BHIBLIOTEKA YA SAITE ya Watchtower
BHIBLIOTEKA YA SAITE
ya Watchtower
ciTshwa
  • BHIBHILIYA
  • MABHUKU
  • MITLHANGANO
  • w18 Julho pp. 9-14
  • A mahlo ya wena ma cuwuka mani?

Ka cipandze leci a ku na vhidhyu

Hi tsetselele, kuve ni cikarato kasi a vhidhyu leyi yiba.

  • A mahlo ya wena ma cuwuka mani?
  • A Murindzeli i huwelela a Mufumo wa Jehovha — 2018
  • Zvihlokwana zva mhaka
  • Mahungu yo yelana ni lawa
  • WANUNA WO TSUMBEKA A NGA LUZA THOMO
  • MOSI I NO TSIKA KU INGISA
  • LAHA CIKARATO CI NGA SUKELA KONA
  • U NGA TSIKI LEZVI VAN’WANI VA MAHAKO ZVI KU HAMBUKISA
  • Mosi — A wanuna wa liranzo
    A Murinzeli I Huwelela a Mufumo Wa Jehova—2013
  • Khuhu gi vhurako ndzilo
    Gondza ka matimu ya Bhibhiliya
  • Pimanyisa a kukholwa ka Mosi
    A Murinzeli I Huwelela a Mufumo Wa Jehova—2014
  • Mosi — A wanuna wa kukholwa
    A Murinzeli I Huwelela a Mufumo Wa Jehova—2013
Wona zvinwani
A Murindzeli i huwelela a Mufumo wa Jehovha — 2018
w18 Julho pp. 9-14
Mosi a bako ribye ku huma mati

A mahlo ya wena ma cuwuka mani?

‘Ndza tlakusa mahlo ya mina ka wena, wena loyi u tshamako matilweni.’ — LISIMU 123:1.

TISIMU: 32, 18

U NGA ZVI HLAMULISA KUYINI?

  • Zvi wula yini ku cuwuka Jehovha?

  • Hikuyini Mosi a nga luza thomo ga ku nghena Tikweni ga Citsumbiso?

  • Hi gondza yini ka lezvi zvi nga humelela Mosi?

1, 2. Zvi wula yini ku cuwuka Jehovha?

INYAMUTLHA hi hanya ‘zvikhatini zva zvikarato’. (2 Timote 3:1) Loku Jehovha a nga se lovisa tiko legi go biha a tlhela a neha kurula ka lisine, a wutomi gi taya gi bindza nguvhu. Hi cigelo leco, a mun’we ni mun’wani wa hina i fanele ku ti wutisa lezvi: ‘Ndzi cuwuka mani kasi a ndzi vhuna ni ku ndzi rangela?’ Kuzvilava u tekela ku: “Ndzi cuwuka Jehovha.” Loku u wula lezvo, u hlamulile khwatsi.

2 Zvi wula yini a ku cuwuka Jehovha? Hi nga zvi kombisisa kuyini lezvaku ha simama hi cuwuka Jehovha loku hi kumana ni zvikarato? Cikhatini ci hundzileko, a mutsali wo kari wa Bhibhiliya i tlhamusele a lisima la kuva hi cuwuka Jehovha loku hi lava ku vhuniwa. (Gondza Lisimu 123:1-4.) A mutsali loye i te a cikhati hi cuwukako Jehovha, hi fana ni citiri ci cuwukako a patrawu wa cona. Hi ndlela muni? A citiri ci tsumba patrawu wa cona kasi a ci nyika zvakuga ni ku ci vhikela. Ahandle ka lezvo, contlhe cikhati a citiri ci fanele ku cuwukela a patrawu wa cona kasi ci zwisisa lezvi a lavako ku ci maha ci tlhela ci zvi maha. Hi kufanana, hi fanele ku gondza a Mhaka ya Nungungulu siku ni siku kasi hi zwisisa lezvi Jehovha a lavako ku hi maha hi tlhela hi zvi maha. Loku hi maha lezvo hi nga tiyiseka lezvaku Jehovha i ta hi vhuna loku hi lava civhuno. — Va Le Efesusi 5:17.

3. Cini ci nga hi colopetelako ku cuwuka Jehovha?

3 Hambu lezvi hi zvi tivako ku hi fanele ku cuwuka Jehovha contlhe cikhati, a zvikhati zvin’wani hi nga tshuka hi hambukisa mahlo ya hina. Lezvo zvi humelele Marta, a munghana wa hombe wa Jesu. Marta “i wa karateka hi mitiro yo tala”. (Luka 10:40-42) Loku Marta a wasati wa kukholwa a hambukisilwe kupima hambu lezvi a nga hi na Jesu kwalaha tlhelweni gakwe, a zvi faneli ku hi hlamalisa loku hinawu hi tshuka hi hambukisiwa. Makunu, cini ci nga hi colopetelako ku cuwuka Jehovha? Ka ndzima leyi, hi ta wulawula hi lezvi hi nga hambukisiswako zvona hi lezvi a van’wani va mahako hi tlhela hi gondza hi lezvi hi nga simamisako zvona hi cuwuka Jehovha.

WANUNA WO TSUMBEKA A NGA LUZA THOMO

4. Hikuyini zvi nga hi hlamalisako lezvi Mosi a nga tsandzeka ku nghena Tikweni ga Citsumbiso?

4 Handle ko kanakana, Mosi i wa cuwuka Jehovha kasi a mu rangela. A Bhibhiliya gi hi byela ku Mosi ‘i no timisela aku khwatsi hi loku a mu wona loyi a nga woniwiko’. (Gondza Mahebheru 11:24-27.) Gi tlhela giku ‘cima a ku humangi a muphrofeti lomu ka Izrayeli wa ku kota Mosi, loyi a nga tiva Jehovha hi nghohe yakwe’. (Dhewuteronome 34:10) Hambu lezvi Mosi a nga hi munghana wa hombe wa Jehovha, i tsandzekile ku nghena Tikweni ga Citsumbiso. (Mitsengo 20:12) Cini ci nga mu tsandzekisa?

5-7. Zvini zvi nga humelela cikhatanyana ndzhako ka kuva a vaIzrayeli va humile Gibhite, niku zvini lezvi Mosi a nga maha?

5 Andzhako ka tihweti timbiri a vaIzrayeli na va humile Gibhite, niku na va nga se chikela Citsungeni ca Sinayi, ku humelele nchumu wo bayisa nguvhu. A vanhu va no sangula ku khala hakuva ku wa nga hi na mati. Va ngurangurele Mosi laha ka kuza a zangara a ‘rila ka Jehovha aku: ‘Ndzi ta maha yini hi vanhu lava ke? Va lava ku ndzi gandla hi maribye!’ (Eksodhusi 17:4) Jehovha i nyikile Mosi a zvileletelo zvo dlunyateka. Jehovha i mu byelile lezvaku a teka nhonga yakwe aba ribye le Horebhe. A Bhibhiliya gi li: ‘Mosi i no maha lezvo mahlweni ka masingalakati ya va ka Izrayeli’. — Eksodhusi 17:5, 6.

6 A Bhibhiliya gi wula lezvaku Mosi i chulile wutshamu lego a ku Masa, zvi wulako ku: “Kuringwa”; ni Meribha, gi wulako ku: “Kukanetisana”. Hikuyini? Hi kota ya lezvi a vaIzrayeli va nga kanetisana ni lezvi va nga ringa Jehovha hi ku wutisa ku: ‘Jehovha i kona cikari ka hina, kutani a nga kona ke?’ — Eksodhusi 17:7.

7 Xana Jehovha i ti zwisile kuyini hi lezvi zvi nga humelela le Meribha? I karatekile hakuva a vaIzrayeli va wo vhukela wuhosi gakwe, na ku nga hi Mosi. (Gondza Lisimu 95:8, 9.) Hi nga wona zvilo zvo biha lezvi a vaIzrayeli va nga maha! Kanilezvi Mosi i mahile zvilo zva zvi nene. I rindzele Jehovha a tlhela a landzela khwatsi zvileletelo zvakwe.

8. Zvini zvi nga humelela a cikhati leci a vaIzrayeli va nga hi kusuhani ni ku huma ciwuleni?

8 Kanilezvi, zvini zvi nga humelela ka cimaho co fana ni leco kwalomo ka 40 wa malembe ndzhako? A vaIzrayeli va wa hi kusuhani nguvhu ni ku huma ciwuleni. Va chikele ka wutshamu gi nga gamekene ni Kadhexe, gi nga maha mbhingano ni Tiko ga Citsumbiso. A wutshamu lego gonawu gi gumesile gi vitaniwa ku Meribha.a (Wona tlhamuselo wa lahasi.) Hikuyini? Hi lezvi a vaIzrayeli va tlhela va khala vaku a ku na mati. (Mitsengo 20:1-5) Kanilezvi ka khati legi, Mosi i mahile cihoxo ca hombe.

9. Zvileletelo muni lezvi Jehovha a nga nyika Mosi niku zvini lezvi Mosi a nga maha? (Wona mufota kusanguleni ka ndzima.)

9 Zvini lezvi Mosi a nga maha a cikhati leci a vanhu va nga tsika ku ingisa? Ka khati legi kambe Mosi i rindzele Jehovha kasi a mu rangela. Kanilezvi Jehovha a nga mu byelangi lezvaku aba ribye. I mu byelile lezvaku a teka nhonga yakwe a byela vanhu va tshinela kusuhani ni ribye, a guma a wulawula mahlweni ka gona. (Mitsengo 20:6-8) Xana Mosi i mahile lezvi Jehovha a nga mu leletela? Ahihi. I no zangara nguvhu laha ka kuza a bhongela vanhu aku: ‘Zwanani makunu, n’wina vahluwuki! Hina hi ta mu humesela mati ka legi ribye ke?’ Hi kulandzela i noba ribye makhati mambiri. — Mitsengo 20:10, 11.

Mosi a nga ingisangi zvileletelo lezvi Jehovha a nga mu nyikile

10. Jehovha i ti zwisisile kuyini hi lezvi Mosi a nga maha?

10 Jehovha i no mu zangarela nguvhu Mosi. (Dhewuteronome 1:37; 3:26) Hikuyini a nga mu zangarela? Kuzvilava hi ku Mosi a nga ingisangi zvileletelo lezvi Jehovha a nga mu nyikile.

11. Hikuyini a vaIzrayeli va nga alakanya ku Jehovha a nga mahangi cihlamaliso a cikhati leci Mosi a ngaba ribye?

11 Kuzvilava ku na ni cigelo cin’wani ci nga maha Jehovha a mu zangarela. A maribye ya le Meribha wo sangula ma wa hi yo nonoha nguvhu. Hambu loku munhu a giba nguvhu ribye lego, zvi wa kanakanisa ku a mati ma nga huma. Kanilezvi a maribye ya le Meribha wa wumbiri ma wa hambene nguvhu ni lawa ya le Meribha wo sangula. A kutala ka maribye ma kumekako leyo ma vitaniwa ku i calcário. Kota lezvi a calcário gi nga ribye go olova, a mati ma dona kutsongwani-kutsongwani ma kala ma hlengeletana. A vanhu va wa kuma mati lawo hi ku bhoxa ribye lego. Makunu, a cikhati leci Mosi a ngaba ribye wutshan’wini ga ku wulawula mahlweni ka gona, xana a vaIzrayeli va alakanyile ku a mati lawo ma humile ha woce kutani ma humile hi kota ya lezvi Jehovha a nga maha cihlamaliso?b (Wona tlhamuselo wa lahasi.) A hi zvi tivi.

MOSI I NO TSIKA KU INGISA

12. Ci ngava cihi cigelo cin’wani ci nga maha Jehovha a zangarela Mosi na Aroni?

12 Kuzvilava ka ha hi ni cin’wani cigelo ci nga maha ku Jehovha a zangarela nguvhu Mosi na Aroni. Mosi i byelile vanhu aku: “Hina hi ta mu humesela mati ka legi ribye ke?” A cikhati leci Mosi a ngaku “hina”, kuzvilava i wo ti wula yena na Aroni. Lezvi Mosi a nga wula a zvi kombisangi cichavo hakuva a nga mu nyikangi wudzundzo gontlhe Jehovha. A Lisimu 106:32, 33 li ngalo: ‘Va no zangarisa Nungungulu ni le matini ya Meribha. Hakuva va no zangarisa moya wakwe, laha ka kuza Mosi a wulawula zvahava hi nomu wakwe.’ [Tradução do Novo Mundo]c (Wona tlhamuselo wa lahasi.) (Mitsengo 27:14) Mosi a nga mu nyikangi wudzundzo gontlhe Jehovha legi gi nga mu fanela. Jehovha i byelile Mosi na Aroni aku: “Mu kanetile a gezu ga mina.” (Mitsengo 20:24) Leco ci wa hi ciwonho ca hombe!

13. Hikuyini a ndlela leyi Jehovha a nga tsayisa hi yona Mosi yi faneleko yi tlhela yi hi yo lulama?

13 Jehovha i wa rindzela ku Mosi na Aroni va mu ingisa hakuva hi vona va nga hi varangeli va vanhu vakwe. (Luka 12:48) Cikhatini ci hundzileko, Jehovha a nga tsikangi cizukulwana contlhe ca Izrayeli ci nghena Tikweni ga Citsumbiso hakuva a ci mu ingisangi. (Mitsengo 14:26-30, 34) Hikwalaho zvi wa fanela ku Jehovha a tsayisile Mosi hi kota ya lezvi a nga kala ku ingisa. A ku fana ni vanhu van’wani vo kala ku ingisa, Mosi a nga nghenangi Tikweni ga Citsumbiso.

LAHA CIKARATO CI NGA SUKELA KONA

14, 15. Cini ci nga maha Mosi a tsika ku ingisa Jehovha?

14 Cini ci nga maha Mosi a tsika ku ingisa Jehovha? A hi woneni kambe lezvi a Lisimu 106:32, 33 li wulako. Li ngalo: ‘Va no zangarisa Nungungulu ni le matini ya Meribha. Hakuva va no zangarisa moya wakwe, laha ka kuza Mosi a wulawula zvahava hi nomu yakwe.’ Hambu lezvi a vaIzrayeli va nga tsikile ku ingisa Jehovha, Mosi hi yena a nga zangara. Wutshan’wini ga ku kutikhoma i no wulawula zvilo na a nga alakanyeli a wuyelo ga kona.

15 Mosi i tsikile ku cuwuka Jehovha hi kota ya lezvi a nga vhumela ku hambukisiwa hi lezvi a van’wani va nga maha. Ka khati go sangula legi a vanhu va nga khala hi ku lava mati, Mosi i mahile lezvi Jehovha a nga mu leletele. (Eksodhusi 7:6) Kuzvilava i no karala a tlhela a zangara hi kota ya lezvi a vaIzrayeli va nga kala va nga ingisi hi malembe yo tala. Zvi nga ha maha ka cikhati leco Mosi na a sangulile ku alakanyela ntsena hi lezvi a nga ti zwisa zvona wutshan’wini ga ku alakanyela lezvi a nga mu dzundzisako zvona Jehovha.

Hi fanele ku simama hi cuwuka Jehovha hi tlhela hi mu ingisa contlhe cikhati

16. Hikuyini hi faneleko ku ehleketa hi lezvi Mosi a nga maha?

16 A ku fana ni lezvi Mosi, a muphrofeti wo tsumbeka a nga hambukiswa a tlhela a wonha, hinawu zvi nga hi humelela. Mosi i wa hi kusuhani ni ku nghena Tikweni ga Citsumbiso, kanilezvi hina hi kusuhani ni ku nghena misaveni yiswa. (2 Pedro 3:13) Handle ko kanakana a hi zvi lavi ku luza thomo lego go hlawuleka. Kanilezvi kasi hi nghena misaveni yiswa, hi fanele ku simama hi cuwuka Jehovha hi tlhela hi mu ingisa contlhe cikhati. (1 Johani 2:17) Hi gondza yini ka cihoxo ca Mosi?

U NGA TSIKI LEZVI VAN’WANI VA MAHAKO ZVI KU HAMBUKISA

17. Loku hi zangarile hi nga maha yini kasi hi ti khoma?

17 Ti khome loku u zangarile. Ka zvikhati zvin’wani hi yimisana ni zvikarato zvalezvi zva zvin’we hi ku phindaphinda. Kanilezvi a Bhibhiliya gi ngalo: ‘Ngha hi nga karali a ku maha zva zvi nene; hakuva loku hi nga rereki hi ta tshovela hi cikhati ci faneleko.’ (Va Le Galatiya 6:9; 2 Va Le Tesalonika 3:13) Loku a munhu a hi zangarisa hi ku phindaphinda, ha sangula hi ku ehleketa na hi nga se wulawula ke? Wa zvi kota ku ti khoma loku va ku zangarisile ke? (Mavingu 10:19; 17:27; Matewu 5:22) Loku a wokari a ranga a ku vhuka, u nga tsutsumeli ku zangara kanilezvi tsika Jehovha a kombisa a zanga yakwe. (Gondza Va Le Roma 12:17-21.) Zvi wula yini lezvo? Wutshan’wini ga ku zangara, hi rindzela Jehovha hi lihlazva-mbilu kasi a lulamisa zvikarato zva hina hi cikhati ci faneleko. Loku hi zama ku ti photela wutshan’wini ga ku cuwuka Jehovha, hi tava hi nga mu kombisi cichavo.

18. Zvini hi faneleko ku zvi alakanya xungetano hi ku landzela zvileletelo?

18 Landzela khwatsi a zvileletelo zva ha humako. Ha landzela khwatsi a zvileletelo zva zviswa lezvi Jehovha a hi nyikako? A hi faneli ku simama ku maha zvilo na hi ti byela ku a kale hi wa zvi mahisa lezvo. Wutshan’wini ga lezvo, hi fanele ku tekela ku landzela zvileletelo zviswa lezvi Jehovha a hi nyikako hi ku tirisa hlengeletano yakwe. (Mahebheru 13:17) A cin’wani hi fanele ku ti wonela kasi hi ‘nga hundzeleti lezvi zvi tsalilweko’. (1 Va Le Korinte 4:6) A cikhati hi landzelako khwatsi a zvileletelo zva Jehovha, ho simama ku mu cuwuka.

Makabye a kulileko a zamako ku vhuna makabye wa muswa lezvaku a nga hakiseli ku lulamisa zvihoxo zvo kari

Zvigondzo muni hi zvi kumako ka lezvi Mosi a nga maha a cikhati leci a van’wani va nga maha zvihoxo? (Wona ndzimana 19)

19. Hi nga maha yini kasi a zvihoxo zva van’wani zvi nga wonhi wunghana ga hina na Jehovha?

19 U nga tsiki zvihoxo zva van’wani zvi wonha wunghana ga wena na Jehovha. Loku hi simama ku cuwuka Jehovha, hi nga ta wonha wunghana ga hina naye kutani ku zangara hi kota ya lezvi a van’wani va mahako. A ku fana na Mosi, zva lisima a ku landzela zvileletelo nguvhunguvhu loku hi hi ni malungelo yo kari lomu hlengeletanweni ya Nungungulu. Hi lisine, a mun’we ni mun’wani wa hina i fanele kutikarata a tlhela a ingisa Jehovha kasi a pona. (Va Le Filipi 2:12) Hambulezvo, loku hi hi ni malungelo yo tala, Jehovha i rindzela zva hombe ka hina. (Luka 12:48) Kanilezvi loku hi mu randza Jehovha hi mbilu yontlhe, a ku na nchumu wu to hi khunguvanyisa kutani ku hi hambanyisa ni lirandzo lakwe. — Lisimu 119:165; Va Le Roma 8:37-39.

20. Zvini hi faneleko ku ti yimisela ku maha?

20 Hi hanya ka zvikhati zva zvikarato. Hikwalaho zva lisima a ku simama hi cuwuka Jehovha, loyi a “tshamako matilweni”, kasi hi zwisisa lezvi a lavako ku hi maha. Hi nga tshuki hi tsika lezvi a van’wani va mahako zvi wonha wunghana ga hina na Jehovha. Lezvi zvi nga humelela Mosi zvi hi nyika cigondzo ca lisima nguvhu. Wutshan’wini ga ku maha zvilo hi matloti loku a van’wani a maha zvihoxo, a hi ‘cuwukeni Jehovha Nungungulu wa hina, kala a hi zwela wusiwana’. — Lisimu 123:1, 2.

a Meribha loyi a kumbukilweko laha i hambene ni Meribha loyi a nga kumeka kusuhani ni Refidhime, a vitaniwako kambe lezvaku Masa. Hambulezvo, a matshamu lawo ya mambiri ma wa vitaniwa ku Meribha hakuva a vaIzrayeli va kanetiseni kutani ku khala. — Wona cibhukwana Civhuno ca ku gondza hi cona a Mhaka ya Nungungulu, cipandze 7.

b A tlhari yo kari ya ku tlhamusela timhaka ta Bhibhiliya yi wula lezvaku hi kuya hi mukhuwo wa vaJudha, a vahluwuki va wulile lezvaku lezvi Mosi a nga maha zvi wa nga hi cihlamaliso hakuva i wa zvi tiva ku a ribye lego gi wa sina gi hi ni mati. Hikwalaho va wa lava ku a phinda cihlamaliso leco ka ribye gin’wani. Lezvo a hi lisine i tsheketo.

c Wona Murindzeli wa 15 ka Outubro wa 1987 ka “Zviwutiso zva vagondzi.”

TIVA TLHAMUSELO WA MAGEZU YO KARI

  • Hi cuwuka Jehovha a cikhati hi gondzako a Mhaka yakwe kasi hi zwisisa khwatsi lezvi a lavako ku hi maha hi tlhela hi landzela khwatsi a zvileletelo lezvi a hi nyikako

    Mabhuku ya ciTshwa (2000-2025)
    Huma
    Nghena
    • ciTshwa
    • Rumela
    • Ti hlawulele
    • Copyright © 2025 Watch Tower Bible and Tract Society of Pennsylvania
    • Nayo wa matirisela
    • Nayo wa cihundla
    • Privacy Settings
    • JW.ORG
    • Nghena
    Rumela