Engetela wutlhari ga wena kuchumayeleni — Tsala mapapilo

HIKUYINI ZVI NGA ZVA LISIMA? A bhuku ga 1 Va Le Korinte gin’we ga 14 wa mapapilo gi tsalilweko hi mupostoli Pawule a nga tsala kasi ku tiyisa maKristu-kulori. Loku munhu a tsala papilo i ti nyika cikhati ca ku hlawula khwatsi magezu, lezvi zvi mahako ku loyi a gi amukelako a gi lera hi ku phindaphinda. A mapapilo i ndlela ya yi nene ya ku nyika wukustumunyu ka maxaka ni lava hi tivanako navo. Ma vhuna kambe a ku nyika wukustumunyu ka lava hi kalako hi nga va kumi a ku wulawula navo hi nghohe ni nghohe. Hi cikombiso, kuzvilava a wokari a nga nghana a kombisile kutsakela kanilezvi zvi karata nguvhu ku mu kuma laha kaya. A van’wani zvi nga hi karatela a ku va kuma lomu cipandzeni ca hina hi kota ya lezvi va hanyako ka mimiti leyi yi nga ni maseguransa, yi bhiyilweko yi tlhela yi vhaliwa hi magradhe, kutani hi kota ya lezvi va hanyako kule. Zvini zvi tako ka maalakanyo ya wena loku u alakanya hi ku tsalela van’wani, nguvhunguvhu a vanhu va tako hi ka matiko man’wani?

U NGA ZVI MAHISA KUYINI?

• 

  Tsala lezvi u nga ta nghana u mu byelile loku u wa mu kumile. Ti wule a ku hi wena mani ni leci ci ku mahako u mu tsalela na wa ha sangula ku tsala. Kuzvilava u nga mu tsalela ciwutiso ca ku a ehleketa hi cona u tlhela u mu kongomisa ka saite ya hina. Mu byele ku a nga gondza Bhibhiliya mahala kwalaha kaya kakwe, kutani ku kumbuka a tihloko mhaka ta zvipimo zvokari zva gin’we ga mabhuku ya hina ya ku fambisa ha wona zvigondzo. U nga patsa niku mu nyika a revhista, ciphephana, kartawu ga khero, ni cirambo

• Tsala papilo go koma. Tsala papilo ga ku a n’winyi wa muti a gumesa ku lera na a nga se kolwa. — Wona cikombiso ca papilo

• Gi lere u tlhela u gi hlola lomu u nga phazama matsalela, u gi wona ku ga lereka ke, ga cinghana, a gi khunguvanyise, ni ku ga tsakisa ke.