Hi 2 Ka Abril Hi Ta Sangula Ku Nyikela A Zirambo Za Xialakanyiso
1. Hi rini hi to nyikela a zirambo za Xialakanyiso xa lembe legi, niku hi lihi a lisima la tsima legi ga lembe ni lembe?
1 Kusukela 2 ka Abril kala 17 ka Abril, hi ta nyikela a zirambo za ximaho xa hombe ka zontlhe za lembe — ku nga Xialakanyiso xa kufa ka Kristu. Xikhatini xi hunzileko, a vanhu vo tala va tsakelako va hlamulile khwatsi a tsima legi ga lembe ni lembe. Hi xikombiso, ka siku ga Xialakanyiso, a wasati wo kari i lo fonela a hofisa ya ravi zonake aku: “Zalezo nzi nga chikela kaya, nzi lo wona a xirambo xi nga vekilwe hasi ka livati la mina. Nza zi lava ku famba kanilezi a nzi xi tivi xikhati xa kona.” A makabye i lo mu tlhamusela laha ku nga ni mahungu lawa laha ka xirambo. A wasati loye i lo gumesa a bhulo gakwe hi ku tsumbisa aku, “Nziya kona wusiku legi!”
2. Hi nga wula yini a xikhati lexi hi nyikelako a xirambo?
2 Lezi Hi To Mahisa Zona: Kota lezi hi nga ni xikhati xi tsongwani kasi ku tlhanganyisa a xipanze xa hina, i chukwana hi komisa bhulo. Hi nga ha wula lezi: “Gi cile. Hi navela ku nyika a ngango wa nwina a xirambo lexi xa ximaho xa lisima xa lembe ni lembe xi to mahiwa misaveni yontlhe hi Sonto, 17 ka Abril. [Nyika xirambo a nwinyi wa muti.] Lego i siku ga xialakanyiso xa lembe ni lembe xa kufa ka Jesu. Ku ta vekiwa kanelo wu seketelwako ka Biblia, lowu wu tlhamuselako lezi hi nga vunekisako zona hi nzhiho wa Kristu. A xirambo lexi xi komba a wutshamu ni xikhati lexi a mutlhangano lowo wu to mahiwa hi xona lomu xipanzeni xa hina.”
3. Xana hi nga rambisa kuyini a vanhu vo tala hi laha zi kotekako hi kona?
3 Loku a bandla ga nwina gi hi ni xipanze xa hombe, a madota ma nga ha mu byela lezaku mu siya a zirambo mitini yi nga hiko na vanhu. U nga rivali ku ramba lava u talako ku va enzela, maxaka, vatiri-kuloni, zigonzani-kuloni, ni vanwani u tivanako navo. A xikhati lexi u nyikelako zirambo kumbheleni ka viki, u nga rivali ku nyikela a marevista loku zi fanela. Xana u ngava phayona go vunetela hi Abril kasi u tira nguvu tsimeni legi go tsakisa?
4. Hikuyini hi lavako lezaku a vanhu va tsakelako vata Xialakanyisweni?
4 Hakunene a vanhu lava va tsakelako va tova kona va ta amukela a wukustumunyu ga ntamu! Va tazwa mahungu xungetano hi liranzo la hombe la Jehova leli a li kombisileko hi ku nyikela a nzhiho. (Joh. 3:16) Va ta gonza lezi a Mufumo wa Nungungulu wu to vunisa zona vanhu. (Luka 22:29) Va ta tlhela va kuciwa a ku wulawula ni vakombeteli lezaku va kombela xigonzo xa Biblia kasi va gonza zo tala. Hi khongelela lezaku a vanhu vo tala va timbilu ti nene va vumela a xirambo va tlhela va tava zinwe na hina Xialakanyisweni!