Timhaka ta mabhuku ma tako ka Cibhukwana ca Mutlhangano

2-8 KA MAIO

TITSHOMBA TI NGA KA MHAKA YA NUNGUNGULU | 1 SAMUELI 27-29

“Tipulani leti Dhavhidha a nga ti tirisa tiyimpini takwe”

Perspicaz vhol. 1 paj. 164

Akixi

A cikhati leci Dhavhidha a nga kari a tsutsuma Sawule, i no ya fihlala makhati mambiri lomu ku nga kari ku fumelwa hi Hosi Akixi. Ka khati go sangula, laha va nga pimisa ku Dhavhidha i wa hi nala, Dhavhidha i no ti mahisa ku khwatsi munhu wo suka tipeni zvonake Akixi i no mu chusa kasi a ti fambela, na a pimisa ku munhu wo hlanya. (1 Sam. 21:10-15; Lis. 34: Magezu ya laha hehla ka cipimo; 56: Magezu ya laha hehla ka cipimo) Laha Dhavhidha a nga tlhela kambe ka Akixi, i wa hi ni 600 wa masochwa ni maxaka yakwe, hikwalaho, Akixi i no va laya kuya tshama le Ziklagi. Ndzeni ka lembe ni mune wa tihweti na va tshama seyo, Akixi i waku Dhavhidha ni vanhu vakwe va wo zama ku lavetela tindlela ta kufumela a matiko ya le Judha, kuveni hi lisine la kona, Dhavhidha i wo phanga a vaGexure, vaGirze ni vaAmaleki. (1 Sam. 27:1-12) Dhavhidha i no humelela kuphangeni loko laha ka kuza Akixi a mu yimisa kuva gwardha yakwe laha a vaFilistiya va nga kari va ti longisela kasi ku yalwa na Hosi Sawule. Kanilezvi hi ndzhako ka cikhati, Dhavhidha ni masochwa yakwe va no tlhela le Ziklagi andzhako ka loku a “tihosi ta vaFilistiya” ti va sindzisile ku tlhela. (1 Sam. 28:2; 29:1-11) Zvi wonekisa ku khwatsi a cikhati leci Dhavhidha a nga maha hosi a tlhela alwa ni va ka Gadhi, Akixi a nga dawangi. I no simama ku hanya kala a cikhati leci Solomoni a nga fuma. — 1 Tih. 2:39-41; wona laha ka ku GATI.

Murindzeli 03.21 paj. 4 par. 8

Vaswa, zvini mu nga mahako kasi a van’wani va mu tsumba?

Wona cikarato cin’wani leci Dhavhidha a kumeneko naco. Andzhako ka loku a totilwe kasi ava hosi, zvi lavile ku a rindzela hi malembe yo tala kasi a sangula ku fuma le Judha. (1 Sam. 16:13; 2 Sam. 2:3, 4) Ndzeni ka cikhati leco, cini ci mu vhunileko ku rindzela hi lihlazva-mbilu? Wutshan’wini ga ku mbhela ntamu a kondla mawoko, i no veka kupima ka lezvi zvi nga koteka ku a maha. Hi cikombiso, laha a nga tsutsuma a ya tumbela ka wutshamu gi nga fumelwa hi vaFilistiya, i no londzowota kulwa ni valala va vaIzrayeli. Hi ku maha lezvo, i no vhikela tiko ga Judha hi le timbhirini. — 1 Sam. 27:1-12.

Perspicaz vhol. 2 paj. 354 par. 6

Kuhemba

Hambu lezvi a Bhibhiliya gi konako a kuhemba loku ku nga vangako mhango, lezvo a zvi wuli ku a munhu o sindziseka ku wula timhaka ta lisine ka vanhu va nga hiko ni fanelo ya ku ti tiva. Jesu Kristu i layile lezvi: “Mu nga nyiki timbyana a zvilo zvi basileko ne hambu ku teka maperola ya n’wina mu hoxela makhumba, kasi ma nga tshuki ma ma kandzihetela ma gumesa ma hundzuluka ma mu khadamula.” (Mat. 7:6) Hi zvalezvo zvi nga maha ku ka zviyimo zvo kari Jesu a ti wonela ku wula timhaka ta lisine kutani ku nyika mihlamulo yo kongoma ka zviwutiso zvo kari loku a wona ku lezvo zvi wa ta mu vangela mhango. (Mat. 15:1-6; 21:23-27; Joh. 7:3-10) Zvi wonekisa ku hi zvalezvo zvi nga maha ku Abrahama, na Isaka, na Rahabi na Elixa va nga ti kombekisi a ku vakhozeli va Jehovha. — Gen. 12:10-19; Cip. 20; 26: 1-10; Jox. 2:1-6; Jak. 2:25; 2 Tih. 6:11-23.

Kela titshomba ta moya

Sentinela 01/01/10 paj. 20 par. 5-6

A vafileko va nga vhunetela a va hanyako ke?

Hi nga ehleketa hi mhaka leyi. A Bhibhiliya gi loku a munhu afa i “tlhelela ntshurini” niku “ku mbhela makungu yakwe”. (Lisimu 146:4) Sawule na Samuweli va wa zvi tiva khwatsi ku Nungungulu i wa nga zvi lavi ku a vanhu vakwe va ti tlhanganisa ni tin’anga. Kusanguleni, Sawule i zile a rangela vaIzrayeli kasi va ti tlhatlha ka zvilo zva wudhimoni. — Lev. 19:31.

Hi nga ehleketa hi mhaka leyi: Loku Samuweli — a muphrofeti wo tsumbeka i wa ha simama ku hanya kota nguluve, xana hakunene i wa ta tshova a nayo wa Nungungulu, hi ku vhumela ku a n’anga yi mu khoma kasi a wulawula na Sawule? Jehovha i wa sina a alile ku wulawula na Sawule. Xana zvi wa ta koteka ku a n’anga yi kurumeta Jehovha— a Nungungulu wa Ntamu Wontlhe kasi a wulawula na Sawule hi ku tirisa matsuva Samuweli ke? Ahihi, a zvi nge koteki! Hi lisine, “Samuweli” loye, ne i wa nga hi yena loyi wa muphrofeti wo tsumbeka wa Jehovha. Ku wa hi a dhimoni go biha gi nga ti mahisa ku khwatsi hi Samuweli.

9-15 KA MAIO

TITSHOMBA TI NGA KA MHAKA YA NUNGUNGULU | 1 SAMUELI 30-31

“Tsutsumela ka Jehovha Nungungulu wa wena kasi a ya ku tiyisa”

Sentinela 01/08/06 paj. 28 par. 12

Kuma litsako hi ku chava Jehovha

A cichavo leci Dhavhidha a nga hi naco hi Jehovha a ci mu vhunangi ku a ti wonela ku maha zvilo zvo biha basi. Kanilezvi ci mu vhunile ku ka zviyimo zvo nonoha a maha zviboho hi wutlhari ni ku tiya hlanha. Hi lembe ni mune wa tihweti, Dhavhidha ni masochwa yakwe va no ya fihlala le Ziklagi, ka wutshamu ga vaFilistiya, na va tsutsuma Sawule. (1 Samueli 27:5-7) Ka khati go kari, Dhavhidha ni masochwa yakwe na va sukile, ku no sala kuta vaAmaleki va ta hisa dhoropa va tlhela va teka vana vabye, ni vasati vabye ni mitlhambi yabye. A cikhati va nga wuya va ta wona lezvi zvi nga mahekile va no rila. Lezvo zvi mahile ku a masochwa ya Dhavhidha ma bayiseka ma tlhela ma lava ku mu gandla hi maribye. Hambu lezvi a nga rerekile, Dhavhidha a nga mbhelangi ntamu. (Mavingu 24:10) A cichavo cakwe hi Nungungulu ci mu mahile ku a tsutsumela kakwe niku Dhavhidha ‘i no ti tiyiseta hi Jehovha’. Hi ku vhuniwa hi Jehovha, Dhavhidha ni masochwa yakwe, va no landza vaAmaleki niku va zvi kotile ku teka zvilo zvabye zvontlhe. — 1 Samueli 30:1-20.

Murindzeli 01/04/12 paj. 31 par. 14

Jehovha wa hi hlayisa kasi hi pona

Dhavhidha i kumene ni zvikarato zvo tala wutomini gakwe. (1 Sam. 30:3-6) A magezu yakwe ma komba lezvaku Jehovha i wa zvi tiva lezvi Dhavhidha a nga ti zwisa zvona. (Gondza Lisimu 34:18; 56:8.) Nungungulu wa zvi tiva lezvi hinawu hi ti zwisako zvona. Loku hi ‘tshovekile mbilu’ kutani hi ‘pandzekile moya,’ yena i tshinela kusuhani na hina. Lezvo zva hi chavelela, a ku fana ni lezvi zvi chaveleleko Dhavhidha, loyi a nga yimbelela aku: “Ndzi ta tsaka ndzi bhuma hi kota ya wuxinji ga wena; hakuva u wonile a hlomulo wa mina; u tivile a zvikarato zva muhefemulo wa mina.” (Lis. 31:7) Kanilezvi, Jehovha i maha zva hombe zvo hundza ku wona a zvikarato zva hina. Wa hi hlayisa hi ku hi chavelela ni ku hi tiyisa. A yin’we ya tindlela leti a hi hlayisako hi tona mitlhangano ya bandla.

Kela titshomba ta moya

Sentinela 15/03/05 paj. 24 par. 8

Timhaka-tshinya ta bhuku ga Samuweli wo sangula

30:23, 24. A ciboho leci ci nga ka Mitsengo 31:27, ci komba lezvaku Jehovha wa nyika lisima lava va nga ni ntiro wa ku vhunetela lomu bandleni. Hikwalaho, ni cihi leci hi mahako hi fanele ku ‘ci maha hi muhefemulo wontlhe a ku khwatsi hi loku hi tirela Jehovha, na ku nga hi vanhu’. — Va Le Kolosi 3:23.

16-22 KA MAIO

TITSHOMBA TI NGA KA MHAKA YA NUNGUNGULU | 2 SAMUELI 1-3

“Zvini hi gondzako ka lisimu la ‘Wura’?”

Sentinela 15/06/00 paj. 13 par. 9

Dzundza lava va yimisilweko ku rangela

A ku Dhavhidha i mbhelile ntamu a cikhati leci a nga xanisiwa? I no rila ka Jehovha aku: ‘Ku na ni zvigevenga zvi hlotako wutomi ga mina.’ (Lisimu 54:3) I no vhulula mbilu yakwe ka Jehovha, aku: ‘Nungungulu wa mina, ndzi tlhatlhise ka valala va mina, . . . a vanhu va lunya va tsombana va ndzi vhukela; hambu ndzi nga hambunyetangi ne ni ku wonha, Jehovha. Hambu ndzi nga hi na nandzu, va tsutsuma na va hlomile; vhuka, u ndzi khinga, u languta.’ (Lisimu 59:1-4) A ku fana na Dhavhidha, u tshuka u ti zwisa ku a wokari a nga ni wutihlamuleli go rangela wa ku vangela zvikarato hambu loku u nga mu mahelangi nchumu wo biha? Dhavhidha a nga tshukangi a tsika ku mu kombisa cichavo Sawule. A cikhati Sawule a ngafa, Dhavhidha a nga tlulangi hi ku tsaka, kanilezvi i no chula lisimu la cirilo, aku: ‘Sawule na Jonatani va wa randzeka ni ku xalalisa kuhanyeni kabye, . . . va wa haha ku hundza magama, va hi ni ntamu ku hundza tinghala. Vanhwana va ka Izrayeli! Rilelani Sawule.’ (2 Samueli 1:23, 24) Dhavhidha i kombisile cichavo ca hombe hi Sawule, a totilweko wa Jehovha, hambu lezvi Sawule a nga mu khoma hi ndlela ya hava! Leco cikombiso ci nene ka hina.

Murindzeli 01/04/12 paj. 16 par. 8

A kungatsumbeki cikombiso ca masiku yo gumesa!

A Bhibhiliya ga wulawula kambe hi vanhu vo tala vo tsumbeka. A hi wulawuleni hi vambiri hi tlhela hi susa cigondzo ka vona. Hi ta sangula hi wokari a nga kombisa kutsumbeka ka Dhavhidha. Jonatani, a n’wana wa nhondzo wa Hosi Sawule, hi yena a nga fanele kuva ciga-tshomba ca wuhosi le Izrayeli. Kanilezvi Jehovha i lo hlawula Dhavhidha lezvaku a fuma andzhako ka Sawule. Jonatani i kombisile cichavo ka lezvi Nungungulu a nga zvi mahile, niku wutshan’wini ga ku wona Dhavhidha kota nala wakwe, “a mbilu ya Jonatani yi lo bohana ni mbilu ya Dhavhidha,” a tsumbeka ka Dhavhidha. Jonatani i zile a tlhatlha a tinguwo takwe a nyika Dhavhidha, zvin’we ni supadho yakwe ni wura gakwe, ni bhandi gakwe; hi ndlela leyo a mu nyika a fanelo ya kufuma leyi a nga hi nayo. (1 Sam. 18:1-4) Jonatani i lo maha zvontlhe zvi nga hi ntan’wini wakwe lezvaku a tiyiseta Dhavhidha, laha ka kuza a veka wutomi gakwe mhangweni hi ku mu vhikela mahlweni ka Sawule. Jonatani i te ngalo ka Dhavhidha: ‘U nga chavi, hakuva a canja ga dhadhani Sawule gi nga ta ku kuma; wena u ta fumela va ka Izrayeli, mina ndzi tava nduna ya wena.’ (1 Sam. 20:30-34; 23:16, 17) A zvi hlamalisi lezvi andzhako ka kufa ka Jonatani, Dhavhidha a ngaba nkosi a yimbelela lisimu la cirilo.— 2 Sam. 1:17, 26.

Kela titshomba ta moya

Perspicaz vhol. 1 paj. 1248 par. 1

Makabye

A gezu “makabye” ga tirisiwa kambe ka vanhu va wumbeneko hi zvigelo ni makungo yo fana. Hi cikombiso, Hiramu a Hosi ya le Tire, i vitanile Hosi Solomoni a ku makabye wakwe. A hi ku khwatsi va wova va tanga yin’we ne cikhundla cin’we. Kanilezvi kuzvilava hi lezvi va nga hi ni makungo yo fana ya ku longisela mapulango ni zvibya zvin’wani zva tempeli. (1 Tih. 9:13; 5:1-12) Dhavhidha i tsalile lezvi: ‘Hi nga wonani kutsakisa ka zvona, loku maxaka [vamakabye] ma hanya khatigin’we hi kuzwanana.’ Dhavhidha i wo komba lezvaku a hi wuxaka basi gi mahako ku lava va nga va ka makabye va hanya hi kurula ni kuzwanana. (Lis. 133:1) Hi lisine, a hi wuxaka gi nga maha ku Dhavhidha a vitana Jonatani ku makabye wakwe, kanilezvi lirandzo ni ku khatala loku va nga hi nako. (2 Sam. 1:26) A vanghana lava va nga ni matshamela ni makungo yo fana, hambu loku ma bihile, va vitaniwa ku va ka makabye. — Mav. 18:9.

23-29 KA MAIO

TITSHOMBA TI NGA KA MHAKA YA NUNGUNGULU | 2 SAMUELI 4-6

“Chava ku khunguvanyisa Jehovha”

Sentinela 15/05/05 paj. 17 par. 8

Timhaka-tshinya ta bhuku ga Samuweli wa wumbiri

6:1-7. Hambu lezvi Dhavhidha a nga xuva ku maha zva zvinene a ku pakela Arke lomu ka kareta zvi wa tshova a nayo wa Nungungulu niku zvi vile ni wuyelo go biha nguvhu. (Eksodusi 25:13, 14; Mitsengo 4:15, 19; 7:7-9) Lezvi zvi nga humelela Uza andzhako ka loku a khomile a Arke zvonawu zvi komba lezvaku a kuva ni mixuvo ya yinene a zvi cici a milayo ya Nungungulu.

Sentinela 01/02/05 paj. 27 par. 20

Contlhe cikhati Jehovha i maha zvo lulama

A hi faneli ku rivakelwa ku Uza yenawu i wa fanele ku ngha a zvi tiva ku zvi wa nga ringani ku a khoma a Arke. A Arke gi wa yimela a kuva kona ka Jehovha. A Nayo wu wa komba ku lava va nga kala va nga hi na fanelo ya ku khoma Arke, va wa nga faneli ku gi khoma futsi. Lezvo zvi wa komba kubaseni ku loyi a nga wa ta tshova nayo lowo i wa ta dawa. (Mitsengo 4:18-20; 7:89) Hikwalaho, a ku rurisa arke lego go basa zvi wa fanele ku woniwa kota zvilo zva lisima. Zvi laha kubaseni ku Uza i wa hi muLevhi (hambu lezvi a nga kala a nga hi mupristi); hikwalaho, i wa fanele ku ngha a wu tiva khwatsi Nayo. A zvin’wani kambe, ka malembe yo kari mahlweni ka lezvo, a arke gi tshamile kaya ka papayi wakwe kasi gi hlayiseka. (1 Samueli 6:20–7:1) Gi tshamile seyo hi cipimo ca 70 wa malembe, kala cikhati leci Dhavhidha a nga boha ku gi rurisiwa. Hikwalaho, zva koteka ku Uza a tivile milayo xungetano hi Arke kusukela wun’wananeni gakwe.

Sentinela 01/02/05 paj. 27 par. 21

Contlhe cikhati Jehovha i maha zvo lulama

Kota lezvi hi zvi wonileko, Jehovha wa lera timbilu. Kota lezvi a Mhaka yakwe yi kombako ku Uza i mahile zvilo hi “matloti”, zva koteka ku ngha Jehovha a wonile zvin’wani zva hava ka Uza, zvi kalako zvi nga kumbukiwangi hi ku kongoma lomu ka Bhibhiliya. A ku Uza i wa hi munhu wa matshandza, a nga randza ku maha zvilo a nga kala a nga hi na fanelo ya ku zvi maha? (Mavingu 11:2) A ku a ku fambisa Arke lomu ko tala vanhu, legi a maxaka yakwe ma nga gi vekile, zvi mu mahile a tizwa na a hi wa lisima? (Mavingu 8:13) A ku a kukholwa kakwe ku wa nga tiyangi laha ka kuza a alakanya ku a woko ga Jehovha gitsongwani nguvhu, a gi nge zvi koti a ku khoma a Arke go basa legi gi nga yimela a kuva kona Kakwe? Kani cive cihi a cigelo ca kona, hi nga tiyiseka lezvaku lezvi Jehovha a nga maha zvi lulamile. Kuzvilava i wonile zvo kari mbilwini ya Uza, lezvi zvi nga maha ku a mu lamula kwalaho. — Mavingu 21:2.

Kela titshomba ta moya

Sentinela 01/04/96 paj. 29 par. 1

Contlhe cikhati rula ndzhwalo wa wena ka Jehovha

Dhavhidha kota hosi, i wa hi ni wutihlamuleli go kari ka mhaka leyi. Lezvi a nga maha, hambu munhu a nga ni wunghana go tiya na Jehovha, a nga tshuka a maha zvilo zvo kari zva hava ka zviyimo zvi ringako kukholwa. Kusanguleni Dhavhidha i no swireka, a gumesa a sangula ku chava. (2 Samueli 6:8, 9) A wunghana go tsumbeka legi a nga hi nago na Jehovha gi no ringiwa zva cima. Legi gi vile khati a nga kala ku rula ndzhwalo wakwe ka Jehovha, hi ku kala a nga landzeli zvileletelo Zvakwe. A ku lezvo zva tshuka zvi hi humelela? A ku ha mu nyika nandzu Jehovha hi kota ya zvikarato hi kumanako nazvo loku hi tsikile ku ingisa zvileletelo Zvakwe? — Mavingu 19:3.

30 KA MAIO–5 KA JUNHO

TITSHOMBA TI NGA KA MHAKA YA NUNGUNGULU | 2 SAMUELI 7-8

“Jehovha a maha civhumelwano na Dhavhidha”

Sentinela 01/04/10 paj. 20 par. 3

“A mufumo wa wena wu ta tiya”

Jehovha i no khumbiwa hi lezvi Dhavhidha a nga zvi xuva hi mbilu yontlhe. Kasi ku tatisa a cikombelo ca Dhavhidha ni ku tatisa a kungo gakwe, Nungungulu i no maha civhumelwano naye ci nga komba ku ka pswalo wakwe ku wa ta humelela a munhu a nga wa ta fuma kala kupindzuka. Natani i no byela Dhavhidha a citsumbiso leci co tiya ca Nungungulu: ‘A yindlu ya wena, ni mufumo wa wena zvi ta tshama kala kupindzuka mahlweni ka mina. A citshamu ca wena ca wukosi ci ta su tsondzoma kala kupindzuka.’ (Vhesi 16) Himani a nga wa ta tatisa civhumelwano leci, a fuma kala kupindzuka?— Lisimu 89:20, 29, 34-36.

Sentinela 01/04/10 paj. 20 par. 4

“A mufumo wa wena wu ta tiya”

Jesu wa le Nazareta, i wa hi wa pswalo wa Dhavhidha. A ngilozi yo kari yi wulile lezvi xungetano hi ku pswaliwa ka Jesu: “Jehovha Nungungulu i ta mu nyika citshamu ca wuhosi ca Dhavhidha a papayi wakwe. I ta fumela a yindlu ya Jakobe kala kupindzuka; a Mufumo wakwe wu nga ta gumesa.” (Luka 1:32, 33) Kunene, a civhumelwano ca Nungungulu na Dhavhidha ci tatiseka ka Jesu Kristu. Hikwalaho, Jesu a nga hlawuliwangi hi vanhu kasi a fuma, kanilezvi i fuma hi kota ya citsumbiso co tiya ca Nungungulu leci ci mu nyikako lungelo ga ku fuma kala kupindzuka. A hi alakanyeni lezvaku a zvitsumbiso zva Nungungulu contlhe cikhati zva tatiseka. — Isaya 55:10, 11.

Murindzeli 15/10/14 paj. 10 par. 14

Ngha uva ni kukholwa ko tiya ka Mufumo

Ehleketa hi lezvi Jehovha a nga tsumbisa Hosi Dhavhidha wa le Izrayeli wa kale hi ku tirisa a civhumelwano ca Dhavhidha. (Lera 2 Samueli 7:12, 16.) Jehovha i mahile civhumelwano leci na Dhavhidha cikhatini ca kufuma kakwe le Jerusalema, a mu tsumbisa lezvaku Mesiya i wa ta huma ka pswalo wakwe. (Luka 1:30-33) Hi ndlela leyo, Jehovha i loya mahlweni a nyika mahungu yo kongoma xungetano hi pswalo lowo a tlhela a komba lezvaku a Mufumo wa wuMesiya wu wa ta ‘lumba’ ciga-tshomba ca Dhavhidha. (Ezek. 21:25-27) A wuhosi ga Dhavhidha gi ‘ta tiya kala kupindzuka’ hi laha ka Jesu. Kunene, a pswalo wa Dhavhidha wu “ta simamisa kala kupindzuka, ni citshamu cakwe ca wuhosi ci ta simamisa . . . khwatsi i gambo.” (Lis. 89:34-37) A kufuma ka Mesiya ku nga ta tshuka ku thapelwa hi wubihi, niku a zvimaho zva mufumo wakwe zvi ta tshama kala kupindzuka!

Kela titshomba ta moya

Perspicaz vhol. 2 paj. 1165 par. 1

Masiku yo gumesa

Ciphrofeto ca Bhalami. Ku vile mahlweni kaku a vaIzrayeli va nghena Tikweni ga Citsumbiso laha muphrofeti Bhalami a nga byela Bhalaki a Hosi ya Mowabhi, aku: ‘Ngone ndzi ta ku kombisa lezvi zvi ta nga mahiwa hi lava vanhu lomu tikweni ga wena ka masiku ma ha tako. . . . Ku ta huma nyeleti hi ka Jakobe, a nhonga ya wuhosi yi huma ka Izrayeli, yi lamata a mareve ya Mowabhi, yi mbhetisa vontlhe a vanana va vhilinganya.’ (Mitse. 24:14-17) Kusanguleni ka ku tatiseka ka ciphrofeto leci, ku wonekile lezvaku a nyeleti ku wa hi Hosi Dhavhidha, a mukhozisi wa vaMowabhi. (2 Sam. 8:2) Zvi laha kubaseni ku a ciphrofeto ca “masiku yo gumesa” ci tatisekile a cikhati Dhavhidha a nga maha hosi. Kota lezvi Dhavhidha a nga yimela Jesu kota Hosi ya wuMesiya, a ciphrofeto leci kambe ci wa ta tira ka Jesu a cikhati a khozisako a valala vakwe. — Isa. 9:7; Lis. 2:8, 9.

6-12 KA JUNHO

TITSHOMBA TI NGA KA MHAKA YA NUNGUNGULU | 2 SAMUELI 9-10

“Dhavhidha i kombisile lirandzo li nga mbheliko”

Sentinela 15/06/06 paj. 14 par. 6

Phela u nga kuma litsako

Dhavhidha i tsalile lezvi: ‘I katekile loyi a zwelako lava va vhumalako.’ I simamile aku: ‘Jehovha i ta mu hlanguta hi siku ga khombo. Jehovha i ta mu londzowota a mu hanyisa.’ (Lisimu 41:1, 2) A wuxinji legi Dhavhidha a nga gi kombisa ka Mefibhoxete — a n’wana wo limala wa Jonatani, a munghana wo randzeka wa Dhavhidha, cikombiso ca matshamela manene lawa ma faneleko ku kombisiwa a vanhu va ku ti koramisa. — 2 Samueli 9:1-13.

Sentinela 15/05/05 paj. 17 par. 11

Timhaka-tshinya ta bhuku ga Samuweli wa Wumbiri

9:1, 6, 7. Dhavhidha i tatisile citsumbiso cakwe. Hinawu hi fanele ku ti karatela ku tatisa zvitsumbiso zva hina.

Sentinela 15/02/02 paj. 14 par. 10

Va lwisene ni muzwa nyameni

Hi kota ya lirandzo la hombe leli Dhavhidha a nga hi nalo hi Jonatani, andzhako ka malembe yo kari, i kombisile lirandzo li nga mbheliko ka Mefibhoxete. Dhavhidha i no mu nyika zvontlhe lezvi zvi nga lumba Sawule, a tlhela a yimisa Zibha, a nandza ga Sawule, kota muhlayisi wa zvona. Dhavhidha i tlhelile a mu byela lezvi Mefibhoxete: A ‘masiku wontlhe wena u taga laha mezeni ya mina.’ (2 Samueli 9:6-10) Handle ko kanakana, a lirandzo li nga mbheliko leli Dhavhidha a li kombisileko, li mu tiyisile Mefibhoxete li tlhela li mu vhuna a ku hungula a ku bayisa ka ku tizwa na a nga vhuni nchumu. Hi nga wona a cigondzo leci ca cinene! Hinawu hi fanele ku kombisa wunene ka lava va nga ni muzwa nyameni.

Kela titshomba ta moya

Perspicaz vhol. 1 paj. 291

Malevhu

A kale, a kutala ka vanhu le mutsuwuka-gambo, a ku patsa ni vaIzrayeli, va wa ma nyika lisima a malevhu kota zvilo zvi nga nyika wudzundzo a vavanuna. A nayo wa Nungungulu lowu wu nga nyikilwe a vaIzrayeli, wu wa betela ku halula “lomu matlhelweni ya hloko,” misisi leyi yi nga laha cikari ka ndleve ni tihlo, ni ku halula lomu matlhelweni ya cilevhu. (Levi 19:27; 21:5) Lezvo zvi wa juja kupima hakuva a vahedheni vo kari va wa wona lezvo kota mukhuwo wa wukhongeli.

13-19 JUNHO

TITSHOMBA TI NGA KA MHAKA YA NUNGUNGULU | 2 SAMUELI 11-12

“U nga tsiki kunavela ka hava ku ku fumela”

Murindzeli 06.21 paj. 17 par. 10

Ndlela ya ku chukula kutani ku fambela kule ni mitlhamu ya Sathani

A kuva ni wunavenave zvi mahile ku Hosi Dhavhidha a rivala lezvi Jehovha a nga mu nyikile, ku nga wutomi ga gi nene, titshomba, ni ku mu vhuna ku hlula valala vo tala. Ka cikhati co kari i kombisile kubonga hi zvontlhe lezvi Nungungulu a nga mu mahele, aza aku zvi tele laha ka ku a zvi “na ku hlayiwa”. (Lis. 40:5) Hambulezvo, ka cikhati co kari, i no zvi rivala lezvi Jehovha a nga mu nyikile. I wa nga ha xalali hi lezvi a nga hi nazvo; i wa lava zvo hundza lezvo. Hambu lezvi a nga hi ni vasati vo tala, i no sangula ku navela sati wa vambe, hambu lezvi Jehovha a nga sina a wulile ku zvi bihile. A wasati loyi a nga mu navela hi Bhatexebha, kata Uriya, a muHiti. Dhavhidha i no hluliwa hi kunavela kakwe, a hlengela masango na Bhatexebha a xura nyimba. Dhavhidha a nga kolwangi hi ciwonho leci ca wubhayi, i no guma a maha ciwonho cin’wani hi ku dayisa Uriya! (2 Sam. 11:2-15) Kasi hikuyini Dhavhidha a ngaza a maha lezvo? Ku ngava lezvaku i wa pimisa ku Jehovha a nga zvi woni? Hambu lezvi Dhavhidha a nga tsumbekile a tirela Jehovha hi malembe yo tala, ive ni wunavenave, a guma a wela zvikaratweni. A ya ku tsakisa hi ku Dhavhidha i gumile a vhumela ciwonho cakwe, a ti sola. I tsakile nguvhu hi lezvi Jehovha a nga mu tsetselela, a simama ku mu tsakela. — 2 Sam. 12:7-13.

Murindzeli 09.19 paj. 17 par. 15

Hikuyini hi faneleko ku tekela ku ingisa Jehovha niku hi nga zvi mahisa kuyini?

Jehovha i wa vekile Dhavhidha lezvaku ava hloko ya ngango a ku patsa ni tiko gontlhe ga Izrayeli. Kota lezvi a nga hi hosi, Dhavhidha i wa ni wutihlamuleli ga hombe. Ka zvikhati zvin’wani i tirisile a wutihlamuleli gakwe hi ndlela ya hava. (2 Sam. 11:14, 15) Kanilezvi i kombisile ku wa ingisa Jehovha hi ku vhumela ku kawukiwa. A cikhati a nga khongela i no byela Jehovha lezvi a nga ti zwisa zvona. Niku i mahile zvontlhe a nga zvi kota kasi a ingisa a wusungukati ga Jehovha. (Lis. 51:1-4) A ku hundza lezvo, i wa ti koramisa a tlhela a vhumela a wusungukati ga van’wani a ku patsa ni ga vavasati. (1 Sam. 19:11, 12; 25:32, 33) Dhavhidha i gondzile hi zvihoxo zvakwe a tlhela a rangisa ku tirela Jehovha wutomini gakwe gontlhe.

Murindzeli 06.18 paj. 17 par. 7

Tsika milayo ni matshinya ya milayo ya Nungungulu ma gondzisa livhalo la wena

A hi faneli ku rindzela ku kala hi xaniseka hi ku nga ingisi milayo ya Nungungulu kasi hi tiva zva zvi nene ni zva kubiha. Hi nga gondza ka zvihoxo lezvi a van’wani va zvi mahileko ka cikhati ci hundzileko. A zvikombiso lezvo zvi kona lomu ka Bhibhiliya. A bhuku ga Mavingu 1:5 gi ngalo: ‘Loyi a tlharihileko i fela kuzwa, a endzelekisa wutivi’ kutani zvileletelo. A zvileletelo lezvo zvita hi ka Nungungulu niku hi zvona zva zvi nene ku hundza zvontlhe zvi nga kona! Hi cikombiso, ehleketa hi lezvi Dhavhidha a nga xanisekisa zvona andzhako ka kuva a tsikile ku ingisa Jehovha a maha wubhayi na Bhatexebha. (2 Samuweli 12:7-14) A cikhati u lerako matimu lawo, ti wutise lezvi: ‘Dhavhidha na a mahile yini kasi a nga weli ka zvikarato lezvo? Ndzi nga maha yini loku ndzi hi ka ciyimo co fana ni leco? Loku ndzi ringwa ku maha wubhayi ndzi wa ta fana na Dhavhidha kutani na Josefa ke?’ Loku hi ehleketa khwatsi hi wuyelo go biha ga ku wonha, hi ta engetela ku ‘venga kubiha’.

Kela titshomba ta moya

Perspicaz vhol. 1 paj. 653 par. 3

Dhavhidha

Jehovha i wa kari a zvi wona lezvi zvi nga mahiwa hi Dhavhidha. Hikwalaho a nga fihlangi ciwonho leco ca hombe. Loku Jehovha i wa no vhumelela ku a ciwonho ca Dhavhidha na Bhatexebha ci xuxiwa hi valamuli va nyama hi kuya hi Nayo wa Mosi, hi wumbiri gabye na va delwe niku a n’wana loyi a nga wa ta pswaliwa hi wubhayi lego i wa tafa ni mamani wa kona. (Deut. 5:18; 22:22) Hikwalaho, Jehovha i no khatalela mhaka leyo hi yece niku i mu kombisile wuxinji Dhavhidha, hi kota ya civhumelwano ca Mufumo (2 Sam. 7:11-16), handle ko kanakana, lezvo zvi mahekile hi ku Dhavhidha yenawu i wa kombisa wuxinji (1 Sam. 24:4-7; ringanisa na Jakobe 2:13); niku Jehovha i mahile lezvo hi kota ya kutisola loku a nga ku wona ka Dhavhidha na Bhatexebha. (Lis. 51:1-4) Kanilezvi, a va ponangi ku tsayisiwa. Jehovha i wulile lezvi hi ku tirisa muphrofeti Natani: ‘Languta ndzi ta vhuxa a makhombo lomu ndlwini ya wena.’ — 2 Sam. 12:1-12.

20-26 KA JUNHO

TITSHOMBA TI NGA KA MHAKA YA NUNGUNGULU | 2 SAMUELI 13-14

“Amnoni i ti tsakisile zvi guma zvi vanga cirilo”

Perspicaz vhol. 1 paj. 31

Absalome

Kudawa ka Amnoni. A kusaseka ka Tamara, a makabye wa Absalome, ku mahile ku Amnoni a makabye wakwe wa nhondzo va nga hambene vamamani a mu navela. Amnoni i no ti mahisa ku khwatsi o babya, va rumela Tamara lomu ndlwini yakwe kasi a ya mu bhikela, Amnoni a gumesa a mu pfinya. A lirandzo leli Amnoni a nga hi nalo la ku lava ku hlengela masango na Tamara, li gumesile liva livengo la hombe, a tlhela a laya ku Tamara a humesiwa laha ruweni. Absalome i no tlhangana na Tamara na a handzulile nguwo yakwe ya mavalavala yi nga mu tivekisa kota n’wana wa hosi a kalako a nga se tivana ni wanuna, na a ti chetele khuma lomu hlokweni. Zvalezvi Absalome a nga wona Tamara, i no tekela ku alakanya ku kuzvilava Amnoni i mu pfinyile, hakuva i wa sina a polile ku wa mu navela. Absalome i no byela Tamara aku a nga mu wuleti Amnoni, a tlhela a mu teka lezvaku a ya tshama naye le kaya kakwe.— 2 Sam. 13:1-20.

Murindzeli 09.17 paj. 6 par. 11

Gondza ku ti khoma

A Bhibhiliya gi tlhela gi nyika zvikombiso zva vanhu va nga tsika ciringo ca wubhayi ci va hlula. Gi komba a mihandzu yo bava leyi a munhu a tshovelako loku a nga ti khomi. Loku u tshuka uva ka ciyimo co fana ni leci Kim a nga hi ka cona, ehleketa hi jaha ga cipumbu legi ku wulawuliwako hi gona ka Mavingu cipimo 7. Ehleketa kambe hi makhombo lawa ma nga wela Amnoni hi lezvi a nga kala ku ti khoma. (2 Samueli 13:1, 2, 10-15, 28-32) A vapswali va nga vhuna vana vabye a ku gondza ku ti khoma ni wutlhari hi ku wulawula hi zvikombiso lezvo ka wukhozeli ga ngango.

Perspicaz vhol. 1 paj. 31 par. 6

Absalome

Andzhako ka malembe mambiri, ku no chikela nguva ya ku kaya a mawoya ya tiyivhu— a nguva ya mibuzo. Absalome i no longisela festa le Baal-hazora, ku nga pfhuka wa 22 wa tikilometro kusukela Mupela-gambo wa Jerusalema, a ramba a vana va Hosi na Dhavhidha wutsumbu. Laha Dhavhidha, a papayi wa kona a nga ala kuya festeni leyo, Absalome i no mu kucetela lezvaku a rumela Amnoni a matewula yakwe, kasi a mu vhaletela. (Mav. 10:18) Laha festeni, ‘a cikhati leci a mbilu ya Amnoni yi [nga] tangele hi vhinyo’, Absalome i no ruma malandza yakwe lezvaku ma mu daya. A vana lava van’wani va Dhavhidha va no tlhela Jerusalema, Absalome a tsutsuma a ya tshama ka kokwani wakwe le Siriya, ka mufumo wa Gexura, le Mutsuwuka-gambo wa Bimbi ga Galileya. (2 Sam. 13:23-38) A ‘cipadha’ leci ci nga wulilwe hi muphrofeti Natani, makunu ci wa nghenile “ndlwini” ka Dhavhidha niku ci wa ta simama kala afa. — 2 Sam. 12:10.

Kela titshomba ta moya

Despertai! 22/12 paj. 8-9

Kusaseka loku ku nga ka lisima

A kuhambana ni lezvo, wona lezvi Absalome a n’wana wa Dhavhidha a nga maha. Hambu lezvi Absalome a nga hi munhu wo saseka a tlhela a naveliwa hi van’wani, i zvi kombisile kubaseni lezvaku i wa nga hi munhu wa munene. A Bhibhiliya gi wula lezvi hi yena: ‘Makunu cikari ka vontlhe va ka Izrayeli yi wa nga hi kona a mbhuri yo hundza Absalome. Va wa mu babaza hi kusaseka! I wa nga hi na bawa kusukela mikondzweni kala hlokweni yakwe.’ (2 Samueli 14:25) Hikwalaho, a wunavenave ga Absalome gi mahile ku a jikela a papayi wakwe a tlhela a mu tekela wuhosi. I zile a pfinya ni vasati va papayi wakwe. Kota wuyelo ga kona, Absalome i no zangarelwa hi Jehovha, niku i file hi ndlela ya xapi. — 2 Samueli 15:10-14; 16:13-22; 17:14; 18:9, 15.

Wa zvi navela a ku fana na Absalome? Handle ko kanakana ahihi. Phela i wa hi munhu a ga hi ni matshamela ya hava. A kusaseka kakwe ko hlamalisa a ku vhunangi nchumu hi kota ya matshandza ni kungatsumbeki kakwe, ne a ku mu vhikelangi a ku wonha. A cin’wani kambe, lomu ka Bhibhiliya ku na ni zvikombiso zvo tala zva vanhu va wutlhari vaku a ku wuliwi nchumu hi kusaseka kabye ka lahandle. Zva woneka kubaseni a ku a ca lisima ku wa hi kusaseka kabye ka le ndzeni.

27 KA JUNHO–3 JULHO

TITSHOMBA TI NGA KA MHAKA YA NUNGUNGULU | 2 SAMUELI 15-17

“Absalome i jikele papayi wakwe hi kota ya matshandza”

Perspicaz vhol. 1 paj. 692

Loyi a rangako

Le Mutsuwuka-gambo, zvi wa tolovelekile a ku ku ranga vanhu le phambeni ka movha wa hosi va famba hi kutsutsuma, va longisela ni ku tivisa lezvaku kata hosi va tlhela va vhunetela ka lezvi zvi nga laveka. (1 Sam. 8:11) Absalome na Adhonija va rangisile 50 wa vavanuna phambeni ka tikareta tabye, hi ku pimanyisa a zvilo lezvo zvi nga mahelwa hosi, ni ku lava wudzundzo ga hombe, ni ku fela ku tsayisa ni wihi a nga wa ta kala a nga va seketeli. — 2 Sam. 15:1; 1 Tih. 1:5; wona laha ka ku VATSUTSUMI (BATEDORES).

Murindzeli 01/07/12 paj. 18 par. 5

Tirela a Nungungulu wa kutlhatlheka

A Bhibhiliya gi na ni zvikombiso zvo tala zva vanhu va nga hi ni kucetelo wa kubiha ka van’wani. A mun’we wabye hi Absalome, a n’wana wa Hosi Dhavhidha. Absalome i wa hi wanuna wa ku saseka nguvhu. Kanilezvi hi kufamba ka cikhati, a ku fana na Sathani, a mbilu yakwe yi lo tala hi makangwa zvonake a sangula ku navela wuhosi ga raru wakwe, legi gi nga kala gi nga mu lumbi. Na a zama ku wutla wuhosi lego, Absalome i lo ti maha ku khwatsi o khatala nguvhu hi vaIzrayeli-kuloni a ku hundza lezvi a hosi yi nga va khatalelisa zvona. Kunene, a ku fana na Sathani le sin’wini ga Edheni, Absalome i lo ti maha wa mu nene a bihisa a raru wakwe. — 2 Sam. 15:1-5.

Perspicaz vhol. 1 paj. 1137-1138

Hebroni

Andzhako ka malembe yo kari, Absalome a n’wana wa Dhavhidha, i no tlhela Hebroni a ya sangulela seyo a ku banga wuhosi ga papayi wakwe. (2 Sam. 15:7-10) Zvi wonekisa ku Absalome i hlawulile ku sangulela Hebroni a ku banga wuhosi ga papayi wakwe hi kota ya lezvi gi nga hi dhoropa ga lisima hi lezvi ka nguva yo kari gi nga vile tsindza ga tiko ga Judha ni lezvi gi nga hi gona tiko a nga pswalelwe ka gona. Hi ndzhako ka cikhati, Hosi Rehobhowamu, a zukulu wa Dhavhidha, i no aketa a tiko ga Hebroni. (2 Kro. 11:5-10) Laha va nga wuya a vaJudha lava va nga khomilwe vaya Bhabhuloni a cikhati leci a tiko ga Judha gi nga hahluliwa, a vaJudha vo kari va no ya tshama Hebroni (Kiriyat-arbha). — Neh. 11:25.

Kela titshomba ta moya

Murindzeli 08.18 paj. 6 par. 11

Loku uzwa mahungu, wa hlola ku lisine ke?

Ka zvikhati zvin’wani a vanhu va nga xwanya mahungu ya ku a hi ya lisine khwatsi xungetano hi hina. Lezvo zvi nga hi swira. Lezvo zvi humelele Mefibhoxete. Hosi Dhavhidha hi kuhana kakwe i mu nyikile mipetso yontlhe Mefibhoxete yi nga lumba Sawule, a kokwani wakwe. (2 Samuweli 9:6, 7) Kanilezvi hi ndzhako ka cikhati, Dhavhidha i nozwa mawunwa xungetano hi Mefibhoxete. Dhavhidha a nga lavangi ku hlola mhaka leyo kasi a tiva ku lisine ke, kanilezvi i no teka titshomba tontlhe ta Mefibhoxete. (2 Samuweli 16:1-4) A cikhati leci Dhavhidha a nga wulawula naye, i wonile lezvaku i wa mahile cihoxo. I no mu tlhelisela titshomba to kari Mefibhoxete. (2 Samuweli 19:24-29) Loku Dhavhidha i wa no ti nyika cikhati ca ku hlola mhaka leyo wutshan’wini ga ku tsutsumela ku maha ciboho na a ti seketela ka mahungu lawo ya mawunwa, Mefibhoxete na a nga zangi a xanisekile hi zvilo lezvo zvo biha a nga mahelwe.