Zikhumbuxeto za Gotsovanyano wa Muganga wa 2014

◼ Zikhati za mutlhangano: A tivati ti ta vululiwa hi 7:00. A wucenje ga kusangula ka mutlhangano gi ta sangula hi 8:20 ka masiku wontlhe ya manharu. Ka xikhati lexo, hontlheni hi fanele ku tshama kasi a mutlhangano wu sangula hi ndlela yi nene. Hi Wazihlanu ni Mulongiso, a lisimu ni mukhongelo wo gumesa zi ta sangula hi 15:55. Hi Sonto zi ta sangula hi 14:50.

◼ Migotsovanyano ya matiko manyingi: Ka matshamu yo kari ku ta mahiwa migotsovanyano ya matiko manyingi. Tiva lezaku a hofisa ya ravi yi rambile a ntsengo wo kari wa mabandla ni vatsombani va matiko manwani anzhako ko tiva ntsengo wa zitshamu, wutshamu go veka mimova, ni tikwarutu ta ti hotela ti nga kona. Ku ngava ni kutlimbana loku a vahuweleli vaya ka gotsovanyano wo kari wa matiko manyingi na va nga rambiwangi. Loku a xiyimo xa wena xi kurumeta lezaku u wona gotsovanyano wunwani wo hambana ni lowu u avelweko wona, u nga hlawuli a gotsovanyano wa matiko manyingi kota wo valeta lowo.

◼ Wutshamu go veka mimova: Ka matshamu wontlhe ya gotsovanyano lawa hi nga ni wutshamu go veka mimova, ku nga ta hakhelwa nchumu. A mimova, mimota, kutani mibhasikeni, yi ta vekiwa hi xaxameto hi kuya hi loyi a rangako a chikela. Kota lezi a wutshamu gi nga gi tsongwani, zi wa tava chukwana a ku a vanhu va hlengela a mova wunwe hi laha zi kotekako ha kona.

◼ Ku vekisa wutshamu: Laha a tivati ti vululwako ka mixo ni mixo, maha wuxinji u nga hatliseli wutshamu legi u gi lavako a ku khwatsi wo palisana ni vatsombani-kuloni. A moya wa kutikarata lo’wu hi kucako a ku hlota kutshamiseka ka vanwani wu hi tivekisa kota maKristu ya lisine wu tlhela wu kuca vahlaleli lezaku va dumisa Nungungulu. (Joh. 13:34, 35; 1 Kor. 13:4, 5; 1 Ped. 2:12) A wutshamu gi nga ha vekelwa a vanhu lava u fambako navo moveni wunwe kutani lava u tshamako navo muti munwe zinwe ni lava u gonzako navo Biblia. A wutshamu ga ku hlawuleka gi vekelwa a vakhosaheleko ni vababyako. Kota lezi a wutshamu legi gi nga gi tsongwani, munhu munwe ntsena kutani vambiri va nga tshamako ni a khosaheleko kutani mubabyi kasi ku mu vuna hi zo kari.

◼ Zifihlulo: Tanani ni za ku khomisa nyoka hi kaya kasi mu nga suki wutshanwini ga gotsovanyano mu ya xava kutani ku ya teka zakuga hi xikhati xa kuhumula. Mu nga tirisa minzhava yi tsongwani yo hlayisa zilo na zi titimela leyi yi enelako lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo hi kuziranza ka ntiro wa misava yontlhe laha gotsovanyanweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Mimuri: Loku ku hi ni muri wo kari u nwako, u nga wu siyi hakuva wu nga tava kona laha ka gotsovanyano.

◼ Kuvikela timhango: Maha wuxinji u ti wonela nguvu ka timhango ta ku tshuka u retemuka uwa. A lembe ni lembe ka bikiwa a timhango ti mahekako hi kota ya zilato, nguvunguvu lezi za zirenze xo leha. I chukwana a ku boha zilato zo toloveleka zi ku tshamako khwatsi lezi zi to ku vumelela a ku famba khwatsi.

◼ Maformulario Queira Visitar (S-43-T): Ku fanele ku tiriswa a maformulario Queira Visitar (S-43-T) kasi ku nyika mahungu xungetano hi munhu wihi ni wihi a kombisako kutsakela kota wuyelo ga kuxumayela ka hina hi xitshuketi hi xikhati xa gotsovanyano. A maformulario lawa ma tatisilweko ma fanele ku yiswa ka Xipanze xa Mabhuku kutani ka matsalani wa bandla ga wena loku mu wuyile hi mutlhanganweni.

◼ Marestaurante: Ngha u nyika a wudzunzo a vito ga Jehova hi matshamela ya wena ya ma nene lomu restaurante. Ambala hi ndlela ya wuKristu. Nyikela a mali ya kubonga loku zi tolovelekile.

◼ Malulamiselo ya wutshamu go etlela: A Xipanze xa ku Rurela Vapfhumba xi sangula ku tira na gotsovanyano wa ha hi kule kasi ku maha malulamiselo ya ku rurela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu. Hambulezo, kota lezi hi lavako ku a “zilo zontlhe zi mahiwa hi fanelo ni nayo,” ni lezi ku patsekako a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mitini ya vamakabye va fanele ku xalaliswa hi lezi va nyikwako va tlhela va maha lezi va kombeliwako. Alakanya a ku siya yindlu na yi basile siku ni siku legi u yako gotsovanyanweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, a munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a rurela vapfhumba hi kuziranza, na ku ngahi hi kukurumetwa. Hi kufanana, lava va ta nga etlela laha wutshanwini ga gotsovanyano, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.

◼ Ntiro wa kuziranza: Ni wihi loyi a xuvako ku maha ntiro lowo i fanele ku bikela a Xipanze xa Vatiri va Kuziranza laha gotsovanyanweni. A vanana va nga chikeliko ka 16 wa malembe vonawu va nga nyikela xivuno xo saseka hi ku tira na va wonelelwa hi vapswali kutani munhu munwani wa hombe a vumelelweko hi munwe wa vona.

◼ Kubapatizwa: Lava va yako kubapatizweni va fanele ku tshama wutshanwini legi gi vekelweko vona na wu nga se sangula a longoloko wa Mulongiso ni mixo. Vontlhe lava va yako kubapatizweni va fanele ku famba ni thawula ni tinguwo to hlamba hi tona ti kombisako xichawo. Ka zikhati zi hunzileko a vokari va bohile a tinguwo ti nga faneliko, leti ti nga onha a wudzunzo ga ximaho lexo. A madota lawa ma kambisisako a ziwutiso zi nga ka bhuku Organizados ni lava va yako kubapatizweni ma fanele ku tiyiseka lezaku a munwe ni munwani wabye wa ti zwisisa a timhaka leti zinwe ni matshinya ya milayo ya Biblia lawa ma fambelanako nato.