Mosi — A wanuna wa liranzo

XINI A LIRANZO?

A liranzo kukhatala ko eta hi vanwani. A munhu a nga ni liranzo i kombisa hi magezu ni mitiro lezi a ti zwisako zona hi vanhu lava a va ranzako, hambu loku a ku maha lezo zi lava ku a ti karata.

XANA MOSI I KOMBISISILE KUYINI LIRANZO?

Mosi i kombisile liranzo hi Nungungulu. Hi ndlela muni? Alakanya a magezu lawa ma tsalilweko ka 1 Johani 5:3: “A ku mu ranza Nungungulu hi ku hlayisa milayo yakwe.” Mosi i hanyile hi tshinya legi ga nayo. Ka zontlhe lezi Nungungulu a nga mu ruma ku maha — kusukela ka xiavelo xa ku karata xa ku ya wulawula na Faro kala ka ntiro wu wonekako na wu nga hi wa nchumu wa ku tlakusa nhonga yakwe hehla ka Bimbi go Pswhuka — Mosi i lo ingisa. Na ku nga khataliseki ku i nchumu wo olova kutani wo karata a nga rumiwa, Mosi i wo ingisa. “I lo maha zontlhe khwatsi hi lezi Jehova a mu leleteleko.” — Eksodusi 40:16.

Mosi i kombisile liranzo hi vaIsraeli-kulobye. Vona va wa zi wona lezaku Jehova i wa tirisa Mosi kasi ku rangela vanhu vakwe, hikwalaho va wa tshinela ka Mosi loku va tlhangana ni zikarato zo hambanahambana. Hi gonza lezi: “A vanhu va lo ta yima mahlweni ka Mosi kusukela ni mixo kala laha gambyeni.” (Eksodusi 18:13-16) Hi nga alakanyela a kukarala loku kuzilava Mosi a nga kuzwa anzhako ka kuva a mbhetile siku gontlhe na a ingisela a zikarato za vaIsraeli! Hambulezo, Mosi i wa tsaka hi ku vuna a vanhu lava a nga va ranza.

Ahandle ka ku va ingisela, Mosi i wa tlhela a khongelela a varanzekako vakwe. I tlhelile a khongelela ni lava va nga mu hoxelile! Hi xikombiso, a xikhati lexi a makabye wakwe Miriamu a nga ngurangurela Mosi , Jehova i lo muba hi hlokonho. Wutsanwini ga ku tsaka hi lezi a tsayiswako, Mosi i lo tekela ku mu khongelela aku: “O Nungungulu, nza ku khongotela lezaku u mu hanyisa!” (Mitsengo 12:13) Xini kambe xi nga wa ta kuca Mosi a ku maha mukhongelo lowo ahandle ka liranzo?

HINA KE, HI GONZA YINI?

Hi nga ha pimanyisa Mosi hi ku hlakulela a liranzo lo eta hi Nungungulu. A liranzo lelo li hi susumetela ku ingisa a milayo yakwe hi mbilu yontlhe. (Va Le Roma 6:17) Loku hi ingisa Nungungulu hi mbilu yontlhe, hi tsakisa mbilu yakwe. (Mavingu 27:11) Hinawu ha vuneka. Ahandle ka lezo, loku hi tirela Nungungulu hi liranzo la lisine, hi nga ta maha za zi nene ntsena kanilezi hi ta zi maha hi kutsaka! — Tisimu 100:2

A ndlela yinwani ya ku pimanyisa Mosi ku hlakulela liranzo hi vanwani. Loku a vanghana kutani a ziro za ngango va hi tshinelela ni zikarato zabye, a liranzo li ta hi kuca (1) ku va ingisela hi mbilu yontlhe; (2) hi ti veka ka wutshamu gabye, hizwa lezi vona va zi zwako; hi tlhela (3) hi va komba lezaku ha va khatalela.

A ku fana na Mosi, hi nga khongelela lava hi va ranzako. Ka zikhati zinwani loku va hi byela zikarato zabye, hi nga ha tizwa na hi nga hi va nchumu loku hi nga zi koti ku va vuna. Kuzilava hi nga tlhela hi wula lezi, “Nza ku zwela, nzo vumala xo maha; nzi ta ku khongelela.” Kanilezi alakanya lezaku “a mukombelo wa munhu a lulamileko wa vuna nguvu.” (Jakobe 5:16) Kunene a mikhongelo ya hina yi nga kuca Jehova lezaku a mahela nchumu munhu loye, lezi kuzilava a nga wa ta kala a nga zi mahi. I nchumu muni wa chukwana hi nga wa ta wu maha hi varanzekako va hina ahandle ka ku va khongelela?a

Xana a wu kholwi lezaku ku na ni zotala hi zi gonzako ka Mosi? Hambu lezi a nga hi munhu wo fana na hina, i vekile xikombiso xa hombe nguvu xa kukholwa, kutikoramisa, ni liranzo. Loku hi pimanyisa khwatsi a xikombiso xakwe, hi ta vuneka hina wutsumbu ni vanhu vanwani. — Va Le Roma 15:4.