CIGONDZO 53
Hlawula mihlakano yi tsakisako Jehovha
Jehovha i “Nungungulu wo tsaka”. (1 Timote 1:11) I lava ku hi tsaka hi tlhela hi ti buza hi wutomi. Wa tsaka loku hi ti nyika cikhati ca kuhumula. Ka cigondzo leci, hi ta wona lezvi hi nga ci tirisisako zvona a cikhati ca hina ca kuhumula hi ndlela yi nene, yi to maha ku Jehovha yenawu a tsaka.
1. Zvini hi faneleko ku zvi alakanya a cikhati leci hi hlawulako mihlakano?
Zvini lezvi u randzako ku maha ka cikhati ca wena ca kuhumula? A vokari va randza ku tshama laha kaya va lera mabhuku, kutani ku ingisela mimuzka, kutani ku sixtira mafilmi, kutani ku nghena ka internet. Kanilezvi a van’wani a va zvi randzi a ku tshama laha ka kun’we, hikwalaho, va randza ku jikajika, ku hlambela kutani ku bela bhola ni vanghana vabye. Ni wihi hlakano hi to wu hlawula, hi fanele ku tiyiseka lezvaku wa ‘amukeleka ka Hosi’. (Va Le Efesusi 5:10) Zva lisima a ku hi zwisisa a mhaka leyi, hakuva a kutala ka lezvi a vanhu va hlakanako hi zvona zvi kombisa zvilo lezvi Jehovha a zvi vengako, zvo kota tihanyi, ni wubhayi, ni wungoma. (Lera Lisimu 11:5.) Zvini zvi to hi vhuna a ku hlawula khwatsi a mihlakano ya hina?
Loku hi hlawula a vanghana lava va randzako Jehovha, va ta hi vhuna ku maha zviboho zva zvinene ni ku hlawula khwatsi a mihlakano ya hina. Kota lezvi hi gondzileko ka cigondzo 48, “loyi a fambako ni munhu wo tlhariha i ta tlharihawu”. Kanilezvi, loku hi tolovela ku hlakana ni vanhu va kalako va nga randzi a milayo ya Nungungulu, ‘zvi nga ta hi fambela khwatsi’. — Mavingu 13:20.
2. Hikuyini zvi nga zva lisima a ku pima a cikhati leci hi mbhetako na hi hlakana?
Hambu loku a hlakano lowu hi wu hlawulako wu hi wunene, hi fanele ku ti wonela ku wu nga hi geli cikhati co tala, hakuva hi nga kala hi nga ha salelwi hi cikhati ca ku maha mitiro ya lisima nguvhu. A Bhibhiliya gi hi kuca lezvaku hi “ci tirisa khwatsi a cikhati ca [hina]”. — Lera Va Le Efesusi 5:15, 16.
GONDZA ZVI ETA
Gondza u tiva lezvi u nga zvi tivisako zvona ku hlawula khwatsi a mihlakano ya wena.
3. Potsa a mihlakano yo biha
Hikuyini hi faneleko ku hlawula khwatsi a mihlakano ya hina? Bisani VHIDHIO, mu gumesa mu bhula hi zviwutiso zvi landzelako.
A tijogu ti nga kari ti mahiwa a kale le Roma ti fanisa kuyini ni mihlakano yo kari ya nyamutlha?
Zvini lezvi Danny wa lomu ka vhidhio a nga zvi gondza xungetano hi mihlakano?
Lerani Va Le Roma 12:9, mu gumesa mu bhula hi ciwutiso leci:
A vhesi legi gi fanele ku zvi khumbisa kuyini lezvi u hlawulisako zvona a mihlakano?
Zvilo muni zvo kari lezvi Jehovha a zvi vengako? Lerani Mavingu 6:16, 17 na Va Le Galatiya 5:19-21. Andzhako ka ku lera mutsalo wun’we ni wun’wani, bhulani hi ciwutiso leci:
Zvilo muni zvi kumbukiwako ka mavhesi lawa zvi tolovelekileko ka mihlakano ya nyamutlha?
Zviwutiso zvi to ku vhuna ku hlawula khwatsi mihlakano
Ti wutise lezvi:
Zvilo muni? A ku ka hlakano lowu ku na ni zvilo lezvi Jehovha a zvi vengako?
Cikhati co kota kwihi? A hlakano lowu wu ta ndzi gela ni cikhati ca ku maha zvilo zva lisima nguvhu ke?
Na va mani? Wu ndzi maha ndzi hlakana ni vanhu va kalako va nga mu randzi Jehovha?
Zvi chukwana a ku fambela kule ni mhango. Hikwalaho, loku u nga tiyiseki lezvaku a hlakano wo kari wu nene kutani wu bihile, i chukwana ku wu potsa
4. Tirisa cikhati ca wena hi wutlhari
Bisani VHIDHIO, mu gumesa mu bhula hi ciwutiso ci landzelako.
A makabye loyi hi mu wonileko lomu ka vhidhio i wa nga sixtiri zvilo zvo biha. Makunu ci wa hi cihi a cikarato?
Lerani Va Le Filipi 1:10, mu gumesa mu bhula hi ciwutiso leci:
A vhesi legi gi hi vhunisa kuyini a ku tiva a mpimo wa cikhati leci hi nga mbhetako na hi hlakana?
5. Hlawula a mihlakano ya yinene
Hambu lezvi ku nga ni mihlakano yo kari yi nga tsakisiko Jehovha, ku na ni zvilo zvo tala zva zvinene hi nga mahako kasi hi ti hungata. Lerani Mutshawuteli 8:15 na Va Le Filipi 4:8, mu gumesa mu bhula hi ciwutiso leci:
Mihlakano muni ya yinene u yi randzako?
U nga ti buza hi mihlakano ya yinene
A VOKARI VE: “A zvi bihangi a ku sixtira kutani ku lera zvilo zvi wulawulako hi tihanyi, ni wubhayi, ni wungoma. A ca lisima ku kala ndzi nga zvi mahi.”
U wa ta va hlamulisa kuyini?
LEZVI HI NGA GONDZA
Jehovha i lava lezvaku hi hlawula a mihlakano ya hina hi tlhela hi ti buza hi yona.
Zviwutiso zva kuvhuxeta
Mihlakano muni leyi a maKristu ma faneleko ku yi potsa?
Hikuyini hi faneleko ku ti wonela ka cikhati leci hi mbhetako na hi hlakana?
Hikuyini u lavako ku hlawula mihlakano yi tsakisako Jehovha?
GONDZA ZVIN’WANI
Wona ku himani a faneleko ku hlawula a mihlakano ya wena.
Wona lezvi u nga mahisako zvona a zviboho zva zvinene xungetano hi mihlakano.
“Xana Lezi U Ti Hungatisako Zona Zi Na Ni Xivuno Ke?” (A Murindzeli, 1 ka Outubro wa 2011)
Ka matimu lawa yaku: “Ndzi zvi kotile a ku hlula a cihlawulela”, wona leci ci mahileko a wanuna wo kari a cica a mihlakano yakwe.
“A Bhibhiliya ga cica wutomi ga vanhu” (A Murindzeli, 1 ka Fevereiro wa 2010)
Wona lezvi a mamani wo kari a nga mahisa zvona a ciboho ca cinene xungetano hi mihlakano yi kombisako a zvilo zva wungoma.