Timhaka ta mabhuku ma tako ka Cibhukwana ca Mutlhangano
2-8 KA NOVEMBRO
TITSHOMBA TI NGA KA MHAKA YA NUNGUNGULU | EKSODUSI 39-40
“Mosi i lo landzela khwatsi a zvileletelo”
(Eksodusi 39:32) Zvinghaho va lo mbhetisa lezvo wontlhe ntiro wa yindlu leyi va nge ngalo i tenda ga mutlhangano. A vanana va ka Izrayeli va lo maha zvontlhe kota lezvi Jehovha a leleteleko Mosi.
w11 15/9 27 ¶13
Xana wa tiviwa hi Jehovha ke?
A ku hambana na Kora, Mosi i wa hi “munhu wo rula nguvhu ku hundza vanhu vontlhe va nga laha misaveni.” (Mitse. 12:3) I kombisile a kurula ni kutikoramisa kakwe hi ku ti yimisela a ku landzela a zvileletelo zva Jehovha. (Ekso. 7:6; 40:16) A ku na cikombiso ca lezvaku Mosi i wata na a kanakanela a wuhosi ga Jehovha kutani ku swiriwa hi zvileletelo zvakwe. Hi cikombiso, Jehovha i nyikile a zvileletelo zvontlhe xungetano hi maakela ya tabhernakeli, zvo kota a muvala wa tihindza ni ntsengo wa tingoti leti ti nga fanele ku tiriswa kasi ku maha a tinguwo ta kona. (Ekso. 26:1-6) Loku a muwoneleli wo kari hlengeletanweni ya Nungungulu i wo ku byela zvontlhe lezvi u faneleko ku maha, u wa tata na u swireka. Hambulezvo, Jehovha muwoneleli wo mbhelela, loyi a tsumbako malandza yakwe ni ku ma avela mitiro hi matsenya. Loku a hi byela zvontlhe lezvi hi faneleko ku maha, i maha lezvo hi ku hi randza. Hambulezvo, wona lezvaku Mosi a nga zangarangi laha Jehovha a nga mu nyika zvileletelo zvontlhe, a hi ku khwatsi Jehovha i wo nyenya lezvaku Mosi a tirisa a marambu yakwe ya hloko. Wutshan’wini ga lezvo, Mosi i lo ti karata nguvhu kasi a vatiri va “maha zvontlhe” hi ku landzela zvileletelo zva Nungungulu. (Ekso. 39:32) Hi nga wona a kutikoramisa ka Mosi! Mosi i wa zvi tiva lezvaku a ku maha tabhernakeli ku wa hi ntiro wa Jehovha niku yena i wo tiriswa ntsena hi Nungungulu kasi ku maha a ntiro lowo.
(Eksodusi 39:43) Mosi i lo cuwuka wontlhe ntiro, languta, va wa mahile khwatsi hilezvi Jehovha a nga leletelisa zvona, va wa mahile zvalezvo. Zvonake Mosi i lo va katekisa.
(Eksodusi 40:1, 2) Zvonake Jehovha i lo wulawula ka Mosi, aku: 2 Hi siku go ranga ga hweti yo sangula, u ta yimisa a yindlu ya tenda ga mutlhangano.
(Eksodusi 40:16) Lezvo Mosi i lo maha zvontlhe khwatsi hi lezvi Jehovha a mu leleteleko.
w05 15/7 27 ¶3
Wa tsumbeka ka zvilo zvontlhe?
Mahebheru 3:5 i ngalo: ‘Kota nandza, Mosi i wa tsumbekile’. Cini ci nga maha ku Mosi ava munhu wo tsumbeka? Kumahiweni ka tabhernakeli, ‘Mosi i lo maha zvontlhe khwatsi hi lezvi Jehovha a mu leleteleko’. (Eksodusi 40:16) Kota vakhozeli va Jehovha, hi kombisa kutsumbeka hi ku mu tirela na hi ingisa zvileletelo zvakwe. Lezvo zvi patsa ku simama hi tsumbekile kakwe hambu loku hi kumana ni zviringo zvo nonoha hi cikhati co leha. Hikwalaho, loku hi zvi kota a ku hlula zviringo lezvo basi, a hi cigelo ca ku hi ti byela ku hi tsumbekile ka Jehovha. Ka Luka 16:10 Jesu i te: “Loyi a tsumbekako ka lezvi zvi tsongwani i tsumbekile ni ka lezvi zva hombe, ni loyi a nga lulamangiko ka lezvi zvi tsongwani a nga lulamangi ni ka lezvi zva hombe”. Hi fanele ku simama hi tsumbeka hambu ka zvilo zvi wonekisako ku khwatsi zvitsongwani.
Kela titshomba ta moya
(Eksodusi 39:30) Va lo maha a mubhodi wa cidlodlo ca kubasa hi ndzalama yi basileko. Zvonake va tsala hehla ka cona hi ndlela leyi va kehlako ha yona lomu ka phera, va tsala timhaka leti: Ku basiselwe Jehovha.
w01 1/2 14¶3
Wa hanya hi kuyelana ni kutihendleleta ka wena?
A ku tihendleleta a hi mhaka ya ku hlakana hi yona. Zvi komba lezvaku u ti hendleletile kota nandza ga Nungungulu na zvi sukela mbilwini niku zvi lava a kuva ni mahanyela ya ma nene. Hikwalaho, ha ci wona cigelo ci nga maha mupostoli Pedro a wula magezu lawa ya Jehovha a ku: “Basani, hakuva mina ndzi basile.” (1 Pedro 1:15, 16) Hina kota maKristu ma ti hendleletileko hi na ni wutihlamuleli ga hombe ga ku hanya mayelano ni kutihendleleta ka hina, hi ku tsumbeka kala magumo. Kanilezvi zvini zvi patsekako ka kutihendleleta ka hina kota maKristu? — Levi 19:2; Matewu 24:13.
(Eksodusi 40:34) Zvonake a refu gi lo fenengeta a tenda ga mutlhangano, hakuva a refu gi wa hi hehla ka gona, ni kuhatima ka Jehovha ku tata a tabernakeli.
Xana u fanele ku karatekela ku tiva lezvaku a ntiro wa wena wu woniwa hi mani?
A cikhati leci a tabhernakeli gi nga mbhela, “a refu gi lo fenengeta a tenda ga mutlhangano, . . . ni kuhatima ka Jehovha ku tata a tabhernakeli.” (Ekso. 40:34) Hi nga wona a cikombiso co dlunyateka ca kuxalala ka Jehovha! U alakanya ku Bezaleli na Oholiaba va ti zwisile kuyini ka cikhati leco? Hambu lezvi a mavito yabye ma nga kalile ku tsaliwa ka lezvi va zvi mahileko, va wa tsakile hi ku tiva lezvaku Jehovha i wa katekisile a kutikarata kabye kontlhe. (Mav. 10:22) Ka malembe ma nga landzela, a ku wona lezvaku a ntiro wa mandla yabye wu wa simama wu tiriswa ntirweni wa Jehovha handle ko kanakana zvi wa va nyika litsako. Zvi te dlunya lezvaku a cikhati leci Bezaleli na Oholiaba va to vuka hi ka vafileko misaveni yiswa, va ta tsaka nguvu hi ku tiva lezvaku a tabhernakeli gi tirisilwe wukhozelini ga lisine hi cipimo ca 500 wa malembe!
9-15 KA NOVEMBRO
TITSHOMBA TI NGA KA MHAKA YA NUNGUNGULU | LEVI 1-3
“Kungo ga minyikelo”
(Levi 1:3) Loku a munyikelo wakwe wu hi muphahlo wa kuhiswa wa tihomu, i ta nyikela hi nkuzi yi nga hiko na bawa; i ta yi nyikela laha nyangweni ya tabhernakeli ga mutlhangano, kasi a ta amukeleka mahlweni ka Jehovha.
(Levi 2:1) Loku a munhu a nyikela ka Jehovha a munyikelo wa zwakuga, a munyikelo lowo wu tava wa mapa yo saseka; i ta ma chela mafura ni libani lo nuhela.
(Levi 2:12) Mu ta zvi neha ka Jehovha zin’we ni munyikelo wa mihandzu yo ranga, kanilezvi ngha zvi nga hiswi laha alatini, khwatsi hi munyikelo wa masema yo nandziha.
it-3120
Minyikelo
Minyikelo ya kuhiswa. A minyikelo ya kuhiswa yi wa nyikelwa yontlhe ka Jehovha, a mukhozeli i wa nga sali ni cipandze cokari ca cihari. (wona Val 11:30, 31, 39, 40.) Zvi wa lava ku va kombela ka Jehovha lezvaku a amukela a minyikelo leyo va nga kari va yi maha. A kufana ni “mupahlo wa kuhiswa”, Jesu a nga nyikelangi a cipandze co kari ca miri wakwe kota muphahlo, kanilezvi i nyikele a miri wakwe wontlhe.
it-3123 ¶5
Minyikelo
Minyikelo ya timbewu. A minyikelo ya timbewu yi wa mahiwa khati gin’we ni minyikelo ya kurula, minyikelo ya kuwonha ni mihanzu yo ranga; Ka zvikhati zvin’wani a munhu ni munhu i wa nyikela yece. (Ek 29:40-42; Levi 23:10-13, 15-18; Mitse 15:8, 9, 22-24; 28:9, 10, 20, 26-28 cipimo 29) A minyikelo leyo yi wa mahiwa kasi ku alakanya a makatekwa lawa Jehovha a nga va nyika. Ka zvikhati zvotala a minyikelo leyo yi wa patsiwa ni mafura ni libani. A minyikelo ya timbewu yi wa mahisiwa ku khwatsi i mapa yo saseka, mavele ma wocilweko, kutani mikati yi wocilweko kutani ku katingiwa. A cipandze cokari ca muphahlo wa timbewu ci wa vekiwa le hehla ka alati ga miphahlo ya kuhiswa. A cipandze cokari ci wa giwa hi vaprisiti. Ka minyikelo ya kurula a mukhozeli yenawu i wa patseka. (Le 6:14-23; 7:11-13; Mitse 18:8-11) A minyikelo ya timbewu leyi yi nga nyikelwa le alatini yi wa nga faneli ku cheliwa a livrina kutani wulombe (zvo khwatsi ku wa wuliwa kambe ni xarope ya makuwu) kasi ku yi kukumuka. — Le 2:1-16.
(Levi 3:1) Loku a munyikelo wa munhu wu hi muphahlo wa kurula, ni loku a nyikela a homu, hambu yi hi ya matsune kutani kati, i ta yi nyikela na yi nga hi na bawa mahlweni ka Jehovha.
it-3121 ¶8
Minyikelo
Minyikelo ya kurula. A minyikelo ya kurula yi nga amukeleka ka Jehovha, yi wa komba kurula naye. A ngango wontlhe wu wa patseka ka munyikelo lowo (ka wutshamu ga tabhernakeli, hi kuya hi mukhuwo, ku wa veketeliwa a mixaxa lomu ka cipandze leci ci nga avanyisilwe hi kortina legi gi nga randzele a wutshamu ga tabhernakeli; lomu tempeleni ku wa hi ni wutshamu go gela kona). A Mupristi wa hombe i wa kuma cipandze ca munyikelo, a vapristi van’wani vonawu va wa kuma cipandze. Jehovha i wa kuma a masema yo nuhela ya minyikelo leyo. A nkhata lowu wu nga yimela wutomi, wu wa nyikelwa ka Nungungulu, na wu ringana yena. Hikwalaho a vapristi ni vakhozeli a ku patsa na Jehovha zvi wa ku khwatsi va wa hi zvin’we kugeni loko, lezvi zvi nga wula kuzwanana ka kurula. A munhu a nga patseka ka mibhuzo leyo na a nga basangi (a ku nga basi kontlhe ku wuliwako hi Nayo) kutani kuga nyama leyo na ci hundzile cikhati leci yi nga fanele ku giwa hi cona (lomu ka nguva ya kuhisa yi wa ta sangula ku bola) a munhu loye i wa fanele ku hlongoliwa ka va ka kabye. A ku maha munyikelo lowo a munhu wa kona na a nga basangi, kutani kuga nyama leyi yi nga woneka na yi nga faneleki mahlweni ka Jehovha zvi wa maha munyikelo wuva cinyenyeko ka Jehovha, hakuva lezvo zvi wa nga kombisi cichavo hi zvilo zvi basileko zva Jehovha. — Le 7:16-21; 19:5-8.
Kela titshomba ta moya
(Levi 2:13) Yontlhe minyikelo ya wena ya zvakuga u ta lunga hi munyu; wu nga dzuki wu vumaleka a munyu wa civhumelwano ca Nungungulu wa wena laha ka munyikelo wa wena; u ta lunga hi munyu yontlhe minyikelo ya wena.
(Ezekieli 43:24) U ta zvi tshineta mahlweni ka Jehovha, a vapristi va ta zvi chela munyu, va maha ha zvona a munyikelo wa kuhiswa ka Jehovha.
w04 15/5 22 ¶1
Timhaka-tshinya ta bhuku ga Levi
2:13 — Hikuyini a “minyikelo yontlhe” yi nga fanele ku lungiwa hi munyu? Va wa nga mahi lezvo kasi va engetela kunandziha ka minyikelo. Misaveni yontlhe, a munyu wa tirisiwa nguvhu kasi ku vekisa zvilo zvi nga boli. Kuzvilava wu wa patsiwa ni minyikelo kasi wu yimela kungaboli.
(Levi 3:17) Ku tava cileletelo ca kala kupindzuka zvizukulwaneni zva n’wina, kontlhe lomu mu ta nga aka kona; mu nga dzuki muga mafura, hambu ni nkhata.
it-2246
Mafura
Cigelo ca nayo lowo. Xungetano hi civhumelwano ca nayo, a mafura ni nkhata zvi wa woniwa kota lezvi zvi nga lumba Jehovha basi. A nkhata wu wa lumba Jehovha hakuva wu yimela wutomi, kuveni Jehovha hi yena ntsena a nyikako wutomi. (Le 17:11, 14) A mafura ma wa woniwa kota cipandze ca cinene nguvhu laha ka nyama ya cihari. A munyikelo wa mafura ya cihari, wu wa fanele ku mahiwa na va zvi tiva ku a zvipandze zva zvinene zvi wa lumba Jehovha, a n’winyi wa malulamiselo lawo! A mukhozeli i wa fanele ku kombisa ku wa zvi lava ku nyikela zva zvinene ka Nungungulu. Kota lezvi Jehovha a nga fanelwa hi minyikelo ya yinene ya vaIzrayeli, a minyikelo leyo yi wa fanele ku hisiwa le alatini, kota “zvakuga” zva “masema yo nuhela” kakwe. (Le 3:11, 16) Hikwalaho, a kuga mafura ku wa hi ndlela yo kala ku kombisa cichavo hi zvilo zvi basileko zva Nungungulu, kutani ku kanyisa tifanelo ta Jehovha. Loku a munhu aga mafura ya cihari i wa konelwa kufa. A ku hambana ni nkhata, a mafura ya cihari ci fileko hi coce kutani ku dayiwa hi cin’wani cihari, ma wa tirisiwa ka zvilo zvin’wani. — Le 7:23-25.
w04 15/5 22 ¶2
Timhaka-tshinya ta bhuku ga Levi
3:17. Kota lezvi a mafura ma nga woniwa kota cipandze ca cinene, a kuva ma betelwa ku giwa zvi wa komba ka vaIzrayeli ku a zvilo zva zvinene zvi wa lumba Jehovha. (Genesisi 45:18) Lezvo zvi hi alakanyisa ku hinawu hi fanele ku mu nyika zva zvinene Jehova. — Mavingu 3:9, 10; Va Le Kolosi 3:23, 24.
16-22 KA NOVEMBRO
TITSHOMBA TI NGA KA MHAKA YA NUNGUNGULU | LEVI 4-5
“Mu nyike zva zvi nene Jehovha”
(Levi 5:5, 6) A munhu loyi a wonhileko kota lezvo, i ta wulela kuwonha kakwe; 6 i ta neha ka Jehovha a munyikelo wa kuwonha kakwe, a kati wa cifuyo ca citsongwani, hambu yi hi yivu, kutani i mbuti, kasi yi maha muphahlo wa ku susa nandzu. Zvonake a mupristi i ta mu mahela a ndzhiho wa ciwonho cakwe.
it-3122 ¶9
Minyikelo
Minyikelo ya minandzu. A minyikelo ya minandzu yonawu yi wa hi minyikelo hi kota ya ciwonho, hakuva ni wihi nandzu wu hisa ciwonhweni. A minyikelo leyo yi wa mahiwa ka zviwonho zvo kari, lezvi zvi nga maha munhu ava ni nandzu, niku yi wa hambene ni munyikelo yin’wani, zvi wa wonekisa ku khwatsi yi wa mahiwa kasi ku vhuxa fanelo yo kari, loku a fanelo ya Jehovha kutani ya vanhu vakwe yi sina yi hambunyetilwe. A minyikelo ya minandzu yi wa mahelwa ku tsakisa Jehovha ka nayo lowu wu nga hambunyetilwe, kutani ku maha ku a muwonhi a ti solileko a kuma tifanelo takwe ni ku kuma kutlhatlhiswa ka nandzu wa ciwonho cakwe. — Isa 53:10.
(Levi 5:7) Va nga dzuki va zvi bhika ni comeIo. Leci hi ciavelo leci ndzi va nyikileko ca lomu ka miphahlo ya mina leyi yi hiswako hi ndzilo. Zvilo zvi basileko nguvhu, khwatsi hi muphahlelo wa kuwonha, ni muphahlelo wa minandzu.
w09 1/6 26 ¶3
Jehovha wa chela kota hi kugumelwa ka hina
A nayo na wu wulawula hi ku khatala ka lisima ka Jehovha wu li: ‘Loku [munhu] a vhumala a yivhu kutani i mbuti, i ta neha ka Jehovha a muphahlo wa ciwonho cakwe a matuva mambiri, kutani mavhinyani mambiri ya zvipomba.’ (vhesi 7) A magezu lawa ma nge “loku a munhu a vhumala” ma nga hundzuluselwa kambe maku “loku . . . a mandla yakwe ma nga zvi koti ku zvi kuma”. Loku a muIzrayeli a tshuka a hi ni wusiwana ga hombe laha ka kuza a nga zvi koti a ku chava a yivhu, makunu Nungungulu i wa vhumela hi matsenya lezvi a munhu loye a nga wa ta zvi kota ku nyikela — matuva mambiri kutani mavhinyani mambiri ya zvipomba.
(Levi 5:11) Loku a vhumala a matuva mambiri, kutani mavhinyani mambiri ya zvipomba, loye a wonhileko i ta neha a munyikelo wakwe hi zva wukhume ka efa ya mapa yo basa, ma tava muphahlo wa kuwonha. A nga dzuki a chela mafura hehla ka wona, hambu ni libani lo nuhela, hakuva muphahlo wa kuwonha.
w09 1/6 26 ¶4
Jehovha wa chela kota hi kugumelwa ka hina
Ahati loku a munhu a nga zvi koti a ku xava a matuva mambiri kutani mavhinyani mambiri ya zvipomba ke? A nayo wu wa wula lezvi: ‘A munhu loyi a wonhileko i wa ta neha a munyikelo wakwe hi zva wukhume hi efa ya mapa yo basa, ma tava muphahlo wa kuwonha’. (vhesi 11) Ka munhu a nga hi cisiwana nguvhu Jehovha i mahile lezvaku a munyikelo wakwe wu mahiwa hi zvilo zva zvitsongwani, ni ku vhumela lezvaku wu mahiwa na wu nga hi na nkhata. Le Izrayeli, a wusiwana gi wa nga vhaleli munhu a ku kuma a lunghelo ga ku maha a munyikelo wa kuwonha, kutani lunghelo ga ku tshama na a basile mahlweni ka Nungungulu.
Kela titshomba ta moya
(Levi 5:1) Loku a munhu a wonha laha a hlambanyiswako, na a kustumunya hi lezvi a zvi wonileko hambu lezvi a zvi tivako, loku a nga wuli lezvi a zvi wonileko kutani lezvi a zvi tivako, yena i ta rwala a nandzu wa kona.
Gondza ka malandza yo tsumbeka ya Jehovha
A wunene gi nga ku vhuna ku tiva loyi u faneleko ku tsumbeka ka yena kuranga. Hi cikombiso, u nga ha tiva lezvaku a mukholwa-kuloni i mahile ciwonho ca hombe. Hambulezvo, u nga ha lava ku tsumbeka kakwe, nguvhunguvhu loku a hi munghana kutani xaka. Kanilezvi loku u fihla ciwonho leco, a wu tsumbeki ka Nungungulu. Hi lisine, u fanele ku tsumbeka ka Nungungulu kuranga. Hikwalaho, a ku fana na Natani, kombisa wunene, hambulezvo u nga tsiki ku tsumbeka ka Jehovha. Kuca munghana wa wena kutani xaka ga wena lezvaku a ya kombela civhuno ka madhota. Loku a nga mahi lezvo hi cikhati ci faneleko, a kutsumbeka ka wena ka Nungungulu ku fanele ku ku kuca ku bika mhaka leyo ka madhota. Loku u maha lezvo, u ta simama u tsumbekile ka Jehovha u tlhela u maha wunene ka munghana wa wena kutani xaka ga wena, hakuva a madhota ya wuKristu ma ta zama ku mu vhuna hi moya wo olova lezvaku a vuxa wunghana gakwe na Jehovha. — Lera Levi 5:1; Va Le Galatia 6:1.
(Levi 5:15, 16) Loku a munhu a hambunyeta a wonha hi ku hoheta, hi ku kala a nga humesi lezvi zvi basiselweko Jehovha, i ta neha a munyikelo wa ndzhiho, a hamba yi nga hiko na bawa, yi hlawulweko lomu tlhambini, zin’we ni mati ya xekeli, gi nga xekeli ga lipimo la wutshamu go basa; ku tava muphahlelo wa ndzhiho. 16 Yena i ta humesa a mali ya ku riha lezvi a tekileko zva wutshamu go basa, a engetela zva wuntlhanu ka zvona, a zvi nyika mupristi, loyi a ta nga mu mahela a muphahlo wakwe wa ndzhiho hi hamba leyi a humesileko a kuva ya muphahlo wa ndzhiho, zvonake i ta tsetselelwa.
it-3529 ¶1
Kubasa
Zvihari ni mihandzo ya masimu. A zvihari zva matewula zva vamatsuni a tiyivhu, ni tihomo, ni timbuti zvi wa woniwa na zvi basile ka Jehovha niku zvi wa nga faneli ku tirulwa. Zvi wa fanele ku nyikelwa kota miphahlelo niku a cipandze cin’wani ca nyama ci wa giwa hi vapristi. (Mitse 18:17-19) A mihandzu yo sangula ni zva wukhume zvi wa basile a ku fana ni miphahlo ni zvinyikiwo lezvi zvi nga nyikelwa ntirweni wo basa. (Ek 28:38) Zvontlhe zvilo zvo hlazweka zvi wa basile ka Jehovha niku zvi wa nga faneli ku tirisiwa hi ni cihi cigelo kutani hi cumbu hi munhu, kutani hi zvighelo zvo biha. A cin’we ca zvikombiso ca lezvo ku wa hi nayo wa zva wukhume. Loku a munhu a vekisa a cipandze cokari ca mihandzu yakwe kasi ku nyikela kota zva wukhume, a gumesa yena kutani munhu mun’wani wa laha ngangweni wakwe a zvi tirisa, a munhu loyi i wa woniwa kota loyi a hambunyetileko a nawo wa Nungungulu wu nga yelana ni zvilo zvo basa. Wutshan’wini ga ku humesa a mbuti ya matsuni kota muphahlo, a nayo wu wa koxa lezvaku ku humesiwa a mali yo ringana ni munyikelo, ni 20 porcento. Hikwalaho ku wa hi ni cichawo ca hombe hi zvilo zvo basa lezvi zvi nga lumba Jehovha. — Le 5:14-16.
23-29 KA NOVEMBRO
TITSHOMBA TI NGA KA MHAKA YA NUNGUNGULU | LEVI 6-7
“Munyikelo wa kubonga”
(Levi 7:11, 12) Lowu hi nayo wa muphahlelo wa kurula, lowu wu ta nga nyikelwa ka Jehova. 12 Loku munhu a wu nyikela kota munyikelo wa kubonga kakwe, zvin’we ni muphahlo wa kubonga i ta nyikela ni zvikhekhetselo zvi nga hiko na comelo, na zvi totilwe mafura, ni zvibaba zva mapa yo saseka ma katingilweko, na ma chelilwe mafura.
Lezvi hi zvi gondzako ka bhuku ga Levi
Cigondzo ca wumbiri: Hi tirela Jehovha hakuva hi bonga lezvi a hi mahelako. Kasi ku khanyisa a mhaka leyi, a hi kambisiseni a miphahlo ya kurula leyi yi nga mahiwa le Izrayeli wa kale. Lomu ka bhuku ga Levi hi gondza lezvaku a muIzrayeli i wa maha a muphahlo wa kurula “kota munyikelo wa kubonga”. (Lev. 7:11-13, 16-18) A munyikelo lowo i wa wu maha hi ku zvi randza kakwe na ku nga hi cikurumeta. Hikwalaho, lowu ku wa hi munyikelo wa ku zvi randza lowu a munhu a nga wu maha hi kota ya ku randza Nungungulu wakwe, Jehovha. A nyama ya cihari leci va nga maha hi cona muphahlo wa kurula yi wa giwa hi munhu loyi a mahileko munyikelo, ni ngango wakwe, ni vapristi. Kanilezvi ku wa hi ni zvipandze zvo kari zva cihari leco zvi nga hi zva Jehovha basi. Hi zvihi zva kona?
(Levi 7:13-15) I ta neha kambe a zvibaba zvi nga ni comelo, zvin’we ni cifuyo ca muphahlo wa kurula muphahlelweni wakwe wa ku khesa. 14 A ka muphahlo lowu i ta pambula cibaba cin’we kadha lixaka, a kuva munyikelo wa ku tlakuselwa mahlweni ka Jehovha; zvi ta lumba a mupristi loye a nwatsekelako alatini a nkhata wa muphahlo wa kubonga. 15 Kasike a nyama ya cifuyo ca muphahlo wa kurula ca munyikelo wakwe wa kukhesa, yi ta giwa gona siku lego va phahlelako ha gona, va nga siyi nchumu kala mandziku.
w00 15/8 15 ¶15
Minyikelo yi tsakisako Nungungulu
A munyikelo wun’wani wu nga mahiwa hi kuzvirandza ku wa hi munyikelo wa kurula, wu kumbhukiwako ka Levi cipimo 3. Hi cihebheru a gezu “kurula” gi wula zvo hundza kurula ko kala tiyimpi kutani maguwa. A bhuku Estudos nas Instituições Mosaicas gi ngalo: “Lomu ka Bhibhiliya a kurula loko ku woneka ka kuzwanana ko rula na Nungungulu, kutshameka, litsako”. A munyikelo wa kurula wu wa nga mahiwe kasi ku kuva ni kurula na Nungungulu, kanilezvi kasi ku kombisa kubonga kutani ku ti bhuza hi ciyimo ca kurula na Nungungulu, ci kumiwako hi lava va amukelekako kakwe. A vapristi ni mumahi wa munyikelo va wa sangula hi ku maha munyikelo wa mafura ni nkhata hi kona va nga maha munyikelo wa kurula. (Levi 3:17; 7:16-21; 19:5-8) Hi ndlela yo fanekisela, a mumahi wa munyikelo, ni vapristi na Jehovha Nungungulu va waga zvin’we a munyikelo lowo, zvi nga komba kuzwanana cikari ka vona.
(Levi 7:20) Kanilezvi kani hi wihi loye a nga hlazvekangiko, loku aga a nyama ya muphahlo wa kurula, lowu wu nga wa Jehovha, a munhu loye i ta susiwa ka va ka kabye.
w00 15/8 19 ¶8
Minyikelo ya wudzundzu yi tsakisako Jehovha
A mumahi wa munyikelo i wa fanele ku tshamisa kuyini? A nayo wu waku loku munhu a lava ku tshinela Nungungulu i wa fanele ku basa. Loku hi cigelo co kari a munhu a tshukile a maha zvilo zvo biha, a kusangula i wa fanele ku maha munyikelo wa ciwonho kasi ku a woneka na a basile mahlweni ka Jehovha. Lezvo zvi wa ta maha ku a munyikelo wakwe wa kurula wu amukeleka mahlweni ka Jehovha. (Levi 5:1-6, 15, 17) Xana ha li wona lisima li nga kona hi ku tshama na hi basile mahlweni ka Jehovha? Loku hi lava lezvaku a wukhozeli ga hina gi amukeleka mahlweni ka Jehovha, hi fanele ku tekela ku tsika ni cihi ci nga yelaniko ni milayo ya Jehovha. Hi fanele ku londzowota ni cihi civhuno leci Nungungulu a hi nyikako hi ku tirisa “madhota ya bandla” na Jesu Kristu a “muphahlo wa ku hi tlhatlhisa ka zviwonho zva hina”.— Jakobe 5:14; 1 Johani 2:1, 2.
Kela titshomba ta moya
(Levi 6:13) A ndzilo wu ta vura wontlbe masiku laha alatini, wu nga dzuki wu timeka.
it-2148 ¶4
Ndzilo
Lezvi wu yelanisako zvona ni tabhernakeli ni tempeli. A ndzilo wu wa tirisiwa ka wukhozeli legi gi nga mahiwa tabhernakeline niku hi ndhzako ka cikhati wu tirisilwe kambe tempeleni. Mixo ni mixo, gambu ni gambu a mupristi i wa fanele ku hisa libani le alatini ga libani. (Ek 30:7, 8) A nayo wa Nungungulu wu wa wula lezvaku a ndzilo wa lomu alatini ga munyikelo wu wa fanele ku tshama na wu vhura. (Le 6:12, 13) A mitsalo a yi seketeli a cihena ca ciJudha ca lezvaku a ndzilo wa le alatini wu wa dziveliwa hi Nungungulu hi ndlela ya cihlamaliso. Hi kuya hi zvileletelo zvo sangula zva Jehovha ka Mosi, a vana va Aroni va wa fanele ku ‘dzivela a ndzilo laha alatini, va veketela tihunyi ndzilweni’ na va nga se tlhateka muphahlo alatini. (Le 1:7, 8) Ku vile hi ndzhako ka ku mahiwa ka muphahlo wa hamba ya ku wumbela wupristi laha a ndzilo wu ngata hi ka Jehovha, wu nga woneka kota refu le hehla ka tabhernakeli, wu ta hisa a muphahlo wu nga sina wu hisilwe laha alatini. Hikwalaho, a ndzilo wa cihlamaliso a wu wonekangi kasi ku dzivela a tihunyi laha alatini, kanilezvi kasi ku “hisa a muphahlo wa kuhiswa, ni mafura laha alatini.” Makunu a ndzilo lowu wu nga simama ku vhura laha alatini, kuzvilava ku wa hi kupatsana ka ndzilo wa Jehovha ni lowu wu nga sina wu dzivelilwe laha alatini. (Le 8:14–9:24) Hi ndlela yo fana, laha Solomoni a nga maha mukhongelo wo gumesa wa ku hendleleta ntempeli, a ndzilo wa cihlamaliso wu tako hi ka Jehovha wu no ta hisa a muphahlo wakwe. — 2Kr 7:1; wona kambe Val 6:21; 1Tih 18:21-39; 1Kr 21:26 a mavhesi lawa ma komba a zvikombiso zva ku tirisiwa ka ndzilo wa Jehovha kota ndlela ya ku amukela a minyikelo ya malandza yakwe.
(Levi 6:25) Byela Aroni ni vana vakwe, uku ka vona: Lowu hi nayo wa muphahlo wa kuwonha. Ka wutshamu legi va tlhavelako kona zvihari zva miphahlo ya kuhiswa, hi kona laho va ta nga tlhavela kona a zvihari zva miphahlo ya kuwonha mahlweni ka Jehovha. Zvi basile nguvhu.
si 27 ¶15
Bhuku ga wunharu ga Bhibhiliya — Levi
(3) Ku wa laveka a munyikelo wa ciwonho, kasi munhu a fela ku tlhatlhisiwa ka zviwonho a zvi mahileko hi ku phazama. A muhlowo lowo wa cihari ci nyikelwako wu fanele ku yelana ni ciwonho leci ci to hloliwa, hi mupristi, hi vanhu vontlhe, hi hosi yo kari kutani hi munhu wo ringanelwa. A kuhambana ni minyikelo yi nga mahiwa hi ku zvi randza ni minyikelo ya kurula a minyikelo ya ku tlhatlhisa zviwonho yi wa hi cikurumeta. — 4:1-35; 6:24-30.
30 KA NOVEMBRO – 6 KA DEZEMBRO
TITSHOMBA TI NGA KA MHAKA YA NUNGUNGULU | LEVI 8-9
“Cikombiso ca makatekwa ya Jehovha”
(Levi 8:6-9) Zvinghaho Mosi i lo tshineta Aroni ni vana vakwe, a va hlazva hi mati. 7 I lo ambexa Aroni a hembe, a mu boha hi bhandi, ni ku mu ambexa ni nghanju, zvonake i lo mu ambexa ni efode, a yi tiyisa hi ngoti ya kona. 8 I lo mu ambexa ni ngenge laha cifuveni, a vekela ka yona Urima na Tumima. 9 I lo mu vekela ni cihuku laha hlokweni, le mahlweni ka cihuku i lo vekela a mubhodi wa ndzalama, ci nga cidlodlo co basa, kota lezvi Jehovha a leleteleko Mosi.
(Levi 8:12) I lo chela mafura yo tola hlokweni ka Aroni kasi ku mu basisa.
it-2414
Ku yimisiwa kota mupristi
Mosi i no hlambisa (kutani ku va ruma va hlamba hi voce) Aroni ni vana vakwe, na Nadabe, na Abihu Eliazare na Itamare lomu ka cinamelo ca suku (basia ya kobre) leci ci nga hi kona, a guma a boha Aroni a tinguwu ta wupristi. (Mitse 3:2, 3) Hikwlaho, a ku mu boha a tinguwu leto to saseka, zvi wa komba ku Aroni i nyikilwe a wutihlamuleli. A tinguwu leto ti wa komba a matshamela ni wutihlamuleli legi ka ntiro lowu a nga hi nawu. Hi ku landzela, Mosi i no guma a tota a tabhernakeli ni zvontlhe zvibya zva kona, ni alati ga miphahlo ya ku hisiwa, cinamelo ca suku (basia ya kobre) ni zvontlhe zvibya lezvi va nga kari va zvi tirisa. Ndzhako ka lezvo va no woniwa kota vanhu va basileko, va hlawulilweko kasi ku maha a ntiro wo hlawuleka wa Nungungulu. Hi ku gumesa Mosi i no tota Aroni hi ku mu chela mafura yo tota hlokweni yakwe. — Le 8:6-12; Ek 30:22-33; Lis 133:2.
(Levi 9:1-5) Hi siku ga wuntlhanu ni manharu, Mosi i lo vitana Aroni ni vana vakwe, ni masingalakati ya va ka Israeli, 2 aku ka Aroni: Teka a role gi tava ga muphahlelo wa kuwonha, ni hamba yi nga hiko na bawa, yi tava ya muphahlelo wa kuhiswa, u phahlela ka Jehovha. 3 Zvonake u ta wula ka vanana va ka Izrayeli, uku: Tekani a mhongo ya muphahlo wa kuwonha, ni role, ni yivhu, zva lembe gin’we a wukale, na zvi nga hi na bawa, zvi tava zva muphahlelo wa kuhiswa; 4 ni nkuzi, ni hamba ya muphahlelo wa kurula, mu zvi phahlela ka Jehovha, ni munyikelo wa zvakuga zva mapa ma chelilweko mafura; hakuva inyamutlha Jehovha i ta ti wonekelisa ka n’wina. 5 Zvinghaho va lo neha mahlweni ka tabhernakeli ga mutlhangano lezvi zvi leletelweko hi Mosi; zvonake a ntlhangano wontlhe wu lo tshinela, wu ta yima mahlweni ka Jehovha.
it-11208 ¶8
Ku yimisiwa kota mupristi
Hi siku ga wu 8, Aroni kota mupristi a yimisilweko a tlhela a nyikiwa wutihlamuleli, i no sangula ku maha a ntiro wakwe hi ku maha miphahlo ya ku tsetselela zviwonho zva vana va ka Izrayeli (na a nga vhuniwi hi Mosi), zvi wa lava lezvaku va basisiwa na ku nga hi ka zviwonho zvabye zva mabeleko basi, kanilezvi hi kota ya lezvi va nga kala ku ingisa hi ku khozela role ga ouro, lezvi zvi nga guma zvi maha ku va zangarelwa hi Jehovha. (Le 9:1-7; Ek 32:1-10) Laha a mupristi loyi wa muswa a nga mbheta ku maha muphahlo lowo, Jehovha i kombile lezvaku i wu amukele hi ku rumela a ndzilo wa cihlamaliso, handle ko kanakana wu wonekisileko kota mhinga ya refu le hehla ka tabhernakeli, na wu hisa a muphahlo lowu wu nga hi le hehla ka alati. — Le 9:23, 24.
(Levi 9:23, 24) Zvonake Mosi na Aroni va lo nghena lomu ka tabhernakeli ga mutlhangano, zvonake va huma, va katekisa a vanhu; ni kungangamela ka Jehovha ku lo woneka ka vanhu vontlhe. 24 Ni ndzilo wu lo huma mahlweni ka Jehovha wu hisa a muphahlo wa kuhiswa, ni mafura laha alatini. Ni vanhu vontlhe va lo zvi wona, zvonake va lo kanyuluka hi kutsaka, va ti wisa la hasi hi tinghohe tabye.
Lezvi hi zvi gondzako ka bhuku ga Levi
Cigondzo ca wumune: Jehovha wa katekisa a hlengeletano yakwe ya laha misaveni. Wona lezvi zvi mahekileko hi 1512 Mahlweni ka Nguva ya Hina a cikhati leci ku nga yimiswa a tabhernakeli le Citsungeni ca Sinayi. (Ekso. 40:17) Mosi hi yena a nga rangela a mubuzo wa ku yimisiwa ka Aroni ni vana vakwe kota vapristi. A vaIzrayeli va wa tlhanganile kasi va ta wona a vapristi na va nyikela a miphahlo yabye yo sangula. (Lev. 9:1-5) Jehovha i zvi kombisile kuyini lezvaku i wa va amukela a vapristi lavo va nga ha hi ku yimisiwa? I no rumela ndzilo hi le tilweni wu ta hisa a muphahlo wu mbhela wu ku bhi laha alatini, a cikhati leci Aroni na Mosi va nga kari va katekisa a vanhu. — Lera Levi 9:23, 24.
Kela titshomba ta moya
(Levi 8:6) Zvinghaho Mosi i lo tshineta Aroni ni vana vakwe, a va hlazwa hi mati.
Hikuyini hi faneleko ku basa?
A cilaveko ca lezvaku a vapristi va Izrayeli va hlazeka ci wula zva hombe ka vanhu va Jehovha inyamutlha. Lava hi gondzako navo Bhibhiliya a kutala ka zvikhati va ku wona a kubasa ka matshamu ya hina ya wukhozeli va tlhela va wona kutisasekisa ka hina ni maambalela ya hina ya ma nene. Hambulezvo, a kubasa ka vapristi ku hi vhuna ku wona lezvaku ni wihi loyi a kandzihako citsunga ca wukhozeli ga Jehovha i fanele kuva ni “mbilu yi hlazvekileko.” (Lera Tisimu 24:3, 4; Isa. 2:2, 3.) A ntiro wo basa lowu hi mahelako Nungungulu hi fanele ku wu maha hi mapimo ni timbilu ti basileko zvin’we ni mimiri yi basileko. Lezvo zvi lava kuva hi tshama hi ku ti hlola. Hi ku maha lezvo, a vokari va nga ha pola cilaveko ca ku cica zva hombe kasi va basa. (2 Kor. 13:5) Hi cikombiso, a munhu a bhabhatisilweko loyi a hlalelako zvithombe zva masango ha womu, i fanele ku ti wutisa lezvi, ‘Xana ndza tshama ndzi basile?’ Hi kulandzela i fanele ku lava civhuno kasi ku daya mukhuwo lowo wo nyenyeza. — Jak. 5:14.
(Levi 8:14-17) I lo neha a nkuzi ya muphahlo wa kuwonha, Aroni ni vana vakwe va lo tlhateka a mandla yabye hlokweni ya nkuzi ya muphahlo wa kuwonha. 15 Mosi i lo yi tlhava, a teka a nkhata wa kona, laha na petile litiho lakwe lomu nkhateni i lo tota timhondzo ta alati matlhelo wontlhe, a basisa a alati; zvonake i lo chulula a nkhata lahasi ka alati, a gi basisa kasi gi fela ku mahelwa a ndzhiho. 16 Zvonake i lo teka a mafura wontlhe ma pomeleko marumbu, ni pambani wa zvivindzi, ni tiswa timbiri ni mafura ya tona, a zvi hisa alatini. 17 Kanilezvi a nkuzi ni bhebhe ga yona, ni nyama ya kona, ni swanyi wa kona, i loya zvi hisa lahandle ka wugovelo, khwatsi hi lezvi Jehovha a leleteleko Mosi.
it-3 17 ¶6
Mosi
Nungungulu i hlawulile Mosi kasi a ve mutlhanganyisi wa nayo ka va Izrayeli, Mosi i wa hi ni cikhundla co tlakuka nguvhu ka Jehovha ca ku a kuna munhu mun’wani a nga ci kumako ahandle ka Jesu Kristu, a Mutlhanganyisi wa civhumelwano ciswa. Mosi i n’watsekeli nkhata wa miphahlo ya zvihari laha ka bhuku ga civhumelwano, a cipandze cin’wani ca nkhata lowo ci wa yimela Jehovha, a cin’wani ci wa yimela a citshungo (handle ko kanakana ku wuliwa a madhota lawa ma nga yimela a citshungo). Laha Mosi a nga lera a bhuku ga civhumelwano, vona va te: “Zvontlhe lezvi Jehovha a wulileko hi ta zvi ingisa, hi zvi maha.” (Ek 24:3-8; Mah 9:19) Ka cikhundla cakwe ca wutlhanganyisi, Mosi i vile ni thomo ga ku rangela a ku akiwa ka tabhernakeli ni ku mahiwa ka zvibya zva kona, lezvi a zvileletelo zva kona a nyikilweko hi Nungungulu, ni ku yimisa vapristi, ku tota a tabhernakeli na Aroni a mupristi wa hombe hi mafura yo hlawuleka. Hikwalaho, i rangele a mitiro yo sangula ya mupristi muswa Aroni. — Eksodusi cipimo 25-29; Levi cipimo 8, 9.