Papilo ga Hubye yi Fumako

Timboni-kulori ta Jehova ti Ranzekako:

A hi kutsakisa ka xikhati lexi hi hanyako ka xona! Hakunene ha tsaka hi ku tira “hi mbilu yinwe” na nwina vamakabye va ranzekako, hi nyika wukustumunyu ga hombe go hunza ga zikhati zontlhe ka Jehova, a Nungungulu wa hina wa le tilweni. — Zef. 3:9; Joh. 14:12.

A kuva ni litsako ntirweni wa hina ka Jehova a zi wuli ku ngalo a hi na zikarato za hombe. Ka lembe ga ntiro gi hunzileko, a vokari xikari ka nwina va yimisene ni ziyimo zo nonoha hi kota ya kutsekatseka ka misava, mintalo ya mati, zingulu ni timhango tinwani ta ntumbuluko ti vangako kuxaniseka. (Mat. 24:7) A votala va pfinyana ni mababyi ni kukhosahala siku ni siku, ku nga zilo zi tshovako marambu. Hontlheni hi boheka ku lwisana ni “kuxaniseka” ku yako mahlweni ku engeteleka. (Mat. 24:8) Matikweni yo hlaya, a ku patsa ni Arménia, Coreia do Sul ni Eritreia, a vamakabye va hina vo tala va valelwe hi kota ya kukholwa kabye. — Mat. 24:9.

Xini xi hi vunako a ku simama ni mawonela ma nene hambu lezi hi yimisanako ni zikarato lezi? A mutsalo wa lembe wa 2010 wa hi alakanyisa a xinwe xa zigelo za lisima: ‘A liranzo li timisela zilo zontlhe. A liranzo cima li nga ta fuva.’ (1 Kor. 13:7, 8) Ina, a ku ranzana — zinwe ni ku ranza Jehova — za hi tiyisa lezaku hi timisela hi nga rereki.

A votala va ti wulako maKristu va hlamala hi ku wona a kuanza ni ku simama ka ntiro wa hina wa kuxumayela. Hambu lezi kuzilava va nga ha alako lezi hi zi kholwako ni tigonzo ta hina, a vokari vaza va kurumeteka ku wula lezi, “A ntiro lowu mu wu mahako hi wona lowu hinawu hi nga fanele ku wu maha!” Xini xi vunako a Timboni ta Jehova lezaku ti simama ku xumayela siku ni siku? Laha kambe a hlamulo liranzo. A ku fana ni Dadani wa hina wa le tilweni, a hi ranzi lezaku ni munwe a lova. (2 Ped. 3:9) A kuxuva ka hina ka lezaku vontlhe va hunzuluka ku woneka ka ntsengo wuswa wo hunza yontlhe wa 7.508.050 wa vahuweleli va bikileko ka lembe ga ntiro gi hunzileko. Hi yihi a yinwani hlengeletano ya wukhongeli yi nga ni vatiri vo tala vo kota lava, va hlengelako hi kuhiseka ntirweni lowu wa liranzo, va ti nyikelako hi kuziranza kasi ku vuna vanwani hi tlhelo ga moya?

Ha tiyiswa hlana hi ku wona a kutatiseka ka xiprofeto xi tsalilweko hi Isaya: “A masikwini yo gumesa a xitsunga xa yindlu ya ka Jehova xi ta yimiswa le xixungweni xa zitsunga, yi tlakusiwa hehla ka zitsunga zinwani; wontlhe matiko ma taya kona.” (Isa. 2:2-4) Xikari ka xidlemo lexo xa kulela ga cima xi khitikanelako ndlwini ya Jehova, ku na ni 294.368 va bapatizilweko ka lembe ga ntiro gi hunzileko. Ha va hoyozela a vamakabye lava va lisima hlengeletanweni ya hina. Ngha a liranzo la hina la wuKristu li hi kuca a ku simama hi va vuna a ku vika a kuvukela ka nala wa hina Satani Diabolus. — 1 Ped. 5:8, 9.

A ntsengo wa hombe wa ku hunza wa zikhati zontlhe wa 18.706.895 wa vanhu va vileko kona Xialakanyisweni hi wa Wumbiri, 30 ka Março wa 2010, wu komba lezaku ka ha hi ni vanhu va timiliyoni lava zi kotekako ku va ti patsa na hina va khozela Jehova. Hakunene ha tsaka nguvu hi lezi Jehova a kalako a nga se lovisa a mafambisela lawa ya kubiha ya zilo! Na ha ha rinzela lezo, a liranzo la hina hi lona li hi vunako a ku simama hi timisela. — 2 Tes. 3:5.

A Migotsovanyano ya Muganga “Tshama Kusuhani Na Jehova!,” leyi a kutala ka yona yi mahilweko hi 2010 misaveni yontlhe, yi tiyisile a kuzwanana ka hina na Jehova, a Dadani wa hina wa le tilweni. Hakunene a magezu lawa ya mutsali wa tisimu ma wula lisine: “Va katekile a vanhu lava Jehova a nga Nungungulu wabye.” (Tis. 144:15) Ha tiyiseka lezaku loku hi tshama kusuhani na Jehova a hi na xigelo xa ku chava nchumu, hambu loku manziko ku humelela yini. (Tis. 23:4) Lokuloku Jehova, hi ku tirisa a N’wana wakwe, i ta “mbhetisa a mitiro ya Satani.” (1 Joh. 3:8) Hakunene hi langutela a siku lego hi mahlo yo pswhuka! Kanilezi na ha ha rinzela lezo, hi na ni ntiro wa hombe hi faneleko ku wu maha. — 1 Kor. 15:58.

Tiyisekani lezaku xontlhe xikhati ‘a hi tsiki’ ku mu kumbuka mikhongelweni ya hina. (Rom. 1:9) Ngha mu ti “hlayisa liranzweni la Nungungulu, na mu cuwukela a wuxinji ga Hosi ya hina Jesu Kristu legi gi yisako kuhanyeni ka pinzukelwa.” — Juda 21.

Ha mu ranza nguvu!

Vamakabye va nwina,

Hubye yi Fumako ya Timboni ta Jehova