Xiro xiswa xa Hubye yi Fumako

Hi 5 ka Setembro wa 2012, hi Wazithathu ni mixo, a ngango wa Beteli wa le Estados Unidos ni Canadá wu lo tiviswa lezaku ku engetelwe xiro xiswa ka Hubye yi Fumako ya Timboni ta Jehova. Kusukela hi 1 ka Setembro wa 2012, Mark Sanderson i tira kota xiro xa hubye leyi.

Makabye Sanderson i wundlilwe hi vapswali va maKristu le San Diego, Califórnia, Estados Unidos, niku i bapatizilwe hi 9 ka Fevereiro wa 1975. I sangulile ku tira kota phayona le Saskatchewan, Canadá, hi 1 ka Setembro wa 1983. Hi Dezembro wa 1990, i lo pasa Xikola xa Gonziselelo ya Wutireli (lexi makunu xi vitwako ku Xikola xa Biblia xa Vamakabye va Magwenza) le Estados Unidos. I wa hi ka ntlawa wa wuntlhanu ni wumbiri. Hi Abril wa 1991, Makabye Sanderson i lo nyikiwa xiavelo xa kuya tira kota phayona go hlawuleka xihlaleni xa Terra Nova le Canadá. Anzhako ka ku tira kota muvaleti wa muwoneleli wa xipanze, i lo rambiwa lezaku ava xiro xa ngango wa Beteli wa le Canadá hi Fevereiro wa 1997. Hi Novembro wa 2000, i lo ciciwa a yisiwa Beteli ya Estados Unidos, laha a nga ya tira ka Xipanze xi Tirisanako ni Mahungu ya Zipitali. Anzhako ka xikhati, i lo tira ka Xipanze xa Ntiro.

Hi Setembro wa 2008, Makabye Sanderson i lo gonza Xikola xa Ziro za Kometi ya Ravi niku zalezo a nga mbheta i lo yimiswa kota xiro xa Kometi ya Ravi ga Filipinas. Hi Setembro wa 2010, i lo vitaniswa lezaku a tlhela Estados Unidos, laha a nga ya tira kota muvuneteli ka Kometi ya Ntiro ya Hubye yi Fumako.