Timhaka ta mabhuku ma tako ka Cibhukwana ca Mutlhangano
© 2024 Watch Tower Bible and Tract Society of Pennsylvania
6-12 KA MAIO
TITSHOMBA TI NGA KA MHAKA YA NUNGUNGULU TISIMU 36-37
“U nga zangari hi kota ya vakubiha”
Murindzeli 04.17 paj. 11 par. 4
Zvini zvi to ta fuvisiwa hi Mufumo wa Nungungulu?
4 A vanhu vo biha va hi khumbisa kuyini nyamutlha? Mupostoli Pawule i wulile lezvaku masikwini yo gumesa ku wa tava ni “zvikhati zva zvikarato.” Hi kulandzela aku: “A vanhu vo biha ni vakanganyisi va ta nonohisa vaya mahlweni kubiheni.” (2 Tim. 3:1-5, 13) U tshuka u zvi wona lezvo ke? A kutala ka hina hi tshukile hi xanisiwa hi vanhu vo biha vo kota lava va civhukelani, lava va ku venga van’wani hi kota ya hlonge yabye, ni zvigevenga zvo leva. A vokari a vazi va fihla a zvilo zvo biha lezvi va mahako. A van’wani va ti maha ku khwatsi vo vhuna vanhu, kuveni hi lisine va maha kubiha. Kanilezvi, hambu loku hi nga se tshuka hi mahelwa kubiha, ha khumbiwa hi vanhu vo biha. Ha bayiseka loku hizwa matimu ya vanana, ni vakhosaheleko, ni vanhu van’wani va nga hava muvhikeli va khomiwako hi ndlela ya xapi. A vanhu lavo vo biha va maha zvilo hi ndlela yi va mahako va ku khwatsi zvihari kutani madhimoni. (Jak. 3:15) Leci ci tsakisako hi ku a Mhaka ya Jehovha ya hi nyika kutsumba.
Murindzeli 06.22 paj. 10 par. 10
Jehovha wa katekisa lava va tsetselelako
10 A ku veka civiti zvi na ni mhango. Jehovha i lava lezvaku hi ti buza hi kupepa ku nehiwako hi ku nga veki civiti. (Lera Va Le Efesusi 4:31, 32.) I hi kuca ku hi tsika a “khulo ni zanga”. (Lis. 37:8) Wutlhari a ku landzela a wusungukati legi. A ku veka civiti zvi nga hi vangela mhango hi tlhelo ga nyama ni ga maalakanyo. (Mav. 14:30) Loku hi vekela civiti wokari a zvi bayisi a munhu loye a hi khunguvanyisileko. Zvi fana ni loku hinwa a vhenene, a yi vangeli mhango a van’wani kanilezvi yi vangela hina wutsumbu. Kanilezvi loku hi tsetselela van’wani ho ti nyika cinyikiwo hina wutsumbu. (Mav. 11:17) Hi kuma kurula ka maalakanyo ni ka mbilu hi tlhela hi zvi kota ku simama ku tirela Jehovha.
Sentinela 1/12/03 paj. 13 par. 20
‘Ti xalalise ha Jehovha’
20 Makunu “lava va rulako va taga tshomba ya tiko”. (Lis. 37:11a) Kanilezvi hi vamani ‘lava va kurula’? A gezu gi hundzuluselweko ku kurula gita hi ka gezu gi wulako ku “zangarisa, ku chepeta ni ku tsongahata”. Kunene lava va kurula hi lava va ti tsongahatako va rindzela Jehovha kasi a lulamisa kontlhe a kungalulami loku ku va zangarisako. “Va ta xalaliswa hi kurula ka hombe.” (Lis. 37:11b) Hambu zvezvi hi kuma kurula ka hombe paradhesini ga moya gi yelanako ni bandla ga lisine ga wuKristu.
Titshomba ta moya
Perspicaz vhol. 2 paj. 410
Citsunga
Kutiya, kupindzuka kutani kutlakuka. A zvitsunga zvi tiyile ni ku zva kala kupindzuka. (Isa. 54:10; Mah. 3:6; fananisa ni Lis. 46:2.) Hikwalaho, a cikhati leci a mutsali wa Tisimu a nga wula lezvaku a kululama ka Jehovha ku fana ni ‘zvitsunga zva hombe’ (Lis. 36:6) kuzvilava i wa wula lezvaku a kululama ka Jehovha a ku cicacici. Kutani kota lezvi ka ku a zvitsunga zvi tlakukile, i wa wula lezvaku a kululama ka Nungungulu ka hundza nguvhu loku ka vanhu. (Fananisa na Isa. 55:8, 9.) Xungetano hi ku chululiwa ka ngelo wa wu 7 wa zanga ya Nungungulu, Kuvhululelwa 16:20 i ngalo: “A zvitsunga zvi n’walala.” Lezvo zvi komba ku hambu zvilo zvo tlakuka nguvhu zvo kota zvitsunga zvi nga ta pona ka siku ga ku chululiwa ka zanga ya Nungungulu. — Fananisa na Jer. 4:23-26.
13-19 KA MAIO
TITSHOMBA TI NGA KA MHAKA YA NUNGUNGULU TISIMU 38-39
U nga rwali ndzhwalo wa ku tizwa nandzu wo hundza mpimo
Murindzeli 11.20 paj. 27 par. 12-13
Veka kupima ka lezvi zva ha tako
12 Lera 1 Johani 3:19, 20. Ka zvikhati zvin’wani ha tshuka hi tizwa nandzu. Hi cikombiso, a vokari va tizwa nandzu hi lezvi va zvi mahileko na va nga se gondza lisine. A van’wani va tizwa nandzu hi zvihoxo va zvi mahileko andzhako ka kubhabhatiswa. Lezvo a zvi hlamalisi. (Rom. 3:23) Hi lava ku maha zva zvi nene. Kanilezvi “hontlheni ha phazama makhati yo tala”. (Jak. 3:2; Rom. 7:21-23) Hambu lezvi zvi nga tsakisiko a ku tizwa nadzo, zvi nga hi vhuna. Hikuyini? Hiku loku hi tizwa nandzu zvi hi kuca ku cica mahanyela ya hina hi tlhela hi ti yimisela ku nga ha phinda a zvihoxo zvalezvi zva zvin’we. — Mah. 12:12, 13.
13 Hi tlhelo gin’wani, hi nga tizwa nandzu wo hundza mpimo, ku nga ku simama hi tizwa nandzu hambu loku hi ti solile, Jehovha a tlhela a komba lezvaku i hi tsetselele. A ku tizwa nandzu wo kota lowo zvi na ni mhango. (Lis. 31:10; 38:3, 4) Hikuyini? Wona a cikombiso ca makabye wo kari wa cisati loyi a nga tizwa nandzu wo hundza mpimo hi cigoho a nga ci mahile kale. I: “Ndzi wa zvi wona na zvi nga sizi nchumu a ku ndzi ti karata ntirweni wa Jehovha hi lezvi ndzi nga alakanya ku kuzvilava ndzi nga ta pona.” A kutala ka hina kuzvilava hi ti zwisa lezvo. Hikwalaho zva lisima ku hi ti wonela ka ntlhamu lowu wa ku tizwa nandzu wo hundza mpimo. A ca lisima nguvhu ku ehleketa hi lezvi Sathani a to tsakisa zvona loku hi nyima ku tirela Jehovha hambu loku yena a ha simama ku hi randza! — Ringanisa na 2 Va Le Korinte 2:5-7, 11.
Sentinela 15/11/02 paj. 20 par. 1-2
Zvini hi nga mahako kasi a masiku ya hina ma tsakisa Jehovha?
A masiku ya wutomi ga hina ma wonekisa ku khwatsi ma tsongwani ma tlhela ma hatlisa nguvhu. Dhavhidha, a mutsali wa Tisimu i ehleketile hi ku koma ka wutomi zvi mu kuca ku khongela, aku: ‘Jehovha, ndzi tivise a kugumelwa ka mina, kasi ndza tiva a ntsengo wa masiku ya mina; ndzi tivise lezvaku ndzi muhundzi. U mahile a masiku ya mina a ku khwatsi hi kuanama ka canja; a cikhati ca kuhanya ka mina a hi nchumu mahlweni ka wena’. Dhavhidha i wa karatekela ku hanya hi ndlela yi nga tsakisa Nungungulu, hi magezu ni mitiro. A cikhati leci a nga wulawula hi lezvi a nga khengelisa zvona ka Nungungulu, i te: “A kutsumba ka mina ku le ka wena.” (Lis. 39:4, 5, 7) Jehovha i nozwa mukhongelo wakwe. I no hlola mitiro ya Dhavhidha a tlhela a mu chachazela hi kuya hi mitiro yakwe.
Zva olova a ku tshama hi khomekile contlhe cikhati ni ku talelwa hi mitiro. Lezvo zvi nga hi maha hi karateka, nguvhunguvhu loku hi hi ni zvotala zva ku maha kanilezvi na hi hi ni cikhati citsongwani. Xana a ku fana na Dhavhidha, hinawu ha karatekela ku hanya hi ndlela yi tsakisako Nungungulu? Kunene, Jehovha wa wona ni ku hlola a mun’we ni mun’wani wa hina. Ka 3600 wa malembe ma hundzileko, Joba, a wanuna a nga chava Nungungulu, i zwisile lezvaku Jehovha i wa wona a mahanyela yakwe ni ku hlayela wontlhe mazambo yakwe. Joba i no ti wutisa ku: ‘Ndzi ta kuyini laha Nungungulu a ta nga ndzi vhukela? Ni loku a ndzi ranisa ndzi ta hlamula yini?’ (Joba 31:4-6, 14) Hi nga maha ku a masiku ya hina ma tsakisa Jehovha, hi ku rangisa zvilo zva moya, ku ingisa milayo yakwe ni ku ci tirisa hi wutlhari a cikhati ca hina. A hi kambisiseni khwatsi a timhaka leti.
Murindzeli 10.21 paj. 15 par. 4
Ndlela yo vhuxa wunghana ga wena na Jehovha
Bhula na Jehovha hi kukhandzakanya. Papayi wa wena Jehovha wa zvi tiva ku a ku tizwa nandzu hi kota ya zvilo zvo biha lezvi u zvi mahileko zvi nga maha ku zvi ku karatela ku khongela ka yena. (Rom. 8:26) Hambulezvo, ‘khongela u nga tsiki’ u byela Jehovha lezvi u zvi lavisako zvona kuva munghana wakwe. (Rom. 12:12) André i alakanya lezvi: “Ndzi wa tizwa nandzu ni tingana ta hombe nguvhu. Kanilezvi, khati ni khati ndzi nga khongela, zvi wo hunguleka. Ndzi waya ndzi kuma kurula ka hombe.” Loku u nga ci tivi ca ku khongela, wona mikhongelo leyi Hosi Dhavhidha a nga yi maha a cikhati a nga ti sola, yi tsalilweko ka Lisimu 51 ni 65.
Titshomba ta moya
Murindzeli 09.22 paj. 13 par. 16
Kombisa ku wa tsumbeka
16 A kutikhoma ka lisima nguvhu loku hi lava ku a van’wani va hi tsumba. A tshamela legi gi hi vhuna ku hi ti khoma loku hi ringiwa ku wula zvilo zva cihundla. (Lera Mavingu 10:19.) Zvi nga tshuka zvi hi karatela ku hi ti khoma a cikhati leci hi tirisako a ma rede social. Loku hi nga ti woneli, hi nga tshuka hi hlawutela mahungu ya cihundla ka vanhu vo tala na hi nga zvi poli. Neti hi haxa mahungu lomu ka Internet, a ha hi na ndlela ya ku wonelela lezvi a mahungu lawo ma to tirisiswa zvona kutani zvikarato lezvi ma to vanga. A kutikhoma kambe ku hi vhuna ku hi simama hi miyela a cikhati leci a valala va hina va zamako ku hi kurumeta ku hi wula zvilo zvi to veka mhangweni a vamakabye va hina. Lezvo zvi humela a cikhati leci hi thethisiwako hi maphoyisa ka tiko legi a ntiro wa hina wu betelwako. Ka zviyimo lezvi ni ka zvin’wani, hi nga tirisa a wusungukati ga ku ‘hlayisa a minomu ya hina hi matomu’. (Lis. 39:1) Kani hi tirisana ni va ngango wa hina, ni vanghana va hina, ni vamakabye va hina kutani van’wani vanhu, hi fanele kuva vanhu vo tsumbeka. Kasi hiva vanhu vo tsumbeka hi fanele ku ti khoma.
20-26 KA MAIO
TITSHOMBA TI NGA KA MHAKA YA NUNGUNGULU TISIMU 40-41
Hikuyini u vhunako van’wani?
Murindzeli 08.18 paj. 19-20 par. 16-18
A vanhu vo hana va tshama va tsakile
16 A vanhu va hanako hi mbilu yontlhe a va hani hi ku rindzela ku tlheliselwa cokari. Jesu i te: ‘Laha u mahako a mubuzo, ramba zvisiwana, ni zvirela, ni zvilima, ni zvikhumu; zvonake u ta kateka, hakuva va vhumala zva ku ku tlhelisela ha zvona.’ (Luka 14:13, 14) A Bhibhiliya gi tlhela giku: “A munhu loyi a [hanako] i ta kateka”, niku ‘[wa tsaka] loyi a zwelako lava va vhumalako.’ (Mav. 22:9; Lis. 41:1) Hi fanele ku hana hi kota ya lezvi hi lavako ku vhuna van’wani hi mbilu yontlhe.
17 A cikhati leci Pawule a nga tshaha magezu ya Jesu yaku ‘loyi a nyikako wa tsaka nguvhu a ku hundza loyi a amukelako’, i wa nga wulawuli hi ku hana hi titshomba basi. Hi nga tiyisa van’wani kambe, hi va nyika wusungukati ga Bhibhiliya, hi tlhela hi va nyika lezvi zvi lavekako. (Mit. 20:31-35) Ka lezvi Pawule a nga wula ni ku maha i hi gondzisile lisima la ku hi hana laha hi tirisako cikhati ca hina, ni ntamu wa hina, ni laha hi khatalelako van’wani ni ku va randza.
18 A titlhari ta ku gondza mahanyela ya vanhu ti polile lezvaku a ku hana zvi maha munhu a tsaka. A ndzima yo kari yi wula lezvaku a vanhu vali va tsaka nguvhu loku va va mahele zva zvi nene van’wani. A titlhari ti wula lezvaku loku hi vhuna van’wani a wutomi ga hina gi tsakisa nguvhu hi tlhela hi hanyela co ci tiva. Ti tlhela ti ku i chukwana ku a munhu a maha ntiro wa kuzvirandza kasi a kuma litsako a tlhela a ngavi ni zvitshetshela. Hi lisine, lezvi ti zvi polileko a zvi hi hlamalisi hakuva kusukela kale, Jehovha a Muvangi wa hina, i wula lezvaku a ku hana zvi hi nyika litsako. — 2 Tim. 3:16, 17.
Murindzeli 15/12/15 paj. 24 par. 7
Jehovha i ta ku tiyiseta
7 Hambulezvo, loku hi babya hi nga kombela ku chavelelwa, ku nyikwa wutlhari, ni ku vhuniwa hi Nungungulu, a ku fana ni vakhozeli va lisine va cikhatini ci hundzileko. Hosi Dhavhidha i tsalile lezvi: “I katekile loyi a zwelako lava va vhumalako, Jehovha i ta mu hlanguta hi siku ga khombo. Jehovha i ta mu lonzowota a mu hanyisa.” (Lis. 41:1, 2) Ha zvi tiva lezvaku a ku chela kota hi zvisiwana masikwini ya Dhavhidha zvi wa nga mahi munhu a hanya kala kupindzuka. Hikwalaho, Dhavhidha i wa nga lavi ku wula lezvaku a munhu i wa ta hanyiswa hi cihlamaliso a tlhela a kuma wutomi ga pindzukelwa. Hi nga ha wula lezvaku magezu lawo ma pimisilweko ma wa wula ku ngalo Nungungulu i wa ta vhuna munhu loyi a chelako kota hi zvisiwana. Hi ndlela muni? Dhavhidha i lo tlhamusela aku: “Jehovha i ta mu tiyiseta loku a hi sangweni ga kubabya.” (Lis. 41:3) Kunene, loyi a khatala hi zvisiwana i wa ta tiyiseka lezvaku Nungungulu wa mu wona niku wa ku wona kutsumbeka kakwe. Niku a wuzvikoti ga kukalamuka legi Nungungulu a mahileko miri wakwe na wu hi nago gi wa ta mu vhuna ku kalamuka ka mababyi yakwe.
Murindzeli 09.17 paj. 14 par. 17
Kombisa tipswalo a ku fana na Jehovha
17 Hambu lezvi a ku kombisa tipswalo zvi hi vhunako, a cigelo ca hombe ca ku maha lezvo hi ku hi lava ku pimanyisa Jehovha ni ku mu nehela wudzundzo. A lirandzo ni tipswalo zvita hi le ka yena. (Mav. 14:31) I hi vekela cikombiso co mbhelela ca tipswalo. Hikwalaho, a hi maheni zvontlhe hi zvi kotako kasi ku mu pimanyisa. Hi ndlela leyo, hi ta bohana nguvhu ni vamakabye va hina hi tlhela hi hanyisana khwatsi ni van’wani.— Gal. 6:10; 1 Joh. 4:16.
Titshomba ta moya
Perspicaz vhol. 2 paj. 49
Jehovha
A matimu wontlhe ya Bhibhiliya ma wulawula hi ku yimela a wuhosi ga Jehovha ni ku lezvo zvi veka kubaseni a kungo-tshinya ga Nungungulu, ku nga kubasisiwa ka vito gakwe. A kubasisiwa loko ku patsa a kubasisiwa ka vito ga Nungungulu ka mawunwa wontlhe. Kanilezvi a ku hundza lezvo, zvi lava ku a vito gakwe gi dzundziwa kota vito go basa hi zvivangwa zvontlhe zva le tilweni ni zva laha misaveni. Lezvo zvi wula ku tiva ni ku kombisa cichavo a cikhundla ca Jehovha kota Hosi ya Hombe hi kuzvirandza na hi hi ni kuxuva ka ku mu tirela ni ku xalala hi ku maha kurandza kakwe hi kota ya lirandzo leli hi nga nalo hi yena. A mukhongelo wa Dhavhidha ka Jehovha, wu nga ka Lisimu 40:5-10, wu gi kombisa khwatsi a tshamela legi ni kubasisiwa ka lisine ka vito ga Jehovha. (Wona lezvi mupostoli Pawule a ma tirisisileko zvona a magezu ya lisimu leli ka Kristu Jesu ka Mah. 10:5-10.)
27 KA MAIO–2 KA JUNHO
TITSHOMBA TI NGA KA MHAKA YA NUNGUNGULU TISIMU 42-44
Vhuneka khwatsi hi lezvi Jehovha a gondzisako
Sentinela 1/6/06 paj. 9 par. 4
Timhaka-tshinya ta bhuku ga wumbiri ga Tisimu
42:4, 5, 11; 43:3-5. Loku hi cigelo co kari ci nga hiko ntan’wini wa hina hi tshuka hi tsawukana ni bandla ga wuKristu, a ku alakanya a wunghana go tsakisa legi hi nga hi nago ni vamakabye zvi nga hi tiyisa. Hambu lezvi kusanguleni lezvo zvi nga engetelako kubayisa ni ciwundza zvi nga tlhela zvi hi alakanyisa lezvaku Nungungulu wuchavelo ga hina ni ku hi fanele ku rindzela yena kasi hi kuma ku tlhatlhiswa.
Sentinela 15/1/12 paj. 15 par. 2
Zvini u mahako kasi a cigondzo ca wena ca Bhibhiliya ci tsakisa ci tlhela ci ku vhuna?
KHONGELA: A zambo go sangula ku khongela. (Lis. 42:8) Hikuyini? Hi fanele ku wona a cigondzo ca hina ca Mhaka ya Nungungulu kota cipandze ca wukhozeli ga hina. Hikwalaho, hi fanele ku kombela Jehovha kasi a hi nyika kupima ka kunene a tlhela a hi nyika moya wakwe wo basa. (Luka 11:13) Barbara, a nga ni malembe yo tala na a tira kota murumiwa, i wula lezvi: “Contlhe cikhati ndzi ranga hi ku khongela na ndzi nga se lera kutani ku gondza Bhibhiliya. Andzhako ka lezvo ndzi ti zwisa ku khwatsi Jehovha i na na mina kwalaha ni ku wa tsaka hi lezvi ndzi mahako.” A ku ranga hi ku khongela na hi nga se gondza zvi vhulula a maalakanyo ya hina ni mbilu kasi ku vhumela a zvakuga zvo tala zva moya lezvi hi nga nazvo.
Murindzeli 09.16 paj. 6 par. 11-12
“Ngha a mandla ya wena ma nga mbheli ntamu!”
11 Jehovha wa hi tiyisa kambe hi ku tirisa a zvileletelo lezvi hi zvi kumako mitlhanganweni ni migotsovanyanweni, ni ka zvikola zva hina zva wuKristu. A zvileletelo lezvo zvi nga hi vhuna ku tirela Nungungulu hi mbilu yi nene, hi ti vekela mixuvo, hi tlhela hi maha mitiro yo tala ya wuKristu. (Lis. 119:32) Wa xuva nguvhu ku tiyiswa hi zvileletelo zva Jehovha ke?
12 Jehovha i vhunile vanhu vakwe lezvaku va hlula vaAmaleki ni vaEtiopia, niku i nyikile ntamu Nehemiya ni vaJudha lezvaku va mbheta ku aka makhurisi ya Jerusalema. Hi ndlela yo fana, Nungungulu i ta hi nyika ntamu wa ku simama ni ntiro wa hina wo chumayela hambu loku hi hi ni kukarateka, hi kanetwa, ni ku nga kumi vanhu vo tsakela. (1 Ped. 5:10) Jehovha a nga ta tirisa cihlamaliso kasi ku hi susela zvikarato zva hina. Hi fanele ku maha cipandze ca hina. Hi ndlela muni? Hi fanele ku gondza Mhaka ya Nungungulu siku ni siku, hi longisela mitlhangano hi tlhela hiya mitlhanganweni leyo vhiki ni vhiki, hi maha cigondzo ca munhu wutsumbu ni wukhozeli ga ngango, ni ku tsumba Jehovha hi mukhongelo. Hi nga tshuki hi tsika nchumu wu hi colopetela ka zvilo lezvi Jehovha a hi nyikako kasi ku hi nyika ntamu ni ku hi tiyisa. Loku u wona lezvaku a mandla ya wena ma mbhelile ntamu ka cin’we ca zvilo lezvi, kombela Nungungulu lezvaku a ku vhuna. U ta wona lezvi a moya wa Nungungulu wu to ku nyikisa zvona ntamu ni “kuxuva ni kutira.” (Filp. 2:13) Hambulezvo, xana u nga tiyisa a mandla ya van’wani?
Titshomba ta moya
Perspicaz vhol. 1 paj. 479
Makhanga
Lomu ka Mitsalo a makhanga hi kuphindaphinda ma tirisiwa hi ndlela yo fananisa. A cikhati leci Joba a nga tlhamusela a ciyimo cakwe ca ku zwelisa wusiwana i wulile lezvaku i mahile ‘makabye wa mahlolwa [makhanga]’. (Joba 30:29) Xungetano hi kuhluliwa ka tingana ka vanhu va Nungungulu, a mutsali wa Tisimu, kuzvilava na a wulawula hi lomu ku nga lwiwa kona yimpi, lomu a makhanga ma tlhangana kona kasi maga a nyama ya zvirumbi (fananisa ni Lisimu 68:23) i wulile lezvi: ‘U hi tshovile wutshan’wini ga mahlolwa [makhanga]’. (Lis. 44:19) A kurandzelwa ka Jerusalema hi vaBhabhuloni hi 607 Mahlweni ka Nguva ya Hina, ku mahile lezvaku kuva ni ndlala ya hombe, lezvi zvi nga maha ku a vamamani va khoma vana vabye hi ndlela ya xapi. Hikwalaho, zva zwisiseka lezvi Jeremiya a wulileko lezvaku a kubiha ka “tiko ga mina” ku hambana nguvhu ni lezvi a makhanga ma khatalisako zvona hi vana va wona. — Miko. 4:3, 10.
3-9 KA JUNHO
TITSHOMBA TI NGA KA MHAKA YA NUNGUNGULU TISIMU 45-47
Lisimu la muchadho wa Hosi
Murindzeli 15/2/14 paj. 9-10 par. 8-9
Nengela a muchadho wa Yivhana!
8 Gondza Lisimu 45:13, 14a. A muswika i kombiswa na a sasekile nguvhu kasi ku chadha ni hosi. Ka Kuvhululelwa 21:2, a muswika i fananiswa ni dhoropa, a Jerusalema Giswa, a “bombiselweko nuna wakwe.” A dhoropa legi ga le tilweni gi na ni “kungangamela ka Nungungulu” niku ga hatima “khwatsi hi ribye ga ntsengo wa hombe, a ku fanana ni ribye ga jasperi, na gi basisile ku khwatsi hi kristali.” (Kuv. 21:10, 11) A kungangamela ka Jerusalema Giswa ku tlhamuselwa hi ndlela yo saseka ka bhuku ga Kuvhululelwa. (Kuv. 21:18-21) A zvi hlamalisi lezvi a muyimbeleli wa tisimu a kombisako a muswika na a “ngangamela”! Phela a muchadho lowo wa wuhosi wu maheka tilweni.
9 A muswika i yisiwa ka Muteki — ku nga Hosi ya wuMesiya. A Muteki i kari a longisela muswika, a mu basisa hi ku mu hlazva hi mati, ku nga mhaka. I ‘basile niku a nga na kusoleka.’ (Efe. 5:26, 27) A muswika wakwe i fanele ku ngha a bohile tinguwo ti yelanako ni cimaho leco kambe. Niku hi zvalezvo a nga bohisa zvona! Hakunene, “a tinguwo takwe ti lukilwe hi ndzalama,” niku ‘i ta yiswa hosini na bombile hi nguwo yi khomelweko.’ Ka muchadho wa Yivhana, “i lo nyikiwa ku ambala tinguwo to saseka ta wukene, ti basisilweko tiku pa! A tinguwo to saseka ta wukene hi mitiro ya kululama ya vobasa.” — Kuv. 19:8.
Murindzeli 05.22 paj. 17 par.10-12
Zvini lezvi a bhuku ga Kuvhululelwa gi wulako xungetano hi cikhati ci tako?
Zvini lezvi Jehovha a to maha hi kota ya kuvhukelwa loko ka vanhu vakwe? Jehovha i hi byela lezvi: “A zanga ya mina yi ta vindluka”. (Ezek. 38:18, 21-23) Kuvhululelwa cipimo 19 i tlhamusela lezvi zvi to maheka hi kulandzela. Jehovha i ta rumela a n’wana wakwe kasi ku vhikela vanhu vakwe ni ku hlula valala vabye. Jesu i talwa a yimpi leyo na a hi ni “mabutho ya le tilweni”, ku nga tingilozi to tsumbeka zvin’we ni lava va 144 000. (Kuv. 17:14; 19:11-15) A yimpi leyo yi ta gumesisa kuyini? A vanhu vontlhe lava va vhukelako Jehovha ni tihlengeletano ta kona zvi ta lovisiwa zvi ku bhi! — Lera Kuvhululelwa 19:19-21.
11 Hi nga alakanyela lezvi lava vo tsumbeka laha misaveni va to tsakisa zvona hi kuva va ponile a kulovisiwa ka valala va Nungungulu! Leco ci tava cikhati ca ku tsakisa nguvhu! Hambu lezvi le tilweni ku tova ni litsako la hombe a cikhati leci Bhabhuloni wa Hombe a to lovisiwa, ku nga tava cona coce a cigelo ca kutsaka. (Kuv. 19:1-3) A cin’wani cigelo, ku tava “muchadho wa Yivhana”, ku nga yona a mhaka-tshinya ya bhuku ga Kuvhululelwa. — Kuv. 19:6-9.
12 Wu ta maheka rini a muchadho lowo? Na ku kiyela kutsongwani kasi a yimpi ya Armagedhoni yi sangula, vontlhe lava va 144 000 va ta ngha va hi le tilweni. Hambulezvo, leco ci nga tava cikhati ca muchadho wa Yivhana. (Lera Kuvhululelwa 21:1, 2.) A muchadho wa Yivhana wu ta maheka andzhako ka yimpi ya Armagedhoni, a valala vontlhe va Nungungulu na va nga ha hi kona. — Lis. 45:3, 4, 13-17.
Perspicaz vhol. 1 paj. 1099
Yimpi
Kugumeseni ka yimpi leyo, a misava yi tava ni kurula hi 1000 wa malembe. A Lisimu li wulako lezvaku Jehovha i ‘maha a tiyimpi ti khawula kala magumelweni ya misava, a tshova wura, ni ku tsema tlhari gi pulakanyeka; a hisa tikareta ndzilweni’, a kusangula li tatisekile a cikhati leci Jehovha a nga neha kurula tikweni ga Izrayeli hi ku tshova matlhari ya valala. Andzhako ka loku Kristu a hlulile lava va vangako tiyimpi, a yimpini ya Armagedhoni, a misava yi tava ni kurula kusukela magemeta-musi kala magemeta-musi. (Lis. 46:8-10) Lava va to kuma wutomi ga pindzukelwa hi lava va to ngha va ‘tlombile zvipadha zvabye zvi maha zvikomu, hi matlhari yabye va fula mibhera ne va nga ha gondzi kulwa’. ‘Hakuva a nomu wa Jehovha wa tiyimpi wu wulile lezvo.’ — Isa. 2:4; Mika 4:3, 4.
Titshomba ta moya
Murindzeli 04.17 paj. 12 par. 9
Zvini zvi to ta fuvisiwa hi Mufumo wa Nungungulu?
9 Cini ci to vhaleta a tihlengeletano to biha? Xana ku tava ni hlengeletano yo kari laha misaveni andzhako ka Har–Magedoni? A Bhibhiliya gi wula lezvaku ku tava ni “matilo maswa ni misava yiswa, lomu a kululama ku tshamileko kona.” (2 Ped. 3:13) A matilo ya kale ni misava ya kale ku wuliwa a mifumo yo biha ni vanhu lava va yi rangelako. Loku zvi ta fuviswa, zvi ta vhaletwa hi yini? Zvi ta vhaletwa hi “matilo maswa ni misava yiswa.” A matilo maswa ku wuliwa mufumo wuswa, wu nga Mufumo wu wumbiwako hi Jesu Kristu ni vafumeli-kulobye va 144 000. A misava yiswa ku wuliwa a vanhu lava va to fumelwa hi Mufumo wa Nungungulu. Jesu ni lava a to fuma navo va ta mu pimanyisa hi kumbhelela Jehovha Nungungulu, loyi a nga hiko Nungungulu wa vhilinganya. (1 Kor. 14:33) Hikwalaho a “misava yiswa” yi nga tava ni vhilinganya. Ku tava ni vavanuna va va nene kasi ku wonelela a zvilo. (Lis. 45:16) A vavanuna lavo va ta rangelwa hi Kristu ni lava va 144 000. Hi nga alakanyela a cikhati leci a tihlengeletano tontlhe to biha ti to vhaletwa hi hlengeletano yin’we basi yi nga ni wumun’we, ya ku yi nga ta tshuka yi thapelwa hi wubihi!
10-16 KA JUNHO
TITSHOMBA TI NGA KA MHAKA YA NUNGUNGULU TISIMU 48-50
Vapswali, tiyisani kutsumba ka ngango wa n’wina ka hlengeletano ya Jehovha
Murindzeli 03.22 paj. 22 par. 11
A wukhozeli ga lisine gi ta engetela litsako la wena
11 Hi khozela Jehovha loku hi gondza Mhaka yakwe hi tlhela hi gondzisa vana va hina. A Sabhadho gi wa hi siku ga ku a vaIzrayeli va veka mitiro yabye hi tlhelo kasi va veka kupima ka wunghana gabye na Jehovha. (Ekso. 31:16, 17) A vaIzrayeli vo tsumbeka va wa tlhela va gondzisa vana vabye xungetano hi Jehovha ni wunene gakwe. Hinawu nyamutlha, hi fanele ku ti nyika cikhati ca ku lera hi tlhela hi gondza a Mhaka ya Nungungulu. Lezvo zvi maha cipandze ca wukhozeli ga hina niku zvi hi vhuna ku tshinela ka Jehovha. (Lis. 73:28) Niku laha hi gondzako kota ngango, hi nga vhuna vana va hina lezvaku va wumba wunghana go tiya ni Papayi wa hina wa lirandzo wa le tilweni. — Lera Lisimu 48:13.
Sentinela 15/3/11 paj. 19 par. 5-7
U na ni zvigelo zva ku tsaka
‘Tsemakanyani Ziyoni, mu gi rendzelekela, hlayani a makhokhola ya gona. Cuwukisani khwatsi a ligingisi la gona, mu langutela a tiyindlu ta gona ta wuhosi, kasi ma fela ku tlhatlhambutela ka cizukulwana ca ha tako.’ (Lis. 48:12, 13) Hi ndlela leyo, a mutsali wa Tisimu i wo kuca a vaIzrayeli a ku va wona a Jerusalema hi laha kusuhani. Wa zvi kota a ku alakanyela lezvi a mingango ya vaIzrayeli yi nga zvi alakanya laha yi nga endza yiya dhoropeni lego go basa kasi ku ya maha mibuzo ya lembe ni lembe ni ku wona a tempele yo hlamalisa? Handle ko kanakana va wa kuceka a ku zvi ‘tlhatlhambutela ka cizukulwana ci nga hata’.
Hi nga ehleketa hi muzindza wa le Xebha, loyi kusanguleni a nga kanakana hi lezvi a nga zvizwa xungetano hi kukula ka mufumo wa Solomoni ni wutlhari gakwe go hlamalisa. Cini ci nga mu kholwisa lezvaku lezvi a nga zvizwa zvi wa hi lisine? I wulile lezvi: ‘A ndzi kholwangi lezvi va nga wa zvi wula, kala lezvi ndzi ngata ndzi ta zvi wona hi mahlo ya mina.’ (2 Kro. 9:6) Kunene, lezvi hi zvi wonako hi ‘matihlo ya hina’ zvi nga hi khumba nguvhu.
U nga va vhunisa kuyini a vana va wena lezvaku va zvi wona hi ‘matihlo yabye’ a zvilo zvo hlamalisa zva hlengeletano ya Jehovha? Loku ku hi ni tsindza ga Vakustumunyu va Jehovha (Bheteli) kusuhani ni kaya ka wena, u nga tsiki ku gi endzela. Hi cikombiso, Mandy na Bethany, va wa tshama ka pfhuka wa cipimo ca 1500 wa tikilometro a ku suka hi kaya kabye kuya Bheteli. Hambulezvo, a vapswali vabye va wa maha malulamiselo ya ku va endzela Bheteli, nguvhunguvhu a cikhati leci va nga ha hi vaswa. Va wula lezvi: “Na hi nga se endzela Bheteli hi wa alakanya lezvaku a Bheteli wutshamu go karata nguvhu ni ku ku tshama vakhosaheleko basi. Kanilezvi hi no ya wona a vaswa va nga tirela Jehovha hi kutikarata ni ku va wa tsaka nguvhu! Hi no wona lezvaku a hlengeletano ya Jehovha yi wa nga gumelwi ka cipandze citsongwani leci hi nga hanya ka cona, niku khati ni khati hi nga endzela Bheteli zvi wa ku khwatsi i jesawu yi nga hi nyika ntamu hi tlhelo ga moya.” A ku wona a hlengeletano ya Jehovha hi laha kusuhani zvi kucile Mandy na Bethany lezvaku vava maphayona ni ku hi ndzhako ka cikhati va no rambiwa ku ya tira Bheteli kota vatiri va kuzvirandza va cikhatana.
Murindzeli 1/8/12 paj. 19 par. 5
Hanyani kota zvisumbulwa zva Mufumo!
5 Gondza matimu. A munhu loyi a lavako kuva cisumbulwa ca mufumo wa vanhu i fanele ku gondza co kari xungetano hi matimu ya mufumo lowo. Hi kufanana, lava va navelako kuva zvisumbulwa zva Mufumo wa Nungungulu va fanele ku gondza zvontlhe va zvi kotako xungetano hi Mufumo wakwe. Wona a cikombiso ca vana va Kora, lava va nga tira le Izrayeli wa kale. Va wa tsakiswa nguvhu hi Jerusalema ni wutshamu ga gona ga wukhozeli zvin’we ni ku hlawutela a matimu ya dhoropa legiya. Va wa nga xalaliswi hi maribye ni semende lezvi zvi nga akile a wutshamu lego ga wukhozeli kanilezvi va wa xalaliswa hi lezvi zvi nga yimelwa hi wutshamu lego. Jerusalema wu wa hi “muti wa Hosi ya hombe,” Jehovha, hakuva ku wa hi tsindza ga wukhozeli gi basileko. Hi kwalaho a Nayo wa Jehovha wu nga gondzisiwa kona. Jehovha i wa kombisa tipswalo takwe ka vanhu lava va nga fumelwa hi Hosi ya Jerusalema. (Gondza Lisimu 48:1, 2, 9, 12, 13.) Xana wenawu wa xuva ku gondza ni ku hlawutela a matimu ya cipandze ca laha misaveni ca hlengeletano ya Jehovha ke? Laha u yako u gondza xungetano hi hlengeletano ya Nungungulu ni lezvi Jehovha a vhunisako zvona a vanhu vakwe, a Mufumo wa Nungungulu wu tava wa lisine ka wena. A kuxuva ka wena a ku chumayela a mahungu yo saseka ya Mufumo ku ta andza ha koce. — Jer. 9:24; Luka 4:43.
Titshomba ta moya
Perspicaz vhol. 2 paj. 859
Titshomba
Kota tiko go ganya, a vaIzrayeli va waga ni kunwa leci va ci lavako (1 Tih. 4:20; Mutsh. 5:18, 19), niku a titshomba tabye ti wa va vhikela a zvikarato zvi vangiwako hi wusiwana. (Mav. 10:15; Mutsh. 7:12) Kanilezvi, hambu lezvi ka ku zvi wa yelana ni kungo ga Jehovha lezvaku a vaIzrayeli va ti buza hi mihandzu ya kutikarata kabye (fananisa na Mav. 6:6-11; 20:13; 24:33, 34), Jehovha i tlhelile a va tlharihisa hi mhango ya ku rivala lezvaku hi yena Cibuka ca titshomba tabye ni ku sangula ku tsumba titshomba. (Deut. 8:7-17; Lis. 49:6-9; Mav. 11:4; 18:10, 11; Jer. 9:23, 24) Va alakanyisilwe lezvaku a titshomba ti wa hi ta cikhatana (Mav. 23:4, 5), niku ti wa nga nyikelwi ka Nungungulu kota hakhelo ya kutlhatlhisa munhu ka kufa (Lis. 49:6, 7), niku ti wa nga hi na civhuno ka vafileko. (Lis. 49:16, 17; Mutsh. 5:15). Va kombilwe lezvaku a ku ti nyika nguvhu lisima a titshomba zvi wa ta maha ku va maha zvahava lezvi zvi nga ta maha ku va nga ha tsakelwi hi Nungungulu. (Mav. 28:20; fananisa na Jer 5:26-28; 17:9-11.) Va tlhelile va kuciwa kambe lezvaku ‘dhumisa Jehovha hi tshomba tabye’. — Mav. 3:9.
17-23 KA JUNHO
TITSHOMBA TI NGA KA MHAKA YA NUNGUNGULU TISIMU 51-53
Zvini u nga mahako kasi u nga mahi zviwonho zva hombe?
Murindzeli 01.19 paj. 15 par. 4-5
U nga yi vhikelisa kuyini a mbilu ya wena?
4 Hi magezu man’wani, a gezu “mbilu” ka Mavingu 4:23, gi wula lezvi hi zvi ehleketako, kutizwa ka hina, lezvi hi zvi xuvako, ni leci ci hi kucako ku maha zvilo zvo kari. Hi lezvi hi nga zvona futsi hi le ndzeni, na ku nga hi lezvi hi wonekisako zvona lahandle.
5 Kasi ku li zwisisa khwatsi a lisima la lezvi hi nga zvona hi le ndzeni, ehleketa hi lihanyo la hina. Kasi hi potsa zvibabyababyani, hi fanele ku hlawula zvakuga zva mavhitamina hi tlhela hi khandzakanya ku tiyisa miri. Hi kufanana, kasi hi hanya khwatsi hi tlhelo ga moya, hi fanele ku lera Bhibhiliya siku ni siku ni mabhuku ya hina ya wuKristu, hi tlhela hi komba ku ha kholwa ka Jehovha. Hi kombisa ku ha kholwa ka Jehovha hi ku hanya hi lezvi hi gondzako hi tlhela hi wulawula hi kukholwa ka hina ni van’wani. (Rom. 10:8-10; Jak. 2:26) Ca wumbiri, loku ho ya hi lezvi hi wonekisako zvona hi lahandle, hi nga pimisa ku a hi babyi, kuveni hi le ndzeni ha babya. Hi kufanana, loku ho ya hi lezvi hi zvi mahako siku ni siku hi tlhelo ga moya, hi nga alakanya ku hi tiyile, kuveni bava, le mbilwini ku na ni mixuvo ya hava yi milako. (1 Kor. 10:12; Jak. 1:14, 15) Hi nga rivali lezvaku Sathani i wa ta tsaka nguvhu loku i wo zvi kota ku hi hehla hi maalakanyo yakwe. Kasi ye Sathani i zamisa kuyini a ku hi hehla? Kona hi nga ti vhikelisa kuyini?
Murindzeli 15/6/15 paj. 14 par. 5-6
Hi nga zvi kota ku tshama hi basile
5 A yin’we ya tindlela ta ku komba lezvaku hi tsumba Jehovha hi kumbhelela ku khongela xungetano hi yimpi leyi hi lwako ni maalakanyo ma nga basangiko. Loku hi tshinela ka Jehovha hi mukhongelo, yenawu i ta tshinela ka hina. I hi nyika moya wakwe wa kubasa hi matsenya lezvaku hi kuma ntamu wa ku hlula maalakanyo yo biha hi tlhela hi tshama hi basile. Hikwalaho, a hi tiviseni Nungungulu a kuxuva ka hina ka mbilu ko lava ku mu tsakisa hi maalakanyo ya mbilu ya hina. (Lis. 19:14) Xana ha ti koramisa hi mu kombela kuva a hi hlola kasi ku pola ni yihi “ndlela ya kubiha” — ku ngava kunavela kutani kubyekelela ka hava — leyi yi nga hi yisako ciwonhweni ke? (Lis. 139:23, 24) Xana ha mu kombela hi kukhandzakanya lezvaku a hi vhuna ku hlayisa kutsumbeka ka hina a cikhati hi kumanako ni zviringo ke?— Mat. 6:13.
6 Kuzvilava lezvi hi nga wundliswa zvona kutani mahanyela ya hina ya kale zvi hi mahile hi randza ku maha lezvi Jehovha a zvi vengako. Hambulezvo, Jehovha a nga hi vhuna ku cica lezvi zvi lavekako kasi hi zvi kota ku simama hi mu tirela hi ndlela yi amukelekako. Hosi Dhavhidha i wa zvi zwisisa lezvo. Andzhako ka ku maha wubhayi na Bhatexebha, Dhavhidha i lo khongela ka Jehovha aku: “Ndzi vangele a mbilu yi hlazvekileko; ndzi nyike moya wuswa wa kutiya cikari ka mina.” (Lis. 51:10, 12, Tradução do Novo Mundo.) A mahanyela yo biha ma nga ha tsakelwa nguvhu hi nyama ya hina, kanilezvi Jehovha a nga hi nyika moya wuswa wa kuvhumela, wu hi mahako hi xuva ku mu ingisa. Hambu loku a kunavela ka hava ku womelele, na ku tala ku tlimba maalakanyo ya hina ma hlazvekileko, Jehovha a nga rangela mazambo ya hina kasi hi ingisa zvileletelo zvakwe hi tlhela hi zvi kota ku hanya hi zvona. Wa zvi kota ku hi vhikela ka zvilo zvontlhe zva hava lezvaku zvi nga hi fumeli. — Lis. 119:133.
Titshomba ta moya
Perspicaz vhol. 1 paj. 719
Dhowegi
I wa hi muEdhomi a nga tirela Hosi Sawule kota murisi. I wa hi nduna ya varisi, ku nga hi ntiro wu nga hi ni wutihlamuleli ga hombe. (1 Sam. 21:7; 22:9) Zvi wonekisa ku khwatsi Dhowegi i wa hi muprozelite. Lezvi a nga ‘khamekile mahlweni ka Jehovha’ le Nobhe, kuzvilava hi kota ya cifungo co kari a nga mahile, kutani hi kota ya kungahlazveki kutani hi kota ya ku ngha a alakanyelwa kuva ni hlokonho, Dhowegi i zvi wonile a cikhati leci a mupristi wa hombe, Ahimeleki, a nga nyika Dhavhidha a tipawa ta zvikombiso ni cipadha ca Goliyate. Hi ndzhako ka cikhati, laha Sawule a nga wulawula ni malandza yakwe, a wula lezvaku va wa kari va mu vhukela, Dhowegi i no hlawutela lezvi a nga zvi wonile le Nobhe. Andzhako ka ku vitanisa Ahimeleki, a mupristi wa Hombe, zvin’we ni vapristi van’wani va le Nobhe a tlhela a mu xuxisa, Sawule i no laya vatsutsumi lezvaku va daya vapristi. A cikhati leci va nga ala, hi ku rumiwa hi Sawule, Dhowegi i no daya a 85 wa vapristi na a nga chavi nchumu. Andzhako ka ku hihirita loko, Dhowegi i no laya lezvaku a tiko ga Nobhe gi hahluliwa, ku dayiwa vontlhe a vahanyi va gona, a vaswa ni vakhosaheleko, a ku patsa ni zvifuyo. — 1 Sam. 22:6-20.
Kota lezvi kombisiwako ka magezu ya laha hehla ya Lisimu 52, Dhavhidha i tsalile lezvi xungetano hi Dhowegi: ‘A lirimi la wena li pola zvilo zvi bihileko, li kariha khwatsi likari, wena mukhohlisi. U randza kubiha ku hundza kusaseka, u randza mawunwa ku hundza ku wulawula zvinene. U randza wontlhe a magezu ma lovisako, wena wa lirimi lo kanganyisa.’ — Lis. 52:2-4.
24-30 KA JUNHO
TITSHOMBA TI NGA KA MHAKA YA NUNGUNGULU TISIMU 54-56
Nungungulu i tlhelweni ga hina
Sentinela 1/8/06 paj. 22 par. 10-11
Kombisa wutlhari hi ku chava Nungungulu!
10 Ka khati go kari, Dhavhidha i no lava wuchavelo ka Akixi, a nga hi hosi ya le Gate, a tiko ga vaFilistiya, dhoropeni ga Goliyate. (1 Sam. 21:10-15) A malandza ya hosi ma no tivekisa Dhavhidha kota nala wa tiko lego. Zvini lezvi Dhavhidha a nga maha ka ciyimo leco ca mhango? I no chulula mbilu yakwe ka Jehovha hi mukhongelo. (Lis. 56:1-4, 11-13) Hambu lezvi zvi nga lava ku Dhavhidha a ti mahisa ku khwatsi o hlanya kasi a pona, hi lisine Dhavhidha i wa zvi tiva lezvaku hi Jehovha a nga mu ponisa hi ku katekisa a kutikarata kakwe. Hi ku tsumba Jehovha hi mbilu yontlhe, Dhavhidha i kombile lezvaku i wa chava Nungungulu. — Lis. 34:4-6, 9-11.
11 A ku fana na Dhavhidha, hinawu hi nga komba lezvaku ha chava Nungungulu hi ku tsumba lezvaku i ta hi vhuna ku lwisana ni zvikarato zva hina. Dhavhidha i wulile lezvi: ‘Nyikela a ndlela ya wena ka Jehovha, tsumba kakwe, yena i ta zvi maha.’ (Lis. 37:5) Lezvo a zvi wuli ku hi fanele a ku hendleleta a zvikarato zva hina ka Jehovha hi gumesa hi kondla mawoko, hi rindzela lezvaku a hi ponisa. Dhavhidha a nga khongela ka Nungungulu a gumesa a zvi tsikisa zvezvo. I no tirisa wutlhari legi Jehovha a nga mu nyikile kasi a yimisana ni cikarato leco. Hambulezvo, Dhavhidha i wa zvi tiva lezvaku kasi a humelela i wa nga faneli ku tsumba ntamu wakwe basi. Hi zvalezvo hinawu hi faneleko ku maha. Andzhako ka loku hi mahile zvontlhe zvi nga ntan’wini wa hina, lezvi zvin’wani hi fanele ku zvi tsika mandleni ya Jehovha. Hi lisine, ka zvikhati zvo tala a ku na leci hi nga mahako a ku hundza ku tsumba Jehovha. Laha, hi kwalaha a munhu a kombisako lezvaku wa chava Nungungulu. Hi nga chavelelwa hi magezu ya Dhavhidha yo huma mbilwini, yaku: ‘Jehovha i na ni wuhlengeli ni lava va mu chavako.’ — Lis. 25:14.
Achegue-se paj. 243 par. 9
A ci kona ci to “zvi kota ku hi hambanisa ni lirandzo la Nungungulu”
9 Jehovha kambe wa ku nyika lisima a kutimisela ka hina. (Mat. 24:13) Alakanya lezvaku Sathani i lava lezvaku u fularela Jehovha. Siku ni siku u simamako u tsumbekile ka Nungungulu u vhunetela a ku kaneta a mawunwa ya Sathani. (Mav. 27:11) A hi contlhe cikhati zvi olovako a ku timisela. A mababyi, ni wusiwana, ni kukarateka ni zvin’wani zvikarato zvi ngava zvikarato zva siku ni siku. Loku lezvi hi zvi rindzelako zvi nga maheki zvi nga hi mbheta ntamu. (Mav. 13:12) Loku hi tiya hi timisela a zvikarato lezvo, Jehovha wa ku nyika nguvhu lisima a kutikarata ka hina. Hi cigelo leco ci nga maha ku Dhavhidha a kombela Jehovha lezvaku a veka mihloti yakwe ka “nghotso” a tlhela a engeta a wula lezvi hi kutsumba: “A yi tsaliwangi lomu bhukwini ga wena ke?” (Lis. 56:8) Handle ko kanakana, Jehovha wa yi nyika nguvhu lisima yontlhe a mihloti ya hina ni kubayisa loku hi ku timiselako laha hi simamako hi tsumbekile kakwe ni ku a nga zvi rivali lezvo. Lezvo zvilo zva lisima nguvhu kakwe.
Murindzeli 06.22 paj. 18 par. 16-17
Lezvi a lirandzo li hi vhunisako zvona ku hlula
16 Sathani wa zvi tiva lezvaku ha khatala hi wutomi ga hina. I wula lezvaku hi nga tsika zvontlhe hi nga nazvo — hambu a wunghana ga hina na Jehovha — hi ku fela ku hanya. (Joba 2:4, 5) A ngo ku ti kalavela! Kanilezvi kota lezvi Sathani ku nga yena “loyi a nga ni ntamu wa ku daya,” i zama ku londzowota a kuchava ka hina ka ku chava kufa kasi ku hi maha hi fularela Jehovha. (Mah. 2:14, 15) Ka zvikhati zvo kari lava va kucetelwako hi Sathani va hi chavisela va ku va ta hi daya loku hi nga tsiki kukholwa ka hina. Ka zvikhati zvin’wani, kuzvilava Sathani a nga londzowota a zviyimo zvo chavisa zva matirelwa ya mababyi kasi ku hi tsikisa ku tirela Jehovha. A vadhokodhela kutani maxaka ma nga kholwiko ma nga hi kucetela ku vhumela ku cheliwa nkhata, lezvi zvi nga wa ta tshova a nayo wa Nungungulu. Kutani a wokari a nga hi maha hi vhumela a matirelwa man’wani ma nga yelaniko ni matshinya ya milayo ya Mitsalo.
17 Hambu lezvi hi nga zvi laviko kufa, ha zvi tiva lezvaku Jehovha a nga ta nyima ku hi randza hambu loku hifa. (Lera Va Le Roma 8:37-39.) Loku a vanghana va Jehovha vafa, i simama ku va alakanya a ku khwatsi hi loku va ha hanya. (Luka 20:37, 38) I zvi xuva nguvhu ku va vhuxa. (Joba 14:15) Jehovha i hakhele ntsengo wo tlakuka nguvhu kasi hi “kuma wutomi ga pindzukelwa”. (Joh. 3:16) Ha zvi tiva ku Jehovha wa hi randza nguvhu niku wa khatala hi hina. Hikwalaho, wutshan’wini ga ku fularela Jehovha a cikhati leci hi babyako kutani loku va hi dzukisela va ku hi tafa, hi tsutsumela kakwe kasi hi kuma kuchavelelwa, wutlhari ni ntamu. Hi zvalezvo futsi Valérie ni nuna wakwe va mahileko. — Lis. 41:3.
Titshomba ta moya
Perspicaz vhol. 1 paj. 707-708
Ku ranga u tiva ni ku wula zvilo na zvi nga se maheka
Lezvi Judhasi Iskariyoti a zvi mahileko zvi tatisile a zviphrofeto zva Nungungulu zvi tlhela zvi komba lezvaku Jehovha wa ranga a tiva zvilo na zvi nga se maheka a ku patsa ni lezvi zvi nga wulawula hi N’wana wakwe. (Lis. 41:9; 55:12, 13; 109:8; Miti. 1:16-20) Hambulezvo, a hi faneli ku chikelela a magumo ya lezvaku Nungungulu i wa zvi tiva kutani ku i mahile lezvaku Judhasi a maha zvilo hi ndlela leyo. A zviphrofeto zvi wa wula lezvaku a munghana wo kari wa hombe wa Jesu hi yena a to mu tokometa, kanilezvi zvi wa nga wuli hi kukongoma lezvaku himani. Ahandle ka lezvo, zvi wa talwa ni matshinya ya milayo ya Bhibhiliya a ku Nungungulu a ranga a wula lezvi Judhasi a nga wa ta maha. A nayo wa Nungungulu wu wulilweko hi mupostoli wu ngalo: “U nga tshuki u tsutsumela ku tlhateka mandla ya wena ka munhu; ne u nga hlengeli ka zviwonho zva van’wani; simama kuva ni mahanyela yo hlazveka.” (1 Tim 5:22; fananisa ni 3:6.) Na a komba a kukarateka kakwe ka lezvaku a kuhlawuliwa ka 12 wa vapostoli ku mahiwa hi ndlela ya yinene ni ya wutlhari, Jesu i no mbheta wusiku gontlhe na a khongela ka Papayi wakwe na a nga se tivekisa a ciboho cakwe. (Luka 6:12-16) Loku ku wa hi lezvaku Nungungulu i wa sina a zvi lavisile zvezvo zvaku Judhasi a tokometa Jesu, na zvi nga yelanangi ni wurangeli legi a nyikileko Jesu niku hi kuya hi nayo Nungungulu, na a hi nandzu wa zviwonho lezvi Judhasi a zvi mahileko.
Hikwalaho, zvi wonekisa ku khwatsi a cikhati leci Judhasi a nga hlawuliwa a kuva mupostoli, a mbilu yakwe yi wa nga hi na nchumu ci nga komba lezvaku i wa tava mutokometi. Judhasi i no vhumelela lezvaku ku ‘mila mutsu wa vhenene’ wu mu nyenyezisa zvi maha ku a hambuka a tlhela a vhumela ku kongomisiwa hi Sathani kasi a yiva ni ku tokometa wutshan’wini ga ku vhumela ku rangelwa hi Nungungulu. (Mah. 12:14, 15; Joh. 13:2; Miti. 1:24, 25; Jak. 1:14, 15; wona JUDAS N.º 4.) A cikhati leci a ciwonho ca Judhasi ci nga kula, Jesu i zvi wonile lezvi zvi nga hi mbilwini ya Judhasi a tlhela a wula lezvaku i wa ta mu tokometa. — Joh. 13:10, 11.