Timhaka ta mabhuku ma tako ka Cibhukwana ca Mutlhangano
1-7 KA JULHO
TITSHOMBA TI NGA KA MHAKA YA NUNGUNGULU | VA LE KOLOSI 1-4
“Tlhatlhani loyi wa kale mu ambala loyi wa muswa”
(Va Le Kolosi 3:5-9) Hikwalaho, dayani a zviro zva n’wina zva laha misaveni, lezvi zvi pswalako a wubhayi, ni kungahlazveki, ni kunavela ko nyenyeza ka masango, ni kunavela ko biha, ni wunavenave, ku nga ku khozela zvifananiso. 6 A zanga ya Nungungulu yata hehla ka lava va mahako a zvilo lezvi. 7 Hi zvalezvi n’winawu mu nga kari mu hanyisa zvona kale. 8 Kanilezvi, makunu tsikani a zvilo lezvi zvontlhe: A zanga, ni khulo, ni kubiha, ni guwa; ni kurukatela ku nga tshuki ku huma non’wini wa n’wina. 9 Mu nga hembelani. Tlhatlhani a munhu wa kale ni mitiro yakwe,
w11 15/3 10 ¶12-13
Amukela moya wa Nungungulu, na ku nga hi wa tiko
A wumunhu ga mina gi komba yini? (Lera Va Le Kolosi 3:8-10, 13.) A moya wa tiko wu vhuvhumisa mitiro ya nyama. (Gal. 5:19-21) Hi ringiwa nguvhu a ku hi kombisa a moya wa tiko loku a zvilo zvi nga fambi khwatsi. Hi cikombiso, loku a makabye a nga hi cheli kota, ku hi khunguvanyisa hambu hi ku hi wonhela futsi. A ku hundza lezvo, laha ngangweni wa hina zvi nga woneka laha kubaseni a ku i moya muni wu hi rangelako. Kuzvilava zvi nga lava ku hi ti hlola. Ti wutise lezvi: ‘Ka 6 wa tihweti ti hundzileko, ndzi chukwatisile a wumunhu ga mina ga wuKristu kutani ndzi tlhelele ndzhako ka mawulawulela ni mahanyela yo biha?’
A moya wa Nungungulu wu nga hi vhuna ku ‘tlhatlha a munhu wa kale ni mitiro yakwe’ hi ambala “a munhu muswa”, lezvi zvi to hi vhuna kuva vanhu va va nene ni va lirandzo. Hi ti yimisela ku tsetselela van’wani na zvi sukela mbilwini, hambu loku zvi wonekisa ku khwatsi hi na ni cigelo ca ku sola. Hi nga ha hlamuli hi “zanga, ni khulo, ni guwa, ni kurukatela” loku a munhu a hi gohela cokari. Kanilezvi wutshan’wini ga lezvo, hi ti karatela kuva vanhu vo ‘zwela wusiwana’. — Efe. 4:31, 32.
Kela titshomba ta moya
(Va Le Kolosi 1:13, 14) I hi tlhatlhisile ntan’wini wa munyama, a hi yisa mufun’weni wa N’wana wakwe wo randzeka, 14 loyi hi ka yena hi tlhatlhiswako hi hakhelo ya kutlhatlhisa, ku nga ku tsetselelwa a zviwonho zva hina.
it-2169 ¶3-5
Mufumo wa Nungungulu
‘Mufumo wa N’wana wakwe wo randzeka.’ Andzhako ka 10 wa masiku Jesu na a tlhelile tilweni, hi Pentekosta ya 33 Nguveni ya Hina, a vapizani vakwe va no tiyiseka lezvaku i ‘tlakuselwe reveni ga cinene ga Nungungulu’ a cikhati leci Jesu a nga chulula a moya wa ku basa hehla kabye. (Mit 1:8, 9; 2:1-4, 29-33) Hi ndlela leyo, a “civhumelwano ciswa” ci tira kabye, va wumba cipandze-tshinya ca “tiko go basa”, a Izrayeli wa moya. — Mah 12:22-24; 1Pe 2:9, 10; Gal 6:16.
Kristu makunu i wa tshamile reveni ga cinene ga Papayi wakwe niku i wa hi Hloko ya bandla. (Efe 5:23; Mah 1:3; Flp 2:9-11) A Mitsalo yi komba lezvaku kusukela hi Pentekosta ya 33 Nguveni ya Hina, ku yimisilwe mufumo wa moya hehla ka vapizani vakwe. A cikhati leci Pawule a nga tsalela a maKristu ya le Kolosi i kumbukile Jesu Kristu kota loyi makunu a nga hi ni mufumo: “[Nungungulu] i hi tlhatlhisile ntan’wini wa munyama, a hi yisa mufun’weni wa N’wana wakwe wo randzeka.” — Kol 1:13; ringanisa na Mit 17:6, 7.
Kusukela hi Pentekosta ya 33 Nguveni ya Hina, a mufumo wa Kristu mufumo wa moya, wu fumako a Izrayeli wa moya, a maKristu ma pswalilweko hi moya wa Nungungulu lezvaku mava vana va moya va Nungungulu. (Joh 3:3, 5, 6) A cikhati leci a maKristu lawo ma pswalilweko hi moya ma to amukela nchachazelo wabye wa le tilweni, va nga ta hava vafumelwi va laha misaveni va mufumo wa moya wa Kristu, kanilezvi va tava tihosi na Kristu le tilweni.— Kuv 5:9, 10.
(Va Le Kolosi 2:8) Ti woneleni, kasi ku ngavi na munhu a mu phasako hi filozofiya ni kukanganyisa, lezvi zvi nga humiko hi ka Kristu, kanilezvi zvi tako hi ka mikhuwo ya vanhu ni ka zvilo zva tiko.
w08 15/8 28 ¶9
Timhaka-tshinya ta Mapapilo ya Va Le Galatiya, Va Le Efesusi, Va Le Filipi ni Va Le Kolosi
2:8 — Zvini a zvilo zva tiko lezvi Pawule a nga hi tlharihisa ka zvona? Zvilo zva tiko ga Sathani lezvi zvi gi kongomisako. Kutani ku zvilo zva tiko ga Sathani lezvi zvi kucako vanhu. (1 Johani 2:16) A zvilo lezvo zva tiko zvi patsa tifilozofiya, ku randza titshomba, ni wukhongeli ga mawunwa ga tiko legi.
8-14 KA JULHO
TITSHOMBA TI NGA KA MHAKA YA NUNGUNGULU | 1 VA LE TESALONIKA 1-5
“Simamani ku tiyisana ni ku akana”
(1 Va Le Tesalonika 5:11-13) Hikwalaho, simamani ku tiyisana ni ku akana, zvi nga zvalezvi mu mahako. 12 Ha mu kombela vamakabye lezvaku mu kombisa cichavo ka lava va tirako hi kutikarata cikari ka n’wina, lava va mu rangelako Hosini, va tlhela va mu kawuka; mu va dzundza nguvhu ni ku va randza hi kota ya ntiro wabye. Tshamani hi kurula cikari ka n’wina.
w11 15/6 26 ¶12
‘Kombisani cichavo hi lava va tirako hi kutikarata cikari ka n’wina’
12 A ‘ku rangela’ bandla zvi patsa zvotala zva ku hundza ku gondzisa. A gezu legi ga kumeka kambe ka 1 Timote 3:4. Pawule i wulile lezvaku a dhota gi fanele kuva munhu “loyi a rangelako khwatsi a ngango wakwe, a hi ni vana va ingisako hi cichavo contlhe”. A gezu ‘kurangela’ ka mongo lowo, a gi wuli basi a ku gondzisa vana vakwe kanilezvi gi wula ku rangela ngango ni kuva ni vana va “ingisako hi cichavo contlhe”. Kunene, a madhota ma rangela bandla, ma vhuna vontlhe lezvaku va ingisa Jehovha. — 1 Tim. 3:5.
w11 15/6 28 ¶19
‘Kombisani cichavo hi lava va tirako hi kutikarata cikari ka n’wina’
Zvini u nga wa ta maha loku u wo nyikiwa a cinyikiwo leci ci mahelweko wena? U wa ta kombisa a kubonga hi ku ci tirisa? A “vanhu kota zvinyikiwo” malulamiselo lawa Jehovha a ku maheleko hi ku tirisa Jesu. A yin’we ya tindlela u nga kombisako hi yona kubonga hi zvinyikiwo lezvo ku ingisela khwatsi a tikanelo leti ti vekiwako hi madhota u tlhela u zama ku tirisa timhaka leti va gondzisako. U nga kombisa kubonga kambe hi ku nyikela mihlamulo yo zwala mitlhanganweni. Seketela a ntiro lowu wu rangelwako hi madhota, wo kota a ntiro wa kuchumayela. Loku u vhunekile hi wusungukati u nyikilweko hi dhota go kari, hikuyini u nga mu byeliko? A ku hundza lezvo, kombisa kubonga hi mingango ya madhota. Alakanya lezvaku a dhota gi tira nguvhu lomu bandleni hi lezvi a ngango wa gona wu ti tsonako cikhati co tshama nago.
Kela titshomba ta moya
(1 Va Le Tesalonika 4:3-6) Hakuva Nungungulu i randza lezvaku mu basa ni ku tsika wubhayi. 4 A mun’we ni mun’wani wa n’wina i wa tive a ndlela ya ku fumela a miri wakwe kasi wu simama wu basile ni ku dzundzeka, 5 na a nga vhuri hi kunavela ko nyenyeza ka masango, ku nga lezvi va mahako a vamatiko lava va nga mu tiviko Nungungulu. 6 Ku ngavi na munhu a tsemakanyako a mbhingano wa lezvi zvi faneleko a kalavela makabye wakwe mhakeni leyi, hakuva Jehovha i ta tsayisa vontlhe lava va mahako zvilo lezvi, kota lezvi hi sinako hi mu byelile ni ku mu tlharihisa.
it-1863-864
Wubhayi
A wubhayi cigoho ca hombe leci ci nga mahako munhu a hlongoliwa (ku susiwa) bandleni ga wuKristu. (1Ko 5:9-13; Mah 12:15, 16) A mupostoli i tlhamusela lezvaku a muKristu a mahako wubhayi i wonhela a miri wakwe, hi ku tirisa zviro zvakwe zva wubeleki kasi ku maha zvakubiha. I ti vangela khombo ga hombe ga moya, a chakisa bandla ga Nungungulu, a tlhela a ti veka ka mhango ya hombe ya ku kuma mababyi yo daya ya ku nyiketana hi ku hlengela masango. (1Ko 6:18, 19) I kalavela vamakabye vakwe va maKristu (1Te 4:3-7) hi 1) ku chakisa bandla, a tisa tingana, ni ciruko lomu bandleni (Mah 12:15, 16), 2) ku maha lezvaku loyi a mahako naye wubhayi a nga havi ka ciyimo ci basileko hi tlhelo ga mahanyela, a tlhela a mu maha a nghenela wukati na a chakile loku ku hi ku a nga se chadha, 3) ku chakisa ngango wakwe, ni 4) ku wonhela vapswali vakwe, nuna, kutani munhu loyi a to chadha ni loyi yena a mahileko naye wubhayi. A nga kanyisi munhu, loyi kuzvilava a nga vhumelelako wubhayi, kanilezvi i kanyisa Nungungulu, loyi a to mu tsayisa hi kota ya ciwonho cakwe. — 1Te 4:8.
15-21 KA JULHO
TITSHOMBA TI NGA KA MHAKA YA NUNGUNGULU | 2 VA LE TESALONIKA 1-3
“Kuwonekeliswa ka citlula-milayo”
(2 Va Le Tesalonika 2:6-8) Makunu n’wina ma ci tiva leci ci ci vhalelako; hikwalaho ci ta wonekeliswa loku a cikhati ca cona ci chikela. 7 Hakuva a mitiro ya citlula-milayo leci, leyi ya ha hiko cihundla, yi sina yi sangulile; kanilezvi yi ta simama yiva cihundla kala ku susiwa loyi a yi vhalelako ka cikhati leci. 8 Andzhako ka lezvo, a citlula-milayo ci ta wonekeliswa, leci Hosi Jesu a to ci daya hi moya wa nomu wakwe, a ci lovisa hi kutiwonekelisa kakwe cikhatini leci a tova cikari ka hina.
it-1972-973
Ku khozela Nungungulu
Ku na ni wun’wani fihlakalo wu hambeneko nguvhu ni “cihundla co basa” ca Jehovha. A fihlakalo lowo “mitiro ya citlula-milayo”. Yi wa hi fihlakalo ka maKristu ya lisine hakuva masikwini ya mupostoli Pawule a “citlula-milayo” ci wa nga se tiveka niku ci wa nga seva ntlawa wo woneka. Hambu andzhako ka ku a “citlula-milayo” leco ci sangulile ku woneka, ci wa ta simama civa fihlakalo ka vanhu vo tala hakuva a wubihi ga cona ci wa ta gi maha na ci ti fihla ci ku khwatsi ci khozela Nungungulu. Lezvo zvi wa tava ku hluwukela a wukhozeli ga lisine ga Nungungulu. Pawule i wulile lezvaku a “mitiro ya citlula-milayo” yi wa sina yi sangulile masikwini yakwe, hakuva ku wa hi ni kucetelo wo biha bandleni ga wuKristu lowu hi magumo wu nga wa ta pswala ntlawa lowo wa vahluwuki. Hi ku gumesa, ci wa ta lovisiwa hi Jesu Kristu hi kutiwonekelisa kakwe cikhatini leci a tova cikari ka hina. A muhluwuki loye a rangelwako hi Sathani i wa ta ti tlakusa “hehla ka vontlhe lava va ti wulako ku ‘vanungungulu’ kutani zvilo zvontlhe zvi khozelwako” (Gr., seʹba·sma). Hikwalaho, a mukaneti loye wa hombe wa Nungungulu a tirisiwako hi Sathani i wa tava mukhohlisi wa hombe niku i wa ta maha ku a vanhu lava va landzelako mitiro yakwe va lovisiwa. A “citlula-milayo” leco ci wa ta kanganyisa nguvhu hi lezvi ci nga wa ta maha wubihi ga cona na ci ti fihla ciku ci khozela Nungungulu. — 2Te 2:3-12; ringanisa na Mat 7:15, 21-23.
(2 Va Le Tesalonika 2:9-12) Kanilezvi a citlula-milayo ci kona hi kota ya kutira ka Sathani, na ci hi ni mitiro yontlhe ya ntamu, ni zviwoniso ni zvihlamaliso zva mawunwa, 10 ni kukanganyisa kontlhe ka hava kasi ku kalavela lava va lovako, kota tsayiselelo wa lezvi va nga ala ku randza lisine leli li nga wa ta va maha va ponisiwa. 11 Hikwalaho Nungungulu i va tsika va kanganyisiwa hi tigondzo ta mawunwa, va kholwa mawunwa, 12 kasi vontlhe va fela ku lamuliwa hi kota ya lezvi va nga kala ku kholwa lisine, va tsakisiwa hi kungalulami.
it-2245 ¶7
Kuhemba
Jehovha Nungungulu i va “tsika va kanganyisiwa” lava va vhumelako mawunwa kasi “va kholwa mawunwa” wutshan’wini ga ku kholwa mahungu ya ma nene xungetano hi Jesu Kristu. (2Te 2:9-12) A mhaka leyi yi fananisiwa hi lezvi zvi humeleleko ka malembe ma hundzileko ka Ahabhi, a Hosi ya vaIzrayeli. A vaphrofeti va mawunwa va hembele Ahabhi va ku i ta hlula yimpini leyi a nga lava kulwa ni Ramote-Gileade, kuveni a muphrofeti wa Jehovha Mikaya i wa phrofetile lezvaku a nga ta hlula. Hi kuya hi muwoniso wa Mikaya, Jehovha i vhumelele a civangwa ca moya lezvaku civa “moya wa mawunwa” lomu minon’wini ya vaphrofeti va Ahabhi. Zvi wulako ku, a civangwa leco ca moya ci tirisile a ntamu wa cona hehla ka vaphrofeti kasi va nga wulawuli lisine, kanilezvi va wulawula lezvi va nga zvi lava ni lezvi Ahabhi a nga lava ku zvizwa. Hambu lezvi a nga sina a tlharihisilwe, Ahabhi i hlawulile ku kanganyisiwa hi mawunwa yabye a tlhela a rihela hi wutomi gakwe. — 1Tih 22:1-38; 2Kr 18.
Kela titshomba ta moya
(2 Va Le Tesalonika 1:7, 8) Kanilezvi n’wina lava mu xanisekako, i ta mu nyika kuhumula zvin’we na hina cikhatini leci Hosi Jesu a to wonekeliswa hi le tilweni ni tingilozi takwe ta ntamu 8 ndzilweni wu vhurako, na a neha tsayiselelo ka lava va nga mu tiviko Nungungulu ni lava va nga ingisiko a mahungu ya ma nene ya Hosi ya hina Jesu.
it-1834 ¶5
Ndzilo
Pedro i tsalile lezvaku “a matilo lawa ma nga kona zvezvi ni misava ya kona, zvi longiselelwe ndzilo”. Hi kuya hi mongo ni kuvhululelwa ka yin’wani mitsalo, zvi laha kubaseni lezvaku a ku wuliwi a ndzilo wa civiri kanilezvi ku wuliwa kulovisiwa ka pindzukelwa. A ku fana ni lezvi a Ndambi ya Nowa yi nga kala ku lovisa a matilo ni misava ya civiri, kanilezvi yi lovisa a vanhu va kubiha basi, hi zvalezvo kambe zvi to maheka cikhatini leci Jesu a to wonekeliswa ni tingilozi takwe ta ntamu ndzilweni wu vhurako, ku ta loviselwa magumo ntsena a vanhu va kubiha zvin’we ni tiko legi go biha legi va mahako cipandze ca gona. — 2Pe 3:5-7, 10-13; 2Te 1:6-10; ringanisa na Isa 66:15, 16, 22, 24.
(2 Va Le Tesalonika 2:2) lezvaku mu nga hatlisi ku jujeka kupima hambu ku chava hi kuzwa mahungu ya ku khwatsi mata hi ka Nungungulu, kani ya ku byeliwa hi nomu, kutani hi papilo go khwatsi gita hi ka hina, giku a siku ga Jehovha gi chikele.
w86 15/7 19 ¶19
Hanyani kota vana va Nungungulu
Hi ku landzela, Johani i komba lezvi hi faneleko ku tlhariha ka zvona. (Lera 1 Johani 4:1.) A hi faneli ku kholwa a timhaka tontlhe ti pimisilweko, kutani “magezu ma pimisilweko”, kanilezvi hi fanele ku ‘hlola a timhaka ti pimisilweko kasi ku wona lezvaku hakunene tita hi ka Nungungulu ke’. Hikuyini? “Hakuva lomu tikweni ku na ni vaphrofeti vo tala va mawunwa.” Cikhatini leco, a vagondzisi vokari va mawunwa va wa fambafamba va ti patsa ni mabandla yo tala, na va zama ku “ti kokela vapizani”. (Mitiro 20:29, 30; 2 Johani 7) Hikwalaho kasi va simama na va tsumbekile zvi wa lava ku va tlhariha.
22-28 KA JULHO
TITSHOMBA TI NGA KA MHAKA YA NUNGUNGULU | 1 TIMOTE 1-3
“Ti karatele ku maha ntiro wa wunene”
(1 Timote 3:13) Hakuva a vavanuna lava va mahako khwatsi mitiro yabye va ti lavela wudzundzo gi nene, ni ku wulawula hi kutlhatlheka ka hombe xungetano hi kukholwa loku ku nga ka Kristu Jesu.
km 9/78 4 ¶7
Lava va mahako ntiro wa wu nene
Zva olova a ku tiva ku hikuyini Pawule a nga ku a vavanuna lavo “va ti lavela wudzundzo gi nene”. Lezvo a hi ku engetela zvikhundla lomu chichini kota lezvi van’wani va wulako. A ku hundza lezvo, a malandza yo vhunetela lawa ma “mahako khwatsi mitiro yabye” ma tiyiseka lezvaku Jehovha na Jesu va va katekisa, niku a bandla gontlhe ga va seketela ni ku va komba a cichavo. Va kuma “kutlhatlheka ka hombe xungetano hi kukholwa loku ku nga ka Kristu Jesu”. Va bongiwa hi kota ya mitiro yabye ya yi nene ni ku tsumbeka kabye; va tiyile kukholweni niku va wulawula hi kukholwa kabye hi kutiya na va nga chavi nchumu.
Kela titshomba ta moya
(1 Timote 1:4) ni lezvaku va nga ingiseli tikaringani ni ku landzelela a matimu ya tixaka ta vakokwani. A zvilo lezvo a zvi vhuni nchumu, zvo vhuxa kukanetisana basi, a zvi vhuvhumisi zvilo zva Nungungulu lezvi zvi akako kukholwa.
it-1914-915
Tixaka ta vakokwani
Ku wa nga hi na cigelo ca ku gondza niku kanetisana hi timhaka leto nguvhunguvhu ka cikhati leci Pawule a nga mu tsalela hi cona Timote. Zvi wa nga ha hi zva lisima a ku simama ni mabhuku ya tixaka ta vakokwani kasi ku komba a lixaka la munhu, kota lezvi Nungungulu a nga kala a nga ha hambanisi a vaJudha ni vamatiko lomu bandleni ga wuKristu. (Gal 3:28) Niku a mabhuku ya tixaka ta vakokwani ma wa sina ma kombile a pswalo wa Kristu hi ku tirisa a lixaka la Dhavhidha. A cin’wani kambe hi ku zvi wa nga ta teka a cikhati co leha andzhako ka ku Pawule a tsalile a citlharihiso leci kala loku Jerusalema a hahlulwa ni mabhuku ya tixaka ta vaJudha. Nungungulu a nga ma ponisangi. Hikwalaho, Pawule i wa nga lavi lezvaku Timote ni mabandla va hambukisiwa va mbheta cikhati na va gondza ni ku kanetisana hi timhaka ti yelanako ni tixaka, a zvilo zvaku zvi wa nga vhuni nchumu ka kukholwa ka wuKristu. A matimu ya tixaka lawa hi ma kumako lomu ka Bhibhiliya ma ringana kasi ku komba lezvaku Jesu hi Mesiya, ku nga lixaka la lisima nguvhu ka maKristu. A tin’wani tixaka ti nga lomu ka Bhibhiliya ti kona kota wukustumunyu ga ku tiyisa a matimu ya Bhibhiliya ma kombako khwatsi lezvaku a Bhibhiliya i bhuku ga matimu.
(1 Timote 1:17) Makunu ka Hosi ya pindzukelwa, leyi yi nga fiko, yi nga wonekiko, ku nga yena yece a nga Nungungulu, a give kona wudzundzo, ni wudhumo, kala kupindzuka ni kupindzuka. Amen.
cl 12 ¶15
“Langutani! Loyi hi yena Nungungulu wa hina”
A cin’wani cikhundla ci tiriselwako Jehovha basi ku “Hosi ya pindzukelwa”. (1 Timote 1:17; Kuvhululelwa 15:3) Zvi wula kuyini ku “Hosi ya pindzukelwa”? Zva karata ku hi zvi zwisisa hi kota ya kugumelwa ka maalakanyo ya hina, kanilezvi Jehovha wa pindzukelwa hi tindlela timbiri — yena wa pindzukelwa ka cikhati ci hundzileko ni ka cikhati ci tako. Lisimu 90:2 yi li: ‘Hi mahlweni a zvitsunga na zvi nga se ku huma, na u nga se ku vanga misava ni tiko, kusukela kupindzukeni kala kupindzuka wena u hi Nungungulu.’ Hikwalaho Jehovha a nga vangi ni masangulo; contlhe cikhati i vile kona. Zvi lulamile a ku a vitaniwa ku “wakale ka masiku” — yena i vile kona kusukela kupindzukeni ne na ku nga seva ni munhu kutani nchumu wuakweni gontlhe! (Dhaniyeli 7:9, 13, 22) Himani a nga kanetako a fanelo leyo ya kuva Hosi ya Hombe?
29 KA JULHO–4 KA AGOSTO
TITSHOMBA TI NGA KA MHAKA YA NUNGUNGULU | 1 TIMOTE 4-6
“Titshomba ni ku khozela Nungungulu”
(1 Timote 6:6-8) Kunene a ku khozela Nungungulu na hi xalele hi lezvi hi nga nazvo i bhindzu ga hombe. 7 Hakuva a hi tangi ni nchumu laha tikweni, ne a hi nge teki nchumu loku hi suka ka gona. 8 Hikwalaho loku hi hi ni zvakuga ni tinguwo, a hi tsakeni hi zvalezvo.
w03 1/6 9 ¶1-2
Gondza ku xalala hi lezvi u nga nazvo
A ca hombe ci mahileko Pawule ava ni litsako ku wa hi ku xalala hi lezvi a nga hi nazvo. Hambulezvo, zvi wula yini a ku xalala hi lezvi u nga nazvo? Hi magezu yo olova, zvi wula ku xalala hi zvilo tshinya zvi lavekako kasi ku hanya. Xungetano hi mhaka leyi, Pawule i byelile Timote, a munghana wakwe wa ntiro wa kuchumayela aku: “A ku khozela Nungungulu na hi xalele hi lezvi hi nga nazvo i bhindzu ga hombe. Hakuva a hi tangi ni nchumu laha tikweni, ne a hi nge teki nchumu loku hi suka ka gona. Hikwalaho loku hi hi ni zvakuga ni tinguwo, a hi tsakeni hi zvalezvo.” — 1 Timote 6:6-8.
Wona lezvaku Pawule i yelanisa a ku xalala hi lezvi hi nga nazvo ni ku khozela Nungungulu. I wa zvi tiva lezvaku, a ku xalala ka lisine hi ku kuma hi ku khozela Nungungulu, zvi wulako ku rangisa ntiro lowu hi mahelako Nungungulu, na ku nga hi ku rangisa titshomba kutani ku ganya. A “zvakuga ni tinguwo” zvi wa hi zvona basi zvi nga laveka kasi a simama ku khozela Nungungulu. Hikwalaho, kasi Pawule a xalala hi lezvi a nga hi nazvo, i wa fanele ku tsumba Jehovha ni ka gihi tshamela a nga hi ka gona.
(1 Timote 6:9) Kanilezvi lava va lavako ku ganya va wela kuringweni ni mitlhan’wini ni kunaveleni ko tala ka wupumbu, lezvi zvi nyupetako vanhu kulovisiweni ni kulahlekeni.
g 6/07 6 ¶2
A ku lava ku ganya — Zvi ku khumbisa kuyini?
A kutala ka vanhu a vafi hi kota ya ku lava titshomba. Hambulezvo, va nga tshuka vafa na va ha ti karatela ku lava titshomba. A ku hundza lezvo, a wutomi gabye gi nga kumana ni zvikarato zvo tala loku a ntiro ni mali zvi va maha va nga kumi wurongo, va bongola tihloko, va khomiwa hi kankro kutani man’wani mababyi ma nga mahako ku munhu a hatlisa kufa. Niku hambu loku a zvi pola lezvaku i fanele ku cica lezvi a zvi rangisako, kuzvilava a nga nghana a celwe. Zvi nga maha na ku hi ku a nuna wakwe kutani sati na a nga ha mu tsumbi, a vana vakwe na va karateka ni wutomi gabye na gi hi mhangweni. Kuzvilava zvi nga koteka ku lulamisa a zvokari zva zvikarato lezvo, kanilezvi zvi lava kutikarata ka hombe nguvhu. Kunene, a vanhu lavo “va ti vangela zvikarato zvo tala”. — 1 Timote 6:10.
(1 Timote 6:10) Hakuva a ku randza mali i mutsu wa zvilo zvontlhe zva kubiha, niku hi kota ya ku yi randza, a vokari va pengile kukholweni, va ti vangela zvikarato zvo tala.
g 11/08 6 ¶4-6
6 wa tindlela kasi ku humelela wutomini
Kota lezvi hi zvi wonileko ka ndzima yo sangula ya revhista legi, a vanhu va ti karatelako ku lava titshomba a ku khwatsi hi yona ndlela ya ku humelela wutomini, hi lisine vo landza mheho. A wutomi lego a gi va tsoni litsako ntsena kanilezvi gi va tisela zvikarato zvo tala. Hi cikombiso, a kuzwanana ni maxaka ni vanghana zva fuva a cikhati leci munhu a ti karatelako ku lava titshomba. A van’wani va tsandzeka ku etlela hi kota ya ku karateka kutani zvikarato, na ku nga hi ntiro lowu va wu mahako. Mutshawuteli 5:12 a li: ‘A wurongo ga munhu loyi a tirako ga nandziha, hambu loku aga nguvhu kutani ku tsongwani; kanilezvi a kuxura ka a fumileko a ku mu nyiki wurongo.’
A mali a hi hosi yo biha basi, ya kanganyisa kambe. Jesu Kristu i wulawulile hi “kunavela titshomba”. (Marku 4:19) Hi magezu man’wani, a titshomba ti tsumbisa litsako, kanilezvi a ti ku nyiki. Tona to vanga kunavela zvotala. Mutshawuteli 5:10 i wula lezvi: ‘Loyi a randzako mali a nga kolwi hi mali, ni loyi a randzako kufuma a nga kolwi hi bhindzu. Lezvo kambe a zvi nyawuli.’
Hi magezu matsongwani, a kurandza mali zvi engetela zvikarato wutshan’wini ga ku zvi lulamisa, ni ku hi magumo zvi vanga kubayiseka, kukarateka hambu hi wugevenga. (Mavingu 28:20) A zvilo zvi yelanako nguvhu ni litsako wuhana, kutsetselela, mahanyela yo basa, lirandzo, ni wumoya.
Kela titshomba ta moya
(1 Timote 4:2) hi kota ya kukanganyisa ka vanhu va wulawulako mawunwa, lava a tivhalo tabye ti tlanyeleko a ku khwatsi ti no hisiwa hi simbi yo hisa.
lvs 23-24 ¶17
Muva ni livhalo li nene mahlweni ka nungungulu
Mupostoli Pedro i te ngalo: “Mu fanele kuva ni livhalo li nene.” (1 Pedro 3:16) A co bayisa hi ku loku a vanhu va kanyisa a matshinya ya milayo ya Jehovha, hi kufamba ka cikhati a livhalo labye a la ha va tlharihisi. Pawule i wulile lezvaku a tivhalo leto ti ‘tlanyele a ku khwatsi ti no hisiwa hi simbi yo hisa’. (1 Timote 4:2) U tshuka uswa hi simbi yo hisa nguvhu? Loku u swile nguvhu, a wutshamu legi gi ngaswa go tlanyala gi nga hazwi nchumu. Hi ku fanana, loku a munhu a simama ku maha zvakubiha, a livhalo lakwe lo ‘tlanyala’ li gumesa li nga ha tiri.
(1 Timote 4:13) Simama ku ti tsitsirita u gondzela van’wani, u va nyika wusungukati, ni ku va gondzisa, kala ndzita.
it-2714 ¶1-2
Gondzela van’wani
Lomu bandleni ga wuKristu. Ka zana ga malembe go sangula, vatsongwani va nga hi ni mabhuku yo songiwa ya Bhibhiliya, hikwalaho zvi wa hi zva lisima a ku lerela van’wani lomu bandleni. Pawule i layile lezvaku ku leriwa a mapapilo yakwe lomu mitlhanganweni ya bandla ga wuKristu, a tlhela a laya lezvaku loku va mbheta ku lera va fanele ku ma hundzisa maya ka gin’wani bandla kasi na vonawu va lera. (Kol 4:16; 1Te 5:27) Pawule i mu nyikile wusungukati Timote a muswa wa muwoneleli ga lezvaku a ti tsitsirita ku ‘gondzela van’wani, a nyika wusungukati, ni ku gondzisa’. — 1Tm 4:13.
A ku lerela van’wani zvi fanele ku mahiwa khwatsi. (Hab 2:2) Hi kota ya lezvi a ku lerela van’wani zvi mahelwako ku va gondzisa, a muleri i fanele ku zvi zwisisa khwatsi lezvi a lerako, a tlhela a tiva kungo ga mahungu lawa a lerako, a tlhela a potsa ku nyika mawonela ya hava. Hi kuya hi Kuvhululelwa 1:3, loyi a gondzako a ciphrofeto leci hi gezu ga hombe ni lava va zwako a magezu ya cona va tlhela va ingisa a timhaka leti ti tsalilweko ka cona va tava ni litsako.