Kasi hi tile hi kwihi ke?

Genesisi, a bhuku go sangula ga Biblia, gi tlhamusela hi magezu ma tsongwani lezi a zilo zontlhe zi nga tumbulukisa zona. Gi ngalo: “A kusanguleni Nungungulu i lo vanga tilo ni misava.” (Genesisi 1:1) Anzhako ka ku vanga tisinya ni zihari, Nungungulu i lo vanga vanhu vo sangula, Adamu na Eva. Va wa hambene ni zihari hakuva a vanhu, hi wutsongwani ga kona, va zi kota ku kombisa a matshamela ya Nungungulu, a ku patsa ni xinyikiwo xa ku hlawula ha voce lezi va zi lavako. Hikwalaho, va wa ta ti hlamulela ka Nungungulu hi lezi va nga wa ta zi maha. Loku va wa no ingisa zileletelo za Nungungulu, na va mahile xipanze kutatiseni ka kungo gakwe kota vapswali vo sangula va vanhu vontlhe laha misaveni, lava va nga wa ta ti buza hi wutomi go mbhelela ni ga kurula kala kupinzuka.

Kanilezi, a ngelosi yo kari, kutani xivangwa xa moya, yi lo lonzowota vanhu lezaku yi va tirisa ka lezi yona wutsumbu yi nga zi lava. Hi ndlela leyo, yi lo maha Satani, zi wulako ku “Mukaneti.” Satani i lo kalavela Eva hi ku tirisa nyoka, a mu byela lezaku i wa ta hanya khwatsi loku a nga rangelwi hi Nungungulu. Adamu na Eva va lo ingisa Satani, va tsema kuzwanana kabye ni Muvangi wabye. Hi kota ya kuhlawula kabye ka hava, a vapswali va hina vo sangula va lo luza wutomi ga pinzukelwa va tlhela va hi siyela xionho, kungambheleli, ni kufa.

Nungungulu i lo tekela ku wula lezi a to maha kasi ku lulamisa xikarato lexi ni ku vulula ndlela ya lezaku a vana va Adamu va kuma wutomi ga pinzukelwa. Nungungulu i lo profeta lezaku a “pswalo” wo kari — munhu wo hlawuleka — wu wa ta gumesa hi ku lovisa Satani wu tlhela wu fuvisa a kuxaniseka kontlhe loku yena na Adamu, na Eva va ku vangileko. (Genesisi 3:15) Wu wa tava mani a “pswalo” lowo ke? Zi wa ta tiveka hi kufamba ka xikhati.

Satani yenawu i lo maha zontlhe a zi kotako kasi a kungo ga Nungungulu gi nga tatiseki. A xionho ni wubihi zi lo hangalaka hi xihatla. Nungungulu i lo boha ku lovisa a vakubiha hi ntalo; a byela Noa, a wanuna wo lulama, lezaku a aka taru — kaxa ga hombe go deluka — kasi yena ni ngango wakwe va pona zinwe ni zihari lezi a nga leletelwe ku nghena nazo lomu tarwini.

Loku ku hunzile lembe anzhako ka loku a Ntalo wu sangulile, Noa ni ngango wakwe va lo huma lomu tarwini vaya ka misava yi nga basisilwe. Kanilezi a “pswalo” wu wa hata.

 — Ma seketelwe ka Genesisi zipimo 1-11; Juda 6, 14, 15; ni Kuvululelwa 12:9.