Simama ku kula kota mutireli
1. Zikombiso muni za zana ga malembe go sangula zi kombako lezaku hi fanele ku simama hi kula kota vatireli?
1 A maKristu ma fanele ku kula kota vatireli. Jesu i nyikile valanzeli vakwe a gonziselelo leyi yi nga wa ta va vuna ku engetela a wutlhari gabye ga ku xumayela. (Luka 9:1-5; 10:1-11) Hi xalexo xigelo xi nga maha Akwila na Prisila va teka Apolosi “va ya mu tlhamusela khwatsi a ndlela ya Nungungulu.” (Miti. 18:24-26) Hi xigelo xalexo kambe, Paule i lo kuca muvangeli wo buva Timote lezaku a simama ku pinyama kugonziseni kakwe kasi a kukula kakwe ku “woneka ka vanhu vontlhe.” (1 Tim. 4:13-15) Kani hi vaswa kani hi va kale na hi tirela Hosi kota vahuweleli va mahungu yo saseka, hi fanele ku simama hi chukwatisa wutlhari ga hina go xumayela.
2. Hi nga gonzisa kuyini ka vanwani?
2 Gonza ka vanwani: A yinwe ya tindlela ta ku engetela a wutlhari ga hina ku gonza ka vanwani. (Mav. 27:17) Hikwalaho, demba ndleve a xikhati lexi a vahuweleli-kuloni va mahako zingheniso zabye. Kombela mawonela yo kongoma ka vahuweleli va humelelako wutirelini, u tlhela u demba khwatsi ndleve ka lezi va to ku byela. (Mav. 1:5) Wa karateka hi lezi u nga mahisako zona a maenzo yo wuyela, ku sangula xigonzo xa Biblia kutani tshamela ginwani ga wutireli? Kombela xivuno ka muwoneleli wa ntlawa wa wena kutani muhuweleli munwani wo buva. Alakanya kambe lezaku a moya wa ku basa wa Jehova wu nga engetela a wutlhari ga hina, hikwalaho wu kombele hi kukhanzakanya. — Luka 11:13.
3. Hi fanele ku ti zwisa kuyini loku hi nyikwa mawonela, kuzilava na hi nga kombelangi ke?
3 U nga kwati loku u nyikwa mawonela ya kuchukwatisa, hambu loku u nga kombelangi. (Mutsh. 7:9) A ku fana na Apolosi, vumela xivuno lexo hi kutikoramisa ni kubonga. Lexo xi tava xikombiso xa wutlhari. — Mav. 12:15.
4. Xigelo muni xa ntamu lexi Jesu a nyikileko xa kuva hi kula kota vavangeli ke?
4 A kukula ku neha wudzunzo ka Nungungulu: Hi ku tirisa mufananiso, Jesu i lo kuca valanzeli vakwe lezaku va kula kota vatireli. I lo ti fananisa ni vina; a fananisa valanzeli vakwe va totilweko ni maravi ya kona. I lo wula lezaku Dadani i thena ravi ginwe ni ginwani “kasi gi fela ku pswala hi kuhunzeleleko.” (Joh. 15:2) A ku fana ni lezi a nwinyi wa xivina a xuvako lezaku a maravi ya mivina yakwe ma pswala nguvu, Jehova i lava lezaku hi simama ku engetela wutlhari ga hina kasi ku humesa “mbhanzo wa milomu” ya hina. (Maheb. 13:15) Hi gihi a wuyelo go tsakisa gi nga kona loku hi kula kota vavangeli ke? Jesu wa hlamula aku: “Dadani wa mina wa dumiswa hi lezi, lezaku mu pswala mihanzu yo tala.” — Joh. 15:8.