HLOKO YA MHAKA YA KAPA | NDLELA YA KUVA MUNGHANA WA NUNGUNGULU
Wa tizwa na u hi munghana wa Nungungulu?
“A kuva ni wunghana na Nungungulu zi ku maha u tizwa na u tiyile, u tlhela u nga chavi nchumu. Zi mahisa ku khwatsi Nungungulu o tshama na a ku cuwuka kasi a ku vuna.” — Ku wulile CHRISTOPHER, JAHA GO KARI GA LE GANA.
“Nungungulu wa ku wona a kuxaniseka ka wena kontlhe, a ku ranza a tlhela a ku khatalela ku hunza lezi u nga wa ta mu kombela.” — Ku wulile HANNAH, jaha ga 13 WA MALEMBE GA LE ALASCA, ESTADOS UNIDOS.
“I nchumu wa lisima nguvu ni wo tangalisa a kuzwa ni ku tiva lezaku u na ni wunghana ga hombe na Nungungulu!” — Ku wulile GINA, A WASATI WA LE JAMAICA A NGA NI 40 WA MALEMBE NI KU HUNZA.
Christopher, Hannah, na Gina a hi vona voce va ti zwisako lezo. A vanhu vo tala misaveni yontlhe va kholwa hi kumbhelela lezaku Nungungulu wa va wona kota vanghana vakwe. Wena ke? Wa tizwa na u hi munghana wa Nungungulu? Kutani, wa tsakela kuva munghana wa hombe wa Nungungulu? Kuzilava wa ti wutisa a ku: ‘Hakunene za koteka ku a munhu wa nyalidede ava ni wunghana ni Nungungulu wa Ntamu-wontlhe ke? Niku loku zi koteka, hi ndlela muni?’
ZA KOTEKA KUVA MUNGHANA WA NUNGUNGULU
Hi kuya hi Biblia, za koteka a ku zwanana ni kuva ni wunghana ga hombe na Nungungulu. A Biblia gi wula lezaku Nungungulu i vitanile Abrahama, wa muHeberu a ku: “Munghana wa mina.” (Isaya 41:8, Tradução do Novo Mundo) Wona kambe a xirambo xo tsakisa xi tsalilweko ka Jakobe 4:8. Xi ngalo: “Tshinelani ka Nungungulu, na yena i ta tshinela ka nwina.” Hikwalaho, zi te dlunya lezaku za koteka kuva ni kuzwanana kutani wunghana ga hombe na Nungungulu. Kanilezi, kota lezi Nungungulu a nga wonekiko, u nga ‘tshinelisa’ kuyini kakwe u tlhela u ti buza hi kuva ni kuzwanana naye ke?
Kasi ku hlamula xiwutiso lexi, ehleketa hi lezi zi mahekako loku a vanhu vambiri va maha wunghana. Hi tolovelo gi sangula hi kuva va tivana mavito yabye. Hi kulanzela, laha va bhulako hi kukhanzakanya, va tlhela va phofulelana kutizwa kabye, a wunghana gabye giya gi kula. Niku a xikhati lexi va ti karatelako ku mahelana zilo, a wunghana gabye go tiya. Hi nga wula lezaku a wunghana na Nungungulu gonawu gi tshamisile zalezo. A hi woneni ku hi nga zi mahisa kuyini.