‘A Wutlhari Gi Kombisa A Kululama Ka Gona Hi Mitiro Ya Gona’
1. Xana a ntiro wa hina wu woniswa kuyini hi vokari?
1 Ka zikhati zo kari ha tshuka hi hlamuliwa hi ndlela ya hava hi venyi va miti lava va nga hi zwisisiko kutani ku ngha va byelilwe a mahungu yo biha xungetano hi Timboni ta Jehova. Kuzilava a mawonela yabye ma kucetelwe hi mibiko ya zihaxa-mahungu yi wulawulako za hava ha hina. Ka matshamu yo kari hi woniwa kota “lihunzu li nga ni mhango.” Hi fanele ku mahisa kuyini loku hi yimisana ni kukanetwa loko?
2. Xini xi to hi vuna a ku nga mbheli ntamu loku hi yimisana ni kukanetwa?
2 Simama A Kuva Ni Mawonela Ma Nene: Jesu ni malanza manwani ya Nungungulu ya zana ga malembe go sangula a kutala ka zikhati va wa nga zwisisiwi niku va wa nga woniwi khwatsi. (Miti. 28:22) Kanilezi a va vumelangi lezaku a kukanetwa ku va wisa tingana hi kota ya wutireli gabye. Jesu i te ngalo: ‘A wutlhari gi kombisa a kululama ka gona hi mitiro ya gona.’ (Mat. 11:18, 19) I lo simama ku maha a kuranza ka Dadani wakwe hi kuchivirika, na a tiyiseka lezaku a lisima la mahungu yo saseka li wa ta woneka ka lava hakunene va hlotako a zinene. Ha zi kota ku potsa a kumbhela ntamu hi ku alakanya lezaku hambu a N’wana wa Nungungulu i yimisene ni zilo zo fana ni lezi.
3. Hikuyini a mibiko yo biha ni kukanetwa zi nga faneliko ku hi hlamalisa?
3 Jesu i kombile lezaku a tiko gi wa ta venga a valanzeli vakwe khwatsi hi lezi gi mu vengileko. (Joh. 15:18-20) Hikwalaho, a mibiko yo biha ni kukanetwa a zi faneli ku hi hlamalisa. Hi lisine, hi fanele ku rinzela lezaku a zilo lezo ziya zi anza a xikhati lexi hi nghenako hi hloko masikwini yo gumesa ni xikhati lexi a zanga ya Satani yi yako yi vindluka nguvu. (Kuv. 12:12) Ha zi kota ku tsaka hi kota ya xikombiso lexi xa ku a tiko ga Satani ga mbhelelwa hi xikhati.
4. Loku hi nga amukelwi hi ndlela yi nene, xana hi fanele ku hlamulisa kuyini?
4 Hlamula Hi Tipswalo: Loku hi nga amukelwi hi ndlela yi nene, xikhati xontlhe hi fanele ku hlamula hi tipswalo ni kuolova. (Mav. 15:1; Kol. 4:5, 6) Loku a xiyimo xi vumelela, hi nga ha tlhamusela a nwinyi wa muti loyi hakunene a lavako ku tiva xigelo lezaku ku na ni mahungu yo tala ya hava xungetano hi Timboni ta Jehova kutani ku mu wutisa ku ngalo hikuyini a ti zwisako lezo ke. A hlamulo wa hina wo olova wu nga ha mu maha a wutisa xo kari hi lezi a zi zwileko xungetano hi Timboni ta Jehova a tlhela a demba ndleve ka khati go lanzela a to enzelwa hi Mboni. Kanilezi, loku a nwinyi wa muti a zangarile nguvu, zi ngava chukwana a ku suka hi ndlela yi nene. Ha zi kota ku tiyiseka lezaku na ku nga khataliseki lezi a vanwani va hi wonisako zona, Jehova wa nyika lisima a wutireli ga hina. — Isa. 52:7.