Ngha Uva Mutireli A Yako Mahlweni
1 A Dadani wa hina wa le tilweni wa tsaka loku a malanza yakwe ma kula hi tlhelo ga moya. Lezo zi patsa kuya mahlweni kota mutireli a buvileko ni wo humelela wa mahungu yo saseka. Paule i kucile muwoneleli Timote lezaku a pinyama kasi a ‘kuya mahlweni kakwe ku woneka.’ (1 Tim. 4:13-15) Hina hontlhe hi fanele ku ti karatela ku chukwatisa a wutireli ga hina, hambu lava xikari ka hina va nga vahuweleli va buvileko.
2 Ti Vekele Makungo: Lezaku hiya mahlweni, hi fanele ku ti vekela makungo. Hi wahi a makungo yo kari lawa hi nga ha ti vekelako? Hi nga ti karatela ku yi tirisa khwatsi a supado ya hina ya moya, a Biblia. (Efe. 6:17) Kuzilava ku na ni ndlela yo kari yo xumayela leyi hi faneleko ku yi chukwatisa, yo kota ku nyika wukustumunyu lomu maruweni, ku nyika wukustumunyu hi telefone, kutani ku nyika wukustumunyu lomu mabazarini ni lomu zitolo. Ginwani ga masiku hi nga ti karatela ku maha maenzo yo wuyela hi ndlela yo humelela. A kungo ginwani ga gi nene nguvu ku nga hava ku chukwatisa a wuzikoti ga hina ga ku sangula ni ku fambisa a zigonzo za Biblia.
3 Zivuno: A mitlhangano ya bandla, nguvunguvu a Xikola xa Wutireli ga Nungungulu ni Mutlhangano wa Ntiro, yi mahelwe ku hi vuna lezaku hi kula kota vatireli. Loku hi ti karatela nguvu a ku longisela hi tlhela hiva kona ka mitlhangano leyo, ni ku tirisa a mawonela lawa hi nyikiwako wona, hakunene hi ta kuma a mabhinzu yo tala. — 2 Kor. 9:6.
4 Hi fanele kambe ku vunana a kuya mahlweni. (Mav. 27:17) A ku ingisela khwatsi a zingheniso za lava hi tirako navo wutirelini zi ta hi vuna a kuya mahlweni. Hi kuengetela, a muwoneleli wa hina wa xigonzo xa bhuku a nga ha maha malulamiselo ya lezaku hi nyikwa xivuno. Hakunene xikatekiso xa hombe a kuva ni phayona gi buvileko kutani muhuweleli munwani lezaku a hi vuna a ku humelela hi tlhela hi kuma litsako wutirelini! Xana ku na ni muhuweleli wa muswa laha ka ntlawa wa hina wa xigonzo xa bhuku? Kuzilava hi nga sangula hi hina hi mu ramba lezaku hi tira naye.
5 A wutireli ga wuKristu hi wona a ntiro wa lisima ka yontlhe leyi yi mahiwako inyamutlha. A xikhati lexi hi nyikako Jehova a ‘muphahlo wa hina wa kubonga,’ hi lava ku mu nyika a wuchukwana ga hina. (Maheb. 13:15) Loku hi ti karatela a kuya mahlweni wutirelini , hi tava zitiri ‘zi nga hiko na tingana, lezi zi avelako a mhaka ya zinene hi kululama.’ — 2 Tim. 2:15.