HLOKO YA MHAKA YA KAPA: ZA KOTEKA KU KUMA LITSAKO WUTOMINI
Xana hakunene za koteka ku kuma litsako wutomini?
“A masiku ya kuhanya ka hina ma ringana 70 wa malembe, ni lava va nga ni ntamu va nga chikela ka 80 wa malembe, kanilezi a ntamu wa wona ngwa kubayiseka ni kukarateka.” — Tisimu 90:10.
A MAGEZU lawa ma wula lisine! A wutomi misaveni leyi gi tele hi “kubayiseka ni kukarateka.” Kuzilava wa tshuka u ti wutisa, ‘Xana zi nga koteka a ku kuma litsako la lisine wutomini nyamutlha?’
Hi xikombiso, Maria i wa hi munhu wa zigingi xikhati xontlhe, kanilezi nyamutlha a nga ni 84 wa malembe, a nga ha zi koti ku suka laha mutini ha yece. A maalakanyo yakwe ma tira khwatsi, kanilezi ko khwatsi a miri wakwe a wa ha mu vuni. U alakanya ku a nga li kumisa kuyini litsako wutomini go kota lego?
Wena ke? Zi nga ha maha u tshukile u ti wutisa ku xana a wutomi ga wena gi na ni xikongomelo ke. Kuzilava a ntiro wa wena wa karalisa wu tlhela wu swira. Kuzilava a vanhu a va wu nyiki lisima a ntiro lowu u wu mahako. Hambu loku a wutomi ga wena gi famba khwatsi nyamutlha, u nga ha chava xungetano hi lezi zi nga ku humelelako manziko. A zinwani zikhati, u nga ha tizwa xiwunza. Kuzilava laha ngangweni wa wena mu hanya hi ku holovisana. Kuzilava u felwe hi a ranzekako wa wena. A wanuna wo kari a vitwako André i wa hi ni wunghana nguvu ni papai wakwe, loyi a nga sangula ku babya hi xitshuketi a tlhela afa. Lezo zi siyile xilonza xa hombe ka André lexi a alakanyako lezaku xi nga ta tshuka xi hola.
Na ku nga khataliseki a ku zikarato muni hi kumanako nazo, ku na ni nchumu lowu hontlheni hi vilelako ku wu tiva: Xana hakunene za koteka ku kuma litsako wutomini? A hlamulo wa xiwutiso lexi hi nga wu kuma ka wutomi ga wanuna wo kari a hanyileko kwalomo ka 2.000 wa malembe ma hunzileko — ku nga Jesu Kristu. Na ku nga khataliseki a zikarato zontlhe lezi a kumeneko nazo, handle ko kanakana Jesu i kumile litsako wutomini. Hinawu hi nga li kuma loku hi lanzela xikombiso xakwe.