Chavelelwa — u chavelela vanwani

A nchumu wa lisima wu hi vunako ku lwisana ni zikarato lezo ku chavelelwa loku ku tako hi ka maxaka, vanghana, ni maKristu-kulori.

A magezu ya ma nene ni ya liranzo ma wuliwako hi munghana ma nga fanana ni tlhatlhangati lowu wu kanzetako zifuta wu tlhela wu tiyisa marambu. (Mav. 16:24; 18:24; 25:11) Hambulezo, a maKristu ya lisine a ma karatekeli a ku chavelelwa ntsena. Kanilezi, ma ti karatela “ku chavelela vona lava va nga le kuxanisekeni, hi kuchavelela loku [wona wutsumbu ma] chavelelwako ha kona hi Nungungulu.” (2 Kor. 1:4; Luka 6:31) Antonio, a muwoneleli wa muganga le Mexiko, i zi hanyile ha yece.

A xikhati lexi a nga khomiwa mababyi ma vitwako linfoma, munwe wa muxaka wa cancro ya nkhata, Antonio i lo karateka nguvu. Hambulezo, i zamile ku ti khoma lezaku a nga hluliwi hi kukarateka kakwe. Hi ndlela muni? I wa zama ku alakanya tisimu ta Mufumo, a ti yimbelela hi gezu go tlakuka a tlhela a ehleketa hi magezu ya kona. A ku khongela hi gezu go tlakuka zinwe ni ku gonza Biblia zonawu zi mu chavelele nguvu.

Hambulezo, Antonio i wula lezaku a xivuno xa hombe nguvu ka zontlhe xi tile hi ka maKristu-kulobye. I ngalo: “Loku mina ni sati wa mina hi karateka, hi wo kombela a xaka ga hina legi gi nga dota bandleni lezaku gita gi tlhela gi ta khongela na hina. Lezo zi wa hi chavelela zi tlhela zi hi nyika kurula.” I engeta aku: “Hi lisine, hi zi kotile ku hlula a kukarateka ka hina hi xikhatanyana hi kota ya ku vuniwa hi maxaka ya hina ni vamakabye va hina va moya.” I lo bonga nguvu hi kuva ni vanghana lavo va mu kombisileko liranzo ni ku mu khatalela!

A xinwani xivuno zikhatini za zikarato i moya wa ku basa lowu hi tsumbisilweko. Mupostoli Pedro i wulile lezaku a moya wa ku basa wa Nungungulu “xinyikiwo” xa mahala. (Miti. 2:38) A mhaka leyi yi wonekile ku lisine a xikhati lexi ku nga totiwa a vanhu vo tala hi Pentekosta wa 33 Nguveni ya Hina. Hambulezo, a moya wa ku basa wa ha simama kuva xinyikiwo lexi hina hontlhe hi zi kotako ku xi kuma. Ku na ni tshala gi nga mbheliko ga xinyikiwo lexi. Makunu, hikuyini u nga kombeliko ku wu kuma na wu tele ke? — Isa. 40:28-31.

KOMBISA KUKHATALA KA HOMBE HI LAVA VA XANISEKAKO

Mupostoli Paule i xanisekile nguvu, ka zikhati zinwani i zile ava kusuhani ni kufa. (2 Kor. 1:8-10) Hambulezo, Paule i wa nga chavi kufa. I wa chavelelwa hi ku tiva lezaku Nungungulu i wa mu vuna. I lo tsala aku: “A bongiwe Nungungulu tlhelo Dadani wa Hosi ya hina Jesu Kristu, a Dadani wa wuxinji ni Nungungulu wa kuchavelela kontlhe; loyi a hi chavelelako kuxanisekeni ka hina kontlhe.” (2 Kor. 1:3, 4) Paule a nga vumelangi ku hluliwa hi zikarato lezo. Kanilezi, a zikarato lezi a lwiseneko nazo zi mu vunile ku zwela wusiwana vanwani, laha ka kuza a zi kota ku chavelela vanwani loku va hi lomu zikaratweni.

Anzhako ka kuva a kalamukile a mababyi yakwe, Antonio i zi kotile ku tlhelela ntirweni wakwe kota muwoneleli wa muganga. Na a nga se babya, i wa sina a hi munhu wa ku khatalela vakhozeli-kulobye hi kukhanzakanya. Kanilezi, anzhako ka mababyi yakwe, yena ni sati wakwe va ti karatela nguvu a ku vuxela ni ku chavelela lava va babyako. Hi xikombiso, anzhako ka kuva a vuxele a muKristu wo kari loyi a nga lwisana ni mababyi ya hombe, Antonio i wonile lezaku a makabye loyi i wa nga lavi kuya mitlhanganweni. Antonio i ngalo: “A hi lezaku i wa nga ha mu ranzi Jehova kutani vamakabye, kanilezi a mababyi ma wa mu bile laha ka kuza a sala a tizwa na a nga hi wa nchumu.”

Lexi Antonio a mahileko kasi ku tiyisa a makabye loyi a nga babya, kuve a mu kombela lezaku a maha mukhongelo ka hlakanonyana va vileko nawo ka masikwanyana ma nga hunza. Hambu lezi a nga tizwa na a nga vuni nchumu, a makabye loyi i lo vumela ku maha mukhongelo. Antonio i wula lezi: “I lo maha mukhongelo wa wu nene nguvu, laha anzhako ka lezo a nga wonekisa ku khwatsi munwani munhu. Makunu i lo sangula ku tlhela a tizwa na a hi munhu.

Kunene, kani za zitsongwani kani za hombe, hontlheni ha tshuka hi lwisana ni zikarato zo kari. Kanilezi, khwatsi hi lezi Paule a wulileko, zi nga hi longisela lezaku hi chavelela vanwani a xikhati lexi va nga zikaratweni. Hikwalaho, ngha hi zwela wusiwana a maKristu-kulori lawa ma xanisekano hi tlhela hi pimanyisa Jehova a Nungungulu wa hina, hi ku chavelela vanwani.