Mosi — A wanuna wa kukholwa

XINI A KUKHOLWA?

A “kukholwa,” kota lezi ku tirisiswako zona lomu ka Biblia, kutiyiseka ka hombe ku seketelwako ka zilo zo dlunyateka. A munhu a nga ni kukholwa hi Nungungulu, munhu a tsumbako lezaku Nungungulu i ta tatisa a zitsumbiso zakwe zontlhe.

XANA MOSI I KOMBISISILE KUYINI KUKHOLWA?

Mosi i hanyile hi ndlela yi kombako lezaku i wa kholwa ka zitsumbiso za Nungungulu. (Genesisi 22:15-18) I wa hi ni lungelo ga ku hanya wutomi ga gi nene xikari ka titshomba ta le Gipite, kanilezi i lo gi tsika, “a ti hlawulela a kuva a xaniswa zinwe ni vanhu va Nungungulu, ku hunza kuva ni litsako [la xikhatanyana] la kuonha.” (Maheberu 11:25) Xana lexo xi’ve xiboho xa matloti, lexi a nga wa ta guma a ti laya hi xona? Ahihi, hakuva a Biblia gi ngalo Mosi “i lo timisela aku khwatsi hi loku a mu wona loyi a nga woniwiko.” (Maheberu 11:27) Mosi a nga zangi a ti layile hi kuhlawula loku a nga ku maha hi kukholwa.

Mosi i wa ti karatela ku tiyisa kukholwa ka vanwani. Hi xikombiso, wona lezi zi nga humelela a xikhati lexi a vaIsraeli va nga wonekisa ku khwatsi va phasilwe xikari ka butho ga Faro ni Bimbi go Pswhuka. Hi ku chava a hlomulo wu nga wonekisa ku khwatsi wu ta humelela, a vaIsraeli va lo rila ka Jehova ni ka Mosi. Xana Mosi i hlamulisile kuyini?

Kuzilava Mosi i wa nga zi tivi lezaku Nungungulu i ta panza a Bimbi go Pswhuka, a vulula ndlela ya kuva a vaIsraeli va pona. Hambulezo, Mosi i wa tsumba lezaku Nungungulu i wa ta maha xokari kasi ku ponisa a vanhu vakwe. Niku Mosi i wa lava ku vuna vaIsraeli-kulobye lezaku vonawu vava ni kutsumba loko. Hi gonza lezi: “Mosi aku ka vanhu: Mu nga chavi; yimani mu wona a kuhanyisa ka Jehova loku a ta nga ku tira xikari ka nwina nyamutlha.” (Eksodusi 14:13) Xana Mosi i zi kotile ku tiyisa a kukholwa ka vaIsraeli-kulobye? Ina, hakuva a Biblia gi wula lezi xungetano hi Mosi ni vaIsraeli vontlhe: “Hi kukholwa va lo tsemakanya a Bimbi go Pswhuka kota lomu misaveni yi womileko.” (Maheberu 11:29) A kukholwa ka Mosi a ku vunangi yena yece, kanilezi ku vunile vontlhe lava va gonzileko ka yena.

HINA KE, HI GONZA YINI?

Hi nga pimanyisa a xikombiso xa Mosi hi ku hanya hi ndlela yi kombako lezaku ha kholwa ka zitsumbiso za Nungungulu. Hi xikombiso, Nungungulu i tsumbisa ku khatalela a zilaveko za hina za nyama loku hi rangisa wukhozeli gakwe wutomini ga hina. (Mateu 6:33) Lisine ku zi nga tshuka zi hi karatela a ku nga rangisi a zilo za nyama hi kota ya lezi a vanhu vo tala va zi rangisako nguvu inyamutlha. Kanilezi ha zi kota a ku tsumba lezaku loku hi maha zontlhe hi zi kotako kasi ku hehukisa a wutomi, hi veka kupima wukhozelini ga hina, Jehova i ta khatalela a zilaveko za hina zontlhe. Yena i nyika a xitiyisekiso lexi: “Cima nzi nga ta ku tsika, hambu ku ku siya.” — Maheberu 13:5.

Hi fanele kambe ku ti karatela ku vuna vanwani lezaku va tiyisa a kukholwa kabye. Hi xikombiso, a vapswali va nga ni wutlhari va lonzowota khwatsi a lungelo va nga nago kasi ku tiyisa a kukholwa ka vana vabye. Laha va yako va kula, a vana va na ni xilaveko xa ku tiva lezaku Nungungulu i kona niku hi yena a hi nyikako matshinya ya milayo xungetano hi za zi nene ni za kubiha. Ahandle ka lezo, va fanele ku vuniwa lezaku va zwisisa va tlhela va kholwa lezaku a ku lanzela a matshiya yakwe ya milayo hi zona zi nga za chukwana wutomini ga hina. (Isaya 48:17, 18) Xinyikiwo xa hombe lexi a vapswali va nyikako vana vabye loku va va vuna kuva ni kukholwa ka lezaku “ku kona Nungungulu, ni lezaku yena wa chachazela lava va mu lavako.” — Maheberu 11:6.