I wa “yi tiva a ndlela”

GUY HOLLIS PIERCE, xiro xa Hubye yi Fumako ya Timboni ta Jehova, i mbhetile a pfhumba gakwe ga laha misaveni hi Wazibili wa 18 ka Março wa 2014. I wa hi ni 79 wa malembe a xikhati lexi a kutsumba kakwe ka kuva makabye wa Kristu a vuxilweko hi ka vafileko ku nga tatiseka. — Maheb. 2:10-12; 1 Ped. 3:18.

Guy Pierce i pswalilwe le Auburn, California, Estados Unidos, hi 6 ka Novembro wa 1934, a bapatizwa hi 1955. I lo chada ni sati wakwe wo ranzeka, Penny, hi 1977 a sangula ku wundla ngango. A ku wundla ngango zi mu mahile ava ni matshamela ya ma nene ya raru. Hi 1982, yena na Penny va wa hi maphayona, niku hi 1986 i lo sangula ntiro wakwe wa 11 wa malembe kota muwoneleli wa xipanze le Estados Unidos.

Hi 1997, Guy na Penny Pierce va lo sangula ku tira kota ziro za ngango wa Beteli le Estados Unidos. Makabye Pierce i lo tira ka Xipanze xa Ntiro, niku hi 1998 i lo kuma xiavelo xa kuva muvuneteli va Kometi ya Vatiri ya Hubye yi Fumako. Hi 2 ka Outubro wa 1999, ka mutlhangano wa lembe wa Torre de Vigia de Bíblias e Tratados de Pensilvânia, ku lo tivisiwa lezaku makabye Pierce i yimisilwe kota xiro xa Hubye yi Fumako. Ka malembe yo gumesa, i lo tira ka Kometi ya Vatiri, ya Kutsala, ya Kuhumesa mabhuku, ni ya Vawoneleli.

A vanhu va midawuko yo hambanahambana va wa mu ranza Makabye Pierce hi kota ya kunwayitela kakwe ni kuhlekisela. Hambulezo, a matshamela ma nga mu maha a ranziwa nguvu hi vanwani liranzo lakwe, kutikoramisa, xichawo xakwe hi milayo ni matshinya ya milayo yo lulama, ni kukholwa kakwe ko mbhelela ka Jehova. Ka Guy Pierce, zi wa zwala ku wula lezaku a gambo gi nga tshuka gi nga tsuwuki ku hunza ku wula lezaku a zitsumbiso za Jehova zi nga ta tatiseka, niku i wa lava ku bhulela tiko gontlhe a lisine lelo.

Makabye Pierce i wa tshama a khomekile hi ntiro wa Jehova, laha a nga vuka ni mixo nguvu a tlhela a kutala ka zikhati a tira kala phinzulani. A tipfhumba takwe ta ku kuca vamakabye vakwe va maKristu ti mu mahile a fambafamba misaveni yontlhe, niku i wa nga tshuki a khomeka nguvu laha ko kala a nga kumi ni xikhati xa ku bhula ni xiro xinwe ni xinwani xa ngango wa Beteli zinwe ni vamakabye vanwani lava va nga lava ku bhula naye, ku nyikwa wusungukati, ni ku vuniwa. Hambu anzhako ka malembe yo tala, a makholwa-kulobye ma ha alakanya a kuhana kakwe, xinghana, ni magezu ya Mitsalo yo tiyisa hlana.

A makabye wa hina tlhelo munghana wo ranzeka i siyile sati ni ntlhanu wa vana ni munwe, ni vazukulu zinwe ni vazukulu xinguwo. A ku hunza lezo, i wa hi ni vana vo tala va moya. Mark Sanderson, a nga xiro xa Hubye yi Fumako, i lo veka kanelo ya xirilo xa makabye Pierce hi Mulongiso wa 22 ka Março wa 2014. I lo wulawula hi kutsumba ka le tilweni ka makabye Pierce a tlhela a gonza magezu ya Jesu yaku: “Le ndlwini ya Dadani gi kona wutshamu ginyingi; . . . Hambu loku nzi famba nzi ya mu longisela wutshamu, nzi ta wuya kambe, nzi ta mu teka muta ka mina, kasi laha nzi nga kona, mu fela kuva kona na nwinawu. Ni lomo nzi yako kona, ma yi tiva a ndlela.” — Joh. 14:2-4.

Lisine lezaku hi ta mu xuva nguvu makabye Pierce. Hambulezo ha tsaka hi ku tiva lezaku i wa “yi tiva a ndlela” ya kuya mutini wakwe wa pinzukelwa.