A hi na vafundisa kutani vapaderi va holelwako hlengeletanweni ya hina. Kanilezi, a ku fana ni lezi zi nga mahiwa kusanguleni ka bandla ga wuKristu, ka yimisiwa vawoneleli va ringanelwako kasi ‘ku risa a bandla ga Nungungulu.’ (Mitiro 20:28) A madota lawo vavanuna va buvileko hi tlhelo ga moya lava va rangelako ni ku risa a bandla, na ku nga hi “hi kukurumetwa kanilezi hi ku zi ranza; na ku nga hi ku tirela bhinzu, kanilezi hi matsenya.” (1 Pedro 5:1-3) I ntiro muni ma hi mahelako?

Ma hi hlayisa ni ku hi vikela. A madota ma rangela ma tlhela ma vikela a bandla hi tlhelo ga moya. Na ma tiva lezaku Nungungulu i ma nyikile a ntiro lowu wa lisima, a madota a ma fumeli vanhu vakwe, kanilezi ma hi vuna a kuva ni kutshamiseka ni litsako. (2 Va Le Korinte 1:24) A ku fana ni lezi a murisi a khatalelako khwatsi a yivu yinwe ni yinwani yakwe, a madota ma ti karatela ku tiva khwatsi a xiro xinwe ni xinwani xa bandla. — Mavingu 27:23.

Ma hi gonzisa a mamahela ya kuranza ka Nungungulu. Viki ni viki, a madota ma rangela a mitlhangano ya bandla kasi ku tiyisa a kukholwa ka hina. (Mitiro 15:32) A vavanuna lavo vo pinyama va rangela a ntiro wa kuxumayela, hi ku tira na hina ni ku hi gonzisa a matshamela wontlhe ya wutireli.

Ma tiyisa a munwe ni munwani wa hina. Kasi ku khatalela a zilaveko za hina za moya, a madota ya bandla ma nga ha hi enzela kaya ka hina kutani laha Salawini ya Mufumo kasi ku hi vuna ni ku hi chavelela hi ku tirisa Mitsalo. — Jakobe 5:14, 15.

Ahandle ka ntiro lowu ma wu mahako laha bandleni, a kutala ka madota ma na ni mitiro ya kutihanyisa ni wutihlamuleli ga ngango, lezi zi tekako xikhati xabye kasi ku zi khatalela. A vamakabye lavo va xinuna va tirako hi kutikarata va ringanelwa hi xichawo xa hina. — 1 Va Le Tesalonika 5:12, 13.

• Hi wihi a ntiro wa madota ya bandla?

• Xana a madota ma kombisisa kuyini kukhatala hi hina?

A Biblia gi wulawula hi mitlawa yimbiri ya vavanuna va maKristu va nga ni wutihlamuleli bandleni—ku nga “varisi ni madikoni.” (Va Le Filipi 1:1) A kutala ka zikhati, a bandla ginwe ni ginwani gi khatalelwa hi varisi ni madikoni kutani malanza ya wutireli vo hlaya. I ntiro muni lowu a malanza ya wutireli ma hi mahelako?

Ma vunetela a hubye ya madota. A malanza ya wutireli vavanuna va tiyileko hi tlhelo ga moya, vo tsumbeka, ni va kupima ku nene, va ngava vaswa kutani vanhu va kulileko. Vona va khatalela mitiro ya lisima ya bandla kanilezi leyi yi nga ya viki ni viki ni ya ku lava ntamu wa xiviri. Lezo zi vuna madota a kuva ma veka kupima ka wutihlamuleli ga wona ga ku gonzisa ni ku risa.

Ma maha mitiro yi lavekako. A malanza yo kari ya wutireli ma nyikiwa a ntiro wa wukombeteli kasi ku hoyozela vontlhe va chikelako mitlhanganweni. A manwani ma tirisana ni muchini wa pfumawulo, ku avela mabhuku, ku wonelela mali ya bandla, ni ku avela ziro za bandla a zipanze za ku xumayela ka zona. Ma tlhela ma vunetela kuhlayiseni ka Salawu ya Mufumo. A madota ma nga ha ma kombela lezaku ma vunetela a vakhosaheleko. Kani hi gihi wutihlamuleli legi a malanza ya wutireli ma nyikwako, a kutiyimisela ka wona a ku gi tatisa ku ma maha lezaku ma bongiwa hi vontlhe. — 1 Timote 3:13.

Ma veka xikombiso xi nene kota vavanuna va maKristu. A malanza ya wutireli ma hlawulwa hi kota ya matshamela ya wona ya ma nene ya moya. Loku ma maha zipanze mitlhanganweni, ma tiyisa a kukholwa ka hina. Hi kuva ma rangela ntirweni wa kuxumayela, ma hi kuca a kuva hi hiseka. Hi kota ya moya wabye wa ku tirisana ni hubye ya madota, wona ma vuvumisa litsako ni kuzwanana laha bandleni. (Va Le Efesusi 4:16) Hi kufamba ka xikhati, wonawu ma nga ha ringanelwa hi ku tira kota madota.

• Xana a malanza ya wutireli vavanuna va matshamela muni?

• Xana a malanza ya wutireli ma vunisa kuyini a bandla lezaku gi tira hi kuolova?

A Mitsalo ya xiGreki ya wuKristu yi kumbuka Barnabasi na mupostoli Paule hi kukhanzakanya. A vavanuna lava va tirile kota vawoneleli va fambafambako, na va enzela a mabandla yo sangula. Hikuyini? Va wa karatekela nguvu a kutshamiseka ka vamakabye vabye va moya. Paule i wulile lezaku i wa xuva ‘ku tlhela, a enzela vamakabye’ kasi ku ya wona lezaku vo yini. I wa ti yimisele ku enza mazanazana ya tikilometro kasi ku ya va tiyisa. (Mitiro 15:36) Loko hi kuxuva loku a vawoneleli va hina va fambafambako va nga nako inyamutlha.

Vata va ta hi tiyisa. A muwoneleli wa xipanze i enzela xipimo xa 20 wa mabandla, a ya tshama viki ka ginwe ni ginwani ga wona makhati mambiri hi lembe. Hi nga vuneka nguvu hi matshango ya vamakabye lava zinwe ni lawa ya vasati vabye, loku va tekile. Vona va ti karatela ku tivana ni vaswa zinwe ni vahombe hi kufanana, niku va zi tsakela nguvu ku famba na hina ntirweni wa simu ni ka zigonzo za hina za Biblia. A vawoneleli lava va maha maenzo ya wurisi zinwe ni madota, niku kasi ku hi tiyisa, va veka tikanelo ti chavelelako mitlhanganweni ya bandla ni ya xipanze. — Mitiro 15:35.

Va kombisa kukhatala hi vontlhe. A vawoneleli va zipanze va khatala nguvu hi wumoya ga mabandla. Vona va tlhangana ni madota zinwe ni malanza ya wutireli kasi ku wulawula hi kuanza loku ku wonekileko ni ku va nyika wusungukati ga lisima mayelano ni ku tatisa a wutihlamuleli gabye. Va vuna a maphayona lezaku ma humelela wutirelini, niku va tsaka nguvu hi ku tivana ni vanhu lava va ha sangulako ku hlengela na hina ni kuzwa a kukula kabye ka moya. A munwe ni munwani wa vamakabye lavo i ti hendleleta hi kuziranza kota “xitiri-kulori” kasi ku hi vuna. (2 Va Le Korinte 8:23) Hi fanele ku pimanyisa a kukholwa kabye ni kupinyama kabye ka Nungungulu. — Maheberu 13:7.

• Hi gihi a kungo ga kuva a vawoneleli va zipanze va enzela a mabandla?

• U nga vunekisa kuyini hi tienzo tabye?

Loku ku humelela mhango, a Timboni ta Jehova ti tekela ku maha malulamiselo kasi ku ya vuna a vamakabye va tona lava va khumbilweko hi yona. A kutikarata loko ku kombisa a kutiya ka liranzo leli li nga kona xikari ka hina. (Johani 13:34, 35; 1 Johani 3:17, 18) Hi va vuna hi tindlela muni?

Hi va vuna hi mali. A xikhati ku ngava ni ndlala ya hombe nguvu le Judia, a maKristu yo sangula le Antiokia ma lo rumela mali kasi ku ya vuna a vamakabye va wona va moya. (Mitiro 11:27-30) Hi kufanana, loku hizwa lezaku a vamakabye va hina ka xipanze xo kari xa tiko va yimisana ni zikarato, hi rumela minyikelo hi ku tirisa a bandla ga hina kasi ku ya vuna lava va nga ni xilaveko xa hombe. — 2 Va Le Korinte 8:13-15.

Hi va nyika xivuno xo kongoma. A madota lawa ma nga ka wutshamu lego ma lavetela a xiro xinwe ni xinwani xa bandla kasi ku tiyiseka lezaku vontlhe va tshamisekile ke. Ku nga ha yimiswa kometi ya ku lamulela timhango kasi ku wonelela a kunyikelwa ka zakuga, mati ma basileko, tinguwo, wutshamu go hanya kona ni ku khatalela lava va babyako. A Timboni to tala ti nga ni wutlhari legi gi lavekako ti ti hendleleta kasi ku famba hi makotela ya tona ti ya hlengela ntirweni wa ku lamulela timhango kutani ku aketa a tiyindlu ni tiSalawu ta Mufumo leti ti hahlukileko. A kubohana loku hi nga nako kota hlengeletano ni wutlhari legi hi gi kumako hi ku tira zinwe zi hi vuna ku hatlisa hi lulamisela a xivuno lexi xi lavekako. Hambu lezi hi nawulutelako woko a “va le ngangweni [wa hina] wa kukholwa,” ha tlhela hi vuna vanwani loku zi koteka, na ku nga khataliseki a wukhongeli gabye. — Va Le Galatia 6:10.

Ha va nyika xivuno xa moya hi tlhela hi va singata. A vanhu va welweko hi mhango va na ni xilaveko xa ku chavelelwa. Ka zikhati lezo, hi kuma ntamu wu tako hi ka Jehova, a “Nungungulu wa kuchavelela kontlhe.” (2 Va Le Korinte 1:3, 4) Hi kutsaka, hi hlengela a zitsumbiso za Biblia ni lava va nga kukaratekeni, hi va tiyisa lezaku lokuloku a Mufumo wa Nungungulu wu ta mbheta a zikarato lezi zi vangako kuxaniseka. — Kuvululelwa 21:4.

• Hikuyini a Timboni ti hlamulako hi kuhatlisa xikhatini xa timhango?

• Kuchavelela muni ka moya loku hi zi kotako ku nyika lava va ponileko ka timhango?

Xikhatanyana mahlweni ka kufa kakwe, Jesu i lo bhula hi tlhelo ni mune wa vapizani vakwe—Pedro, Jakobe, Johani, na Andreu. A xikhati lexi Jesu a nga kari a profeta xungetano hi xiwoniso xa kuvakona kakwe masikwini yo gumesa, yena i lo maha xiwutiso xa lisima: “Hi wihi loyi a nga nanza gi tsumbekileko ni go tlhariha, loye a hosi yakwe yi gi yimisileko hehla ka malanza ya yona, kasi ku ma nyika zakuga hi xikhati xi faneleko ke?” (Mateu 24:3, 45; Marku 13:3, 4) Jesu i wo tiyisa vapizani vakwe lezaku kota “hosi” yabye, yena i wa ta yimisa vanhu lava va nga wa ta nyika zakuga zo nyawula za moya a valanzeli vakwe masikwini yo gumesa. Hi vamani lava va nga wa ta wumba a nanza lego?

Valanzeli va lisine va Jesu va totilweko hi moya. A “nanza” lego gi nyikilwe ntiro wa hombe hi Jesu wa ku va phamela zakuga za moya a vakhozeli va Jehova hi xikhati xi faneleko. Hi khegela ka nanza gi tsumbekileko lezaku hi simama ku kuma “zakuga hi xikhati xa kona.” — Luka 12:42.

Va wonelela a yindlu ya Nungungulu. (1 Timote 3:15) Jesu i nyikile a nanza legi a wutihlamuleli go binza ga ku wonelela a ntiro wa xipanze xa laha misaveni xa hlengeletano ya Jehova—ku nga ku hlayisa a titshomba ta yona, ku rangela a ntiro wa kuxumayela, ni ku hi gonzisa hi ku tirisa mabandla ya hina. Hikwalaho, kasi ku tatisa a zilaveko za hina, a “nanza gi tsumbekileko ni go tlhariha” ga avela zakuga za moya hi ku tirisa mabhuku lawa hi ma tirisako ntirweni wa hina wa simu, zinwe ni milongoloko leyi yi mahiwako mitlhanganweni ya hina ya bandla ni ya xipanze.

A nanza lego ga tsumbeka ka lisine la Biblia ni ka ntiro wa gona wa ku xumayela a mahungu yo saseka. A nanza lego gi tlharihile kambe hi ndlela leyi gi khatalelako hi yona hi wutlhari a zilaveko za Kristu misaveni. (Mitiro 10:42) Jehova wa katekisa a ntiro wa gona hi kuya mahlweni a kokela vanhu ngangweni wakwe wa vakhozeli ni ku kumekisa zakuga zo tala za moya. — Isaya 60:22; 65:13.

• Himani a yimisilweko hi Jesu lezaku a wundla vapizani vakwe hi tlhelo ga moya?

• Xana a nanza gi tsumbekile gi tlhela gi tlhariha hi tindlela muni?

Ka zana ga malembe go sangula, a ntlawa wutsongwani wa “vapostoli ni masingalakati” le Jerusalema, wu wa tira kota hubye yi fumako kasi ku maha ziboho za lisima zi nga mahelwa bandla gontlhe ga maKristu ma totilweko. (Mitiro 15:2) Loku va maha xiboho hi wumunwe, xi wa hi wuyelo ga ku ngha va bhulisene hi lezi Mitsalo yi zi wulako ni ku lanzela wurangeli ga moya wa Nungungulu. (Mitiro 15:25) A xikombiso lexo xa lanzelwa inyamutlha.

Yi tiriswa hi Nungungulu kasi ku maha a kuranza kakwe. A vamakabye va totilweko lava va wumbako a Hubye yi Fumako va khatala nguvu hi Mhaka ya Nungungulu niku va na ni kubuva ka hombe mayelano ni ku maha ziboho za moya. Vona va tlhangana viki ni viki kasi ku kambisisa a zilaveko za vamakabye va hina misaveni yontlhe. A ku fana ni lezi zi nga mahiwa ka zana ga malembe go sangula, yona yi nyika zileletelo zi seketelwako ka Biblia, ku ngava hi mapapilo kutani hi ku tirisa vawoneleli va fambafambako, ni vanwani. Yi vuvumisa a kuzwanana ka maalakanyo ni ka zimaho xikari ka vanhu va Nungungulu. (Mitiro 16:4, 5) A Hubye yi Fumako yi wonelela a kulongiselwa ka zakuga za moya, yi vuvumisa a ntiro wa kuxumayela a Mufumo, yi tlhela yi wonelela a kuyimiswa ka vamakabye va xinuna ziyinweni za wutihlamuleli.

Yi rangelwa hi moya wa Nungungulu. A Hubye yi Fumako yi kombela wurangeli ka Jehova, a Hosi ya Wuako Gontlhe, ni ka Jesu, a Hloko ya bandla. (1 Va Le Korinte 11:3; Va Le Efesusi 5:23) A ziro za yona a zi ti woni kota varangeli va vanhu va Nungungulu. Vona ni maKristu wontlhe ma totilweko ‘va lanza Yivana, Jesu, ni kwihi laha yi yako kona.’ (Kuvululelwa 14:4) A Hubye yi Fumako ya yi bonga nguvu a mikhongelo leyi hi yi mahelako.

• Hi vamani va nga wumba a hubye yi fumako ya zana ga malembe go sangula?

• Xana a Hubye yi Fumako inyamutlha yi hlotisa kuyini a wurangeli ga Nungungulu?

Beteli i vito ga xiHeberu gi wulako ku “yindlu ya Nungungulu.” (Genesisi 28:17, 19) I vito gi faneleko tiyindlu ti yimisilweko hi Timboni ta Jehova misaveni yontlhe kasi ku wonelela ni ku seketela hi kona a ntiro wa kuxumayela. A Hubye yi Fumako yi tira le tsinza ga misava yontlhe doropeni ga Nova York, E.U.A., niku yi wonelela hi kwalaho a ntiro wa tihofisa ta maravi matikweni yo tala. Kota ntlawa, lava va tirako ka tiyindlu leto va tiviwa kota ngango wa Beteli. A ku fana ni ngango, va hanya va tlhela va tira zinwe, vaga zinwe, ni ku gonza a Biblia zinwe hi kuzwanana. — Tisimu 133:1.

Wutshamu go hlawuleka laha a ziro za ngango zi tirako hi kutikarata. Ka muti wunwe ni wunwani wa Beteli, ku na ni vavanuna ni vavasati lava va pinyamelako ku maha a kuranza ka Nungungulu ni ku tirela a zilaveko za Mufumo xikhati xontlhe. (Mateu 6:33) A ku na ni munwe wabye a nyikwako muholo, kanilezi vontlhe va nyikwa ka ku etlela ni zakuga, ni mali yitsongwani kasi ku khatalela a zilaveko zabye. A munhu munwe ni munwani a nga Beteli i na ni xiavelo xa ntiro, ku ngava lomu hofiseni, kozinyeni, kutani lomu ku gelwako kona zakuga. A vokari va tira ku gandla mabhuku, ku maha basiselelo lomu tindlwini, ku hlaza tinguwo, ku lungisa-lungisa zibya, kutani mitiro yinwani.

Wutshamu legi ku tiriwako nguvu kasi ku seketela a kuxumayelwa ka Mufumo. A kungo-tshinya ga Beteli yinwe ni yinwani ku maha lezaku a zinene za Biblia zi kumiwa hi vanhu vo tala hi laha zi kotekako hi kona. A broxura legi xikombiso xa lezo. Gi tsalilwe na gi wonelelwa hi Hubye yi Fumako, gi rumelwa hi tikomputadori ka mazanazana ya mitlawa ya vahunzuluseli matlhelweni yo hambanahambana ya misava, gi gandliwa hi michini ya ku hatlisa nguvu ka tiBeteli to hambanahambana, gi tlhela gi rumelwa ka mabandla ya ku hunza 100.000. Ka xigava xinwe ni xinwani, a mingango ya Beteli ya nyika xivuno xa lisima ka ntiro wa xihatla nguvu ka yontlhe—wu nga kuxumayelwa ka mahungu yo saseka. — Marku 13:10.

• Hi vamani va tirako Beteli, niku va hlayisiswa kuyini?

• I ntiro muni wa xihatla wu seketelwako hi ntiro wa Beteli yinwe ni yinwani?

A ziro za ngango wa Beteli zi tira ka zipanze zo hambanahambana, na zi khatalela a ntiro wa kuxumayela ka tiko ginwe kutani ka matiko yo hlaya. Zona zi nga ha tira ka mitlawa ya wuhunzuluseli, zi gandla marevista, zi patsetela maphagina ya mabhuku, zi hlayisa mabhuku ma gandlilweko, zi gravara a timhaka ti to ingiselwa kutani tividiyu, hambu ku khatalela zilaveko zinwani za tiko lego.

A Kometi ya Ravi yi wonelela a ntiro. A Hubye yi Fumako yi nyika a ntiro wa ku wonelela a ravi ginwe ni ginwani ka Kometi ya Ravi yi wumbiwako hi madota manharu kutani kuhunza lawa ma ringanelwako khwatsi. A kometi ya ravi yi tshama hi ku bikela a Hubye yi Fumako a mahungu ma yelanako ni kuanza ka ntiro ka tiko ginwe ni ginwani legi gi wonelelwako hi kometi leyo zinwe ni zikarato zi zi kotako ku humelela. A mibiko leyo yi vuna a Hubye yi Fumako a ku boha a timhaka leti ku to wulawulwa hi tona ka mabhuku ni ka mitlhangano ya bandla ni mitlhanganweni ya hombe ya ha tako. Hi kukhanzakanya, ka rumelwa vayimeli va Hubye yi Fumako lezaku va enzela maravi kasi ku nyika zileletelo a tiKometi ta Maravi kutatiseni ka ntiro wa tona. (Mavingu 11:14) Ka mahiwa longoloko wo hlawuleka lowu wu patsako a kanelo yi vekiwako hi muyimeli wa tsinza kasi ku tiyisa lava va hanyako kusuhani ni ravi.

Ku nyikwa xivuno a mabandla ya xipanze lexo. A vamakabye va nga ni wutihlamuleli laha hofiseni ya ravi va vumelela a kuwumbiwa ka mabandla maswa. A vamakabye lavo kambe va rangela a ntiro wa maphayona, varumiwa, ni vawoneleli va zipanze va tirako ka xipanze xi wonelelwako hi ravi lego. Va longisela mitlhangano ya xipanze ni migotsovanyano, va wonelela a kuakiwa ka tiSalawu tiswa ta Mufumo, va tlhela va maha zontlhe zi kotekako lezaku a mabhuku ma rumelwa mabandleni kasi ku tatisa a zilaveko za vamakabye. Zontlhe lezi zi mahiwako hofiseni ya ravi za vunetela kutatisekeni ku nene ka ntiro wa kuxumayela. — 1 Va Le Korinte 14:33, 40.

• Xana a tiKometi ta Maravi ti vunetelisa kuyini a Hubye yi Fumako?

• Wutihlamuleli muni gi khatalelwako hofiseni ya ravi?

Kasi ku maha zontlhe hi zi kotako lezaku hi xumayela a “ivangeli” ka “wontlhe matiko ni tixaka ni tirimi ni mifumo,” hi humesa mabhuku hi tirimi ta ku hunza 750. (Kuvululelwa 14:6) Hi zi kotisa kuyini ku maha ntiro lowo wo karata? Hi wu maha hi ku vuniwa hi vatsali va matiko yo hambanahambana ni ntlawa wa vahunzuluseli vo ti karata—va nga Timboni ta Jehova vontlhe.

A timhaka ta mabhuku ya hina ti ranga hi ku tsaliwa hi xiNgiza. A Hubye yi Fumako yi wonelela a ntiro wa Xipanze xa Wutsali le tsinza ka hina ka misava yontlhe. A xipanze lexi xi rangela a ziavelo za vatsali lava va tirako kwale tsinza ni ka maravi yo kari. A kuva ni vatsali vo hambanahambana zi hi vuna a ku wulawula hi timhaka ta midawuko yo hlaya, lezi zi mahako lezaku a mabhuku ya hina ma khumba vanhu va misava yontlhe.

A timhaka leto ti rumelwa ka vahunzuluseli. Anzhako ka kuva a bhuku gi tsalilwe gi tlhela gi pasiswa, gi rumelwa hi ku tirisa tikomputadori ka mitlawa ya wuhunzuluseli yi nga ka matlhelo yo hambanahambana ya misava, kasi ku hunzulusela, ku hlola, ni ku basisa a timhaka leto. Vona va ti karatela ku hlawula ‘a timhaka to lulama ta zinene’ leti ti to nyika a mongo wontlhe wa lezi zi tsalilweko hi xiNgiza ka lirimi leli zi hunzuluselwako ziya ka lona. — Mutshawuteli 12:10.

A ntiro wu hatlisiswa hi tikomputadori. A komputadori a yi zi koti ku valeta vanhu lava va tsalako ni ku hunzulusela. Hambulezo, va zi kota ku hatlisisa a ntiro wabye hi ku tirisa madisionario, magramatika, ni mabhuku ya ku hlola hi wona ma nga lomu ka tikomputadori. A Timboni ta Jehova ti vangile a Sistema Eletrônico de Fotocomposição Multilíngue (MEPS), ku nga longoloko wa lomu ka komputadori wu hi vumelelako ku tsala mahungu hi mazanazana ya tirimi ma tlhela ma patsiwa ni zithombe kasi ma wumba a mabhuku lawa ma to gandliwa.

Hikuyini hi mahako yontlhe mizamo leyi, hambu ka tirimi leti ti wulawulwako hi vanhu vatsongwani nguvu? Hi maha lezo hakuva kuranza ka Jehova lezaku a “vanhu vontlhe va hanyiswa, vava ni kutiva ka zinene.” — 1 Timote 2:3, 4.

• Xana a mabhuku ya hina ma tsaliswa kuyini?

• Hikuyini hi hunzuluselako mabhuku ya hina hi tirimi to tala nguvu?

A hlengeletano ya hina yi humesa yi tlhela yi avela mahala a mazanazana ya timiliyoni ta maBiblia ni mabhuku manwani lembe ni lembe. Hi aka hi tlhela hi hlayisa tiSalawu ta Mufumo ni tihofisa ta maravi. Hi vunetela a makume ya mazana ya vatiri va Beteli ni varumiwa, hi tlhela hi vunetela lava va welwako hi timhango. Hikwalaho, u nga ha ti wutisa lezi, ‘Va yi kuma kwihi mali ya ku maha zontlhe lezo?’

A hi hlengiseli za wukhume, ne a hi kurumeti minyikelo mitlhanganweni ya hina. Hambu lezi a mali yi lavekako kasi ku seketela a ntiro wa hina wa kuxumayela yi teleko nguvu, a hi kombeli mali. Zana ga malembe nzhako, a wugandli ga wumbiri ga revista A Murinzeli gi wulile lezaku ha kholwa ku ngalo hi seketelwa hi Jehova niku hi “nga ta tshuka hi kombela ku vuniwa hi munhu”—niku a hi tshuki hiva ni xilaveko lexo! — Mateu 10:8.

A ntiro wa hina wu seketelwa hi minyikelo ya kuziranza. A vanhu vo tala va wu tsakela a ntiro wa hina wa ku gonzisa a Biblia va tlhela va maha minyikelo ya ku wu seketela. A Timboni ha toce ta nyikela hi kutsaka a xikhati xa tona, ntamu, mali, ni titshomba tinwani kumaheni ka kuranza ka Nungungulu misaveni yontlhe. (1 Kronekele 29:9) Le Salawini ya Mufumo, ku na ni makaxa lawa lava va tsakelako ku maha minyikelo va zi kotako ku maha ka wona. A minyikelo leyo kambe yi nga mahiwa hi ku tirisa saite ya jw.org. A kutala ka zikhati, a mali yi amukelwako yita hi ka vanhu va nga hiko ziganyi, va fanako nguvu ni noni ya xisiwana leyi Jesu a wulawulileko khwatsi hi yona yi nga peta zingerengere zimbiri za ntsengo wa lahasi xikhwameni xa minyikelo ya tempeli. (Luka 21:1-4) Hikwalaho, ni wihi munhu wa zi kota ku “ti vekela” zo kari kasi ku nyikela “kota lezi a xuvako mbilwini yakwe.” — 1 Va Le Korinte 16:2; 2 Va Le Korinte 9:7.

Ha tiyiseka lezaku Jehova i ta simama ku kuca timbilu ta lava va lavako ku mu ‘dumisa hi titshomba tabye’ kasi ku seketela a ntiro wa Mufumo lezaku a kuranza kakwe ku mahiwa. — Mavingu 3:9.

• Xini xi hambanyisako a hlengeletano ya hina ni tixaka tinwani ta wukhongeli?

• Xana a minyikelo ya kuziranza yi tirisiswa kuyini?

Kota lezi zi kombiswako hi vito Salawu ya Mufumo, a mhaka-tshinya ya Biblia yi gonziwako lomo Mufumo wa Nungungulu—lowu wu nga hi hloko ya mhaka ya kuxumayela ka Jesu. — Luka 8:1.

Matshamu ya wukhozeli ga lisine. A ntiro wa ku xumayela a mahungu yo saseka ya Mufumo wu khatalelwa ka matshamu lawo. (Mateu 24:14) A tiSalawu ta Mufumo ta hambanahambana hi wuhombe ni maakelwa, kanilezi tontlhe tiyindlu ti nga tluliko mpimo hi kusasekiselwa kutani wuhombe, niku a kutala ka tona ti tiriswa hi mabandla ya ku hunza ginwe. Ka malembe ma ha hi ku hunzako, hi akile makume ya makume ya mazana ya tiSalawu ta Mufumo (ku nga xipimo xa ntlhanu wa tona hi siku) kasi ku longoloka khwatsi ni kukula ka mabandla ya hina. Zi kotekisa kuyini lezo? — Mateu 19:26.

Ti akiwa hi mali ya minyikelo yi yako ka longoloko wa kuakiwa ka tiSalawu ta Mufumo. Ka tiSalawu tontlhe ta Mufumo, ku na ni ginwani kaxa ga minyikelo ya Longoloko wa ku Aka tiSalawu ta Mufumo Misaveni Yontlhe. A minyikelo leyi yi rumelwa hofiseni ya ravi lezaku yi tiriselwa a mabandla lawa ma nga ni xilaveko xa ku aka kutani ku aketa a Salawu ya Mufumo.

Ti akiwa hi vanhu va ziyimo zo hambanahambana va ti hendleletako lezaku va tira na va nga holelwi. Ka matiko yo tala, ku yimisilwe Mitlawa ya ku Aka tiSalawu ta Mufumo. A mitlawa ya malanza ya kuaka ni lava va ku ti nyiketela yi rurarura hi ka bandla ginwe yiya ka ginwani nzeni ka tiko lego, hambu ka matshamu ya le kule nguvu, kasi ku rangela a ntiro wunwe ni wunwani wa kuaka ni ku gonzisa a Timboni ta wutshamu lego. Ka matiko manwani, ka yimiswa a Tikometi ta Zipanze ta ku Aka kasi ku wonelela a kuakiwa ni kuaketwa ka tiSalawu ta Mufumo xipanzeni lexi ti avelweko xona. A madota lawa ma buvileko ntirweni wa kuaka ma rangela a mabandla ka zigava zontlhe za kuaka, niku a vanwani va nga ni wutlhari ga kuaka va ti hendleleta kasi ku vunetela. Ka wutshamu ginwe ni ginwani ku akiwako, a ziro za bandla lego zi wumba a xipanze xa hombe xa lava va ti hendleletako kasi ku tira. A moya wa Jehova ni kutikarata loku a vanhu vakwe va ku kombisako hi mbilu yontlhe hi zona zi mahako lezaku a ntiro lowu wu koteka. — Tisimu 127:1; Va Le Kolosi 3:23.

• Hikuyini a matshamu ya hina ya wukhozeli ma vitwako tiSalawu ta Mufumo?

• Zi kotekisa kuyini ku aka tiSalawu ta Mufumo misaveni yontlhe?

A Salawu yinwe ni yinwani ya Mufumo ya Timboni ta Jehova yi rwala a vito go basa ga Nungungulu. Hikwalaho, hi zi wona na zi hi wudzunzo ni xipanze xa lisima xa wukhozeli ga hina a ku hlengela kubasiseni ni kulungiseni ka yona. Ni wihi munhu wa zi kota ku hlengela mitirweni leyo.

Ti nyiketele lezaku u hlengela kubasiseni ka yona anzhako ka mitlhangano. Anzhako ka mutlhangano wunwe ni wunwani, a vamakabye va xinuna ni va xisati va basisanyana a Salawu ya Mufumo hi kutsaka lezaku yi simama ku cuwukeka. Khati ginwe hi viki, ka mahiwa basiselelo yo tshinganyana. A ntiro lowo wu wonelelwa hi dota kutani nanza ga wutireli legi hi tolovelo gi lanzelako a xaxameto wa lezi zi faneleko ku mahiwa. Maringano ni xilaveko, a munhu ni munhu wa zi kota ku ti nyiketela kasi ku swiyela, ku hlaza lahasi, ku phuhunela ni ku veketelisa zitulo ni zinwani zibya, ku basisa zipetso, ku hlaza tinjhanela, ku hoxa chaka, kutani ku basisa lahandle. Khati ginwe hi lembe hi wutsongwani ga kona, ka vekiwa siku ga lezaku ku mahiwa basiselelo yo mbhelela. Hi patsa a vanana va hina ka mitiro yo kari lezaku hi va gonzisa ku kombisa xichawo hi wutshamu ga hina ga wukhozeli. — Mutshawuteli 5:1.

Ti nyiketele lezaku u vunetela kulungiseni ka ni xihi xi lavekako. Lembe ni lembe, a Salawu ya Mufumo ya hloliwa hi wukheta, nzeni ni handle ka yona. Hi kota ya kuhloliwa loko, ka lungisiwa-lungisiwa zo kari kasi yi simama na yi hlayisekile, lezi zi vunako ku potsa ku tirisa mali yo engeteleka. (2 Kronekele 24:13; 34:10) A Salawu ya Mufumo yi basileko ni yo hlayiseka hi yona yi nga wutshamu gi ringanelwako ku khozela a Nungungulu wa hina. Hi ku hlengela ntirweni lowo, hi kombisa lezi hi mu ranzisako zona Jehova ni lezi hi gi nyikisako zona lisima a wutshamu ga hina ga wukhozeli. (Tisimu 122:1) Lezo kambe zi maha a vanhu va lomu xipanzeni xa hina va xalala hi wukhozeli ga hina. — 2 Va Le Korinte 6:3.

• Hikuyini hi nga faneliko ku tsika ku khatalela a wutshamu ga hina ga wukhozeli?

• Malulamiselo muni ma mahiwako lezaku a Salawu ya Mufumo yi tshama na yi basile?

Xana wa tsakela ku kambisisa zo kari kasi ku engetela a wutivi ga wena xungetano hi Biblia? Wa ha lava ku tiva zinwani xungetano hi mutsalo wo kari kutani munhu, wutshamu, hambu nchumu wu kumbukiwako lomu ka Biblia? Kutani wa tshuka u ti wutisa lezaku xana a Mhaka ya Nungungulu ya zi kota ku ku vuna xikaratweni xo kari ke? Loku zi hi tano, famba biblioteka ya le Salawini ya Mufumo.

Yi na ni zitiro zi nene za ku kambisisa hi zona. Kuzilava wena a wu na mabhuku wontlhe ma seketelwako ka Biblia lawa ma humesilweko hi Timboni ta Jehova hi lirimi la wena. Kanilezi a biblioteka ya le Salawini ya Mufumo yi na ni mabhuku yo tala ma ha hi ku humesiwako. Niku ya zi kota ku ngha yi hi ni tixaka to hambanahambana ta wuhunzuluseli ga Biblia, disionario ga gi nene, ni manwani mabhuku ya ma nene. Tlhatlheka ku tirisa a biblioteka leyo mahlweni ni nzhako ka mitlhangano. Loku ku hi ni komputadori, za koteka ku ngha yi hi ni Watchtower Library. A Watchtower Library i biblioteka ya lomu ka komputadori yi nga ni mabhuku ya hina yo tala nguvu. Ya olova ku yi tirisa niku u nga lava mhaka yo kari, gezu, kutani mutsalo.

Ya vuna a zigonzani ka Mutlhangano wa ntiro ni mahanyela. A xikhati lexi u longiselako xipanze xa wena, u nga ha kambisisa zokari lomu ka biblioteka ya Salawu ya Mufumo. A muwoneleli wa Mutlhangano wa ntiro ni mahanyela hi yena a wonelelako a biblioteka leyi. Hi yena a nga ni wutihlamuleli ga ku yi hlayisa ni ku chela mabhuku ma ha hi ku humako. Yena kutani mugonzisi wa wena wa zi kota ku ku gonzisa ku kambisisa a mhaka leyi u yi lavako. Kanilezi ka beletelwa ku teka ni gihi bhuku uya nago kaya. Niku handle ko kanakana hi fanele ku hlayisa khwatsi a mabhuku lawo, hi nga ma tsaleteli.

A Biblia gi tlhamusela lezaku kasi ku “kuma wutivi ga Nungungulu,” hi fanele ku ti yimisela a ku gi kambisisa kota “tshomba yi fihlilweko.” (Mavingu 2:1-5) A biblioteka ya le Salawini ya Mufumo yi nga ku vuna ku sangula a kukambisisa ka wena.

• Zitiro muni za ku kambisisa hi zona zi nga ka biblioteka ya le Salawini ya Mufumo?

• Himani a zi kotako ku ku vuna a ku lonzowota khwatsi a biblioteka leyi?

Jesu Kristu i byelile lezi a valanzeli vakwe: “Ngha na kuwonekela ka nwina ku woninga mahlweni ka vanhu, kasi va wona mitiro ya nwina yo saseka, va dumisa a Raru wa nwina wa le tilweni.” (Mateu 5:16) Kasi ku maha lezo, hi lonzowota khwatsi a tekinolojiya ya masikwana lawa, a ku patsa ni Internet. A phajina ga hina ga Internet, www.pr418.com/tsc, hi gona a phajina ga nayo lomu ka Internet legi gi kumekisako mahungu xungetano hi kukholwa ni mitiro ya Timboni ta Jehova. Zini zi kombiswako kwalomo?

Mihlamulo ya Biblia ka ziwutiso zi tolovelako ku mahiwa. Kwalomo u nga kuma mihlamulo ya ziwutiso zo kari za lisima nguvu zi tshukileko zi mahiwa. Hi xikombiso, a ziphephana lezi zi lanzelako u nga zi kuma lomu ka Internet hi tirimi to hunza 600: Xana a kuxaniseka ku ta tshuka ku mbhela? Xana a vafileko va zi kota ku tlhela va hanya hakunene? U nga kuma ni Tradução do Novo Mundo kambe hi tirimi to hunza 130 wa tona, ni mabhuku yo hlaya ya ku gonza hi wona a Biblia, a ku patsa ni bhuku Zini lezi a Biblia gi zi gonzisako hakunene? zinwe ni wugandli ga ha hi ku humako ga marevista A Murinzeli ni Khindlimuka! A kutala ka mabhuku lawo ma nga gonziwa kutani ku ingiselwa ka Internet kutani ku chisa hi MP3, PDF kutani EPUB. Wa zi kota ku tlhela u gandla a maphajina yo kari kasi ku nyika munhu a ma tsakelako hi lirimi lakwe wutsumbu! Ku na ni mabhuku ma kombiswako hi wuvidiyu hi makume ya tirimi ta mawoko. Kwalomo ka Internet u nga koka a kugonziwa ka Biblia hi wudrama, tidrama ti seketelwako ka Biblia, ni wucenje go saseka lezaku u ti buza hi gona kuhumuleni.

Mitiro ya Timboni ta Jehova. Lomu ka Internet ka tlhela ku cheliwa mahungu maswa ni tividiyu ti kombisako ntiro wa hina wa misava yontlhe, zimaho zi khumbako Timboni ta Jehova, ni mizamo ya hina ya ku lamulela timhango vanwani. U nga kuma zitiviso za migotsovanyano ya ha tako zinwe ni makhero ya tihofisa ta hina ta maravi.

Hi tindlela leti, ho tsika a kuwonekela ka zinene ku woninga kala matshanwini ya le kule nguvu ya misava. A vanhu va wontlhe matiko-hombe, a ku patsa ni Antártida, va vuneka. Hi khongelela ‘lezaku a mhaka ya Jehova yi simama kuya mahlweni’ hi xihatla misaveni yontlhe, lezaku Nungungulu a dzunziwa. — 2 Va Le Tesalonika 3:1.

• Xana a phajina www.pr418.com/tsc ka Internet gi vunisa kuyini vanhu vo tala a ku gonza a zinene za Biblia?

• Zini u navelako ku zi kambisisa ka phajina ga hina ga Internet?