‘Lezi makunu u mu tivileko Nungungulu’ — u fanele ku maha yini?

1. Hikuyini a mufambisi wa xihaha-pfhuka a rangako hi ku hlola a xihaha-pfhuka xakwe hi ku lanzela a xaxameto wo kari na a nga se suka?

A VAFAMBISI va xihaha-pfhuka xa xi nene ka zontlhe zi mahilweko va na ni xaxameto lowu va hlolako hi wona a xihaha-pfhuka xabye na va nga se suka, lowu wu nga ni xipimo xa 30 wa zilo va faneleko ku zi hlola khwatsi. Loku va nga lanzeli khwatsi a xaxameto lowo na va nga se suka, a vafambisi va vulula ndlela ya ku maha mhango ya hombe nguvu. Wa zi tiva a ku mufambisi muni a kuciwako lezaku a wu lanzela khwatsi a xaxameto lowo wontlhe? Hi loyi a buvileko nguvu! A mufambisi loyi a buvileko nguvu, za olova ku a nga khatali nguvu kutani ku tlhela a tsika ku hlola zontlhe ka xihaha-pfhuka xakwe.

2. Zini lezi a maKristu ma kuciwako ku zi hlola?

² A ku fana ni mufambisi wa xihaha-pfhuka loyi a tivako lisima la ku tivikela, wenawu u nga tirisa a xaxameto wa tshamela lego lezaku u hlola a kukholwa ka wena kasi ku nga tsekatseki a xikhati lexi u to ku lava nguvu. Kani wa hi ku bapatizwa kani u kari u tirela Jehova hi malembe yo tala, za lisima nguvu a kuva u hlola a kutiya ka kukholwa ka wena hi kukhanzakanya ni lezi u mu tirelisako zona Jehova Nungungulu. Loku hi nga hloli khwatsi ni loku hi nga khanzakanyi ku maha lezo, zi nga hi yisa khombyeni hi tlhelo ga moya. A Biblia ga hi tlharihisa giku: “Loyi a alakanyako lezaku i yimile, a ti wonele, a nga dzuka awa.” — 1 Kor. 10:12.

3. Zini lezi a maKristu ya le Galatia ma nga fanele ku zi maha?

³ A makristu ya le Galatia ma wa fanele ku hlola a kutiya ka kukholwa ka wona ni kuva ma nyika lisima a kutlhatlheka kabye ka moya. Hi muphahlelo wakwe, Jesu Kristu i vululile ndlela ya lezaku vontlhe lava va kholwako kakwe va tiva Nungungulu hi ndlela yo hlamalisa — ya kuva vana va Nungungulu! (Gal. 4:9) Kasi ma simama ka xiyimo lexo xo kateka nguvu, a maKristu ya le Galatia ma wa fanele ku fularela tigonzo ta lava va nga kurumeta ku lanzela a Nayo wa Mosi. Kuveni lezo a vamatiko lomu bandleni lava va nga hi makhuna va wa nga tshukangi va hi lahasi ka Nayo. A vaJuda ni vamatiko vontlhe va wa fanele ku kula hi tlhelo ga moya. Lezo zi wa patsa ku va tiva lezaku va wa nga ta hlayelwa kululama hi ku lanzela a Nayo wa Mosi.

ZIGAVA ZO SANGULA KASI KU TIVA NUNGUNGULU

4, 5. Wusungukati muni legi Paule a nyikileko va le Galatia, niku ga lisima ka hina hi ndlela muni?

⁴ A kungo ga wusungukati ga mupostoli Paule ka va le Galatia gi wa hi legi: kasi ku vikela maKristu ya tinguva tontlhe lezaku ma nga fulareli a lisine la Biblia ma tlhelela za lenzhako. Jehova a nga pimiselangi mupostoli Paule lezaku a kuca maKristu ya le Galatia ntsena, kanilezi lezaku a kuca malanza yakwe wontlhe.

⁵ A munwe ni munwani wa hina i maha khwatsi hi ku alakanya lezi a nga tlhatlhisiswa zona wukhumbini ga moya zonake ava Mboni ya Jehova. Kasi ku maha lezo, hlola a ziwutiso lezi za zimbiri: Wa ha zi alakanya a zigava lezi u zi lanzeleko kasi u ringanelwa hi kuva munwe wa lava va ngaya kubapatizweni ke? Wa ha zi alakanya lezi u mu tivisileko zona Nungungulu a tlhela a ku tivawo, hi ndlela leyo u sangula ku ti buza hi kutlhatlheka ka lisine ka moya?

6. I xaxameto muni hi to wu kambisisa?

⁶ Hi kutsongwani ka kona, hontlheni hi lanzele ntlhanu wa zigava ni mune. A zigava lezo, zi fanako ni xaxameto wa moya lowu hi faneleko ku ti hlola hi ku lanzela wona, zi xaxametilwe ka kwadru “Zigava zi yisako kubapatizweni ni ku simama ku kula.” Loku hi tshama na hi alakanya a zigava lezo za ntlhanu ni mune zi ta hi nyika ntamu wa ku hi tiya hi nga tlheleli zilo za tiko legi. Khwatsi hi lezi a mufambisi wa xihaha-pfhuka a buvileko nguvu loyi a simamako ku haha a nga mahi mhango hi kuva a ranga hi ku hlola xihaha-pfhuka xakwe hi ku lanzela xaxameto, wenawu u fanele ku ti hlola hi ku lanzela a xaxameto wa moya kasi u simama ku tirela Jehova hi kutsumbeka.

LAVA VA TIVIWAKO HI NUNGUNGULU VA SIMAMA KU KULA HI TLHELO GA MOYA

7. Xikombiso muni hi faneleko ku xi lanzela, niku hikuyini?

⁷ A xaxameto wa mufambisi wa xihaha-pfhuka wu mu alakanyisa lezaku i na ni zilo lezi a faneleko ku zi maha hi kukhanzakanya na a nga se haha. Hi ku fanana, hinawu hi fanele ku hlola a kukula ka hina hi tlhelo ga moya kusukela loku hi bapatizilwe. Paule i lo tsalela Timote aku: “Khomisisa hi kukholwa ni liranzo leli li nga ka Kristu Jesu a timhaka leti ti nene, leti u ti zwileko ka mina, lezaku tiva xikombiso ka wena.” (2 Tim. 1:13) A “timhaka leti ti nene,” ti lomu ka Mhaka ya Nungungulu. (1 Tim. 6:3) Khwatsi hi lezi a minzhatinyana ya masangulo ya xithombe yi hi vunako ku wona a xithombe xontlhe, ‘a xikombiso xa lisine’ xi hi vuna ku zwisisa ni kulanzela zontlhe lezi Jehova a zi lavako ka hina. Zalezi, a hi woneni a zigava lezi zi hi yisileko kubapatizweni kasi hi wona ku hi xi lanzelisa kuyini a xikombiso xa lisine.

8, 9. (a) Hikuyini hi faneleko ku simama hi engetela wutivi ni ku kulisa a kukholwa ka hina? (b) Tlhamusela a lisima la ku simama hi kula hi tlhelo ga moya, niku hikuyini a kukula loko ku nga hiko ka siku ginwe ntsena?

⁸ A xo ranga ka xaxameto wa hina ku kuma wutivi. Anzhako ka lezo hi ngava ni kukholwa. Kanilezi, hi fanele ku simama hi kula hi matlhelo wontlhe ya mambiri. (2 Tes. 1:3) A kukula zi patsa kuya mahlweni hi cica mahanyela ya hina hi laha zi lavekako hi kona. A “ku kula” zi wula ku enzeleka, kuya mahlweni. Hikwalaho, anzhako ka kubapatizwa, hi fanele ku simama hi kula hi tlhelo ga moya, kasi a wumoya ga hina gi nga tshami kwalaha ka kale.

⁹ Hi nga fananisa a kukula ka hina hi tlhelo ga moya ni kukula ka sinya. A sinya yi nga kula nguvu yi tlhela yi hlamalisa, nguvunguvu loku a timitsu ta yona ti zimile tiya kule nguvu ti tlhela ti nava nguvu. Hi xikombiso, a tisinya ta hombe nguvu ta misedari ya le Lebanoni ta kula ti leha laha ka kuza ti chikela a 37 wa timetro, ti tlhela tiva ni timitsu to tiya ti zimako tiya kule nguvu, a tshinya ga kona ga chikela a 12 wa timetro hi kuanama. (Xizim. 5:15) Anzhako ka kuva yi kulile nguvu hi xitshuketi, a ya ha kuli nguvu. Hambulezo, ya simama ku kula, kanilezi a ku kula ka yona a ku woneki nguvu. Lembe ni lembe, a tshinya gi ya gi anama, a timitsu ti simama ku zima ti tlhela ti nava tiya kule zonake yiva sinya yo tiya nguvu. A kukula ka muKristu hi tlhelo ga moya hi nga ku fananisa ni kulela ga sinya leyi. Ka xikhati lexi hi sangulako ku gonza Biblia, hi nga ha hatlisa ku kula nguvu hi tlhelo ga moya zonake hi bapatizwa. Lava va nga lomu bandleni va ku wona a kukula ka hina va tlhela va xalala nguvu. Hi ngaza hi ringanelwa hi kuva maphayona kutani ku kuma malungelo manwani lomu bandleni. Ka malembe ma lanzelako, a kukula ka hina ku nga tshuka ku nga ha woneki khwatsi. Hambulezo, hi fanele ku simama hi kulisa kukholwa ni wutivi ga hina kala hi chikela “ka wudota gi mbheleleko, ni ka lipimo la xiyimo xi mbheleleko xa Kristu.” (Efe. 4:13) Khwatsi hi sinya liyani, hi kula kusukela ka hluke kala kuza hiva muKristu a buvileko, a sinya yo tiya ni yi kulileko nguvu.

10. Hikuyini hambu maKristu ma buvileko ma nga ni xilaveko xa ku simama ma kula?

¹⁰ Kanilezi a ku kula ka hina a ku faneli ku gumelwa laha. Hi fanele ku engetela wutivi ga hina hi tlhela hi tiyisa kukholwa ka hina. Hi ndlela leyo hi tava hi zima mitsu yo tiya nguvu lomu ka misava ya Mhaka ya Nungungulu. (Mav. 12:3) Lomu bandleni ga wuKristu, ku na ni va makabye vo tala va xinuna ni va xisati lava va mahileko zalezo futsi. Hi xikombiso, a makabye wo kari loyi a tirako kota dota hi xipimo xa 30 wa malembe i wonile lezaku wa ha simama ku kula hi tlhelo ga moya. I ngalo: “Nziya mahlweni nzi gi tsakela nguvu a Biblia. Xontlhe xikhati nza kuma lungelo ga ku tirisa a milayo ni matshinya ya milayo ya Biblia hi ti ndlela to hambanahambana. Niku a ku tsakela ka mina a wutireli ku simama ku kula.”

SIMAMA KU TIYISA WUNGHANA GA WENA NA NUNGUNGULU

11. Hi yihi ndlela ya ku simama hi tiyisa a wunghana ga hina na Jehova?

¹¹ A kukula ka hina ku patsa ku simama hi tshinela ka Jehova kota Munghana ni Dadani wa hina. I lava lezaku hi tizwa na hi amukeleka kakwe. I lava kambe lezaku hi tiyiseka ku wa hi ranza niku hi hlayisekile mandleni yakwe a ku fana ni lezi a nwanana a ti zwisako na a ranziwa a xikhati lexi a nga mawokweni ya mupswali wakwe wa liranzo, kutani khwatsi hi lezi hi ti zwisako zona loku hi hi ni munghana wa hina wa lisine loyi hi mu tsumbako nguvu. Khwatsi hi lezi u zi tivako, a wunghana legi na Jehova a gi kuli hi kutsopeta ka tihlo. Ku laveka xikhati lezaku hi mu tiva hi tlhela hi mu ranza. Hikwalaho, loku u lava ku mu tiva khwatsi Jehova, ti yimisele ku ti nyika xikhati lezaku u gonza a Biblia siku ni siku, u tlhela u gonza a Murinzeli munwe ni munwani ni Despertai! zinwe ni mabhuku manwani ma seketelweko ka Biblia.

12. Zini zi lavekako ka hina kasi hi tiviwa hi Jehova?

¹² A vanghana va Nungungulu va simama ku kula hi ku maha mikhongelo hi mbilu yontlhe ni ku hlengela ni vanhu va va nene. (Gonza Malaki 3:16.) A “tindleve ta [Jehova] ti kangatele mikombelo yabye.” (1 Ped. 3:12) A ku fana ni mupswali a nga ni liranzo, Jehova i tshama na a longile ku hi vuna loku hi mu rilela hi mukhongelo. Hikwalaho, hi fanele ku ‘simamisa hi tiyile kukhongeleni.’ (Rom. 12:12) A hi nge kuli hiva maKristu yo buva loku hi nga vuniwi hi Nungungulu. A tshikelelo wa mafambisela lawa ya zilo wa hombe nguvu. Hikwalaho, a hi nge wu koti ku wu hlula ha hoce. Loku hi tsika ku khongela, hi ti valela ha hoce a ku kuma xivuno lexi Nungungulu a ti yimiseleko ku hi nyika ni lexi a zi kotako ku hi nyika. Xana wa xalala hi tshamela ga mikhongelo ya wena, ni ku u wona lezaku wa ha fanele ku kula mhakeni leyi? — Jer. 16:19.

13. Hikuyini a ku hlengela ni maKristu-kulori zi nga za lisima kasi hi kula hi tlhelo ga moya?

¹³ Jehova wa xalaliswa hi vontlhe lava va mu mahako wuchavelo gabye; hikwalaho, hambu loku makunu hi mu tivile Nungungulu, hi fanele ku simama hi hlengela hi kukhanzakanya ni bandla ga lava va mu tivako. (Neh. 1:7) Tikweni legi gi teleko hi zilo zi tsemako hlana, wutlhari ka hina a ku lava wuchavelo xikari ka vamakabye va hina vo tiyisa hlana. Hi gihi wuyelo ga ku maha lezo ke? Lomu bandleni ga wuKristu u kuma vanhu lava va to ku susumeta “mitirweni yo saseka.” (Maheb. 10:24, 25) Kasi kuva ni kuranzana loku Paule a ku kumbukileko a xikhati lexi a nga tsalela Maheberu, ku laveka wumakabye — a ntlawa wa vakhozeli va nga ni kupima kunwe; gi nga bandla. A ku kombisa liranzo la tshamela legi zi patsa ku tirisana ni maKristu-kulori. Laha ka xaxameto wa wena, xontlhe xikhati tsala a serto laha ka kuya mitlhanganweni.

14. Hikuyini a kutisola ni kuhunzuluka zi nga hiko za siku ginwe ntsena?

¹⁴ A kusanguleni loku hi lavile kuva maKristu ku lavekile ku hi ti sola hi tlhela hi kuhunzuluka, kutani ku fularela zionho za hina. Hambulezo, a kutisola a hi za siku ginwe zi gumesa, hi fanele ku simama hi maha lezo. Kota vanhu vo kala kumbhelela, hi na ni xionho xi fihleleko nzeni ka hina a ku fana ni nyoka yi longileko ku hi luma. (Rom. 3:9, 10; 6:12-14) Ngha hi tshama na hi tlharihile, hi potsa ku maha zihoxo hi alakanya lezaku a hi za nchumu. Lexi xi tsakisako hi lezaku Jehova wa hi timisela a xikhati lexi hi ti karatelako ku hlula a gome ga hina hi tlhela hi cica lezi zi lavekako. (Fil. 2:12; 2 Ped. 3:9) Lexi xi to hi vuna nguvu ku tirisa khwatsi a xikhati xa hina ni titshomba ta hina, hi tsika a ku hanyela a ku ti tsakisa. A makabye wo kari wa xisati i tsalile lezi: “Nzi wundlelwe lisineni, hambulezo lezi nzi nga mu wonisa zona Jehova, zi hambene ni lezi va nga mu wonisa zona vanwani. Nzi wa alakanya ku i fanele ku chaviwa nguvu, niku nzi wa alakanya lezaku nzi wa nga ta tshuka nzi zi kota ku mu tsakisa.” Hi kufamba ka xikhati, a makabye loyi i lo wela “zikaratweni za hombe hi tlhelo ga moya” hi kota ya zihoxo zo tala a nga zi mahile. I engeta aku: “A hi lezaku nzi wa nga mu ranzi Jehova, kanilezi hi lezaku nzi wa nga mu tivi khwatsi. Kanilezi, anzhako ka kuva nzi khongele hi mbilu yontlhe, nzi lo sangula ku cica mawonela ya mina.” I te ngalo: “Nzi lo wona lezaku Jehova i wa nzi khoma hi woko a nzi hletela a ku khwatsi nzi nwanana, a nzi vuna ku hlula zikarato za mina hi xinwe xinwe, na a maha lezo hi liranzo, na a nzi komba lezi nzi nga fanele ku maha.”

15. Zini lezi Jesu ni Dadani wakwe va xalalako hi ku zi wona?

¹⁵ ‘Simama u bhula ni vanhu’ xungetano hi mahungu yo saseka. A ngelosi ya Jehova yi wulile magezu lawa ka Pedro ni ka vapostoli lava vanwani anzhako ka kuva va tlhatlhisilwe hi xihlamaliso lomu paxweni. (Miti. 5:19-21) Kunene, a xinwe xa zilo xi faneleko a kuva ka xaxameto wa hina kuya ntirweni wa simu viki ni viki. Jesu ni Dadani wakwe va khatala hi kukholwa ni wutireli ga hina. (Kuv. 2:19) Kota kuwula ka makabye a tirako kota dota loyi a kumbukilweko ka nzima leyi, “a ntiro wa kuxumayela i nchumu lowu wonawu hi faneleko ku wu maha.”

16. Hikuyini zi nga zi nene a ku ehleketa hi kutihendleleta ka hina ka Jehova?

¹⁶ Ehleketa hi kutihendleleta ka wena. A tshomba ya lisima nguvu leyi hi nga nayo kuzwanana ka hina na Jehova. Wa va tiva lava va nga vakwe. (Gonza Isaya 44:5.) Hlola khwatsi hi mukhongelo a tshamela ni kutiya ka kuzwanana ka wena na Jehova. A nchumu wunwani wu yelanako ni lezo, ku alakanya a lisima la siku legi u nga bapatizwa hi gona. A ku maha lezo zi ta ku alakanyisa lezaku a bapatizo wa wena xikombiso xa xiboho xa lisima nguvu ka zontlhe u zi mahileko.

SIMAMA KU TSHAMA KUSUHANI NA JEHOVA HI KUVA U TIMISELA

17. Hikuyini hi nga ni xilaveko xa ku timisela kasi hi simama ku tshama kusuhani na Jehova?

¹⁷ A xikhati lexi a nga tsalela va le Galatia, Paule i khanyisile a xilaveko xa ku timisela. (Gal. 6:9) Lezo za lisima ka maKristu nyamutlha. U ta kumana ni minzhingo, kanilezi Jehova i ta ku vuna. Simama ku kombela a moya wa ku basa hi mukhongelo. U ta pepa moyeni a xikhati lexi a valetako a kubayiseka hi litsako, ni kukarateka hi kurula. (Mat. 7:7-11) Ehleketa lezi: Loku Jehova a khatalela zinyanyani, xana a nga ta mu khatalela nguvu nwina lava mu ti hendleletileko kakwe mu tlhela mu mu ranza ke? (Mat. 10:29-31) Kani mitshikelelo muni u kumanako nayo, u nga tshuki u tlhelela nzhako ge hambu ku tsukula. Hi nga wona a makatekwa lawa ma kumiwako hi lava va tiviwako hi Jehova!

18. ‘Lezi makunu u mu tivileko Nungungulu,’ zini u zi lavako ku maha?

¹⁸ Makunu, loku ku hi lezaku wa hi ku mu tiva Nungungulu ni ku bapatizwa, u fanele ku maha yini? Simama ku mu tiva khwatsi Jehova, u kula kasi u buva hi tlhelo ga moya. Ahati loku u hi ni malembe yo tala na u bapatizilwe ke, u fanele a ku maha yini? Wenawu u fanele ku simama u etisa u tlhela u engetela wutivi ga wena hi Jehova. Hi nga tshuki hi kondla mawoko hi alakanya lezaku a ha ha faneli ku simama hi tiyisa a wunghana ga hina na Jehova. Wutshanwini ga lezo, ngha xontlhe xikhati hi ti hlola hi ku lanzela a xaxameto wa hina wa moya kasi hi tiyiseka lezaku ha simama ku kulisa a wunghana ga hina ni Dadani wa hina wa liranzo, tlhelo Munghana, ni Nungungulu wa hina — Jehova. — Gonza 2 Va Le Korinte 13:5, 6.