Wuhluwuki lomu ku tshamako zivangwa za moya

Vontlhe vanhu va moya lava Jehova a va vangileko va wa hi va nene. Makunu a ngelosi yo kari yi lo maha yo biha. Hi Satani Diyabu. Satani i wa lava lezaku a vanhu va laha misaveni va khozela yena wutshanwini ga Jehova. Zonake ku lo maheka lezi:

Le sinwini ga Edeni, ku wa hi ni tisinya tinyingi ti nga kari ti pswala mihanzu yo nanziha. Jehova i lo byela Adamu ni sati wakwe, Eva, lezaku va wa zi kota ku yiga na va nga chavi nchumu. Kanilezi ku wa hi ni sinya yinwe leyi Nungungulu a nga te ngalo va nga yigi. Yena i te ngalo loku va yiga, futsi va wa tafa. — Genesisi 2:9, 16, 17.

Ginwani siku a nyoka yo kari yi lo wulawula na Eva na a hi yece. Hi lisine, a hi yona nyoka yi nga wulawula; hi Satani Diyabu loyi a yi mahileko yi ku khwatsi yo wulawula. Satani i lo byela Eva lezaku loku yena aga a hanzu lowo wo beletelwa, i wa ta tlhariha a ku fana na Nungungulu. Yena kambe i lo mu byela lezaku i wa nga tafa. Wontlhe magezu lawo ma wa hi mawunwa. Hambulezo, Eva i lo kholwa Satani zonake aga a hanzu. Loku ku hunzile xikhati, Eva i lo nyikawu Adamu, na yena i loga. — Genesisi 3:1-6.

Hi ka mahungu lawo ya lisine, hi gonza lezaku Satani muhluwuki ni muhembi. Yena i lo byela Eva lezaku i wa nga tafa loku a nga ingisi Nungungulu. Lezo zi wa hi mawunwa. Yena hakunene i file, Adamu na yenawu. Satani a nga fangi xikhatini lexo, hambulezi hi magumo a tofa hi kota ya kuonha kakwe. Kanilezi yena wa ha hanya ka xikhati lexi niku wa ha simama ku khohlisa vanhu. Wa ha hi muhembi, niku i zama ku maha lezaku a vanhu va tshova milayo ya Nungungulu. — Johani 8:44.

Tingelosi tinwani ti hluwuka

Loku ku hunzile xikhati, tingelosi tinwani ti lo maha to biha. A tingelosi leto ti lo wona vavasati vo saseka misaveni zonake ti lava ku hlengela masango na vona. Hikwalaho ti lota misaveni ti ta ambala a mimiri ya vavanuna. Zonake ti lo ti tekela vavasati lavo. Lezo zi wa nga yelani ni khungo ga Nungungulu. — Genesisi 6:1, 2; Juda 6.

Lezo kambe zi lo vangela vanhu a zikarato zo tala. A vasati va tingelosi leto va lo pswala vana, kanilezi va wa nga hi vanana vo toloveleka. Va lo kula va maha zihotlovila za timholova ni tihanyi. Hi magumo a misava yi lo tala hi tihanyi laha ko kala Jehova a funga ku lovisa a vanhu vo biha hi ntalo wa hombe. A vanhu vo lulama lava va ponileko ka Ntalo lowo ku wa hi Noa ni ngango wakwe ntsena. — Genesisi 6:4, 11; 7:23.

Hambulezo, a tingelosi to biha ti tlhelele lomu ku tshamako zivangwa za moya; a ti fangi. Kanilezi ti tsayisilwe. A ta ha vumelelwangi ku tlhelela ngangweni wa tingelosi to lulama ta Nungungulu. A ku hunza lezo, Jehova a nga ha ti vumelelangi ku ambala mimiri ya vanhu. Niku hi magumo ti tafa le kulamulweni ka hombe. — 2 Pedro 2:4; Juda 6.

Satani a hlongoliwa tilweni

Kusanguleni ka zana ga malembe ga wu 20, kuve ni yimpi le tilweni. A bhuku ga Biblia ga Kuvululelwa gi hlawutela lezi zi mahekileko: “Ku wa hi kona kulwa le tilweni; Mikaeli [Jesu Kristu na a vuxilwe hi ka vafileko] ni tingelosi takwe [ta ti nene] va yalwa na drako [Satani], na drako alwa na hi ni tingelosi takwe [to biha]; kanilezi ti lo hluliwa, a ta ha kumangi wutshamu le tilweni. Zonake drako loyi wa hombe, a nga nyoka leyi ya kale, yi tibyako Muhlevi na Satani, a mukhohlisi wa tiko gontlhe, yena i lo hoxwa lahasi misaveni, ni tingelosi takwe [to biha] ti lo hoxwa zinwe naye.”

Give gihi a bhinzu ga kona? A tlhatlhambuto wa simama: “Hikwalaho, tsakani nwina matilo, na nwina lava mu tshamako ka wona.” A tingelosi ta ti nene ti wa zi kota ku tsaka hakuva Satani ni tingelosi, kutani mimoya, yo biha va wa nga ha hi kona tilweni. Kanilezi ku nga wuliwa yini hi vanhu va nga misaveni? A Biblia gi ngalo: “Kanilezi nwina misava ni bimbi mu na ni khombo, hakuva Satani i relele ka nwina, na a zangarile nguvu, hakuva wa zi tiva lezaku a xikhati lexi xi mu saleleko xi tsongwani.” — Kuvululelwa 12:7-9, 12.

Ina, Satani ni vanghana vakwe vo biha va khohlisa ni ku vangela vanhu a makhombo ya hombe misaveni. A tingelosi leto to biha ti vitwa lezaku madimoni. Valala va Nungungulu. Tontlhe ti bihile.