HLOKO YA MHAKA YA KAPA: HI GONZA YINI KA MOSI?
I wa hi mani Mosi?
U alakanya yini loku uzwa a vito Mosi? Xana u alakanyela . . .
a nwanana loyi a mamani wakwe a mu fihlileko lomu ka nzhava Congweni wa Nilo?
a jaha gi wundlilweko titshombeni ta Gipite hi nhwana wa Faro — kanilezi gi nga tshuki gi rivala lezaku muIsraeli?
a wanuna loyi a hanyileko kota murisi le Midiani hi 40 wa malembe?
a wanuna loyi a bhulileko na Jehovaa mahlweni ka xihlahla xi vurako?
a wanuna loyi a tiyileko hlana a wulawula ni hosi ya Gipite, a kombela lezaku a vaIsraeli va tlhatlhiwa wukhumbini?
a wanuna loyi, hi ku rumiwa hi Nungungulu, a bikileko a Khume ga Mintungu hehla ka Gipite a xikhati lexi a hosi ya kona yi nga kanyisa a Nungungulu wa lisine?
a wanuna loyi a rangeleko a vaIsraeli va huma Gipite?
a wanuna loyi a tirisilweko kasi ku panza a Bimbi go Pswhuka?
a wanuna loyi a nyikileko vaIsraeli a Milayo ya Khume yi ngata hi ka Nungungulu?
MOSI i mahile zontlhe lezi ni zinwani. A zi hlamalisi ku a wanuna loyi wo tsumbeka a kombiswa nguvu xichawo hi maKristu, vaJuda ni vaMwinyi!
Handle ko kanakana Mosi i’ve muprofeti wo ‘chaveka.’ (Deuteronome 34:10-12) I vumelile ku tiriswa hi Nungungulu hi ndlela ya ntamu. Hambulezo, Mosi i wa hi munhu wo fana ni vanwani. A ku fana na muprofeti Elija, loyi a wonekileko reveni ga Mosi ka muwoniso wo kari masikwini ya Jesu, Mosi i wa hi munhu wo fana na hina. (Jakobe 5:17; Mateu 17:1-9) Mosi i lwisene ni zikarato zo tala lezi hinawu hi kumanako nazo, niku i zi kotile ku zi hlula.
Xana wa zi lava ku tiva a ku i zi hlulisile kuyini? Wona matshamela manharu ya ma nene lawa Mosi a nga ma kombisa ni lezi hi nga zi gonzako ka xikombiso xakwe.
a Jehova i vito ga Nungungulu gi kombiswako lomu ka Biblia.