Timhaka ta mabhuku ma tako ka Cibhukwana ca Mutlhangano — BHIBLIOTEKA YA SAITE ya Watchtower

Timhaka ta mabhuku ma tako ka Cibhukwana ca Mutlhangano

3-9 KA MARÇO

TITSHOMBA TI NGA KA MHAKA YA NUNGUNGULU | MAVINGU 3

Komba lezvaku wa tsumba Jehovha

Mavhesi ya Bhibhiliya ma tlhamuselweko n.° 14 par. 4-5

Mavingu 3:5, 6 — “U nga tsumbi a kupimisisa ka wena n’winyi”

“Tsumba Jehovha hi mbilu ya wena yontlhe”. Hi komba lezvaku hi tsumba Nungungulu a cikhati leci hi mahako zvilo hi mawonela yakwe. Hi fanele ku tsumba Nungungulu hi kumbhelela, hi mbilu ya hina yontlhe. Lomu ka Bhibhiliya, a kutala ka zvikhati a mbilu ku wuliwa a munhu wa le ndzeni, lezvi zvi patsako lezvi hi ti zwisako zvona, ni lezvi zvi hi kucako ku maha zvokari, ni lezvi hi zvi pimisako ni mawonela ya hina. Hikwalaho, kasi hi tsumba Nungungulu hi mbilu yontlhe, a zvi faneli ku gumelwa ka lezvi hi ti zwisako zvona basi. Hi tsumba Jehovha hakuva ha tiyiseka lezvaku kota Muvangi wa hina wa zvi tiva lezvi zvi nga zvi nene nguvhu ka hina. — Rom. 12:1.

“U nga tsumbi a kupimisisa ka wena n’winyi”. Zvi lava ku hi tsumba Nungungulu hakuva a maalakanyo ya hina a ma mbhelelangi. Loku hi ti tsumba kutani hi rangelwa ntsena hi lezvi hi ti zwisako zvona, hi nga maha zviboho zvaku kusanguleni zvi nga wonekisa ku khwatsi zvinene kanilezvi hi magumo zvi hi nehela wuyelo ga hava. (Mav. 14:12; Jer. 17:9) A wutlhari ga Nungungulu ga hombe nguvhu a ku hundza legi ga hina. (Isa. 55:8, 9) Loku hi rangelwa hi maalakanyo ya Nungungulu zvi ta hi fambela khwatsi. — Lis. 1:1-3; Mav. 2:6-9; 16:20.

Mavhesi ya Bhibhiliya ma tlhamuselweko n.° 14 par. 6-7

Mavingu 3:5, 6 — “U nga tsumbi a kupimisisa ka wena n’winyi”

“Mu alakanye tindleleni ta wena tontlhe”. Hi fanele ku tiva mawonela ya Jehovha ka zvontlhe wutomini ga hina ni mawonela yakwe hi zviboho zva hina zva lisima lezvi hi mahako. Hi maha lezvo hi ku khongela kakwe hi kombela wusungukati ni ku maha lezvi a hi byelako lomu ka Mhaka yakwe, a Bhibhiliya. — Lis. 25:4; 2 Tim. 3:16, 17.

“I ta lulameta a tisoko ta wena”. Nungungulu i lulameta a tisoko ta hina hi ku hi vhuna ku hanya hi milayo yakwe yo lulama. (Mav. 11:5) Hikwalaho, hi potsa zvikarato zvo tala hi tlhela hi hanya wutomi go tsakisa. — Lis. 19:7, 8; Isa. 48:17, 18.

Beneficie-se paj. 76 par. 4

Simama ku kula hi tlhelo ga moya

A ku kumana ni zviyimo zvo hambanahambana wutomini zvi nga maha ku a munhu a ringiwa ku pimisa ku: ‘A ciyimo leci ndzi tshuka ndzi kumana naco. Ndza zvi tiva ku zvini ndzi to maha.’ Xana lezvo zvi ngava wutlhari? Mavingu 3:7 i hi tlharihisa, aku: “U nga ti byeli lezvaku u tlharihile”. Kunene lezvi hi zvi hanyileko zvi fanele ku engetela lezvi hi faneleko ku ehleketa hi zvona wutomini. Kanilezvi, loku hi kari hi kula hi tlhelo ga moya, lezvi hi zvi hanyileko zvi fanele ku hi alakanyisa lezvaku hi lava makatekwa ya Jehovha kasi zvi hi fambela khwatsi. A ku kula ka hina a ku woneki hi ku hi ti tsumba, kanilezvi ku woneka hi ku hi tsutsumela ka Jehovha kasi a rangela a wutomi ga hina. Hi komba lezvaku ha kula hi tlhelo ga moya hi ku tsumba lezvaku a ku na nchumu ci humelelako na ci nga vhumelelwi hi Jehovha ni ku simama hiva ni wunghana go tiya ni Papayi wa hina wa le tilweni.

Titshomba ta moya

Sentinela 15/09/06 paj. 17 par. 7

Timhaka-tshinya ta bhuku ga Mavingu

3:3. Hi fanele ku li nyika nguvhu lisima a lirandzo li nga mbheliko ni kutsumbeka a ku khwatsi i kordhawu ga lisima nguvhu. Hi fanele ku tlhela hi tsala a matshamela lawa timbilwini ta hina hi ku maha lezvaku mava cipandze ca wumunhu ga hina.

10-16 KA MARÇO

TITSHOMBA TI NGA KA MHAKA YA NUNGUNGULU | MAVINGU 4

“Hlayisa a mbilu ya wena”

Murindzeli 01.19 paj. 15 par. 4

U nga yi vhikelisa kuyini a mbilu ya wena?

Hi magezu man’wani, a gezu “mbilu” ka Mavingu 4:23, gi wula lezvi hi zvi ehleketako, kutizwa ka hina, lezvi hi zvi xuvako, ni leci ci hi kucako ku maha zvilo zvo kari. Hi lezvi hi nga zvona futsi hi le ndzeni, na ku nga hi lezvi hi wonekisako zvona lahandle.

Murindzeli 01.19 paj. 17 par. 10-11

U nga yi vhikelisa kuyini a mbilu ya wena?

Kasi hi zvi kota ku vhikela mbilu ya hina, ku laveka nchumu wa ku hi vhuna ku pola timhango, hi tlhela hi tekela ku ti vhikela. Ka Mavingu 4:23, a gezu gi hundzuluselweko ‘kuhlayisa’, gi hi alakanyisa ntiro wu mahiwako hi guarda. Masikwini ya Hosi Solomoni, ku wa hi ni va guarda va nga tshama le hehla ka makhurisi ya dhoropa kasi va gi vhikela ni kuba mpundzu loku va wona mhango na yita. A mufananiso lowu wu hi vhuna ku zwisisa lezvi hi faneleko ku maha kasi hi ti vhikela ku Sathani a nga hehli kupima ka hina.

A kaleloko, a va guarda va nga tshama le hehla ka makhurisi va wa tirisana ni lava va nga tshama lahasi va vhikela tinyangwa ta dhoropa. (2 Sam. 18:24-26) Lava va lahasi va wa tirisana ni lava va le hehla kasi ku vhikela dhoropa hi ku tekela ku vhala tinyangwa khati ni khati ku nga kari kuta valala. (Neh. 7:1-3) A livhalo la hina li gondzisilweko hi Bhibhiliya li nga tira kota guarda legi ga lehehla hi ku hi tlharihisa loku Sathani a zama ku dhumela mbilu ya hina — hi magezu man’wani, loku a zama ku hi mu pimanyisa ka lezvi hi pimisako, lezvi hi ti zwisako zvona, mixuvo ya hina, ni ka leci ci hi kucako ku maha zvilo. Contlhe cikhati a livhalo la hina li hi tlharihisako, hi fanele ku li ingisa, hi vhala tivati hi ndlela yo fananisa.

Murindzeli 01.19 paj. 18 par. 14

U nga yi vhikelisa kuyini a mbilu ya wena?

Kasi Sathani a nga hehli mbilu ya hina, a hi faneli ku yi vhikela ka zvilo zva hava basi; hi fanele ku tlhela hi yi vhulula kasi ku nghena zva zvi nene. Ehleketa kambe hi mufananiso wa dhoropa gi nga ni makhurisi. A guarda gi vhala tivati kasi a valala va nga dhumeli dhoropa. Kanilezvi, ka zvikhati zvin’wani gi vhulula tivati kasi ku nghena zvakuga ni zvin’wani zvi lavekako kasi a vanhu va hanya. Loku a tivati ti wo tshama ti vhalilwe, a vanhu lomu dhoropeni va wa ta xoka hi ndlala. Hi kufanana, hi fanele ku vhulula mbilu ya hina hi kukhandzakanya kasi yi pswonga kupima ka Nungungulu.

Sentinela 01/05/12 paj. 32 par. 2

“Hlayisa a mbilu ya wena”!

Hikuyini hi faneleko ku vhikela a mbilu ya hina yo fananisa? Nungungulu i kucile Hosi Solomoni a ku tsala lezvi: “Hlayisa a mbilu ya wena a ku hundza zvontlhe, Hakuva ka yona ku na ni zvibuka zva wutomi.” (Mav. 4:23) A wutomi ga hina zvezvi ni lungelo ga ku hi hanya kala kupindzuka cikhatini ci tako giya hi lezvi hi yi hlayisisako zvona a mbilu ya hina. Hikuyini? Hakuva Nungungulu wa zvi wona lezvi zvi nga timbilwini ta hina. (1 Sam. 16:7) Lezvi Nungungulu a ti zwisako zvona hi hina zviya hi lezvi a “munhu [wa hina] a fihleleko wa mbilu” a tshamisileko zvona. — 1 Ped. 3:4.

Titshomba ta moya

Murindzeli 08.21 paj. 8 par. 4

U ti yimisele ku rindzela Jehovha ke?

Mavingu 4:18 i wula lezvi: ‘A ndlela ya valulamileko yi kotisa kuwonekela ka mixo, loku ku endzelekako kala a hlikanhi wu mbhelela.’ A magezu lawa ma tolovela ku tirisiwa nguvhu ka lezvi Jehovha a yako a gi tivekisa zvona kungo gakwe ka vanhu vakwe. I zvi maha hi kutsongwani-kutsongwani. Hambulezvo, a vhesi legi kambe gi hi vhuna ku zwisisa lezvi a muKristu a yako a cicisa zvona wutomi gakwe ava munghana wa Jehovha. A munhu a nga hatlisisiwi ku kula hi tlhelo ga moya. Zvi teka cikhati. Loku hi ti karata hi gondza a Mhaka ya Nungungulu hi hanya hi lezvi hi gondzako ni ku tirisa wusungukati legi hi nyikiwako hi hlengeletano yakwe, hi taya hiva ni wumunhu go fana ni legi ga Kristu. Hi taya hi mu tiva khwatsi Nungungulu kambe. Wona mufananiso a nga wu tirisa Jesu kasi ku komba mhaka leyi.

17-23 KA MARÇO

TITSHOMBA TI NGA KA MHAKA YA NUNGUNGULU | MAVINGU 5

U nga mahi wubhayi

Sentinela 15/07/00 paj. 29 par. 1

U nga simama ni mahanyela yo basa tikweni legi go biha

Lomu ka Mavingu, a munhu wo biha i vitaniwa ku “wasati wa matiko”, a cibhayi. A magezu lawa a wasati loye a ma wulako kasi ku koka a jaha lego ma tsombela a ku fana ni wulombe niku ma nene a ku hundza mafura. Xana a kutala ka zviyimo zva wubhayi a zvi sangulisi lezvo? Hi cikombiso, wona lezvi zvi nga humelela Amy, a nga hi matsalani wo saseka nguvhu wa 27 wa malembe. I hlawutela lezvi: “Ndzi na ni mutiri-kuloni wo khatala nguvhu hi mina niku i zvi randza nguvhu a ku ndzi dzundza. Zva tsakisa a ku a van’wani va ku wona. Kanilezvi ndza zvi zwisisa khwatsi lezvaku a kukhatala kakwe hi mina ka ku lava ku hi hlengela masango. Ndzi nga ta tshuka ndzi wela ka ciringo cakwe.” A magezu ya munhu a lavako ku koka wo kari ma nandziha, ahandle ka loku hi tiva a kungo ga wona. Kasi hi zvi pola hi fanele ku tirisa a kupimisisa.

Sentinela 15/07/00 paj. 29 par. 2

U nga simama ni mahanyela yo basa tikweni legi go biha

A wuyelo ga ku maha wubhayi ga bava a ku fana ni vhenene niku ga kariha nguvhu a ku fana ni cipadha ca ku tsema seno ni seno, zvi wulako ku ga bayisa niku ga daya. A kutala ka zvikhati a wuyelo ga kona ku biwa hi livhalo, ku kuma nyimba yo kala u nga yi lavi, kutani ku kuma mababyi. Hi nga alakanyela a kubayisa loku a sati kutani nuna wa loyi a nga kala kutsumbeka a ku zwako. Hi ku nga tsumbeki khati gin’we basi zvi nga vanga zvilondza zva wutomi gontlhe. Kunene, a wubhayi ga vanga kubayisa.

Sentinela 15/07/00 paj. 29 par. 5

U nga simama ni mahanyela yo basa tikweni legi go biha

Hi fanele ku tshama kule ni kucetelo wa vanhu vo biha. A hi faneli ku pimanyisa mahanyela yabye hi ku ingisela mimuzka ya hava, ku sixtira tiprograma to kala kuhlazveka kutani ku sixtira pornografia. (Mav. 6:27; 1 Kor. 15:33; Efe. 5:3-5) Niku zvi wa nga tava zvinene a ku koka van’wani hi ku hlakana hi lirandzo kutani hi ku boha hi ndlela yo kala yi nga kombisi cichavo. — 1 Tim. 4:8; 1 Ped. 3:3, 4.

Titshomba ta moya

Sentinela 15/07/00 paj. 29 par. 7

U nga simama ni mahanyela yo basa tikweni legi go biha

Solomoni i kombile lezvi a munhu a nga zvi tshovelako hi ku maha wubhayi. A wubhayi ni ku ti susa lisima kutani lirandzo leli munhu a nga nalo hi yena n’winyi zvi famba zvin’we. Xana a zvi dhanisi a ku hanyela ku ti tsakisa kutani ku tsakisa van’wani? Xana a ku hlengela masango ni munhu wo kala u nga chadhangi naye a zvi kombi ku a wu ti randzi ke?

24-30 KA MARÇO

TITSHOMBA TI NGA KA MHAKA YA NUNGUNGULU | MAVINGU 6

Zvini hi gondzako ka tisokoti?

Perspicaz vhol. 1 paj. 999 par. 1-2

Tisokoti

‘Wutlhari ga ntumbuluko’. A ‘wutlhari’ legi a tisokoti ti nga nago a hi ku khwatsi to gondzisiwa, kanilezvi wutlhari ga ntumbuluko legi ti nga nyikiwa hi Muvangi wa tona. A Bhibhiliya gi wula lezvaku a tisokoti ti “longisela a zvakuga zva tona laha cimun’wini, ti hlengeleta a zvakuga zva tona hi cikhati ca kutshovela”. (Mav. 6:8) A tisokoti to tiveka nguvhu ti kumekako le Palestina, ti vitaniwako ku tisokoti ta kutshovela (Messor semirufus), ti hlengeleta a zvakuga zvo tala laha cimun’wini tiga hi nguva ya cirami, laha zvi karatako ku kuma zvakuga. A tisokoti leto ti tala ku kumiwa lomu va hulelako kona timbewu, lomu ku nga ni tindzhoho to tala. Loku a vhula yi tsakamisa a zvakuga lezvi zvi hlengeletelweko hi tisokoti, a tisokoti ta kutshovela ti rwalela ti zvi humesa lahandle kasi zvi woma. A tisokoti leto ta susa hambu hi timbilu ta timbewu leti ti ti hlengeleteleko kasi ti nga mili. A mitlawa ya tisokoti ta kutshovela yi woneka hi tindlela leti ti fambako hi tona ti bambatelweko khwatsi ni makamba ya timbewu lawa ma salako laha nyangweni wa nkele wa tona.

Matshamela hi nga ma pimanyisako. A ku hlola kutsongwani a tisokoti zvi maha ku mava ni ntamu a magezu lawa yaku: “Wena lolo, famba ka tisokoti u ya cuwukisisa a mahanyela ya tona, u tlhariha.” (Mav. 6:6) A tisokoti a ti tiveki basi hi ku longisela zvakuga zva tona, kanilezvi ti tiveka kambe hi kutimisela ni kutiyimisela ka tona, a kutala ka zvikhati na ti rwalile kutani ku kokovisela zvilo zvi bindzako nguvhu a ku hundza tona, ti maha zvontlhe ti zvi kotako kasi ku maha ntiro wa tona, ti nga vhumeli ku tsukula hambu loku tiwa, ti retemuka kutani ti famba ka wutshamu ga ndzhelelo nguvhu. Hi kota ya lezvi ti tirisanako khwatsi, a mikele ya tona yi tshama yi basile, niku ti kombisa kukhatala hi tin’wani, ka zvikhati zvin’wani hi ku vhuna leti ti bayisilweko kutani ti kareleko lezvaku ti tlhela lomu mikeleni.

Sentinela 15/09/00 paj. 26 par. 3-4

Hlayisa vito ga wena

Xana hi wa nga faneli ku ti tsitsirita a ku fana ni tisokoti? A ku tira hi kutitsitsirita ni ku ti karatela ku chukwatisa a ntiro wa hina zva hi vhuna, kani i kona a hi wonelelako kutani ahihi. Kani hi le cikoleni, kani hi le ntirweni kutani ka mitiro yin’wani ya moya, hi fanele ku ti karatela ku maha zvontlhe zvi nga ntan’wini wa hina. A ku fana ni lezvi a tisokoti ti vhunekako hi kutitsitsirita, Nungungulu i lava lezvaku ‘hi ti buza hi ntiro wa hina wontlhe hi wu dzunukeleko’. (Mutsh. 3:13, 22; 5:18) A livhalo li basileko ni kuxalala i nchachazelo wa ntiro wa hina. — Mutsh. 5:12.

Hi ku tirisa zviwutiso zvimbiri zvo kala zvi nga lavi hlamulo, Solomoni i no zama ku vhuxa malolo ka wurongo gabye, aku: “Wena lolo, u ta etlela kala rini? U ta vhuka rini wurongweni ga wena ke? Etlelanyana, ina, khudzehelanyana, kondlanyana mawoko u humula, makunu a wusiwana ga wena gi tata a ku khwatsi i khamba, ni kuvhumala ka wena a ku khwatsi munhu a hlomileko.” (Mav. 6:9-11) A cikhati leci a lolo gi etlelako, a wusiwana gi mu tela hi cihatla a ku khwatsi i khamba, ni kuvhumala ku mu khoma a ku khwatsi munhu a hlomileko. A masimu ya lolo ma khubhunyetiwa hi byanyi ni mimizwa. (Mav. 24:30, 31) A mabhindzu yakwe a ma hlweli kuwa. Xana a patrawu wo kari i wa ta tirisana ni lolo hi cikhati co kota kwihi? A munhu a lolohako ku gondza zvi nga mu fambela khwatsi cikoleni?

Titshomba ta moya

Sentinela 15/09/00 paj. 27 par. 4

Hlayisa vito ga wena

A 7 wa zviwonho lezvi zvi kumbukiwako ka Mavingu hi zvona zva tshinya niku zvi patsa a tixaka ta zvilo zvontlhe zva kubiha. “A mahlo ya matshandza” ni “mbilu yi xuxako a zvikungo zva kubiha” zviwonho lezvi zvi mahiwako maalakanyweni. A “lirimi li hembako” ni “kustumunyu wo hemba loyi a wulawulako mawunwa ntsena” magezu yo biha. A “mandla ma halatako a nkhata wu nga hiko na nandzu” ni “mikondzo yi tsutsumelako a ku maha zvakubiha” zvilo zvo biha. Niku loyi Jehovha a mu vengako nguvhu munhu loyi a tsakisiwako hi ku vhuxa tiholova cikari ka vanhu lava va hanyako hi kurula. A kuengeteleka ka zviwonho lezvi zva 6 zviya ka 7 zvi komba ku a zviwonho lezvi a hi zvona zvontlhe, kota lezvi ka ku contlhe cikhati a vanhu va engetela ku maha zvilo zvo biha.

31 KA MARÇO–6 KA ABRIL

TITSHOMBA TI NGA KA MHAKA YA NUNGUNGULU | MAVINGU 7

Potsa zviyimo zvi nga ku ringako

Sentinela 15/11/00 paj. 29 par. 5

“Hlayisa a zvileletelo zva mina kasi u hanya”

A janela legi Solomoni a nga cuwukisa hi gona, kuzvilava gi wa hi janela gi nga hi ni magradhi ya maripa, ma nga sasekiselwe. A cikhati leci gi nga phuma, lomu maruweni ku nova ni munyama. Solomoni i no wona jaha gi ngaya mhangweni. A jaha lego gi wa hi cipumbu niku gi wa nga hi na kupimisisa. Kuzvilava i wa ku tiva khwatsi laha a nga hi kona niku zvini lezvi zvi nga wa ta humelela. A Jaha lego gi no tshinela “kusuhani ni khona ga wasati loye” hi ruwa gi ngaya kaya kakwe. Hi mani wasati loyi? Zvini lezvi a nga zvi lava?

Sentinela 15/11/00 paj. 30 par. 4-6

“Hlayisa a zvileletelo zva mina kasi u hanya”

A magezu ya wasati loye ma wa nandziha. I wa tlharihisela kuwulawula niku i wa wulawula hi kutiya. Zvontlhe lezvi a nga zvi wula zvi wa hi zva ku fela ku koka a jaha lego. Hi ku wula lezvaku ka siku lego i wa nyikele a muphahlo wa kuhlengela niku i wa tatisile zvifungo zvakwe, i wa ti maha wo lulama a komba lezvaku i wa hi munhu wa moya. A miphahlo ya kuhlengela leyi yi nga mahiwa le tempeleni Jerusalema yi wa nyikelwa hi nyama, ni mapa, ni mafura, ni vhinyo. (Lev. 19:5, 6; 22:21; Mitse. 15:8-10) Kota lezvi ka ku loyi a nga nyikela a muphahlo lowo zvi wa koteka ku a sala ni cipandze cakwe ni ngango wakwe, i wulile lezvaku le kaya kakwe ku wa hi ni zvilo zvo tala zva kuga ni kunwa. A kovhinte yakwe yi wa dlunyatekile. A jaha lego gi wa ta tsaka le kaya ka wasati loye. I wa sukile kaya kakwe hi ku famba a lavetela a jaha lego. Zvi wa koka nguvhu loku a munhu a kholwa zvilo lezvo. A tlhari yo kari ya Bhibhiliya yi wulile lezvi: “Lisine lezvaku i wa lava wokari, kanilezvi xana hakunene i wa lava a jaha lego basi? Kuzvilava a cipumbu — co kota jaha lego — hi cona ci nga wa ta kholwa kakwe.”

Ahandle ka ku mu koka hi tinguwo leti a nga bohile, ni magezu yakwe yo xengetela, ni ku mu angarela, ni ku mu pswopswa, i tlhelile a tirisa masema. I wulile lezvi: “Ndzi andlalile a tinguwo to saseka laha mubhedhini wa mina, ta wukene ga mivalavala ga Gibhite. ndzi fafazele a mira, ni mhangani, ni kanela mubhedhini wa mina.” (Mav. 7:16, 17) I wa andlalele khwatsi a mubhedhi wakwe hi tinguwo ta wukene ga mivalavala ga Gibhite a tlhela a fafazela a mira yo nuhela, ni mhangani, ni kanela.

A wasati loye i tlhelile a wula lezvi: “Tana, hi ta popiwa hi lirandzo kala gica; a hi ti buze zvin’we hi lirandzo” . A kovhinte leyo yi wa nga nyimi laha ka ku va yaga zvakuga basi voce va vambiri. Yi wa tlhela yi patsa ku va hlengela masango. Ka jaha lego, ku wa hi citsumbiso ca ku va ti buza ni kutsaka! Kasi ku gi xengetela, a wasati loye i simamile aku: “A nuna wa mina a nga kona laha kaya; i endzile aya kule. I fambile ni cikhwama ca mali, niku a nga ta wuya na ku nga se chikela a siku legi a hweti yi to tala.” (Mav. 7:18-20) A wasati loye i mu tiyisekisile lezvaku ku wa nga tava ni cikarato hakuva a nuna wakwe i wa fambile a tendera mabhindzu niku i wa nga ta hatla a wuya. I wa tlharihile nguvhu kasi ku kanganyisa a jaha lego! “I gi kanganyisa hi magezu yakwe ya ntamu, a gi xengetela hi timhaka takwe to nandziha.” (Mav. 7:21) Zvi wa lava munhu wo fana na Josefa kasi ku ala ciringo leco co koka kupima. (Gen. 39:9, 12) Xana a jaha lego gi wa ta hlula ciringo leci?

Sentinela 15/11/00 paj. 31 par. 2

“Hlayisa a zvileletelo zva mina kasi u hanya”

A jaha lego a gi zvi kotangi a ku ala a ciringo leco. Gi no tsika kupimisisa, gi mu landzela “a ku khwatsi i homu yi yako kudaweni”. A ku fana ni lezvi a wanuna a nga paxweni zvi kalako zvi nga koteki ku a pona a tsayiselelo, a jaha lego gonawu gi xengetelwe ku giya ciwonhweni. A jaha lego gi wonile a mhango ya zvontlhe lezvo andzhako ka loku gi ‘tlhavilwe civindzi hi paxa’, ku nga cilondza ci nga wa ta maha ku gifa. A kufa loko ku wa tava ka lisine, hi kota ya lezvi a nga ti vekile mhakweni ya ku a kuma mababyi ma kumiwako hi kuhlengela masango. A cilondza leco kambe na ci mu vangele a kufa hi tlhelo ga moya hakuva zvi wa ‘patsa a muhefemulo wakwe wontlhe’. A matshamela yakwe wontlhe ni wutomi gakwe zvi no khumbiwa nguvhu niku i no maha ciwonho ca hombe ka Nungungulu. A jaha lego gi noya kufeni a ku fana ni cinyanyani ci yako ntlhan’wini!

Titshomba ta moya

Sentinela 15/11/00 paj. 29 par. 1

“Hlayisa a zvileletelo zva mina kasi u hanya”

Solomoni i simamile aku: “Zvi bohe titihweni ta wena; u zvi tsala mbilwini ya wena.” (Mav. 7:3) A ku fana ni lezvi a titiho hi ti wonako contlhe cikhati niku ta lisima loku hi lava ku maha cokari, lezvi hi zvi gondzako lomu ka Bhibhiliya kutani wutivi legi hi gi kumako lomu ka Bhibhiliya contlhe cikhati zvi fanele kuva cialakanyiso ni wurangeli gi hi rangelako ka zvontlhe hi mahako. Hi fanele ku zvi tsala timbilwini ta hina, zviva cipandze ca mahanyela ya hina.

7-13 KA ABRIL

TITSHOMBA TI NGA KA MHAKA YA NUNGUNGULU | MAVINGU 8

Zwana a wutlhari ga Jesu

Ngona U Nzi Lanzela paj. 131 par. 7

“Ndza Mu Randza Dhadhani”

Ka vhesi 22, a wutlhari gi ngalo: “Jehovha i no ndzi vanga kusanguleni ka ndlela yakwe, hi mahlweni ka mitiro yakwe ya kale.” A cin’wani co hundza a wutlhari ntsena ci fanele ku patseka laha, hi lezvaku a wutlhari cima a gi ‘vangiwangi.’ Gona cima a gi vangi ni masangulo hakuva Jehovha i kona cikhati contlhe niku yena i sina a tlharihile. (Lis. 90:2) Hambulezvo, a N’wana wa Nungungulu i wa hi “matewula ya zvivangwa zvontlhe”. Yena i vangilwe, ive wo sangula ka mitiro yontlhe ya Jehovha. (Kol. 1:15) A N’wana i vile kona a mahlweni ka misava ni matilo, kota kuhlawutela ka Mavingu. Niku kota Gezu, Muwulawuli wa Nungungulu, ive cikombiso co mbhelela ca wutlhari ga Jehovha. — Joh. 1:1.

Ngona U Nzi Lanzela paj. 131-132 par. 8-9

“Ndza Mu Randza Dhadhani”

Xana wu wa hi wihi a ntiro wa N’wana ndzeni ka cikhati ci nga hiko na ku hlayiwa mahlweni ka kuva ata misaveni? A vesi 30 gi hi byela lezvaku i wa hi tlhelweni ga Nungungulu kota “cigogo ca mitiro”. Xana lezvo zvi wula yini? A bhuku ga Va Le Kolosi 1:16 ga tlhamusela: “A zvilo zvontlhe zvi vangilwe ha yena, le tilweni ni laha misaveni, . . . zvontlhe zvi vangilwe hi yena, zvi vangelwa yena.” Hikwalaho Jehovha, a Muvangi, i lo tirisa N’wana wakwe, a Cigogo ca Mitiro, kasi ku vanga zvilo zvontlhe zvin’wani — kusukela ka zvivangwa zva moya le tilweni kala ka wuako gontlhe gi wonekako, ka misava ni tixaka ta yona to tsalangana ta kuhlamalisa ta tisinya ni zvihari, kala ka civangwa co tlakuka nguvhu laha misaveni: a munhu. Ka matshamela man’wani, hi nga fananisa a kutirisana cikari ka Dhadhani ni N’wana ni loku a mutsali wa zvithombe zva tiyindlu a nga nako ni meseri, kutani muaki, loyi a mahako lezvaku a mitiro ya mutsali yi tatiseka. A cikhati leci hi hlamalisiwako hi cilo cin’we ni cin’wani ca kuvanga, hakunene hi nyika wudzundzo ka Mutsali wa Hombe wa Zvithombe. (Lis. 19:1) Hambulezvo, hi nga ha alakanya kambe hi kutirisana ka simasima ni ko tsakisa cikari ka Muvangi ni ‘cigogo cakwe ca mitiro’.

Loku a vanhu vambiri va nga mbhelelangiko va tira nguvhu zvin’we, a zvikhati zvo kari zva va karatela a kuva va zwanana. Lezvo a hi zvona zvi mahekileko ka Jehovha ni N’wana wakwe! A N’wana i tirile a malembe ya tsandza-vahlayi ni Dhadhani wakwe niku i wa “tsaka contlhe cikhati mahlweni kakwe.” (Mav. 8:30) Ina, yena i wa nengela hi kuva zvin’we ni Dhadhani wakwe, niku lezvo zvi wa zwiwa hi vona va vambiri. Hakunene, a N’wana i kalile a fanana nguvhu ni Dhadhani wakwe, a gondza a ku pimanyisa a matshamela ya Nungungulu. Makunu, a zvi hlamalisi lezvaku a kubohana ku nga kona cikari ka N’wana ni Dhadhani ku lo tiya nguvhu! Hi kufaneleko, kona ka zvi kota ku vitwa lezvaku ciboho ca lirandzo ca kale nguvhu ni co tiya nguvhu ka zvontlhe wuakweni gontlhe.

Sentinela 15/04/09 paj. 31 par. 14

Kombisa kubonga ka Jesu, a nga Dhavhidha wa hombe na Solomoni wa hombe

Wanuna mun’we basi a palako Solomoni hi wutlhari. A wanuna loye hi Jesu Kristu, a ti wulileko ku i “nchumu wa hombe wo hundza Solomoni”. (Mat. 12:42) Jesu i wulawulile hi “timhaka ta wutomi ga pindzukelwa”. (Joh. 6:68) Hi cikombiso, a Kanelo yakwe ya le Citsungeni yi tlhamusele a matshinya yo kari ya milayo ma nga lomu ka Mavingu ya Solomoni, yi tlhela yi wulawula hi zvilo zvo hambanahambana zvi nehako litsako ka lava va khozelako Jehovha. (Mav. 3:13; 8:32, 33; 14:21; 16:20) Jesu i khanyisile lezvaku a litsako la lisine lita hi ka zvilo zvi yelanako ni ku khozela Jehovha ni kutatiseka ka zvitsumbiso Zvakwe. I wulile lezvi: “Va tsaka lava va tivako ku va ni tora ga ku tiva Nungungulu, hakuva a Mufumo wa matilo wabye.” (Mat. 5:3) Lava va landzelako a matshinya ya milayo ma kumekako ka tigondzo ta Jesu, va tshinela ka Jehovha, “a cibuka ca wutomi”. (Lis. 36:9; Mav. 22:11; Mat. 5:8) Jesu Kristu i kombisa a “wutlhari ga Nungungulu”. (1 Kor. 1:24, 30) Kota Hosi ya wuMesiya, Jesu i na ni “moya wa wutlhari”. — Isa. 11:2.

Titshomba ta moya

Murindzeli 10.22 paj. 18 par. 1-2

A wutlhari ga lisine ga banguleka gi vitana

KA MATIKO yo tala, zvi tolovelekile a ku wona vahuweleli va Mufumo lomu maruweni ma teleko hi vanhu na va zama ku nyikela mabhuku na va tsakile ka lava va hundzako. U tshuka u chumayela hi ndlela leyi ke? Loku zvi hi lezvo, ha tiyiseka ku wa tshuka u ehleketa hi mufananiso wu nga ka bhuku ga Mavingu, wu wulawulako hi wutlhari gi bangulekako gi vitana lomu prasa ya dhoropa. (Lera Mavingu 1:20, 21.) A Bhibhiliya ni mabhuku ya hina ma na ni “wutlhari” ga lisine — ku nga wutlhari ga Jehovha. A mahungu lawo hi yalawa a vanhu va ma lavako futsi kasi va sangula ku famba ndleleni yi yako wutomini. Loku a wokari a vhumela ku teka bhuku go kari hi tsaka nguvhu. Kanilezvi, a hi vontlhe va tekako. A vokari ne a va na mhaka ni ku tiva lezvi a Bhibhiliya gi gondzisako. A van’wani va hi hleka. Va ti byela ku a Bhibhiliya gi hundzelwe. Ku ni lava va solako milayo ya gona xungetano hi mahanyela, vaku lava va hanyako hi yona a hi vanene niku va ti byela ku va lulamile. Hambulezvo, Jehovha wa ha simama ku kombisa lirandzo hi ku nyika wutlhari gakwe ka ni wihi a gi lavako. I zvi mahisa kuyini?

A yin’we ya tindlela leti Jehovha a ti tirisako kasi ku a vanhu vazwa wutlhari i Mhaka yakwe, a Bhibhiliya. Hi nga zvi wulisa ku ni wihi a gi lavako a nga gi kuma. Ahati a mabhuku ya hina ke, lawa ma seketelwako ka Bhibhiliya? Hi ku vhuniwa hi Jehovha, ma humesiwa hi 1000 wa tirimi ni kuhundza. Lava va vhumelako ku ingisela wutlhari lego, ku nga ku gondza ni ku hanya hi lezvi va gondzako, va ta vhuneka. Hambulezvo, a vanhu vo tala a va na mhaka ni ku ingisela wutlhari ga Jehovha. Loku va lava ku maha zviboho, va ti mahela lezvi va zvi lavako kutani ku maha lezvi va byeliwako hi van’wani. Ka zvikhati zvin’wani va nga hi chepeta futsi hi lezvi hi hlawulako ku hanya hi lezvi a Bhibhiliya gi gondzisako. Ka ndzima leyi, hi ta wona ku hikuyini a vanhu va mahako lezvo. Hambulezvo, a hi rangeni hi ku wona lezvi hi nga gi kumisako zvona a wutlhari ga Jehovha.

14-20 KA ABRIL

TITSHOMBA TI NGA KA MHAKA YA NUNGUNGULU | MAVINGU 9

Maha munhu wo tlhariha, u ngavi mutseketseli

Murindzeli 02.22 paj. 9 par. 4

Ingisa wusungukati ga lava va nga ni wutlhari

Hi lisine, a wusungukati hi nyikiwako hi wokari zvi nga tshuka zvi hi karatela ku gi ingisa. Hi nga tshuka hi khunguvanyeka kambe. Hikuyini? Hi ku hambu lezvi hi zvi tivako khwatsi a ku a hi mbhelelangi, zvi nga tshuka zvi hi karatela ku vhumela wusungukati loku a wokari a hi byela nchumu wo kari hi nga phazama. (Lera Mutshawuteli 7:9.) Hi nga sangula ku ti yimelela. Hi nga ti wutisa ku iza a ndzi nyika wusungukati lego hikuyini, kutani ku swireka hi lezvi a nga hi nyikisa zvona. Hi nga tshuka hi chikela laha ko solasola loyi a nga hi nyika wusungukati, hiku: ‘Ova mani yena a kuza a ndzi nyika wusungukati? A nga zvi woni a zvihoxo zvakwe?’ Loku a wusungukati lego gi nga yelani ni lezvi hi zvi lavako, hi nga guma hi giba hi makatla kutani ku kombela mun’wani hi wonako ku i ta hi byela lezvi hi lavako ku zvizwa.

Murindzeli 02.22 paj. 12 par. 12-14

Ingisa wusungukati ga lava va nga ni wutlhari

Cini ci nga hi vhunako ku vhumela wusungukati? Hi fanele ku ti koramisa, hi zvi zwisisa hi tlhela hi vhumela ku a hi mbhelelangi niku ka zvikhati zvin’wani hi nga tshuka hi maha zvilo zva wupumbu. Kota lezvi hi zvi wonileko le hehla, Joba ive ni mawonela ya hava. Hambulezvo, Jehovha i gumile a mu katekisa hi ndzhako ka cikhati. Hikuyini? Hakuva Joba i wa ti koramisa. I kombisile tshamela legi hi ku vhumela wusungukati legi Elihu a nga mu nyika, a cica mawonela yakwe, hambu lezvi Elihu a nga hi mutsongwani ka yena. (Joba 32:6, 7) A ku ti koramisa kambe zvi ta hi vhuna ku tirisa wusungukati hambu loku gi wonekisa ku khwatsi a gi laveki kutani loku hi nyikilwe hi munhu a nga mutsongwani ka hina. A dhota go kari ga le Canadá gi wulile lezvi: “Lezvi hi kalako hi nga ti wonisi lezvi a van’wani va hi wonisako zvona, zva karata ku kula loku hi nga nyikiwi wusungukati.” Hontlheni ha zvi lava futsi a ku kula, hi engetela mihandzu ya moya ni ku wu maha khwatsi a ntiro wa hina kota maKristu. — Lera Lisimu 141:5.

Wona wusungukati kota cikombiso ca ku Jehovha wa ku randza. Jehovha i lava ku zvi hi fambela khwatsi wutomini. (Mav. 4:20-22) Loku a hi nyika wusungukati hi ku tirisa Mhaka yakwe, mabhuku ya hlengeletano kutani makabye wo buvha, o kombisa lezvaku wa hi randza. Mahebheru 12:9, 10 i wula lezvi: “I hi laya kasi hi vhuneka.”

Veka kupima ka wusungukati ga kona, na ku nga hi ka lezvi u nga nyikisiwa zvona. Ka zvikhati zvin’wani, hi nga ti zwisa ku loyi a nga hi nyika wusungukati a nga hi nyikangi hi ndlela ya yi nene. Lisine ku loyi a nyikako wusungukati yenawu i fanele ku zvi maha hi ndlela ya ku zvi olova ku gi amukela. (Gal. 6:1) Hambulezvo loku hi nyikiwa wusungukati, i chukwana ku hi veka kupima ka wusungukati ga kona, hambu loku hi ti zwisa ku i wa fanele ku hi nyika hi ndlela ya yi nene. Hi nga ti wutisa lezvi: ‘Hambu loku ndzi nga xalali hi lezvi a nga ndzi nyikisa zvona, a ku ci kona ndzi nga gondzako ka lezvi a nga wula? A ku ndzi nga tsika cihoxo ca loyi a nga ndzi nyika wusungukati, ndzi maha lezvi a nga wula ke?’ Zvi wa tava zvi nene nguvhu ka hina a ku zama ku vhuneka hi ni gihi wusungukati hi nyikiwako. — Mav. 15:31.

Sentinela 15/05/01 paj. 30 par. 1-2

‘Hi kota ya wutlhari, a masiku ya hina ma ta tala’

Lezvi a munhu wo tlhariha a mahako loku a kawukiwa zvi hambene ni lezvi a mutseketseli a mahako loku a kawukiwa. Solomoni i wulile lezvi: “Kawuka a munhu a tlharihileko, i ta ku randza. Gondzisa a munhu a tlharihileko, i ta tlhariha nguvhu.” (Mav. 9:8b, 9a) A munhu wo tlhariha wa zvi tiva lezvaku “a ku na kulayiwa ku tsakisako hi cikhati ca kona, kanilezvi ka bayisa; hambulezvo hi ndzhako ka cikhati, ku pswala handzu wa kurula ni wa kululama ka lava va gondzisiwako hi kona”. (Mah. 12:11) Hambu lezvi a kukawukiwa ku nga bayisako, hikuyini hi nga wa ta lava kuphota kutani ku ti yimelela, kasi lezvo loku hi vhumela zvi ta maha ku hi tlhariha nguvhu?

A hosi yo tlhariha yi simamile, yiku: “Gondzisa a munhu wa kululama, i ta engetela kutiva.” (Mav. 9:9b) A ku na munhu wo tlhariha nguvhu kutani a kulileko nguvhu hi tanga laha ka ku a zva ha ringani ku a gondza. A zvo ku tsakisa a ku wona hambu hi lava va kulileko hi tanga na va vhumela lisine va tlhela va ti nyikela ka Jehovha. Niku ngha hinawu hi ti karatela ku simama hiva ni kuxuva ka ku hi gondza hi tlhela hi nga tsiki maalakanyo ya hina ma khudzehela.

Sentinela 15/05/01 paj. 30 par. 5

‘Hi kota ya wutlhari, a masiku ya hina ma ta tala’

A kutikarata kasi hi kuma wutlhari wutihlamuleli ga hina. Kasi ku khanyisa mhaka leyi, Solomoni i wulile lezvi: “Loku u tlhariha, zvi vhuna wena n’winyi, kanilezvi loku u hi mutseketseli, zvi ta bindza wena wece.” (Mav. 9:12) A munhu wo tlhariha i vhuna yena n’winyi niku a mutseketseli i ti xanisa ha yece. Hikwalaho, hi tshovela lezvi hi byalako. Makunu, ‘demba a ndleve ya wena u ingisela wutlhari’. — Mav. 2:2.

Titshomba ta moya

Murindzeli 06.23 paj. 22-23 par. 9-10

Simama ku vhuneka hi ku chava Jehovha

Hi na ni zvigelo zvo zwala zvi faneleko ku hi kuca ku hi nga mahi wubhayi. Ku wuliwa lezvaku a ‘wasati wa cipumbu’ i wula lezvi: ‘A mati ma yivilweko ma nandziha.’ Cini a mati lawo ya ku yiviwa? A Bhibhiliya ga wulawula hi masango ma hlengelwako hi nuna ni sati kota mati yo tima tora. (Mav. 5:15-18) A sati ni nuna va chadhileko hi nayo va nga kuma litsako hi ku hlengela masango hi ndlela yi nene ndzeni ka wukati gabye. Kanilezvi, a zvi tshamisangi lezvo hi ‘mati ma yivilweko.’ A mati lawo ku nga wuliwa ku hlengela masango ma nga hiko nayweni. A kutala ka zvikhati lezvo zvi mahiwa cihundleni, a ku fana ni lezvi a khamba gi yivako cihundleni. A ‘mati ma yivilweko’, kutani masango, ma nga ku khwatsi ma nandziha, nguvhunguvhu loku lava va hlengelako va ti byela ku a ciwonho cabye ci nga ta tiveka. Kuveni vo ti fayelisa! Jehovha wa zvi wona zvontlhe. A ku na nchumu ca ku bayisa nguvhu a ku hundza ku nga ha tsakelwi hi Jehovha. Hikwalaho, a hi nge wuli ku a ku maha lezvo zva ‘nandziha’. (1 Kor. 6:9, 10) A zvi nyimi laho.

A ku maha wubhayi zvi wisa tingana, zvi maha munhu a tizwa na a ga vhuni nchumu, a kuma nyimba na a nga yi lavi, zvi tlhela zvi hohlola mingango. Makunu, zvi na se dlunya a ku wutlhari a ku ngayi kaya ka wasati wa cipumbu ni kuga zvakuga zvakwe. Ahandle ka kufa hi tlhelo ga moya, a votala va mahako wubhayi va kuma mababyi lawa ma gumesako ma va daya futsi hi kelela. (Mav. 7:23, 26) A vhesi 18 ga cipimo 9, gi gumesisa lezvi: ‘Lava a va rambileko va lomu ndzeni ka Xeole’ — ku nga cilahla. A hi na cigelo ca ku vhumela ku kalavelwa hi yena a hi peta khombyeni lego. — Mav. 9:13-18.

21-27 KA ABRIL

TITSHOMBA TI NGA KA MHAKA YA NUNGUNGULU | MAVINGU 10

Hi nga li kumisa kuyini a litsako la lisine?

Sentinela 15/07/01 paj. 25 par. 1-3

‘A valulamileko va katekisiwa’

A valulamileko va tlhela va katekisiwa hi ndlela yin’wani. “A mandla yo loloha ma vanga wusiwana, kanilezvi a mandla lawa ma ti tsitsiritako ma ganyisa. A n’wana loyi a nga ni kupimisisa i tshovela timbewu laha cimun’wini, kanilezvi a n’wana loyi a wisako tingana i etlela le’ga tshongotshongo cikhatini ca kutshovela.” — Mav. 10:4, 5.

A magezu lawa ya hosi ma tira nguvhu ka lava va tirako kutshoveleni. A cikhati ca kutshovela a hi cikhati ca ku etlela. Cikhati ca ku tira nguvhu ni ku ti tsitsirita. Kunene, ku laveka cihatla.

Na a kari a ehleketa hi kutshovela ka vanhu, na ku nga hi ka timbewu, Jesu i byelile vapizani vakwe, aku: “A ntiro wa kutshovela wa hombe, kanilezvi a vatiri va tsongwani. Hikwalaho, kombelani a N’winyi wa ntiro [Jehovha Nungungulu] lezvaku a rumela vatiri kutshoveleni kakwe.” (Mat. 9:35-38) Hi 2000, ku vile ni 14 000 000 wa vanhu ni ku hundza va wonileko Cialakanyiso ca kufa ka Jesu — ku nga ntsengo wu hundzako hi kumbiri a ntsengo wa Vakustumunyu va Jehovha. Makunu himani a nga alako lezvaku a masimu “ma te xwe kasi ma tshovelwa”? (Joh. 4:35) A vakhozeli va lisine va kombela vatiri ka n’winyi wa ntiro na va kari va ti tsitsirita ntirweni wa ku maha vapizani hi ku yelana ni mikhongelo yabye. (Mat. 28:19, 20) Niku Jehovha wa katekisa a kutikarata loko! Ka lembe ga ntiro ga 2000 ku bhabhatisilwe a 280 000 wa vanhu ni ku hundza. A vanhu lavo vonawu va ti karatela kuva vagondzisi va Mhaka ya Nungungulu. Ngha hizwa litsako ni kuxalala ka nguva leyi ya kutshovela hi ku hlengela hi mbilu yontlhe ntirweni wa ku maha vapizani.

Sentinela 15/09/01 paj. 24 par. 3-4

Famba ‘ndleleni ya kululama’

Solomoni i kombile a lisima la kululama. I te: “A tshomba ya munhu wo ganya i dhoropa gakwe gi vhikelweko khwatsi. A kulova ka zvisiwana wusiwana ga zvona. A ntiro wa loyi a lulamileko wu yisa wutomini; kanilezvi a bhindzu ga wakubiha gi yisa ciwonhweni.” — Mav. 10:15, 16.

A titshomba ti nga hi vhikela ka zvilo zvo kari wutomini a ku fana ni lezvi a dhoropa gi bhiyelweko gi vhikelako hi ndlela yo kari lava va hanyako ka gona. A wusiwana gi nga bayisa nguvhu loku ku humelela zvikarato zva citshuketi. (Mutsh. 7:12) Hambulezvo, a hosi yo tlhariha kuzvilava yi wulawulile hi cikarato co kari ci nga khumbako munhu wo ganya kutani wa cisiwana. A munhu wo ganya a nga tsumba titshomba takwe, a alakanya lezvaku a zvilo zvakwe zva lisima “i muro wu vhikelako”. (Mav. 18:11) A cisiwana conawu ci nga alakanya lezvaku a wusiwana gakwe gi maha ku a nga hi na kutsumba. Hikwalaho, hi wumbiri gabye va tsika ku ti mahela vito gi nene mahlweni ka Nungungulu.

Perspicaz vhol. 1 paj. 315

Makatekwa

Jehovha wa katekisa vanhu. “A cikatekiso ca Jehovha hi cona ci ganyisako munhu, niku a nga engeteli kubayisa hi cona.” (Mav. 10:22) Jehovha i katekisa lava a va tsakelako hi ku va vhikela, ku va maha va humelela, ku va rangela, ku maha ku zvi va fambela khwatsi, ni ku khatalela zvilaveko zvabye hi ndlela ya yinene kabye.

Titshomba ta moya

Sentinela 15/05/06 paj. 30 par. 18

Litsako la ku famba hi kululama

“A cikatekiso ca Jehovha” — hi cona cibuka ca litsako la vanhu va Jehovha. Niku hi na ni citiyisekiso ca lezvaku a ci “engeteli kubayisa”. (Mav. 10:22) Makunu, hikuyini a malandza yo tsumbeka ya Nungungulu ma kumanako ni zvikarato zvi ma vangelako kubayisa ka hombe ni kuxaniseka? Ku na ni zvigelo zvinharu zva tshinya zvi mahako ku hi kumana ni zvikarato. 1) Kungambheleli ka hina. (Gen. 6:5; 8:21; Jak. 1:14, 15) 2) Sathani ni madhimoni yakwe. (Efe. 6:11, 12) 3) Tiko go biha. (Joh. 15:19) Hambu lezvi Jehovha a vhumelelako lezvaku hi humelelwa hi zvilo zvo biha, a hi yena a zvi vangako. Kunene, “a zvinyikiwo zvontlhe zvo saseka ni zvinyikiwo zvontlhe zvo mbhelela zvita hi le hehla, zvi relela hi ka Papayi wa kuwonekela ka le tilweni”. (Jak. 1:17) A makatekwa ya Jehovha a ma hi vangeli kubayisa.

28 KA ABRIL–4 KA MAIO

TITSHOMBA TI NGA KA MHAKA YA NUNGUNGULU | Mavingu 11

U nga tshuki u wula zvilo lezvi!

Sentinela 15/05/02 paj. 26 par. 4

A vanhu vo lulama va kuciwa hi kutsumbeka

A kutsumbeka ka vanhu vo lulama ni wubihi ga vanhu vo biha zva khumba van’wani. A hosi ya Izrayeli yi wulile lezvi: “Hi nomu wakwe, a mudhuki wa lovisa a muakelani wakwe, kanilezvi hi wutivi, a valulamileko va tlhatlhisiwa”. (Mav. 11:9) Himani a nga alako lezvaku a mahlevo, ni ku lumbeta van’wani, ni magezu yo kala kuhlazveka ni mabhulo yo kala ma nga vhuni nchumu zva chakisa van’wani? Kanilezvi a munhu a lulamileko i hlawula khwatsi magezu yakwe, a wulawula timhaka ta tinene ni ta lisine. I vhikelwa hi wutivi, hakuva a kutsumbeka kakwe ku mu vhuna ku wona lezvaku lava va mu lumbetako vo mu hembela.

Sentinela 15/05/02 paj. 27 par. 2-3

A vanhu vo lulama va kuciwa hi kutsumbeka

A vahanyi va dhoropa go kari va landzelako mahanyela ya manene va vhuvhumisa kurula ni kutshamiseka, niku va aka van’wani lomu cipandzeni cabye. Hi ndlela leyo a dhoropa lego ga vhuvhuma. Lava va mahlevo, ku nga zvilo zvo biha, va vanga woyonga, ni ku kala litsako, ni tiholova ni zvin’wani zvikarato. Lezvo zvi humelela nguvhu loku a vanhu lavo va hi ni wutihlamuleli go kari. A dhoropa go tshamisa lezvo gi tolovela kuva ni gujeguje, ni kukanganyisa, ni mahanyela yo biha kuzvilava ni wusiwana.

A tshinya ga nayo gi nga ka Mavingu 11:11 gi tira hi ntamu ka malandza ya Jehovha, a cikhati leci ma tlhanganako ni van’wani. A bandla legi gi nga ni vanhu va moya, ku nga vanhu vo tsumbeka va rangelwako hi kululama, i bandla gi nga ni vanhu vo tsaka, vo ti tsitsirita ni ku randza ku vhuna van’wani, va mu nyika wudzundzo Nungungulu. Jehovha wa katekisa a bandla lego gi tlhela gi kula hi tlhelo ga moya. Ka zvikhati zvo kari, a vokari va nga tshuka va nga xalali, va solasola kutani ku wulawula zva hava hi ndlela leyi a zvilo zvi mahiwako hi yona. A vanhu lavo va fana ni “mutsu wa vhenene”, wu nga kulako wu thapela van’wani. (Mah. 12:15) A kutala ka zvikhati, a vanhu lavo va lava kuva ni malungelo yo tala ni nduma. Va vanga zviwulawula zva ku lomu bandleni, kutani ku a madhota ma na ni kungalulami, ni cihlawulela, kutani zvin’wani zvilo zvo biha. Hikwalaho, a nomu wabye wu nga vanga kuhambana lomu bandleni. Xana a hi faneli ku ti vhala tindleve ka mabhulo yabye hi ti karatela kuva vanhu va moya, lava va vhuvhumisako kurula ni wumun’we lomu bandleni?

Sentinela 15/05/02 paj. 27 par. 5

A vanhu vo lulama va kuciwa hi kutsumbeka

“Loyi a nga hava kupimisisa” i vanga a kubayisa ka hombe. I na ni mahlevo ma lumbetako kubiha van’wani kutani ku va vangela kubayisa. A vawoneleli va fanele ku hatlisa va maha cokari kasi ku mbheta a moya wa tshamela lego. A kuhambana ni munhu “loyi a nga hava kupimisisa”, a munhu loyi a nga ni kupimisisa wa zvi tiva ku hi rini a faneleko ku miyela. Wutshan’wini ka ku paluxa zvihundla, wa zvi fihla. Hi ku tiva lezvaku a lirimi li nga vanga a kubayisa ka hombe, a munhu wo tlhariha ‘i tsumbeka moyeni wakwe’. I tsumbeka ka makholwa-kuloni a tlhela a nga wulawuli hi timhaka ta cihundla ti nga ma vangelako kubayisa. A vanhu va tshamela lego va gi vhuna nguvhu a bandla!

Titshomba ta moya

Khindlimuka! 20.01 paj. 11, kwadru

Zvini zvi nga ku vhunako ku hungula stress?

A WUNENE GI NGA KU VHUNA KU HUNGULA A STRESS

‘A munhu wa wuxinji i maha zvinene ka muhefemulo wakwe.’ — MAVINGU 11:17.

Lomu ka bhuku Overcoming Stress ku na ni cipimo ci nga ni hloko mhaka yaku: “Hlula stress hi wunene.” Hi kuya hi Dr. Tim Cantopher, a mutumbuluxi wa bhuku lego, a ku kombisa a wunene ka van’wani zvi nga vhuvhumisa a lihanyo li nene ni litsako. Kanilezvi, loyi a nga kombisiko a wunene kutani a munhu wa kubiha a nga na litsako hakuva a van’wani a va mu tsakeli niku a va zvi randzi a ku tshama naye.

Hi nga mbheta stress hi ku ti kombisa wunene. Hi cikombiso, a hi fanele ku ti mahela zvo biha kutani ku ti londza zvilo zva ku a zvi koteki. Ne a hi faneli ku ti wona na hi nga hi va lisima kutani vo biha. Jesu i wulile lezvi: “Randza muakelani wa wena a ku fana ni lezvi u ti randzisako zvona.” — Mar. 12:31.