Xana a wukhongeli ga tsumbeka mhakeni ya Mali?

Estellea i waya chechini ni vana vakwe va ntlhanu ni vambiri niku i wa nga tshuki a lova. I ngalo: “Nzi lo byela a mufundisa wa mina lezaku nzi lava ku gonza a Biblia.” Kanilezi a nga zangi a mu gonzisile. Hi magumo, Estelle i lo nyima kuya chechini. Yena i simama aku: “A varangeli va chechi va wa nzi tsalela mapapilo vaku loku nzi nga zi koti ku famba, nzi nga rumela mali basi. Nzi lo ehleketa nziku: ‘A va khatali hi mina loku nzi ngayi; va lava mali ya mina basi.’”

Angelina, loyi kale ni kale a nga hi mukhongeli i ngalo: “Chechini ka mina va wa hunzisa lihlelo makhati manharu hi siku na va rinzela ku hi chela mali ka makhati wontlhe. Va wa tshama hi ku kombela mali. Nzi lo ehleketa lezi: ‘A vanhu lava a va na moya wa Nungungulu.’”

Xana a tichechi ta lomu u tshamako kona ta lonza mali hi mano kutani hi kukongoma? Xana lezo za zwanana ni Biblia?

ZINI LEZI A BIBLIA GI ZI GONZISAKO?

Jesu, a muyimisi wa wuKristu, i te ngalo: “Mu amukele hi matsenya, nyikani hi matsenya.” (Mateu 10:8) A mahungu ya Biblia a ma xavisiwi niku ma fanele ku kumiwa hi vontlhe va ma lavako.

Xana a maKristu yo sangula ma wa hakhelisa kuyini a zilaveko za bandla?

Munhu ni munhu i wa maha munyikelo “kota lezi a xuvako mbilwini yakwe; na a nga karateki, kutani ku kurumetwa; hakuva Nungungulu wa ranza loyi a nyikako na a xalele.” (2 Va Le Korinte 9:7) Mupostoli Paule i te ngalo: “Hi [wa] tira wusiku ni mumu, kasi hi nga binzisi ni munwe wa nwina, laha hi nga kanela ivangeli ya Nungungulu ka nwina.” (1 Va Le Tesalonika 2:9) Paule i wa tira kota mumahi wa matenda kasi ku ti hanyisa wutirelini gakwe. — Mitiro 18:2, 3.

A TIMBONI TA JEHOVA TI MAHISA KUYINI?

A Timboni ta Jehova ti tala ku tlhangana ka tiyindlu ti vitwako ku ngalo tiSalawu ta Mufumo. Loku ku hi ni zilo za ku lava mali, ti yi kumisa kuyini? A ti tshuki ti hunzisa tihlelo ta mihlengo, ge hambu ku rumela tivilope ta ku kombela mali. Kanilezi ni wihi loyi a xalaliswako hi milongoloko yabye ya moya i maha munyikelo wakwe ka kaxa gi nga kona Salawini ya Mufumo.

A revista legi gi gandliwa hi mali gi tlhela gi rumelwa hi mali. Hambulezo, u nga ta tshuka u gi wona na gi hi ni xitiviso xa kuxaviswa kutani xa ku kombela mali. Gi khanyisa nguvu a kuhangalaka ka lisine la Biblia.

U zi wonisa kuyini: Xana a malulamiselo lawa ma zwanana ni magezu ya Jesu zinwe ni xikombiso xa maKristu yo sangula?