Zifenengeto za hloko — zi tirisiwa rini niku hikuyini?

Hi rini niku hikuyini a wasati wa muKristu a faneleko ku boha a xifenengeto xa hloko wukhozelini? A hi kambisiseni a tlhamuselo wu pimisilweko wa mupostoli Paule xungetano hi mhaka leyi. I nyika wurangeli legi hi gi lavako kasi ku maha ziboho za zi nene, lezi zi dzunzako Nungungulu. (1 Va Le Korinte 11:3-16) Paule i komba zilo zinharu hi faneleko ku zi alakanyela: (1) a mitiro leyi yi lavako lezaku a wasati a boha a xifenengeto lexo, (2) ziyimo lezi a ka zona a faneleko ku xi boha, ni (3) zigelo lezi zi mu mahako a lanzela a nayo lowo.

Mitiro. Paule i wulawula hi mitiro yimbiri: ku nga kukhongela ni kuprofeta. (Mavesi 4, 5) Hakunene, a kukhongela i ndlela ya ku tshinela ha yona ka Jehova wukhozelini. Inyamutlha, a kuprofeta ku nga ha ringaniswa ni ntiro wihi ni wihi wa ku gonzisa Biblia lowu a mutireli wa muKristu a wu mahako. Hambulezo, xana Paule i nyika maalakanyo ya lezaku a wasati i fanele ku fenengeta hloko a khati ni khati a khongelako kutani ku gonzisa a lisine la Biblia ke? Ahihi. A xiyimo lexi a wasati a khongelako kutani ku gonzisa ka xona hi xona xi to wula.

Ziyimo. A magezu ya Paule ma kombisa ziyimo zimbiri, kutani wutshamu legi a ntiro wu mahelwako ka gona — ku nga ngango ni bandla. I ngalo: “Ni hloko ya wasati hi nuna wakwe . . . A wasati munwe ni munwani loyi a khongelako, kutani ku profeta, na a nga fenengetangi a hloko yakwe, i yi chela tingana a hloko yakwe.” (Mavesi 3, 5) Laha ngangweni, a nuna hi yena loyi Jehova a mu yimisileko kota hloko ya sati. Loku a nga kombisi xichawo xi faneleko hi wuhloko ga nuna wakwe, o chela tingana a nuna wakwe loku a maha mitiro leyi Jehova a nyikako wanuna. Hi xikombiso, loku kuva ni xilaveko xa lezaku a fambisa xigonzo xa Biblia a nuna wakwe na a hi kona, i wa ta kombisa xichawo ka wuhloko ga nuna hi ku boha a xifenengeto xa hloko. I fanele ku maha lezo hambu loku a nuna a nga hi muKristu a bapatizilweko hakuva a nuna hi yena hloko ya ngango.a Loku a khongela kutani ku gonzisa na ku hi ni n’wana wakwe wa mu tsongwani wa jaha a bapatizilweko, a wasati i fanele ku boha a xifenengeto xa hloko kambe, na ku nga hi lezaku ova hloko ya ngango, kanilezi hi kota ya malungelo lawa ma nyikiwako ziro za xinuna za bandla ga wuKristu zi bapatizilweko.

Paule i wulawula hi bandla aku: “Loku munhu a ranza ku kaneta, hina a hi na mukhuwo wa kunghahi, hambu ni mabandla ya Nungungulu a ma nawo.” (Vesi 16) Lomu bandleni ga wuKristu, a wuhloko gi nyikwa vavanuna va bapatizilweko. (1 Timote 2:11-14; Maheberu 13:17) Vavanuna ntsena va yimisiwako kota madota ni malanza ya wutireli na va hi ni wutihlamuleli va nyikilweko hi Nungungulu ga ku hlayisa a ntlhambi wa Nungungulu. (Mitiro 20:28) Hambulezo, ka tshuka kuva ni ziyimo lezi zi lavako lezaku a wasati wa muKristu a kombeliwa ku maha ntiro lowu hi fanelo wu mahiwako hi wanuna a bapatizilweko loyi a ringanelwako. Hi xikombiso, ku nga hava ni xilaveko xa lezaku a fambisa a mutlhangano wa ntiro wa simu loku ku nga hi na wanuna a bapatizilweko loyi a ringanelwako. Kutani ku fambisa a xigonzo xa Biblia xa laha mutini xi mahelweko makungo na ka ha hi mahlweni na ku hi ni wanuna a bapatizilweko.b Kota lezi a mitiro leyo yi nga maravi ya bandla ga wuKristu, a wasati i fanele ku boha a xifenengeto xa hloko kasi a kombisa xichawo hi lezi a mahako ntiro lowu hi fanelo wu mahiwako hi wanuna.

Hi ginwani tlhelo, a matshamela yo tala ya wukhozeli a ma lavi lezaku a makabye wa xisati a boha a xifenengeto xa hloko. Hi xikombiso, a nga na xilaveko xa ku maha lezo a xikhati lexi a nyikako mihlamulo mitlhanganweni ya bandla, loku a hi wutirelini ga muti ni muti ni nuna wakwe kutani munwani wanuna a bapatizilweko, kutani ku gonza hambu ku khongela ni vana vakwe va nga bapatizwangiko. Lisine lezaku ku nga ha vuka zinwani ziwutiso, niku loku a makabye wa xisati a nga tiyiseki hi xo kari, a nga ha maha kambisiso wunwani.c Loku a ha kanakana ni loku a livalo lakwe li mu kuca a ku maha lezo, a ku boha a xifenengeto xa hloko zi wa nga tava zi bihile, kota lezi zi kombiswako laha ka mufota lowu.

Zigelo. Ka vesi 10, hi kuma zigelo zimbiri zi mahako lezaku a wasati wa muKristu a lava ku tatisa a xileletelo lexi: “A wasati i fanele a kuva ni xikombiso a hlokweni yakwe xaku i fumelwe, hi kota ya tingelosi.” Xo sangula, wona a magezu lawa yaku, ‘xikombiso xaku i fumelwe.’ A ku boha a xifenengeto xa hloko i ndlela ya lezaku a wasati a komba ku wa vumela a wuhloko legi Jehova a nyikileko vavanuna va bapatizilweko lomu bandleni. Hikwalaho, i kombisa a liranzo lakwe ni kutsumbeka kakwe ka Jehova Nungungulu. A xigelo xa wumbiri xi kumeka ka magezu lawa yaku: “Hi kota ya tingelosi.” Xana a wasati a nga khumbisa kuyini a zivangwa lezo za moya za ntamu hi ku boha a xifenengeto xa hloko ke?

A tingelosi ti lava ku wona a wuhosi ga Nungungulu na gi kombiswa xichawo hlengeletanweni ya Jehova yontlhe, le tilweni ni laha misaveni. Tonawu ta vuneka hi ka zikombiso za vanhu va nga mbhelelangiko xungetano hi mhaka leyi. Phela tonawu ti fanele ku ti koramisa ka lulamiselo ga Jehova — ku nga xiringo lexi a tingelosi to hlaya xikhatini xi hunzileko ti weleko ka xona. (Juda 6) Zalezi, a tingelosi ti nga ha wona a wasati wo kari wa muKristu a buvileko, a nga ni wutivi go tala, ni wutlhari ga ku hunza a wanuna wo kari a bapatizilweko lomu bandleni; hambulezo, a wasati loye i ti yimisele a ku ti koramisa ka wuhloko ga wanuna loye. Ka zikhati zo kari, a wasati loye muKristu a totilweko loyi hi kufamba ka xikhati a tova xiga-tshomba zinwe na Kristu. A wasati loye hi kugumesa i ta tira ka xikhundla xo tlakuka nguvu a ku hunza lexi xa tingelosi a tlhela a fuma zinwe na Kristu le tilweni. Hi nga wona a kusaseka ka xikombiso lexi va nyikako a tingelosi ka xikhati lexi! Hakunene, i lungelo ga hombe legi a vamakabye vontlhe va xisati va nga nago ga ku kombisa a kuingisa ni kutikoramisa hi mahanyela yabye ya kutsumbeka ni kutitsongahata kuwoneni ka tingelosi to tsumbeka ta tsanza-vahlayi!