A kuingisa za ku vikela

U WA ta tsaka loku u wo maha ni xihi u xi lavako ke? Ku na ni zikhati lezi u kalako u nga zi lavi a ku byeliwa lezi u faneleko ku maha? Nzi byele lisine, u nga chavi ku wula — 

Kanilezi hi zihi zi nga zi nene? Xana zi nene futsi a ku maha ni xihi u xi lavako? Kutani a zilo zi famba khwatsi loku u ingisa papai na mamani? — Nungungulu i wula lezaku u fanele ku ingisa mamani na papai, hikwalaho ku na ni zigelo zo zwala za kuva u ingisa. A hi wone a zigelo za kona.

U na ni malembe mangani? — A papai wa wena ke? — Ahati kokwani wa kupswala papai ni loyi wa ku pswala mamani ke, va na ni malembe mangani? —  Va na ni malembe yo tala ku hunza wena. Laha a malembe ya munhu ma yako ma tala, yenawu i simama ku tiva zilo zo tala kambe. Izwa zilo za ziswa, a wona zilo za ziswa a tlhela a maha zilo za ziswa lembe ni lembe. Hikwalaho, a vanana va nga gonza zilo ka vanhu va hombe.

Wa tiva munhu wo kari a nga mutsongwani ka wena? — Wa tiva zotala ku hunza yena? — Hikuyini u tivako zotala ku hunza yena? — Hi lezaku u hanyile malembe yo tala. U vile ni xikhati xo tala xo gonza a ku hunza loyi a nga mu tsongwani ka wena.

Himani a hanyileko ku hunza mina na wena ni vanhu vontlhe? — Hi Jehova Nungungulu. I tiva zilo zo tala a ku hunza mina na wena. Loku a hi byela ku maha zilo zo kari, hi fanele ku tiyiseka lezaku zilo za zi nene, hambu loku zi wonekisa ku khwatsi za karata ku maha. U wa zi tiva lezaku hambu Mugonzisi wa Hombe i tshukile zi mu karatela ku ingisa? — 

Ka khati go kari Nungungulu i lo kombela Jesu lezaku a maha zilo zo karata nguvu. Jesu i lo maha mukhongelo a wulawula hi zilo lezo, kota lezi hi zi wonako laha ka mufota. I lo khongela aku: “Loku u zi ranza, susa a gombe legi ka mina.” Hi kuva Jesu a kombelile lezo ka Nungungulu, i lo komba lezaku a hi zikhati zontlhe zi olovako ku maha kuranza ka Nungungulu. Kanilezi, zini lezi Jesu a nga wula hi kugumesa ka mukhongelo wakwe? — 

I gumesile hi ku wula lezi: Ku nga maheki a ‘kuranza ka mina, kanilezi a ku maheke a kuranza ka wena.’ (Luka 22:41, 42) Ina, i wa lava lezaku ku maheka a kuranza ka Nungungulu, na ku nga hi kuranza kakwe. I loya mahlweni a maha lezi Nungungulu a nga lava lezaku a zi maha, na ku nga hi lezi yena a nga zi wona na zi hi zi nene.

Hi gonza yini ka lezo? — Hi gonza lezaku xontlhe xikhati zi nene a ku maha lezi Nungungulu a wulako, hambu loku zi karata. Kanilezi hi gonza zinwani kambe. Wa zi tiva a ku zini? — Hi gonza lezaku Nungungulu na Jesu a hi munhu munwe, kota lezi a vanwani va wulako. Jehova Nungungulu wa kale a ku hunza Jesu, niku i tiva zotala ku hunza lezi Jesu a N’wana wakwe a zi tivako.

Loku hi ingisa Nungungulu, hi komba lezaku ha mu ranza. A Biblia gi ngalo: “A ku mu ranza Nungungulu hi ku hlayisa milayo yakwe.” (1 Johani 5:3) Wa zi wona makunu lezaku hontlheni hi fanele ku ingisa Nungungulu. Wena u lava ku mu ingisa, a hi zona? — 

A hi vulule a Biblia ga hina hi wona lezi Nungungulu a byelako vanana lezaku va maha. Hi ta wona lezi a Biblia gi zi wulako ka Va Le Efesusi xipimo 6, vesi 1 ni 2 ni 3. Me ngalo: ‘Vanana, ingisani a vapswali va nwina Hosini, hakuva lezi zi sasekile. Chava a papai wa wena ni mamani wa wena (lowu hi nayo wo ranga wu nga ni xitsumbiso), kasi u fela ku kateka, u hanya xikhati xa hombe laha misaveni.’

Wa zi wona; hi Jehova wutsumbu a ku byelako lezaku u fanele ku ingisa papai ni mamani wa wena. Zi wula yini a ku “chava” mamani na papai? Zi wula lezaku u fanele ku va kombisa xichawo. Niku Nungungulu i tsumbisa lezaku loku u ingisa a vapswali va wena, u ta “kateka” lezi zi wulako ku, a zilo zi ta ku fambela khwatsi.

Khwatsi nzi ku hlawutela a matimu yo kari ma wulawulako hi vanhu vo kari va ponisileko wutomi gabye hi ku ingisa. A vanhu lavo va hanyile ka doropa ga hombe ga Jerusalema xikhatini xi hunzileko kale nguvu. A vanhu vo tala va doropa lego va wa nga ingisi Nungungulu. Hikwalaho, Jesu i lo va tlharihisa lezaku hi ku famba ka xikhati Nungungulu i wa ta lovisa a doropa gabye. Lava va nga ranza ku maha za zi nene, Jesu i va byelile lezi va nga fanele ku maha kasi va pona. I te ngalo: ‘Loku mu wona Jerusalema na gi ranzelwe hi masochwa, tivani lezaku a kulovisiwa ka gona ku laha kusuhani. Hi xikhati lexo lava va nga le Jerusalema, a va chavele zitsungeni.’ — Luka 21:20-22.

Khwatsi hi lezi Jesu a nga sina a wulile, a masochwa ya vaRoma ma lota ku ta hlasela Jerusalema. A masochwa lawo, ma lo ta ranzela doropa gontlhe. Kani xini xi nga ma maha, a masochwa lawo ma lo gumesa ma tlhela na ma nga gi lovisangi. A vanhu vo tala va lo alakanya lezaku a mhango yi wa hunzile. Hikwalaho, va lo simama ku tshama lomu doropeni. Kanilezi, zini lezi Jesu a nga wulile lezaku va wa fanele ku maha? — Loku wenawu u wa hanya le Jerusalema, na u mahile yini? — Lava hakunene va nga kholwa lezi Jesu a nga wulile, va lo tsika miti yabye va tsutsuma vaya zitsungeni ka wutshamu ga le kule ni Jerusalema.

Ku lo hunza lembe gontlhe na ku nga maheki nchumu le Jerusalema. Ka lembe ga wumbiri kambe, a ku mahekangi nchumu. Ka lembe ga wunharu, a ku mahekangi nchumu kambe. A vanhu vo kari kuzilava va wa alakanya lezaku lava va humileko doropeni va wa fayele. Kanilezi ka lembe ga wumune, a masochwa ya vaRoma ma lo tlhela ma wuya. Ka khati legi kambe, ma lo ranzela a doropa gontlhe ga Jerusalema. Ka xikhati lexo ku wa nga hi na ndlela ya ku pona. Ka khati legi a masochwa ma lo lovisa a doropa. A vanhu vo tala va nga hi lomu doropeni va lo dawa, lava va nga sele va lo khomiwa vaya wukhumbini.

Lava va nga ingisa Jesu ke, zini zi nga va humelela? — Va lo pona. Va wa hi kule nguvu ni doropa ga Jerusalema. Hikwalaho, a va bayisiwangi. A ku ingisa zi va vikele.

Xana loku u ingisa a zi nge ku vikeli wenawu? — A vapswali va wena va nga ha ku byela lezaku u nga hlakani laha ruweni. Hikuyini va wulako lezo? — Va wula lezo hi ku u nga tshuka u biwa hi mimova. Kanilezi, ka siku ginwani u nga ha alakanya lezi: ‘Zezi a ku na mimova laha ruweni, nzi nga ta bayisiwa. A vanana vanwani va hlakana laha ruweni, niku a nzi se va wona na va bayisiwa.’

Hi zalezo a vanhu vo tala le Jerusalema va nga zi alakanya. Anzhako ka kuva a masochwa ya vaRoma ma tlhelile, zi wa wonekisa ku khwatsi a ka ha hi na mhango. A vanwani va wo simama ku tshama lomu doropeni. Hikwalaho, vonawu va lo tshama. Va wa tlharihisilwe, kanilezi a va ingisangi. Kota wuyelo ga kona, va lo dawa.

A hi wone xikombiso xinwani. Wa tshuka u hlakana hi cisafura (meciso)? — Zi nga ku khwatsi za tsakisa a ku wona a nzilo na wu vura laha ka paleti a xikhati lexi u tlhotlhako. Kanilezi, a ku hlakana hi cisafura zi nga vanga mhango. A yindlu yontlhe yi ngaswa, niku hambu wenawu u ngafa hi kota ya lezo!

Alakanya lezaku a ku ingisa hi zikhati zo kari ntsena a zi eneli. Kanilezi loku xontlhe xikhati u ingisa, hi zona zi to ku vikela. Kambe wa zi alakanya a ku himani a nge: “Vanana, ingisani a vapswali va nwina”? — Hi Nungungulu. U nga rivali kambe lezaku i wula lezo hakuva wa ku ranza.