EKSODA

1 Hi lawa mavito ya vana va Israyele lava nga famba na Yakobe aGibita. Mavito lawa i ya wanuna mun’wani ni mun’wani lweyi a nga ta ni ndjangu wa yena:+ 2 Rubeni, Simiyoni, Levhi na Yuda;+ 3 Isakara, Zebuloni na Benjamini; 4 Dani na Naftali; Gadi na Aseri.+ 5 Vana ni vatukulu hinkwavu va Yakobe a va li 70, kambe Yosefa se a a li Gibita.+ 6 Se Yosefa ni vamakwavu hinkwavu va game va fa,+ ku patsa ni vanhu hinkwavu lava nga hanya ka nkama wa yena. 7 Vayisrayele va sungule ku tala, va ya va yengeteleka ni ku va ni matimba hi ku hantlisa, lakakuva va za va tata tiko hinkwalu.+

8 Hi ku famba ka nkama, tiko la Gibita li ve ni hosi ya nyuwani, leyi a yi nga mu tivi Yosefa. 9 Se yi byela vanhu va yona yi ku: “Vonani! Vayisrayele lava i vanyingi hintamu, naswona se va ni matimba ku hi tlula.+ 10 A hi va tlhariheleni, hikusa loko hi nga yendli leswo va ta tama va tala, se loko ko tshuka ku pfuka nyimpi, va ta tipatsa ni valala va hina va lwa na hina naswona va ta baleka ka tiko leli.”

11 Kutani va va vekela varhangeli va swikarawa swaku va va dlisa mbitsi hi ku va nyika mintirho ya ku tika swinene.+ Va tlhele va yakisa Vayisrayele doropa la Pitomi ni la Ramisesi,+ lomu Faru a a veka swilo swa yena kona. 12 Kambe nkama a va ya va va dlisa mbitsi, Vayisrayele+ a va ya va tala ngopfu atikweni, lakakuva Vagibita va za va va chava hintamu. 13 Kutani Vagibita va sindzise Vayisrayele swaku va yendla mintirho ya ku tika va tlhela va va yendla swikarawa.+ 14 Va va tikisele wutomi hi ku va nyika mintirho ya ku tika, va va sindzisa ku pfuva vumba va yaka hi lona, va ba switini* ni ku yendla mintirho ya yinyingi ya le masin’wini. Phela a va va tikisela wutomi ni ku va tirhisa mintirho hinkwayu ya wukarawa.+

15 Hi ku famba ka nkama, hosi ya Gibita yi vulavule na Xifra na Puwa. Vavasati lava a va li Vaheberu naswona a va pfuna* vavasati van’wani loko va psala.* 16 Yi va byele leswi: “Loko mi pfuna wansati wa Muheberu swaku a psala,+ txuvukani swaku a n’wana i wa wa yini; loko a li djaha dlayani, kambe mu tshikeni a hanya loko a li ntombhi.” 17 Leswi vavasati lava a va chava Xikwembu xa ntiyiso, a va zanga va swi yendlile leswi hosi ya Gibita yi nga va byela swona. Va yo vhela va tshika vana va madjaha va hanya.+ 18 Hi ku famba ka nkama, hosi ya Gibita yi vitane vavasati lava a va pfuna vavasati van’wani loko va psala, yi gama yi va vutisa yi ku: “Hi mhaka muni mi tshike vana va madjaha va hanya ke?” 19 Se vavasati lava va hlamula Faru va ku: “Vavasati va Vaheberu a va fani ni vavasati va Vagibita. Va ni matimba naswona loko ku fika lweyi a nga ta va psalisa, a kuma swaku se va psalile.”

20 Hi mhaka leyo Xikwembu xi va katekisile vavasati lava a va pfuna vavasati van’wani loko va psala, naswona vanhu va ye va tala va tlhela va va ni matimba hintamu. 21 Phela leswi vavasati lava a va chava Xikwembu xa ntiyiso, hi ku famba ka nkama xi va nyike mindjangu. 22 Hi wugamu Faru a byele vanhu hinkwavu a ku: “Vana va madjaha lava nga ta psaliwa hi Vaheberu mi fanele mi va txukumeta ka Nambu wa Nilu, kambe mi nga dlayeni vana va tintombhi.”+

2 Hi ku famba ka nkama, wanuna mun’wani wa lixaka la Levhi a chade ni n’wana wa Levhi.+ 2 Kutani wansati lweyi a kuma nyimba, a gama a psala* n’wana wa djaha. Nkama a nga vona swaku phela a a saseke hintamu, a mu tumbete tiwheti tinharhu.+ 3 Loko a vona swaku a a nga ha swi koti ku mu tumbeta,+ a mu tekile a mu peta ka ndzhava lowu a wu hambiwa hi tihlanga ta papiru a gama a wu tota hi alikatrawu. Se a teke ndzhava wolowo a ya wu veka xikarhi ka tihlanga leti a ti li kusuhi ni Nambu wa Nilu. 4 Kutani makwavu wa yena wa xisati+ a a nyime hi le kulenyana a ta vona swaku a ku ta yendleka yini hi makwavu wa yena.

5 Nkama n’wana wa xisati wa Faru a a ya ku hlambheni ka Nambu wa Nilu, vatirhi va yena va xisati a va famba hi lomu matlhelweni ka Nilu. Se a vona ndzhava xikarhi ka tihlanga. A gama a rhuma vatirhi va yena va xisati swaku va ya mu tekela wona hi ku hantlisa.+ 6 Nkama a nga wu pfula, a vone n’wana wa mufana na a rila. Se a mu tsetsa, kambe a ku: “Lweyi i mun’wani wa vana va Vaheberu.” 7 Kutani makwavu wa n’wana lweyi, a byela n’wana wa Faru a ku: “Ni nga ya ni ya ku lavela wansati wa Muheberu swaku a ta ku yan’wisela yena ke?” 8 N’wana wa Faru a mu hlamula a ku: “Famba!” Se ntombhi leyi, yi yo vhela yi famba yi ya vitana mamani wa n’wana.+ 9 Kutani n’wana wa Faru a ku: “Teka n’wana lweyi u ya ni yan’wisela yena, ni ta ku hakela.” Kutani wansati lweyi a teka n’wana a ya mu hlayisa. 10 Nkama n’wana a nga kula, a mu yise ka n’wana wa Faru. Kutani n’wana lweyi, a game a va n’wana wa yena.+ A mu chule swaku i Moxe,* a gama a ku: “Hi mhaka ya leswi ni nga mu humesa ka mati.”+

11 Nkama Moxe a nga kula, a fambe a ya vona mintirho ya ku tika leyi a yi yendliwa hi vamakwavu.+ A vone Mugibita na a ba Muheberu, lweyi a a li mun’wani wa vamakwavu. 12 Kutani a txuvuka matlhelweni a nga voni munhu, se a dlaya Mugibita a mu txelela* hansi ka misava.+

13 A tlhele a huma hi mundzuku ka kona naswona a ku ni vavanuna vambirhi va Vaheberu lava a va li ku lweni. Se a vutisa lweyi a a ni nandzu a ku: “U mu bela yini makwenu?”+ 14 A mu hlamula a ku: “I mani a nga ku veka swaku u va hosi ni muthethisi wa hina? Se leswi u lava ku ni dlaya ku fana ni Mugibita lweyi u nga mu dlaya ke?”+ Moxe a sungula ku chava, a ku: “Impela leswi ni nga swi yendla swi tsumbuliwile!”

15 Faru a gama a yi tiva mhaka leyi, kutani a zama ku dlaya Moxe; kambe Moxe a baleka a ya tshama ka tiko la Midiyani,+ lomu a nga fika a tshama lani a ku ni xihlovo. 16 Muprista wa lixaka la Vamidiyani+ a a ni 7 wa vana va tintombhi. Vana lava va fambe va ya kha mati va tlhela va tata lomu mintlhambi a yi ta phuza kona mati, leswaku va phuzisa mati mintlhambi ya papayi wa vona. 17 Kambe valusi va fike va va hlongola, hikusa a va tolovela ku yendla swoleswo. Se Moxe a sekeleka swaku a va pfuna,* kutani a nyika mati ntlhambi wa vona. 18 Nkama va nga fika kaya ka papayi wa vona Reweli,*+ a va vutise hi ku hlamala a ku: “Ku yo yendleka yini swaku mi za mi hantla mi vuya namuntlha?” 19 Va mu hlamula va ku: “Mugibita+ mun’wani a hi lamulelile ka valusi naswona a tlhele a hi khela mati a phuzisa ntlhambi wa hina.” 20 Se a vutisa vana va yena a ku: “A kwini? Mi mu siyele yini? Fambani mi ya mu vita swaku a ta dla na hina.” 21 Moxe a game a pfumela ku tshama ni wanuna lweyi. Wanuna lweyi a game a teka n’wana wa yena Zipora+ a mu nyika Moxe swaku a va nsati wa yena. 22 Hi ku famba ka nkama, Moxe a ve ni n’wana wa djaha, a gama a mu chula swaku i Jerixomu*+ hikusa a te: “Ni tshame ka tiko la ku kala li nga li la mina.”+

23 Loko se ku hundze nkama wa ku leha,* hosi ya Gibita yi fa,+ kambe Vayisrayele a va tama va rila hi mhaka ya wukarawa. A va rila wusiku ni nhlikanhi naswona va tame va kombela Xikwembu xa ntiyiso+ swaku xi va pfuna. 24 Hi ku famba ka nkama, Xikwembu xi twa ku rila ka vona+ xi tlhela xi khumbuka ntwananu lowu xi nga wu yendla na Abrahamu, Izaki na Yakobe.+ 25 Se Xikwembu xi txuvuka Vayisrayele; kutani xi vona ku hlupheka ka vona.

3 Moxe a game a va mulusi wa ntlhambi wa Yetro+ papayi wa nsati wa yena, lweyi a a li muprista wa Midiyani. Nkama na a lusa ntlhambi amananga ka tlhelo la wupeladlambu, a game a fika ka ntshava ya Xikwembu xa ntiyiso, aHorebi.+ 2 Kutani ntsumi ya Yehovha yi humelela ka Moxe na yi li ka ndzilu axikarhi ka xinsinyani xa mintwa.+ Nkama a nga txuvuka, a vone xinsinyani xa mintwa na xi pfurha kambe a xi nga pshi. 3 Se Moxe a ku: “Leswi ni swi vonaka i masingita, na ha famba ni ya vona swaku hi mhaka muni xinsinyani xa mintwa xi nga pshi.” 4 Nkama Yehovha a nga vona swaku a tshinelile swaku a ta xi vona, a mu vitanile na a li ka xinsinyani xa mintwa a ku: “Moxe! Moxe!” Yena a ku: “Hi mina lweyi.” 5 Kutani a ku: “U nga tshineli la! Hlivila masandaliya ya wena, hikusa ndhawu leyi u nga nyima ka yona ya kwetsima.”

6 A tlhela a ku: “Hi mina Xikwembu xa papayi wa wena, Xikwembu xa Abrahamu,+ Xikwembu xa Izaki+ ni Xikwembu xa Yakobe.”+ Se Moxe a tumbeta nghohe* ya yena hikusa a a chava ku txuvuka Xikwembu xa ntiyiso. 7 Yehovha a tlhela a ku: “Ni ku vonile ku hlupheka ka vanhu va mina lava nga Gibita ni tlhela ni twa ku rila ka vona hi mhaka ya lava va va sindzisaka ku tirha; ni ku tiva kahle ku vava loku va ku twaka.+ 8 Ni ta ya ni ya va ponisa ka Vagibita,+ ni va humesa ka tiko lolelo ni va yisa ka tiko lalinene li tlhela li va likulu, leli nga tala hi leiti ni wulombe.+ Ndhawu leyi i ya Vakanana, Vaheti, Vaamori, Vaperezi, Vahivhi ni Vayebusi.+ 9 Phela ni swi twile leswi Vayisrayele va rilisaka swona ni tlhela ni vona swaku Vagibita va va dlisa khayikhayi.+ 10 Kutani tani, ni ta ku rhuma swaku u ya ka Faru u ya humesa vanhu va mina aGibita,+ ku nga Vayisrayele.”

11 Se Moxe a byela Xikwembu xa ntiyiso a ku: “No va mani mina swaku ni za ni ya ka Faru ni ya humesa Vayisrayele aGibita?” 12 Kutani Xikwembu xi ku: “Ni ta va na wena,+ naswona hi lexi xikombiso xa leswaku hi mina ni nga ku rhuma: Loko se u humesile vanhu va mina Gibita, mi ta tirhela* Xikwembu xa ntiyiso ka ntshava leyi.”+

13 Kambe Moxe a byela Xikwembu xa ntiyiso a ku: “A hi nge ni ya ka Vayisrayele ni fika ni ku: ‘Ni rhumiwe ka n’wina hi Xikwembu xa vavhovho va n’wina.’ Kutani vona va ku: ‘I mani vito la xona?’+ Ni ta va byela swaku yini mina?” 14 Se Xikwembu xi byela Moxe xi ku: “Ni Ta Va Lexi Ni Langaka* Ku Va Xona.”*+ Xi tlhela xi ku: “U ta byela Vayisrayele u ku: ‘Ni Ta Va Lexi Ni Langaka Ku Va Xona a ni rhume ka n’wina.’”+ 15 Kutani Xikwembu xi tlhela xi byela Moxe xi ku:

“U ta byela Vayisrayele u ku: ‘Ni rhumiwe hi Yehovha Xikwembu xa vavhovho va n’wina, Xikwembu xa Abrahamu,+ Xikwembu xa Izaki+ ni Xikwembu xa Yakobe.’+ Lelo i vito la mina hi masiku ni masiku+ naswona vanhu hinkwavu va ta ni tivisa swoleswo. 16 Se swoswi famba u ya hlengeleta madoda ya Israyele u gama u ma byela leswi: ‘Yehovha Xikwembu xa vavhovho va n’wina a humelele ka mina, Xikwembu xa Abrahamu, Izaki na Yakobe naswona a te: “Ni mi txuvukile+ ni tlhela ni vona leswi mi yendliwaka swona Gibita. 17 Se na mi tshembisa swaku ni ta mi humesa ka tiko la Vagibita lava mi hluphaka+ ni mi yisa ka tiko la Vakanana, Vaheti, Vaamori,+ Vaperezi, Vahivhi ni Vayebusi,+ ka tiko leli nga tala hi leiti ni wulombe.”’+

18 “Phela va ta ku yingisa,+ naswona wena ni madoda ya Israyele mi ta ya ka hosi ya Gibita, se mi fanele mi yi byela leswi: ‘Yehovha Xikwembu xa Vaheberu+ a khulume na hina. Se hi kombela u hi tshika, hi yendza masiku manharhu hi ya mananga swaku hi ya yendlela Yehovha Xikwembu xa hina gandzelo.’+ 19 Kambe ni swi tiva kahle swaku hosi ya Gibita, a yi nge mi tshiki mi famba. Yi to mi tshika ntsena loko yo sindzisiwa hi voko la matimba.+ 20 Kutani ni ta za ni tirhisa voko la mina swaku ni ba tiko la Gibita hi mintirho ya mina hinkwayu ya ku hlamalisa leyi ni nga ta yi yendla, se hi kona yi nga ta mi tshika mi famba.+ 21 Ni ta yendla swaku Vagibita va va komba timpsalu vanhu lava, naswona a mi nge fambi na mi nga na nchumu.+ 22 Wansati mun’wani ni mun’wani a fanele a kombela swilo leswi nga yendliwa hi prata, hi woru ni mpahla ka vhizinyu wa yena ni ka wansati lweyi a tshamaka kaya ka yena naswona mi fanele mi swi yambexa vana va n’wina va madjaha ni va tintombhi. Phela mi ta va tekela swilo swa vona Vagibita.”+

4 Se Moxe a hlamula a ku: “A hi nge a va kholwi leswi ni nga ta va byela swona naswona va nga ni yingisi,+ va ku: ‘Yehovha a nga humelelanga ka wena.’” 2 Kutani Yehovha a mu vutisa a ku: “U khome yini?” Moxe a hlamula a ku: “Ni khome nhonga.” 3 Xikwembu xi ku: “Yi txukumeteli hansi.” Se a yi txukumetela hansi, kutani yi txintxa yi va nyoka.+ Kutani Moxe a yi baleka. 4 Yehovha a byela Moxe a ku: “Yi khomi hi ntxila.” Kutani Moxe a yi khoma, kutani yi txintxa yi va nhonga ka voko la yena. 5 Xikwembu xi gama xi ku: “Phela leswi swi ta va yendla va kholwa swaku Yehovha Xikwembu xa vavhovho va vona, Xikwembu xa Abrahamu, Xikwembu xa Izaki ni Xikwembu xa Yakobe,+ xi humelele ka wena.”+

6 Yehovha a tlhela a byela Moxe a ku: “Ni kombela u nghenisa voko la wena ndzeni ka mpahla ya wena.” Kutani Moxe a li nghenisa. Nkama a nga li humesa, voko la yena a li biwe hi mavabyi ya nhlokonho* li tlhela li basa ku fana ni gamboko!*+ 7 Kutani Xikwembu xi ku: “Tlhelisa voko la wena ndzeni ka mpahla ya wena.” Se a li tlhelisa. Nkama a nga li humesa, a li holile li fana ni muzimbha wa yena hinkwawu! 8 Xikwembu xi ku: “Loko va nga ku kholwi kumbe va nga na mhaka ni singita la ku sungula, va ta kholwa singita la wumbirhi.+ 9 Kutani loko va nga kholwi ka masingita lawa mambirhi naswona va yala ku ku yingisa, u ta ya u ya kha mati ka Nambu wa Nilu u gama u ma chulula ka misava ya ku woma, se mati wolawo ma ta txintxa ma va ngati ka misava ya ku woma.”+

10 Moxe a byela Yehovha a ku: “Ni rivaleli Yehovha, hikusa ni ni manghanghamela. Leswo swi ni yendlekela ku sukela khale hambiloko se u vulavule na mina mutirheli wa wena. Phela a ni khulumi kahle.”+ 11 Yehovha a byela Moxe a ku: “I mani lweyi a nga yendla nomo wa munhu, kumbe lweyi a yendlaka swaku vanhu va nga khulumi, va nga twi, va vona kahle kumbe va nga voni? A hi mina Yehovha? 12 Kutani swoswi famba. Ni ta va na wena nkama u nga ta khuluma naswona ni ta ku djondzisa leswi u faneleke u swi hlaya.”+ 13 Se Moxe a ku: “Ni rivaleli Yehovha, ni kombela u rhuma mun’wani lweyi u mu lavaka.” 14 Kutani Yehovha a mu kwatela hintamu Moxe, a gama a ku: “U ni byela yini hi makwenu wa wena Aroni+ lweyi wa Mulevhi! Phela na swi tiva swaku a khuluma kahle. Swoswi wa ta a ta kumana na wena. Nkama a nga ta ku vona mbilu ya yena yi ta tsaka.+ 15 Kutani u fanele u khuluma na yena,+ u mu byela leswi a nga ta swi hlaya, ni ta va na wena ku patsa na yena nkama mi nga ta khuluma,+ naswona ni ta mi djondzisa leswi mi nga ta swi yendla. 16 Aroni a ta ku vulavulela ka vanhu naswona a ta va munyimeli wa wena, se wena u ta va Xikwembu xa yena.*+ 17 U ta khoma nhonga leyi u yendla hi yona masingita.”+

18 Kutani Moxe a tlhelela ka Yetro papayi wa nsati wa yena,+ a fika a ku: “Ni kombela ku famba ka vamakwerhu lava nga Gibita ni ya vona swaku va ha hanya ke.” Yetro a byela Moxe a ku: “Famba hi ku rhula.” 19 Kutani Yehovha a gama a byela Moxe na a li Midiyani a ku: “Tlhelela Gibita hikusa vanhu hinkwavu lava a va lava ku ku dlaya se va file.”+

20 Se Moxe a teka nsati wa yena ni vana va yena va madjaha a va khwelisa ka mbongolo, a gama a tlhela ka tiko la Gibita. Moxe a tlhele a famba na a khome nhonga ya Xikwembu xa ntiyiso. 21 Kutani Yehovha a byela Moxe a ku: “Nkama u nga ta tlhela Gibita, yendla masingita hinkwawu lawa ni nga ku nyika matimba ya ku ma yendla+ phambheni ka Faru. Kambe ni ta yendla swaku Faru a tiwomisa nhloko,*+ se a nga ta va tshika vanhu va mina va famba.+ 22 U fanele u byela Faru u ku: ‘Yehovha a li: “Phela Israyele i n’wana wa mina wa matevula.+ 23 Kutani u fanele u tshika n’wana wa mina a famba swaku a ta ni tirhela. Kambe loko wo tshuka u yala ku mu tshika a famba, ni ta dlaya n’wana wa wena wa matevula.”’”+

24 Na wa ha li ndleleni nkama a nga fika ka ndhawu leyi a nga yetlela ka yona, Yehovha+ a humelele ka yena naswona a a lava ku mu dlaya.*+ 25 Se Zipora+ a teka ribye la ku lotiwa a tsema nsuvu wa n’wana wa yena kutani a yendla swaku xikhumba xa kona xi khumba minenge ya yena, a gama a ku: “U nuna* wa mina hi mhaka ya ngati leyi.” 26 Kutani A mu tshika a famba. A gama a ku: “U nuna* wa mina hi mhaka ya ngati leyi”; a hlaye leswo hi mhaka ya ku tsema nsuvu.

27 Se Yehovha a byela Aroni a ku: “Famba u ya kumana na Moxe+ amananga.” Kutani a famba, a gama a tlhangana na yena ka ntshava ya Xikwembu xa ntiyiso,+ a fika a mu pfuxela hi ku mu bejara.* 28 Kutani Moxe a byela Aroni hinkwaswu leswi Yehovha a nga mu rhuma+ swona ni masingita hinkwawu lawa A nga mu rhuma ku ma yendla.+ 29 Se Moxe na Aroni va game va famba, va fika va hlengeleta madoda hinkwawu ya Vayisrayele.+ 30 Aroni a va byela swilo hinkwaswu leswi Yehovha a nga swi byela Moxe a tlhela a yendla masingita+ phambheni ka vanhu. 31 Kutani vanhu va kholwa.+ Nkama va nga twa swaku Yehovha a ta va pfuna Vayisrayele,+ naswona a swi vonile swaku va xaniseka,+ va gama va khizama, swimombo swa vona swi khumba hansi.

5 Se Moxe na Aroni va gama va ya ka Faru va fika va ku: “Yehovha Xikwembu xa Israyele a te: ‘Tshika vanhu va mina va famba swaku va ta ni hambela fexta amananga.’” 2 Kambe Faru a ku: “I mani Yehovha+ wa kona swaku ni mu yingisa ni za ni tshika Vayisrayele va famba ke?+ A ni tivi Yehovha mina naswona a ni nge va tshiki Vayisrayele va famba.”+ 3 Kambe va ku: “Xikwembu xa Vaheberu xi vulavule na hina. Kutani ha ku kombela swaku hi yendza masiku manharhu hi ya mananga hi ya yendlela Yehovha Xikwembu xa hina gandzelo.+ Phela loko ho kala hi nga yendli leswo, a ta hi ba hi mavabyi kumbe a hi dlaya hi xipada.” 4 Faru a va hlamula a ku: “Wena Moxe na Aroni, hi mhaka muni mi tshikisa vanhu ku tirha? Tlhelani ku tirheni!”+ 5 Faru a tlhela a ku: “Ma swi vona leswi va nga talisa swona vanhu lava, se n’wina mi lava ku va tshikisa ku tirha.”

6 Hi siku lolelo Faru a byela varhangeli ni vavoneleli va vatirhi a ku: 7 “Mi nga ha va nyikeni byanyi vanhu lava swaku va hamba switini.*+ Va tshikeni va tilavela hi voxe. 8 Kambe mi fanele mi va sindzisa ku hamba switini swa ku ringana ni leswi a va swi hamba ku sunguleni. Mi nga va pumbeleni ntirho, hikusa i malolo. Hi leswo swi va yendlaka va vangetela guwa va ku: ‘Hi lava ku famba hina, hi lava ku yendlela Xikwembu xa hina gandzelo!’ 9 Va tirhiseni yi nga chayi, mi nga va nyikeni nkama wa ku humula swaku va nga yingiseli mavunhwa.”

10 Se varhangeli ni vavoneleli va vatirhi+ va huma va ya byela vanhu va ku: “Faru a te: ‘A ni nge he mi nyiki byanyi. 11 Fambani mi ya tilavela byanyi hinkwaku lomu mi nga ta li kuma kona kambe swi tiveni swaku ntirho wa n’wina a wu nga ta pumbiwa la!’” 12 Se vanhu va hangalaka ka tiko hinkwalu la Gibita swaku va hlengeleta mahlanga lawa ma nga sala masin’wini swaku va ma yendla byanyi. 13 Kutani varhangeli va ku khoo va va sindzisa va ku: “Mi fanele mi wu heta ntirho wa n’wina siku ni siku, ku fana ni leswi a mi yendlisa xiswona nkama na ma ha nyikiwa byanyi.” 14 Na vona vavoneleli lava nga Vayisrayele, lava nga langiwa hi varhangeli va Faru va biwile.+ Va va vutise va ku: “Hi mhaka muni tolo ni namuntlha mi nga hambanga switini swa ku ringana ni leswi a mi swi hamba khale ke?”

15 Se Vayisrayele lava a va vonelela vatirhi va ya ka Faru va fika va khala va ku: “Hi mhaka muni u hi khomisa xileswi hina vatirhi va wena? 16 Hina vatirhi va wena a ha ha nyikiwi byanyi kambe hi byeliwa leswi: ‘Hambani switini!’ Phela ha biwa ti nga teki kuve a nandzu i wa vanhu va wena.” 17 Kambe a ku: “Mo lolowa n’wina, mo kala mi nga lavi ku tirha n’wina!+ Hi leswo swi yendlaka mi ku: ‘Hi la ku famba, hi lava ku yendlela Yehovha gandzelo.’+ 18 Se tlhelani mi ya tirha! A mi nga ha ta nyikiwa byanyi la, kambe mi fanele mi hamba switini leswi lavekaka.”

19 Se vavoneleli va vatirhi lava a va li Vayisrayele va swi vona swaku swilo a swi djime hi nhloko hi mhaka ya nawu lowu nge: “Mi nga tshuki mi pumba numeru ya switini leswi lavekaka siku ni siku.” 20 Nkama va nga huma ka Faru va kumane na Moxe na Aroni, lava a va va nyimelile. 21 Se va byela Moxe na Aroni va ku: “Yehovha a a swi voni leswi mi nga swi yendla a gama a mi yavanyisa, hikusa mi yendle swaku Faru ni vatirhi va yena va hi nyenya* naswona mi veke xipada ka voko la vona swaku va hi dlaya.”+ 22 Kutani Moxe a byela Yehovha a ku: “Yehovha, hi mhaka muni u hlupha vanhu lava? Kasi u ni rhumele yini ke? 23 Phela ku sukela nkama ni nga ya ka Faru swaku ni ya vulavula hi vito la wena,+ Faru a va khoma hi ndlela ya ku biha hintamu vanhu lava+ naswona a wu zanga u va ponisa vanhu va wena.”+

6 Kutani Yehovha a byela Moxe a ku: “Swoswi u ta swi vona leswi ni nga ta mu yendla swona Faru.+ Hi voko la mina la matimba ni ta mu sindzisa swaku a va tshika va famba naswona ni ta mu sindzisa hi voko la mina la matimba swaku a va hlongola ka tiko la yena.”+

2 Se Xikwembu xi byela Moxe xi ku: “Hi mina Yehovha. 3 A ni hamba ni humelela ka Abrahamu, Izaki na Yakobe na ni li Xikwembu xa Matimba Hinkwawu,+ kambe a ni titivisanga+ hi vito la mina la ku Yehovha.+ 4 Ni tlhele ni yendla ntwananu na vona, swaku ni ta va nyika tiko la Kanana, tiko leli a va tshama ka lona na li nga li la vona.+ 5 Swoswi ni swi twile leswi Vayisrayele va konyisaka xiswona, lava Vagibita va nga va yendla swikarawa naswona na wu khumbuka ntwananu wa mina.+

6 “Se byela Vayisrayele u ku: ‘Hi mina Yehovha naswona ni ta mi chunsa ka mintirho ya ku tika ya Vagibita, ni ta tlhela ni mi chunsa ka wukarawa la vona;+ ni ta tirhisa voko la mina la matimba* ni ku khatisa kakukulu+ swaku ni mi ponisa. 7 Ni ta mi teka mi va vanhu va mina naswona ni ta va Xikwembu xa n’wina,+ phela mi ta swi tiva leswaku hi mina Yehovha Xikwembu xa n’wina lweyi a nga mi chunsa ka mintirho ya ku tika ya le Gibita. 8 Ni ta mi yisa ka tiko leli ni nga funga* ku li nyika Abrahamu, Izaki na Yakobe, naswona ni ta mi nyika swaku li va la n’wina.+ Hi mina Yehovha.’”+

9 Moxe a game a ya byela Vayisrayele mhaka leyi, kambe a va zanga va mu yingisa hikusa a va hele matimba naswona a va karhatiwa hintamu.+

10 Kutani Yehovha a khuluma na Moxe a ku: 11 “Famba u ya byela Faru hosi ya Gibita swaku a fanele a tshika Vayisrayele va huma ka tiko la yena.” 12 Kambe Moxe a byela Yehovha a ku: “Phela Vayisrayele a va ni yingisanga;+ se Faru a ta ni yingisa ndjhani leswi swi ni karhatelaka ku vulavula ke?”+ 13 Kambe Yehovha a tlhela a byela Moxe na Aroni hinkwaswu leswi a va fanele va swi byela Vayisrayele ku patsa na Faru, hosi ya Gibita, swaku a za a humesa Vayisrayele ka tiko la Gibita.

14 Hi lava, lava a va rhangela ka mindjangu ya vavhovho va vona: Ka vana va Rubeni, matevula ya Israyele,+ a ku na Anoki, Palu, Hezroni na Karimi.+ Leyi i mindjangu ya Rubeni.

15 Vana va Simiyoni a ku li Yemuwele, Yamini, Ohadi, Yakini, Sohari na Xawuli lweyi mamani wa yena a a li Mukanana.+ Leyi i mindjangu ya Simiyoni.

16 Hi lawa mavito ya vana va Levhi,+ hi ku ya hi mindjangu ya vatukulu va vona: Jersoni, Kohata na Merari.+ Levhi a hanye 137 wa malembe.

17 Vana va Jersoni a ku li Libni na Ximeyi, hi ku ya hi mindjangu ya vona.+

18 Vana va Kohata a ku li Amirami, Izari, Hebroni na Uziyeli.+ Kohata a hanye 133 wa malembe.

19 Vana va Merari a ku li Mahili na Muxi.

Leyi a ku li mindjangu ya Valevhi, hi ku ya hi mindjangu ya vatukulu va vona.+

20 Kutani Amirami a teka Yokebedi, makwavu wa papayi wa yena swaku a va nsati wa yena.+ Va game va psala Aroni na Moxe.+ Amirami a hanye 137 wa malembe.

21 Vana va Izari a ku li Kora,+ Nefegi na Zikiri.

22 Vana va Uziyeli a ku li Mixayele, Elizafani+ na Sitiri.

23 Kutani Aroni a teka Elixeba n’wana wa Aminadabi swaku a va nsati wa yena; Elixeba a a li makwavu wa xisati wa Nasoni.+ Va psale Nadabi, Abiyu, Eliyazari na Itamari.+

24 Vana va Kora a ku li Asiri, Elkana na Abiyazafi.+ Leyi a yi li mindjangu ya vana va Kora.+

25 Eliyazari+ n’wana wa Aroni a teke mun’wani wa vana va Putiyeli swaku a va nsati wa yena. Va game va psala Feniyasi.+

Lava i varhangeli va lixaka la Valevhi, hi ku ya hi mindjangu ya vona.+

26 Lweyi i Aroni na Moxe lava Yehovha a nga va byela leswi: “Humesani Vayisrayele ka tiko la Gibita ku fana ni mintlawa ya masonchwa.”+ 27 Phela i Moxe na Aroni+ va nga byela Faru hosi ya Gibita swaku a humesa Vayisrayele aGibita.

28 Siku leli Yehovha a nga khuluma na Moxe ka tiko la Gibita, 29 Yehovha a byele Moxe a ku: “Hi mina Yehovha. Byela Faru hosi ya Gibita minchumu hinkwayu leyi ni ku byelaka yona.” 30 Se Moxe a byela Yehovha a ku: “Swa ni karhatela ku vulavula, se Faru a ta ni yingisisa ku yini?”+

7 Kutani Yehovha a byela Moxe a ku: “Phela ni ku yendle u fana ni Xikwembu* ka Faru naswona makwenu Aroni a ta va muprofeta wa wena.+ 2 U fanele u ya phindha hinkwaswu leswi ni nga ta ku byela swona se makwenu Aroni a ta khuluma na Faru, kutani Faru a ta gama a tshika Vayisrayele va huma ka tiko la yena. 3 Ni ta yendla swaku Faru a tiwomisa nhloko,*+ naswona ni ta yendla swikombiso ni masingita ya manyingi hintamu ka tiko la Gibita.+ 4 Kambe Faru a nga ta mi yingisa, kutani ni ta veka voko la mina henhla ka Gibita, ni humesa xitshungu* xa vanhu va mina, ku nga Vayisrayele ka tiko la Gibita. Ni ta yendla leswo hi ku va khatisa hintamu.+ 5 Phela Vagibita va ta swi tiva leswaku hi mina Yehovha+ hikakunene nkama ni nga ta va khatisa, ni gama ni humesa Vayisrayele xikarhi ka vona.” 6 Moxe na Aroni va yendle hinkwaswu leswi Yehovha a nga va rhuma swona. 7 Nkama Moxe na Aroni va nga ya vulavula na Faru,+ Moxe a a ni 80 wa malembe kasi Aroni a a ni 83 wa malembe.

8 Kutani Yehovha a byela Moxe na Aroni a ku: 9 “Loko Faru o mi byela a ku: ‘Yendlani singita!’ Byela Aroni u ku: ‘Teka nhonga ya wena u yi txukumetela hansi phambheni ka Faru.’ Yi ta txintxa yi va nyoka yayikulu.”+ 10 Kutani Moxe na Aroni va famba va ya ka Faru, se va yendla leswi Yehovha a nga va byela swona. Aroni a txukumetela nhonga ya yena hansi phambheni ka Faru ni vatirhi va yena kutani yi txintxa yi va nyoka yayikulu. 11 Kambe Faru a vitana vavanuna va ku tlhariha ni valoyi; kutani vaprista lava yendlaka masalamusi va le Gibita+ na vona va yendla swa ku fana hi masalamusi ya vona.+ 12 Mun’wani ni mun’wani a txukumeta nhonga ya yena hansi, kutani ti txintxa ti va tinyoka tatikulu; kambe nyoka* ya Aroni yi minta tinyoka ta vona. 13 Kambe Faru a tiwomise nhloko,*+ a nga zanga a va yingisa hilani Yehovha a nga vula hi kona.

14 Se Yehovha a byela Moxe a ku: “Faru a tiyele nhloko.+ Wa yala ku tshika vanhu va famba. 15 Yana ka Faru nimixo. Nkama yena a nga ta ya ka Nambu wa Nilu, u fanele u nyima tlhelweni ka Nambu swaku u ta tlhangana na yena, naswona u fanele u famba na u tamele nhonga leyi nga txintxa yi va nyoka.+ 16 Kutani u ta mu byela leswi: ‘Yehovha Xikwembu xa Vaheberu a ni rhume ka wena+ naswona a li: “Tshika vanhu va mina va famba swaku va ta ya ni tirhela amananga”, kambe wena a wu yingisanga anze swoswi. 17 Yehovha a li: “U ta swi tiva leswaku hi mina Yehovha+ hi leswi ni nga ta swi yendla. Swoswi ni ba mati lama nga ka Nambu wa Nilu hi nhonga leyi nga ka voko la mina, kutani ma ta txintxa ma va ngati. 18 Se tihlampfi leti nga ka Nambu ti ta fa, Nambu wu ta nun’hwa hintamu naswona Vagibita a va nge gwenti ku phuza mati ya Nambu.”’”

19 Se Yehovha a byela Moxe a ku: “Byela Aroni u ku: ‘Tlakusa nhonga ya wena henhla ka mati ya tiko la Gibita,+ henhla ka minambu ya lona, misele ya lona, henhla ka mati ya lona ya ku kala ma nga fambi*+ ni henhla ka tindhawu hinkwatu leti va hlayisaka ka tona mati,* leswaku ma ta txintxa ma va ngati.’ Ku ta va ni ngati ka tiko hinkwalu la Gibita, ka swibya swa ku yendliwa hi mapulangu ni swa ku yendliwa hi maribye.” 20 Hi ku hantlisa, Moxe na Aroni va yendla hi ku landza leswi Yehovha a nga va byelisa swona. Aroni a tlakusa nhonga a ba mati lawa a ma li ka Nambu wa Nilu phambheni ka Faru ni vatirhi va yena, se mati hinkwawu lawa a ma li ka nambu ma txintxa ma va ngati.+ 21 Tihlampfi leti a ti li ka nambu ti fa+ naswona nambu wu sungula ku nun’hwa hintamu, Vagibita a va nga gwenti ku phuza mati lawa a ma huma hi ka Nambu wa Nilu+ naswona a ku ni ngati ka tiko hinkwalu la Gibita.

22 Kambe vaprista lava yendlaka masalamusi va le Gibita na vona va yendla swa ku fana ni leswo hi masalamusi ya vona,+ kutani Faru a ya a tiwomisa nhloko yi ku roo, naswona a nga zanga a va yingisa, ku nga leswi Yehovha a nga vula swona.+ 23 Kutani Faru a tlhela kaya ka yena naswona a nga vanga na mhaka ni leswi nga yendleka. 24 Vagibita hinkwavu a va txela matlhelweni ka Nambu wa Nilu va lava mati ya ku phuza, hikusa a va nga gwenti ku phuza mati ya Nambu wa Nilu. 25 Ku hundze 7 wa masiku na Yehovha a txintxe mati ya Nambu wa Nilu ma va ngati.

8 Kutani Yehovha a byela Moxe a ku: “Famba ka Faru, u fika u mu byela u ku: ‘Yehovha a li: “Tshika vanhu va mina va famba leswaku va ta ni tirhela.+ 2 Loko u sima u nga lavi ku va tshika va famba, ni ta hlasela ndhawu ya wena hinkwayu hi makhele.+ 3 Se Nambu wa Nilu wu ta tala hi makhele, ma ta huma ka mati ma nghena kaya ka wena, ma nghena ka kwartu la wena, ka mubedu wa wena, kaya ka vatirhi va wena ni ka vanhu va wena, lomu u swekelaka kona ni ka matijela ya wena.+ 4 Makhele ma ta hlasela wena, vanhu va wena ni vatirhi va wena hinkwavu.”’”

5 Yehovha a gama a byela Moxe a ku: “Byela Aroni u ku: ‘Tlakusa voko la wena leli u nga khoma hi lona nhonga ahenhla ka minambu, henhla ka misele ya Nilu ni henhla ka tindlela ta mati ya ku kala ma nga fambi,* u yendla leswaku ku va ni makhele ka tiko hinkwalu la Gibita.’” 6 Se Aroni a tlakusa voko la yena henhla ka mati ya Gibita, kutani makhele ma sungula ku huma ma tata tiko la Gibita. 7 Kambe vaprista lava yendlaka masalamusi va yendle swa ku fana ni leswo hi masalamusi ya vona, na vona va yendle swaku ku va ni makhele ka tiko la Gibita.+ 8 Se Faru a vitana Moxe na Aroni a va byela leswi: “Kombelani Yehovha swaku a susa makhele lawa ka mina ni ka vanhu va mina,+ hikusa swoswi se ni lava ku va tshika vanhu lava va famba swaku va ya yendlela Yehovha gandzelo.” 9 Kutani Moxe a byela Faru a ku: “Ni kombela u ni byela swaku u lava ni ya ku kombelela siku muni swaku makhele ma susiwa ka wena, ka vatirhi va wena, ka vanhu va wena ni ka miminti ya wena. Kambe ka Nambu wa Nilu a ma nga ta susiwa.” 10 Se a ku: “Mundzuku.” Kutani Moxe a ku: “Swi ta yendlekisa leswi u nga swi vulisa swona leswaku u ta swi tiva swaku a ku na munhu lweyi a fanaka na Yehovha Xikwembu xa hina.+ 11 Makhele ma ta susiwa ka wena, ka miminti ya wena, ka vatirhi va wena ni ka vanhu va wena. Ma to sala ntsena ka Nambu wa Nilu.”+

12 Se Moxe na Aroni va huma ka Faru. Moxe a gama a kombela swaku Yehovha a susa makhele lawa a nga ma tisa ka Faru.+ 13 Kutani Yehovha a yendla leswi Moxe a nga mu kombela swona, kutani makhele ma sungula ku fa lomu ndlwini, ka kintari* ni le khwatini. 14 Va ma hlengeleta ma va swidulu swa swinyingi kutani tiko li sungula ku nun’hwa hintamu. 15 Nkama Faru a nga vona swaku va mu pfunile, a tiwomisa nhloko+ a tlhela a yala ku va yingisa, hi ku ya hi leswi Yehovha a nga vula swona.

16 Kutani Yehovha a byela Moxe a ku: “Byela Aroni u ku: ‘Tlakusa nhonga ya wena u ba misava se wuthulu la kona li ta txintxa li va tinsuna ka tiko hinkwalu la Gibita.’” 17 Se va yendla swoleswo. Aroni a gama a ba misava hi nhonga leyi a a yi khomile, kutani tinsuna ti hlasela vanhu ni swiharhi. Wuthulu hinkwalu li txintxa li va tinsuna ka tiko hinkwalu la Gibita.+ 18 Vaprista lava yendlaka masalamusi va zame ku yendla swaku ku va ni tinsuna hi masalamusi ya vona,+ kambe a va swi kotanga. Kutani tinsuna ti hlasela vanhu ni swiharhi ku ku mphu. 19 Se vaprista lava yendlaka masalamusi va byela Faru va ku: “Leswi swi yendleka hi matimba ya Xikwembu!”*+ Kambe nhloko ya Faru yi ya yi tiyela yi ku roo, a nga zanga a va yingisa, hi ku ya hi leswi Yehovha a nga vula swona.

20 Kutani Yehovha a byela Moxe a ku: “Pfuka nimpundzu hintamu u ya ka Faru. Nkama a nga ta huma a ya matini, u ta mu byela u ku: ‘Yehovha a te: “Tshika vanhu va mina va famba leswaku va ta ni tirhela. 21 Kambe loko u nga va tshiki vanhu va mina va famba, ni ta rhumela mabawa* ka wena, ka vatirhi va wena, ka vanhu va wena ni le ka miminti ya wena; kutani tiyindlo ta le Gibita ti ta tala hi mabawa naswona ma ta tata misava leyi va* yi kandzihetelaka. 22 Hi siku lolelo ni ta vhikela tiko la Goxeni lomu vanhu va mina va tshamaka kona. Kona a ku nga ta va ni mabawa,+ leswo swi ta yendla swaku u swi tiva swaku mina Yehovha ni kona lani tikweni.+ 23 Ni ta yendla leswaku ku va ni ku hambana xikarhi ka vanhu va mina ni vanhu va wena. Mhaka leyi yi ta yendleka mundzuku.”’”

24 Yehovha a yendle leswi a nga swi vula. Kutani mabawa ya manyingi ma sungula ku hlasela munti wa Faru, miminti ya vatirhi va yena ni tiko hinkwalu la Gibita.+ Phela mabawa lawa ma hahlule tiko.+ 25 Faru a gama a vitana Moxe na Aroni a va byela leswi: “Fambani mi ya yendlela Xikwembu xa n’wina gandzelo kola tikweni.” 26 Kambe Moxe a ku: “A swi kahle ku yendla leswo, hikusa swilo leswi hi nga ta swi tirhisa swaku hi yendlela Yehovha Xikwembu xa hina gandzelo swi ta va nyenyentsa Vagibita.+ Loko ho yendla gandzelo leli nyenyentsaka Vagibita phambheni ka vona, indjhe a va nga ta hi ba hi maribye ke? 27 Hi ta yendza masiku manharhu hi ya mananga, hi ya fika hi yendlela Yehovha Xikwembu xa hina gandzelo, hi ku ya hi leswi a nga hi byela swona.”+

28 Kutani Faru a ku: “Ni ta mi tshika mi famba mi ya yendlela Yehovha Xikwembu xa n’wina gandzelo amananga. Kambe mi nga yi kule hintamu. Ni kombeleleni.”+ 29 Moxe a ku: “Swoswi na ha famba kutani ni ta ya ku kombelela ka Yehovha, swaku mabawa lawa ma suka ka wena, ka vatirhi va wena ni ka vanhu va wena mundzuku. Kambe u fanele u tshika ku tlanga hi hina hi ku yala ku tshika vanhu va hina swaku va ya yendlela Yehovha+ gandzelo.” 30 Kutani Moxe a suka ka Faru a ya kombela ka Yehovha.+ 31 Se Yehovha a yendla leswi Moxe a nga swi vula, kutani mabawa ma suka ka Faru, ka vatirhi va yena ni ka vanhu va yena. A ku salanga ni lin’we. 32 Kambe Faru a tlhela a tiwomisa nhloko yi ku roo, a nga zanga a va tshika va famba.

9 Se Yehovha a byela Moxe a ku: “Famba ka Faru, u fika u mu byela leswi: ‘Yehovha Xikwembu xa Vaheberu a te: “Tshika vanhu va mina va famba leswaku va ta ni tirhela.+ 2 Kambe loko wo yala ku va tshika va famba, u tirha ku khoo u va khomeletela, 3 mina Yehovha+ ni ta dlaya swifuyu swa wena leswi nga khwatini hi matimba ya mina. Ku ta va ni ntungu wawukulu+ lowu nga ta hlasela makavhalu, timbongolo, makamela, ntlhambi wa tihomu ni wa tinyempfu. 4 Mina Yehovha ni ta hambanisa swifuyu swa Vayisrayele ka swa Vagibita, a ku na xifuyu ni xin’we ka swifuyu swa Vayisrayele lexi nga ta fa.”’”+ 5 Naswona Yehovha a veke nkama wa ku yendla leswo, a te: “Mina Yehovha ni ta yendla leswo mundzuku lani tikweni.”

6 Hi mundzuku ka kona, Yehovha a swi yendlile leswo. Kutani mixaka hinkwayu ya swifuyu swa Vagibita swi sungula ku fa,+ kambe a ku na xifuyu ni xin’we ka swifuyu swa Vayisrayele lexi nga fa. 7 Nkama Faru a nga vutisa, a tsumbule swaku a ku na xifuyu ni xin’we ka swifuyu swa Vayisrayele lexi nga fa. Kambe Faru a tame a tiwomisa nhloko yi ku roo, a nga va tshikanga vanhu va famba.+

8 Kutani Yehovha a byela Moxe na Aroni a ku: “Nusani nkuma hi mavoko mambirhi axitikweni, se Moxe a fanele a wu txukumetela ahenhla na a li phambheni ka Faru. 9 Wu ta va wuthulu ka tiko hinkwalu la Gibita, naswona wu ta txintxa wu va marhumba lama nga ta humesa swilondza ka vanhu ni ka swifuyu swa tiko hinkwalu la Gibita.”

10 Se va teka nkuma va ya nyima phambheni ka Faru, kutani Moxe a wu txukumetela henhla, se wu txintxa wu va marhumba lama nga humesa swilondza ka vanhu ni ka swiharhi. 11 Vaprista lava yendlaka masalamusi a va swi kotanga ku ya kumana na Moxe hi mhaka ya marhumba, hikusa na vona a va humeliwe hi marhumba ku patsa ni Vagibita hinkwavu.+ 12 Kambe Yehovha a pfumelela Faru swaku a tiyela nhloko yi ku roo, a nga zanga a va yingisa, hilani Yehovha a nga mu byela hi kona Moxe.+

13 Se Yehovha a byela Moxe a ku: “Pfuka nimpundzu hintamu u ya ka Faru, u fika u mu byela leswi: ‘Yehovha Xikwembu xa Vaheberu a te: “Tshika vanhu va mina va famba leswaku va ta ni tirhela. 14 Phela swoswi ni ta ku ba hi makhombo ya mina hinkwawu, wena, vatirhi va wena ni vanhu va wena, leswaku u ta swi tiva swaku a nga kona lweyi a fanaka na mina amisaveni hinkwayu.+ 15 Loko a no swi lava, a ni ta va se ni tlakuse khale voko la mina swaku ni ku ba hi ntungu wawukulu, wena ni vanhu va wena, kutani a wu ta va se u helisiwile khale misaveni. 16 Kambe ni ze ni ku tshika u hanya swaku ni ta ku komba matimba ya mina, ni leswaku vito la mina li ta twalisiwa misaveni hinkwayu.+ 17 Wa ha titlakusa makatla ka vanhu va mina hi ku yala ku va tshika va famba? 18 Mundzuku hi nkama wa ku fana ni lowu ni ta nisa mpfula ya marhalala* yamakulu, lama kalaka ma nge se tshama ma va kona aGibita ku ta fikela swoswi. 19 Se rhuma vatirhi va wena swaku va landza swifuyu swa wena hinkwaswu ni swilo swa wena hinkwaswu leswi nga khwatini. Vanhu ni swifuyu leswi nga ta kumiwa na swi li khwatini, swi ta fa nkama swi nga ta neliwa hi mpfula ya marhalala.”’”

20 Vatirhi hinkwavu va Faru, lava a va li chava rito la Yehovha va tise vatirhi va vona ni swifuyu swa vona lomu ndlwini hi ku hantlisa, 21 kambe lava kalaka va nga li yingisanga rito la Yehovha, va tshike vatirhi va vona ni swifuyu swa vona khwatini.

22 Kutani Yehovha a byela Moxe a ku: “Tlakusa voko la wena u kombeta matilweni swaku mpfula ya marhalala yi na ka tiko hinkwalu la Gibita,+ ahenhla ka vanhu, henhla ka swiharhi ni ka swilo hinkwaswu leswi milaka khwatini ka tiko la Gibita.”+ 23 Kutani Moxe a tlakusa nhonga ya yena a kombeta tilweni, se Yehovha a yendla swaku ku dzindza, ku va ni marhalala ku tlhela ku na ndzilu* amisaveni. Kutani Yehovha a tame a nisa marhalala ka tiko la Gibita. 24 A ku na marhalala naswona a ku ni ndzilu xikarhi ka marhalala wolawo. Phela a ma li makulu swinene; naswona a ku nge se tshama ku va ni ya ku fana na wona ka tiko la Gibita.+ 25 Marhalala ma be swilo hinkwaswu leswi a swi li khwatini ka tiko hinkwalu la Gibita, ku sukela ka munhu ku ya fika ka xiharhi; naswona ma dlaye byanyi hinkwalu ma tlhela ma tshovelela ni minsinya hinkwayu.+ 26 Phela ko va ka tiko la Goxeni ntsena lomu Vayisrayele a va tshama kona lani marhalala ma kalaka ma nga banga.+

27 Se Faru a rhuma vanhu swaku va ya vitana Moxe na Aroni kutani a va byela leswi: “Swoswi ni djohile. Phela Yehovha a lulamile, kambe hi mina ni vanhu va mina hi nga ni nandzu. 28 Kombelani Yehovha swaku a nyimisa ku dzindza ni marhalala. Kutani ni ta mi tshika mi famba naswona a mi nge he tshami la.” 29 Se Moxe a mu byela leswi: “Loko ni huma adoropeni ni ta tlakusa voko la mina ka Yehovha. Se ku dzindza ni marhalala swi ta nyima, leswaku u ta swi tiva swaku misava i ya Yehovha.+ 30 Kambe na swi tiva swaku hambi no yendla leswo, wena ni vatirhi va wena a mi nga ta mu chava Yehovha Xikwembu.”

31 A swinsinyani swa linyu* ni maxalani swi dlayiwile hi marhalala hikusa maxalani se a ma wupfile kasi a swinsinyani swa linyu a swi ni swiluva. 32 Kambe a trigu la ku toloveleka ni trigu la ku pshuka a li dlayiwanga hi marhalala hikusa a la ha li litsongo.* 33 Se Moxe a suka ka Faru a huma doropeni a gama a tlakusa voko la yena ka Yehovha, se ku dzindza ni marhalala swi nyima ni mpfula yi nyima.+ 34 Nkama Faru a nga vona swaku a mpfula, marhalala ni ku dzindza swi nyimile, a tlhela a djoha a tama a tiyelisa nhloko ya yena yi ku roo,+ ni vatirhi va yena. 35 Faru a tame a tiwomisa nhloko yi ku roo, a nga zanga a va tshika Vayisrayele va famba, hilani Yehovha a nga vulisa swona hi ku tirhisa Moxe.+

10 Kutani Yehovha a byela Moxe a ku: “Famba ka Faru, hikusa mina ni pfumelele swaku nhloko ya yena ni tinhloko ta vatirhi va yena ti tiyela ti ku roo,+ swaku ni ta yendla swikombiso leswi swa mina phambheni ka yena,+ 2 ni leswaku u ta byela vana va wena ni vatukulu va wena ndlela leyi ni nga va khatisa hi yona Vagibita ni swikombiso leswi ni nga swi yendla xikarhi ka vona;+ se mi ta swi tiva swaku hi mina Yehovha.”

3 Kutani Moxe na Aroni va nghena ka Faru va fika va ku: “Yehovha Xikwembu xa Vaheberu a te: ‘Kasi u ta tama u yala ku tiveka hansi ka mina anze siku muni ke?+ Tshika vanhu va mina va famba leswaku va ta ni tirhela. 4 Hikusa loko u tama u yala ku tshika vanhu va mina va famba, mundzuku ni ta tisa mintete ka tiko la wena. 5 Yi ta mbhonya tiko hinkwalu ku sala na ku nga voneki nchumu ni xin’we, yi ta dla leswi nga siyiwa hi marhalala* naswona yi ta dla minsinya ya n’wina hinkwayu leyi ya ha kulaka.+ 6 Tiyindlo ta n’wina ni tiyindlo ta vatirhi va n’wina hinkwavu ni tiyindlo hinkwatu ta Gibita ti ta tala hi mintete. Phela hambi vapapayi va n’wina ni vavhovho va n’wina a va se tshama va vona mintete ya ku fana ni leyi ka wutomi la vona hinkwalu ku ta fikela namuntlha.’”+ Se va ndzuluka va huma ka Faru.

7 Kutani vatirhi va Faru va mu byela leswi: “Kasi munhu lweyi a ta tama a hi tisela makhombo* anze siku muni? Tshika vanhu lava va famba swaku va ya tirhela Yehovha Xikwembu xa vona. Wo kala u nga swi voni swaku tiko la Gibita li wonhiwile ke?” 8 Se Moxe na Aroni va ya vitaniwa va tlhela ka Faru, se Faru a ku: “Fambani mi ya tirhela Yehovha Xikwembu xa n’wina. Kambe ku ta famba vamani ke?” 9 Kutani Moxe a ku: “Hi ta famba ni vana va hina, vanhu va hina lava nga guga, vana va hina va madjaha ni va tintombhi, tinyempfu ta hina ni tihomu ta hina,+ hikusa hi lava ku mu hambela fexta* Yehovha.”+ 10 A va byela leswi: “Siku leli ni nga ta mi tshika mi famba ni vana va n’wina swi ta tikomba swaku impela Yehovha a na n’wina hikakunene!+ Phela swa tikomba swaku mi lava ku yendla swilo swa ku biha. 11 A swi tirhi la! I vavanuna ntsena va nga ta fambaka va ya tirhela Yehovha, hikusa hi leswo mi nga kombela swona.” Se va hlongoliwa phambheni ka Faru.

12 Kutani Yehovha a byela Moxe a ku: “Tlakusa voko la wena ahenhla ka tiko la Gibita leswaku ku ta va ni mintete leyi nga ta dla swilo hinkwaswu leswi nga mila tikweni, ni hinkwaswu leswi nga siyiwa hi marhalala.” 13 Se Moxe a tlakusa nhonga ya yena henhla ka tiko la Gibita, kutani Yehovha a yendla swaku ku ba moya lowu taka hi le wuxeni, moya lowu wu be siku hinkwalu ni wusiku hinkwalu. Nkama li nga xa, moya lowu wu tise mintete. 14 Se ku sungula ku va ni mintete ka tiko hinkwalu la Gibita naswona yi xika yi tata tiko hinkwalu la Gibita.+ Phela a yi nyenyentsa ngopfu;+ a ku nge se tshama ku va ni mintete ya yinyingi ya ku fana ni leyo naswona a ku nge he tshuki ku va ni yin’wani. 15 Yi tate tiko hinkwalu naswona tiko li sungule ku mphuma hi mhaka ya yona; yi dle hinkwaswu leswi nga mila tikweni, ni mihandzu hinkwayu ya minsinya leyi nga siyiwa hi marhalala; naswona a ku na nchumu ni xin’we xa vherdi xi nga sala ka minsinya ni ka leswi nga ha milile ka tiko hinkwalu la Gibita.

16 Se Faru a vitana Moxe na Aroni hi ku hantlisa a va byela leswi: “Ni djohele Yehovha Xikwembu xa n’wina ni tlhela ni djohela na n’wina. 17 Swoswi, ni kombela mi ni rivalela ka wugamu, kutani mi kombela Yehovha Xikwembu xa n’wina swaku a susa khombo leli li ni hetaka.” 18 Se Moxe a huma ka Faru a ya kombela ka Yehovha.+ 19 Kutani Yehovha a yendla swaku ku ba moya wawukulu hintamu lowu a wu ta hi le wupeladlambu, swaku wu susa mintete wu yi yisa ka Lwandle la Ku Pshuka. A ku na ntete ni wun’we lowu nga sala ka tiko hinkwalu la Gibita. 20 Kambe Yehovha a pfumelela swaku Faru a womisa nhloko ya yena yi ku roo+ naswona a nga va tshikanga Vayisrayele va famba.

21 Se Yehovha a byela Moxe a ku: “Tlakusa voko la wena u kombeta matilweni swaku ka tiko la Gibita ku va ni munyama, munyama wawukulu swinene.” 22 Hi ku hantlisa Moxe a tlakusa voko la yena a kombeta matilweni, se ku va ni munyama wawukulu ka tiko hinkwalu la Gibita anze ku hela masiku manharhu.+ 23 A va nga swi koti ku vonana, naswona va hete masiku manharhu na va nga humi lani a va li kona; kambe hinkwaku lomu Vayisrayele a va tshama kona a ku ni ku vonakala.+ 24 Se Faru a vitana Moxe a ku: “Fambani mi ya tirhela Yehovha.+ Kambe siyani tinyempfu ta n’wina ni tihomu ta n’wina. Tekani ni vana va n’wina mi famba na vona.” 25 Kambe Moxe a ku: “U ta tlhela u hi nyika magandzelo ni magandzelo ya ku hisiwa, kutani hi ta nyikela hi wona ka Yehovha Xikwembu xa hina.+ 26 Hi ta famba ni swifuyu swa hina. A ku na xifuyu* ni xin’we xi nga ta sala la, hikusa hi ta tirhisa swin’wani swa kona swaku hi gandzela Yehovha Xikwembu xa hina naswona a hi se swi tiva swaku hi ta tirhisa xini xa kona swaku hi yendlela Yehovha magandzelo anze hi ya fika kohala.” 27 Se Yehovha a pfumelela Faru swaku a tiyela nhloko yi ku roo naswona a nga va tshikanga va famba.+ 28 Faru a mu byela leswi: “Suka la phambheni ka mina! U nga ha tlheli u zama ku vuya, siku u nga ta tshuka u vuya la, u ta fa!” 29 Kutani Moxe a ku: “Ni ta yendla leswi u nga swi vula, a ni nge he tlheli ni zama ku ta ni ta ku vona.”

11 Se Yehovha a byela Moxe a ku: “Ni ta tisa khombo lin’wani la wugamu ka Faru ni tiko la Gibita. Kutani hi kona a nga ta za a mi tshika mi famba.+ A nkama a nga ta mi chunsa, a to yendla hi ku mi hlongola mi huma lani.+ 2 Swoswi byela vanhu hinkwavu vavanuna ni vavasati swaku va fanele va kombela swilo leswi nga yendliwa hi woru ni prata ka vavhizinyu va vona.”+ 3 Kutani Yehovha a yendla swaku Vayisrayele va kombiwa timpsalu hi Vagibita. Naswona Moxe a game a va munhu lweyi a hloniphiwaka hintamu aGibita hi vatirhi va Faru ni vanhu.

4 Se Moxe a ku: “Yehovha a te: ‘Hi xikarhi ka wusiku ni ta huma ni ya Gibita,+ 5 kutani matevula hinkwawu ya tiko la Gibita ma ta fa,+ ku sukela ka n’wana wa matevula wa Faru lweyi a nga tshama ka xitshamu xa yena xa wuhosi, ku ya fika ka n’wana wa matevula wa mutirhi wa yena wa xisati lweyi a yendlaka ntirho wa ku sila, ni matevula hinkwawu ya swifuyu.+ 6 Ku ta va ni nkosi wawukulu ka tiko hinkwalu la Gibita, lowu kalaka wu nge se tshama wu va kona naswona a wu nge tlheli wu va kona.+ 7 Hambi mbyana a yi nga ta va vukulela Vayisrayele kumbe swifuyu swa vona, leswaku mi ta swi tiva swaku Yehovha a nga yendla leswaku ku va ni ku hambana xikarhi ka Vagibita ni Vayisrayele.’+ 8 Phela vatirhi va wena hinkwavu va ta ni tela va fika va khizama phambheni ka mina, va ku: ‘Famba wena ni vanhu hinkwavu lava ku landzelaka.’+ Se ni ta gama ni huma ni tifambela.” Kutani Moxe a huma ka Faru na a kwate ngopfu.

9 Kutani Yehovha a byela Moxe a ku: “Phela Faru a nga ta mi yingisa,+ leswaku masingita ya mina ma ta ya ma tala ka tiko la Gibita.”+ 10 Moxe na Aroni va yendle masingita lawa hinkwawu phambheni ka Faru+ kambe Yehovha a pfumelele swaku nhloko ya Faru yi tiyela yi ku roo, naswona a nga zanga a tshika Vayisrayele va huma ka tiko la yena.+

12 Kutani Yehovha a byela Moxe na Aroni ka tiko la Gibita a ku: 2 “Leyi yi ta va wheti ya ku sungula ka tiwheti ta n’wina. Yi ta va wheti ya ku sungula ka tiwheti ta lembe ka n’wina.+ 3 Khulumani ni Vayisrayele hinkwavu mi ku: ‘Hi diya 10 ka wheti leyi, mun’wani ni mun’wani a fanele a langela ndjangu* wa yena nyempfu yin’we,+ ka munti ku fanele ku langiwa nyempfu yin’we ntsena. 4 Kambe loko swi ku ndjangu wa kona i wutsongo lakakuva a va nge swi koti ku heta nyempfu, wu fanele wu pambulela vhizinyu hi ku ya hi numeru ya vanhu va kona. Nkama mi yendlaka tikonta ta leswi nga ta laveka, zamani ku vona swaku munhu mun’wani ni mun’wani a ta dla nyama ya ku kota kwini ka nyempfu. 5 Nyempfu ya kona yi fanele yi hanye kahle,+ yi ni lembe lin’we naswona yi li ya xinuna. Mi nga langa ka swinyempfani swa xinuna kumbe ka timbuti. 6 Mi fanele mi yi hlayisa anze diya 14 ka wheti leyi,+ se ndjangu wun’wani ni wun’wani wa Vayisrayele wu fanele wu yi dlaya loko dlambu la ha li ku pela.+ 7 Va fanele va teka ngati yin’wani va yi tota ka aru la xipfalu ka matlhelo hamambirhi ni hi le henhla ka lona ka tiyindlo leti va nga ta dlela ka tona.+

8 “‘Va fanele va dla nyama hi wusiku lolelo.+ Va fanele va yi woxa hi ndzilu va gama va yi dla ni mapawu ya ku kala fermentu+ ni matsavu ya ku bava.+ 9 A mi fanelanga mi yi dla na yi nga swekiwanga kumbe ya ku vilisiwa hi mati, kambe yi woxeni hi ndzilu ku patsa ni nhloko ya yona, minenge ya yona ni leswi nga ndzeni. 10 Mi nga siyeni nchumu swaku xi tirhisiwa mundzuku, kambe loko li xa hinkwaswu leswi nga sala tolo mi fanele mi swi hisa hi ndzilu.+ 11 Mi fanele mi yi dlisa leswi: Mi boha mabandhi, mi yambala masandaliya, mi khoma tinhonga naswona mi fanele mi yi dla hi ku hantlisa. I Paxkwa la Yehovha. 12 Hikusa ni ta hundza ka tiko la Gibita hi wusiku lolelo, ni dlaya matevula hinkwawu ka tiko la Gibita, ku sukela ka matevula ya munhu ku ya fika ka matevula ya xifuyu;+ naswona ni ta yavanyisa swikwembu hinkwaswu swa Gibita.+ Hi mina Yehovha. 13 Ngati yi ta va xikombiso ka tiyindlo leti mi nga ta va ka tona; se loko ni hundza ni vona ngati, a mi nga ta helisiwa hi khombo loko ni hlasela tiko la Gibita.+

14 “‘Siku leli li ta va xitsundzuxu ka n’wina. Loko li fika mi fanele mi yendlela Yehovha fexta,* leswo mi fanele mi swi yendla ni ka vana va n’wina lava nga ta va kona ka minkama leyi taka. Mi fanele mi li yendla hikusa i nawu lowu nga ta tirha hi masiku ni masiku. 15 Mi ta dla mapawu ya ku kala fermentu+ anze ku hela 7 wa masiku. Hi siku la ku sungula mi fanele mi susa mbila leyi nga vila lomu ndlwini ka n’wina, hikusa mun’wani ni mun’wani lweyi a nga ta dla nchumu lexi nga ni fermentu ku sukela hi siku la ku sungula anze siku la wu 7, a fanele a dlayiwa aIsrayele. 16 Hi siku la ku sungula mi ta va ni kongresu ya ku kwetsima naswona hi siku la wu 7 mi ta va ni kongresu yin’wani ya ku kwetsima. A mi fanelanga mi tirha nchumu ka masiku lawa.+ Kambe mi ta lunghiselela swakudla leswi munhu a nga ta tidlela swona ntsee.

17 “‘Mi fanele mi yendla Fexta la Mapawu ya Ku Kala Fermentu,+ hikusa hi siku leli, ni ta humesa switshungu* swa n’wina ka tiko la Gibita. N’wina ni vana va n’wina lava nga ta va kona ka nkama lowu taka mi fanele mi yendla fexta hi siku leli; lowu i nawu lowu nga ta tirha hi masiku ni masiku. 18 Hi diya 14 ka wheti ya ku sungula nimadlambu, mi ta dla mapawu ya ku kala fermentu anze hi diya 21 ka wheti yoleyo nimadlambu.+ 19 Ku nga tshuki ku kumiwa mbila ya ku vila ka miminti ya n’wina anze ku hela 7 wa masiku, hikusa loko munhu o tshuka a dla swilo leswi nga ni fermentu, hambi a li munhu wa tiko lin’wani lweyi a tshamaka na n’wina kumbe a li Muyisrayele,+ a fanele a dlayiwa xikarhi ka Vayisrayele.+ 20 Mi nga tshuki mi dla nchumu lexi nga ni fermentu. Ka makaya ya n’wina hinkwawu mi fanele mi dla mapawu ya ku kala fermentu.’”

21 Se Moxe a yo vhela a vitana madoda hinkwawu ya Vayisrayele+ a gama a ma byela leswi: “Fambani mi ya langela mindjangu ya n’wina swifuyu swaswitsongo* mi gama mi swi dlaya swaku swi va gandzelo la Paxkwa. 22 Kutani mi fanele mi teka matluka ya xinsinyani xa hisopa* mi ma peta ka ngati leyi nga ka tijela mi gama mi tota ka matlhelo hamambirhi ya aru la swipfalu ni le henhla ka lona; mi nga tshuki mi huma ndlwini ka n’wina anze li xa. 23 Nkama Yehovha a nga ta hundza swaku a hlasela Vagibita, a gama a vona ngati henhla ka nyanghwa ni ka matlhelo mambirhi ya aru la xipfalu, Yehovha a ta hundza ka xipfalu xolexo, a nga ta li tshika khombo swaku li dlaya munhu ni mun’we ka tiyindlo ta n’wina.+

24 “Mi fanele mi swi khumbuka leswi, nawu lowu wu ta tirha hi masiku ni masiku ka n’wina ni ka vana va n’wina.+ 25 Nkama mi nga ta ku swee, ka tiko leli Yehovha a nga ta mi nyika lona leli a nga mi tshembisa lona, mi fanele mi li yendla fexta leli.+ 26 Loko vana va n’wina va tshuka va mi vutisa va ku: ‘Kasi mi li yendlela yini fexta leli?’+ 27 Mi fanele mi ku: ‘I gandzelo la Paxkwa la Yehovha, lweyi a nga tshama a hundza henhla ka tiyindlo ta Vayisrayele aGibita nkama a a hlasela Vagibita kambe a nga ti hlaselanga tiyindlo ta hina.’”

Kutani vanhu va khizama, swimombo swa vona swi txuvuka hansi. 28 Se Vayisrayele va famba va ya yendla hinkwaswu leswi Yehovha a nga byela Moxe na Aroni.+ Va vhele va yendla swoleswo.

29 Kutani hi xikarhi ka wusiku Yehovha a dlaye matevula hinkwawu ka tiko la Gibita,+ ku sukela ka matevula ya Faru lweyi a a tshame ka xitshamu xa wuhosi ku ya fika ka matevula ya xib’ochwa lexi a xi li djele ni matevula hinkwawu ya swifuyu.+ 30 Faru, vatirhi va yena ni Vagibita hinkwavu va pfukile niwusiku naswona Vagibita a va ba nkosi wawukulu hikusa a ku fiwile ka miminti hinkwayu.+ 31 Faru a yo vhela a vitana Moxe na Aroni+ ka wusiku lolelo a va byela leswi: “Sukani la, mi huma xikarhi ka vanhu va mina, n’wina ni Vayisrayele lavan’wani. Fambani mi ya tirhela Yehovha hi ku landza leswi mi nga swi hlaya.+ 32 Tekani ni mintlhambi ya n’wina ya tinyempfu ni ya tihomu mi suka la, hi ku landza leswi mi nga hlaya swona.+ Kambe ni katekiseni na mina.”

33 Se Vagibita va sungula ku kombela swaku vanhu va huma ka tiko la vona hi rupurupu+ na va ku: “Phela hinkwerhu se hi file!”+ 34 Vanhu va rhwale trigu la ku pfuviwa na li nga se cheliwa fermentu ni matijela ya ku pfuvela ka wona na ma phutseliwe hi mpahla ya vona. 35 Vayisrayele va yendle leswi Moxe a nga va byela swona, se va kombela swilo leswi nga yendliwa hi prata ni woru ni mpahla ka Vagibita.+ 36 Yehovha a yendle swaku Vagibita va va komba timpsalu vanhu va yena va za va va nyika swilo leswi va nga va kombela, se Vayisrayele va tekele Vagibita swilo swa vona.+

37 Kutani Vayisrayele va suke Ramisesi+ va ya Sukoti,+ a ku ni kolomuyani ka 600.000 wa vavanuna lava a va famba hi minenge na ku nga kontiwi vana.+ 38 Kutani va fambe ni ntlawa wawukulu wa vanhu va ku kala va nga li Vayisrayele,*+ ku patsa ni mintlhambi ya tinyempfu ni ya tihomu, swifuyu swa swinyingi hintamu. 39 Va sungule ku hamba mapawu ya redondu ya ku kala fermentu hi ku tirhisa trigu la ku pfuviwa leli va nga huma na lona hi Gibita. A ma nga cheliwanga fermentu hikusa va hlongoliwe Gibita hi rupurupu lakakuva a va kumanga ni nkama wa ku lunghiselela hambi swakudla swa ku va dla hi ndlela.+

40 Vayisrayele va tshame 430 wa malembe+ aGibita.+ 41 Siku ku nga hela 430 wa malembe, xitshungu* hinkwaxu xa Yehovha xi humile ka tiko la Gibita. 42 I wusiku leli va nga ta kombisa ku khensa Yehovha hi mhaka ya leswi a nga va humesa ka tiko la Gibita. I wusiku leli Vayisrayele hinkwavu ni vatukulu va vona hinkwavu+ va nga ta yendlela Yehovha fexta.

43 Kutani Yehovha a byela Moxe na Aroni a ku: “Hi lowu nawu wa Paxkwa: A ku na munhu wa tiko lin’wani lweyi a nga ta dla Paxkwa.+ 44 Kambe loko ku ni lweyi a nga ni xikarawa xa xinuna lexi a nga xi xava hi male a fanele a xi tsema nsuvu*+ se hi kona xi nga sungulaka ku dla paxkwa. 45 A vanhu va tiko lin’wani lava tshamaka na n’wina ni vatirhi va n’wina, a va fanelanga va dla paxkwa. 46 A nyempfu yi fanele yi dliwa ka yindlo yin’we ntsena. A mi fanelanga mi teka nyama yin’wani mi yi humesa handle naswona a mi fanelanga mi tshova marhambu ya yona.+ 47 Vayisrayele hinkwavu va fanele va yendla paxkwa. 48 Loko munhu wa tiko lin’wani lweyi a tshamaka na n’wina a lava ku yendlela Yehovha Paxkwa, vavanuna hinkwavu lava tshamaka ka ndjangu wa yena va fanele va tsema nsuvu, se hi kona a nga tshinelaka ka fexta la paxkwa naswona a ta fanisiwa ni Vayisrayele lavan’wani. Kambe a ku na munhu ni mun’we lweyi a faneleke a dla paxkwa na a nga tsemanga nsuvu.+ 49 A nawu lowu wu fanele wu tirha ka Muyisrayele ni ka munhu wa tiko lin’wani lweyi a tshamaka na n’wina.”+

50 Se Vayisrayele hinkwavu va yendla leswi Yehovha a nga byela Moxe na Aroni. Va vhele va swi yendlisa swoleswo. 51 Hi siku lolelo, Yehovha a humese Vayisrayele* hinkwavu ka tiko la Gibita.

13 Yehovha a tlhela a khuluma na Moxe a ku: 2 “Ni langeleni matevula hinkwawu ya xinuna ka Vayisrayele. Matevula ya xinuna ya vanhu ni ya swiharhi i ya mina.”+

3 Se Moxe a byela vanhu a ku: “Khumbukani siku leli mi nga huma hi lona Gibita+ ka tiko leli a mi li swikarawa,* hikusa hi voko la matimba, Yehovha a mi humesile ka tiko leli.+ Se mi nga tshuki mi dla nchumu lexi nga cheliwa fermentu. 4 Namuntlha hi wheti leyi ya Abibi,*+ ma humesiwa ka tiko leli. 5 A nkama Yehovha a nga ta mi yisa ka tiko la Vakanana, la Vaheti, la Vaamori, la Vahivhi ni la Vayebusi,+ leli a nga funga ka vavhovho va n’wina swaku a ta mi nyika lona,+ tiko la kona li nga tala hi leiti ni wulombe,+ mi fanele mi hamba fexta leli hi wheti leyi ya Abibi. 6 Mi ta dla mapawu ya ku kala fermentu+ ku za ku hela 7 wa masiku, se hi siku la wu 7 ku ta va ni fexta* la Yehovha. 7 Mi fanele mi dla mapawu ya ku kala fermentu anze ku hela 7 wa masiku;+ mi nga tshuki mi kumiwa+ ni nchumu lexi nga cheliwa fermentu naswona mi nga tshuki mi kumiwa ni fermentu ka tindhawu* ta n’wina hinkwatu. 8 Se hi siku lolelo u ta byela n’wana wa wena u ku: ‘Ni hamba fexta leli hi mhaka ya leswi Yehovha a nga ni yendlela swona nkama ni nga huma Gibita.’+ 9 Fexta leli li ta va xikombiso lexi nga tsaliwa ka voko la wena ni ka ximombo xa wena.*+ Li ta ku khumbukisa swaku u fanele u vulavula hi nawu wa Yehovha. Naswona li ta tlhela li ku khumbukisa swaku Yehovha hi yena a nga ku humesa ka tiko la Gibita hi matimba ya yena yamakulu. 10 U fanele u yingisa nawu lowu, kutani u hamba fexta leli lembe ni lembe+ hi nkama lowu nga vekiwa.

11 “Nkama Yehovha a nga ta ku yisa ka tiko la Vakanana, leli a nga funga swaku a ta ku nyika lona, wena ni vavhovho va wena,+ 12 u fanele u nyika Yehovha vana hinkwavu va xinuna va matevula ni swiharhi hinkwaswu swa xinuna swa matevula leswi u nga ta swi kuma. Matevula hinkwawu ya xinuna i ya Yehovha.+ 13 Mbongolo yin’wani ni yin’wani ya matevula u fanele u yi hakelela* hi nyempfu, loko mbongolo ya kona u nga yi hakeleli, u fanele u yi tshova nhamu. Ni vana va wena hinkwavu va xinuna lava nga matevula na vona u fanele u va hakelela.+

14 “Loko n’wana wa wena a tshuka a ku vutisa hi ku famba ka nkama a ku: ‘Swi vula yini leswi?’ Mu hlamuli u ku: ‘Yehovha a hi humese Gibita ka tiko la wukarawa hi voko la matimba.+ 15 Nkama Faru a nga tiwomisa nhloko a yala ku hi tshika hi famba,+ Yehovha a dlaye matevula hinkwawu ka tiko la Gibita, ku sukela ka matevula ya munhu anze ka matevula ya xiharhi.+ Hi leswo swi ni yendlaka ni nyika Yehovha matevula hinkwawu ya xinuna ni tlhela ni kutsula matevula hinkwawu ya vana va mina va xinuna.’ 16 Leswi swi ta va xikombiso ka voko la wena ni ka ximombo xa wena,*+ hikusa Yehovha a hi humese Gibita hi voko la yena la matimba.”

17 Nkama Faru a nga tshika vanhu va famba, Xikwembu a xi va fambisanga hi ndlela leyi a yi li ka tiko la Vafilista hambileswi a yi ta va yendla va hantla va fika. Hikusa Xikwembu xi te: “Loko vanhu lava vo tshuka va kumana ni nyimpi va ta txintxa mimpimiso ya vona va gama va tlhelela Gibita.” 18 Hi mhaka leyo Xikwembu xi yendle swaku vanhu va rhendzelekela hi ndlela leyi nga mananga ka Lwandle la Ku Pshuka.+ Kambe Vayisrayele va hume Gibita ku fana ni mintlawa ya masonchwa.* 19 Moxe a tlhele a teka ni marhambu ya Yosefa, hikusa Yosefa a a yendle swaku Vayisrayele va funga swaku va ta swi yendla leswo nkama a nga te: “Xikwembu xi ta va na n’wina naswona mi fanele mi teka marhambu ya mina mi huma na wona ka tiko leli.”+ 20 Se va gama va suka Sukoti va ya gwimba matende ya vona aEtamu amagamu ka mananga.

21 Yehovha a a famba phambheni ka vona, ninhlikanhi a a va kongomisa+ hi ku tirhisa rhefu kasi niwusiku a a tirhisa ndzilu swaku wu va voningela va kota ku famba ninhlikanhi ni wusiku.+ 22 Rhefu a li nga suki phambheni ka vanhu ninhlikanhi, hambi ndzilu a wu nga suki niwusiku.+

14 Kutani Yehovha a khuluma na Moxe a ku: 2 “Byela Vayisrayele swaku va tlhela va ya gwimba matende ya vona phambheni ka Piyayiroti axikarhi ka Migidoli ni lwandle, va txuvukana ni Bali-Zefoni. Mi fanele mi gwimba matende ya n’wina ma txuvuka Bali-Zefoni+ akusuhi ni lwandle. 3 Kutani Faru a ta vula leswi hi Vayisrayele: ‘Va lahlekile atikweni, swa tikomba swaku va dungeke tinhloko, naswona a va na ka ku huma mananga.’ 4 Ni ta pfumelela swaku Faru a tiwomisa nhloko yi ku roo+ naswona a ta va hlongolisa, ni ta dzunisa vito la mina hi ku hlula Faru ni masonchwa ya yena hinkwawu.+ Phela Vagibita va ta swi tiva swaku hi mina Yehovha.”+ Se Vayisrayele va yendla swoleswo.

5 Hi ku famba ka nkama, hosi ya Gibita yi byeliwe swaku vanhu va balekile. Se Faru ni vatirhi va yena va tekela ku tilaya hileswi va nga tshika vanhu va famba,+ va gama va ku: “Hi mhaka muni hi yendle leswi? Hi mhaka muni hi tshike swikarawa swa hina swa Vayisrayele swi famba?” 6 Kutani Faru a lulamisa tinyolo* ta yena ta nyimpi, a gama a teka vanhu va yena a famba na vona.+ 7 A teka ni 600 wa tinyolo ta makavhalu ta xiyimu xa le henhla ni tinyolo tin’wani hinkwatu ta Gibita a famba na tona, phela hinkwatu a ti fambisiwa hi tinhenha ta nyimpi. 8 Se Yehovha a pfumelela swaku Faru hosi ya Gibita a tiwomisa nhloko yi ku roo. Se a gama a hlongolisa Vayisrayele lava nga huma ka tiko la Gibita na va nga chavi nchumu.+ 9 Vagibita va hlongolise+ Vayisrayele na va ni tinyolo hinkwatu ta makavhalu ya Faru, vafambisi va makavhalu ni masonchwa hinkwawu ya nyimpi. Va fike va va kuma na va ha gwimbe matende ya vona kusuhi ni lwandle, akusuhi ni Piyayiroti lomu a ku txuvukane ni Bali-Zefoni.

10 Nkama Faru na a tshinela, Vayisrayele va vone swaku phe Vagibita va le ku teni. Se va sungula ku va chava hintamu va gama va ba nyandha ka Yehovha.+ 11 Va byela Moxe va ku: “Ko kala ku nga na masirha Gibita swaku u za u hi tisa la mananga swaku hi ta fela kona?+ Hi mhaka muni u hi yendle leswi? U hi humesele yini Gibita ke? 12 Kasi a hi ku byelanga nkama na hi li Gibita hi ku: ‘Hi tshike hi tirhela Vagibita’? Hikusa swa yampsa hi tirhela Vagibita ku tlula ku fa lani mananga.”+ 13 Se Moxe a byela vanhu a ku: “Mi nga chaveni.+ Tiyani nhlana mi vona loko Yehovha a mi ponisa namuntlha.+ Hikusa Vagibita lava mi va vonaka namuntlha a mi nge he tshuki mi va vonile ni siku ni lin’we.+ 14 Phela Yehovha a ta mi lwela,+ se n’wina mi ta miyela mi ku whii.”

15 Yehovha a byela Moxe a ku: “Hi mhaka muni u tshamela ku ni rilela ke? Byela Vayisrayele swaku va hahlula matende ya vona. 16 Se wena tlakusa nhonga ya wena henhla ka lwandle, u li yava hi xikarhi, swaku Vayisrayele va ta famba xikarhi ka lona na misava yi womile. 17 Ni tshike Vagibita va tiwomisa nhloko swaku va ta gama va nghena ka lwandle na va hlongolisa Vayisrayele; kutani mina ni ta tidzunisa hi ku hlula Faru ni masonchwa ya yena hinkwawu ya nyimpi, ni tinyolo ta yena ta nyimpi ni vafambisi va makavhalu ya yena.+ 18 Se Vagibita va ta swi tiva swaku hi mina Yehovha nkama ni nga ta dzunisa vito la mina hi ku hlula Faru, tinyolo ta yena ta nyimpi ni vafambisi va makavhalu ya yena.”+

19 Kutani ntsumi ya Xikwembu xa ntiyiso+ leyi a yi famba phambheni ka Vayisrayele yi suka yi ya nyima ndzhaku ka vona, se rhefu leli a li li phambheni ka vona na lona li suka li ya nyima ndzhaku ka vona.+ 20 Kutani rhefu li nyime xikarhi ka Vagibita ni Vayisrayele.+ Ka tlhelo lelin’wani la rhefu a ku yo mphum. Kasi ka tlhelo lelin’wani a ku yo baa niwusiku.+ Vagibita a va zanga va tshinela ka Vayisrayele wusiku hinkwalu.

21 Se Moxe a tlakusa voko la yena henhla ka lwandle;+ kutani Yehovha a yendla swaku ku ba moya wawukulu wusiku hinkwalu, lowu a wu ta hi wuxeni, se lwandle li sungule ku yavana hi xikarhi+ naswona misava ya lwandle yi woma.+ 22 Vayisrayele va famba axikarhi ka lwandle na misava yi womile,+ kuve mati a ma li makhumbi ka tlhelo la vona la xinene ni la ximatsi.+ 23 Kutani Vagibita, makavhalu hinkwawu ya Faru, tinyolo ta yena ta nyimpi ni vafambisi va makavhalu ya yena va txatxa Vayisrayele, va fika va ku swee ka lwandle.+ 24 Nkama na li ya ku xeni,* Yehovha a txuvuke ntlawa wa Vagibita na a li ka ndzilu ni le ka rhefu,+ a gama a va dunga tinhloko va nga xi tivi ni xa ku xi yendla. 25 A tlhela a susa maroda ka tinyolo ta vona lakakuza swi va tikela ku ti fambisa. Se Vagibita va ku: “A hi va balekeni Vayisrayele, hikusa Yehovha wa va lwela ka Vagibita.”+

26 Se Yehovha a byela Moxe a ku: “Tlakusa voko la wena henhla ka lwandle swaku mati ma mbhonya Vagibita, tinyolo ta vona ta nyimpi ni vafambisi va makavhalu ya vona.” 27 Moxe a vhela a tlakusa voko la yena henhla ka lwandle, kutani nkama a li ya ku xeni, mati ya lwandle ma sungula ku tlhelela ka ndhawu ya wona. Nkama Vagibita a va zama ku baleka, Yehovha a diba Vagibita axikarhi ka lwandle.+ 28 Mati ma mbhonya tinyolo ta nyimpi ni vafambisi va makavhalu ni masonchwa hinkwawu ya Faru lama nga nghena ka lwandle na ma hlongolisa+ Vayisrayele. Phela a ku ponanga ni mun’we ka vona.+

29 Kambe Vayisrayele va fambe ka misava ya ku woma axikarhi ka lwandle+ naswona mati a ma li makhumbi ka tlhelo la vona la xinene ni la ximatsi.+ 30 Hi siku lolelo Yehovha a va ponise hi ndlela yoleyo Vayisrayele ka Vagibita naswona Vayisrayele va game va vona Vagibita+ na va file va ku jii ahandle ka lwandle. 31 Vayisrayele va tlhele va vona matimba yamakulu lawa Yehovha a nga ma tirhisa swaku a lwa ni Vagibita, naswona vanhu va sungule ku chava Yehovha ni ku va ni lipfumelo ka Yehovha ni ka mutirheli wa yena Moxe.+

15 Hi nkama wolowo Moxe ni Vayisrayele va yimbelele lisimu leli ka Yehovha:+

“Ni yimbelelela Yehovha, hikusa a hlule hi ndlela ya ku hlamalisa.+

A dibe makavhalu ni vafambisi va wona ka lwandle.+

 2 Yehovha* i ntamu wa mina ni matimba ya mina, hikusa hi yena a nga ni ponisa.+

Lexi i Xikwembu xa mina, ni ta xi dzunisa;+ i Xikwembu xa papayi wa mina,+ phela ni ta xi tlakusa.+

 3 Yehovha i nhenha ya matimba.+ Yehovha i vito la yena.+

 5 Magandlati ma va mbhonyile; va mbombomelile ku fana ni ribye ka mati ya ku yenta.+

 9 Nala a te: ‘Ni ta va hlongolisa! Ni ku va katla!

Ni ta teketela tshomba la vona ni za ni kolwa!

Ni ta humesa xipada xa mina! Ni va dlaya!’+

11 Yehovha Xikwembu xa mina, i mani lweyi a fanaka na wena xikarhi ka swikwembu?+

I mani lweyi a fanaka na wena, lweyi a kwetsimaka swinene?+

Lweyi a faneleke a chaviwa hi tinsimu ta ku dzunisa, Lweyi a yendlaka minchumu ya ku hlamalisa.+

12 U tlakuse voko la wena la xinene naswona misava yi va mintile.+

Ni vanhu hinkwavu lava tshamaka Kanana va ta hela ntamu.+

16 Va ta chava, va karhateka.+

18 Yehovha i hosi hi masiku ni masiku.+

20 Kutani Miriyamu muprofeta wa xisati, makwavu wa Aroni, a khoma xingomana, se vavasati hinkwavu na vona va mu landzela na va khome swingomana swa vona va tlhela va txina. 21 Miriyamu a hlamule vavanuna hi lisimu a ku:

“Yimbelelani Yehovha, hikusa a tlakusiwile hintamu.+

A kavhalu ni mufambisi wa lona a swi txukumete lwandle.”+

22 Se Moxe a gama a rhangela Vayisrayele va suka ka Lwandle la Ku Pshuka va ya mananga ya Xuri, va fambe masiku manharhu amananga, kambe a va zanga va kuma mati. 23 Nkama va nga fika Mara*+ va kume mati kambe a va gwentanga ku ma phuza hikusa a ma dzunga. Hi leswo swi nga yendla a chula ndhawu yoleyo a ku i Mara. 24 Kutani vanhu va sungula ku khala ka Moxe,+ va ku: “Kasi hi ta phuza yini ke?” 25 Se Moxe a kombela Yehovha+ swaku a mu pfuna, kutani Yehovha a gama a mu komba xinsinyani. Nkama a nga xi teka a xi peta ka mati, ma sungula ku tsokombela.

Hi lanu Xikwembu xi nga va nyika nawu ni xivangelo xa wuyavanyisi. Naswona Xikwembu xi tlhele xi va ringa.+ 26 Xi ku: “Loko mo ni yingisa, mina Yehovha Xikwembu xa n’wina, mi ni yendlela swaswinene mi tlhela mi yingisa minawu ya mina ni hinkwaswu leswi ni mi byelaka swona,+ a ni nge tshuki ni mi tisela mavabyi lawa ni nga ba Vagibita hi wona,+ hikusa mina Yehovha ni ta mi hanyisa.”+

27 Va gama va fika Elimi, lani a ku ni 12 wa swihlovo swa mati ni 70 wa minsinya ya mintxindzu. Se va gwimba kolanu matende akusuhi ni mati.

16 Loko se va suke aElimi, Vayisrayele hinkwavu va game va fika mananga ya Sini,+ lama nga xikarhi ka Elimi ni Sinayi. Va fike hi diya 15 ka wheti ya wumbirhi loko se va hume ka tiko la Gibita.

2 Kutani Vayisrayele va sungula ku ngurangurela Moxe na Aroni amananga.+ 3 Vayisrayele a va tshamela ku va byela va ku: “A swi ta yampsa loko a hi dlayiwile hi voko la Yehovha ka tiko la Gibita lomu a hi tshama phambheni ka tipanela ta nyama,+ hi tlhela hi dla pawu hi xurha. Se swoswi mi hi tise lani mananga swaku mi ta dlaya vanhu hinkwavu lava hi ndlala.”+

4 Yehovha a byela Moxe a ku: “Ni ta mi nisela pawu hi tilweni+ naswona hinkwenu mi fanele mi rholela leswi munhu a kotaka ku swi dla hi siku.+ Ni lava ku va ringa ni ta vona swaku va ta yingisa nawu wa mina kumbe a va nga ta wu yingisa.+ 5 Kambe hi siku la wu 6,+ nkama va nga ta hlengeleta leswi va nga ta swi rholela, va fanele va hlengeleta leswi nga ta ringana masiku mambirhi ku tlula leswi va swi rholelaka masiku man’wani.”+

6 Se Moxe na Aroni va byela Vayisrayele hinkwavu va ku: “Nimadlambu mi ta swi tiva swaku i Yehovha lweyi a nga mi humesa ka tiko la Gibita.+ 7 Nimixo mi ta vona matimba yamakulu* ya Yehovha, hikusa Yehovha a mi twile na mi mu ngurangurela. Kasi ho va vamani swaku mi hi ngurangurela ke?” 8 Moxe a tlhela a ku: “Nkama Yehovha a nga ta mi nyika nyama swaku mi dla nimadlambu ni pawu swaku mi dla mi xurha nimixo, mi ta swi vona swaku Yehovha a ku twile ku ngurangura ka n’wina loku mi mu ngurangurelaka hi kona. Kambe hina ho va vamani? Phela a mi ngurangurelanga hina, kambe mi ngurangurele Yehovha.”+

9 Kutani Moxe a byela Aroni a ku: “Byela Vayisrayele u ku: ‘Tshinelani phambheni ka Yehovha, hikusa a ku twile ku ngurangura ka n’wina.’”+ 10 Nkama Aroni a nga gama ku khuluma ni Vayisrayele va yo vhela va ndzuluka va txuvuka tlhelo la le mananga, kutani ku phatima ka Yehovha ku humelela ka rhefu.+

11 Yehovha a tlhela a khuluma na Moxe a ku: 12 “Ni ku twile ku ngurangura ka Vayisrayele.+ Se va byeli leswi: ‘Nimadlambu mi ta dla nyama kasi nimixo mi ta dla pawu mi xurha,+ mi ta swi tiva swaku hi mina Yehovha Xikwembu xa n’wina.’”+

13 Loko li pela ku te tin’hwarhi* ti fika ti tata lomu a va gwimbe kona matende,+ kasi nimixo a ku ni mberha. 14 Nkama mberha yi nga nyamalala a ku ni swilo swa ku fananyana ni tindzhoho leswi a swi mbhonye misava,+ swilo swa kona a swi fana ni gamboko.* 15 Nkama Vayisrayele va nga swi vona va sungule ku vutisana va ku: “I mpsini leswi?” Hikusa a va nga swi tivi swaku i mpsini. Moxe a va byela a ku: “I pawu leli Yehovha a nga mi nyika lona swaku mi li dla.+ 16 Yehovha a hlaye leswi: ‘Mun’wani ni mun’wani a ta rholela hi ku ya hi mpimu lowu a dlaka wona. Mun’wani ni mun’wani wa n’wina a fanele a hlengeleta swa ku ringana omere* lin’we+ hi ku ya hi numeru ya vanhu lava a tshamaka na vona ka tende la yena.’” 17 Vayisrayele va sungule ku yendla swoleswo; van’wani va rholele swa swinyingi, kasi van’wani va rholele swaswitsongo. 18 Nkama va nga swi pima hi omere, va kume swaku lweyi a nga rholela swa swinyingi a nga saleliwanga, ni lweyi a nga rholela swaswitsongo a nga choteliwanga hi nchumu.+ Hinkwavu va rholele leswi va nga ta swi dla.

19 Se Moxe a va byela a ku: “A ku na munhu ni mun’we lweyi a faneleke a swi siyela mundzuku.”+ 20 Kambe a va mu yingisanga Moxe. Loko van’wani va zama ku swi siyela mundzuku, swi hume swivungwani swi tlhela swi nun’hwa hintamu. Se Moxe a va kwatela. 21 A va swi rholela mixo wun’wani ni wun’wani, munhu ni munhu hi ku ya hileswi a a ta swi dla. Loko dlambu li hisa a swi deretera.*

22 Kutani hi siku la wu 6, va rholele leswi a swi ringana masiku mambirhi,+ munhu mun’wani ni mun’wani a rholele swa ku tata tiomere timbirhi. Se hinkwavu lava a va rhangela Vayisrayele va ye va ya byela Moxe leswi swi nga yendleka. 23 A va byela leswi: “Yehovha a vule leswi: Mundzuku ku ta humuliwa,* i savata ya ku kwetsima ka Yehovha.+ Woxani leswi mi faneleka mi swi woxa, mi vilisa leswi mi faneleka mi swi vilisa;+ kutani leswi swi nga ta sala mi ta swi hlayisa anze mundzuku.” 24 Se va swi hlayisa anze mundzuku nimixo hi ku landza leswi Moxe a nga va byela swona, a swi nun’hwanga kumbe ku huma swipungwani. 25 Kutani Moxe a ku: “Dlanani swona namuntlha, hikusa namuntlha i Savata ya Yehovha. Namuntlha a mi nge kumi nchumu seniyani handle ka matende ya n’wina. 26 Mi ta rholela swakudla 6 wa masiku, kambe hi siku la wu 7, ku nga Savata,+ a swi nga ta va kona.” 27 Kambe vanhu van’wani va humile hi siku la wu 7 leswaku va ya swi rholela, kambe a va kumanga nchumu.

28 Se Yehovha a byela Moxe a ku: “Kasi mi ta yala ku yingisa minawu ya mina ni leswi ni mi byelaka swona anze siku muni ke?+ 29 Khumbukani swaku Yehovha a mi nyike Savata.+ Hi leswo swi yendlaka swaku hi siku la wu 6 a mi nyika pawu swaku mi dla masiku mambirhi. Mun’wani ni mun’wani a fanele a tshama lomu a nga kona; a ku na munhu ni mun’we lweyi a faneleke a suka ka ndhawu ya yena hi siku la wu 7.” 30 Se vanhu va yendla leswi va nga byeliwa swaku va swi yendla hi Savata hi siku la wu 7.+

31 Vayisrayele va chule pawu lolelo va ku i “mana.”* A li base ku fana ni mbewu ya kowentru naswona a li nandzika ku fana ni mabulaxa lawa ma nga cheliwa wulombe.+ 32 Se Moxe a ku: “Yehovha a vule swaku ku yendliwa leswi: ‘Tata omere hi mana, u li hlayisa, leswaku vana va wena lava va nga ta va kona ka nkama lowu taka+ va ta vona pawu leli ni nga mi nyika lona swaku mi dla amananga nkama ni nga mi humesa ka tiko la Gibita.’” 33 Se Moxe a byela Aroni a ku: “Teka khuwani u chela mana leyi ringanaka omere, u gama u li veka phambheni ka Yehovha u li hlayisela vana va wena hinkwavu lava nga ta va kona ka nkama lowu taka.”+ 34 Aroni a li veka phambheni ka kaxa la Wumboni,*+ hi ku landza leswi Yehovha a nga mu byela swona Moxe leswaku li ta hlayiseka. 35 Vayisrayele va hete 40 wa malembe+ na va dla mana, anze va fika ka tiko leli a ku tshama vanhu.+ Va dle mana anze va ya fika kusuhi ni tiko la Kanana.+ 36 Efa* yi tatiwa hi 10 wa tiomere.

17 Vayisrayele va yendla leswi Yehovha a nga va byela swona,+ va suka mananga ya Sini+ va fika va gwimba matende ya vona aRefidimi.+ Kambe a ku nga na mati swaku vanhu va phuza.

2 Se vanhu va sungula ku holovisa Moxe+ va ku: “Hi nyiki mati ya ku phuza.” Kambe Moxe a ku: “Hi mhaka muni mi ni holovisa? Hi mhaka muni mi tshamela ku ringa Yehovha?”+ 3 Kambe vanhu va tame va ngurangurela Moxe+ hi mhaka ya leswi a va twa torha ngopfu va ku: “U hi humesele yini Gibita swaku u ta hi dlaya hi torha, ni vana va hina ni swifuyu swa hina ke?” 4 Moxe a gama a ya kombela ku pfuniwa hi Yehovha a ku: “Se ni ta ku yini hi vanhu lava? Phela va ta za va ni ba hi maribye!”

5 Kutani Yehovha a byela Moxe a ku: “Famba phambheni ka vanhu naswona teka ni madoda man’wani ya Vayisrayele ku patsa ni nhonga leyi u nga ba Nambu wa Nilu hi yona.+ Yi tamele u famba. 6 Phela ni ta va na ni nyime phambheni ka wena kohala ka ribye aHorebi. U fanele u ba ribye se ku ta gama ku huma mati swaku vanhu va ta phuza.”+ Moxe a yendle swoleswo phambheni ka madoda ya Vayisrayele. 7 Se a chula ndhawu yoleyo a ku i Masa*+ na Meriba,*+ hi mhaka ya leswi Vayisrayele va nga holovisa Moxe ni leswi va nga ringa Yehovha,+ va ku: “Indjhe Yehovha a kona xikarhi ka hina kumbe a nga kona?”

8 Kutani Vaamaleki+ va ta swaku va ta lwa ni Vayisrayele aRefidimi.+ 9 Se Moxe a byela Yoxuwa+ a ku: “Hi langeli vavanuna u gama u famba na vona mi ya lwa ni Vaamaleki. Mundzuku ni ta nyima henhla ka ganga na ni khome nhonga ya Xikwembu xa ntiyiso.” 10 Se Yoxuwa a yendla leswi Moxe a nga mu byela swona,+ a famba a ya lwa ni Vaamaleki. Kutani Moxe, Aroni na Huri+ va khwela va ya henhla ka ganga.

11 Loko Moxe a tlakusa mavoko ya yena, Vayisrayele a va hlula, kambe loko a ma yisa hansi, Vaamaleki a va hlula. 12 Nkama mavoko ya Moxe ma nga sungula ku karhala, va teke ribye va li veka hansi ka yena swaku a tshama ka lona. Se Aroni na Huri va seketela mavoko ya yena, mun’wani na a nyime ka tlhelo leli kasi mun’wani na a nyime ka tlhelo lelin’wani, swaku mavoko ya yena ma nyima ma tiya anze dlambu li pela. 13 Kutani Yoxuwa a hlula Amaleki ni masonchwa ya yena hi xipada.+

14 Se Yehovha a byela Moxe a ku: “Tsala leswi ka buku swaku swi ta va xitsundzuxu u tlhela u swi byela Yoxuwa u ku: ‘Ni ta yendla swaku Amaleki a nga ha tshuki a khumbukiwa hansi ka matilo.’”+ 15 Moxe a gama a yaka altari a yi chula swaku i Yehovha-Nisi,* 16 a ku: “Hikusa voko la Amaleki li lwa ni xitshamu xa wuhosi xa Yehovha,*+ Yehovha a ta lwa ni vana va Amaleki hinkwavu lava nga ta psaliwa ka nkama lowu taka.”+

18 Yetro muprista wa le Midiyani, papayi wa nsati wa Moxe+ a twe swilo hinkwaswu leswi Xikwembu xi nga swi yendlela Moxe ni vanhu va xona, ku nga Vayisrayele, ni leswi Yehovha a nga va humesisa swona Vayisrayele aGibita.+ 2 Yetro, papayi wa nsati wa Moxe a a yamukele Zipora nsati wa Moxe nkama a nga mu tlhelisa kaya ka yena 3 ni vana va yena vambirhi va madjaha.+ Vito la n’wana mun’we a ku li Jerixomu,*+ hikusa Moxe a te: “Ni tshame ka tiko la van’wani”, 4 kasi vito la mun’wani a ku li Eliyezere,* hikusa a te: “Xikwembu xa papayi wa mina i mupfuni wa mina lexi nga ni ponisa ka xipada xa Faru.”+

5 Se Yetro papayi wa nsati wa Moxe a ya ka Moxe ku patsa ni vana va Moxe ni nsati wa yena amananga lomu a a gwimbe kona tende la yena ka ntshava ya Xikwembu xa ntiyiso.+ 6 Kutani a rhuma vanhu va ya byela Moxe va ku: “Mina Yetro+ papayi wa nsati wa wena, ni ta ka wena na ni ni nsati wa wena ni vana va wena vambirhi.” 7 Se Moxe a huma a ya tlhangaveta papayi wa nsati wa yena, kutani a khizama a mu bejara.* Nkama va nga gama ku pfuxelana va nghene ka tende la yena.

8 Moxe a tlhamusele papayi wa nsati wa yena swilo hinkwaswu leswi Yehovha a nga swi yendla ka Faru ni le Gibita hi mhaka ya Vayisrayele,+ swikarhatu hinkwaswu leswi va nga kumana na swona andleleni+ ni ndlela leyi Yehovha a nga va ponisa hi yona. 9 Yetro a tsakisiwe hi swilo hinkwaswu leswi Yehovha a nga swi yendlela Vayisrayele hi ku va ponisa aGibita. 10 Kutani Yetro a ku: “A ku dzunisiwe Yehovha lweyi a nga mi ponisa aGibita ni ka Faru, ni lweyi a nga chunsa vanhu ka ku fumiwa hi Vagibita. 11 Phela swoswi se na swi tiva swaku Yehovha i mukulu ka swikwembu leswin’wani hinkwaswu,+ hi mhaka ya leswi a nga swi yendla ka lava va nga tiveka henhla ka vanhu va yena.” 12 Se Yetro papayi wa nsati wa Moxe a tisela Xikwembu gandzelo la ku hisiwa ni magandzelo man’wani. Kutani Aroni ni madoda hinkwawu ya Vayisrayele va ta leswaku va ta dla swakudla ni papayi wa nsati wa Moxe phambheni ka Xikwembu xa ntiyiso.

13 Hi mundzuku ka kona, Moxe a tshame hansi swaku a yavanyisa vanhu ku nga leswi a a tolovela ku swi yendla, kutani vanhu va nyima phambheni ka Moxe ku sukela nimixo anze nimadlambu. 14 Nkama papayi wa nsati wa Moxe a nga vona swilo hinkwaswu leswi Moxe a a swi yendlela vanhu, a te: “Hi mhaka muni u va yendla leswi vanhu lava? Hi mhaka muni u tshama lanu u yendla ntirho lowu na wu li wexe, se vanhu lava hinkwavu va nyima phambheni ka wena ku sukela nimixo ku ya fikela nimadlambu ke?” 15 Moxe a hlamula papayi wa nsati wa yena a ku: “Hikusa vanhu va tshamela ku ta ka mina va ta vutisa hi Xikwembu. 16 Loko ku humelela mhaka xikarhi ka vanhu vambirhi va yi tisa ka mina swaku ni yi yavanyisa, se ni gama ni va byela swiboho swa Xikwembu xa ntiyiso ni minawu ya xona.”+

17 Papayi wa nsati wa Moxe a mu byela a ku: “Leswi u swi yendlaka a hi swinene. 18 Phela u ta karhala, wena ni vanhu lava u nga na vona hikusa ntirho lowu i wukulu hintamu ka wena, naswona a wu nge swi koti ku wu yendla u li wexe. 19 Swoswi ni yingise. Ni ta ku tsundzuxa naswona Xikwembu xi ta va na wena.+ U munyimeli wa vanhu phambheni ka Xikwembu xa ntiyiso+ naswona u fanele u yisa timhaka ka Xikwembu xa ntiyiso.+ 20 U fanele u va tsundzuxa swiboho ni minawu+ u tlhela u va byela leswi va faneleke va hanyisa swona ni ntirho lowu va faneleke va wu yendla. 21 Kambe u fanele u langa vavanuna lava kotaka ku yavanyisa,+ lava chavaka Xikwembu, lava tshembekaka, lava nyenyaka ku ganya hi ndlela ya ku kanganyisa,+ u va veka swaku va va tindota ta mintlawa ya 1.000 wa vanhu, tindota ta mintlawa ya 100 wa vanhu, tindota ta mintlawa ya 50 wa vanhu ni tindota ta mintlawa ya 10 wa vanhu.+ 22 Va fanele va yavanyisa vanhu loko ku humelela timhaka* naswona loko mhaka ya kona yi karhata va ta yi tisa ka wena,+ kambe timhaka hinkwatu tatitsongo a va ti yavanyise. Tivevukiseli ntirho hi ku va tshika va ku pfuna+ ku yendla ntirho lowu. 23 Loko wo yendla leswi naswona Xikwembu xi ku pfumelela ku swi yendla, u ta swi kota ku yendla ntirho lowu naswona vanhu hinkwavu va ta timukela va tsakile.”

24 Se Moxe a yingisa papayi wa nsati wa yena, a vhela a yendla hinkwaswu leswi a nga mu byela swona. 25 Moxe a langa vavanuna aIsrayele lava va kotaka ku yavanyisa, a va veka swaku va rhangela vanhu, va va tindota ta mintlawa ya 1.000 wa vanhu, tindota ta mintlawa ya 100 wa vanhu, tindota ta mintlawa ya 50 wa vanhu ni tindota ta mintlawa ya 10 wa vanhu. 26 Kutani va yavanyisa vanhu loko ku humelela timhaka. Loko mhaka yi karhata a va yi yisa ka Moxe+ kambe timhaka hinkwatu tatitsongo a va ti yavanyisa. 27 Se Moxe a gama a vhalelisana+ ni papayi wa nsati wa yena, kutani papayi wa nsati wa yena a tlhelela ka tiko la yena.

19 Hi wheti ya wunharhu na Vayisrayele va humile ka tiko la Gibita, hi siku lolelo* va fike mananga ya Sinayi. 2 Va suke aRefidimi+ va ya mananga ya Sinayi va fika va gwimba matende ya vona kona. Vayisrayele va gwimbe matende kolanu phambheni ka ntshava.+

3 Kutani Moxe a khwela ka ntshava swaku a ya kumana ni Xikwembu xa ntiyiso. Kutani Yehovha a mu vitana na a li ka ntshava+ a ku: “Va byeli leswi vatukulu va Yakobe ku nga Vayisrayele: 4 ‘Mi swi vonile leswi ni nga swi yendla ka Vagibita+ ni swaku ni mi rhwale hi timpapa ta magama* ni mi tisa ka mina.+ 5 Kutani loko mo yingisa rito la mina hi ku tshembeka mi tlhela mi hlayisa ntwananu wa mina, hikakunene mi ta va tshomba la mina la lisima xikarhi ka vanhu hinkwavu,+ hikusa misava hinkwayu i ya mina.+ 6 Mi ta va mfumu wa vaprista ni tiko la ku kwetsima ka mina.’+ Marito lawa u ta ma byela Vayisrayele.”

7 Kutani Moxe a famba a ya vitana madoda ya tiko a ma byela marito hinkwawu lawa Yehovha a nga mu byela wona.+ 8 Kutani vanhu hinkwavu va gama va hlamula hi rito lin’we va ku: “Hi tinyimisele ku yendla hinkwaswu+ leswi Yehovha a nga swi vula.” Se Moxe a byela Yehovha leswi vanhu va nga swi vula. 9 Kutani Yehovha a byela Moxe a ku: “Ni ta ka wena na ni li ka rhefu la ku mphuma, swaku vanhu va ta swi twa nkama ni nga ta khuluma na wena ni swaku va ta va ni lipfumelo ka wena nkama hinkwawu.” Kutani Moxe a byela Yehovha leswi vanhu va nga swi vula.

10 Se Yehovha a byela Moxe a ku: “Famba ka vanhu, u va yendla va lunghekela ntlhanganu wa ku kwetsima namuntlha ni mundzuku naswona va fanele va hlampsa mpahla ya vona. 11 Va fanele va lunghekela siku la wunharhu, hikusa hi siku lolelo Yehovha a ta xika a ya ka ntshava ya Sinayi phambheni ka vanhu hinkwavu. 12 U fanele u markara matlhelweni ka ntshava lomu vanhu va faneleke va gamela kona, u gama u va byela u ku: ‘Tivoneleni leswaku ku nga tshuki ku va ni munhu ni mun’we lweyi a khwelaka ka ntshava kumbe ku yi khumba. Phela lweyi a nga ta khumba ntshava a ta dlayiwa. 13 A nga fanelanga a khumbiwa hi munhu, kambe a fanele a biwa hi maribye kumbe a txopiwa.* Kumbe i xiharhi kumbe i munhu, a nge hanyi.’+ Kambe loko ku chayiwa limhondzo la nyempfu+ va nga tshinela ka ntshava.”

14 Kutani Moxe a xika hi ka ntshava a ya ka vanhu, a sungula ku yendla vanhu va lunghekela ntlhanganu wa ku kwetsima kutani va hlampsa mpahla ya vona.+ 15 A byela vanhu a ku: “Tilunghiseleleni siku la wunharhu, mi nga fambeni masangu.”

16 Hi siku la wunharhu nimixo, ku sungula ku dzindza, ku hatima ku tlhela ku va ni rhefu la ku mphuma+ henhla ka ntshava naswona ku twala guwa lalikulu la ku chayiwa ka limhondzo, lakakuva vanhu hinkwavu lava a va li ka matende va sungula ku rhurhumela.+ 17 Moxe a humese vanhu ka matende swaku va ta tlhangana ni Xikwembu xa ntiyiso, se va nyima hansi ka ntshava. 18 Ntshava hinkwayu ya Sinayi a yi huma ximusi, hikusa Yehovha a a xike ka yona na a li ka ndzilu;+ ximusi xa kona a xi huma xi ya henhla ku fana ni ximusi xa mududumela naswona ntshava hinkwayu a yi tsekatseka swinene.+ 19 A nkama guwa a li ya li twala hintamu, Moxe a sungule ku khuluma, se rito la Xikwembu xa ntiyiso li mu hlamula.

20 Se Yehovha a xika a ya ka ntshava ya Sinayi. Kutani Yehovha a vitana Moxe na a li henhla ka ntshava, se Moxe a khwela.+ 21 Kutani Yehovha a byela Moxe a ku: “Xika u ya khumbukisa vanhu swaku va nga tshuki va tshinela lani swaku va ta vona Yehovha, hikusa loko vo yendla leswo vanhu va vanyingi va ta fa. 22 Vaprista lava nkama ni nkama va tshinelaka ka Yehovha a va tibasise swaku Yehovha a nga va dlayi.”+ 23 Kutani Moxe a byela Yehovha a ku: “Vanhu a va nge swi koti ku ta ka ntshava ya Sinayi hikusa se u hi be ndleve u ku: ‘Markara lomu vanhu va faneleke va nyima kona ka matlhelo hinkwawu ya ntshava, u yendla ntshava yi kwetsima.’”+ 24 Yehovha a byela Moxe a ku: “Famba, xika u ya teka Aroni u vuya na yena kambe u nga tshiki vaprista ni vanhu swaku va khwela va ta ka Yehovha leswaku ni nga va dlayi.”+ 25 Kutani Moxe a xika a ya ka vanhu a fika a va byela.

20 Se Xikwembu xi vula marito lawa hinkwawu xi ku:+

2 “Hi mina Yehovha Xikwembu xa n’wina, lweyi a nga mi humesa ka tiko la Gibita lomu a mi li swikarawa.*+ 3 A mi fanelanga mi va ni swikwembu swin’wani loku ku nga li mina.+

4 “Mi nga tshuki mi tiyendlela xifaniso xa ku vatliwa kumbe xifaniso xa nchumu lexi nga matilweni kumbe lexi nga misaveni kumbe lexi nga matini hansi ka misava.+ 5 Mi nga tshuki mi swi khizamela kumbe mi xengiwa ku swi tirhela,+ hikusa mina Yehovha Xikwembu xa n’wina, ni Xikwembu lexi lavaka swaku ku gandzeliwa xona ntsena,+ naswona ni Xikwembu lexi khatisaka vana hi mhaka ya xidjoho xa vapapayi va vona ni tlhela ni yendla leswo ka vatukulu* ni ka lixaka la wu 4 ka lava va ni nyenyaka, 6 kambe ni rhandza lava va ni rhandzaka va tlhela va yingisa minawu ya mina,+ anze ka lixaka la wu 1.000.

7 “Mi nga tshuki mi tlanga hi vito la Yehovha Xikwembu xa n’wina,+ hikusa Yehovha a nge tshiki ku khatisa lweyi a tlangaka hi vito la yena.+

8 “Mi nga khohlweni ku hlayisa siku la Savata mi li vona na li kwetsima.+ 9 Mi fanele mi yendla mintirho ya n’wina hinkwayu hi 6 wa masiku ntsena,+ 10 kambe siku la wu 7 li ta va savata ya Yehovha Xikwembu xa n’wina. Mi nga tshuki mi yendla ntirho ni wun’we, n’wina kumbe n’wana wa n’wina wa djaha kumbe wa ntombhi, kumbe xikarawa xa n’wina xa xinuna kumbe xa xisati, kumbe xifuyu xa n’wina kumbe munhu wa tiko lin’wani lweyi mi tshamaka na yena.+ 11 Hikusa Yehovha a hete 6 wa masiku na a yendla matilo, misava, lwandle ni minchumu hinkwayu leyi nga ka swona, a gama a sungula ku humula hi siku la wu 7.+ Hi leswo swi nga yendla swaku Yehovha a katekisa siku la Savata naswona a li yendla li kwetsima.

12 “Hlonipha papayi wa wena ni mamani wa wena+ swaku u ta hanya masiku ya manyingi ka tiko leli Yehovha Xikwembu xa wena a ku nyikaka lona.+

13 “U nga tshuki u dlaya.+

14 “U nga tshuki u mbuyeta.+

15 “U nga tshuki u yiva.+

16 “U nga tshuki u hemba loko u fakaza mhaka hi munhu mun’wani.+

17 “U nga tshuki u navela yindlo ya munhu mun’wani. U nga tshuki u navela nsati wa munhu mun’wani;+ u nga tshuki u navela xikarawa xa yena xa xinuna kumbe xa xisati, kumbe homu kumbe mbongolo ya yena, kumbe nchumu xin’wani ni xin’wani lexi nga xa yena.”+

18 Vanhu hinkwavu a va twa ku dzindza va tlhela va vona ku hatima, va twa guwa la ku chayiwa hi limhondzo va tlhela va vona ximusi na xi huma hi ka ntshava. Loko va vona swilo leswo va sungula ku rhurhumela va gama va ya nyima kule.+ 19 Kutani va byela Moxe va ku: “Wena khuluma na hina, hi ta yingisa, kambe Xikwembu xi nga vulavuli na hina hikusa hi chava ku fa.”+ 20 Se Moxe a byela vanhu a ku: “Mi nga chaveni, hikusa Xikwembu xa ntiyiso xi tele ku ta mi ringa+ swaku mi tama mi xi chava swaku mi nga djohi.”+ 21 Kutani vanhu va tama va nyima hi kule kambe Moxe a tshinela kusuhi ni rhefu la ku mphuma lomu a ku ni Xikwembu xa ntiyiso.+

22 Se Yehovha a byela Moxe a ku: “U ta byela Vayisrayele u ku: ‘Mi swi vone hi n’wexe swaku ni vulavule na n’wina na ni li tilweni.+ 23 Mi nga tshuki mi tiyendlela swikwembu swa prata mina na ni li kona, naswona mi nga tshuki mi tiyendlela swikwembu swa woru.+ 24 Mi ta yendla altari ya misava naswona mi ta yendla ka yona magandzelo ya n’wina ya ku hisiwa, magandzelo ya n’wina ya ku kombela ku rhula hi tinyempfu ni hi tihomu ta n’wina. Ni ta ta ka n’wina ni mi katekisa ka ndhawu yin’wani ni yin’wani leyi ni nga ta yendla swaku vito la mina li khumbukiwa+ ka yona. 25 Loko mi ni yendlela altari ya maribye, mi nga tshuki mi yi yaka hi maribye lawa ma nga tsemiwa. Mi nga tshuki mi tirhisa xa ku tsema hi xona*+ ka altari ya maribye, hikusa loko mi yendla leswo a ni nga ta yi yamukela altari ya kona. 26 Mi nga tshuki mi famba hi swikada loko mi ya ka altari ya mina, swaku swirho swa n’wina swa le xihundleni swi nga voneki ka altari.’

21 “Hi leyi minawu leyi u nga ta va byela yona:+

2 “Loko wo tshuka u xava xikarawa xa Muheberu,+ xi fanele xi va xikarawa xa wena anze ku hela 6 wa malembe, kambe hi lembe la wu 7 xi ta chunsiwa na xi nga zanga xi hakela nchumu.+ 3 Loko xi te xoxe, xi ta famba xoxe. Kambe loko xi te ni nsati wa xona, xi ta famba ni nsati wa xona. 4 Loko n’winyi wa xona a xi nyika nsati se xi gama xi psala* vana va madjaha kumbe va tintombhi, nsati ni vana va ta lumba n’winyi wa xona, se xona xi ta famba na xi li xoxe.+ 5 Kambe loko xikarawa xo sindzisa xi ku: ‘Na mu rhandza n’winyi wa mina, nsati wa mina ni vana va mina; se a ni lavi ku chunsiwa,’+ 6 lweyi a nga n’winyi wa xona, a fanele a xi yisa phambheni ka Xikwembu xa ntiyiso. A ta fika a xi nyimisa a xi khigetela ka xipfalu kumbe ka aru la xipfalu a gama a xi boxa ndleve hi nchumu xa ku boxa hi xona, se xi ta gama xi va xikarawa xa yena wutomi la xona hinkwalu.

7 “Loko munhu o xavisa n’wana wa yena wa xisati leswaku a va xikarawa, n’wana yelweyo a nge chunsiwi ku fana ni machunselo ya xikarawa xa xinuna. 8 Loko n’winyi wa n’wana lweyi wa xisati a nga mu tsakeli naswona a nga mu langi swaku a va nsati wa yena wamutsongo,* kambe a mu xavisa ka munhu mun’wani, a nga na mpfumelelo wa ku mu xavisa ka vanhu va tiko lin’wani hikusa a mu kanganyisile. 9 Se loko a mu langa swaku a va nsati wa n’wana wa yena, a fanele a mu khoma ku fana ni n’wana wa yena wa xisati. 10 Loko n’wana* lweyi o tshuka a teka nsati mun’wani, a fanele a tama a hlayisa lwiyani wa ku sungula hi ku mu nyika swakudla, mpahla ni timfanelo ta wukati.*+ 11 Loko a nga mu yendlele minchumu leyi ya yinharhu, wansati lweyi wa ku sungula a ta famba na a chunsekile a nga hakeli male.

12 “Lweyi a nga ta ba munhu a gama a fa, a fanele a dlayiwa.+ 13 Kambe loko a nga mu dlayanga hi maxivomu naswona Xikwembu xa ntiyiso xi swi pfumelela swaku swi yendleka, ni ta mu langela ndhawu leyi a nga ta balekela ka yona.+ 14 Loko munhu o tshuka a kwatela munhu mun’wani ku tlula mpimu a gama a mu dlaya hi maxivomu,+ munhu yelweyo a fanele a fa hambiloko o ya tumbela ka altari ya mina.+ 15 Lweyi a baka papayi wa yena kumbe mamani wa yena a fanele a dlayiwa.+

16 “Loko munhu o tshuka a yiva munhu mun’wani+ a gama a mu xavisa kumbe a kumiwa na a li na yena,+ a fanele a dlayiwa.+

17 “Lweyi a rhukaka papayi wa yena kumbe mamani wa yena a fanele a dlayiwa.+

18 “Loko vanhu vo tshuka va holova kutani mun’we a ba mun’wani hi ribye kumbe hi xibakela* a nga fi kambe a vavisiwa lakakuva swi lava swaku a tshama na a yetlelile, ku fanele ku yendliwa leswi: 19 Loko lweyi a nga biwa a swi kota ku sekeleka a nyima a famba hi nhonga, lweyi a nga mu ba a nge khatisiwi. Kambe a fanele a hakela munhu lweyi a nga mu vavisa nkama hinkwawu lowu a nga ta tshama na a nga koti ku yendla nchumu anze a kota ku hanya hi ku helela.

20 “Loko munhu o tshuka a ba xikarawa xa yena xa xinuna kumbe xa xisati hi nhonga xi gama xi fa, xi fanele xi hakeliwa.+ 21 Kambe loko xo hanya siku lin’we kumbe mambirhi, a xi nge hakeliwi hikusa xi xaviwe hi male ya n’winyi wa xona.

22 “Loko vanhu vo tshuka va lwa va gama va vavisa wansati lweyi a nga ni nyimba se a psala na nkama wa yena wu nga se fika*+ kambe ku nga fi munhu, lweyi a nga mu vavisa a fanele a hakela hinkwaswu leswi nuna wa wansati lweyi, a nga ta mu hakelisa swona; a fanele a ya swi hakela phambheni ka vayavanyisi.+ 23 Kambe loko ko tshuka ku fa munhu, wutomi li fanele li hakeliwa hi wutomi.*+ 24 Tihlo hi tihlo, tinyu hi tinyu, voko hi voko, nenge hi nenge.+ 25 Ku psha hi ku psha, xilondza hi xilondza, xibakela hi xibakela.

26 “Loko munhu o tshuka a ba tihlo la xikarawa xa yena xa xinuna kumbe xa xisati li gama li nga ha voni, a fanele a hakela tihlo la xona+ hi ku xi chunsa xi famba. 27 Loko o tshuka a ba tinyu la xikarawa xa yena xa xinuna kumbe xa xisati li suka, a fanele a hakela tinyu la xona hi ku xi chunsa xi famba.

28 “Loko homu yo tshuka yi tlhava wanuna kumbe wansati a gama a fa, homu yoleyo yi fanele yi biwa hi maribye yi za yi fa+ naswona nyama ya yona a yi fanelanga yi dliwa. N’winyi wa homu yoleyo a nge khatisiwi. 29 Kambe loko swi ku homu yoleyo a yi tolovela ku tlhava vanhu naswona n’winyi wa yona a biwe ndleve kambe a nga yi vonelelanga yi gama yi dlaya wanuna kumbe wansati, homu yoleyo yi fanele yi biwa hi maribye yi fa, na yena n’winyi wa yona a fanele a dlayiwa. 30 Kambe loko o tshuka a kombeliwa ku hakela male swaku a nga dlayiwi, a fanele a humesa male hinkwayu leyi a nga ta hakelisiwa yona. 31 Hambi yi tlhave xifanyani kumbe xintombhani, ku fanele ku yendliwa leswi nawu wu vulaka swona hi n’winyi wa homu. 32 Loko homu yi tlhave xikarawa xa xinuna kumbe xa xisati, n’winyi wa homu yoleyo a fanele a hakela n’winyi wa xikarawa xolexo hi 30 wa swikhemu swa prata,* se homu ya kona yi fanele yi biwa hi maribye yi za yi fa.

33 “Loko munhu o tshuka a tshika xihlovo na xi nga pfaliwanga kumbe a txela xihlovo a gama a nga xi mbhonyi, se ku gama ku ta mbongolo kumbe homu yi fika yi pela, 34 n’winyi wa xihlovo a fanele a hakela.+ A fanele a hakela male ya kona ka n’winyi wa xifuyu, se xifuyu lexi nga fa xi ta va xa yena. 35 Loko homu ya munhu yo vavisa homu ya munhu mun’wani yi gama yi fa, va fanele va xavisa homu leyi ya ha hanyaka va gama va yavelana male ya kona; va fanele va tlhela va yavelana ni homu leyi nga fa. 36 Kumbe loko se a swi tiviwa swaku homu yoleyo a yi rhandza ku tlhava vanhu kambe n’winyi wa yona a a nga yi voneleli, a fanele a hakela homu hi homu, se leyi nga fa yi ta va ya yena.

22 “Loko munhu o tshuka a yiva homu kumbe nyempfu a gama a yi dlaya swaku yi dliwa kumbe a yi xavisa, a fanele a hakela homu hi 5 wa tihomu se a nyempfu hi 4 wa tinyempfu.+

2 (“Loko muyivi+ o tshuka a kumiwa na a zama ku tlhanya yindlo a gama a biwa a fa, munhu lweyi a nga mu dlaya a nga na nandzu wa ngati. 3 Kambe loko muyivi o dlayiwa se na li xile, lweyi a nga mu dlaya a ta va ni nandzu wa ngati.)

“Muyivi a fanele a hakela. Kambe loko a nga na nchumu, a fanele a xavisiwa swaku a hakela swilo leswi a nga swi yiva. 4 Loko vo mu kuma ni leswi a nga swi yiva na swa ha hanya, kumbe i homu kumbe i mbongolo kumbe i nyempfu, a fanele a swi hakela kambirhi.

5 “Loko munhu o tshuka a ya lusa swifuyu swa yena masin’wini kumbe ka masimu ya mawuvha a gama a swi tshika swi ya dla ni ka masimu ya munhu mun’wani, a fanele a hakela hi swilo swaswinene swa masin’wini ka yena kumbe hi swilo swaswinene swa masimu ya yena ya mawuvha.

6 “Loko ko tshuka ku tlhavikiwa ndzilu wu gama wu hangalaka wu hisa mimintwa, wu tlhela wu hisa tinyandza ta trigu leli nga tshoveliwa kumbe leli kalaka li nga se tshoveliwa kumbe nsimu, lweyi a nga wu tlhavika a fanele a hakela leswi nga psha.

7 “Loko munhu o tshuka a tamelisa male munhu mun’wani kumbe swilo swin’wani leswaku a swi hlayisa, se swilo swa kona swi gama swi yiviwa kaya ka munhu yelweyo, loko muyivi wa kona a kumiwa, a fanele a hakelisiwa kambirhi.+ 8 Loko muyivi a nga kumiwi, n’winyi wa munti a fanele a yisiwa phambheni ka Xikwembu xa ntiyiso+ swaku ku ya voniwa swaku indjhe a hi yena a nga yi teka ke. 9 Ka mhaka ya munhu lweyi a nga ta kumiwa ni swilo swa ku yiviwa, ku nga ha va homu, mbongolo, nyempfu, mpahla kumbe nchumu xin’wani ni xin’wani xa ku lahleka lexi munhu mun’wani a nga ha tshukaka a vula a ku: ‘Lexi i xa mina,’ vanhu volavo hawumbirhi ka vona va fanele va yisa mhaka ya vona ka Xikwembu xa ntiyiso.+ Se lweyi Xikwembu xi nga ta vula swaku hi yena a nga ni nandzu a fanele a hakela munhu lweyi mun’wani kambirhi.+

10 “Loko munhu o tshuka a kombela munhu mun’wani swaku a mu hlayisela mbongolo ya yena kumbe homu kumbe nyempfu kumbe xifuyu xin’wani, se xi gama xi fa kumbe xi limala kumbe xi tekiwa na xi nga voniwanga hi munhu, 11 lweyi a nga nyikiwa swilo swoleswo swaku a swi hlayisa, a fanele a funga ka lweyi mun’wani na a li phambheni ka Yehovha swaku a hi yena a nga swi teka; se n’winyi wa swona a fanele a pfumela leswi a swi vulaka. Munhu lweyi mun’wani a nge hakeli nchumu.+ 12 Kambe loko xifuyu xa kona va yivele lweyi va nga mu kombela swaku a xi hlayisa, a fanele a hakela ka n’winyi wa xona. 13 Loko swi ku xi yo dlayiwa hi xiharhi xa khwati, a fanele a tisa xifuyu lexi nga dlayiwa swaku xi ta voniwa. A nga fanelanga a hakela nchumu lexi nga dlayiwa hi xiharhi xa khwati.

14 “Kambe loko munhu o lomba xifuyu ka munhu mun’wani, xi gama xi ya limala kumbe xi fa na xi nga li ka n’winyi wa xona, lweyi a nga xi lomba a fanele a xi hakela. 15 Loko swi ku n’winyi wa xona a a li kona, a xi nga ta hakeliwa. Loko xi lombiwe hi male, male leyi nga hakeliwa yi ta tirhela ku xi hakela.

16 “Kutani loko wanuna o tshuka a kanganyisa ntombhi* leyi kalaka yi nge se tshembisiwa muchadu a gama a famba masangu na yona, a fanele a yi lovola leswaku yi va nsati wa yena.+ 17 Loko papayi wa yona a yala ku mu nyika yona, wanuna lweyi a fanele a hakela male leyi ku lovoliwaka hi yona ntombhi.*

18 “Mi nga tshuki mi tshika wansati lweyi a nga muloyi a hanya.+

19 “Lweyi a fambaka masangu ni xiharhi a fanele a dlayiwa.+

20 “Lweyi a yendlelaka swikwembu swin’wani magandzelo handle ka Yehovha ntsena, a fanele a dlayiwa.+

21 “Mi nga tshuki mi hlupha munhu wa tiko lin’wani kumbe mi mu xolola,+ hikusa na n’wina mi tshame Gibita na mi nga li va le Gibita.+

22 “Mi nga tshuki mi hlupha wansati wa ku feliwa hi nuna kumbe n’wana lweyi a nga feliwa hi vapsali.*+ 23 Loko wo tshuka u mu hlupha a za a rila ka mina, swi tivi swaku ni ta ku twa ku rila ka yena;+ 24 kutani ni ta kwata hintamu naswona ni ta mi dlaya hi xipada, se vasati va n’wina va ta sala na va nga na vavanuna ni vana va n’wina va ta sala na va nga na vapsali.*

25 “Loko u xi lomba male xisiwana* lexi tshamaka na wena, lexi lumbaka vanhu va mina, u nga fani ni munhu lweyi a lombisaka leswaku a kuma majuru. U nga xi londzi majuru.+

26 “Loko u teka mubalu* wa munhu mun’wani swaku wu va xitiyisekisu xa leswaku a ta ku hakela xikweneti xa yena,+ u fanele u mu tlhelisela wona loko li pela. 27 Hikusa hi wona ntsena lowu a nga na wona, a tirhisa wona swaku a funengeta muzimbha* wa yena; se loko u nga wu tlhelisi a ta funengela yini loko a yetlela?+ Loko a rila ka mina, ni ta mu yingisa hikusa na twelana wusiwana.+

28 “Mi nga tshuki mi rhuka Xikwembu+ kumbe mi rhuka lweyi a fumaka xikarhi ka n’wina.+

29 “Mi nga kanakaneni ku yendla magandzelo hi swilo swa n’wina swa swinyingi leswi mi swi tshovelaka kumbe hi leswi swi zaka swi dibekela lomu mi kamelaka kona mafurha ni vhinyu.+ Mi fanele mi ni nyika vana va n’wina va matevula va madjaha.+ 30 U fanele u yendla leswi hi homu ya wena ni nyempfu ya wena:+ Yi ta tshama ni mamani wa yona 7 wa masiku. Se u ta gama u ni nyika yona+ hi siku la wu 8.

31 “Mi fanele mi va vanhu va ku kwetsima ka mina+ naswona a mi fanelanga mi dla nyama ya xifuyu lexi nga dlayiwa hi xiharhi xa khwati.+ Mi fanele mi yi txukumeta ka timbyana.

23 “Mi nga tshuki mi hangalasa mhaka ya mavunhwa.+ Mi nga tirhisani ni munhu wa ku biha hi ku fakaza swilo swa mavunhwa.+ 2 Mi nga tshuki mi landzelela xitshungu swaku mi yendla swilo swa ku biha, naswona mi nga tshuki mi djikisa wululami hi ku fakaza swilo leswi nga ta tsakisa xitshungu. 3 A mi fanelanga mi va ni xikheto loko ku thethiwa mhaka ya xisiwana.+

4 “Loko mi tshuka mi kuma homu kumbe mbongolo ya nala wa n’wina na yi lahlekile, mi fanele mi yi tlhelisa ka yena.+ 5 Loko mi vona mbongolo ya munhu lweyi a mi nyenyaka na yi wile ni xidjumba xa yona, mi nga yi tshiki mi famba. Mi fanele mi pfuna n’winyi wa yona ku rhula xidjumba.+

6 “A mi fanelanga mi yavanyisa xisiwana lexi nga xikarhi ka n’wina hi ndlela ya ku biha loko mi thetha mhaka ya xona.+

7 “Mi nga tipeti ka ku lumbetana* hi swa mavunhwa, naswona mi nga dlayi lweyi a kalaka a nga na nandzu ni wa ku lulama, hikusa a ni nge tshuki ni hlaya swaku a lulamile lweyi a yendlaka swa ku biha.+

8 “Mi nga tshuki mi pfumela ku xaviwa, hikusa leswo swi yendla swaku matihlo ya vayavanyisi ma nga swi voni swa ku lulama naswona swi yendla swaku vanhu va ku tshembeka+ va txintxa swiboho swa vona.

9 “Mi nga tshuki mi hlupha munhu wa tiko lin’wani. Ma swi tiva swaku swi ndjhani ku va munhu wa tiko lin’wani hikusa na n’wina mi tshame mi va ka tiko la Gibita na mi nga li va le Gibita.+

10 “Mi ta byala mbewu ka tiko la n’wina mi gama mi tshovela leswi mi nga swi byala ku ringana 6 wa malembe,+ 11 Kambe hi lembe la wu 7, mi fanele mi li tshika li nga rimiwanga swaku li ta humula, se swisiwana leswi nga xikarhi ka n’wina swi ta dla leswi nga ta mila, kutani loko swi swi siya swi ta dliwa hi swiharhi. Mi fanele mi yendla leswo ni ka masimu ya n’wina ya mawuvha ni ka minsinya ya n’wina ya mawolivhera.

12 “Mi fanele mi tirha 6 wa masiku ntsena; kambe hi siku la wu 7, a mi fanelanga mi tirha nchumu leswaku homu ya n’wina ni mbongolo ya n’wina swi humula, na yena n’wana wa xikarawa xa xisati ni munhu wa tiko lin’wani va humula.+

13 “Tiyisekani swaku mi yendla hinkwaswu leswi ni nga mi byela swona,+ mi nga tshuki mi vula mavito ya swikwembu swin’wani; a ma fanelanga ma twiwa ka minomo ya n’wina.+

14 “Hi lembe mi fanele mi ni hambela mafexta* manharhu.+ 15 Mi ta hamba Fexta la Mapawu ya Ku Kala Fermentu.+ Hi 7 wa masiku mi ta dla mapawu ya ku kala fermentu hi ku landza leswi ni nga mi byela swona, mi ta yendla leswo hi nkama lowu nga vekiwa hi wheti ya Abibi,*+ hikusa mi hume Gibita hi wheti yoleyo. A nga kona lweyi a faneleke a ta ka mina na a nga khomanga nchumu.+ 16 Mi ta hamba ni Fexta la Ku Tshovela* mihandzu leyi nga rhanga yi wupfa masin’wini ka n’wina;+ nkama lembe li nga ta hela loko mi hlengeleta leswi mi nga swi tshovela+ masin’wini ka n’wina, mi fanele mi hamba ni Fexta la Ku Hlengeleta.* 17 Kanharhu hi lembe vavanuna hinkwavu va fanele va humelela phambheni ka Yehovha,+ Hosi ya ntiyiso.

18 “Mi nga tshuki mi nyikela ngati ya gandzelo la mina ni swilo leswi nga cheliwa fermentu. Magandzelo ya mafurha lama nyikeliwaka ka mafexta ya mina a ma fanelanga ma tshama wusiku hinkwalu li za li ya xa.

19 “Mi ta tisa mihandzu yayinene ngopfu leyi nga rhanga yi wupfa andlwini ya Yehovha Xikwembu xa n’wina.+

“Mi nga tshuki mi sweka ximbutani hi leiti la mamani wa xona.+

20 “Ni rhuma ntsumi phambheni ka n’wina+ swaku yi mi vonelela ndleleni ni ku mi yisa ka ndhawu leyi ni nga mi lunghiselela yona.+ 21 Yi yingiseni mi yendla leswi yi nga ta mi byela swona. Mi nga yi terekeleni hikusa a yi nge mi rivaleli swidjoho swa n’wina,+ hikusa vito la mina li ka yona. 22 Kambe loko mi yingisa leswi yi swi vulaka mi tlhela mi yendla hinkwaswu leswi ni mi byelaka swona, ni ta nyenya valala va n’wina ni tlhela ni lwa ni lava lwaka na n’wina. 23 Hikusa ntsumi ya mina yi ta famba phambheni ka n’wina yi mi yisa ka Vaamori, Vaheti, Vaperezi, Vakanana, Vahivhi ni Vayebusi, se ni ta gama ni va helisa.+ 24 Mi nga tshuki mi khizamela swikwembu swa vona kumbe mi xengiwa ku swi tirhela naswona mi nga tshuki mi tekelela mahanyelo ya vona.+ Kambe mi fanele mi swi wisetela mi tlhela mi dilizela mapilari lawa va nga ma yendla swikwembu swa vona.+ 25 Mi fanele mi tirhela mina Yehovha Xikwembu+ xa n’wina kutani ni ta katekisa pawu la n’wina ni mati ya n’wina.+ Ni ta susa mavabyi xikarhi ka n’wina.+ 26 Vavasati lava nga ka tiko la n’wina a va nge tshuki va humeliwa hi tinyimba kumbe va nga psali+ naswona ni ta yendla swaku mi hanya nkama wa wunyingi.

27 “Ni ta yendla swaku va mi chava hambi mi nge se fika+ naswona ni ta dunga tinhloko ta vanhu hinkwavu lava mi nga ta tlhangana na vona, ni ta yendla swaku valala va n’wina hinkwavu va mi baleka.+ 28 Ni ta yendla swaku valala va n’wina va tsemeka nhlana* na mi nge se fika+ naswona ni ta hlongola Vahivhi, Vakanana ni Vaheti na mi swi vona.+ 29 A ni nge va hlongoli phambheni ka n’wina hi lembe lin’we ntsena, leswaku tiko li nga gami li tlhuma se swiharhi swi tala swi gama swi mi hlasela.+ 30 Ni ta va hlongola phambheni ka n’wina hi kutsongokutsongo anze mi tala mi gama mi teka tiko li va la n’wina.+

31 “Ndhawu ya n’wina ni ta yi veka yi sukela ka Lwandle la Ku Pshuka anze yi ya fika ka lwandle la Vafilista ni ku sukela amananga anze yi ya fika ka Nambu wa Ewufrata;+ hikusa lava nga yaka ka tiko leli ni ta va nyiketa ka mavoko ya n’wina se n’wina mi ta va hlongola.+ 32 Mi nga tshuki mi yendla ntwananu na vona kumbe swikwembu swa vona.+ 33 A va fanelanga va tshama ka tiko la n’wina, swaku va nga mi yendli mi ni djohela. Loko mo tshuka mi tirhela swikwembu swa vona, swi ta va ntlhamu ka n’wina.”+

24 Se a byela Moxe a ku: “Khwela u ya ka Yehovha wena na Aroni, na Nadabi na Abiyu+ ku patsa ni 70 wa madoda ya Israyele, mi fika mi khizama na ma ha li kule. 2 Moxe a fanele a tshinela ka Yehovha na a li yexe, kambe lavan’wani a va fanelanga va tshinela naswona vanhu a va fanelanga va khwela na yena.”+

3 Kutani Moxe a fika a byela vanhu marito hinkwawu ya Yehovha ni swiboho hinkwaswu swa ku yavanyisa,+ se vanhu hinkwavu va hlamula hi rito lin’we va ku: “Hi tinyimisele ku yendla hinkwaswu+ leswi Yehovha a nga swi hlaya.” 4 Se Moxe a tsala marito hinkwawu ya Yehovha.+ Kutani a pfuka nimpundzu a yaka altari hansi ka ntshava ni 12 wa mapilari lama nyimelaka 12 wa tinxaka ta Israyele. 5 A gama a rhuma madjaha ya Vayisrayele, swaku ma ya yendla magandzelo ya ku hisiwa ma tlhela ma yendla magandzelo hi tihomu, swaku ma va magandzelo+ ya ku kombela ku rhula ka Yehovha. 6 Se Moxe a teka hafu ya ngati a yi chela ka matijela, kutani hafu leyin’wani ya ngati a yi n’wan’wasela henhla ka altari. 7 Kutani a teka buku ya ntwananu a yi lerhela vanhu.+ Se vanhu va ku: “Hi tinyimisele ku yendla hinkwaswu leswi Yehovha a nga swi hlaya naswona hi ta mu yingisa.”+ 8 Kutani Moxe a teka ngati a yi n’wan’wasela vanhu+ a gama a ku: “Leyi i ngati ya ntwananu lowu Yehovha a nga wu yendla na n’wina hi ku twanana ni marito lawa hinkwawu.”+

9 Moxe na Aroni, Nadabi na Abiyu ni 70 wa madoda ya Israyele va khwela ka ntshava, 10 se va vona Xikwembu xa Israyele.+ Hansi ka minenge ya xona a ku ni swilo swa ku fana ni maribye lama vitaniwaka safira, naswona a ma tengile ku fana ni matilo.+ 11 Xikwembu a xi va vavisanga vavanuna lava a va rhangela Vayisrayele+ naswona Xikwembu xa ntiyiso xi va kombe swilo swa ku hlamalisa* hi ndlela ya singita, se va gama va dla va tlhela va phuza.

12 Yehovha a byela Moxe a ku: “Khupuka u ta halenu ka mina ka ntshava u fika u tshama kona. Ni ta ku nyika maribye lawa ni nga ta tsala minawu ni leswi ni swi lavaka leswaku ni djondzisa vanhu.”+ 13 Kutani Moxe ni mupfunisi wa yena Yoxuwa+ va suka va famba, kutani Moxe a gama a khwela ka ntshava ya Xikwembu xa ntiyiso.+ 14 Kambe a byela madoda a ku: “N’wina hi nyimeleni kola anze hi vuya.+ Mi ta sala na Aroni na Huri.+ Lweyi a nga ni mhaka leyi a lavaka ku pfuniwa hi yona a a yi ka vona.”+ 15 Kutani Moxe a khwela a famba ka ntshava na rhefu la ha mbhonye ntshava.+

16 Ku phatima ka Yehovha+ ku tshame henhla ka Ntshava ya Sinayi+ naswona rhefu li yi mbhonyile ku ringana 6 wa masiku. Hi siku la wu 7, Xikwembu xi vitana Moxe na xi li xikarhi ka rhefu. 17 Ka Vayisrayele lava a va swi vona, ku phatima ka Yehovha a ku fana ni ndzilu lowu a wu pfurha ahenhla ka ntshava. 18 Se Moxe a nghena ka rhefu a tlhela a khwela ka ntshava.+ Moxe a tshame kolanu ku ringana 40 wa masiku, wusiku ni nhlikanhi.+

25 Kutani Yehovha a byela Moxe a ku: 2 “Byela Vayisrayele swaku va ni hlengeletelela minyikelo; mi ta yamukela minyikelo ya mina+ ka munhu mun’wani ni mun’wani lweyi mbilu ya yena yi swi tsakelaka. 3 Swilo swa kona leswi mi nga ta swi yamukela hi leswi: Woru,+ prata,+ kobre,+ 4 linya la azuli, mavoya ya ku pshuka, nguvu ya ku pshuka, nguvu ya xiyimu xa le henhla, mavoya ya mbuti, 5 swikhumba swa tinyempfu leswi nga pendiwa swi va swa ku pshuka, xikhumba xa foka,* mapulangu ya nsinya wa akasiya,+ 6 mafurha ya ku chela ka swa ku voninga hi swona,+ balsamu ya mafurha ya ku kwetsima+ ni ya swinun’hwelisu,*+ 7 ni maribye ya onikisi ni maribye man’wani lawa ma nga ta vekiwa ka efodi*+ la muprista ni ka xipaxtani xa xifuva.+ 8 Va ta ni yendlela ndhawu leyi kwetsimaka kutani ni ta tshama xikarhi ka vona.+ 9 Mi ta yendla tabernakela ni swilo hinkwaswu leswi nga ta va ka yona, na mi landza planu leli ni nga ta mi komba lona.+

10 “Va ta hamba areka* hi mapulangu ya nsinya wa akasiya; yi fanele yi leha kolomuyani ka 111 wa masentimetru,* yi yanama 67 wa masentimetru,* yi tlhela yi tlakuka 67 wa masentimetru.*+ 11 Kutani u ta yi namarheta hi woru la ku tenga.+ U ta yi namarheta ndzeni ni le handle ka yona, u ta yi vekela bandhi la woru lomu matlhelweni ka yona.+ 12 U fanele u yi yendlela 4 wa switlan’wani swa woru u gama u swi veka henhla ka 4 wa minenge ya yona, switlan’wani swimbirhi swi ta va ka tlhelo lin’we kasi switlan’wani swin’wani swimbirhi swi ta va ka tlhelo lelin’wani. 13 U fanele u yendla timhandzi hi mapulangu ya nsinya wa akasiya u gama u ti namarheta a woru.+ 14 U ta nghenisa timhandzi toleto ka switlan’wani leswi nga matlhelweni ka Areka leswaku Areka yi rhwaliwa hi tona. 15 Timhandzi ti ta tshama ka switlan’wani swa Areka; a ti fanelanga ti susiwa ka swona.+ 16 Ndzeni ka Areka u ta veka Wumboni* leli ni nga ta ku nyika lona.+

17 “U ta hamba tampa* hi woru la ku tenga, yi leha kolomuyani ka 111 wa masentimetru,* yi yanama 67 wa masentimetru.*+ 18 U ta yendla makerubu mambirhi hi woru; u ta ma yendla hi ku tirhisa hamela u gama u ma veka ka magamu hamambirhi ya tampa.+ 19 U fanele u yendla makerubu lawa ka matlhelo hamambirhi ya tampa lomu yi gamelaka kona, kerubu lin’we li va ka tlhelo lin’we, kasi kerubu lin’wani li va ka tlhelo lelin’wani. 20 Makerubu ma ta pfula timpapa ta wona timbirhi ti ya henhla, ma mbhonya tampa hi timpapa ta wona+ naswona ma ta txuvukana. Tinghohe* ta makerubu ti ta txuvuka tampa. 21 U ta veka tampa+ henhla ka Areka kutani ndzeni ka Areka u ta veka Wumboni leli ni nga ta ku nyika lona. 22 Ni ta tikombisa ka wena kolanu se ni ta khuluma na wena na ni li henhla ka tampa.+ Ni ta ku byela hinkwaswu leswi ni nga ta ku rhuma swona swaku u swi byela Vayisrayele na ni li xikarhi ka makerubu mambirhi lawa ma nga henhla ka areka ya Wumboni.

23 “U ta hamba meza+ hi mapulangu ya nsinya wa akasiya wu leha kolomuyani ka 89 wa masentimetru,* wu yanama 44,5 wa masentimetru* naswona wu tlhela wu tlakuka 67 wa masentimetru.*+ 24 U ta wu namarheta hi woru la ku tenga naswona u ta veka bandhi la woru lomu matlhelweni ka wona. 25 U ta veka bandhi leli nga ni kolomuyani ka 7,4 wa masentimetru* lomu matlhelweni ka meza u gama u veka nchumu xa woru xa ku sasekisela hi xona lomu matlhelweni ka bandhi. 26 U ta yendla 4 wa switlan’wani swa woru u gama u swi veka ka 4 wa matlhelo ya meza lowu, lomu 4 wa minenge ya wona yi tlhomiwaka kona. 27 Switlan’wani leswi swi fanele swi va kusuhi ni nchumu lexi nga vekiwa matlhelweni ka meza swi ta tirhela ku tlhoma timhandzi ta ku rhwala hi tona meza. 28 U ta yendla timhandzi hi mapulangu ya nsinya wa akasiya kutani u ti namarheta woru, swaku va rhwala hi tona meza.

29 “U ta tlhela u yendla swibya, tikopo, majaru ni matijela ya kona lomu va nga ta chela magandzelo ya vhinyu. U fanele u swi yendla hi woru la ku tenga.+ 30 Nkama hinkwawu u ta veka mapawu ya ku kwetsima ka meza phambheni ka mina.+

31 “U ta hamba xa ku tlhoma swa ku voninga hi swona+ hi woru la ku tenga. Xa ku tlhoma swa ku voninga hi swona xi fanele xi yendliwa hi ku tirhisa hamela. Hansi ka xona, nhonga ya xona, tigadja ta xona, switlukani swa xona, matluka ya swiluva ni swiluva swa kona, hinkwaswu swi ta va nchumu xin’we.+ 32 Nchumu lexi xa ku tlhoma swa ku voninga hi swona xi ta va ni 6 wa tigadja. A tigadja tinharhu ti ta va ka tlhelo lin’we kasi tigadja letin’wani tatinharhu ti ta va ka tlhelo lelin’wani. 33 Ligadja ha lin’we ka tlhelo lin’we li ta va ni switlukani swinharhu leswi fanaka ni swiluva swa mendwa, naswona xikarhi ka switlukani leswi ku ta va ni matluka ya swiluva ni swiluva swa kona; u fanele u yendla leswo ni ka tigadja letin’wani ka tlhelo lelin’wanyani. A 6 wa tigadja leti nga ka nhonga ya xa ku tlhoma swa ku voninga hi swona ti ta tshamisa swoleswo. 34 Ka nhonga ya xa ku tlhoma swa ku voninga hi swona ku ta va ni 4 wa switlukani leswi fanaka ni swiluva swa mendwa naswona xikarhi ka swona ku ni matluka ya swiluva ni swiluva swa kona. 35 Hansi ka ndhawu leyi tigadja timbirhi ta ku sungula ti tlhanganaka ka yona, ku ta va ni matluka ya swiluva naswona hansi ka ndhawu leyi tigadja timbirhi leti landzelaka ti tlhanganaka ka yona, ku ta va ni matluka man’wani ya swiluva; kasi hansi ka ndhawu leyi tigadja timbirhi letin’wani ti landzelaka ti tlhanganaka ka yona na kona ku ta va ni matluka ya swiluva. A 6 wa tigadja leti nga ka nhonga ya xa ku tlhoma swa ku voninga hi swona ti ta tshamisa swoleswo. 36 A matluka ya swiluva ni tigadja swi fanele swi khomana ni xa ku tlhoma swa ku voninga hi swona lexi nga ta yendliwa hi woru la ku tenga hi ku tirhisa hamela.+ 37 U ta xi yendlela 7 wa swa ku voninga hi swona, kutani loko swa ku voninga hi swona swi tlhavikiwile swi ta vona ka ndhawu leyi nga phambheni ka xona.+ 38 A swa ku tima ngoti ya ku voninga ni swa ku chela ndzilu, swi fanele swi yendliwa hi woru la ku tenga.+ 39 A xa ku tlhoma swa ku voninga hi swona ni minchumu leyin’wani swi fanele swi yendliwa hi woru la ku tenga leli pezaka 34,2 wa makilu.* 40 Tiyiseka swaku u swi yendla hi ku landza planu leli u nga kombiwa lona ka ntshava.+

26 “U ta yendla tabernakela+ hi 10 wa tipanu ta ku lukiwa ta xiyimu xa le henhla, linya la azuli, mavoya ya ku pshuka ni nguvu ya ku pshuka. U ta rhungetela swifaniso+ swa makerubu+ ka tona. 2 Panu yin’wani ni yin’wani yi fanele yi leha 12,5 wa mametru,* yi yanama 1,8 metru.* Tipanu hinkwatu ti fanele ti ringana.+ 3 Tlhanganisa 5 wa tipanu swaku ti va panu yin’we yayikulu, u gama u yendla swa ku fana hi 5 wa tipanu letin’wani. 4 Ka panu yin’wani ni yin’wani yayikulu, yendla swa ku hulela ka swona hi linya la azuli ka magamu ya tona swaku tipanu leti timbirhi ti ta kota ku tlhanganisiwa. 5 U ta yendla 50 wa swa ku hulela ka swona ka panu yin’we ni 50 wa swa ku hulela ka swona ka magamu ya panu leyin’wani, leswaku swa ku hulela ka swona swi ta txuvukana lomu tipanu ti nga ta tlhangana kona. 6 U ta hamba 50 wa swa ku huka* hi swona swa woru leswaku u tlhanganisa tipanu hi swona, kutani tabernakela yi ta va nchumu xin’we.+

7 “U ta tlhela u yendla tipanu hi mavoya ya mbuti+ swaku u mbhonya tabernakela. U ta yendla 11 wa tipanu.+ 8 Panu yin’wani ni yin’wani yi fanele yi leha 13,4 wa mametru,* yi yanama 1,8 metru. A 11 wa tipanu leti ti fanele ti ringana. 9 U ta tlhanganisa 5 wa tipanu u tlhela u tlhanganisa 6 wa tipanu letin’wani, se a panu ya wu 6 leyi nga phambheni ka tabernakela u fanele u yi petsa. 10 U ta yendla 50 wa swa ku hulela ka swona ka magamu ya panu yin’we leyi nga henhla, ni 50 wa swa ku hulela ka swona ka magamu ya panu leyin’wani lomu ti nga ta tlhangana kona. 11 U ta yendla 50 wa swa ku huka hi swona swa kobre u gama u swi peta ka mimbhovo swaku u tlhanganisa tipanu, ti ta va panu yin’we ahenhla ka tabernakela. 12 Leswi nga sala ka tipanu swi ta tshikiwa swi lengalenga. Hafu ya panu leyi nga sala yi ta lengalenga ndzhaku ka tabernakela. 13 Leswi nga sala ka tipanu ta tabernakela swi ta va ni 44,5 wa masentimetru* matlhelo hinkwawu, naswona swi ta tshikiwa na swi lengalenga leswaku tipanu leti ti ta funengeta tabernakela.

14 “U ta yendla xa ku mbhonya tabernakela hi swikhumba swa tinyempfu leswi nga pendiwa swi va swa ku pshuka. Henhla ka xona u ta yendla xa ku mbhonya hi xona xa ku yendliwa hi swikhumba swa foka.*+

15 “U fanele u yendla maaru+ ya tabernakela hi mapulangu ya nsinya wa akasiya, ma ta nyimisiwa ma ku nthwii!+ 16 Aru lin’wani ni lin’wani li ta leha 4,5 wa mametru,* li yanama 67 wa masentimetru.* 17 Aru lin’wani ni lin’wani li ni swilo swimbirhi leswi yendlaka leswaku ma tlhangana magamu ka wona. U fanele u ma yendlisa swoleswo maaru hinkwawu ya tabernakela. 18 U fanele u yendla 20 wa maaru swaku ma vekiwa ka tlhelo la sul* la tabernakela; ma ta vekiwa ma txuvuka sul.

19 “U ta yendla 40 wa swa ku tlhoma maaru+ swa prata leswi nga ta vekiwa hansi ka 20 wa maaru. Hansi ka aru lin’wani ni lin’wani ku ta va ni swilo swimbirhi leswi nga ta tlhomiwa ka swilo swimbirhi swa prata swa ku tlhoma ka swona maaru.+ Maaru hinkwawu u fanele u ma yendlisa swoleswo. 20 U ta tlhela u yendla 20 wa maaru swaku u ta ma veka ka tlhelo la norte* la tabernakela, 21 ni 40 wa minchumu ya prata ya ku tlhoma ka yona maaru: Ka aru la ku sungula u ta veka swilo swimbirhi swa ku tlhoma ka swona maaru u tlhela u veketela swilo swimbirhi swa ku tlhoma ka swona maaru ka aru lin’wani ni lin’wani leli landzelaka. 22 Ndzhaku ka tabernakela ka tlhelo leli la wupeladlambu, u fanele u hamba 6 wa maaru.+ 23 U ta yendla maaru mambirhi lawa ma nga ta seketela tiponta timbirhi ta ndzhaku ka tabernakela. 24 Maaru lawa ma fanele ma longoloka ma li mambirhi ku suka hansi ku ya fika henhla, anze ma ya tlhangana ka xitlan’wani xa ku sungula. Maaru lawa ma fanele ma yendliwa hi ndlela ya ku fana. Naswona ma ta va ka tiponta timbirhi. 25 Ku ta va ni 8 wa maaru ni 16 wa swa ku tlhoma ka swona maaru swa prata: Hansi ka aru la ku sungula u ta veka swilo swimbirhi swa ku tlhoma ka swona maaru u tlhela u veka swilo swimbirhi swa ku tlhoma ka swona maaru hansi ka aru lin’wani ni lin’wani leli landzelaka.

26 “U ta yendla timhandzi hi mapulangu ya nsinya wa akasiya: 5 wa tona ti ta va maaru ya tlhelo lin’we la tabernakela,+ 27 ni 5 wa timhandzi ta maaru ta tlhelo lelin’wani la tabernakela, ni 5 wa timhandzi ta maaru lawa ma nga ta va ndzhaku ka tabernakela, hi ka tlhelo la wupeladlambu. 28 Mhandzi leyi nga xikarhi ka maaru yi fanele yi suka ka ponta yin’we yi ya gama ka ponta leyin’wani.

29 “U ta namarheta maaru hi woru+ naswona u ta yendla switlan’wani swa woru leswi nga ta khoma timhandzi, leti na tona ti nga ta namarhetiwa hi woru. 30 U fanele u yendla tabernakela hi ku landza planu leli u nga kombiwa lona ka ntshava.+

31 “U fanele u hamba kortina+ hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla. Kortina leli li fanele li rhungiwa swifaniso swa makerubu. 32 U fanele u li hayeka ka 4 wa mapilari lama nga yendliwa hi nsinya wa akasiya, ma tlhela ma namarhetiwa woru. Leswi u nga ta hayeka ka swona, na swona swi fanele swi yendliwa hi woru. Mapilari lawa ma ta vekiwa henhla ka 4 wa swilo swa ku tlhoma mapilari leswi nga yendliwa hi prata. 33 U fanele u hayeka kortina lolelo ka swa ku huka hi swona, u gama u veka areka ya Wumboni+ kolanu ndzhaku ka kortina. Kortina leli li ta mi hambanisela Ndhawu Ya Ku Kwetsima+ ni Ndhawu Ya Ku Kwetsima Hintamu.+ 34 U fanele u veka tampa henhla ka areka ya Wumboni ka Ndhawu Ya Ku Kwetsima Hintamu.

35 “U ta veka meza phambheni ka kortina,* se a xa ku tlhoma swa ku voninga hi swona+ xi ta txuvukana ni meza wolowo ka tlhelo la sul la tabernakela; kutani a meza u ta wu veka ka tlhelo la norte. 36 U ta hamba kortina la ku pfala ndhawu ya ku nghena hi yona ka tabernakela hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla.+ 37 U ta yendla 5 wa mapilari hi nsinya wa akasiya u tlhela u ma namarheta hi woru swaku ku ta hayekiwa ka wona kortina la ku pfala ndhawu ya ku nghena hi yona ka tabernakela. A swa ku hayeka ka swona swi ta yendliwa hi woru naswona u ta yendla 5 wa minchumu ya ku tlhoma mapilari hi kobre swaku ku tlhomiwa ka yona mapilari wolawo.

27 “U fanele u hamba altari hi mapulangu ya nsinya wa akasiya;+ yi fanele yi leha 2,2 wa mametru* yi yanama 2,2 wa mametru. Altari leyi yi fanele yi va ni 4 wa matlhelo ya ku ringana, yi tlhela yi leha 1,3 metru.*+ 2 U ta yendla timhondzo+ henhla ka 4 wa tiponta ta altari. Timhondzo leti ti fanele ti tshama kolanu ka altari naswona u ta gama u namarheta altari hi kobre.+ 3 U ta hamba mabakidi ya ku chela nkuma,* mafoxolo, matijela, magarfu ni swa ku chela ndzilu; u fanele u yendla swibya hinkwaswu swa altari hi kobre.+ 4 U ta yendla xa ku sefa hi xona xa kobre ka altari, naswona ka xisefo lexi u ta yendla 4 wa switlan’wani swa kobre leswi u nga ta swi veka ka 4 wa tiponta ta xona ka altari. 5 U fanele u peta xisefo hansi ka bandhi la altari naswona xi fanele xi va xikarhi ka altari. 6 U ta yendla timhandzi ta nsinya wa akasiya u gama u ti namarheta hi kobre swaku ti ta tirhisiwa ka altari. 7 Timhandzi leti ti ta petiwa ka switlan’wani leswi nga ka altari, leswaku ti va ka matlhelo hamambirhi ya altari loko yi rhwaliwa.+ 8 Altari yi fanele yi yendliwa hi mapulangu yi va kaxa la ku pfuleka. Yi fanele yi yendliwa hi ku landza leswi ni nga ku komba swona ka ntshava.+

9 “U fanele u yendla kintari*+ wa tabernakela. Hi ka tlhelo la sul,* kintari lowu u fanele u wu pfala hi makortina ya ku yendliwa hi tinguvu ta ku lukiwa ta xiyimu xa le henhla, makortina ya kona ma fanele ma lehe 44,5 wa mametru* ka tlhelo lin’we.+ 10 Wu ta va ni 20 wa mapilari ni 20 wa swilo swa kobre swa ku tlhoma mapilari wolawo. A swa ku hayeka ka swona leswi nga ka mapilari ni switlan’wani swa kona swi fanele swi va swa prata. 11 Ka tlhelo la norte* ku fanele ku va ni kortina leli nga leha 44,5 wa mametru, ku tlhela ku va ni 20 wa mapilari ni 20 wa minchumu ya kobre ya ku tlhoma ka yona mapilari wolawo, ni swa ku hayeka hi swona swa prata ni switlan’wani swa prata leswi nga ta va ka mapilari. 12 Hi ka tlhelo la wupeladlambu la kintari lowu ku fanele ku hayekiwa kortina leli nga yanama 22 wa mametru.* U ta tlhela u hamba 10 wa mapilari ni 10 wa swilo swa ku tlhoma mapilari wolawo. 13 Ku yanama ka kintari hi ka tlhelo la wuxeni* ku fanele ku va 22 wa mametru. 14 Ka tlhelo lin’we ku ta hayekiwa kortina leli nga leha 6,7 wa mametru* ka mapilari manharhu lawa ma nga ni swa ku tlhoma ka swona mapilari swaswinharhu.+ 15 Se ka tlhelo lelin’wani ku ta hayekiwa makortina lama nga leha 6,7 wa mametru ka mapilari manharhu lawa ma nga ni swa ku tlhoma ka swona mapilari swaswinharhu.

16 “Ka nyanghwa wa kintari ku fanele ku va ni kortina la ku pfala hi lona leli nga leha 8,9 wa mametru* leli nga yendliwa hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla,+ naswona ku fanele ku va ni 4 wa mapilari ni 4 wa swa ku tlhoma ka swona mapilari wolawo.+ 17 Mapilari hinkwawu lawa ma nga matlhelweni ka kintari ma fanele ma va ni switlan’wani swa prata ni swa ku hayeka ka swona swa prata, kambe a swa ku tlhoma mapilari swi fanele swi va swa kobre.+ 18 Kintari lowu wu fanele wu va ni 44,5 wa mametru,+ wu yanama 22 wa mametru, wu tlhela wu hayekiwa nguvu ya xiyimu xa le henhla leyi nga tlakuka 2,2 wa mametru, yi tlhela yi va ni minchumu ya kobre ya ku tlhoma mapilari. 19 Swibya ni minchumu hinkwayu leyi nga ta tirhisiwa ka tabernakela ni swimhandzani swa kona ku patsa ni swimhandzani swa kintari, swi fanele swi va swa kobre.+

20 “U fanele u byela Vayisrayele swaku va ku tisela mafurha ya wolivhera ya ku tenga swaku u chela ka swa ku voninga hi swona, leswaku nkama ni nkama swi tshama na swi vona.+ 21 Ka tende la ntlhanganu leli nga handle ka kortina leli nga kusuhi ni areka ya Wumboni,+ Aroni ni vana va yena va fanele va tiyiseka swaku swa ku voninga hi swona swi tshama na swi vona ku sukela nimadlambu anze li ya xa phambheni ka Yehovha.+ Leswo va fanele va swi yendla. Nawu lowu a wu heli naswona Vayisrayele ni vatukulu va vona hinkwavu,+ va fanele va wu yingisa nkama hinkwawu.

28 “U fanele u vitana makwenu wa wena Aroni xikarhi ka Vayisrayele ni vana va yena swaku va ta va vaprista va mina,+ vitana Aroni+ ni vana va yena+ ku nga Nadabi, Abiyu,+ Eliyazari na Itamari.+ 2 U fanele u yendlela makwenu wa wena Aroni mpahla ya ku kwetsima yi tlhela yi saseka+ leswaku a hlonipheka. 3 U ta ya khuluma ni vanhu hinkwavu lava swi kotaka kahle ku tirha,* lava ni nga va nyika wutlharhi,*+ va ta yendlela Aroni mpahla leyi kombisaka swaku ni mu langile swaku a va muprista wa mina.

4 “A mpahla leyi va nga ta yi yendla hi leyi: Xipaxtani xa xifuva,+ efodi,*+ nkhantxu wa ku kala wu nga na mavoko,+ nkhantxu wa ku leha wa maxadreji, xifunengeto xa nhloko*+ ni bandhi.+ Va ta yendla mpahla leyi ya ku kwetsima va yendlela Aroni ni vana va yena, leswaku a va muprista wa mina. 5 Vatirhi lava nga ni wutlharhi va ta tirhisa woru, linya la azuli, mavoya ya ku pshuka, nguvu ya ku pshuka ni nguvu ya xiyimu xa le henhla.

6 “Va fanele va rhunga efodi* hi woru, linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla.+ 7 Yi fanele yi yendliwa hi tinguvu timbirhi leti nga ta tlhanganisiwa ka makatla. 8 Bandhi+ leli nga ka efodi leli nga ta yi boha yi tiya, li fanele li yendliwa hi swilo leswi efodi yi nga yendliwa hi swona ku nga woru, linya la azuli, mavoya ya ku pshuka, nguvu ya ku pshuka ni nguvu leyi nga lukiwa ya xiyimu xa le henhla.

9 “U ta teka maribye mambirhi ya onikisi+ u tsala mavito ya vana va Israyele henhla ka wona,+ 10 u ta tsala 6 wa mavito henhla ka ribye lin’we ni 6 wa mavito laman’wani ka ribye lelin’wani, hi ku landza leswi va nga psalisiwa xiswona. 11 Munhu lweyi a yendlaka ntirho wa ku tsala ka maribye a fanele a tsala mavito ya vana va Israyele ka maribye lawa ya mambirhi hi ku landza leswi karimbu+ li yendlisiwaka swona. Se u ta gama u mu byela swaku a chela woru tlhelweni ka maribye leswaku ma tiya. 12 U ta gama u veka maribye mambirhi ka efodi lani yi tlhanganaka kona hi lani ka makatla; maribye lawo ma ta tirhela ku va xitsundzuxu ka vana va Israyele,+ se Aroni a fanele a rhwala mavito ya vona ka makatla ya yena swaku ma va xitsundzuxu loko a ya ka Yehovha. 13 U ta yendla swilo swa woru swaku swi khoma maribye wolawo 14 ni machini mambirhi ya woru la ku tenga lawa ma nga lukiwa ku fana ni goda,+ u fanele u ma tlhoma ka swilo swa woru swa ku khoma hi swona maribye.+

15 “U fanele u lava munhu lweyi a swi kotaka kahle ku rhunga, swaku a ta yendla xipaxtani xa xifuva xa ku yavanyisa.+ Xi fanele xi yendliwa ku fana ni efodi, hi woru, linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla.+ 16 Loko xi petsiwa xi fanele xi ringana ka 4 wa matlhelo ya xona hinkwawu, xi leha kolomuyani ka 22 wa masentimetru* xi tlhela xi yanama kolomuyani ka 22 wa masentimetru. 17 U fanele u xi vekela maribye, ma va 4 wa mafila. Ka fila la ku sungula ku ta va ni ribye la rubi, topazi ni exmeralda. 18 Ka fila la wumbirhi ku ta va ni ribye la turkeza, safira ni jaxpe. 19 Ka fila la wunharhu ku ta va ni ribye la lexemu,* agata ni ametixta. 20 Ka fila la wu 4 ku ta va ni ribye la krizolita, onikisi ni jadi. Maribye lawa ma fanele ma vekiwa ka swilo swa woru swa ku khoma maribye. 21 Maribye lawa ma ta nyimela 12 wa mavito ya vana va Israyele. Ribye lin’wani ni lin’wani li fanele li tsaliwa ku fana ni karimbu, vito lin’wani ni lin’wani li nyimela lixaka lin’we ka 12 wa tinxaka.

22 “U fanele u yendla machini hi woru la ku tenga+ ku fana ni magoda swaku u ma veka ka xipaxtani xa xifuva. 23 U fanele u hamba switlan’wani swimbirhi swa woru swa xipaxtani xa xifuva u gama u swi veka henhla ka tiponta timbirhi ta xipaxtani xa xifuva. 24 U ta nghenisa tingoti timbirhi ta woru ka switlan’wani swimbirhi leswi nga magamu ka xipaxtani xa xifuva. 25 U ta gama u nghenisa tingoti timbirhi ka swilo swimbirhi swa ku khoma maribye naswona u fanele u swi veka phambheni ka efodi lani tinguvu timbirhi ta efodi ti tlhanganaka kona ka makatla. 26 U fanele u hamba switlan’wani swimbirhi swa woru u gama u swi veka ka tiponta timbirhi ta le hansi leti nga txuvukana ni efodi+ ndzeni ka xipaxtani xa xifuva. 27 U fanele u hamba ni switlan’wani swin’wani swimbirhi swa woru u swi veka phambheni ka efodi, hi hansi ka mavoko mambirhi kusuhi ni lani efodi yi tlhanganisiwaka kona, ahenhla ka bandhi la efodi.+ 28 Xipaxtani xa xifuva xi fanele xi bohiwa hi ngoti ya azuli, ku tlhela ku bohiwa ni switlan’wani swa xona ka switlan’wani swa efodi. Leswo swi ta yendla swaku xipaxtani xa xifuva xi nga suki ka efodi ahenhla ka bandhi.

29 “Aroni a fanele a rhwala mavito ya vana va Israyele ka xipaxtani xa xifuva xa wuyavanyisi lexi nga henhla ka mbilu ya yena loko a nghena ka Ndhawu Ya Ku Kwetsima swaku xi va xitsundzuxu phambheni ka Yehovha nkama hinkwawu. 30 Ka xipaxtani xa xifuva xa wuyavanyisi, u fanele u veka Urimi ni Tumimi;*+ swi ta va henhla ka mbilu ya Aroni loko a ya ka Yehovha, se Aroni a fanele a rhwala swilo swa ku yavanyisa Vayisrayele ka xifuva xa yena phambheni ka Yehovha nkama hinkwawu.

31 “U fanele u yendla nkhantxu wa ku kala wu nga na mavoko hi linya la azuli lowu nga ta rhanga wu yambaliwa hansi ka efodi.+ 32 Wu fanele wu va ni mbhovo wa ku peta nhloko. Mbhovo wa kona wu fanele wu rhungiwa hi muluki wa tinguvu. Wu fanele wu fana ni mbhovo wa mpahla leyi nga yendliwa hi swinsimbani, leswaku wu nga pandzeki. 33 U fanele u yendla nchumu xa ku fana ni mihandzu ya ma romã hi linya la azuli, mavoya ya ku pshuka ni nguvu ya ku pshuka swaku u xi veka magamu ka nkhantxu wa azuli, u gama u hambanisela ma romã hi swinsimbani* swa woru. 34 U fanele u veka xinsimbani xa woru xi landzeliwa hi romã, u gama u yendla swa ku fana ahansi ka nkhantxu hinkwawu wa ku kala wu nga na mavoko. 35 Aroni a fanele a wu yambala loko a tirha naswona guwa la swinsimbani li fanele li twala loko a ya ka ndhawu leyi kwetsimaka phambheni ka Yehovha ni loko a huma, leswaku a nga fi.+

36 “U fanele u hamba xixapani xa ku phatima hi woru la ku tenga u gama u tsala marito lama nge: ‘Yehovha wa Kwetsima.’+ 37 U fanele u xi bohelela ka xifunengeto xa nhloko*+ hi ngoti ya azuli; xi fanele xi tshama phambheni ka xifunengeto. 38 Xi ta va ka ximombo xa Aroni naswona Aroni hi yena a nga ta hlamula loko vanhu va tshuka va djohela swilo swa ku kwetsima,+ leswi Vayisrayele va nga swi langa swaku va swi nyikela swi va tinyiko ta ku kwetsima. Xixapani lexi xi fanele xi tshama ka ximombo xa Aroni swaku Yehovha a ta va yamukela.

39 “U ta hamba nkhantxu wa ku leha wa maxadreji, u yendla xifunengeto xa nhloko* hi nguvu ya xiyimu xa le henhla ni bandhi.+

40 “U ta tlhela u yendlela vana va Aroni+ minkhantxu ya ku leha, mabandhi ni swifunengeto swa nhloko, swi saseka leswaku va ta hlonipheka.+ 41 U ta gama u swi yambexa makwenu wa wena Aroni ni vana va yena, u va chela mafurha ka tinhloko ta vona+ u va veka swaku va va vaprista+ u gama u va kwetsimisa, se va ta gama va va vaprista va mina. 42 Naswona u fanele u va hambela swibulukwani swa le ndzeni* hi tipanu ta linyu swaku va tipfala muzimbha hi swona.+ Swi ta sukela ka masenge swi ya fika henhlanyana ka matsolo. 43 Swi fanele swi yambaliwa hi Aroni ni vana va yena loko va ya ka tende la ntlhanganu kumbe loko va ya ka altari va ya tirha ka ndhawu ya ku kwetsima leswaku va nga kumi nandzu, va gama va fa. Nawu lowu a wu heli naswona wu ta tirha ka yena ni vatukulu* va yena nkama hinkwawu.

29 “U ta yendla leswi leswaku u va kwetsimisa swaku va va vaprista va mina: Teka xihon’wani, tinyempfu timbirhi ta ku hanya kahle,+ 2 mapawu ya ku kala fermentu, mapawu ya redondu ya ku kala fermentu lawa ma nga patsiwa ni mafurha, ni mapawu ya ku woma ya ku kala fermentu lawa ma nga totiwa mafurha.+ U fanele u hamba mapawu lawa hi trigu la ku siliwa kahle, 3 u gama u ma peta ka ndzhava u ya ma nyikela na ma li ka wona+ ku patsa ni homu ni tinyempfu timbirhi.

4 “U ta tisa Aroni ni vana va yena ka nyanghwa wa tende la ntlhanganu+ u gama u va hlambisa hi mati.+ 5 Kutani u teka mpahla+ u yambexa Aroni: U ta mu yambexa nkhantxu wa ku leha, nkhantxu wa ku kala wu nga na mavoko lowu wu yambaliwaka ndzeni ka efodi,* efodi ni xipaxtani xa xifuva se u mu boha bandhi la efodi li tiya ka masenge.+ 6 U ta mu yambexa xifunengeto xa nhloko* u gama u mu veka marka wa ku kwetsima wa ku tinyiketela* ka xifunengeto lexi;+ 7 kutani u teka mafurha ya ku kwetsima+ u ma chela ka nhloko ya yena u mu langa.+

8 “U ta gama u tisa vana va yena u va yambexa minkhantxu ya ku leha,+ 9 kutani u boha Aroni ni vana va yena mabandhi u tlhela u va veka ni swifunengeto swa nhloko; vona ni vatukulu va vona va ta va vaprista, lowu i nawu wa ku kala wu nga heli.+ Aroni ni vana va yena u fanele u va vekisa xileswo swaku va va vaprista.+

10 “Se u ta tisa homu phambheni ka tende la ntlhanganu kutani Aroni ni vana va yena va ta tlhateka mavoko ya vona henhla ka nhloko ya homu.+ 11 Dlaya homu phambheni ka Yehovha, ka nyanghwa wa tende la ntlhanganu.+ 12 Teka ngati yin’wani ya homu u yi tota ka timhondzo ta altari+ hi litiho, se u teka ngati leyin’wani hinkwayu u yi chulula hansi ka altari.+ 13 Kutani teka mafurha+ hinkwawu lama funengeteka marhumbu ni xivindzi ni tiyinso timbirhi ku patsa ni mafurha lama nga ka tona, u swi hisa leswaku ximusi xa swona xi tuvika henhla ka altari.+ 14 Kambe nyama ya homu, xikhumba xa yona ni chaka la yona u ta swi hisa hi ndzilu ahandle ka matende ya n’wina. I gandzelo la xidjoho.

15 “Teka nyempfu se Aroni ni vana va yena va ta tlhateka mavoko ka nhloko ya yona.+ 16 Dlaya nyempfu u gama u teka ngati ya yona u yi n’wan’wasela ka matlhelo hinkwawu ya altari.+ 17 Tsemelela nyempfu, u hlampsa marhumbu ya yona+ ni minenge ya yona, se u veka nyama yoleyo xikan’we ni nhloko ya kona. 18 U fanele u hisa nyempfu hinkwayu leswaku ximusi xa yona xi tuvika ka altari. I gandzelo la ku hisiwa leli nga yendleliwa Yehovha, li nun’hwela kahle.+ I gandzelo leli nga yendleliwa Yehovha hi ndzilu.

19 “Se u teka nyempfu leyin’wani, kutani Aroni ni vana va yena va ta tlhateka mavoko ka nhloko ya yona.+ 20 Dlaya nyempfu u gama u teka ngati yin’wani ya yona u yi tota ka ponta ya ndleve ya xinene ya Aroni ni ka tiponta ta tindleve ta xinene ta vana va yena, ni ka litiho lalikulu* la voko la vona la xinene ni ka litiho lalikulu la nenge wa vona wa xinene, kutani u n’wan’wasela ngati ka matlhelo hinkwawu ya altari. 21 Se u teka ngati yin’wani leyi nga henhla ka altari ni mafurha man’wani ya ku kwetsima+ u swi n’wan’wasela Aroni ni mpahla ya yena u tlhela u n’wan’wasela vana va yena ni mpahla ya vona, leswaku yena ni vana va yena va ta va va ku kwetsima ni mpahla ya yena ni ya vana va yena yi ta va ya ku kwetsima.+

22 “Ka nyempfu teka mafurha, ntxila wa ku nona, mafurha lama mbhonyaka marhumbu ni xivindzi, tiyinso timbirhi ni mafurha lama nga ka tona+ ni nenge wa xinene, hikusa i nyempfu leyi nga nyikeliwa nkama ku nga vekiwa vaprista.+ 23 Teka ni pawu la redondu ni pawu leli nga patsiwa ni mafurha, leli nga hambiwa ku fana ni aneli ni pawu la ku woma ka ndzhava lowu nga ni mapawu ya ku kala fermentu lowu nga phambheni ka Yehovha. 24 U fanele u swi veka ka mavoko ya Aroni ni ka mavoko ya vana va yena, se u swi fambisa swi ya hala ni hala swi va gandzelo leli fambisiwaka ka Yehovha. 25 Kutani u swi teka ka mavoko ya vona u ya swi hisa ka altari henhla ka gandzelo la ku hisiwa swaku swi nun’hwela kahle ka Yehovha. I gandzelo leli nga yendleliwa Yehovha hi ndzilu.

26 “Se u teka xifuva xa nyempfu leyi nga nyikeliwa nkama Aroni a nga vekiwa swaku a va muprista,+ u xi fambisa xi ya hala ni hala swaku xi va gandzelo leli fambisiwaka ka Yehovha, se xi ta gama xi va xa wena. 27 U fanele u kwetsimisa xifuva xa gandzelo leli fambisiwaka ni nenge wa munyikelo wa ku kwetsima lowu fambisiwaka wu ya hala ni hala ni lowu nga tekiwa ka nyempfu leyi nga nyikeliwa nkama Aroni ni vana va yena va nga vekiwa swaku va va vaprista.+ 28 Swilo leswi swi ta va swa Aroni ni vana va yena hi ku landza nawu wa ku kala wu nga heli lowu Vayisrayele va faneleke va wu yingisa hikusa i xiyenge xa ku kwetsima naswona swi ta tlhela swi va xiyenge xa ku kwetsima lexi Vayisrayele va faneleke va xi nyikela.+ I xiyenge xa vona xa ku kwetsima lexi va xi nyikelaka ka Yehovha lexi va xi susaka ka magandzelo ya vona ya ku kombela ku rhula.+

29 “Mpahla ya ku kwetsima+ ya Aroni yi ta sala yi tirhisiwa hi vana va yena+ lava nga ta langiwa ni ku vekiwa swaku va va vaprista. 30 Muprista lweyi a nga ta mu pfaleta xikarhi ka vana va yena ni lweyi a nghenaka ka tende la ntlhanganu leswaku a tirha ka ndhawu ya ku kwetsima, a ta yi yambala anze ku hela 7 wa masiku.+

31 “U ta teka nyempfu leyi nga nyikeliwa nkama ku nga vekiwa vaprista u gama u sweka nyama ya kona ka ndhawu ya ku kwetsima.+ 32 Aroni ni vana va yena va ta dla+ nyama ya nyempfu ni pawu leli nga ka ndzhava na va li ka nyanghwa wa tende la ntlhanganu. 33 Va fanele va dla swilo leswi ku nga yendliwa hi swona gandzelo la ku kombela ku rivaleliwa nkama va nga vekiwa swaku va va vaprista* ni ku kwetsimisiwa. Kambe munhu lweyi a kalaka a nga li muprista a nga fanelanga a swi dla hikusa swa kwetsima.+ 34 Loko nyama ya nyempfu leyi ku nga yendliwa gandzelo hi yona ni pawu swo sala anze nimixo, u ta swi hisa hi ndzilu.+ A swi fanelanga swi dliwa hikusa swa kwetsima.

35 “U ta yendlisa swoleswo ka Aroni ni vana va yena hi ku landza hinkwaswu leswi ni nga ku byela swona. U ta heta 7 wa masiku na u va veka swaku va va vaprista.+ 36 Siku ni siku u ta nyikela homu swaku yi va gandzelo la xidjoho ni la ku kombela ku rivaleliwa leswaku u ta basisa altari ka xidjoho hi ku yi kombelela ku rivaleliwa, kutani u fanele u yi chela hi mafurha swaku u yi kwetsimisa.+ 37 U ta heta 7 wa masiku na u kombelela altari ku rivaleliwa naswona u fanele u yi kwetsimisa swaku yi va altari ya ku kwetsima hintamu.+ Mun’wani ni mun’wani lweyi a tirhaka ka altari a fanele a kwetsima.

38 “U fanele u nyikela hi leswi ka altari nkama hinkwawu: Tinyempfu timbirhi leti nga ni lembe lin’we, siku ni siku.+ 39 Nyikela ximbutani xin’we nimixo u gama u nyikela lexin’wani nimadlambu.+ 40 Ximbutani xa ku sungula u fanele u xi nyikela ni kilu lin’we* la mpupu wa ku siliwa kahle lowu nga patsiwa ni litru lin’we* la mafurha ya ku tenga ni litru lin’we la vhinyu la gandzelo la swakunwa.* 41 U ta nyikela ximbutani xa wumbirhi nimadlambu na xi ni gandzelo la swakudla ni la vhinyu ku fana ni lexi u nga xi nyikela nimixo. Gandzelo leli li yendleliwe Yehovha hi ndzilu, naswona u ta li nyikela li nun’hwela kahle ka yena. 42 Li ta va gandzelo la ku hisiwa leli nga ta yendliwa nkama ni nkama hi vatukulu va n’wina, ka nyanghwa wa tende la ntlhanganu phambheni ka Yehovha, lomu ni nga ta humelela ka n’wina swaku ni vulavula na wena kona.+

43 “Ni ta humelela kolanu ka Vayisrayele naswona ndhawu yoleyo yi ta kwetsimisiwa hi ku phatima ka mina.+ 44 Ni ta kwetsimisa tende la ntlhanganu ni altari naswona ni ta kwetsimisa Aroni ni vana va yena+ swaku va va vaprista va mina. 45 Ni ta tshama xikarhi ka Vayisrayele naswona ni ta va Xikwembu xa vona.+ 46 Vhela va ta swi tiva swaku hi mina Yehovha Xikwembu xa vona, lweyi a nga va humesa ka tiko la Gibita, swaku ni ta tshama xikarhi ka vona.+ Hi mina Yehovha Xikwembu xa vona.

30 “U ta yendla altari yi va ndhawu ya ku hisa swinun’hwelisu;*+ naswona u ta yi yendla hi mapulangu ya nsinya wa akasiya.+ 2 Yi fanele yi ringana matlhelo hinkwawu, yi leha kolomuyani ka 45 wa masentimetru, yi yanama 44,5 wa masentimetru* naswona yi tlakuka 89 wa masentimetru.* Timhondzo ta yona ti ta khomana na yona.+ 3 U fanele u yi namarheta woru la ku tenga: Henhla ka yona, ka matlhelo ya yona ni ka timhondzo ta yona; naswona u ta hamba bandhi la woru u gama u li veka lomu matlhelweni ka yona. 4 U ta tlhela u hamba switlan’wani swimbirhi swa woru u swi veka hansi ka bandhi la yona ka matlhelo hamambirhi, lomu timhandzi ta ku yi rhwala ti nga ta petiwa kona. 5 Yendla timhandzi hi mapulangu ya nsinya wa akasiya u gama u ti namarheta woru. 6 U fanele u veka areka leyi phambheni ka kortina leli nga kusuhi ni areka ya Wumboni,+ aphambheni ka tampa leyi nga henhla ka Wumboni, lomu ni nga ta tikombisa kona ka wena.+

7 “Aroni+ a ta hisa swinun’hwelisu+ ka yona,+ a tuvikisa ximusi xa yona ka altari nkama a lulamiselaka swa ku voninga hi swona+ mixo wun’wani ni wun’wani. 8 Nkama Aroni a nga ta tlhavika swa ku voninga hi swona nimadlambu, a fanele a hisa swinun’hwelisu. Vatukulu va n’wina va ta hisa swinun’hwelisu nkama ni nkama phambheni ka Yehovha. 9 Mi nga tshuki mi nyikela swinun’hwelisu swa ku kala mi nga rhumiwanga hi mina+ ka altari leyi kumbe gandzelo la ku hisiwa kumbe gandzelo la swakudla naswona mi nga tshuki mi chela gandzelo la vhinyu henhla ka yona. 10 Kan’we hi lembe,+ Aroni a fanele a kombela ku rivaleliwa henhla ka timhondzo ta altari. Naswona kan’we hi lembe, a fanele a kombelela altari ku rivaleliwa hi ku tota ngati yin’wani ya xifuyu xa gandzelo la xidjoho la ku kombela ku rivaleliwa.+ Leswo swi fanele swi yendliwa ka vatukulu va n’wina hinkwavu. Phela altari ya kwetsima swinene ka Yehovha.”

11 Kutani Yehovha a vulavula na Moxe a ku: 12 “Loko u konta Vayisrayele+ kuva u tiva swaku i vangaki, mun’wani ni mun’wani a fanele a nyikela xa ku ponisa wutomi la yena ka Yehovha nkama va nga ta kontiwa. Leswo swi ta yendla swaku va nga weliwi hi khombo loko va tsalisiwa. 13 Hinkwavu lava nga tsalisiwa va ta nyikela hi leswi: 6 wa magrama* ya prata. U fanele u peza prata lolelo hi ku tirhisa mapezela ya ndhawu ya ku kwetsima.*+ Minyikelo ya Yehovha+ yi ta va 6 wa magrama ya prata. 14 Mun’wani ni mun’wani lweyi a nga ta tsalisiwa na a ni 20 wa malembe kumbe ku tlula a ta humesa munyikelo wa Yehovha.+ 15 Lweyi a nga ganya a nga fanelanga a humesa swa swinyingi, ni xisiwana a xi fanelanga xi humesa munyikelo wa Yehovha lowu nga hansi ka 6 wa magrama ya prata,* swaku mi ponisa wutomi la n’wina. 16 U ta teka male ya prata ya ku ponisa wutomi ka Vayisrayele u gama u yi nyikela swaku yi seketela ntirho wa tende la ntlhanganu, leswo swi ta yendla leswaku Vayisrayele va khumbukiwa phambheni ka Yehovha, swaku male yoleyo yi ponisa wutomi la n’wina.”

17 Yehovha a tlhela a byela Moxe a ku: 18 “Yendla baziya la kobre ni xa ku tlhateka baziya;+ u gama u li veka xikarhi ka tende la ntlhanganu ni altari, se u chela mati ka lona.+ 19 Aroni ni vana va yena va ta hlamba mavoko ni minenge ka lona.+ 20 Loko va nghena ka tende la ntlhanganu kumbe loko va ya ka altari leswaku va ya tirha ni ku yendlela Yehovha magandzelo hi ndzilu swaku ximusi xa kona xi ya henhla, va fanele va hlamba hi mati swaku va nga fi. 21 Va fanele va hlamba mavoko ni minenge swaku va nga fi. Nawu lowu wu ta tirha hi masiku ni masiku ka vona, ka yena, ka vana va yena ni ka vatukulu va vona hinkwavu.”+

22 Yehovha a tlhela a byela Moxe a ku: 23 “Teka maperfumi ya lisima hintamu: 6 wa makilu ya mira ya ku tiya, makilu manharhu ya kanela ya ku nun’hwela, makilu manharhu ya kalamu ya ku nun’hwela 24 ni 6 wa makilu ya kasiya. U fanele u swi peza hi ku ya hi mapezela ya ndhawu ya ku kwetsima*+ ku patsa ni malitru manharhu ni hafu* ya mafurha ya wolivhera. 25 Kutani u ta hamba mafurha ya ku kwetsima hi wona; ma fanele ma yendliwa kahle.*+ Ma ta va mafurha ya ku kwetsima.

26 “U fanele u tota tende la ntlhanganu+ ni areka ya Wumboni hi wona, 27 meza ni swibya swa wona hinkwaswu, xa ku tlhoma swa ku voninga hi swona ni swibya swa xona, altari ya swinun’hwelisu, 28 altari ya gandzelo la ku hisiwa ni swibya swa yona hinkwaswu, baziya ni lexi li nga ta tshama henhla ka xona. 29 U fanele u swi kwetsimisa swaku swi ta kwetsima hintamu.+ Mun’wani ni mun’wani lweyi a nga ta swi khumba a fanele a kwetsima.+ 30 Kutani u ta langa Aroni+ ni vana va yena,+ u va kwetsimisa swaku va va vaprista va mina.+

31 “Va byeli leswi Vayisrayele: ‘Mafurha lawa ma ta tshama na ma kwetsima ka mina ni ka n’wina ku patsa ni vatukulu va n’wina.+ 32 A ma fanelanga ma toliwa hi munhu naswona a mi fanelanga mi yendla ya ku fana na wona. Phela ma kwetsima. Ma ta tshama ma li nchumu xa ku kwetsima ka n’wina. 33 Lweyi a nga ta tshuka a yendla mafurha ya ku fana na wona ni lweyi a nga ta tshuka a tota munhu wa ku kala a nga li muprista*+ a fanele a dlayiwa.’”

34 Kutani Yehovha a byela Moxe a ku: “Teka maperfumi lawa:+ Madonakati ya nsinya wa xitoraki, onika, galibanumi la ku nun’hwela ni olibanu* la ku tenga; maperfumi lawa ma fanele ma peza ku fana. 35 Hamba swinun’hwelisu+ hi wona; u ma pfuva kahle* u ma chela munyu,+ ma li ya ku tenga naswona ma ta va nchumu wa ku kwetsima. 36 Man’wani ya kona u ta ma kandza ma va mpupu wa ku kandziwa kahle, u gama u veka man’wani ya wona phambheni ka areka ya Wumboni leyi nga ka tende la ntlhanganu, lomu ni nga ta tikombisa kona ka wena. Ma fanele ma kwetsima ngopfu ka n’wina. 37 Swinun’hwelisu leswi mi nga ta swi yendla hi minchumu leyi a mi fanelanga mi swi tirhisela swilo swa n’wina.+ Swi fanele swi va nchumu xa ku kwetsima ka Yehovha. 38 Lweyi a nga ta tshuka a hamba swinun’hwelisu swa ku fana ni leswi swaku a twa ku nun’hwela ka swona a fanele a dlayiwa.”

31 Yehovha a tama a khuluma na Moxe a ku: 2 “Phela ni lange Bezaleli+ n’wana wa Uri, n’wana wa Huri wa lixaka la Yuda.+ 3 Ni ta mu nyika matimba hi ku tirhisa moya wa mina, ni mu nyika wutlharhi, ku twisisa ni wutivi la ku yendla ntirho wun’wani ni wun’wani wa mavoko, 4 leswaku a kota ku sasekisela swilo, a tirha hi woru, prata ni kobre, 5 a tlhela a tsema maribye,+ a yendla minchumu ya ku khoma maribye ni ku tlhela a yendla minchumu ya ku hambanahambana hi mapulangu.+ 6 Ni tlhele ni langa Oliyabu,+ n’wana wa Ayisamaki wa lixaka la Dani leswaku a mu pfuna naswona hinkwavu lava swi kotaka ku tirha kahle* ni ta tata timbilu ta vona hi wutlharhi, leswaku va yendla hinkwaswu leswi ni nga ku byela swona:+ 7 Tende la ntlhanganu,+ areka ya Wumboni,+ tampa+ leyi nga henhla ka yona, swilo hinkwaswu leswi tirhisiwaka ka tende, 8 meza+ ni swibya swa wona, xa ku tlhoma swa ku voninga hi swona xa woru la ku tenga ni hinkwaswu leswi tirhisiwaka ka xona,+ altari ya swinun’hwelisu,*+ 9 altari ya gandzelo la ku hisiwa+ ni swibya swa yona hinkwaswu, baziya ni lexi li vekiwaka henhla ka xona,+ 10 mpahla ya ku hambiwa kahle, mpahla ya ku kwetsima ya muprista Aroni, mpahla ya vana va yena lava nga ta va vaprista,+ 11 mafurha ya ku kwetsima, ni swinun’hwelisu swa ndhawu leyi kwetsimaka.+ Va ta yendla hinkwaswu leswi ni nga ku rhuma swona.”

12 Yehovha a tlhela a byela Moxe a ku: 13 “Khuluma ni Vayisrayele u va byela leswi: ‘Xa lisima hintamu mi fanele mi hlayisa tisavata ta mina,+ hikusa i xikombiso xikarhi ka mina na n’wina ni ka vanhu va n’wina hinkwavu lava nga ta va kona ka nkama lowu taka, leswaku mi ta swi tiva swaku mina Yehovha na mi kwetsimisa. 14 Mi fanele mi hlonipha Savata, hikusa ya kwetsima ka n’wina.+ Lweyi a nga ta tshuka a tlula nawu wa savata a ta dlayiwa. Lweyi a nga ta tshuka a tirha hi savata, a fanele a dlayiwa xikarhi ka vanhu va ka vona.+ 15 Ku nga tirhiwa ka 6 wa masiku ntsena, kambe hi siku la wu 7 i savata, i siku la lisima la ku humula.+ I siku la ku kwetsima ka Yehovha. Lweyi a nga ta tirha hi siku la Savata a fanele a dlayiwa. 16 Vayisrayele va fanele va hlayisa Savata; vona ku patsa ni vatukulu va vona hinkwavu va fanele va hlonipha Savata. I ntwananu wa hi masiku ni masiku. 17 I xikombiso xa ku kala xi nga heli xikarhi ka mina ni Vayisrayele,+ hikusa Yehovha a yendle matilo ni misava hi 6 wa masiku, kambe hi siku la wu 7 a tshike ku tirha a humula.’”+

18 Nkama a nga gama ku khuluma na Moxe ka Ntshava ya Sinayi, a mu nyike maribye mambirhi ya Wumboni,+ maribye lawa ya mambirhi ma tsaliwe hi litiho la Xikwembu.+

32 Nkama vanhu va nga vona swaku Moxe wa hlwela ku xika hi ka ntshava.+ Va hlengeletanile va ya ka Aroni va fika va ku: “Hi yendleli xikwembu lexi nga ta hi rhangela,+ hikusa a hi swi tivi swaku ku humelele yini hi Moxe wa kona, wanuna lweyi a nga hi rhangela hi huma ka tiko la Gibita.” 2 Se Aroni a va byela leswi: “Susani switlan’wani swa woru+ leswi nga ka tindleve ta vasati va n’wina, vana va n’wina va madjaha ni va tintombhi, mi swi tisa la ka mina.” 3 Vanhu hinkwavu va sungula ku susa switlan’wani swa woru leswi a va li na swona ka tindleve ta vona va swi yisa ka Aroni. 4 Kutani a teka woru leli va nga mu nyika, a gama a tirhisa xa ku boxetela hi xona* a yendla xifaniso xa xihon’wani.*+ Se va sungula ku vula va ku: “Hi lexi Xikwembu xa wena, wena Israyele, lexi nga ku rhangela xi ku humesa ka tiko la Gibita.”+

5 Nkama Aroni a nga vona leswi, a gama a yaka altari phambheni ka xihon’wani. Se a huwelela a ku: “Mundzuku ku ta va ni fexta* la Yehovha.” 6 Kutani va pfuka nimixo hi mundzuku ka kona va sungula ku yendla magandzelo ya ku hisiwa va tlhela va nyikela magandzelo ya ku kombela ku rhula. Nkama va nga heta va tshame hansi swaku va dla va tlhela va phuza. Va gama va sekeleka va tsaka.+

7 Se Yehovha a byela Moxe a ku: “Xika, famba ka vanhu va wena lava u nga va humesa ka tiko la Gibita hikusa va yendle swilo swa ku biha.+ 8 Va hantle va khohlwa minawu leyi ni nga va byela yona.+ Va tiyendlele xifaniso xa xihon’wani naswona va tama va xi khizamela va tlhela va xi gandzela na va ku: ‘Hi lexi Xikwembu xa wena, wena Israyele, lexi nga ku humesa ka tiko la Gibita.’” 9 Yehovha a tlhela a byela Moxe a ku: “Ni swi vonile swaku vanhu lava va tiyele tinhloko.*+ 10 Se swoswi ni tshiki, ni va helisa na na ha kwatile, ni ta gama ni yendla swaku wena u va tiko lalikulu.”+

11 Kutani Moxe a kombela Yehovha Xikwembu xa yena+ a ku: “Yehovha, hi mhaka muni u fanele u kwatela vanhu va wena leswi se u nga va humesa ka tiko la Gibita hi matimba yamakulu ni hi voko la matimba ke?+ 12 Phela loko ho yendla leswo Vagibita va ta ku: ‘A a lava ku va yendla swa ku biha nkama a nga va humesa Gibita. A a lava ku va dlaya ka tintshava ni ku va helisa misaveni.’+ U nga kwati, txintxa xiboho xa wena xa ku tisela vanhu lava khombo leli. 13 Khumbuka Abrahamu, Izaki na Israyele vatirheli va wena lava u nga va fungela u ku: ‘Ni ta yendla swaku vana* va n’wina va va vanyingi ku fana ni tinyeleti ta matilo+ naswona ni ta va nyika tiko leli hinkwalu leli ni nga li langela vana* va n’wina, leswaku va li teka li va la vona hi masiku ni masiku.’”+

14 Se Yehovha a txintxa xiboho xa yena xa ku tisela vanhu va yena khombo.+

15 Kutani Moxe a ndzuluka a gama a xika ka ntshava na a khome maribye mambirhi ya Wumboni+ hi mavoko.+ Maribye lawa a ma tsaliwe ka matlhelo hamambirhi; a ma tsaliwe phambheni ni le ndzhaku. 16 Maribye lawa a ma yendliwe hi Xikwembu naswona hi xona xi nga tsala ka wona hi ku yendla hi ku boxetela.+ 17 Nkama Yoxuwa a nga twa guwa la vanhu lava a va huwelela, a byele Moxe a ku: “Ingi ku ni vanhu va lwaka matendeni.” 18 Kambe Moxe a ku:

19 Nkama Moxe a nga fika kusuhi ni matende naswona a vona xihon’wani+ ni vanhu na va txina, a sungula ku kwata hintamu, a gama a txukumeta maribye lawa a a ma tamelile a ma pfotlosa hansi ka ntshava.+ 20 A teka xihon’wani lexi va nga xi yendla a xi hisa hi ndzilu a gama a xi sila xi va mpupu;+ se a teka mpupu wa kona a wu txukumetela henhla ka mati a gama a rhuma Vayisrayele leswaku va ma phuza.+ 21 Se Moxe a byela Aroni a ku: “Va ku yendle yini vanhu lava u za u va tisela xidjoho xaxikulu xa ku fana ni lexi?” 22 Aroni a hlamula a ku: “U nga kwati hosi ya mina. U swi tiva kahle swaku vanhu lava va rhandza ku yendla swa ku biha.+ 23 Se va ni byele leswi: ‘Hi yendleli xikwembu lexi nga ta hi rhangela, hikusa a hi swi tivi swaku ku humelele yini hi Moxe wa kona, wanuna lweyi a nga hi rhangela hi huma ka tiko la Gibita.’+ 24 Se ni te: ‘Lweyi a nga ni woru a fanele a li susa a ni nyika.’ Se ni li teka ni li chela ka ndzilu ku gama ku huma xihon’wani lexi.”

25 Kutani Moxe a gama a swi vona swaku vanhu a va nga ha khomeki hikusa Aroni a a va tshikile va tipoyilisa hi voxe ka valala va vona. 26 Se Moxe a nyima ka nyanghwa wa matende a ku: “I vamani lava nyimaka na Yehovha? A va te ka mina!”+ Kutani Valevhi hinkwavu va ya ka yena. 27 Se a va byela leswi: “Yehovha Xikwembu xa Israyele a te: ‘Mun’wani ni mun’wani a a teke xipada xa yena a nghena ka matende a dlaya makwavu wa yena, vhizinyu wa yena ni munghanu wa yena.’”+ 28 Se Valevhi va yendle leswi Moxe a nga va rhuma swona. Kutani hi siku lolelo ku dlayiwe kolomuyani ka 3.000 wa vavanuna. 29 Kutani Moxe a ku: “Tibasiseni namuntlha swaku mi ta yendla ntirho wa Yehovha hikusa mun’wani ni mun’wani wa n’wina a lwe ni n’wana wa yena ni makwavu;+ namuntlha Xikwembu xi ta mi katekisa.”+

30 Se hi mundzuku ka kona Moxe a byela vanhu a ku: “Mi yendle xidjoho xaxikulu hintamu, kutani swoswi ni ta khwela ka ntshava ni ya ka Yehovha ni ya kombela swaku a mi rivalela xidjoho xa n’wina.”+ 31 Kutani Moxe a tlhela a phindhela ka Yehovha a fika a ku: “Vanhu lava va yendle xidjoho xaxikulu! Va tiyendlele xikwembu xa woru!+ 32 Kambe swoswi loko u swi tsakela, va rivaleli xidjoho xa vona;+ loko u nga lavi ku yendla leswo, ni kombela u ni tima ka buku ya wena leyi u nga yi tsala.”+ 33 Kambe Yehovha a byela Moxe a ku: “Lweyi a nga ni djohela hi yena lweyi ni nga ta mu tima ka buku ya mina. 34 Swoswi famba, u ya rhangela vanhu u va yisa ka ndhawu leyi ni nga ku byela yona. Ntsumi ya mina yi ta ku rhangela+ naswona siku leli ni nga ta va yavanyisa, ni ta va khatisa hi mhaka ya xidjoho xa vona.” 35 Se Yehovha a tisela vanhu khombo hi leswi va nga yendla xihon’wani, lexi nga yendliwa hi Aroni.

33 Se Yehovha a tlhela a byela Moxe a ku: “Famba ni vanhu lava u nga va rhangela u va humesa ka tiko la Gibita. Fambani ka tiko leli ni nga li fungela Abrahamu, Izaki na Yakobe ni ku: ‘Ni ta li nyika vana*+ va n’wina.’ 2 Ni ta rhuma ntsumi leyi nga ta mi rhangela+ yi hlongola Vakanana, Vaamori, Vaheti, Vaperezi, Vahivhi ni Vayebusi.+ 3 Fambani ka tiko leli nga tala hi leiti ni wulombe.+ Kambe a ni nga ta famba na n’wina, hikusa mi vanhu va ku tiyela tinhloko*+ se ni nga tshuka ni mi helisa ndleleni.”+

4 Nkama vanhu va nga twa timhaka leti ta ku biha, va sungula ku rila, naswona a nga kona ni mun’we lweyi a nga yambala swiphatiphati swa yena swa ku tisasekisa. 5 Yehovha a byela Moxe a ku: “Byela Vayisrayele u ku: ‘Mi vanhu va ku tiyela tinhloko.*+ Phela ni nga mi tela ni ta mi helisa hi nkamanyana.+ Kutani swoswi susani swiphatiphati swa n’wina swa ku tisasekisa na na ha pimisa swaku ni ta mi yendla yini.’” 6 Se ku sukela ka ntshava ya Horebi Vayisrayele a va ha zanga va swi yambala swiphatiphati swa ku tisasekisa.

7 Se Moxe a teka tende la yena a ya li gwimba handle, a kulenyana ni matende ya lavan’wani, a gama a li chula swaku i tende la ntlhanganu. Se hinkwavu lava a va lava ku vutisa xanchumu ka Yehovha,+ a va huma va ya ka tende la ntlhanganu leli a li li handle ka matende laman’wani. 8 Loko Moxe a ya tendeni, vanhu hinkwavu a va nyima ka tinyanghwa ta matende ya vona, va mu txuvuka anze a nghena ka tende. 9 Loko Moxe a ku swee ka tende, rhefu lalikulu+ a li xika li nyima ka nyanghwa wa tende na Xikwembu xi vulavula na Moxe.+ 10 Loko vanhu hinkwavu va vona rhefu lalikulu na li nyima ka nyanghwa wa tende, mun’wani ni mun’wani a a khizama na a li ka nyanghwa wa tende la yena. 11 Yehovha a a vulavula na Moxe hi ku kongoma,+ ku fana ni leswi munhu a vulavulisaka xiswona ni munhu mun’wani. Loko a tlhela ka matende, Yoxuwa+ n’wana wa Nuni lweyi a a tirhisana na yena+ a a nga humi ka tende.

12 Se Moxe a byela Yehovha a ku: “U ni byele swaku: ‘Rhangela vanhu lava,’ kambe a wu ni byelanga swaku ni ta famba na mani. U tlhele u ku: ‘Ni ku tiva hi vito* naswona na ku tsakela.’ 13 Na ku kombela, loko u ni rhandza ni byeli tindlela ta wena+ leswaku ni ta ku tiva ni tlhela ni tama ni rhandziwa hi wena. Naswona khumbuka swaku tiko leli i vanhu va wena.”+ 14 Kutani Xikwembu xi ku: “Ni ta famba na wena+ naswona ni ta yendla swaku u humula.”+ 15 Se Moxe a byela Xikwembu a ku: “Phela loko u nga fambi na hina, swa yampsa u nga hi susi la. 16 Swi ta tivisiwa ku yini swaku vhela mina ni vanhu va wena wa hi tsakela ke? Indjhe a swi ngo to tiviwa swaku mina ni vanhu va wena hi hlawulekile ka vanhu lavan’wani hinkwavu amisaveni,+ loko u famba na hina ke?”+

17 Yehovha a tlhela a byela Moxe a ku: “Ni ta swi yendla ni leswi u swi kombelaka hikusa na ku tsakela naswona ni ku tiva hi vito.” 18 Se Moxe a ku: “Ni kombela u ni komba ku phatima ka wena.” 19 Kutani Xikwembu xi ku: “Ni ta yendla swaku u vona wunene la mina hinkwalu naswona ni ta ku byela vito la mina, ku nga Yehovha;+ ni ta tsakela lweyi ni mu tsakelaka naswona lweyi ni lavaka ku mu komba timpsalu ni ta mu komba timpsalu.”+ 20 Kambe xi tlhela xi ku: “A wu nge yi voni nghohe* ya mina hikusa a ku na munhu lweyi a nga ni vonaka a gama a tama a hanya.”

21 Yehovha a tlhela a ku: “Hi leyi ndhawu lani kusuhi na mina. Nyima henhla ka ribye. 22 Nkama ku phatima ka mina ku nga ta hundza, ni ta ku nghenisa ka mbhovo wa ribye naswona ni ta ku pfala hi voko la mina anze ni hundza. 23 Se ni ta gama ni susa voko la mina, kutani u ta vona nhlana wa mina. Kambe nghohe ya mina a wu nga ta yi vona.”+

34 Se Yehovha a byela Moxe a ku: “Khwaya maribye mambirhi ma fana ni lawayani ya ku sungula,+ ni ta gama ni tsala marito lawa a ma li ka maribye ya ku sungula+ lawa u nga ma pfotlosa.+ 2 Tilunghiseli hikusa nimixo u ta ya ka Ntshava ya Sinayi, u ya nyima phambheni ka mina kolahayani henhla ka ntshava.+ 3 Kambe famba wexe naswona ku nga tshuki ku va ni munhu lweyi a nga ta voniwa na a li ka ntshava yoleyo. Hambi ntlhambi wa tinyempfu kumbe wa tihomu na wona a wu fanelanga wu dla byanyi phambheni ka ntshava yoleyo.”+

4 Se Moxe a khwaya maribye mambirhi ma fana ni lawayani ya ku sungula, a gama a pfuka nimixo a ya ka Ntshava ya Sinayi hi ku landza leswi Yehovha a nga mu byela swona, a famba ni maribye mambirhi. 5 Kutani Yehovha a xika+ na a li ka marhefu a fika a nyima kolanu na Moxe, a gama a mu byela hi vito leli nge Yehovha.+ 6 Yehovha a hundza phambheni ka Moxe a ku: “Yehovha, Yehovha, Xikwembu xa timpsalu+ ni ntwelawusiwana,+ lweyi a hlwelaka ku kwata+ naswona a nga tala hi lirhandzu+ ni ntiyiso,*+ 7 lweyi a rhandzaka vanhu va vanyingi hintamu,+ lweyi a rivalelaka xidjoho ni ku kala ku yingisa nawu,+ kambe a nge tshuki a tshika ku khatisa lweyi a nga djoha,+ a ta khatisa vana ni vatukulu hi mhaka ya swidjoho swa vapapayi va vona, a ta tlhela a yendla leswo ka lixaka la wunharhu ni ka lixaka la wu 4.”+

8 Se Moxe a khizama ximombo xa yena xi khumba hansi. 9 Kutani a ku: “Yehovha, loko u ni tsakela ni kombela swaku wena Yehovha u famba na hina+ hambileswi hi nga vanhu va ku tiyela tinhloko,*+ hi rivaleli xidjoho xa hina+ u hi teka na hi li vanhu va wena.” 10 Se Xikwembu xi ku: “Ni yendla ntwananu: Ni ta yendla swilo swa ku hlamalisa phambheni ka vanhu va wena hinkwavu leswi kalaka swi nge se tshama swi yendleka misaveni hinkwayu kumbe ka matiko hinkwawu,+ vanhu hinkwavu lava u tshamaka na vona va ta vona mintirho ya Yehovha, hikusa leswi ni ku yendlelaka swona swa hlamalisa.+

11 “Yingisani leswi ni mi byelaka swona namuntlha.+ Ni ta hlongola Vaamori, Vakanana, Vaheti, Vaperezi, Vahivhi ni Vayebusi+ aphambheni ka n’wina. 12 Tivoneleni swaku mi nga yendli ntwananu ni vanhu va tiko leli mi yaka ka lona,+ hikusa va nga va ntlhamu ka n’wina.+ 13 Kambe mi fanele mi dilizela maaltari ya vona, mapilari ya vona lawa va nga ma txintxa ma va swikwembu swa vona mi tlhela mi hahlula+ ni timhandzi ta vona ta Axera.* 14 Mi nga tshuki mi khizamela xikwembu xin’wani+ hikusa Yehovha a lava swaku ku gandzeliwa yena ntsena. I Xikwembu lexi lavaka swaku ku gandzeliwa xona ntsena.+ 15 Tivoneleni swaku mi nga yendli ntwananu ni vanhu va tiko lolelo, hikusa nkama va tinyiketelaka ka swikwembu swa vona ni ku swi yendlela magandzelo,+ mi ta dla swakudla leswi va nga yendla hi swona magandzelo ya vona.+ 16 Mi ta tshuka mi teka vana va vona va tintombhi swaku va va vasati va vana va n’wina va madjaha,+ se vana va vona va tintombhi nkama va nga ta tinyiketela ka swikwembu swa vona va ta tshuka va yendla swaku vana va n’wina na vona va tinyiketela ka swikwembu swa vona.+

17 “Mi nga tiyendleli swikwembu swa nsimbi.+

18 “Mi ta hamba Fexta la Mapawu ya Ku Kala Fermentu.+ Mi ta dla mapawu ya ku kala fermentu hi ku landza leswi ni nga mi byela swona; mi ta heta 7 wa masiku na mi yendla leswo hi nkama lowu nga vekiwa hi wheti ya Abibi,*+ hikusa mi hume Gibita hi wheti yoleyo.

19 “Matevula hinkwawu ya xinuna i ya mina+ ku patsa ni swiharhi swa n’wina hinkwaswu, hambi matevula ya homu kumbe ya nyempfu.+ 20 Mbongolo ya matevula mi ta yi hakelela* hi nyempfu. Kambe loko mi nga yi hakeleli, mi fanele mi yi tshova nhamu. Ni vana va n’wina hinkwavu va xinuna lava nga matevula na vona mi fanele mi va hakelela.+ A nga kona lweyi a nga ta ta ka mina na a nga khomanga nchumu.

21 “Mi fanele mi tirha 6 wa masiku ntsena kambe hi siku la wu 7 mi fanele mi humula.*+ Mi fanele mi yendla leswo hambi a li nkama wa ku rima kumbe wa ku tshovela.

22 “Mi ta yendla Fexta la Mavhiki hi trigu leli nga rhanga li tshoveliwa ku patsa ni Fexta la Ku Hlengeleta* loko lembe li hela.+

23 “Kanharhu hi lembe, vavanuna hinkwavu va fanele va humelela phambheni ka Yehovha, Hosi ya ntiyiso, lweyi a nga Xikwembu xa Israyele.+ 24 Hikusa ni ta hlongola matiko phambheni ka wena+ naswona ni ta yendla swaku ndhawu ya wena yi va yikulu, a ku na munhu lweyi a nga ta navela tiko la wena nkama u nga ta ya ka Yehovha Xikwembu xa wena, kanharhu hi lembe.

25 “Mi nga tshuki mi nyikela ngati ya gandzelo la mina ni swilo leswi nga cheliwa fermentu.+ Gandzelo la fexta la Paxkwa a li fanelanga li tshikiwa li tshama wusiku hinkwalu li za li ya xa.+

26 “Mi ta tisa mihandzu yayinene ngopfu leyi nga rhanga yi wupfa andlwini ya Yehovha Xikwembu xa n’wina.+

“Mi nga tshuki mi sweka ximbutani hi leiti la mamani wa xona.”+

27 Yehovha a tlhela a byela Moxe a ku: “U ta tsala marito lawa+ hikusa hi ku ya hi marito lawa, ni yendla ntwananu na wena ni Vayisrayele.”+ 28 Moxe a tshame kolanu na Yehovha 40 wa masiku, wusiku ni nhlikanhi. A nga dlanga pawu naswona a nga phuzanga mati.+ A* tsale marito ya ntwananu ka maribye, ku nga 10 wa Minawu.+

29 Se Moxe a xika hi ka Ntshava ya Sinayi na a khome maribye mambirhi ya Wumboni.+ Nkama a a xika hi ka ntshava, a a nga swi voni swaku nghohe* ya yena a yi phatima hintamu hi mhaka ya leswi a a khuluma ni Xikwembu. 30 Nkama Aroni ni Vayisrayele hinkwavu va nga vona Moxe, va vone swaku nghohe ya yena a yi phatima swinene, se va chava ku tshinela kusuhi na yena.+

31 Kambe Moxe a va vitana, se Aroni ni hinkwavu lava a va rhangela vanhu va ya ka yena, kutani Moxe a khuluma na vona. 32 Se Vayisrayele hinkwavu va gama va tshinela kusuhi na yena kutani a va byela hinkwaswu leswi Yehovha a nga mu byela swona ka Ntshava ya Sinayi.+ 33 Loko Moxe a gama ku khuluma na vona a a timbhonya nghohe+ hi nguvu. 34 Kambe loko Moxe a ya khuluma na Yehovha a a susa nguvu anze a huma.+ Se a a gama a huma a ya byela Vayisrayele minawu leyi a nga nyikiwa yona.+ 35 Vayisrayele a va vona swaku nghohe ya Moxe a yi phatima hintamu; kutani Moxe a a timbhonya nghohe hi nguvu anze a ya nghena swaku a ya khuluma ni Xikwembu.+

35 Loko se ku hundze nkamanyana, Moxe a hlengelete Vayisrayele hinkwavu a gama a va byela a ku: “Hi leswi swilo leswi Yehovha a nga hi rhuma swaku hi swi yendla:+ 2 Ku nga tirhiwa hi 6 wa masiku ntsena, kambe siku la wu 7 la kwetsima ka n’wina, i savata, ku nga siku la lisima la ku humula ka Yehovha.+ Lweyi a nga ta tirha hi siku lelo a fanele a dlayiwa.+ 3 Mi nga tshuki mi tshivela ndzilu makaya ka n’wina hi siku la Savata.”

4 Se Moxe a byela Vayisrayele hinkwavu a ku: “Hi leswi swilo leswi Yehovha a nga ni byela swaku swi yendliwa: 5 ‘Tiselani Yehovha minyikelo.+ Mun’wani ni mun’wani lweyi a swi lavaka hi mbilu hinkwayu+ a a tise munyikelo wa Yehovha: Woru, prata, kobre, 6 linya la azuli, mavoya ya ku pshuka, nguvu ya ku pshuka, nguvu ya xiyimu xa le henhla, mavoya ya mbuti,+ 7 swikhumba swa tinyempfu leswi swi nga pendiwa swi va swa ku pshuka, xikhumba xa foka,* mapulangu ya nsinya wa akasiya,* 8 mafurha ya ku chela ka swa ku voninga hi swona, balsamu swaku ku yendliwa mafurha ya ku kwetsima ni ya ku yendla swinun’hwelisu,*+ 9 maribye ya onikisi ni maribye man’wani lawa ma nga ta vekiwa ka efodi*+ la muprista ni ka xipaxtani xa yena xa xifuva.+

10 “‘Hinkwavu lava kotaka ku yendla mintirho*+ a va te, va ta yendla swilo hinkwaswu leswi Yehovha a nga swi vula, 11 tabernakela ni tende la yona ku patsa ni tampa ya yona, swa ku hayeka ka swona ni maaru ya yona, timhandzi ta yona, mapilari ya yona ni swilo swa ku tlhoma ka swona maaru; 12 Areka+ ni timhandzi ta yona,+ tampa+ ni kortina+ la ku hambanisa hi lona; 13 meza+ ni timhandzi ta wona ni swibya swa wona hinkwaswu ku patsa ni pawu la ku kwetsima;+ 14 xa ku tlhoma swa ku voninga hi swona+ ni swibya swa xona, swa ku voninga hi swona ni mafurha ya kona;+ 15 altari ya swinun’hwelisu+ ni timhandzi ta yona; mafurha ya ku kwetsima ni swinun’hwelisu;+ kortina leli nga ta va ka nyanghwa wa tabernakela; 16 altari ya gandzelo la ku hisiwa+ ni xisefo xa yona xa kobre, timhandzi ta yona ni swibya swa yona hinkwaswu; baziya ni xa ku tlhateka baziya;+ 17 makortina ya ku pfala kintari,*+ mapilari ya wona ni swa ku tlhoma maaru; kortina la nyanghwa wa ku nghena ka kintari; 18 swimhandzani swa tabernakela ni swimhandzani swa kintari* ni magoda ya kona;+ 19 mpahla ya ku hambiwa kahle+ ya ku tirha hi yona ka ndhawu leyi kwetsimaka, mpahla ya ku kwetsima ya muprista Aroni+ ni mpahla ya vana va yena lava va nga ta va vaprista.’”

20 Se Vayisrayele hinkwavu va suka phambheni ka Moxe va famba. 21 Kutani mun’wani ni mun’wani lweyi mbilu ya yena yi nga swi tsakela+ ni mun’wani ni mun’wani lweyi a nga ni moya wa ku nyika a tise munyikelo wa yena ka Yehovha swaku wu tirhisiwa ka tende la ntlhanganu, ka mintirho hinkwayu ya tende ni ka mpahla ya ku kwetsima. 22 Vavanuna ni vavasati hinkwavu lava nga swi tsakela, va tame va tisa ni swa ku sasekisa mpahla, switlan’wani swa tindleve, ma aneli ni swiphatiphati swin’wani ku patsa ni swilo hinkwaswu swa woru. Hinkwavu va tise magandzelo* ya vona ya woru ka Yehovha.+ 23 Kutani hinkwavu lava a va ni linya la azuli, mavoya ya ku pshuka, nguvu ya ku pshuka, nguvu ya xiyimu xa le henhla, mavoya ya mbuti, swikhumba swa tinyempfu leswi nga pendiwa swi va swa ku pshuka ni swikhumba swa foka,* va swi tisile. 24 Hinkwavu lava a va nyikela hi prata ni kobre, va tise minyikelo wa Yehovha ni hinkwavu lava a va li ni mapulangu ya nsinya wa akasiya lowu nga yendlaka ntirho wun’wani ni wun’wani, va wu tisile munyikelo wa vona.

25 Vavasati hinkwavu+ lava kotaka ku luka kahle swilo hi mavoko, va tise swilo leswi va nga swi luka: Linya la azuli, mavoya ya ku pshuka, nguvu ya ku pshuka ni nguvu ya lisima hintamu. 26 Kutani vavasati hinkwavu lava va swi kotaka ku luka kahle, lava timbilu ta vona ti nga swi tsakela va luke mavoya ya mbuti.

27 Varhangeli va tise maribye ya onikisi ni maribye man’wani swaku ma vekiwa ka efodi la muprista ni ka xipaxtani xa xifuva,+ 28 balsamu, mafurha ya ku chela ka swa ku voninga hi swona, mafurha ya ku kwetsima+ ni ya swinun’hwelisu.+ 29 Vavanuna ni vavasati hinkwavu lava nga swi tsakela, va tise swilo swaku ku yendliwa ntirho lowu Yehovha a nga hlaya swaku wu yendliwa hi ku tirhisa Moxe; Vayisrayele va tise swilo leswo swi va gandzelo la ku tirhandzela ka Yehovha.+

30 Se Moxe a byela Vayisrayele a ku: “Yehovha a lange Bezaleli n’wana wa Uri, n’wana wa Huri wa lixaka la Yuda.+ 31 Xikwembu xi nyike Bezaleli matimba hi ku tirhisa moya wa xona wa ku kwetsima, xi mu nyike wutlharhi, ku twisisa ni wutivi la ku yendla ntirho wun’wani ni wun’wani wa mavoko, 32 swaku a kota ku sasekisela swilo, a tirha hi woru, prata ni kobre, 33 a tlhela a tsema maribye a yendla ni minchumu ya ku khoma maribye ni ku tlhela a yendla minchumu ya ku hambanahambana hi mapulangu. 34 Xikwembu xi game xi swi veka ka mbilu ya Bezaleli na Oliyabu+ n’wana wa Ayisamaki wa lixaka la Dani swaku va kota ku djondzisa. 35 Xikwembu xi va nyike wutlharhi+ la ku yendla mintirho hinkwayu ya mavoko, ntirho wa ku yendla tinguvu ni wa ku rhunga hi linya la azuli, mavoya ya ku psuka, nguvu ya ku pshuka, nguvu ya xiyimu xa le henhla ni ntirho wa ku luka. Vavanuna lava va ta yendla mintirho hinkwayu va tlhela va yendla swilo swa ku hambanahambana.

36 “Bezaleli a ta tirha na Oliyabu ni vavanuna hinkwavu lava va swi kotaka ku tirha kahle, lava Yehovha a nga va nyika wutlharhi ni ku twisisa swaku va kota ku yendla ntirho hinkwawu wa ku kwetsima, hi ku landza leswi Yehovha a nga swi hlaya.”+

2 Se Moxe a vitana Bezaleli na Oliyabu ni vavanuna hinkwavu lava va swi kotaka ku yendla kahle ntirho, lava Yehovha a nga va nyika wutlharhi,+ hinkwavu lava timbilu ta vona ti nga va yendla va tinyikela swaku va yendla ntirho hi ku swi rhandza.+ 3 Kutani va teka minyikelo hinkwayu+ ka Moxe leyi Vayisrayele va nga yi tisa swaku ku yendliwa ntirho wa ku kwetsima. Kambe vanhu va tame va tisa magandzelo ya ku tirhandzela ka yena mixo wun’wani ni wun’wani.

4 Loko vatirhi lava nga ni wutlharhi va sungule ku yendla ntirho wa ku kwetsima, va game va ya ka Moxe hi mun’we hi mun’we, 5 va fika va ku: “Vanhu va tisa swilo swa swinyingi ku tlula leswi lavekaka swaku ku yendliwa ntirho lowu Yehovha a nga vula swaku wu yendliwa.” 6 Moxe a rhuma vanhu swaku va yendla xitiviso ka matende lexi nge: “Vavanuna ni vavasati, mi nga ha tiseni nchumu swaku xi va munyikelo wa ku kwetsima.” Se vanhu a va ha pfumeleliwanga ku tisa swilo swin’wani. 7 Swilo leswi nga tisiwa a swi ringana ku yendla ntirho hinkwawu lowu a wu fanele wu yendliwa naswona a swi li swinyingi hintamu.

8 Kutani vatirhi hinkwavu lava nga ni wutlharhi+ va yendla tabernakela+ hi 10 wa tipanu ta ku lukiwa ta xiyimu xa le henhla, linya la azuli, mavoya ya ku pshuka ni nguvu ya ku pshuka; a* rhungetele swifaniso swa makerubu ka tona.+ 9 Panu yin’wani ni yin’wani a yi lehe 12,5 wa mametru* yi yanama 1,8 metru.* Tipanu hinkwatu a ti ringana. 10 Se a patsa 5 wa tipanu ti va panu yin’we a tlhela a patsa 5 wa tipanu letin’wani ti va panu yin’we. 11 A gama a yendla swa ku hulela ka swona hi linya la azuli ka magamu ya panu lomu a yi ta tlhanganisiwa ni yin’wani. A tlhele a yendla leswo ni ka magamu ya panu ya handle ka tende, lomu a yi ta tlhanganisiwa ni panu yin’wani. 12 A yendle 50 wa swa ku hulela ka swona ka panu yin’we ni 50 wa swa ku hulela ka swona ka magamu ya panu leyin’wani lomu ti nga ta tlhangana kona swaku swa ku hulela ka swona swi ta txuvukana. 13 Hi wugamu, a yendle 50 wa swa ku huka* hi swona swa woru swaku a tlhanganisa tipanu hi swona, se tabernakela li va nchumu xin’we.

14 Kutani a yendla tipanu hi mavoya ya mbuti swaku a mbhonya tabernakela. A yendle 11 wa tipanu.+ 15 Panu yin’wani ni yin’wani a yi lehe 13,4 wa mametru,* yi yanama 1,8 metru. A 11 wa tipanu leti, a ti ringana. 16 Se a tlhanganisa 5 wa tipanu a gama a tlhela a tlhanganisa 6 wa tipanu letin’wani. 17 A game a yendla 50 wa swa ku hulela ka swona magamu ka panu leyi nga henhla lani ti tlhanganaka kona, naswona a yendla 50 wa swa ku hulela ka swona ka magamu ya panu leyin’wani leyi tlhanganaka ni liyani ya ku sungula. 18 Kutani a yendla 50 wa swa ku hayeka hi swona swa kobre swaku a tlhanganisa tende li va nchumu xin’we.

19 A yendla xa ku mbhonya tabernakela hi swikhumba swa nyempfu leswi nga pendiwa swi va swa ku pshuka henhla ka xona a yendla xa ku mbhonya hi swikhumba swa foka.*+

20 Se a yendla maaru ya tabernakela hi mapulangu ya nsinya wa akasiya,+ lawa a ma nyimisiwile.+ 21 Aru lin’wani ni lin’wani a li lehe 4,5 wa mametru* li yanama 67 wa masentimetru.* 22 Aru lin’wani ni lin’wani a li ni swilo swimbirhi leswi yendlaka leswaku ma tlhangana magamu ka wona. Maaru hinkwawu ya tabernakela a ma yendlisiwe swoleswo. 23 A yendle 20 wa maaru a ma veka ka tlhelo la sul* la tabernakela, a ma veke ma txuvuka sul. 24 A yendle 40 wa swa ku tlhoma maaru swa prata a swi veka hansi ka 20 wa maaru. Hansi ka aru lin’wani ni lin’wani a ku ni swilo swimbirhi leswi nga ta tlhomiwa ka swilo swimbirhi swa prata swa ku tlhoma maaru.+ Maaru hinkwawu a ma yendlise swoleswo. 25 A tlhele a yendla 20 wa maaru swaku a ma veka ka tlhelo la norte* la tabernakela, 26 ni 40 wa minchumu ya prata ya ku tlhoma ka yona maaru: Ka aru la ku sungula, a veke swilo swimbirhi swa ku tlhoma ka swona maaru, a tlhele a veketela swilo swimbirhi swa ku tlhoma ka swona maaru hansi ka aru lin’wani ni lin’wani leli landzelaka.

27 Ndzhaku ka tabernakela ka tlhelo la wupeladlambu, a yendle 6 wa maaru.+ 28 A yendle maaru mambirhi lawa a ma seketela tiponta timbirhi ta ndzhaku ka tabernakela. 29 Maaru lawa a ma longoloka ma li mambirhi ku suka hansi ku ya fika henhla, anze ma tlhangana ka xitlan’wani xa ku sungula. A yendle leswo ka maaru mambirhi ya le ka tiponta. 30 A ku ni 8 wa maaru ku patsa ni 16 wa swilo swa prata swa ku tlhoma ka swona maaru, hansi ka aru lin’wani ni lin’wani a ku ni swilo swimbirhi swa ku tlhoma ka swona maaru.

31 Se a yendle timhandzi hi mapulangu ya nsinya wa akasiya, 5 wa tona ti ve ta maaru ya tlhelo lin’we la tabernakela,+ 32 ni 5 wa timhandzi leti nga va ka maaru ya tlhelo lelin’wani la tabernakela, ni 5 wa timhandzi leti nga va ka maaru ya ndzhaku ka tabernakela hi ka tlhelo la wupeladlambu. 33 A yendla mhandzi ya xikarhi a yi veka hi xikarhi ka maaru ku suka ka magamu man’wani ku ya ka magamu laman’wani. 34 A namarheta maaru hi woru naswona a tlhela a yendla switlan’wani swa woru leswi swi nga ta khoma timhandzi, leti na tona a nga ti namarheta hi woru.+

35 A yendle kortina+ hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla. A game a rhunga+ swifaniso swa makerubu+ ka kortina. 36 Kutani a yendla 4 wa mapilari ya kortina lolelo hi nsinya wa akasiya a tlhela a ma namarheta hi woru ku patsa ni swa ku hayeka ka swona swa woru, a yendle 4 wa swilo swa prata swa ku tlhoma ka swona mapilari. 37 A game a yendla kortina la ku pfala ndhawu ya ku nghena hi yona ka tabernakela hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla,+ 38 ku patsa ni 5 wa mapilari ni swa ku hayeka ka swona. A namarhete woru henhla ka mapilari ni switlan’wani swa wona kambe a 5 wa swilo swa ku tlhoma ka swona mapilari a swi li swa kobre.

37 Kutani Bezaleli+ a yendla Areka+ hi mapulangu ya nsinya wa akasiya. A yi lehe kolomuyani ka 111 wa masentimetru,* yi yanama 67 wa masentimetru,* yi tlhela yi tlakuka 67 wa masentimetru.+ 2 Se a yi namarheta hi woru la ku tenga andzeni ni handle ka yona, a gama a yi veka bandhi la woru lomu matlhelweni ka yona.+ 3 A yi yendlele 4 wa switlan’wani swa woru, a gama a swi veka henhla ka 4 wa minenge ya yona, switlan’wani swimbirhi swi ve ka tlhelo lin’we kasi switlan’wani swin’wani swimbirhi swi va ka tlhelo lelin’wani. 4 A tlhele a yendla timhandzi hi mapulangu ya nsinya wa akasiya a gama a ti namarheta woru.+ 5 Se a nghenisa timhandzi toleto ka switlan’wani leswi nga matlhelweni ka Areka leswaku Areka yi rhwaliwa hi tona.+

6 A yendle tampa hi woru la ku tenga.+ A yi lehe kolomuyani ka 111 wa masentimetru, yi yanama 67 wa masentimetru.+ 7 Se a yendla makerubu mambirhi+ hi woru hi ku tirhisa hamela a gama a ma veka ka magamu mambirhi ya tampa.+ 8 Kerubu lin’we a li li ka magamu ya tlhelo lin’wani kasi kerubu lelin’wani a li li ka magamu laman’wani. A yendle makerubu ka magamu mambirhi ya tampa. 9 Makerubu lawa mambirhi a ma pfule timpapa ta wona ti ya henhla, ma mbhonya tampa hi timpapa ta wona.+ A ma txuvukanile naswona tinghohe* ta wona a ti txuvuke tampa.+

10 Kutani a yendla meza hi mapulangu ya nsinya wa akasiya.+ A wu lehe kolomuyani ka 89 wa masentimetru,* wu yanama 44,5 wa masentimetru* naswona a wu tlakuke 67 wa masentimetru.+ 11 Se a wu namarheta hi woru la ku tenga a gama a wu veka bandhi la woru lomu matlhelweni ka wona. 12 A wu yendlela bandhi leli a li yaname kolomuyani ka 7,4 wa masentimetru* leli a li li matlhelweni ka meza, ni nchumu* xa woru xa ku sasekisela hi xona lexi a xi li matlhelweni ka bandhi. 13 A tlhela a yendla 4 wa switlan’wani swa woru, a gama a swi veka ka 4 wa matlhelo ya meza ka 4 wa minenge ya wona. 14 Switlan’wani leswi, a swi li kusuhi ni nchumu lexi a xi li matlhelweni ka meza naswona a swi tirhela ku tlhoma timhandzi leti a ti ta tirhisiwa ku rhwala meza. 15 Se a yendla timhandzi hi mapulangu ya nsinya wa akasiya a gama a ti namarheta woru swaku ku rhwaliwa meza hi tona. 16 A game a yendla minchumu leyi a yi ta tirhisiwa ka meza hi woru la ku tenga, maparatu, tikopo, matijela ni majaru ya ku chela magandzelo ya vhinyu.+

17 Kutani a yendla xa ku tlhoma swa ku voninga hi swona+ hi woru la ku tenga. A yendle xa ku tlhoma swa ku voninga hi swona hi ku tirhisa hamela. Hansi ka xona, nhonga ya xona, switlukani swa xona, matluka ya swiluva ni swiluva swa kona hinkwaswu swi va nchumu xin’we.+ 18 Nhonga ya xona a yi ni 6 wa tigadja, tigadja tinharhu a ti li ka tlhelo lin’we kasi tigadja tinharhu letin’wani a ti li ka tlhelo lelin’wani. 19 Ligadja ha lin’we ka tlhelo lin’we a li ni switlukani swinharhu leswi fanaka ni swiluva swa mendwa naswona xikarhi ka switlukani leswi a ku ni matluka ya swiluva ni swiluva swa kona, a tlhele a yendla leswo ka tigadja letin’wani ka tlhelo lelin’wani. A 6 wa tigadja leti a ti li ka nhonga ya xa ku tlhoma swa ku voninga hi swona a ti tshamise swoleswo. 20 Ka nhonga ya xa ku tlhoma swa ku voninga hi swona a ku ni 4 wa switlukani leswi fanaka ni swiluva swa mendwa, naswona xikarhi ka swona a ku ni matluka ya swiluva ni swiluva swa kona. 21 Hansi ka ndhawu leyi tigadja timbirhi ta ku sungula ti tlhanganaka ka yona a ku ni matluka ya swiluva, naswona hansi ka ndhawu leyi tigadja timbirhi leti landzelaka ti tlhanganaka ka yona a ku ni matluka man’wani ya swiluva; kasi hansi ka ndhawu leyi tigadja timbirhi letin’wani ti landzelaka ti tlhanganaka ka yona na kona a ku ni matluka ya swiluva. A 6 wa tigadja leti nga ka nhonga ya xa ku tlhoma swa ku voninga hi swona a ti tshamise swoleswo. 22 Matluka ya swiluva ni tigadja a swi khomanile ni xa ku tlhoma swa ku voninga hi swona lexi a xi yendliwe hi woru la ku tenga hi ku tirhisa hamela. 23 Se a yendla 7 wa swa ku voninga hi swona,+ swa ku tima ngoti ya swa ku voninga hi swona ni swa ku chela ndzilu hi woru la ku tenga. 24 A yendle xa ku tlhoma swa ku voninga hi swona ni minchumu leyin’wani hi woru la ku tenga leli pezaka 34,2 wa makilu.*

25 Se a yendla altari ya swinun’hwelisu*+ hi mapulangu ya nsinya wa akasiya. A yi ringana matlhelo hinkwawu, a yi lehe 44,5 wa masentimetru, yi yanama 44,5 wa masentimetru, yi tlakuka 89 wa masentimetru. Timhondzo ta yona a ti khomanile na yona.+ 26 A yi namarheta woru la ku tenga, henhla ka yona, ka matlhelo ya yona ni ka timhondzo ta yona, a gama a yi veka bandhi la woru lomu matlhelweni ka yona. 27 A tlhele a yendla switlan’wani swimbirhi swa woru a swi veka hansi ka bandhi la yona ka matlhelo hamambirhi lomu timhandzi ta ku yi rhwala a ti ta petiwa ka swona. 28 A gama a yendla timhandzi hi mapulangu ya nsinya wa akasiya a gama a ti namarheta hi woru. 29 A tlhela a yendla mafurha ya ku kwetsima+ ni swinun’hwelisu+ swa ku tenga leswi nga yendliwa kahle.

38 A yendla altari ya gandzelo la ku hisiwa hi mapulangu ya nsinya wa akasiya. A yi ni 4 wa matlhelo ya ku ringana, yi leha 2,2 wa mametru* yi yanama 2,2 wa mametru, yi leha 1,3 metru.*+ 2 Kutani a yendla timhondzo ta yona ahenhla ka 4 wa tiponta ta altari. Timhondzo ta yona a ti khomanile na yona. Se a yi namarheta hi kobre.+ 3 A gama a yendla swilo hinkwaswu leswi a swi ta tirhisiwa ka altari, mabakidi ya ku chela nkuma, mafoxolo, magarfu ni swa ku chela ndzilu. A yendle swilo hinkwaswu leswo hi kobre. 4 A tlhela a yendla xisefo xa altari hi kobre, a xi veka hansi ka bandhi la yona, axikarhi ka altari. 5 A tlhela a yendla 4 wa switlan’wani a swi veka ka 4 wa tiponta ta altari akusuhi ni xisefo xa kobre swaku ku ta tlhomiwa timhandzi ka swona. 6 Se a game a yendla timhandzi hi mapulangu ya nsinya wa akasiya a ti namarheta kobre. 7 A tlhoma timhandzi ka switlan’wani leswi a swi li ka tiponta ta altari swaku yi rhwaliwa hi tona. A yendle altari hi mapulangu yi va kaxa la ku pfuleka.

8 Kutani a yendla baziya la kobre+ ni lexi a li ta tlhatekiwa ka xona; a tirhise swipelhu* swa vavasati lava a va langiwile swaku va tirha ka nyanghwa wa tende la ntlhanganu.

9 Kutani a yendla kintari.*+ Ka tlhelo la sul,* a pfale hi makortina ya ku yendliwa hi tinguvu ta ku lukiwa ta xiyimu xa le henhla lawa a ma lehe 44,5 wa mametru.*+ 10 A ku ni 20 wa mapilari ni 20 wa swilo swa kobre swa ku tlhoma mapilari wolawo, naswona a swa ku hayeka ka swona swa mapilari ni switlan’wani swa wona a swi li swa prata. 11 Naswona ka tlhelo la norte* a ku vekiwe kortina leli a li lehe 44,5 wa mametru. A 20 wa mapilari ni 20 wa swa ku tlhoma mapilari a swi li swa kobre. A swa ku hayeka ka swona ni switlan’wani swa kona a swi li swa prata. 12 Kambe ka tlhelo la wupeladlambu, a ku hayekiwe kortina leli a li yaname 22 wa mametru.* A ku ni 10 wa mapilari ni 10 wa swilo swa ku tlhoma mapilari wolawo, swa ku hayeka ka swona swa mapilari ni switlan’wani swa wona a swi li swa prata. 13 Ku yanama ka tlhelo la wuxeni ku ya ka tlhelo la wupeladlambu a ku li 22 wa mametru. 14 Ka tlhelo lin’we a ku hayekiwe kortina leli a li lehe 6,7 wa mametru* ka mapilari manharhu lawa a ma ni swa ku tlhoma ka swona mapilari swaswinharhu. 15 Se ka tlhelo lelin’wani la nyanghwa wa kintari a ku vekiwe kortina leli a li lehe 6,7 wa mametru ka mapilari manharhu lawa a ma ni swa ku tlhoma mapilari swaswinharhu. 16 Makortina hinkwawu lawa a ma li ka kintari, a ma yendliwe hi tipanu ta xiyimu xa le henhla leti nga lukiwa. 17 A swa ku tlhoma mapilari a swi li swa kobre, swa ku hayeka ka swona swa mapilari ni switlan’wani swa kona a swi li swa prata, henhla ka wona a ku namarhetiwe prata naswona mapilari hinkwawu ya kintari+ a ma ni switlan’wani swa prata.

18 A kortina la ku pfala nyanghwa wa kintari, a li yendliwe hi linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla. A li lehe 8,9 wa mametru* li tlakuka 2,2 wa mametru, a li ringana ni makortina lawa ma nga vekiwa ka kintari.+ 19 A 4 wa mapilari ya wona ni 4 wa swilo swa ku tlhoma mapilari a swi yendliwe hi kobre. A swa ku hayeka ka swona ni switlan’wani swa kona a swi li swa prata naswona henhla ka wona a ku namarhetiwe prata. 20 Swimhandzani hinkwaswu swa tabernakela ni swimhandzani leswi a swi li matlhelweni ka kintari a swi li swa kobre.+

21 Leli i lixta la swilo leswi nga tirhisiwa ka ku yaka tabernakela, ku nga tabernakela ya Wumboni.+ Moxe hi yena a nga rhuma Valevhi+ swaku va yendla lixta leli, na va rhangeliwa hi Itamari+ n’wana wa muprista Aroni. 22 Bezaleli+ n’wana wa Uri, n’wana wa Huri wa lixaka la Yuda a yendle hinkwaswu leswi Yehovha a nga swi rhuma Moxe. 23 A a na Oliyabu+ n’wana wa Ayisamaki wa lixaka la Dani, lweyi a a swi kota ku yendla kahle ntirho wa mavoko, ntirho wa ku yendla makortina, wa ku rhunga hi linya la azuli, mavoya ya ku pshuka, nguvu ya ku pshuka ni nguvu ya xiyimu xa le henhla.

24 Woru hinkwalu leli nga tirhisiwa ka ntirho hinkwawu wa ndhawu ya ku kwetsima a li ringana ni woru la gandzelo leli fambisiwaka,+ leli a li peza 1.000 wa makilu* hi ku ya hi mapezela ya ndhawu ya ku kwetsima.* 25 Kutani prata leli nga tisiwa hi vavanuna lava nga tsalisa mavito ya vona a li peza 3.440 wa makilu* hi ku ya hi mapezela ya ndhawu ya ku kwetsima.* 26 Munhu mun’wani ni mun’wani ka vavanuna hinkwavu lava nga tsalisiwa ku sukela ka 20 wa malembe ku ya henhla,+ a tise prata leli pezaka 6 wa magrama* hi ku ya hi mapezela ya ndhawu ya ku kwetsima,* vavanuna hinkwavu lava nga tsalisiwa a va li 603.550.+

27 Ku tirhisiwe 3.420 wa makilu* ya prata swaku ku yendliwa swa ku tlhoma mapilari swa ndhawu ya ku kwetsima ni leswi a swi li kusuhi ni kortina;* a 100 wa swa ku tlhoma mapilari a swi peza 3.420 wa makilu ya prata, xin’wani ni xin’wani xa ku tlhoma pilari+ a xi peza 34,2 wa makilu.* 28 A tirhise 20 wa makilu* ya prata swaku a yendla swa ku hayeka hi swona swa mapilari, se a namarheta tinhloko ta mapilari a gama a ti tlhanganisa.

29 A kobre la gandzelo* a li peza 2.420 wa makilu.* 30 A tirhise kobre lolelo swaku a yendla swa ku tlhoma mapilari lawa a ma li ka nyanghwa wa tende la ntlhanganu, altari ya kobre ni xisefo xa yona xa kobre, swilo hinkwaswu leswi a swi ta tirhisiwa ka altari, 31 swa ku tlhoma mapilari leswi a swi li matlhelweni ka kintari, swa ku tlhoma mapilari lawa a ma li ka nyanghwa wa kintari ni swimhandzani hinkwaswu swa tabernakela ni swimhandzani hinkwaswu+ leswi a swi li matlhelweni ka kintari.

39 Va tirhise linya la azuli, mavoya ya ku pshuka, ni nguvu ya ku pshuka+ swaku va hamba mpahla ya ku tirha hi yona ka ndhawu ya ku kwetsima. Va yendlele Aroni+ mpahla ya ku kwetsima, hi ku landza leswi Yehovha a nga mu byela swona Moxe.

2 Bezaleli a rhunge efodi*+ hi linya la azuli, woru, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla. 3 Va yendle swixapani swa ku lala swa woru, se Bezaleli a gama a swi tsemelela swi va malinya swaku a swi rhunga ni linya la azuli, mavoya ya ku pshuka, nguvu ya ku pshuka ni nguvu ya xiyimu xa le henhla. 4 Va yendle tinguvu timbirhi ta efodi va gama va ti tlhanganisa ka makatla. 5 Bandhi leli nga ka efodi leli a li ta yi boha swi tiya,+ a li yendliwe hi swilo leswi efodi yi nga yendliwa hi swona, ku nga woru, linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla, hi ku landza leswi Yehovha a nga mu byela swona Moxe.

6 Se va veka maribye ya onikisi ka swilo swa ku khoma maribye ya woru, va gama va tsala mavito ya vana va Israyele ka wona ku fana ni loko ku gindliwa karimbu.+ 7 Bezaleli a gama a ma veka ka efodi lani yi tlhanganaka kona hi lani ka makatla, swaku ma va xitsundzuxu ka vana va Israyele;+ hi ku landza leswi Yehovha a nga mu byela swona Moxe. 8 Kutani munhu lweyi a swi kotaka kahle ku rhunga a rhunge xipaxtani xa xifuva,+ a xi yendle xi fana ni efodi hi woru, linya la azuli, mavoya ya ku pshuka, nguvu ya ku pshuka ni nguvu ya ku lukiwa ya xiyimu xa le henhla.+ 9 A 4 wa matlhelo ya xona a ma ringana loko xi petsiwa hi xikarhi. Va yendle xipaxtani xa xifuva lexi loko xi petsiwa, ku leha ka xona ni ku yanama ka xona a ku ringana ni ku yanama ka xiyandla.* 10 Va veke 4 wa mafila ya maribye ka xona. Ka fila la ku sungula a ku ni ribye la rubi, topazi ni exmeralda. 11 Ka fila la wumbirhi a ku ni ribye la turkeza, safira ni jaxpe. 12 Ka fila la wunharhu a ku ni ribye la lexemu,* agata ni ametixta. 13 Ka fila la wu 4 a ku ni ribye la krizolita, onikisi ni jadi. Maribye lawa a ma vekiwe ka swilo swa woru swa ku khoma maribye. 14 Maribye lawa a ma nyimela 12 wa vana va Israyele naswona mavito a ma tsaliwe ku fana ni karimbu, vito lin’wani ni lin’wani li nyimela lixaka lin’we ka 12 wa tinxaka.

15 Kutani va yendle machini hi woru la ku tenga+ ma fana ni magoda swaku va ma veka ka xipaxtani xa xifuva. 16 Se va yendla swilo swimbirhi swa woru swa ku khoma maribye ni switlan’wani swimbirhi swa woru va gama va swi veka ka tiponta timbirhi ta xipaxtani xa xifuva. 17 Se va gama va nghenisa tingoti timbirhi ta woru ka switlan’wani swimbirhi leswi nga ka tiponta ta xipaxtani xa xifuva. 18 Kutani va nghenisa tingoti timbirhi ka swilo swimbirhi swa ku khoma maribye naswona va swi veka phambheni ka efodi lani tinguvu timbirhi ta efodi ti tlhanganaka kona ka makatla. 19 Va gama va yendla switlan’wani swimbirhi swa woru va swi veka ka tiponta timbirhi ta le hansi leti ti nga txuvukana ni efodi+ ndzeni ka xipaxtani xa xifuva. 20 Va tlhele va yendla switlan’wani swin’wani swimbirhi swa woru va gama va swi veka phambheni ka efodi, hansi ka mavoko mambirhi kusuhi ni lani efodi yi tlhanganisiwaka kona, ahenhla ka bandhi la efodi. 21 Hi wugamu va bohelela xipaxtani xa xifuva hi ngoti ya azuli ka switlan’wani swa xona ni ka switlan’wani swa efodi swaku xipaxtani xa xifuva xi nga suki ka efodi henhla ka bandhi, hi ku landza leswi Yehovha a nga mu byela swona Moxe.

22 Se a yendla nkhantxu wa ku kala wu nga na mavoko lowu a wu ta yambaliwa hansi ka efodi, a wu yendliwa hi muluki wa tinguvu, nkhantxu hinkwawu a wu lukiwe hi linya la azuli.+ 23 Mbhovo wa ku peta nhloko lowu a wu li hi xikarhi ka nkhantxu, a wu fana ni mbhovo wa mpahla leyi nga yendliwa hi swinsimbani. Mbhovo wa kona a wu rhungiwile swaku wu nga pandzeki. 24 Se va yendla swilo swa ku fana ni mihandzu ya ma romã hi linya la azuli, mavoya ya ku pshuka ni nguvu ya ku pshuka amagamu ka nkhantxu wa ku kala wu nga na mavoko, na swi rhungiwe xikan’we. 25 Kutani va yendla swinsimbani* hi woru la ku tenga va gama va swi veketela xikarhi ka ma romã lawa a ma li magamu ka nkhantxu wa ku kala wu nga na mavoko, swinsimbani leswi a swi li xikarhi ka ma romã; 26 va veke xinsimbani xi landzeliwa hi romã, va yendle swa ku fana ahansi ka nkhantxu hinkwawu wa ku kala wu nga na mavoko, lowu a va wu tirhisela ku yendla ntirho wa wuprista, hi ku landza leswi Yehovha a nga mu byelisa swona Moxe.

27 Va rhunge nguvu ya xiyimu xa le henhla swaku va yendla minkhantxu ya ku leha ya Aroni ni vana va yena,+ 28 va yendle xifunengeto xa nhloko*+ hi nguvu ya xiyimu xa le henhla, swifunengeto swa nhloko+ leswi nga sasekiseliwa leswi nga yendliwa hi nguvu ya xiyimu xa le henhla, swibulukwani swa le ndzeni*+ leswi nga yendliwa hi nguvu ya ku lukiwa ya xiyimu xa le henhla, 29 bandhi leli nga yendliwa hi tinguvu ta ku lukiwa ta xiyimu xa le henhla, linya la azuli, mavoya ya ku pshuka ni nguvu ya ku pshuka na swi lukiwe xikan’we, hi ku landza leswi Yehovha a nga mu byela swona Moxe.

30 Hi wugamu va yendle xixapani xa ku phatima, lexi a xi ni marka wa ku kwetsima wa ku tinyiketela,* va xi yendle hi woru la ku tenga va gama va tsala marito lama nge: “Yehovha wa Kwetsima.”+ 31 Va xi vekele ngoti leyi nga yendliwa hi linya la azuli swaku va ta xi boha ka xifunengeto xa nhloko, hi ku landza leswi Yehovha a nga mu byela swona Moxe.

32 Kutani ntirho hinkwawu wa tabernakela, ku nga tende la ntlhanganu wu hela naswona Vayisrayele va yendle hinkwaswu leswi Yehovha a nga swi byela Moxe.+ Va yo vhela va swi yendlisa swoleswo.

33 Se va teka tabernakela,+ tende+ ni swibya swa lona hinkwaswu va swi yisa ka Moxe: Swa ku hayeka hi swona,+ maaru ya yona,+ timhandzi ta yona,+ mapilari ya yona ni swa ku tlhoma mapilari swa yona;+ 34 swa ku mbhonya hi swona leswi a swi yendliwe hi swikhumba swa tinyempfu leswi nga pendiwa swi va swa ku pshuka,+ swa ku mbhonya hi swona leswi swi nga yendliwa hi swikhumba swa foka,* kortina la ku hambanisa hi lona;+ 35 areka ya Wumboni ni timhandzi ta yona+ ni tampa ya yona;+ 36 meza, swibya swa wona hinkwaswu+ ni pawu la ku kwetsima; 37 xa ku tlhoma swa ku voninga hi swona lexi nga yendliwa hi woru la ku tenga, swa ku voninga hi swona,+ swa ku voninga hi swona leswi nga vekiwa hi ku landzelelana, swibya swa xona hinkwaswu+ ni mafurha ya ku chela ka swa ku voninga hi swona;+ 38 altari+ ya woru, mafurha ya ku kwetsima,+ swinun’hwelisu*+ ni kortina+ leli a li pfala ndhawu ya ku nghena hi yona ka tende; 39 altari ya kobre+ ni xisefo xa yona xa kobre, timhandzi ta yona,+ swibya swa yona hinkwaswu,+ baziya ni xa ku tlhateka ka xona baziya;+ 40 makortina lawa a ma pfala kintari,* mapilari ya yona ni swa ku tlhoma mapilari swa yona,+ kortina+ la ku pfala nyanghwa wa kintari, magoda ya tende ni swimhandzani+ swa yona ni swilo hinkwaswu leswi a swi ta tirhisiwa ka tabernakela, ku nga tende la ntlhanganu; 41 mpahla ya ku hambiwa kahle ya ku tirha hi yona ka ndhawu leyi kwetsimaka, mpahla ya ku kwetsima ya muprista Aroni+ ni mpahla ya vana va yena lava va nga ta va vaprista.

42 Vayisrayele va yendle ntirho hinkwawu+ hi ku landza leswi Yehovha a nga mu byela swona Moxe. 43 Nkama Moxe a nga kambela ntirho wa vona hinkwawu, a vone swaku va wu yendlise leswi Yehovha a nga va byelisa swona; se Moxe a va katekisa.

40 Kutani Yehovha a byela Moxe a ku: 2 “Hi siku la ku sungula la wheti ya ku sungula, u fanele u nyimisa tabernakela, ku nga tende la ntlhanganu.+ 3 Ndzeni ka tabernakela veka areka ya Wumboni+ u gama u pfala lomu Areka yi nga kona hi kortina.+ 4 U ta gama u peta meza,+ u lunghiselela swilo leswi vekiwaka henhla ka wona kutani u nghenisa xa ku tlhoma swa ku voninga hi swona+ u gama u tlhavika swa ku voninga hi swona.+ 5 Kutani u ta gama u veka altari ya woru ya swinun’hwelisu*+ aphambheni ka areka ya Wumboni, u tlhela u veka kortina la ku pfala ndhawu ya ku nghena hi yona ka tabernakela.+

6 “U fanele u veka altari ya gandzelo la ku hisiwa+ phambheni ka nyanghwa wa tabernakela, ku nga tende la ntlhanganu 7 naswona u fanele u veka baziya xikarhi ka tende la ntlhanganu ni altari u gama u li chela mati.+ 8 Kutani u yendla kintari*+ u gama u wu pfala matlhelweni ka wona, u veka kortina+ ka nyanghwa wa kona. 9 U gama u teka mafurha ya ku kwetsima+ u ma chela ka tabernakela ni swilo hinkwaswu leswi nga ndzeni ka yona,+ u yi kwetsimisa ni swibya swa yona hinkwaswu leswaku yi va nchumu xa ku kwetsima. 10 U fanele u chela mafurha ka altari ya gandzelo la ku hisiwa ni ka swilo hinkwaswu leswi nga ka yona u gama u yi kwetsimisa, leswaku yi va altari ya ku kwetsima hintamu.+ 11 Se u chela mafurha ka baziya ni lexi li nga ta tlhatekiwa ka xona kutani u li kwetsimisa.

12 “Kutani u tisa Aroni ni vana va yena kusuhi ni nyanghwa wa tende la ntlhanganu u va hlambisa hi mati.+ 13 U ta yambexa Aroni mpahla ya ku kwetsima+ u mu chela mafurha+ kutani u mu kwetsimisa, se a ta va muprista wa mina. 14 U ta gama u tisa vana va yena, u va yambexa mpahla ya ku leha.+ 15 U ta va chela mafurha+ u yendla leswi u nga swi yendla ka papayi wa vona leswaku va va vaprista va mina, vona va ta va vaprista va mina ku patsa ni vatukulu va vona hi masiku ni masiku.”+

16 Moxe a yendle hinkwaswu leswi Yehovha a nga mu byela swona.+ A vhele a swi yendlisa swoleswo.

17 Tabernakela yi nyimisiwe+ hi wheti ya ku sungula, ka lembe la wumbirhi, hi siku la ku sungula la wheti. 18 Nkama Moxe a nga nyimisa tabernakela, a veke swa ku tlhoma maaru+ hansi, a veka maaru,+ a nghenisa timhandzi ta yona+ a gama a nyimisa mapilari ya yona. 19 A gwimbe tende+ henhla ka tabernakela a gama a veka xa ku mbhonya+ tende henhla ka lona, hi ku landza leswi Yehovha a nga mu byela swona.

20 A gama a teka maribye ya Wumboni+ a ma veka ndzeni ka Areka+ a gama a veka ni timhandzi+ ka Areka se a pfala Areka+ hi tampa.+ 21 A teke Areka a yi peta ka tabernakela, a gama a hayeka kortina+ a pfala lomu areka ya Wumboni+ a yi li kona, hi ku landza leswi Yehovha a nga mu byela swona.

22 A gama a veka meza+ ka tende la ntlhanganu hi ka tlhelo la norte* la tabernakela ahandle ka kortina,* 23 kutani a veketela mapawu+ ka meza hi ndlela ya kona aphambheni ka Yehovha, hi ku ya hi leswi Yehovha a nga mu byelisa swona.

24 A veka ni xa ku tlhoma swa ku voninga hi swona+ ka tende la ntlhanganu aphambheni ka meza, ka tlhelo la sul* la tabernakela. 25 A tlhavika swa ku voninga hi swona+ phambheni ka Yehovha, hi ku landza leswi Yehovha a nga mu byela swona.

26 A gama a veka altari ya woru+ ka tende la ntlhanganu phambheni ka kortina, 27 leswaku ximusi xa swinun’hwelisu+ xi tuvika ka altari,+ hi ku landza leswi Yehovha a nga mu byela swona.

28 Kutani a veka kortina+ la ku pfala ndhawu ya ku nghena hi yona ka tabernakela.

29 A veka altari la gandzelo la ku hisiwa+ ka nyanghwa wa tabernakela, ku nga tende la ntlhanganu, leswaku a ta yendla gandzelo la ku hisiwa+ ni gandzelo la swakudla ka yona, hi ku landza leswi Yehovha a nga mu byela swona.

30 Se a veka baziya xikarhi ka tende la ntlhanganu ni altari a gama a chela mati ya ku hlamba hi wona.+ 31 Moxe na Aroni ni vana va yena a va hlamba mavoko ni minenge ka lona. 32 Nkama ni nkama loko va ya ka tende la ntlhanganu kumbe va tshinela kusuhi ni altari a va hlamba,+ hi ku landza leswi Yehovha a nga mu byela swona Moxe.

33 Hi wugamu a yendla kintari+ matlhelweni ka tabernakela ni altari a gama a yendla nyanghwa wa kintari+ hi kortina.

Se Moxe a heta ntirho. 34 Rhefu li sungula ku mbhonya tende la ntlhanganu se ku phatima ka Yehovha ku tata tabernakela.+ 35 Moxe a a nga swi koti ku nghena ka tende la ntlhanganu hikusa rhefu a li tshame henhla ka tende naswona ku phatima ka Yehovha a ku tate tabernakela.+

36 Loko rhefu li suka henhla ka tabernakela, Vayisrayele a va hahlula matende hinkwaku lomu a va famba va nyima kona.+ 37 Kambe loko rhefu li nga suki, a va nga ma hahluli matende anze ku fika siku leli rhefu li nga ta suka hi lona.+ 38 Hikusa rhefu la Yehovha a li tshama ka tabernakela ninhlikanhi, se niwusiku ndzilu hi wona a wu tshama henhla ka yona; naswona vanhu hinkwavu va Israyele va swi vonile hinkwaswu leswo hinkwaku lomu a va famba va nyima kona.+