Asia ni Oriente Médio — A mahungu lawa ma susilwe ka Anuário das Testemunhas de Jeová de 2014

Xivuno ka wanuna wa xikhumu, xiwiri, na a nga wulawuli

Phajina 59 nzimana 1, kala phajina 62 nzimana 1

Hi 1999, a bandla ga lirimi la mawoko le Kobe, Japani, gi lo bikelwa lezaku ku na ni wanuna wa xiwiri waku hi Hirofumi. Laha a makabye wo kari a nga zama ku mu enzela, a mamani wa Hirofumi i lo ala ku mu tsika a wonana naye. A makabye loyi i lo famba hi kuphindaphinda aya khongotela a mamani wa Hirofumi, niku hi magumo i lota naye laha nyangweni. A misisi yakwe ni malevu zi wa lehile niku zi wa nga hlayisekangi. I wa ku khwatsi munhu a tsikilweko lomu khwatini hi makume ya malembe. A nghohe yakwe yi wa nga kombisi nchumu. Hirofumi i wa nga hi xiwiri basi, kanilezi i wa hi xikhumu kambe. A makabye loyi i lo vumala ni xo maha kanilezi i lo guma a khoma mawoko ya Hirofumi, a sangula ku wulawula hi mawoko. Kanilezi Hirofumi i wa nga kombi ni ku khwatsi zi kona zi mahekako. I wa hi ni khume ga malembe na a nga bhuli ni munhu kusukela loku a file matihlo na a hi ni 31 wa malembe.

Anzhako ka masiku mambiri, a makabye loyi i lo tlhela kambe. A mamani wa Hirofumi i lo hlamala hakuva i wa alakanya lezaku a makabye loyi i wa nga ta hata anzhako ka loku a wonile a xiyimo xa n’wana wakwe. A makabye loye i lo mu khongotela kambe lezaku a mu tsika a wonana na Hirofumi, hikwalaho i lo mu neha laha nyangweni. Anzhako ka hweti na a mu enzela, kanilezi Hirofumi na a simama a nga kombi ku khwatsi xi kona a xi zwako, a mamani wakwe i lo byela makabye loye lezaku a nga hati. Hambulezo, a makabye loyi i lo simama ata. I wa mu tela ni tibholo a tlhela a maha zontlhe a zi kotako kasi ku kombisa lezaku wa khatala hi yena. Anzhako ka tihweti timbiri na za ha tshamisile zezo, a makabye loyi i lo zi wonisa ku khwatsi i nyuko wa mbyana.

A makabye loyi i lo boha ku mu enzela khati go gumesa. Na a nga se famba, i lo khongela ka Jehova a kombela xivuno kasi ku boha lezaku i fanele ku simama ku enzela Hirofumi ke. A xikhati lexi a nga chikela, i lo khoma mawoko ya Hirofumi a sangula ku mu byela hi mawoko lezaku ku na ni Nungungulu a vitwako Jehova loyi a zi wonako zontlhe lezi zi mu humelelako na hi le tilweni a tlhela a zwisisa a kuxaniseka kakwe ku hunza ni wihi munhu. I lo mu byela lezaku Jehova wa khatala hi yena niku i lava ku mu tlhatlhisa ka zikarato zakwe. Hi xalexo xigelo xa kuva a rumile Timboni takwe lezaku ti mu enzela. Kusanguleni, Hirofumi a nga kombangi ku khwatsi xi kona a xi zwileko; kanilezi i lo guma a khoma woko ga makabye loyi, a gi khoma zi tiya, a tlhela a dona hloti. Hi ku khumbiwa hi lezo, a makabye loyi i lo xililika mihloti na yenawu. Ku lo sangula xigonzo xa Biblia.

Anzhako ka 11 wa malembe na va gonza, Hirofumi i lo sangula ku ti tlhanganisa ni bandla ga lomu ka xipanze xakwe wutshanwini ga ku famba pfhuka wo leha na aya ka bandla ga lirimi la mawoko a ku khwatsi hi lezi a nga ta na a maha. A ku na munhu a nga tiva lirimi la mawoko bandleni lego, kanilezi ka 18 wa tihweti leti ti nga lanzela, a 22 wa vamakabye va xinuna ni va xisati va lo gonza lirimi la mawoko kasi ku vuna Hirofumi. Hi Janeiro wa 2012, Hirofumi i lo maha xipanze xakwe xo sangula ka Xikola xa Wutireli ga Nungungulu, na ku hi ni munhu a nga tlhamusela lezi Hirofumi a nga wula hi mawoko. Hi Outubro wa lembe galego, i lo maha muhuweleli a nga bapatizwangiko.

Asia ni Oriente Médio

“Nzi na ni 30 wa malembe na nzi gi lavetela!”

Phajina 67 nzimana 2

Agnes, a nga murumiwa le Indonésia, i wa tolovela ku nyika wukustumunyu ka wasati a nga hi ni nyimba. A wasati loye i wa xavisa matsawu ni mihanzu bazarini. I wa zi ranza ku gonza marevista ya hina niku i wa ma ranza mabhulo ya Biblia loku a nga khomekangi nguvu. Ka siku go kari, Agnes i loya bazarini kasi ku ya bhula ni wasati loye, kanilezi i wa nga hi kona. A nuna wakwe i lo byela Agnes lezaku a sati wakwe i phulukile. Agnes i lo boha ku mu enzela. I lo mu tela ni Bhuku Ga Mina Ga Mahungu Ya Biblia na gi fumbelwe kota xinyikiwo. A wasati loye i lo tsaka, na a hlamala hi kuva Agnes a tile ku ta mu wona ni xihlangana xakwe, kanilezi i lo hlamala nguvu kambe a xikhati lexi Agnes a nga mu nyika a xinyikiwo lexi a tileko naxo. A wasati loye i lo tlhatlha bhuku lego, a gi cuwuka na a nga kholwi, aku: “U gi kumile kwihi bhuku legi? Nzi na ni 30 wa malembe na nzi gi lavetela! Nzi yile ka zitolo zontlhe za ku xavisa mabhuku nzi tlhela nzi wutisela vontlhe. A nga kona a nga hi nago, a nga kona a nga gi tiva, niku a ku na bhuku ginwani gi nga fana nago.” A xikhati lexi a wasati loye a nga ha hi nwanana, a tio wakwe i wa hi nago bhuku legi ga Mahungu ya Biblia, niku a wasati loye i wa gi ranza ku lera. Zalezi i kari a gi lera kambe, niku a nhanyana wakwe wa nhonzo wa gi ranzawu ku lera. Agnes i lo sangula xigonzo xa Biblia navo hi wumbiri gabye.