U Nga Kanakani A Ku Nyika Wukustumunyu
1. Zini zi lavako kutiya-hlana, niku hikuyini?
1 Xana wa tshuka u kanakana a ku nyika wukustumunyu xikoleni hi ku chava ku tseketselwa? Hi lisine, zi lava kutiya-hlana lezaku u yimela a zinene xikari ka vanhu, nguvunguvu loku u hi munhu wo miyela. Zini zi to ku vuna?
2. Hi nga kombisisa kuyini wutlhari loku hi nyika wukustumunyu xikoleni?
2 Tirisa Wutlhari: Hambu lezi a xikola xi zi kotako ku woniwa kota xipanze xa wena xa kuxumayela, alakanya lezaku a wu kurumeteki ku xumayela a munhu wihi ni wihi a ku fana ni lezi u nga wa ta zi maha loku u xumayela hi muti-ni-muti. Tirisa wutlhari kasi ku tiva a xikhati xa ku wulawula. (Mutsh. 3:1, 7) A mhaka leyi mu wulawulako hi yona ka aula go kari kutani ka T.P.C. yi nga ha ku nyika lungelo ga ku xumayela. Kutani a xigonzani-kuloni xi nga ha ku wutisa a xigelo xa kuva u nga hlengeli ka mitiro yo kari. A maKristu yo kari ma tivisa a vagonzisi va wona kusanguleni ka lembe lezaku Timboni ta Jehova ma tlhela ma va nyika mabhuku ma tlhamuselako lezi hi zi kholwako. A manwani ma veka a mabhuku hehla ka tikarteira ta wona lezaku a zigonzani-kulobye zi maha ziwutiso.
3. U nga ti longiselisa kuyini lezaku u nyika wukustumunyu xikoleni?
3 Tshama Na U Longile: Loku u ti longisela, a kutiya ka wena ku ta engetela. (1 Ped. 3:15) Hikwalaho, ringa ku alakanyela a ziwutiso lezi va nga ha ku mahako, u tlhela u wona tindlela ta ku zi hlamula. (Mav. 15:28) Loku zi koteka, tshama na u hi ni Biblia ga wena zinwe ni mabhuku yo kari, yo kota a Raciocínios, Os Jovens Perguntam, ni manwani ma wulawulako hi kuvanga, lezaku u ma tirisa kota xiseketelo loku zi laveka. Kombela vapswali va wena lezaku mu vuxeta a manyikela ya wukustumunyu wukhozelini ga ngango.
4. Hikuyini u faneleko ku simama a ku nyika wukustumunyu xikoleni?
4 Ngha Uva Ni Mawonela Ma Nene: U nga alakanyi lezaku a zigonzani-kuloni zi ta ku tseketsela a xikhati xontlhe u to zi bhulela hi zinene. Za koteka a ku a zigonzani zo kari zi ku hlamala hi kota ya kutiya-hlana ka wena zonake zi kuceka a ku ingisela. Kanilezi u nga mbheli ntamu loku ku nga humeleli ni munwe a kombisako kutsakela. Jehova i ta tsaka hi lezi u zamileko. (Maheb. 13:15, 16) Simama ku mu kombela lezaku a ku vuna a ku ‘kanela a mhaka hi kutiya kontlhe.’ (Miti. 4:29; 2 Tim. 1:7, 8) Hakunene u ta tsaka nguvu loku a wokari a ku ingisa! Niku za koteka lezaku a munhu loye a gumesa hi ku maha nanza-kulori ga Jehova!