Papilo gi tako hi ka Nungungulu wa liranzo

HI NGA nzi byela, i bhuku muni u gi ranzako nguvu? — A vanana vo kari va ranza bhuku gi wulawulako hi zihari. A vanwani va ranza legi gi nga ni mifota yo tala. A mabhuku lawo ma tsakisa nguvu a ku ma lera.

Kanilezi, a mabhuku ya ma nene ka wontlhe ma nga kona misaveni, hi lawa ma hi gonzisako lisine xungetano hi Nungungulu. A ginwe ga mabhuku lawo gi na ni lisima ku hunza wontlhe lawa manwani. Wa gi tiva a ku hi gihi? — I Biblia.

Hikuyini a Biblia gi nga ga lisima? — Hi ku gita hi ka Nungungulu. Gi hi byela zokari xungetano hi Nungungulu ni zilo za zi nene lezi a to hi mahela. Gi hi komba lezi hi faneleko ku maha kasi hi mu tsakisa. Hikwalaho, hi nga wula ku i papilo gi tako hi ka Nungungulu.

Nungungulu na a zi kotile ku tsala a Biblia gontlhe le tilweni zonake a nyika vanhu. Kanilezi, a nga mahangi lezo. Hambu lezi a maalakanyo ya kona ma tileko hi ka Nungungulu, i tirisile malanza yakwe ya laha misaveni lezaku ma tsala xipanze xa hombe xa Biblia.

Xana Nungungulu i zi mahisile kuyini lezo? — Kasi ku zi tiva, a hi ehlekete hi lezi: Loku hizwa a gezu ga munhu wo kari lomu ka radu, za koteka ku loyi a wulawulako a hi ka wutshamu ga le kule nguvu. A xikhati lexi hi wonako a televizawu, hi nga ha wona a zithombe za vanhu va matiko manwani, hi tlhela hizwa lezi va wulawulako.

A vanhu va zi kota a kuya le hwetini hi ku tirisa a tixaka to kari ta zihaha-pfhuka, niku va nga rumela mahungu misaveni na va hi kwaleyo. U wa zi tiva lezo? — Loku a vanhu va zi kota ku maha lezo, xana Nungungulu a nge zi koti ku rumela mahungu na a hi le tilweni? — 

Handle ko kanakana a nga zi kota! Niku lezo i zi mahile ka xikhati xa kale nguvu, a vanhu na va nga se maha radu kutani televizawu.

Mosi i vile wanuna loyi a zwileko Nungungulu hi kukongoma na a wulawula. Mosi a nga mu wonangi Nungungulu, kanilezi i lozwa a gezu gakwe. Ku wa hi ni vanhu vo tala nguvu laha ku nga maheka lezo. Ka siku lego, Nungungulu i lo tsekatsekisa xitsunga, ku tlhela kuva ni kudzinza ni kuhatima. A vanhu va zi tivile lezaku hi Nungungulu a nga kari a wulawula, kanilezi va lo chava nguvu. Hikwalaho, va lo byela Mosi vaku: “Nungungulu a nga wulawuli na hina, hi ngafa.” Hi nzhako ka xikhati Mosi i lo tsala lezi Nungungulu a nga wulile. Niku lezi Mosi a zi tsalileko zi lomu ka Biblia. — Eksodusi 20:18-21.

Mosi i tsalile a ntlhanu wa mabhuku yo sangula ya Biblia. Kanilezi, a hi yena yece a tsalileko a Biblia. Nungungulu i tirisile xipimo xa 40 wa vavanuna kasi ku tsala zipanze za Biblia. A vavanuna lavo va hanyile ka xikhati xa kale nguvu, niku ku hunzile malembe yo tala kasi a Biblia gi mbhela ku tsaliwa. Hi nga alakanya, zi tekile xikhati xa kwalomo ka 1.600 wa malembe! Lexi xi hlamalisako hi lezaku a vokari xikari ka vavanuna lavo a va tshukangi va tivana, hambulezo, zontlhe lezi va zi tsalileko za zwanana.

A vavanuna vo kari lava Nungungulu a va tirisileko kasi ku tsala Biblia va wa hi ni nduma. Hambu lezi Mosi a nga hi murisi, i lo gumesa a maha murangeli wa tiko ga ka Israeli. Solomoni i wa hi hosi yi nga ganyile nguvu ni yo tlhariha ku hunza vontlhe misaveni. Kanilezi, a vatsali vanwani va wa nga hi na nduma. Amosi i wa hi muhlayisi wa tisinya ta mikuwu.

A mutsali munwani wa Biblia i wa hi dokodela. Wa gi tiva a vito gakwe? — Hi Luka. A munwani i wa tira ku hlengisa mali ya khupo. A vito gakwe hi Mateu. A munwani i wa hi mulamuli a nga wu tiva khwatsi a nayo wa wukhongeli ga xiJuda. I tsalile mabhuku yo tala ya Biblia a ku hunza vanwani. Wa gi tiva vito gakwe? — Hi Paule. Niku Pedro na Johani a vapizani va Jesu, lava vonawu va vileko vatsali va Biblia, va wa hi vakukuti va tinjhanjhi.

A kutala ka vatsali lavo va Biblia va tsalile zilo lezi Nungungulu a nga wa ta zi maha ka masiku ma nga hata. Va zi tivisile kuyini a zilo lezo na zi nga se maheka? —  Hi Nungungulu a nga va byela. I lo va byela lezi zi nga wa ta humelela.

A xikhati lexi Jesu, Mugonzisi wa Hombe, a nga hi laha misaveni, a xipanze xa hombe xa Biblia xi wa sina xi tsalilwe. Alakanya lezaku Mugonzisi wa hombe i wa hanyile le tilweni. I wa zi tiva lezi Nungungulu a nga mahile. Xana Jesu i wa kholwa lezaku a Biblia gita hi ka Nungungulu? — Ina, i wa kholwa.

A xikhati lexi Jesu a nga wulawula ni vanhu xungetano hi mitiro ya Nungungulu, i wa tirisa a Biblia. Ka zikhati zo kari Jesu i wa wulawula navo na a nga vululangi a Biblia. Jesu i tlhelile a hi nehela mahungu yo tala ma tako hi ka Nungungulu. I lo wula lezi: “Lezi nzi zi zwileko ka yena, hi zona lezi nzi wulawulako tikweni.” (Johani 8:26) Jesu i zwile zilo zo tala ka Nungungulu hakuva i wa hanya zinwe Naye. Hi nga gonza kwihi lezi Jesu a zi wulileko? —  Lomu ka Biblia. Zontlhe zi nga lomo zi tsalelwe hina kasi hi lera.

Hi lisine, a xikhati lexi Nungungulu a nga tirisa a vanhu kasi ku tsala a Biblia, va lo tsala hi lirimi leli va nga wulawula. Hikwalaho, a ku hunza a khihlanya ga Biblia gi tsalilwe hi xiHeberu, a xipanze xinwani hi xiAramaiko, ni xinwani xa hombe xi tsalilwe hi xiGreki. Kota lezi a vanhu vo tala inyamutlha va kalako va nga zi tivi a ku lera tirimi leto, a Biblia gi hunzuluselwa hi tirimi tinwani. Inyamutlha, a Biblia gi kumeka hi tirimi to hunza 2.260 wa tona. Hi nga wona a talela ga tona! A Biblia i papilo ga Nungungulu gi yako ka vanhu vontlhe. Hambu lezi a Biblia gi hunzuluselweko hi tirimi to tala, a mahungu ya gona hi yalawa ya manwe, mata hi ka Nungungulu.

Lezi a Biblia gi zi wulako za lisima ka hina. Gi tsalilwe kale nguvu, kanilezi gi wulawula hi zilo zi mahekako inyamutlha. Gi tlhela gi hi byela lezi Nungungulu a to maha lokuloku. Lezi gi zi wulako a zo ku tsakisa! Gi hi maha hi rinzela zilo zo tsakisa zi to maheka.

A Biblia gi tlhela gi hi byela lezi Nungungulu a lavako lezaku hi hanyisa zona. Gi hi byela lezi zi nga zi nene ni lezi zo biha. Mina na wena hi fanele ku tiva a zilo lezo. A Biblia gi wulawula hi vanhu va mahileko zilo zo biha ni lezi zi va humeleleko, kasi hi potsa a zikarato lezi va vileko nazo. Gi tlhela gi wulawula hi vanhu va mahileko zilo za zi nene ni wuyelo ga gi nene legi va vileko nago. A mahungu wontlhe lawo, ma tsalelwe ku vuna hina.

Kanilezi, kasi hi vuneka nguvu hi Biblia, hi fanele ku tiva hlamulo wa xiwutiso xo kari. A xiwutiso xa kona hi lexi: Himani a hi nyikileko a Biblia? Wa mu tiva? — Ina, a Biblia gontlhe gita hi ka Nungungulu. Makunu, hi nga zi kombisisa kuyini a ku hi vanhu vo tlhariha? — Hi ku ingisa Nungungulu ni ku maha lezi a zi wulako.

Hikwalaho, hi fanele ku mbheta xikhati na hi lera zinwe a Biblia. Loku hi amukela a papilo gi tako hi ka munhu hi mu ranzako nguvu, hi gi lera makhati yo tala. Ga lisima ka hina. A Biblia gi fanele kuva ga lisima ka hina hakuva i papilo gi tako hi ka Munhu a hi ranzako nguvu. I papilo gi tako hi ka Nungungulu wa liranzo.