Zviwutiso zva vagondzi

A cikhati leci Sathani a nga byela Evha lezvaku i wa nga tafa loku aga sinya ya ku tiva kusaseka ni kubiha, i wo mu byela lezvaku a muhefemulo wakwe wu wa nga tafa ke — ku nga lezvi a vanhu vo tala va zvi kholwako nyamutlha?

Ko khwatsi a zvi tshamisangi lezvo. Sathani a nga byelangi Evha lezvaku loku aga sinya leyi Nungungulu a nga yi betela, a miri wakwe wu wa tafa kanilezvi a moya wakwe wu ta simama ku hanya ka gin’wani wutshamu. Na a wulawula hi ku tirisa nyoka, Sathani i byelile Evha lezvaku loku aga handzu wa sinya leyi Nungungulu a nga yi betela, i wa “nga tafa futsi”. Sathani i wo wula lezvaku Evha i wa ta simama a hanya a wutomi go tsakisa laha misaveni na a nga fumelwi hi Nungungulu. — Gen. 2:17; 3:3-5.

Loku ku hi lezvaku a gondzo ya ku a muhefemulo a wufi a yi sangulelangi le Edheni, yi sangulile rini? A hi zvi tive khwatsi. Leci hi ci tivako ku a wukhongeli gontlhe ga mawunwa gi wa lovisilwe cikhatini ca Ndambi ya masikwini ya Nowa. Kota lezvi ku nga pona vakhozeli va lisine basi, Nowa ni ngango wakwe, ku wa nga ha hi na gondzo ya mawunwa.

Hikwalaho a gondzo ya lezvaku a muhefemulo a wufi yi fanele ku ngha yi sangulile andzhako ka Ndambi. A cikhati leci Nungungulu a nga pfilunganyisa a tirimi ta vanhu le Bhabheli, a vanhu va hangalaka “misaveni yontlhe”, a zvi kanakanisi lezvaku va wa hi nawo a maalakanyo lawo yaku a muhefemulo a wufi. (Gen. 11:8, 9) Kani a gondzo leyi yi sangulile rini, hi nga tiyiseka lezvaku Sathani, a “papayi wa mawunwa”, hi yena a nga yi sangula niku i wa zvi lava nguvhu a ku yi hangalaka misaveni yontlhe. — Joh. 8:44.