Va lo ti hendleleta hi kuziranza — le Nova York

MALEMBANYANA nzhako, Cesar ni sati wakwe Rocio, va wa hanya wutomi ga kutshamiseka le Califórnia, laha Cesar a nga tira viki gontlhe ka koponi ya michini ya ku kufumeta, ku buvetela moya wu nene, ni ya ku titimeta lomu ndlwini. Va wa hi ni muti wa vona wutsumbu, niku va wa nga hi na vana. Kanilezi ku lo humelela nchumu wu nga cica wutomi gabye. Xini?

Hi Outubro wa 2009, a hofisa ya ravi ya Estados Unidos yi lo rumela papilo mabandleni wontlhe ya tiko lego, na yi ramba vamakabye va kuziranza lava va nga ni wutlhari go kari lezaku va tatisa xikombelo xa ntiro wa Beteli wa xikhatanyana kasi ku ya vunetela kuanziseni ka tiyindlu ta ravi ga le Wallkill, Nova York. Hambu lava va nga hunzile a tanga ya tolovelo ya ku nghena ntirweni wa Beteli va wa rambiwa ku maha lezo. Cesar na Rocio ve ngalo: “Hi kota ya tanga ya hina, hi wa zi tiva lezaku hi wa nga ta tshuka hi kuma lungelo ginwani ga ku tira Beteli. Hi wa nga lavi ku gi luza!” Va lo tekela ku rumela zikombelo zabye.

Cesar na Rocio va lo mbheta lembe ni ku hunza na va nga se rambiwa Beteli. Hambulezo, va lo teka mazambo manwani kasi ku tatisa mixuvo yabye hi ku olovisa wutomi gabye. Cesar i ngalo: “Hi lo cica a garaji ga hina giva yindlwana yo hanya kona kasi a muti wa hina hi wu lugarisa ka munwani. Hi kulanzela hi lo rura ka prediyu ga hina ga 7 wa tikwaruto, hiya ka yindlwana ya hina ya laha garaji. Yi wa hi yindlu hi nga yi xuva wutomini ga hina gontlhe niku hi wova ni malembe matsongwani ntsena na hi yi akile, hambulezo a kucica loko ku wa hi veka ka xiyimo xi nene xa kuva hi vumela a xirambo xa Beteli, loku xi tshuka xita.” Makunu zini zi nga humela? Rocio i ngalo: “Anzhako ka hweti yinwe na hi rurile hiya ka yindlwana ya hina, hi lo amukela xirambo xa kuva vatiri va kuziranza va xikhatanyana le Wallkill. Zi lo dlunyateka ka hina lezaku hi ku olovisa wutomi, hi wa mu nyikile nchumu Jehova lezaku a wu katekisa.”

A MOYA WABYE WA KUZIRANZA WA KATEKISWA

A ku fana na Cesar na Rocio, a mazanazana ya vamakabye va xinuna ni va xisati va ti karata kasi ku vunetela ntirweni wa kuaka lowu wu mahiwako le Nova York. A kutala kabye va seketela a kuengetelwa ka miako ya Wallkill, kasi a vanwani va kuma lungelo ga ku vunetela kuakeni ka tsinza ga misava yontlhe le Warwick.a A mipatswa yo tala yi tsika miti ya yona ya yi nene, mitiro ya yi nene, hambu ni zihari lezi va zi ranzako kasi ku tirela Jehova hi ndlela yo engeteleka. Xana Jehova wa katekisa a moya lowo wa kutikarata ke? Ina, wa wu katekisa!

Hi xikombiso, Way, a nga mufaseli wa magezi, na Debra, lava vontlhe va nga kusuhani ni 60 wa malembe, va xavisile muti wabye ni zibya zo tala le Kansas, va rura vaya Wallkill kasi ku ya maha vatiri va Beteli va sukelako kaya.b Hambu lezi a ku maha lezo zi nga lava kuva va cica zokari wutomini gabye, va ma wona mabhinzu ya kuva va mahile kutikarata loko. Xungetano hi xiavelo xakwe laha Beteli, Debra i ngalo: “Nza tshuka nzi ti zwisa ku khwatsi nzi lomu kuakeni ka le Paradiseni loku ku kombisiwako lomu ka mabhuku ya hina!”

Melvin na Sharon va lo xavisa muti wabye ni zibya le Carolina do Sul kasi ku ya vunetela le Warwick. Hambu lezi a kutikarata loko ku nga kala ku va hehukela, a patswa lowu wu zi wona kota lungelo a ku patseka ntirweni lowo wa hombe matinwini ya hina. Ve ngalo: “A litsako li tako hi ku tiva lezaku u maha nchumu wu to vuna hlengeletano ya hina ya misava yontlhe la hombe nguvu.”

Kenneth, a nga muaki wa tiyindlu a kumileko peceni, na Maureen, va nga kwalomo ka 55 wa malembe, va rurile le California kasi ku ya tira le Warwick. Kasi va rura, va lo kombela makabye wo kari wa xisati lomu bandleni gabye lezaku a khatalela muti wabye va tlhela va kombela maxaka yabye lezaku ma hlayisa papai wa Ken a khosaheleko. Xana va ti laya hi lezi va ti karatileko hi ndlela leyo kasi va ya tira Beteli? Ahihi! Ken i ngalo: “Ha vuneka nguvu. Zi wula lezaku a hi kumani ni zikarato? Ahihi, hambulezo hi hanya wutomi go tsakisa nguvu niku hi kuca vanwani hi mbilu yontlhe lezaku va nghenela ntiro lowu.”

VA HLULA ZIKARATO

A kutala ka lava va ti hendleletileko ka mitiro leyo va lwisene ni zikarato. Hi xikombiso, William na Sandra, va nga kwalomo ka 60 wa malembe, va wa kumile peceni, niku va wa kari va ti phina hi wutomi le Pensilvânia. Va wa hi ni koponi yo humelela ya ku maha tipesa ta michini leyi yi nga hi ni 17 wa vatiri. Va wa ha hi ka bandla galegi va nga hi ka gona kusukela wunwananeni gabye niku a kutala ka maxaka yabye va wa hanya ka xipanze xalexo. Hikwalaho a xikhati lexi ku nga humelela lungelo ga ku ya seketela ntiro wa Wallkill na va sukela kaya, va wa zi tiva lezaku lezo zi ta lava ku va siya vanghana ni maxaka ni zontlhe lezi va nga zi tolovele. William i ngalo: “Handle ko kanakana, a xikarato xa hombe ka zontlhe kuve ku tsika a wutshamu ga hina ga gi nene.” Hambulezo, anzhako ka ku khongela nguvu hi mhaka leyi, va lo boha ku rura hakunene — niku a va ti layi hi zona. William i tlhela aku: “A litsako la ku tirisana hi laha kusuhani ni ngango wa Beteli a li na ku ecanyiswa ni nchumu wunwani. Mina na Sandra hi na ni litsako la hombe laku hi wa nga se tshuka hiva nalo!”

Ricky, a nga muwoneleli wa ntiro wa kuaka le Hawaii, i lo rambiwa ku ya tira Beteli na a sukela kaya kasi ku vunetela ka muako wa Warwick. Sati wakwe Kendra i wa lava lezaku a nuna wakwe a vumela xirambo lexo. Hambulezo, va wa hi ni kukarateka ko zwala: ku nga kutshamiseka ka n’wana wabye wa 11 wa malembe, Jacob. Va wa ti wutisa lezaku zi wa tava wutlhari ku rura vaya Nova York ke niku a n’wana wabye i wa ta zi kota ku ti zwananisa ni wutshamu lego go hambana nguvu ke.

Ricky i ngalo: “A xinwe xa zilo zo ranga hi nga zi lava ku wa hi ku kuma bandla gi nga ni vaswa va humelelako hi tlhelo ga moya. Hi wa lava lezaku Jacob ava ni vanghana vo tala va va nene.” Hi lo ya kuma bandla gi nga hi ni vanana va tsongwani nguvu kanilezi na gi hi ni vatiri vo tala va Beteli. I engeta aku: “Anzhako ka mutlhangano wo sangula ka bandla lego, nzi lo wutisa Jacob lezaku i gi wonisa kuyini, nguvunguvu lezi gi nga kala gi nga hi na vanana vo tala va tanga yakwe. I lo nzi byela lezi, ‘U nga karateki papai. A vanghana va mina va tava vatiri va Beteli lava va ha hiko vaswa.’”

Kunene, a majaha lawo ya Beteli ma lo maha wunghana naye. Give gihi wuyelo ga kona? Ricky i ngalo: “Ka wusiku go kari, nzi wa kari nzi hunza hi laha kusuhani ni kwarutu ya n’wana wa mina nzi wona magezi na ma ha vura. Nzi wa ku nzi ta mu kuma na a bela gemi wo kari lomu ka komputadori, kanilezi i wo gonza a Biblia! A xikhati nzi nga mu wutisa ku zini u mahako, Jacob i te ngalo: ‘Nzo tekelela majaha ya Beteli; nzi lava ku lera Biblia hi lembe ginwe.’” A hi zoza hiya hi ku wula lezaku Ricky na Kendra va tele hi litsako, na ku nga hi ntsena hi kota ya lezi Ricky a zi kotako ku seketela a ntiro wa ku aka laha Warwick kanilezi ni kuva a kurura loko ku vunile jaha gabye lezaku gi kula hi tlhelo ga moya. — Mav. 22:6.

A VA KARATEKI HI ZA MANZIKO

A ntiro wa kuaka le Wallkill ni Warwick hi magumo wu ta mbhela, hikwalaho lava va rambilweko ku ya vunetela va zi tiva lezaku a ntiro wabye wa xikhatanyana. Xana a vamakabye lava va karateka ku hunza mpimo hi lomu va toya kutani lezi va to maha ke? Ne ni kutsongwani! A votala va ti zwisa lezi yi ti zwisako zona a mipatswa yimbiri ya Florida yi nga xikari ka 40 kuya ka 60 wa malembe. John, a nga muwoneleli wa ntiro wa kuaka, ni sati wakwe Carmen, lava va vunetelako le Warwick kota vatiri va kuziranza va xikhatanyana, ve ngalo: “Ha zi wona lezi Jehova a khatalelisako zona zilaveko za hina zo kongoma kala makunu. Hi alakanya lezaku Jehova a nga hi tisangi seno ka xikhati lexi kasi ku guma a hi chokola.” (Tis. 119:116) Luis, loyi a mahako zitimela-minzilo, ni sati wakwe Quenia, va tira le Wallkill. Ve ngalo: “Hi sina hi zi wona lezaku a canja ga Jehova ga kuhana ga tatisa a zilaveko za hina za nyama. Hambu lezi hi kalako hi nga zi tivi lezaku i ta mahisa kuyini, rini, kutani kwihi, ha tsumba lezaku Jehova i ta simama ku hi khatalela.” — Tis. 34:10; 37:25.

‘MAKATEKWA YO TLHELA VA VUMALA NI KO CHELA KONA’

A kutala ka lava va vunetelako ntirweni wo aka le Nova York na va zi kumile zigelo za ku nga ti hendleleti. Kanilezi, va lo ringa Jehova — kota lezi a hi rambako ku maha aku: “Mu nzi ringa ha zona, . . . kasi ku wona loku nzi ta kala nzi nga mu vululeli a tinjhanela ta tilo nzi mu chululela a makatekwa yo tlhela mu vumala ni wutshamu go chela kona.” — Mal. 3:10.

Xana wenawu u nga mu ringa Jehova zonake u kuma makatekwa yakwe yo tala ke? Khongela u tlhela u hlola xiyimo xa wena u tiva lezi u nga mahako kasi ku hlengela ntirweni lowu wo tsakisa, ku ngava le Nova York kutani ka mitiro yinwani ya kuaka ya hlengeletano, u wona ha wece lezi Jehova a to ku katekisisa zona. — Mar. 10:29, 30.

Dale, a nga njiniyela wa zitarato ni mabhulaho, na Cathy, va tako hi Alabama, va wu dzunza nguvu ntiro lowu. Va kari va tira hi kuziranza le Wallkill, niku ve ngalo: “Loku u hi nawo a hlana wa ku tsika a kunanziha ka wutshamu legi u nga ka gona, u tava ni lungelo ga ku wona moya wa Jehova na wu tira.” Niku xini xi lavekako kasi ku ti hendleleta? Dale i ngalo: “Olovisa, u olovisa, u tlhela u olovisa kambe a wutomi ga wena. U nga ta tshuka u ti laya!” Gary, wa le Carolina do Norte, i na ni 30 wa malembe na a maha ntiro wa kuaka. Yena ni sati wakwe Maureen ve ngalo a ginwe ga makatekwa va ma kumako le Warwick ku “tivana ni ku tira zinwe ni vamakabye vo tala va va nene lava va hendleletileko wutomi gabye kasi ku tirela Jehova laha Beteli.” Gary i engeta aku: “Kasi ku tira Beteli u fanele ku hanya wutomi go olova, legi gi nga gona ga chukwana tikweni legi.” Jason, a tirako ka koponi ya magezi, na Jennifer, va tako hi Illinois, i ngalo a ku tira kuakeni ka Beteli le Wallkill “xinwe xa zilo zi nga kusuhani nguvu ni wutomi ga misava yiswa.” Jennifer i tlhavinyeta aku: “Zi tsakisa nguvu ku wona lezaku zontlhe lezi u mahako za tsakelwa hi Jehova niku zi seketela a wumanziko legi a hi longiselelako. Jehova i ku chululela makatekwa yakwe u tlhela u vumala ni ko chela.”