Jehova wa katekisa nguvu a moya wa kuziranza

A MUVANGI wa hina i hi nyikile xinyikiwo xa lisima nguvu xa ku tlhatlheka ku ti hlawulela. Ahandle ka lezo, wa katekisa lava va tirisako kutlhatlheka kabye ka ku ti hlawulela kasi ku vuvumisa wukhozeli ga lisine ni ku maha xipanze xabye kasi ku basisa a vito gakwe go basa va tlhela va seketela kungo gakwe ga hombe. Jehova a nga lavi lezaku hi mu ingisa hi ku chava kutani hi ku kurumetwa. Kanilezi, i nyika nguvu lisima a kuingisa ka ku zi ranza loku ku vuxiwako hi liranzo la lisine ni ku bonga ka hombe.

Hi xikombiso, a xikhati lexi a vaIsraeli va nga hi xiwuleni xa Sinai, Jehova i lo va ruma ku aka wutshamu ga ku khozela kona. I te ngalo: “Humesani xikari ka nwina a hlengo ka Jehova. Munhu ni munhu loyi a ranzako hi mbilu yakwe, a neha ka Jehova a hlengo wakwe: a nzalama ni siliva ni suku.” (Ekso. 35:5) A muIsraeli munwe ni munwani i wa zi kota ku nyikela ni xihi a xi kotako. Ni wihi munyikelo wa kuziranza — na ku khataliseki lezaku xini kutani xa ntsengo muni — xi wa ta tirisiwa laha ku fanelako kasi ku tatisa a kungo ga Nungungulu. Va hlamulisile kuyini?

“Lava va vuxilweko timbilwini tabye” ni “vontlhe lava va zi ranzako” va lo maha minyikelo yabye ya kuziranza, kota lezi a “timbilu tabye” ti nga va kuca ku maha. Munhu ni munhu, kani wanuna kani wasati, i lo neha ni wihi nchumu ntirweni wa Jehova: a zingwavila, masinza, tiphera, nzalama, siliva, suku, tinguwo ta wukuxe, to zirila, to pswhuka, wukene go saseka, mawoya ya timbuti, mabhebhe ya tihamba ma totilweko tinta yo pswhuka, mabhebhe ya macalo, tisinya ta munga, maribye ya onikisi, mipepo, ni mafura. Hi magumo, ‘a zilo zo maha mitiro yontlhe zi lo enela zi tlhela zi sala.’ — Ekso. 35:21-24, 27-29; 36:7.

Lexi xi nga mu tsakisa nguvu Jehova a hi minyikelo ya kona, kanilezi i moya wa kuziranza lowu wu nga kombiswa hi lava va nga maha lezo kasi ku seketela a wukhozeli gi basileko. Va tlhelile va kuceka ku tirisa xikhati xabye ni ntamu. A matimu ya kona ma wula lezi: A “vavasati lava va tlharihileko kulukeni va lo luka hi mandla yabye.” Kunene, “vontlhe vavasati lava va vuxilweko lomu timbilwini tabye va lo luka a woya ga timbuti.” A ku hunza lezo, Jehova i lo nyika Bezaleli a “wutlhari, ni kupima, ni ku tiva ku maha mitiro yontlhe.” Kunene, Nungungulu i lo nyika Bezaleli na Oholiaba a wutlhari gi nga laveka kasi ku maha a ntiro wontlhe lowu va nga nyikilwe. — Ekso. 35:25, 26, 30-35.

A xikhati lexi Jehova a nga ramba vaIsraeli lezaku va maha munyikelo, i wa tsumba hi kumbhelela lezaku “vontlhe lava va zi ranzako hi timbilu tabye” va wa ta seketela a wukhozeli ga lisine. Kota wuyelo ga kona, i lo katekisa vanhu lavo va moya wa kuziranza hi wurangeli ni litsako la hombe. Hi ndlela leyo, Jehova i lo kombisa lezaku loku a katekisa a moya wa kuziranza wa malanza yakwe, a ku na ku kiyela nchumu ge hambu wutlhari ga ku maha kuranza kakwe. (Tis. 34:9) Loku u tirela Jehova hi mbilu yontlhe, handle ko kanakana i ta katekisa a moya wa wena wa kuziranza.

LEZI A VOKARI VA MAHISAKO ZONA A MINYIKELO YO SEKETELA A NTIRO WA MISAVA YONTLHE

Khwatsi hi lezi zi nga maheka masikwini ya mupostoli Paule, a votala nyamutlha ‘va ti vekela’ mali yo kari, zonake va yi chela makaxeni ya minyikelo ya bandla ma tsalilweko ku “Ntiro wa Misava Yontlhe” (“Obra Mundial”). (1 Kor. 16:2) Hweti ni hweti, a mabandla ma rumela a minyikelo leyi ka hofisa ya ravi ya Timboni ta Jehova leyi yi wonelelako a tiko gabye. Za koteka kambe a ku u rumela munyikelo hi kukongoma ka vito ga nayo legi gi tirisiwako hi Timboni ta Jehova tikweni ga wena. Kasi u tiva a vito ga nayo legi gi tirisiwako hi Timboni ta Jehova tikweni ga wena, wulawula ni hofisa ya ravi ya tiko ga wena. A khero ga hofisa ya ravi gi kumeka ka www.jw.org. A tixaka ta minyikelo leyi u nga yi rumelako hi kukongoma hi leti ti lanzelako:

MINYIKELO YO KONGOMA:

Mali, tiphera, mawachi, makordawu (ni zinwani zilo) zo mahiwa hi nzalama, siliva kutani yinwani simbi yo hlawuleka.
Rumela zilo lezi ni papilo gi kombako lezaku a mali leyo kutani zilo lezo munyikelo wo kongoma.

MUNYIKELO WAKU LOKU U WU LAVA VA KU TLHELISELA — MABANDLA NTSENA

Minyikelo ya mali yaku loku a nwinyi wa kona a yi lava a yi kuma.
A kuranga bhulisana ni hofisa ya ravi ya tiko ga nwina kasi u tiva lezi a lulamiselo legi gi tirisako zona lomu tikweni ga nwina.

MINYIKELO YI MAHELWEKO MAKUNGO

Ahandle ka mali ni zilo zinwani za lisima lezi munhu a nga ha zi nyikelako, ku na ni tindlela tinwani ta ku maha minyikelo kasi ku seketela a ntiro wa Mufumo misaveni yontlhe. A manyikelela lawo ma xaxametilwe laha hasi. Kani u lava ku tirisa a mahela muni, a kuranga bhulisana ni hofisa ya ravi ya tiko ga nwina kasi u tiva lezi a lulamiselo legi gi tirisako zona tikweni ga nwina. Kota lezi a milayo ya mahakhelela ya zilo ni mikhupo yi hambanako ka tiko ni tiko, za lisima a ku ranga hi ku wutisa lava va gonzileko a milayo ya mahakhelela ya zilo ni makhupela, na u nga se hlawula a manyikelela lawa ma nga ya chukwana.

Maseguro: Wa zi kota ku tsalisa Associação das Testemunhas de Jeová de Moçambique kota yona yi to kuma mali ya xivumelwano lexi u xi mahileko ni koponi yo kari ya maseguro, kutani kuva yona yi to kuma mali ya wena ya peceni.

Tikonta ta banko: U nga tsalisa a vito gi tiriswako hi Timboni ta Jehova kota legi gi to sala ni tikonta ta wena ta banko, matalawu ya dipozito, kutani konta ya banko leyi munhu a salako nayo loku a nwinyi wa kona afa, ni mali ya peceni. Ngha zi mahiwa hi kuvumelelana ni milayo ya banko ya tiko ga nwina.

Tshomba: U nga nyikela a tshomba ya wena ka vito ga nayo gi tiriswako hi Timboni ta Jehova kota munyikelo wo kongoma. Loku yi hi yindlu kutani muti, u nga simama ku hanya ka wona zonake wu sala wu lumba a hlengeletano loku ufa.

Phepha ga nayo ga maavelela ya tshomba (testamento): U nga ha sayina phepha ga nayo gi tlhamuselako lezaku a mali, tshomba, kutani zilo zinwani za wena zi ta sala zi lumba Associação das Testemunhas de Jeová de Moçambique loku ufa.

Kasi ku kuma manwani mahungu, wulawula ni Associação das Testemunhas de Jeová de Moçambique, ku ngava hi papilo kutani telefone, hi ku tirisa a khero legi gi nga laha hasi, kutani ku wulawula ni hofisa ya ravi yi wonelelako a ntiro tikweni ga nwina.