Nzi walwa yimpi ya ku mbheta wubihi ni tihanyi

KALE KA MINA:

Nzi kulile le Rmaysh, kusuhani ni mbhingano wa tiko ga Israeli ni ga Lebanoni xikhatini xa yimpi. Nzi wonile zilo zo tshisa nguvu, a kubuwuka ka mamina ni vanhu vo tsemeka ziro na va nga hi na nanzu. A wutomi gi wa nonoha niku ku wa tele hi wugevenga ni tihanyi.

A ngango wa hina wu wa lumba a chechi ya Maronita, yi nga hi yinwe ya Tichechi ta Katolika ta le Mutsuwuka-gambo. Papai i wa tshama hi ku tira xontlhe xikhati kasi a hlayisa ngango wa hina wu nga wumbiwa hi 12 wa vanhu, kanilezi mamani i wa ti karatela ku hina vanwani hiya chechini. Hi kufamba ka xikhati, nzi lo sangula ku wona lezaku, a ku fana ni vanhu laha va yileko, a chechi yi wa nga zi koti a ku vuna lava va nga hiko ni muvuni.

Laha nzi nga hi jaha, nzi lo sangula ku ranza kung fu. Nzi lo gonza a kung fu zonake nziva tlhari ya hombe ya kuba zibhakela ni mitapi ni ku tirisa a matlhari yo hambanahambana. Nzi lo ti byela lezi: ‘Nzi nga ta zi kota ku mbheta yimpi, kanilezi, hi kutsongwani ka kona, nzi ta mbheta vanhu va tihanyi.’ Xontlhe xikhati nzi nga wona vanhu vambiri na valwa, nzi wo tekela ku zi nghenela. Hi mabeleko nzi wa hi munhu wa ku hatlisa kuzangara, niku zi wa nga karati a ku nzi zangarisa. Kota lezi nzi ngalwa yimpi ya ku mbheta wubihi ni tihanyi ha nzoce, a vanhu vontlhe va le dzongeni wa Lebanoni va wa nzi chava.

Hi 1980, nzi lo ti patsa ni ntlawa wa kung fu le Beirute. Siku ni siku ku wa kari kuwa mabhomba, magranada, ni maruketi, kanilezi nzi wa nga tsiki kuya nzi ya gonza kulwa. A wutomi ga mina gi wa hi kuga, ku etlela ni ku hanyisa ku khwatsi hi mina Bruce Lee, a muChina wa le Amerika a nga hi mumahi wa mafilimu ni nghwazi ya kung fu. Nzi wa pimanyisa lezi a nga tsemisa zona misisi, mafambela yakwe, ni lezi a nga khavisa zona mutapi loku alwa kung fu. Nzi wa nga tshuki nzi hleka.

LEZI A BIBLIA GI NGA CICISA ZONA A WUTOMI GA MINA:

A mixuvo ya mina ku wa hi ku maha mulwi wa hombe wa kung fu le China. Ka gambo go kari, nzi wa kari nzi vuxeta kulwa lezo na nzi ti longisela kasi nzi enza nziya China, zalezo nzi lozwa vanhu na va gongonza livati. Ku wa hi munghana wo kari a ngata ni Timboni timbiri. Na nzi bohile tinguwo ta ntima ta kulwa hi tona, a miri wa mina wontlhe na wu xililika nyuko, nzi lo va byela lezi: “A nzi tivi nchumu hi Biblia.” Nzi wa nga zi tivi lezaku kusukela kwalaho, a wutomi ga mina gi wa ta cica.

A Timboni leto ti lo nzi tlhamusela hi ku tirisa Biblia lezaku hikuyini a vanhu va to kala va nga zikoti a ku mbheta wubihi ni tihanyi ha voce. Va lo nzi tlhamusela lezaku Satani hi yena a vangako zikarato lezo. (Kuvululelwa 12:12) Nzi lo hlamaliswa nguvu hi kutsumba ni kurula loku nzi ku wonileko tinghoheni ta Timboni leto. Niku nzi lo khumbeka nguvu laha va nga nzi gonzisa lezaku Nungungulu i na ni vito. (Tisimu 83:18) Va lo tlhela va nzi komba 1 Timote 4:8 loyi a nge ngalo: “Hakuva a ku ti toloveta a ntiro wa miri ka vuna kutsongwani, kanilezi a kuhanya ka kukholwa ka vuna zilweni zontlhe; ku na ni xitsumbiso xa wutomi kuhanyeni loku ni ka loku ku tako.” A magezu lawo ma gumesile ma khumba nguvu a wutomi ga mina.

Lexi xi nga tsakisiko hi lezaku a Timboni leto a nza ha tlhanganangi nato, hakuva a va ngango wa mina va wa va byelile lezaku va nga ha wuyi. Hambulezo, nzi lo ti vekela mixuvo ya ku tsika kulwa a kung fu nzi sangula ku gonza Biblia. A vamakabye va mina a va zi tsakelangi, kanilezi nzi lo ti yimisela a ku lavetela Timboni ta Jehova kasi nzi gonza nato a Biblia.

Nzi wa simama a ku lavetela Timboni kanilezi nzi wa nga ti kumi. Nzeni ka xikhatanyana lexo, nzi wa karatekile nguvu hi kufa ka papai ka xitshuketi, ni zikarato zinwani za laha kaya. Nzi wa sangulile ku tira ka koponi ya kuaka. Ka siku go kari, a munwe wa mutiri-kulori, wa ku hi Adel, i lo nzi nyimisa a nzi wutisa a ku hikuyini nzi nga wonekisa ku khwatsi a nzi tsakangi. I lo sangula ku nzi bhulela hi xitsumbiso xa Biblia xa kuvuxiwa ka vafileko. Ka 9 wa tihweti ti nga lanzela, a Mboni leyi ya liranzo yi lo gonza na mina a Biblia hi lihlaza-mbilu.

Laha hi ngaya hi gonza, nzi lo wona lezaku nzi wa fanele ku cica nguvu a wumunhu ga mina. A zi nzi olovelangi. Nzi wa hatlisa ku swireka niku zi wa nga karati a ku nzi kwatisa. A Biblia gi lo nzi gonzisa a ku ti khoma. Hi xikombiso, Mateu 5:44 i na ni wusungukati ga Jesu gi nge: “Ranzani valala va nwina, mu kombelela lava va mu xanisako.” A bhuku ga Va Le Roma 12:19 gi tlharihisa lezi: “Mu nga ti photeli . . . hakuva ku tsalilwe ku ngalo: A kuphota ka mina, mina nzi ta tlhelisela, ku wula Hosi.” A mitsalo leyi ni yinwani yi nzi vunile a kuva nzi kuma kurula maalakanyweni hi kutsongwani-kutsongwani.

LEZI NZI NGA VUNEKISA ZONA:

Hambu lezi a maxaka ya mina ma nga sangula hi ku sola xiboho xa mina xa ku gonza ni Timboni, va lo gumesa hi ku ti komba xichawo a Timboni ta Jehova. Kunene, a munwe wa vamakabye va mina i ti patsile na mina hi khozela Jehova, niku Mamani i yimelela a kukholwa ka hina ka vanwani kala afa.

Nzi lo tlhela nzi katekiswa nguvu hi ku kuma sati wo saseka ni wo tsumbeka, Anita, loyi a nga munghana wa mina wa hombe ntirweni wa xikhati xontlhe. Kusukela hi 2000, mina na Anita hi hanya le Eskilstuna, Suécia, lomu hi vunetelako ku gonzisa a Biblia ka vanhu va wulawulako xiArabia.

Nza ha va zwela wusiwana lava va xanisekako hi kota ya tihanyi. Kanilezi a ku tiva xigelo xa kona — ni ku tiva lezaku Nungungulu i ta zi fuvisa lokuloku — ​zi nzi nyika litsako la lisine ni kurula. — Tisimu 37:29.