Xana u fanele ku cica maalakanyo?

A NTLAWA wo kari wa vaswa va maKristu wu bohile ku ya hlalela filimu. Va zwile lezaku a kutala ka zigonzani-kulobye zi gi tsakele nguvu. Loku va chikele laha gi hlalelwako kona, va cuwuka a zithombe za gona, va wona zibhamu za hombe ni vavasati va maambalela yo kala ma nga nyawuli. Va taku yini? Va ta ala va nghena va gi wona ke?

A xiyimo lexi xi komba lezaku ha kumana ni ziboho zo tala lezi zi nga khumbako wumoya ga hina ni wuxaka ga hina na Jehova — ku ngava hi ndlela yi nene kutani ya hava. Ka zikhati zo kari, u nga ha xuva ku maha nchumu, kanilezi u guma u ehleketisisa hi mhaka leyo, u boha ku cica maalakanyo. Xana lezo zi wula ku kala u nga tivi lexi u xi lavako, kutani za ringana?

Laha hi nga faneliko KU CICA MAALAKANYO

A liranzo la hina ha Jehova li hi kucile ku hendleleta a wutomi ga hina kakwe hi tlhela hi bapatizwa. Hi xuva hi mbilu yontlhe ku simama hi tsumbekile ka Nungungulu. Hambulezo, a nala wa hina Satani i ti yimisele ku tshova a kutsumbeka ka hina. (Kuv. 12:17) Hi mahile xiboho xa ku tirela Jehova ni ku hlayisa milayo yakwe. A ku cica maalakanyo mhakeni ya kutihendleleta ka hina ka Jehova wu wa tava nchumu wo biha nguvu! Hi wa ta luza wutomi ga hina wutsumbu.

Kwalomo ka 26 wa mazana ya malembe nzhako, Nebukadnezzare, a Hosi ya Babuloni, i lo yimisa xifananiso xa hombe xa nzalama a tlhela a laya lezaku a vanhu vontlhe vawa hasi va xi khozela. Ni wihi loyi a nga wa ta kala a nga mahi lezo i wa ta hoxiwa nzhimbyeni wa nzilo. A vakhozeli vanharu va Jehova — Xadrake, Mexake, na Abed-nego — ​a va vumelangi. Kota lezi va nga kala va nga vumeli ku koramela xifananiso lexo, va lo hoxiwa nzhimbyeni wa nzilo. Jehova i lo va ponisa hi xihlamaliso, kanilezi va wa vumele ku veka wutomi gabye mhangweni ku hunza ku tshova xiboho xabye xa ku tirela Nungungulu. — ​Dan. 3:1-27.

Hi nzhako ka xikhati, muprofeti Danieli i lo khongela a nga tsiki, hambu lezi zi nga hi ni khombo ga kuva a hoxiwa nkeleni wa tinghala. I lo simama ni mukhuwo wakwe wa ku khongela ka Jehova kunharu hi siku. Danieli a nga cicangi xiboho xakwe xa ku khozela Nungungulu wa lisine. Kota wuyelo ga kona, a muprofeti loyi i lo poniswa “ntanwini wa tinghala.” — Dan. 6:1-27.

A malanza ya Nungungulu ya masiku ya hina wonawu ma hanya hi kuyelana ni kutihendleleta ka wona ka Jehova. Ka xikola xo kari tikweni ga Afrika, a ntlawa wo kari wa zigonzani zi nga Timboni ta Jehova wu lo ala ku patseka ka xihena xa ku khozela mujeke wa tiko. Va lo va tsumbisa ku va hlongola xikoleni loku va nga vumeli ku ti patsa ni zigonzani-kulobye. Xikhatanyana anzhako ka lezo, a muwoneleli wa gonziselelo (ministro de educação) i lo enzela a xidoropana lexo a ya wulawula ni zigonzani zo kari za Timboni. A vaswa lava va Timboni va lo tiya hlana va tlhamusela xiyimo xabye hi wunene. Kusukela kwalaho, a mhaka leyo a yi se tshuka yi vuka kambe. A vamakabyana va hina va zi kota kuya xikoleni na va nga kurumetwi ku onha wuxaka gabye na Jehova.

Wona kambe xikombiso xa Joseph, loyi a nga babya hi kankro zonake afa hi xitshuketi. A maxaka ya Joseph ma wa zwisisa ma tlhela ma kombisa xichawo hi mawonela yakwe xungetano hi mikhuwo ya marilo. Kanilezi a maxaka ya sati wakwe a ma lisineni, niku ma wa lava lezaku ku lanzelwa zihena zo kari, a ku patsa ni mikhuwo yi nga tsakisiko Nungungulu. Joseph i ngalo: A xikhati nzi nga ala ku tshova milayo ya Jehova, va lo zama ku kucetela vana va mina; kanilezi vontlhe va lo simama va tiyile ka xiboho xabye. A maxaka lawo ma lo zama ku pileka ni xirumbi laha mutini ka mina, kota lezi va tolovelako ku maha, kanilezi nzi lo va byela lezaku loku va kurumeta ku pileka ni xirumbi, va wa nga ta zi maha laha mutini wa mina. Va wa zi tiva lezaku a mukhuwo lowu a wu zwanani ni lezi nzi zi kholwako ge ni lezi a nga zi kholwa sati wa mina.

“Ka xikhati lexo xo nonoha xa hlomulo, nzi lo kombela Jehova lezaku a vuna ngango wa hina lezaku wu nga tshovi milayo yakwe. I lo ingisa mikhongelo ya mina, a hi vuna ku simama hi tiyile zikaratweni lezo.” Ka Joseph ni vana vakwe, a kucica a maalakanyo mhakweni ya wukhozeli gabye zi wa nga hi na ko nghena hi kona.

Laha a ku cica maalakanyo KU NGA KUHLAWULA

Xikhatanyana anzhako ka Pasika ga 33 Nguveni ya Hina, a wasati wo kari wa muSirofenike i loya ka Jesu Kristu na a hi le Sudoni. I lo mu kombela hi kuphindaphinda lezaku a hlongola dimoni ka n’wana wakwe wa nhanyana. Kusanguleni, Jesu a nga mu hlamulangi nchumu. I lo byela vapizani vakwe aku: “A nzi rumiwangi ka vanwani, sine ka tiyivu ti lahlekileko ta yindlu ya ka Israeli.” Laha a wasati loye a nga phikelela, Jesu i lo mu byela lezi: “A hi khwatsi lezaku ku tekwa a zibaba za vanana, zi hoxwa ka timbyana.” A wasati loye i lo kombisa kukholwa ka hombe aku: “Ina, Hosi; kanilezi na tona timbyana taga a matlhatlha ntsena ma wako hi laha mezeni ya venyi va tona.” Jesu i lo vumela xikombelo xakwe a hanyisa a xinhanyatana lexo. — Mat. 15:21-28.

Hi ku maha lezo, Jesu i wa pimanyisa Jehova hi ku vumela ku cica maalakanyo loku a xiyimo xi vumela. Hi xikombiso, Jehova i wa bohile ku hihirita vaIsraeli a xikhati lexi va nga maha a role ga nzalama, kanilezi i lo vumela lezaku Mosi a mu khongotela ku cica a xiboho Xakwe. — Ekso. 32:7-14.

Mupostoli Paule i lo pimanyisa Jehova na Jesu. Ka xikhati xo kari, Paule i wa nga zi woni na zi ringana a kuva va teka Johani Marku mapfhumbeni yabye ya wurumiwa hakuva ka pfhumba gabye go sangula, i wa va tsikile pfhukeni a ti yela kaya. Kanilezi hi ku famba ka xikhati Paule i lo zi wona lezaku Marku i wa ti karata niku i wa ta mu nyika xivuno xa hombe. Hikwalaho i lo byela Timote aku: “Tana na Marku, hakuva wa nzi vuna nguvu ntirweni.” — 2 Tim. 4:11.

Ahati hina ke? Loku hi pimanyisa a Dadani wa hina wa le tilweni wa liranzo, wuxinji ni lihlaza-mbilu, kuzilava hi nga zi wona zi hi zi nene a ku cica maalakanyo ya hina. Hi xikombiso hi nga ha cica lezi hi va wonisako zona vanwani. A kuhambana na Jehova na Jesu, hina a hi mbhelelangi. Loku vona va vumele ku cica, xana hina a hi nge kombisi ku zwisisa ziyimo za vanwani hi tlhela kuzilava hi cica maalakanyo ya hina ke?

A ku cica maalakanyo ku ngava ginwe ga mawonela ya ma nene a xikhati hi ehleketako hi mixuvo ya moya. A vokari va gonzako Biblia ni kuta mitlhanganweni va tshuka va nga mahi xiboho xa ku bapatizwa. Kutani a vamakabye vo kari va nga ha kanakana ku nghenela a ntiro wa wuphayona, hambu loku a xiyimo xabye xi va vumelela ku anzisa wutireli gabye hi ndlela leyo. A vamakabye vanwani va wonekisa ku khwatsi a va byekeleli ku lava wutihlamuleli lomu bandleni. (1 Tim. 3:1) Xana wenawu wa tshuka u ti zwisa lezo? Jehova i ku ramba hi liranzo lezaku u tazwa litsako la malungelo lawo. Makunu hikuyini u nga ciciko a maalakanyo ya wena, u kuma litsako la ku ti hendleleta ka Jehova ni ka vanwani ke?

Ella a tirako ka hofisa yo kari ya ravi ya Timboni ta Jehova tikweni ga Afrika i bika lawa hi ntiro wakwe: “A xikhati nzi ngata Beteli, nzi wa nga alakanyi lezaku nzi wa ta hlwela. Nzi wa xuva ku tirela Jehova hi muhefemulo wontlhe, kanilezi nzi wa nga lavi kuhambana ni ngango wa mina. Kusanguleni, nzi wa wu xuva nguvu a ngango wa mina! Hambulezo, a munghana wa mina wa kwarutu i lo nzi tiyisa, zonake nzi boha ku tshama. Anzhako ka khume ga malembe na nzi hi laha Beteli, nzi xuva ku simama nzi tirela vamakabye va mina hi xikhati xo leha nguvu hi laha zi kotekako hi kona hi ku simama xiavelweni xa mina Beteli.”

Laha a ku cica maalakanyo ZI NGA XIKURUMETA

Wa alakanya lezi zi nga humelela Kana a xikhati lexi a nga lusela makabye wakwe, zonake a tala hi zanga ke? Nungungulu i lo byela wanuna loye a nga kukutela lomu mbilwini lezaku loku a hunzuluka a sangula ku maha za zi nene i wa ta amukelwa. Nungungulu i lo tlharihisa Kana lezaku a ti wonela xionho lexi xi nga “xiyelele nyangweni.” Kana ngha a cicile maalakanyo ni kupima, kanilezi i lo hlawula ku kanyisa wusungukati ga Nungungulu. A yo biha hi lezaku Kana i lo daya nakulobye, a maha mudayi wo sangula! — Gen. 4:2-8.

Wona kambe a xikombiso xa Hosi Uzzia. Kusanguleni, i wa maha kululama mahlweni ka Jehova niku i wa hlota Nungungulu xontlhe xikhati. Kanilezi, hi kufamba ka xikhati i lo chakisa a kululama kakwe hi matshanza. I lo nghena tempeleni a hisa libani, hambu lezi a nga kala a nga hi mupristi. Xana i cicile a maalakanyo a xikhati lexi a vapristi va nga mu tlharihisa lezaku a nga mahi wupumbu lego ke? Ahihi. “Uzzia i lo zangara” a kanyisa xitlharihiso xabye. Kota wuyelo ga kona, Jehova i lo muba hi hlokonho. — 2 Kro. 26:3-5, 16-20.

Kunene, ku na ni zikhati lezi hi faneleko ku cica maalakanyo futsi. Wona xikombiso xa masiku ya hina. Joachim i bapatizilwe hi 1955, kanilezi hi 1978 i lo susiwa bandleni. Anzhako ka 20 wa malembe, i lo ti sola a wuyela bandleni kota Mboni ya Jehova. Xikhatanyana nzhako, a dota go kari gi lo mu wutisa a ku hikuyini a mbhetileko xikhati xo leha na a nga se wuyela. Joachim i te ngalo: “Nzi wova ni zanga ni matshanza. Nza ti sola hi kuva nzi hlwelile nguvu ku wuya. Hambu lezi nzi nga hi le handle ka bandla, nzi wa zi tiva lezaku a Timboni ta Jehova ti gonzisa lisine.” I wa fanele ku cica maalakanyo a tlhela a ti sola.

Hinawu hi nga tshuka hiva ka xiyimo xi lavako lezaku hi cica maalakanyo ya hina ni mahanyela ya hina. Ngha hi ti yimisela ku maha lezo kasi hi amukeleka mahlweni ka Jehova — Tis. 34:8.