Xana a wukhongeli ga tsumbeka mhakeni ya Yimpi?

Alberto i’ve musochwa hi xipimo xa khume ga malembe. I ngalo: “A mufundisa wa hina i wa hi katekisa aku, ‘Nungungulu i na nwina.’ Kanilezi nzi wa karateka nziku, ‘Nziya nzi ya daya, kuveni a Biblia gi ngalo “u nga dayi.”’”

Rui i wa hi musochwa wa butho ga lomu matini xikhatini xa Yimpi ya Wumbiri ya Misava. Ka siku go kari, i lo wutisa mufundisa aku: “Lezi u taku u ta khongelela butho ga hina lezaku gi ya hlula, xana a valala va hina a va mahi zalezo na vonawu ke?” A mufundisa i lo nzi hlamula ku a mitiro ya Hosi a yi tiviwi hi munhu.

Loku a hlamulo lowo wu nga ku eneleli, a hi wena wece.

ZINI LEZI A BIBLIA GI ZI GONZISAKO?

Jesu i te ngalo a wunwe wa milayo ya hombe ya Nungungulu ku ‘ranza muakelane kota lezi u ti ranzako wena.’ (Marku 12:31) Xana Jesu i vekile mbhingano xungetano hi laha a liranzo la hina hi muakelane li faneleko ku gumela kona hi kuya hi lomu a hanyako kona kutani tiko legi a tako hi ka gona ke? Ahihi. I te ngalo ka vapizani vakwe: “Loku mu ranzana, a vanhu vontlhe va ta zi tiva lezaku mu vapizani va mina.” (Johani 13:34, 35) A liranzo labye li wa tava la hombe nguvu laha ka kuza liva xifungo xi va tivekisako ka vanwani. Wutshanwini ga ku dayana, va wa ta nyikela wutomi gabye hi kota ya vanwani.

A maKristu yo sangula ma wa hanya hi kuyelana ni magezu ya Jesu. A bhuku The Encyclopedia of Religion gi ngalo: “A vadadani vo sangula va chechi, a ku patsa na Tertuliano zinwe na Orígenes, va wa wula lezaku a maKristu ma wa nga faneli ku daya munhu. A tshinya legi ga nayo gi wa ma maha ma nga vumeli ku maha masochwa ya Roma.”

A TIMBONI TA JEHOVA TI MAHISA KUYINI?

Kota lezi ku nga ni Timboni ta Jehova matikweni wontlhe, ni gihi tiko gi lwako ni ginwani gi na ni Timboni. Hambulezo, ti maha zontlhe ti zi kotako kasi ku simama ti kombisa a tshamela legi gi ti tivekisako nguvu, ku nga liranzo.

Hi xikombiso, xikhatini xa kulwisana ka vaHutu ni vaTutsi le Ruanda hi 1994, a Timboni ta Jehova a ti ti ngheniselangi ka yimpi leyo. A Timboni ta lixaka linwe ti wa fihla ta leli linwani hambu lezi a kutala ka zikhati ku nga hi ku ti veka mhangweni. Ka siku go kari ku nga khonwa Timboni timbiri ta vaHutu ti nga fihlile vamakabye va vaTutsi, a masochwa ya Interahamwe ya vaHutu ma te ngalo, “Mu fanele kufa hakuva mu ponisile vaTutsi.” Lexi xi nga tsakisiko hi lezaku a Timboni leto ta vaHutu ti lo dawa hi wumbiri ga tona. — Johani 15:13.

U zi wonisa kuyini: Lezi a Timboni ta Jehova ti zi mahako za zwanana ni magezu ya Jesu ya ku kombisa liranzo la kutikarata ke?