Hikuyini u faneleko ku navela ku tiva a Biblia?

A Biblia hi gona gi tiviwako nguvu ku hunza mabhuku wontlhe ma nga kona. Hikuyini? Hi lezaku u gi kuma ni kwihi laha u yako. Gi na ni matimu ya lisine ya vanhu va vileko kona ni kutirisana kabye ni vanwani zinwe na Nungungulu. A matimu lawa ma hi gonzisa zilo za lisima wutomini ga hina hi magezu yo olova ni yo kongoma lawa ma nga hunzuluselwako hi tirimi to tala nguvu, ma tlhela ma zwisisiwa hi vanhu va hanyako misaveni yontlhe ni ka xihi xikhati. Niku a matshinya ya milayo ya Biblia ma vuna xontlhe xikhati.

A xa lisima ka zontlhe hi lezaku a Biblia a gi wuli ntsena lezaku gi wulawula hi Nungungulu, kanilezi gi wula kambe lezaku gita hi ka Nungungulu. Gi tlhela gi hi byela a vito ga Nungungulu, wumunhu gakwe, ni kungo gakwe gi nga ciciko legi a nga hi nago a xikhati a nga vanga vanhu ni misava. A Biblia kambe gi wulawula hi yimpi yi nga kona xikari ka wunene ni wubihi yi sangulileko kale: yi nga drama yo hlamalisa wuakweni gontlhe leyi yi gumesako hi zilo zo saseka. Hikwalaho, a ku gonza Biblia na u hi ni kupima ku vululekileko zi aka kukholwa ni kutsumba.

Lomu ka Biblia, hi kuma mahungu ya ku a hi nge ma kumi ka bhuku ginwani. Hi xikombiso, a Biblia gi hi byela lisine xungetano hi zilo zo kota lezi:

• Lezi hi nga tumbulukisa zona ni lezi zi hi mahako hi xaniseka

• Lezi Nungungulu a zi mahileko kasi ku tirula vanhu

• Lezi Jesu a hi maheleko

• Lezi a misava ni wutomi ga vanhu zi to tshamisa zona xikhatini xi tako

Makunu, hikuyini u nga ti nyikiko xikhatanyana u gonza a maphajina lawa ma lanzelako, u wona lezi a Biblia gi wulawulako hi zona ke?