Himani a nga vanga Nungungulu?

Hi nga ehleketa hi papai wo kari a bhulako ni jaha gakwe ga 7 wa malembe. I mu byela lezi: “Kaleloko, Nungungulu i lo vanga misava ni zontlhe zi nga ka yona, a vanga gambo, hweti ni tinyeleti.” A jaha legi gi ehleketanyana hi zona zonake giku: “Papai, himani a nga vanga Nungungulu?”

A papai wa kona i hlamula aku: “Nungungulu a nga vangiwangi hi munhu. A nga na masangulo ne magumo, ive kona xontlhe xikhati.” Ka xikhati lexi, a hlamulo lowu ntsena wa enela ka nwanana loyi. Hambulezo, laha a yako a kula, a xiwutiso lexi xi simama ku mu karata. Za mu karatela a ku zi zwisisa lezaku zi mahisa kuyini a ku a munhu ava kona na a nga zangi ava ni masangulo. I ti byela a ku hambu a wuako give ni masangulo. Hikwalaho, i ti wutisa lezi: ‘Xana Nungungulu i tile hi kwihi?’

Ahati a Biblia ke, gi hlamulisa kuyini a xiwutiso lexi? Gi hlamulisa zalezi a nga hlamulisa zona a papai wa laha ka mufananiso wa hina. Mosi i tsalile lezi: Jehova, “hi mahlweni a zitsunga na zi nga se ku huma, na u nga se ku vanga misava ni tiko, kusukela kupinzukeni kala kupinzuka wena u hi Nungungulu.” (Tisimu 90:1, 2) Hi kufanana, muprofeti Isaya i lo hlamala aku: ‘A wu zi tivi ke? A wu zi zwangi ke? Lezaku Jehova i Nungungulu wa pinzukelwa”! (Isaya 40:28) Hi ku fana, a papilo ga Juda gi wulawula hi Nungungulu kota loyi a nga kona “na zi nga seva kona zikhati.” — Juda 25.

A mitsalo leyi yi hi komba lezaku Nungungulu i “Hosi ya pinzukelwa,” hi laha mupostoli Paule a nga wula ha kona. (1 Timote 1:17) Lezi zi wula ku xontlhe xikhati Nungungulu ive kona, ni ka xihi xikhati xa lenzhako lexi hi zi kotako ku xi alakanya. Niku i tava kona kala kupinzuka. (Kuvululelwa 1:8) A kuva a hi kona xontlhe xikhati i tshamela ga lisima ga Nungungulu Nyamintamu.

Hikuyini lezo zi hi karatelako ku zi zwisisa? Kota lezi hi hanyako xikhati xitsongwani, zi maha lezaku hina na Jehova hiva ni mawonela yo hambana nguvu xungetano hi xikhati. Kota lezi Nungungulu a nga wa pinzukelwa, a ka yena a 1.000 wa malembe ma fana ni siku ginwe ntsena. (2 Pedro 3:8) Kasi ku kombisa: Xana a bhanzala, legi gi hanyako a 50 wa masiku ntsena, gi nga zi zwisisa loku u wulawula hi wutomi ga hina ga 70 kutani 80 wa malembe? Ne ni kutsongwani! Hambulezo, a Biblia gi komba lezaku hi fana ni mabhanzala loku hi fananiswa ni Muvangi wa hina wa Hombe. Hambu a kupima ka hina ku hambene nguvu ni loku kakwe. (Isaya 40:22; 55:8, 9) Hikwalaho, a zi hlamalisi lezi ku nga ni zilo zo kari zi yelanako ni tshamela ga Jehova lezi hina vanhu hi nga zi kotiko a ku zi zwisisa.

Hambu lezi zi hi karatelako a ku zwisisa ku zi wula yini a kuva Nungungulu a hi wa pinzukelwa, hi nga zi wona lezaku za zwisiseka. Loku ku wa hi ni wokari a vangileko Nungungulu, yaloye i wa tava Muvangi. Kanilezi, kota lezi a Biblia gi tlhamuselako, Jehova hi yena a “nga vanga zilo zontlhe.” (Kuvululelwa 4:11) Tlhatakumbiri, ha zi tiva lezaku ka xikhati xo kari, a wuako gi wa nga hi kona. (Genesisi 1:1, 2) Xana gi tile hi kwihi? Ku wa fanele ku ranga hi kuva ni Muvangi wa kona. Ive kona kambe na ku nga seva ni zivangwa zinwani zo pimisa, zo kota N’wana wakwe a belekilweko yece ni tingelosi. (Joba 38:4, 7; Va Le Kolosi 1:15) Hi kota ya lezo, za dlunyateka lezaku i rangile hi kuva kona na a hi yece. Yena a nga vangiwangi; hakuva ku wa nga hi na nchumu lowu wu nga wa ta ngha wu vangile yena.

A wukona ga hina ni wukona ga wuako gontlhe zi komba lezaku ku na ni Nungungulu wa pinzukelwa. Loyi a mahako a wuako ga hina ga hombe lezaku gi renzelekela, a yimisileko milayo le’yi gi fumelako, i fanele ku ngha a hi kona xontlhe xikhati. Hi yena basi a faneleko ku ngha a zi nyikile wutomi a zilo zontlhe zi hanyako. — Joba 33:4.