LEVHITIKA

1 Se Yehovha a vitana Moxe a vulavula na yena na a li ka tende la ntlhanganu+ a ku: 2 “Byela Vayisrayele u ku: ‘Loko mun’we ka n’wina a nyikela gandzelo ka Yehovha hi ku tirhisa swifuyu, a fanele a swi susa ka ntlhambi wa tihomu kumbe ka ntlhambi wa tinyempfu.+

3 “‘Loko munhu a lava ku nyikela gandzelo la ku hisiwa leli a nga li susa ka ntlhambi wa tihomu, a fanele a nyikela hi homu ya xinuna leyi nga hanya kahle.+ A fanele a yi nyikela hi ku swi rhandza+ ka Yehovha ka nyanghwa wa tende la ntlhanganu. 4 A ta tlhateka voko la yena henhla ka nhloko ya gandzelo la ku hisiwa, se Xikwembu xi ta yamukela gandzelo lolelo leswaku a rivaleliwa swidjoho swa yena.

5 “‘Se ku fanele ku dlayiwa xihon’wani xa xinuna phambheni ka Yehovha naswona vana va Aroni lava nga vaprista,+ va ta nyikela ngati kutani va yi n’wan’wasela ka matlhelo hinkwawu ya altari+ leyi nga ka nyanghwa wa tende la ntlhanganu. 6 Gandzelo la ku hisiwa li fanele li susiwa xikhumba li gama li tsemeleliwa.+ 7 Vana va Aroni lava nga vaprista va ta tshivela ndzilu ka altari+ va gama va veka tihunyi ka ndzilu. 8 Va ta veka nyama leyi nga tsemeleliwa ya gandzelo,+ ku patsa ni nhloko ni mafurha ya tiyinso ahenhla ka tihunyi leti nga ka ndzilu lowu nga ka altari. 9 Marhumbu ni minenge ya kona swi ta hlampsiwa hi mati, se muprista a ta gama a swi hisa hinkwaswu ka altari swaku swi va gandzelo la ku hisiwa, i gandzelo leli nga yendliwa hi ndzilu leli nun’hwelaka kahle ka Yehovha.+

10 “‘Loko gandzelo la yena la ku hisiwa a li susa ka ntlhambi wa yena+ wa tinyempfu kumbe wa timbuti, a fanele a nyikela hi xinyempfani xa xinuna kumbe xiphongo lexi nga hanya kahle.+ 11 Xiharhi xa kona xi ta dlayiwa phambheni ka Yehovha hi ka tlhelo la norte* la altari, se vana va Aroni lava nga vaprista va ta n’wan’wasela ngati ya xona ka matlhelo hinkwawu ya altari.+ 12 Xi ta gama xi tsemeleliwa, se muprista a ta teka nyama ya xona, nhloko ya kona ni mafurha ya tiyinso a swi veka henhla ka tihunyi leti nga ka ndzilu lowu nga ka altari. 13 A ta hlampsa marhumbu ni minenge hi mati, se muprista a ta swi nyikela hinkwaswu a swi hisa ka altari. I gandzelo la ku hisiwa, gandzelo leli yendliwaka hi ndzilu li nun’hwela kahle ka Yehovha.

14 “‘Kambe loko ku li swaku a ta nyikela gandzelo la ku hisiwa ka Yehovha hi ku tirhisa swinyanyani, a fanele a tirhisa matuva kumbe swituvani+ swaku a nyikela gandzelo la yena. 15 Muprista a ta li nyikela ka altari, a ta tsema nhloko ya lona, a li hisa ka altari, kambe ngati ya lona yi fanele yi chululiwa atlhelweni ka altari. 16 a fanele a susa xidlelo* xa lona ni timpapa ta kona a swi txukumeta tlhelweni ka altari, ka tlhelo la le wuxeni lomu ku dibiwaka nkuma.*+ 17 A ta li handzula hi ka timpapa ta lona, kambe a nga fanelanga a li tsema hi le xikarhi. Kutani muprista a ta li hisa ka altari ahenhla ka tihunyi leti nga ka ndzilu. I gandzelo la ku hisiwa, gandzelo leli yendliwaka hi ndzilu li nun’hwela kahle ka Yehovha.

2 “‘Kutani loko munhu a nyikela gandzelo la swakudla+ ka Yehovha, gandzelo la yena li fanele li va la mpupu wa ku siliwa kahle naswona a fanele a chela mafurha henhla ka wona, a gama a n’wan’wasela olibanu* henhla ka wona.+ 2 A ta li yisa ka vana va Aroni lava nga vaprista, kutani muprista a ta nusa mpupu wa ku siliwa kahle ni mafurha ku patsa ni olibanu a tata voko, a gama a swi hisa swi va gandzelo la xitsundzuxu+ ka altari, gandzelo leli nga yendliwa hi ndzilu li nun’hwela kahle ka Yehovha. 3 Hinkwaswu leswi nga ta sala ka gandzelo la swakudla i swa Aroni ni vana va yena,+ i nchumu xa ku kwetsima hintamu+ lexi susiwaka ka magandzelo ya Yehovha lama nga yendliwa hi ndzilu.

4 “‘Loko u nyikela gandzelo la swakudla leli nga yendliwa ka fornu, ku fanele ku tirhisiwa mpupu wa ku siliwa kahle, mapawu ya ku kala fermentu lawa ma nga yendliwa ma va ya redondu na ma patsiwe ni mafurha kumbe mapawu ya ku woma ya ku kala fermentu lawa ma nga totiwa mafurha.+

5 “‘Loko gandzelo la wena ku li gandzelo la swakudla leli nga katingiwa hi xifridjelo,+ ku fanele ku va mpupu wa ku siliwa kahle wa ku kala wu nga na fermentu naswona wu nga patsiwa ni mafurha. 6 Li fanele li khemeleliwa naswona u ta chela mafurha henhla ka lona.+ I gandzelo la swakudla.

7 “‘Loko gandzelo la wena li li gandzelo la swakudla leli nga swekiwa hi panela, li fanele li yendliwa hi mpupu wa ku siliwa kahle lowu nga patsiwa ni mafurha. 8 U fanele u tisa gandzelo la swakudla ka Yehovha leli nga yendliwa hi swilo leswi, naswona li ta nyiketiwa muprista, se yena a ta li yisa kusuhi ni altari. 9 Muprista a ta pambula swin’wani ka gandzelo la swakudla swaku swi va gandzelo la xitsundzuxu,+ kutani a li hisa ka altari li va gandzelo la ku yendliwa hi ndzilu, li nun’hwela kahle ka Yehovha.+ 10 Leswi nga ta sala ka gandzelo la swakudla i swa Aroni ni vana va yena, i nchumu xa ku kwetsima hintamu lexi susiwaka ka magandzelo ya Yehovha lama nga yendliwa hi ndzilu.+

11 “‘Mi nga tshuki mi nyikela gandzelo la swakudla leli nga cheliwa fermentu+ ka Yehovha, hikusa a mi fanelanga mi hisa fermentu kumbe wulombe* swi va gandzelo leli nga yendleliwa Yehovha hi ndzilu.

12 “‘Mi nga swi nyikela ka Yehovha swi va gandzelo la mihandzu leyi rhangaka yi wupfa,+ kambe a swi fanelanga swi tisiwa ka altari leswaku swi va gandzelo la ku nun’hwela kahle.

13 “‘Magandzelo hinkwawu ya swakudla lawa u nga ta ma nyikela ma fanele ma cheliwa munyu; naswona u nga tshuki u khohlwa ku chela munyu hikusa wu ta ku khumbukisa ntwananu wa Xikwembu. U ta chela munyu+ ka magandzelo hinkwawu lawa u nga ta ma nyikela.

14 “‘Loko u nyikela gandzelo la swakudla la mihandzu leyi nga rhanga yi wupfa ka Yehovha, u fanele u nyikela hi trigu la ku kala li nga tiyanga leli li nga woxiwa hi ndzilu, tindzoho ta trigu leti ti kalaka ti nga kandziwanga hintamu, swaku swi va gandzelo la swakudla la mihandzu ya wena leyi nga rhanga yi wupfa.+ 15 U ta chela mafurha henhla ka swona u gama u n’wan’wasela olibanu henhla ka swona. I gandzelo la swakudla. 16 Muprista a ta hisa trigu lin’wani la ku kala li nga kandziwanga hintamu, ni mafurha, ku patsa ni olibanu ya lona hinkwalu swaku swi va gandzelo la xitsundzuxu,+ ku nga gandzelo leli nga yendleliwa Yehovha hi ndzilu.

3 “‘Loko gandzelo la yena ku li gandzelo la ku kombela ku rhula+ naswona a li susa ka ntlhambi wa tihomu, hambi ku li homu ya xinuna kumbe ya xisati, a fanele a nyikela xifuyu lexi nga hanya kahle phambheni ka Yehovha. 2 A ta tlhateka voko la yena henhla ka nhloko ya gandzelo la yena naswona li ta dlayiwa ka nyanghwa wa tende la ntlhanganu; se vana va Aroni lava nga vaprista va ta n’wan’wasela ngati ka matlhelo hinkwawu ya altari. 3 A ta pambula swin’wani ka gandzelo la ku kombela ku rhula swaku swi va gandzelo leli yendleliwaka Yehovha hi ndzilu:+ Mafurha+ lama nga funengeta marhumbu, mafurha hinkwawu lama nga khomana ni marhumbu, 4 ni tiyinso timbirhi ku patsa ni mafurha lama nga ka tona kusuhi ni masenge. Naswona a ta susa mafurha lama nga ka xivindzi ku patsa ni tiyinso.+ 5 Vana va Aroni va ta swi hisa ka altari ahenhla ka gandzelo la ku hisiwa leli nga henhla ka tihunyi leti nga ka ndzilu.+ I gandzelo leli nga yendliwa hi ndzilu la ku nun’hwela kahle ka Yehovha.+

6 “‘Loko ku li swaku a nyikela hi nyempfu kumbe mbuti ka Yehovha swaku yi va gandzelo la ku kombela ku rhula, a ta nyikela hi xifuyu xa xinuna kumbe xa xisati lexi nga hanya kahle.+ 7 Loko a nyikela hi xinyempfani swaku xi va gandzelo la yena, a ta xi nyikela phambheni ka Yehovha. 8 A ta tlhateka voko la yena henhla ka nhloko ya gandzelo la yena se li ta dlayiwa phambheni ka tende la ntlhanganu. Vana va Aroni va ta n’wan’wasela ngati ya lona ka matlhelo hinkwawu ya altari. 9 A ta nyikela mafurha ya gandzelo la ku kombela ku rhula swaku ma va gandzelo leli nga yendleliwa Yehovha hi ndzilu.+ A ta susa ntxila hinkwawu wa ku nona kusuhi ni nhlana, mafurha lama nga funengeta marhumbu, mafurha hinkwawu lama nga khomana ni marhumbu, 10 ni tiyinso timbirhi ku patsa ni mafurha lama nga ka tona kusuhi ni masenge. Naswona a ta susa mafurha lama nga ka xivindzi ku patsa ni tiyinso.+ 11 Kutani muprista a ta swi hisa henhla ka altari swi va swakudla,* ku nga gandzelo leli nga yendleliwa Yehovha hi ndzilu.+

12 “‘Loko gandzelo la yena ku li mbuti, a ta yi nyikela phambheni ka Yehovha. 13 A ta tlhateka mavoko ya yena henhla ka nhloko ya yona, se yi gama yi dlayiwa phambheni ka tende la ntlhanganu naswona vana va Aroni va fanele va n’wan’wasela ngati ya yona ka matlhelo hinkwawu ya altari. 14 Mafurha lama nga funengeta marhumbu, mafurha hinkwawu lama nga khomana ni marhumbu,+ hi wona a nga ta ma nyikela swaku ma va gandzelo la yena leli nga yendleliwa Yehovha hi ndzilu 15 ni tiyinso timbirhi ku patsa ni mafurha lama nga ka tona kusuhi ni masenge. Naswona a ta susa mafurha lama nga ka xivindzi ku patsa ni tiyinso. 16 Muprista a ta swi hisa ka altari swaku swi va swakudla,* ku nga gandzelo leli nga yendliwa hi ndzilu li nun’hwela kahle. Mafurha hinkwawu i ya Yehovha.+

17 “‘Lowu i nawu wa ku kala wu nga heli ka vatukulu va n’wina, ka tindhawu hinkwatu leti mi tshamaka ka tona: Mi nga tshuki mi dla mafurha kumbe ngati.’”+

4 Yehovha a tlhela a byela Moxe a ku: 2 “Byela Vayisrayele u ku: ‘Loko munhu o tshuka a djoha kambe ku nga li hi maxivomu,+ a yendla swilo leswi Yehovha a nga vula swaku a swi fanelanga swi yendliwa, ku fanele ku yendliwa leswi:

3 “‘Loko muprista+ lweyi a nga langiwa a djoha+ kutani a tisela vanhu nandzu, a fanele a nyikela xihon’wani xa xinuna xa ku hanya kahle ka Yehovha, swaku xi va gandzelo la xidjoho hi mhaka ya xidjoho lexi a nga xi yendla.+ 4 A ta tisa homu ya xinuna ka nyanghwa wa tende la ntlhanganu+ aphambheni ka Yehovha a gama a tlhateka voko la yena henhla ka nhloko ya homu naswona a ta yi dlaya phambheni ka Yehovha.+ 5 Se muprista+ lweyi a nga langiwa a ta teka ngati yin’wani ya homu yoleyo a yi yisa ka tende la ntlhanganu; 6 kutani muprista a ta peta litiho ka ngati+ a gama a n’wan’wasela ngati yin’wani ka 7+ phambheni ka Yehovha, phambheni ka kortina leli pfalaka ndhawu ya ku kwetsima. 7 Muprista a ta tlhela a tota ngati yin’wani ka timhondzo ta altari ya swinun’hwelisu*+ leyi nga phambheni ka Yehovha ka tende la ntlhanganu; se ngati leyin’wani hinkwayu ya homu a ta yi chela hansi ka altari ya gandzelo la ku hisiwa,+ leyi nga ka nyanghwa wa tende la ntlhanganu.

8 “‘A ta susa mafurha hinkwawu ya homu ya gandzelo la xidjoho, ku patsa ni mafurha lama funengetaka marhumbu ni mafurha lama nga khomana ni marhumbu 9 ni tiyinso timbirhi ku patsa ni mafurha lama nga ka tona kusuhi ni masenge. Naswona a ta susa mafurha lama nga ka xivindzi ku patsa ni tiyinso.+ 10 A ta susa swilo leswi ku fana ni leswi yendliwaka ka homu ya gandzelo la ku kombela ku rhula.+ Kutani muprista a ta swi hisa ka altari ya gandzelo la ku hisiwa.

11 “‘Kambe xikhumba xa homu ni nyama ya kona hinkwayu, nhloko, minenge, marhumbu ni chaka* la yona,+ 12 homu hinkwayu, a ta yi humesa handle ka matende a ya yi hisa ka ndhawu leyi nga basa lomu nkuma* wu txukumetiwaka kona, a ta yi hisa henhla ka tihunyi ka ndzilu.+ Yi fanele yi hisiwa lomu nkuma wu txukumetiwaka kona.

13 “‘Loko Vayisrayele vo djoha na va nga swi yendli hi maxivomu,+ kambe va nga swi tsumbuli swaku va yendle swilo leswi Yehovha a nga vula swaku va nga swi yendli,+ 14 se xidjoho xa kona xi tiviwa, va fanele va nyikela xihon’wani xa gandzelo la xidjoho va xi tisa phambheni ka tende la ntlhanganu. 15 Madoda ya vona ma ta tlhateka mavoko ka nhloko ya homu phambheni ka Yehovha, kutani homu yi ta dlayiwa phambheni ka Yehovha.

16 “‘Se muprista lweyi a nga langiwa a ta tisa ngati yin’wani ya homu ka tende la ntlhanganu. 17 Muprista a ta peta litiho ka ngati a gama a n’wan’wasela yin’wani ka 7 aphambheni ka Yehovha, phambheni ka kortina.+ 18 Kutani a ta tota ngati yin’wani ka timhondzo ta altari+ leyi nga phambheni ka Yehovha, leyi nga ka tende la ntlhanganu; ngati leyin’wani hinkwayu a ta yi chela hansi ka altari ya gandzelo la ku hisiwa, leyi nga ka nyanghwa wa tende la ntlhanganu.+ 19 A ta susa mafurha hinkwawu lama nga ka homu a gama a ma hisa henhla ka altari.+ 20 Homu leyi a ta yi yendla swa ku fana ni leswi nga yendliwa ka homu leyin’wani ya gandzelo la xidjoho. A ta yendlisa swoleswo, muprista a ta va kombelela ku rivaleliwa+ se va ta gama va rivaleliwa. 21 A ta humesa homu ahandle ka matende kutani a yi hisa ku fana ni homu liya ya ku sungula.+ I gandzelo la xidjoho leli yendleliwaka vanhu.+

22 “‘Loko murhangeli+ a djoha kambe na a nga swi yendlanga hi maxivomu hi ku yendla nchumu xin’wani ka swilo leswi Yehovha Xikwembu a nga vula swaku swi nga yendliwi, a gama a va ni nandzu, 23 kumbe a tsumbula swaku a yendle xidjoho, a fanele a tisa xiphongo xaxitsongo lexi nga hanya kahle swaku xi va gandzelo la yena. 24 A ta tlhateka voko la yena henhla ka nhloko ya xiphongo se a xi dlaya ka ndhawu leyi gandzelo la ku hisiwa li dlayeliwaka kona phambheni ka Yehovha.+ I gandzelo la xidjoho. 25 Muprista a ta tsakamisa litiho la yena hi ngati yin’wani ya gandzelo la xidjoho a gama a yi tota ka timhondzo+ ta altari ya gandzelo la ku hisiwa, kutani a ta chela ngati leyin’wani hinkwayu hansi ka altari ya gandzelo la ku hisiwa.+ 26 A ta hisa mafurha ya xona hinkwawu ahenhla ka altari ku fana ni mafurha ya gandzelo la ku kombela ku rhula;+ kutani muprista a ta kombela swaku xidjoho xa yena xi rivaleliwa, se murhangeli yelweyo a ta rivaleliwa xidjoho xa yena.

27 “‘Loko munhu mun’wani atikweni o djoha kambe a nga swi yendli hi maxivomu, se a va ni nandzu hi ku yendla nchumu xin’wani ka swilo leswi Yehovha a nga vula swaku a swi fanelanga swi yendliwa,+ 28 kumbe a swi tsumbula swaku a yendle xidjoho, a fanele a tisa ximbutani xa xisati lexi nga hanya kahle swaku xi va gandzelo la xidjoho lexi a nga xi yendla. 29 A ta tlhateka voko la yena henhla ka nhloko ya ximbutani xa gandzelo la xidjoho, a gama a xi dlaya lomu xifuyu xa gandzelo la ku hisiwa+ xi dlayeliwaka kona. 30 Muprista a ta tsakamisa litiho la yena hi ngati yin’wani ya xona a gama a ya yi tota ka timhondzo ta altari ya gandzelo la ku hisiwa, kutani a ta chela ngati leyin’wani hinkwayu ya xona hansi ka altari.+ 31 A ta susa mafurha ya xona hinkwawu+ ku fana ni loko ku susiwa mafurha ya xifuyu xa gandzelo la ku kombela ku rhula,+ se muprista a ta xi hisa henhla ka altari xi nun’hwela kahle ka Yehovha; muprista a ta mu kombelela ku rivaleliwa, se a ta gama a rivaleliwa.

32 “‘Kambe loko a tisa xinyempfani swaku xi va gandzelo la yena la xidjoho, a fanele a tisa xinyempfani xa xisati xa ku hanya kahle. 33 A ta tlhateka voko la yena henhla ka nhloko ya gandzelo la xidjoho, a gama a li dlaya lomu gandzelo la ku hisiwa li dlayeliwaka kona,+ swaku li va gandzelo la xidjoho. 34 Muprista a ta tsakamisa litiho la yena hi ngati yin’wani ya gandzelo la xidjoho, a gama a ya yi tota ka timhondzo ta altari ya gandzelo la ku hisiwa,+ kutani a ta chela ngati leyin’wani hinkwayu ya lona hansi ka altari. 35 A ta susa mafurha ya lona hinkwawu ku fana ni loko ku susiwa mafurha ya xinyempfani xa gandzelo la ku kombela ku rhula, kutani muprista a ta swi hisa ka altari, henhla ka magandzelo ya Yehovha lama yendliwaka hi ndzilu;+ muprista a ta mu kombelela ku rivaleliwa hi mhaka ya xidjoho lexi a nga xi yendla, se xidjoho xa yena xi ta rivaleliwa.+

5 “‘Loko munhu o tshuka a swi vona kumbe a twa swaku mun’wani a yendle xidjoho kutani a twa na ku vuliwa swaku ku fanele ku fakaziwa*+ mhaka ya kona, kambe a nga hlayi nchumu, a ta va ni nandzu naswona a ta tihlamulela hi mhaka ya xihoxo xa yena.

2 “‘Kumbe loko munhu o khumba nchumu xa ku kala xi nga tenganga, ku nga ha va ntsumbu wa xiharhi xa ku kala xi nga tenganga, xifuyu xa ku kala xi nga tenganga kumbe swiharhi swaswitsongo+ swa ku kala swi nga tenganga leswi fambaka na swi li swinyingi, a nga tenganga naswona a ni nandzu hambi a nga swi tsumbulanga. 3 Kumbe loko munhu o khumba munhu kumbe nchumu xa ku kala xi nga tenganga,+ lexi nga yendlaka swaku a nga tengi kambe a nga swi tivi, kutani a gama a swi tsumbula, a ta va ni nandzu.

4 “‘Kumbe loko munhu o tsutsumela ku funga nchumu, ku nga na mhaka swaku i xaxinene kumbe i xa ku biha, kambe na a nga swi tivi, se hi ku famba ka nkama a gama a swi tsumbula swaku a tsutsumele ku funga, a ta va ni nandzu.*+

5 “‘Loko o va ni nandzu wa nchumu xin’wani ka minchumu leyi, a fanele a hlaya hi yexe+ xidjoho xa yena. 6 A ta tlhela a tisa gandzelo la yena la nandzu ka Yehovha hi mhaka ya xidjoho lexi a nga xi yendla,+ ku nga xinyempfani xa xisati kumbe ximbutani xa xisati, swaku xi va gandzelo la xidjoho. Se muprista a ta mu kombelela ku rivaleliwa xidjoho xa yena.

7 “‘Kambe loko a nga swi koti ku humesa nyempfu, a fanele a tisa matuva mambirhi kumbe swituvani swimbirhi+ ka Yehovha swaku swi va gandzelo la yena la nandzu hi mhaka ya xidjoho lexi a nga xi yendla, xin’we xi ta va xa gandzelo la xidjoho kutani lexin’wani xi ta va xa gandzelo la ku hisiwa.+ 8 A ta swi tisa ka muprista, se muprista a ta rhanga hi ku nyikela gandzelo la xidjoho a gama a tsema nhloko ya lona lomu nhamu ya lona yi sungulaka kona, kambe a nga yi tsemi yi suka. 9 A ta n’wan’wasela ngati yin’wani ya gandzelo la xidjoho atlhelweni ka altari, kambe leyi nga ta sala a ta yi chela hansi ka altari.+ I gandzelo la xidjoho. 10 Se tuva lelin’wani a ta li nyikela ku fana ni gandzelo la ku hisiwa hi ku landza leswi va yendlisaka xiswona nkama ni nkama;+ kutani muprista a ta mu kombelela ku rivaleliwa xidjoho xa yena, se a ta rivaleliwa xona.+

11 “‘Se loko a nga swi koti ku humesa matuva mambirhi kumbe swituvani swimbirhi, a fanele a tisa mpupu wa ku siliwa kahle lowu tataka nchumu xa kolomuyani ka malitru mambirhi*+ swaku wu va gandzelo la yena la xidjoho. A nga fanelanga a li chela mafurha kumbe a veka olibanu* ka lona, hikusa i gandzelo la xidjoho. 12 A ta wu tisa ka muprista, se muprista a ta nusa wa ku tata voko swaku wu va gandzelo la xitsundzuxu a gama a wu hisa ka altari henhla ka magandzelo ya Yehovha lama nga yendliwa hi ndzilu. I gandzelo la xidjoho. 13 Muprista a ta mu kombelela ku rivaleliwa xidjoho xin’wani ni xin’wani, hambi ku li xin’we xa swidjoho leswi, se a ta rivaleliwa xona.+ Leswi nga sala ka gandzelo swi ta va swa muprista,+ ku fana ni gandzelo la swakudla.’”+

14 Yehovha a tama a vulavula na Moxe a ku: 15 “Loko munhu o tshuka a nga tshembeki kutani a djohela swilo swa ku kwetsima swa Yehovha+ na a nga swi yendli hi maxivomu, a fanele a tisa nyempfu ya xinuna ya ku hanya kahle ka Yehovha swaku yi va gandzelo la nandzu;+ mpimu* wa yona hi male wu fanele wu peziwa hi ku ya hi mapezela ya ndhawu ya ku kwetsima.*+ 16 Kutani a ta hakela xidjoho lexi a nga djohela ndhawu ya ku kwetsima hi xona, a tlhela a yengetela 20 pursentu+ ka male yoleyo. A ta swi nyika muprista swaku muprista a mu kombelela ku rivaleliwa+ hi nyempfu ya gandzelo la nandzu, kutani a ta rivaleliwa.+

17 “Loko munhu o djoha hi ku yendla xin’wani xa swilo leswi Yehovha a nga hlaya swaku a swi fanelanga swi yendliwa, hambi a nga swi tsumbuli, wa ha ni nandzu naswona a ta tihlamulela hi mhaka ya xihoxo xa yena.+ 18 A fanele a tisa nyempfu ya xinuna ya ku hanya kahle ka muprista hi ku ya hi male leyi muprista a nga yi veka, nyempfu leyi yi ta va gandzelo la nandzu.+ Se muprista a ta mu kombelela ku rivaleliwa xihoxo lexi a nga xi yendla na a nga swi tivi naswona a kalaka a nga xi yendlanga hi maxivomu, se a ta rivaleliwa xona. 19 I gandzelo la nandzu. A ni nandzu wa ku djohela Yehovha.”

6 Yehovha a tama a khuluma na Moxe a ku: 2 “Loko munhu o tshuka a djoha kutani a nga tshembeki ka Yehovha+ hi ku kanganyisa munhu mun’wani ka nchumu lowu a nga khomisiwa wona+ kumbe nchumu lowu a nga lombiwa wona kumbe a yivela munhu mun’wani kumbe a mu tekela nchumu hi ku mu kanganyisa, 3 kumbe a kuma nchumu xa ku lahleka se a hemba hi mhaka ya xona naswona loko a funga swa mavunhwa ka xidjoho xin’wani ni xin’wani lexi a nga xi yendla,+ a fanele a yendla leswi: 4 Loko a djohile naswona a ni nandzu, a fanele a tlhelisa leswi a nga swi yiva, leswi a nga swi teka hi nkanu, leswi a nga swi teka hi ku kanganyisa, leswi a nga khomisiwa swona, kumbe nchumu xa ku lahleka lexi a nga xi kuma, 5 kumbe nchumu xin’wani ni xin’wani lexi a nga funga swa mavunhwa ka xona, se a fanele a xi hakela hinkwaxu naswona a ta yengetela 20 pursentu ka male yoleyo.+ A fanele a swi nyika n’winyi wa swona hi siku leli ku nga ta kumiwa swaku a ni nandzu. 6 Kutani a fanele a yisa nyempfu ya xinuna leyi nga hanya kahle ka muprista swaku yi va gandzelo la yena la nandzu ka Yehovha hi ku ya hi male leyi muprista a nga yi veka, ya gandzelo la nandzu.+ 7 Muprista a ta mu kombelela ku rivaleliwa phambheni ka Yehovha, kutani a ta rivaleliwa nchumu xin’wani ni xin’wani lexi a nga xi yendla lexi nga mu yendla a va ni nandzu.”+

8 Yehovha a tlhela a vulavula na Moxe a ku: 9 “Byela Aroni ni vana va yena u ku: ‘Nawu wa gandzelo la ku hisiwa hi lowu:+ Gandzelo la ku hisiwa li ta tshama xitikweni ka altari wusiku hinkwalu li za li ya xa, se ndzilu wu ta tshama na wu pfurha ka altari. 10 Muprista a ta yambala nkhantxu wa yena wa wuprista lowu nga yendliwa hi panu ya linyu+ a tlhela a yambala xibulukwani xa le ndzeni+ xa ku yendliwa hi panu ya linyu. Se a ta gama a susa nkuma*+ wa gandzelo la ku hisiwa lowu nga hisiwa hi ndzilu ka altari, a ya wu veka tlhelweni ka altari. 11 A ta hlivila mpahla+ ya yena a yambala mpahla yin’wani a gama a teka nkuma a wu yisa ka ndhawu leyi nga basa ahandle ka matende.+ 12 Ndzilu wu ta tshama na wu pfurha ka altari. A wu fanelanga wu timeka. Muprista a fanele a tshivela tihunyi+ henhla ka wona mixo wun’wani ni wun’wani naswona a fanele a veka gandzelo la ku hisiwa henhla ka wona, se a ta hisa mafurha ya magandzelo ya ku kombela ku rhula henhla ka wona.+ 13 Ndzilu wu ta tshama na wu pfurha ka altari. A wu fanelanga wu timeka.

14 “‘Kutani nawu wa gandzelo la swakudla hi lowu:+ N’wina vana va Aroni mi ta li nyikela ka Yehovha phambheni ka altari. 15 Mun’we ka vona a ta nusa mpupu wa ku siliwa kahle wa gandzelo la swakudla hi voko ni mafurha man’wani ya lona ku patsa ni olibanu* hinkwalu la gandzelo la swakudla, a ya swi hisa ka altari swi va gandzelo la xitsundzuxu leli nun’hwelaka kahle ka Yehovha.+ 16 Aroni ni vana va yena va ta dla leswi nga ta sala.+ Va ta hamba hi swona mapawu ya ku kala fermentu va swi dla na va li ka ndhawu ya ku kwetsima. Va ta swi dla na va li ka kintari* wa tende la ntlhanganu.+ 17 A swi fanelanga swi cheliwa fermentu.+ Ni va nyika swona swaku swi va swa vona ka magandzelo ya mina lama nga yendliwa hi ndzilu.+ I nchumu xa ku kwetsima hintamu+ ku fana ni gandzelo la xidjoho ni gandzelo la nandzu. 18 Vavanuna hinkwavu xikarhi ka vana va Aroni va ta swi dla.+ I swa vona, ka vatukulu va n’wina hinkwavu hi masiku ni masiku, swi ta huma ka magandzelo lama nga yendleliwa Yehovha hi ndzilu.+ Hinkwaswu leswi nga ta khumba magandzelo lawa swi ta va swa ku kwetsima.’”

19 Yehovha a tlhele a vulavula na Moxe a ku: 20 “Leli i gandzelo leli Aroni ni vana va yena va nga ta li nyikela ka Yehovha hi siku leli a nga ta langiwa hi lona:+ Mpupu wa ku siliwa kahle lowu ringanaka nchumu xa kolomuyani ka malitru mambirhi*+ swaku wu va gandzelo la swakudla,+ a ta nyikela hafu ya wona nimixo ni hafu yin’wani nimadlambu. 21 Li fanele li katingiwa hi mafurha ka xifridjelo.+ U ta li tisa na li vhuviwe kahle ni mafurha kutani u nyikela swikhemu swa lona swa ku woxiwa swaku swi va gandzelo la swakudla swaku swi nun’hwela kahle ka Yehovha. 22 Muprista lweyi a nga langiwa lweyi a nga ta mu pfaleta xikarhi ka vana va yena,+ na yena a fanele a li yendla. I nawu wa ku kala wu nga heli: Gandzelo hinkwalu li fanele li hisiwa phambheni ka Yehovha. 23 Gandzelo lin’wani ni lin’wani la swakudla la muprista li fanele li nyikeliwa hinkwalu. A li fanelanga li dliwa.”

24 Yehovha a tlhele a vulavula na Moxe a ku: 25 “Byela Aroni ni vana va yena u ku: ‘Lowu i nawu wa gandzelo la xidjoho:+ Gandzelo la xidjoho li ta dlayiwa+ phambheni ka Yehovha ka ndhawu leyi gandzelo la ku hisiwa li dlayeliwaka kona. I nchumu xa ku kwetsima hintamu. 26 Muprista lweyi a nga li humesa swaku li va gandzelo la xidjoho a ta li dla.+ A ta li dlela ka ndhawu ya ku kwetsima ka kintari wa tende la ntlhanganu.+

27 “‘Hinkwaswu leswi khumbaka nyama ya gandzelo swi ta va swa ku kwetsima, naswona loko munhu o tshuka a thoneliwa hi ngati yin’wani ya lona ka mpahla ya yena, yi fanele yi hlampsiwa ka ndhawu ya ku kwetsima. 28 Xibya xa ku yendliwa hi vumba lexi yi nga swekiwa ka xona xi ta fayiwa. Kambe loko yi swekiwe ka xibya xa ku yendliwa hi kobre xi ta khuxiwa xi gama xi hlampsiwa hi mati.

29 “‘Vavanuna hinkwavu lava nga vaprista va ta yi dla.+ I nchumu xa ku kwetsima hintamu.+ 30 Loko ngati yin’wani ya gandzelo la xidjoho yi tisiwe ka tende la ntlhanganu swaku yi ta kombela ku rivaleliwa ka ndhawu ya ku kwetsima,+ gandzelo lolelo a li fanelanga li dliwa. Li fanele li hisiwa hi ndzilu.

7 “‘Hi lowu nawu wa gandzelo la nandzu:+ I nchumu xa ku kwetsima swinene. 2 Va ta dlaya xifuyu xa gandzelo la nandzu lomu swifuyu swa magandzelo ya ku hisiwa swi dlayeliwaka kona, se ngati ya xona+ yi fanele yi n’wan’waseliwa ka matlhelo hinkwawu ya altari.+ 3 A ta nyikela hi mafurha ya xona hinkwawu,+ ku patsa ni ntxila wa xona wa ku nona, mafurha lama nga funengeta marhumbu 4 ni tiyinso timbirhi ni mafurha lama nga kusuhi ni masenge. Naswona a ta susa mafurha lama nga ka xivindzi ku patsa ni tiyinso.+ 5 Muprista a ta swi hisa ka altari swi va gandzelo leli nga yendleliwa Yehovha hi ndzilu.+ I gandzelo la nandzu. 6 Vavanuna hinkwavu lava nga vaprista va ta li dla+ naswona va fanele va li dla ka ndhawu ya ku kwetsima. I nchumu xa ku kwetsima hintamu.+ 7 Nawu wa gandzelo la xidjoho ni wa gandzelo la nandzu wa fana; nyama ya kona yi ta va ya muprista lweyi a yendlaka gandzelo la ku kombela ku rivaleliwa.+

8 “‘Loko muprista a nyikela gandzelo la ku hisiwa la munhu mun’wani, xikhumba+ xa xifuyu lexi muprista a nga yendla gandzelo la ku hisiwa hi xona, xi ta va xa yena.

9 “‘Magandzelo hinkwawu ya swakudla lawa ma nga woxiwa ka fornu, kumbe lawa ma nga swekiwa ka panela kumbe lama nga katingiwa ka xifridjelo+ i ya muprista lweyi a ma nyikelaka. Ma ta va ya yena.+ 10 Kambe magandzelo hinkwawu ya swakudla lama nga vhuviwa ni mafurha+ kumbe magandzelo ya ku woma+ ma ta va ya vana hinkwavu va Aroni; va ta yavelana swa ku ringana.

11 “‘Lowu i nawu wa gandzelo la ku kombela ku rhula+ leli munhu a nga ta li nyikela ka Yehovha: 12 Loko a li nyikela swaku a kombisa ku khensa,+ a ta li nyikela ni mapawu ya ku kala fermentu lawa ma nga hambiwa ma va ya redondu ma tlhela ma patsiwa ni mafurha swaku ma va gandzelo la ku khensa, mapawu ya ku woma ya ku kala fermentu lama nga totiwa mafurha ni mapawu ya ku hambiwa ma va ya redondu hi mpupu wa ku siliwa kahle lowu nga patsiwa kahle ni mafurha. 13 A ta nyikela gandzelo la yena xikan’we ni mapawu lama nga yendliwa ma va ya redondu lama nga ni fermentu ku patsa ni magandzelo ya yena ya ku kombela ku rhula lawa ma nga gandzelo la ku khensa. 14 A fanele a teka muxaka wun’we wun’we wa pawu la gandzelo lin’wani ni lin’wani swaku wu va gandzelo la ku kwetsima la Yehovha; li ta va la muprista lweyi a n’wan’waselaka ngati ya magandzelo ya ku kombela ku rhula.+ 15 Nyama ya gandzelo la ku khensa ya magandzelo ya yena ya ku kombela ku rhula, yi ta dliwa hi siku leli a nga ta yi nyikela hi lona. A nga fanelanga a yi veka anze mundzuku nimixo.+

16 “‘Loko gandzelo leli a li nyikelaka a li gandzelo la ku hetisisa leswi a nga swi funga+ kumbe a li gandzelo la ku tirhandzela,+ li ta dliwa hi siku leli a nga li nyikela hi lona naswona leswi nga sala swi nga tlhela swi dliwa hi mundzuku ka kona. 17 Kambe hi siku la wunharhu, nyama leyi nga sala ya gandzelo yi ta hisiwa hi ndzilu.+ 18 Kambe loko nyama ya gandzelo la yena la ku kombela ku rhula yo tshuka yi dliwa hi siku la wunharhu, lweyi a yi nyikelaka a nga ta yamukeleka ka Xikwembu. Phela a xi nge mu yamukeli; i nchumu xa ku nyenyentsa naswona lweyi a dlaka nyama ya lona a ta tihlamulela hi mhaka ya xihoxo xa yena.+ 19 Nyama leyi nga ta tshuka yi khumba nchumu xa ku kala xi nga tenganga a yi fanelanga yi dliwa. Yi fanele yi hisiwa hi ndzilu. Vanhu hinkwavu lava nga tenga va nga dla nyama leyi nga tenga.

20 “‘Kambe munhu lweyi a dlaka nyama ya gandzelo la ku kombela ku rhula leli nga la Yehovha na a nga tenganga, a fanele a dlayiwa.+ 21 Loko munhu o tshuka a khumba nchumu xa ku kala xi nga tenganga, ku nga ha va munhu wa ku kala a nga tenganga+ kumbe xiharhi xa ku kala xi nga tenganga+ kumbe nchumu xin’wani ni xin’wani xa ku kala xi nga tenganga xa ku nyenyentsa,+ a gama a dla nyama yin’wani ya gandzelo la ku kombela ku rhula leli nga la Yehovha, a fanele a dlayiwa.’”

22 Yehovha a tama a vulavula na Moxe a ku: 23 “Byela Vayisrayele u ku: ‘Mi nga tshuki mi dla mafurha+ ya homu, ya xinyempfani kumbe ya mbuti. 24 Mafurha ya xiharhi lexi nga kumiwa na xi file ni mafurha ya xiharhi lexi nga dlayiwa hi xiharhi xin’wani ma nga ha tirhisiwa ka swin’wani ni swin’wani, kambe a mi fanelanga mi ma dla.+ 25 Hikusa lweyi a dlaka mafurha ya xiharhi lexi a xi nyikelaka swaku xi va gandzelo leli yendleliwaka Yehovha hi ndzilu, a fanele a dlayiwa.

26 “‘Mi nga tshuki mi dla ngati+ lomu mi tshamaka kona, hambi yi li ya swinyanyani kumbe ya swiharhi. 27 Munhu lweyi a dlaka ngati a fanele a dlayiwa.’”+

28 Yehovha a tlhela a vulavula na Moxe a ku: 29 “Byela Vayisrayele u ku: ‘Lweyi a nyikelaka gandzelo la yena la ku kombela ku rhula ka Yehovha, a fanele a tisa swin’wani swa gandzelo la yena la ku kombela ku rhula ka Yehovha.+ 30 A ta tisa mafurha ni xifuva na a swi khome hi mavoko,+ swi ta va gandzelo leli nga yendleliwa Yehovha hi ndzilu naswona a ta fambisa xifuva xi ya hala ni hala swaku xi va gandzelo leli fambisiwaka+ phambheni ka Yehovha. 31 Muprista a ta hisa mafurha ka altari,+ kambe xifuva xi ta va xa Aroni ni vana va yena.+

32 “‘A nenge wa xinene mi ta wu nyika muprista swaku wu va gandzelo la ku kwetsima leli humaka ka magandzelo ya n’wina ya ku kombela ku rhula.+ 33 A nenge wa xinene wu ta va wa n’wana wa Aroni lweyi a nyikelaka ngati ya magandzelo ya ku kombela ku rhula ni mafurha.+ 34 Hikusa ni teka xifuva xa gandzelo leli fambisiwaka ni nenge wa swin’wani swa ku kwetsima leswi humaka ka magandzelo ya ku kombela ku rhula ya Vayisrayele, ni swi nyika muprista Aroni ni vana va yena. Lowu i nawu wa ku kala wu nga heli ka Vayisrayele.+

35 “‘Leswi, hi leswi nga ta susiwaka ka magandzelo lama yendleliwaka Yehovha hi ndzilu leswaku swi nyikiwa vaprista, ku nga Aroni ni vana va yena ku sukela hi siku leli va nga langiwa swaku va va vaprista va Yehovha.+ 36 Siku leli Yehovha a nga va langa a byele Vayisrayele swaku va va nyika minchumu leyi.+ Nawu lowu wu ta tirha hi masiku ni masiku ka vatukulu va vona.’”

37 Lowu i nawu wa gandzelo la ku hisiwa,+ gandzelo la swakudla,+ gandzelo la xidjoho,+ gandzelo la nandzu,+ gandzelo la ku vekiwa ka vaprista+ ni gandzelo la ku kombela ku rhula,+ 38 hi ku landza leswi Yehovha a nga mu rhumisa swona Moxe ka Ntshava ya Sinayi,+ hi siku leli a nga byela Vayisrayele swaku va nyikela magandzelo ya vona ka Yehovha amananga ya Sinayi.+

8 Yehovha a tama a vulavula na Moxe a ku: 2 “Teka Aroni ni vana va yena,+ mpahla ya vona,+ mafurha ya ku kwetsima,+ homu ya gandzelo la xidjoho, ni ndzhava wa mapawu ya ku kala fermentu,+ 3 kutani u gama u hlengeleta vanhu hinkwavu ka nyanghwa wa tende la ntlhanganu.”

4 Se Moxe a yendla leswi Yehovha a nga mu byela swona, kutani vanhu va hlengeletana ka nyanghwa wa tende la ntlhanganu. 5 Kutani Moxe a byela vanhu a ku: “Hi leswi swilo leswi Yehovha a nga hi rhuma swaku hi swi yendla.” 6 Se Moxe a tshineta Aroni ni vana va yena kusuhi, a gama a va hlambisa hi mati.+ 7 Kutani a gama a yambexa Aroni nkhantxu wa ku leha+ kutani a mu boha bandhi,+ a mu yambexa nkhantxu wa ku kala wu nga na mavoko,+ a mu yambexa efodi*+ a gama a yi boha yi tiya hi bandhi+ leli nga ka yona. 8 A game a mu bohelela xipaxtani xa xifuva+ kutani a veka Urimi ni Tumimi+ ka xipaxtani xa xifuva. 9 Se a mu yambexa xifunengeto xa nhloko*+ kutani phambheni ka xona a veka xixapani xa ku phatima xa woru, lexi a xi ni marka wa ku kwetsima wa ku tinyiketela,*+ hi ku landza leswi Yehovha a nga mu byela swona Moxe.

10 Kutani Moxe a teka mafurha ya ku kwetsima a tota tabernakela ni swilo hinkwaswu leswi a swi li ka yona,+ a swi kwetsimisa. 11 A gama a n’wan’wasela man’wani ka 7 ka altari kutani a tota altari ni swilo hinkwaswu leswi nga ka yona ni baziya ni xa ku tlhateka baziya leswaku a swi kwetsimisa. 12 Hi wugamu a chela mafurha man’wani ya ku kwetsima ka nhloko ya Aroni a gama a mu langa swaku a va wa ku kwetsima.+

13 Se Moxe a tshineta vana va Aroni kusuhi a va yambexa minkhantxu ya ku leha, a va boha mabandhi a gama a va yambexa swifunengeto swa tinhloko,+ hi ku landza leswi Yehovha a nga mu byela swona Moxe.

14 Kutani a tisa homu ya gandzelo la xidjoho, se Aroni ni vana va yena va tlhateka mavoko ka nhloko ya homu ya gandzelo la xidjoho.+ 15 Kutani Moxe a yi dlaya se a tsakamisa litiho la yena hi ngati,+ a gama a ya tota ka timhondzo ta altari ka matlhelo hinkwawu, se a basisa altari ka xidjoho, kambe ngati leyin’wani hinkwayu a yi chela hansi ka altari swaku a yi kwetsimisa ni ku yi basisa. 16 Se Moxe a gama a teka mafurha hinkwawu lawa a ma li henhla ka marhumbu ni lawa a ma li ka xivindzi ni tiyinso timbirhi ni mafurha ya tona a swi hisa ka altari.+ 17 Se homu hinkwayu, xikhumba xa yona, nyama ya yona ni chaka* la yona swi hisiwa hi ndzilu handle ka matende,+ hi ku ya hi leswi Yehovha a nga mu byela swona.

18 Kutani a tisa nyempfu ya gandzelo la ku hisiwa kusuhi, se Aroni ni vana va yena va tlhateka mavoko ka nhloko ya nyempfu.+ 19 Se Moxe a yi dlaya a gama a n’wan’wasela ngati ya yona ka matlhelo hinkwawu ya altari. 20 A tsemelele nyempfu a gama a veka nhloko ya yona, nyama ya yona ni mafurha ya tiyinso ka altari. 21 Kutani Moxe a hlampsa marhumbu ni minenge hi mati a gama a hisa nyempfu hinkwayu ka altari. A ku li gandzelo la ku hisiwa la ku nun’hwela kahle. I gandzelo leli nga yendleliwa Yehovha hi ndzilu, hi ku landza leswi Yehovha a nga mu byela swona.

22 Se a tisa nyempfu ya wumbirhi ya xinuna, nyempfu leyi nyikeliwaka loko ku vekiwa vaprista,+ kutani Aroni ni vana va yena va tlhateka mavoko ka nhloko ya yona.+ 23 Moxe a yi dlaya a gama a teka ngati yin’wani a yi tota ka ponta ya ndleve ya xinene ya Aroni ni ka litiho lalikulu la voko la yena la xinene ni ka litiho lalikulu la nenge wa yena wa xinene. 24 Kutani Moxe a gama a tshineta vana va Aroni kutani a va tota ngati yin’wani ka tiponta ta tindleve ta vona ta xinene ni ka titiho tatikulu* ta mavoko ya vona ya xinene ni ka titiho tatikulu ta minenge ya vona ya xinene; se Moxe a n’wan’wasela ngati leyin’wani hinkwayu ka matlhelo hinkwawu ya altari.+

25 Kutani a teka mafurha, ntxila wa ku nona, mafurha hinkwawu lawa a ma li handle ka marhumbu ni mafurha ya xivindzi, tiyinso timbirhi ni mafurha ya tona ni nenge wa xinene.+ 26 Se ka ndzhava wa mapawu ya ku kala fermentu lowu a wu li phambheni ka Yehovha, Moxe a humese pawu lin’we la redondu la ku kala fermentu,+ pawu lin’we la redondu li nga totiwa mafurha+ ni pawu la ku woma. Kutani a swi veka henhla ka mafurha ni nenge wa xinene. 27 A game a swi veka ka mavoko ya Aroni ni ka mavoko ya vana va yena, kutani a sungula ku swi fambisa swi ya hala ni hala swi va gandzelo leli fambisiwaka phambheni ka Yehovha. 28 Se Moxe a swi teka ka mavoko ya vona a swi hisa ka altari ahenhla ka gandzelo la ku hisiwa. A ku li gandzelo la ku vekiwa ka vaprista la ku nun’hwela kahle. I gandzelo leli nga yendleliwa Yehovha hi ndzilu.

29 Kutani Moxe a teka xifuva a xi fambisa xi ya hala ni hala swaku xi va gandzelo leli fambisiwaka phambheni ka Yehovha.+ Xifuva xa nyempfu ya ku vekiwa ka vaprista xi ve xa Moxe hi ku landza leswi Yehovha a nga mu byela swona Moxe.+

30 Se Moxe a teka mafurha man’wani ya ku kwetsima+ ni ngati yin’wani leyi a yi li ka altari a n’wan’wasela Aroni ni mpahla ya yena ni vana va yena ni mpahla ya vana va yena lava a va li na yena. Se a kwetsimisa Aroni ni mpahla ya yena ni vana va yena+ ni mpahla ya vona.+

31 Kutani Moxe a byela Aroni ni vana va yena a ku: “Swekani+ nyama ka nyanghwa wa tende la ntlhanganu naswona mi ta yi dla kolanu ni mapawu lawa ma nga ka ndzhava,* hi ku landza leswi Xikwembu xi nga ni byela swona xi ku: ‘Aroni ni vana va yena va ta swi dla.’+ 32 Nyama leyi nga ta sala ni pawu mi ta swi hisa hi ndzilu.+ 33 A mi fanelanga mi huma ka nyanghwa wa tende la ntlhanganu ku ringana 7 wa masiku, anze ku hela masiku ya ku vekiwa ka n’wina hikusa swi ta teka 7 wa masiku swaku mi vekiwa ku va vaprista.+ 34 Yehovha a hi rhume swaku hi yendla leswi hi swi yendlaka namuntlha swaku mi kombeleliwa ku rivaleliwa.+ 35 Mi ta tshama ka nyanghwa wa tende la ntlhanganu wusiku ni nhlikanhi ku ringana 7 wa masiku+ naswona tivoneleni swaku mi nga tluli minawu ya Yehovha+ leswaku mi nga fi; i Xikwembu xi nga ni rhuma ku yendla leswo.”

36 Kutani Aroni ni vana va yena va yendla hinkwaswu leswi Yehovha a nga byela Moxe.

9 Hi siku la wu 8,+ Moxe a vitane Aroni ni vana va yena ku patsa ni madoda ya Israyele. 2 Se a byela Aroni a ku: “Teka xihon’wani xa ku hanya kahle swaku xi va gandzelo la xidjoho+ ni nyempfu ya xinuna ya ku hanya kahle swaku yi va gandzelo la ku hisiwa, u swi nyikela phambheni ka Yehovha. 3 Kambe u ta va byela leswi Vayisrayele: ‘Tekani xiphongo swaku xi va gandzelo la xidjoho, xihon’wani ni xinyempfani, hinkwaswu na swi ni lembe lin’we naswona na swi hanye kahle, swaku swi va gandzelo la ku hisiwa 4 ni homu ni nyempfu swaku swi va magandzelo ya ku kombela ku rhula,+ mi swi nyikela phambheni ka Yehovha ni gandzelo la swakudla+ leli nga patsiwa ni mafurha, hikusa Yehovha a ta humelela ka n’wina namuntlha.’”+

5 Se va teka leswi Moxe a nga va byela swaku va swi yisa phambheni ka tende la ntlhanganu. Kutani Vayisrayele hinkwavu va tshinela, va nyima phambheni ka Yehovha. 6 Kutani Moxe a ku: “Hi leyi minchumu leyi Yehovha a nga hlaya swaku mi yi yendla, swaku ku phatima ka Yehovha ku humelela ka n’wina.”+ 7 Se Moxe a byela Aroni a ku: “Famba ka altari u ya nyikela gandzelo la wena la xidjoho+ ni gandzelo la wena la ku hisiwa, u kombela ku rivaleliwa,+ wena ni ndjangu wa wena; kutani u nyikela gandzelo la vanhu+ naswona u va kombelela ku rivaleliwa,+ hi ku landza leswi Yehovha a nga swi vulisa xiswona.”

8 Kutani Aroni a famba ka altari hi ku hantlisa a fika a dlaya xihon’wani xa gandzelo la xidjoho leli a li li la yena.+ 9 Se vana va Aroni va mu nyiketa ngati+ kutani a peta litiho la yena a gama a yi tota ka timhondzo ta altari, ngati leyin’wani a yi chela hansi ka altari.+ 10 Kutani a hisa mafurha ni tiyinso ni xivindzi ka altari, leswi nga susiwa ka gandzelo la xidjoho, hi ku landza leswi Yehovha a nga mu byela swona Moxe.+ 11 Se a hisa nyama ni xikhumba hi ndzilu ahandle ka matende.+

12 A gama a dlaya gandzelo la ku hisiwa se vana va Aroni va mu nyiketa ngati a yi n’wan’wasela ka matlhelo hinkwawu ya altari.+ 13 Kutani va mu nyiketa nyama ya gandzelo la ku hisiwa ni nhloko a gama a swi hisa ka altari. 14 A tlhela a hlampsa marhumbu ni minenge a swi hisa ka altari swi va gandzelo la ku hisiwa.

15 Se a nyikela gandzelo la vanhu, a teka mbuti ya gandzelo la xidjoho la vanhu a yi dlaya a yendla gandzelo la xidjoho hi yona ku fana ni la ku sungula. 16 Kutani a nyikela gandzelo la ku hisiwa hi ku ya hi nawu wa mayendlelo ya magandzelo ya ku hisiwa.+

17 A gama a nyikela gandzelo la swakudla,+ a nusa swa ku tata voko kutani a swi hisa ka altari ku yengesela ka gandzelo la ku hisiwa nimixo.+

18 A gama a dlaya homu ni nyempfu ya gandzelo la ku kombelela vanhu ku rhula. Se vana va Aroni va mu nyiketa ngati kutani a yi n’wan’wasela ka matlhelo hinkwawu ya altari.+ 19 Kambe mafurha ya homu,+ ntxila wa ku nona wa nyempfu ya xinuna, mafurha lama nga funengeta swa le ndzeni, tiyinso ni mafurha lama nga funengeta xivindzi,+ 20 va swi veke henhla ka swifuva, a gama a hisa mafurha ka altari.+ 21 Kambe Aroni a teka swifuva ni nenge wa xinene a swi fambisa swi ya hala ni hala swaku swi va gandzelo leli fambisiwaka phambheni ka Yehovha, hi ku landza leswi Moxe a nga mu byelisa swona.+

22 Se Aroni a tlakusa mavoko ka vanhu a va katekisa,+ a gama a xika ka altari nkama a nga gama ku yendla gandzelo la xidjoho, gandzelo la ku hisiwa ni magandzelo ya ku kombela ku rhula. 23 Hi wugamu, Moxe na Aroni va nghena ka tende la ntlhanganu va tlhela va huma kutani va katekisa vanhu.+

Se ku phatima ka Yehovha ku humelela ka vanhu hinkwavu;+ 24 Yehovha a rhumela ndzilu+ kutani wu sungula ku hisa gandzelo la ku hisiwa ni mafurha lawa a ma li ka altari. Nkama vanhu va nga swi vona, va sungula ku huwelela, va khizama, va txuvuka hansi.+

10 Se Nadabi na Abiyu+ vana va Aroni, va gama va teka swa ku chela ndzilu va chela ndzilu ni swinun’hwelisu*+ ka swona. Kutani va sungula ku yendla gandzelo* la ku kala li nga yamukeleki+ phambheni ka Yehovha, la ku kala a nga va rhumanga swaku va li yendla. 2 Se Yehovha a rhumela ndzilu kutani wu va hisa+ va fela phambheni ka Yehovha.+ 3 Kutani Moxe a byela Aroni a ku: “Yehovha a te: ‘Lava nga kusuhi na mina+ va fanele va khumbuka swaku na kwetsima naswona ni ta dzunisiwa phambheni ka vanhu hinkwavu.’” Aroni a miyela a ku ntsee.

4 Se Moxe a vitana Mixayeli na Elizafani vana va Uziyeli,+ tiyu wa Aroni, a va byela a ku: “Tanani mi ta tlakula vamakwenu mi va susa phambheni ka ndhawu ya ku kwetsima mi va yisa handle ka matende.” 5 Kutani va ta, va fika va tlakula vavanuna volavo lava a va yambale minkhantxu ya ku leha va va yisa handle ka matende, hi ku landza leswi Moxe a nga va byela swona.

6 Se Moxe a byela Aroni ni vana va yena lavan’wani, ku nga Eliyazari na Itamari a ku: “Mi nga yi tshikeni hi ndlela ya wufuta misisi ya n’wina kumbe mi handzula mpahla ya n’wina,+ swaku mi nga fi naswona swaku Xikwembu xi nga va kwateli vanhu hinkwavu. Vamakwenu, ku nga Vayisrayele hinkwavu va ta rila lava Yehovha a nga va dlaya hi ndzilu. 7 A mi fanelanga mi huma ka nyanghwa wa tende la ntlhanganu hikusa mi ta fa hileswi mafurha ya ku kwetsima ya Yehovha ma nga henhla ka n’wina.”+ Kutani va yendla leswi Moxe a nga va byela swona.

8 Kutani Yehovha a byela Aroni a ku: 9 “Wena ni vana va wena mi nga tshuki mi phuza vhinyu kumbe swa ku dakwisana loko mi ta ka tende la ntlhanganu,+ leswaku mi nga fi. Lowu i nawu wa ku kala wu nga heli ka vatukulu va n’wina. 10 Leswi swi ta yendla swaku ku va ni ku hambana xikarhi ka nchumu xa ku kwetsima ni xa ku kala xi nga kwetsimanga ni xikarhi ka nchumu lexi nga basa ni lexi kalaka xi nga basanga,+ 11 ni ku djondzisa Vayisrayele minawu hinkwayu leyi Yehovha a nga va byela yona hi ku tirhisa Moxe.”+

12 Se Moxe a vulavula na Aroni ni vana va yena lava nga sala, ku nga Eliyazari na Itamari a ku: “Tekani gandzelo la swakudla leli nga siyiwa ka magandzelo ya Yehovha lama nga yendliwa hi ndzilu, mi hamba pawu la ku kala fermentu mi li dla kusuhi ni altari+ hikusa i nchumu wa ku kwetsima hintamu.+ 13 Mi fanele mi li dla ka ndhawu ya ku kwetsima+ hikusa i swa wena ni vana va wena naswona swi susiwa ka magandzelo ya Yehovha lama nga yendliwa hi ndzilu, hikusa ni byeliwe swoleswo. 14 Naswona mi ta dla xifuva xa gandzelo leli fambisiwaka ni nenge wa gandzelo la ku kwetsima+ ka ndhawu leyi nga basa, n’wina ni vana va n’wina va madjaha ni va tintombhi+ hikusa swilo leswi mi nyikiwe swona swaku swi va swa n’wina ni vana va n’wina, na swi susiwa ka magandzelo ya ku kombela ku rhula ya Vayisrayele. 15 Va ta tisa nenge wa gandzelo la ku kwetsima ni xifuva xa gandzelo leli fambisiwaka ku patsa ni magandzelo ya mafurha lama nga yendliwa hi ndzilu, swaku gandzelo leli fambisiwaka li ta fambisiwa li ya hala ni hala phambheni ka Yehovha; se li ta va la wena ni vana va wena hi masiku ni masiku+ hi ku landza leswi Yehovha a nga swi vulisa swona.”

16 Moxe a lavetela mbuti ya gandzelo la xidjoho+ a gama a tsumbula swaku yi hisiwile. Se a kwatela vana va Aroni lava a va salile, ku nga Eliyazari na Itamari a ku: 17 “Hi mhaka muni mi nga dlanga gandzelo la xidjoho ka ndhawu ya ku kwetsima,+ leswi i nga nchumu xa ku kwetsima hintamu ke? Kasi a mi nyikiwanga gandzelo leli swaku mi ta susa xidjoho ka vanhu mi tlhela mi va kombelela ku rivaleliwa phambheni ka Yehovha ke? 18 Vonani! Ngati ya lona a yi tisiwanga ndzeni ka ndhawu ya ku kwetsima.+ Phela a mi fanele mi li dlele ka ndhawu ya ku kwetsima, ku nga leswi ni nga byelisiwa xiswona.” 19 Aroni a byela Moxe a ku: “Phela namuntlha va nyikele gandzelo la vona la xidjoho ni gandzelo la vona la ku hisiwa phambheni ka Yehovha,+ kambe ni humeleliwe hi swilo swa ku biha. Loko a ni yo dla gandzelo la xidjoho namuntlha, indjhe Yehovha a a nga ta ni kwatela ke?” 20 Nkama Moxe a nga twa leswo, a game a swi twisisa swaku hi mhaka muni a yendle leswo.

11 Kutani Yehovha a byela Moxe na Aroni a ku: 2 “Byelani Vayisrayele mi ku: ‘Ka swiharhi leswi nga misaveni mi fanele mi dla leswi:+ 3 Xiharhi xin’wani ni xin’wani lexi nga ni xondzo leli nga yavana hi xikarhi naswona xi gayelaka swakudla, xi nga dliwa.

4 “‘Kambe a mi fanelanga mi dla swiharhi leswi gayelaka swakudla ntsena kumbe leswi nga ni xondzo leli nga yavana hi xikarhi ntsena: Kamela la gayela swakudla kambe xondzo la yona a li yavananga hi xikarhi. Se a li tenganga ka n’wina.+ 5 Ni timbila*+ hikusa ta gayela swakudla kambe maxondzo ya tona a ma yavananga hi xikarhi. Se a ti tenganga ka n’wina. 6 Ni mpfundlha hikusa wa gayela swakudla kambe a wu na xondzo leli nga yavana hi xikarhi. Se a wu tenganga ka n’wina. 7 Ni khumba+ hikusa li ni xondzo leli nga yavana hi xikarhi kambe a li gayeli swakudla. Se a li tenganga ka n’wina. 8 A mi fanelanga mi dla nyama ya swiharhi leswi kumbe mi khumba mintsumbu ya swona. A swi tenganga ka n’wina.+

9 “‘Leswi mi nga swi dlaka ka hinkwaswu leswi nga matini hi leswi: Xin’wani ni xin’wani lexi nga matini lexi nga ni swipapani ni mayaya, hambi xi li lwandle kumbe ka nambu, mi nga xi dla.+ 10 Kambe hinkwaswu leswi nga lwandle ni leswi nga ka nambu leswi kalaka swi nga na swipapani ni mayaya, hambi ka swiharhi hinkwaswu swa le matini leswi fambaka hi mintlawa na swi li swinyingi ni ka swiharhi swin’wani leswi tshamaka matini, i nchumu xa ku nyenyentsa ka n’wina. 11 Leswi swi nyenyentsaka ka n’wina, a mi fanelanga mi dla nyama ya swona+ naswona mi fanele mi nyenya ni mintsumbu ya swona. 12 Hinkwaswu leswi nga matini leswi kalaka swi nga na swipapani ni mayaya, i nchumu xa ku nyenyentsa ka n’wina.

13 “‘Leswi i swiharhi leswi hahaka leswi mi nga ta swi nyenya; a swi fanelanga swi dliwa, hikusa swa nyenyentsa: Gama,+ gama leli phasaka matini, koti la ntima,*+ 14 mangatlu* ya ku pshuka ni mangatlu hinkwawu ya ntima, 15 mixaka hinkwawu ya matlhugwani,* 16 yintxa,* xikhovha, sekwa,* rikhozi* lin’wani ni lin’wani, 17 xikhovha xaxitsongo, tlhugwani la ku tshamela matini, xikhovha xa tindleve ta ku leha, 18 xitutu,* gumbula,* koti, 19 ntavila,* mithetxwani* yin’wani ni yin’wani, munyani* ni mangadjani.* 20 Xin’wani ni xin’wani lexi nga ni timpapa* ka leswi fambaka hi mintlawa na swi li swinyingi lexi kotaka ku famba hi minenge, i nchumu xa ku nyenyentsa ka n’wina.

21 “‘Ka hinkwaswu leswi nga ni timpapa swi tlhela swi kota ku famba hi 4 wa minenge leswi fambaka hi mintlawa na swi li swinyingi, mi nga dla ntsena leswi nga ni minenge yimbirhi ya ku leha leyi swi tlulatlulaka hi yona ka misava. 22 Leswi mi nga swi dlaka hi leswi: Mintete yin’wani ni yin’wani leyi kalaka yi nga tshami ka ndhawu yin’we, mintete leyi dliwaka,+ switxere* ni mintete ya ku toloveleka. 23 Hinkwaswu leswi nga ni timpapa swi tlhela swi kota ku famba hi 4 wa minenge ka leswi fambaka hi mintlawa na swi li swinyingi, i nchumu xa ku nyenyentsa ka n’wina. 24 Phela swiharhi leswi swi nga mi yendla mi nga tengi, mun’wani ni mun’wani lweyi a nga ta khumba mintsumbu ya swona a ta tshama na a nga tenganga anze nimadlambu.+ 25 Mun’wani ni mun’wani lweyi a rhwalaka mintsumbu ya swona a fanele a hlampsa mpahla ya yena;+ a ta tshama na a nga tenganga anze nimadlambu.

26 “‘Xiharhi xin’wani ni xin’wani lexi nga ni xondzo leli nga yavana hi xikarhi kambe xi nga gayeli swakudla, a xi tenganga ka n’wina. Mun’wani ni mun’wani lweyi a nga ta xi khumba a ta va a nga tenganga.+ 27 Xiharhi xin’wani ni xin’wani xa ku kala xi nga na xondzo lexi fambaka hi 4 wa minenge, a xi tenganga ka n’wina. Mun’wani ni mun’wani lweyi a nga ta khumba ntsumbu wa xona a ta tshama na a nga tenganga anze nimadlambu. 28 Lweyi a nga ta rhwala mintsumbu ya swona a fanele a hlampsa mpahla ya yena+ naswona a ta tshama na a nga tenganga anze nimadlambu.+ Phela a swi tenganga ka n’wina.

29 “‘Hi leswi swiharhi leswi fambaka hi mintlawa na swi li swinyingi leswi nga misaveni leswi kalaka swi nga tenganga ka n’wina: Mbeva,* kondlo,+ nkolombya wun’wani ni wun’wani, 30 damarhela, nkolombya wawukulu, xipulwapulwa,* galagala ni lompfanyi. 31 Swiharhi leswi, leswi fambaka hi mintlawa na swi li swinyingi a swi tenganga ka n’wina.+ Mun’wani ni mun’wani lweyi a nga ta khumba ntsumbu wa swona a ta tshama na a nga tenganga anze nimadlambu.+

32 “‘Nchumu xin’wani ni xin’wani lexi swiharhi leswi swi nga ta wela ka xona loko se swi file, xi ta va xi nga tenganga, ku nga ha va xibya xa ku yendliwa hi mapulangu, mpahla, xikhumba kumbe mpahla ya ku yendliwa hi masaka. Xibya xin’wani ni xin’wani lexi tirhisiwaka xi fanele xi petiwa ka mati naswona xi ta va xi nga tenganga; se nimadlambu, hi kona xi nga ta va xi basile. 33 Loko swo wela ka xibya xa vumba, mi ta xi pfotlosa naswona hinkwaswu leswi a swi li ka xibya xolexo swi ta va swi nga tenganga.+ 34 Swakudla hinkwaswu leswi nga ta cheliwa hi mati lawa a ma li ka xibya xolexo, swi ta va swi nga tenganga naswona swakunwa hinkwaswu leswi a swi li ka xibya xolexo swi ta va swi nga tenganga. 35 Nchumu xin’wani ni xin’wani lexi mintsumbu ya swona yi nga ta wela ka xona, xi ta va xi nga tenganga. Kumbe i fornu kumbe i fugao, swi fanele swi pfotlosiwa. A swi tenganga naswona swi ta tshama na swi nga tenganga ka n’wina. 36 Xihlovo ni xikhele lexi ku hlayisiwaka ka xona mati swi ta tshama na swi basile, kambe mun’wani ni mun’wani lweyi a nga ta khumba mintsumbu ya swiharhi swa ku kala swi nga tenganga, a ta va na a nga tenganga. 37 Loko mintsumbu ya swona yo wela henhla ka mbewu leyi nga ta byaliwa, yi ta va yi basile. 38 Kambe loko mbewu yo cheliwa hi mati, se ntsumbu wun’wani wa swona wu wela henhla ka yona, mbewu yoleyo a yi tenganga ka n’wina.

39 “‘Kutani loko xiharhi lexi mi pfumeleliwaka ku xi dla, xo tshuka xi fa, mun’wani ni mun’wani lweyi a nga ta khumba ntsumbu wa xona a ta tshama na a nga tenganga anze nimadlambu.+ 40 Mun’wani ni mun’wani lweyi a nga ta dla ntsumbu wa xona a fanele a hlampsa mpahla ya yena naswona a ta tshama na a nga tenganga anze nimadlambu.+ Mun’wani ni mun’wani lweyi a rhwalaka ntsumbu wa xona a fanele a hlampsa mpahla ya yena naswona a ta tshama na a nga tenganga anze nimadlambu. 41 Xiharhi xin’wani ni xin’wani xaxitsongo ka leswi fambaka hi mintlawa na swi li swinyingi amisaveni, i nchumu xa ku nyenyentsa.+ A xi fanelanga xi dliwa. 42 A mi fanelanga mi dla xiharhi xin’wani ni xin’wani lexi fambaka hi khwirhi, xiharhi xin’wani ni xin’wani lexi fambaka hi 4 wa minenge, kumbe swiharhi swin’wani ni swin’wani leswi fambaka hi mintlawa na swi li swinyingi amisaveni leswi nga ni minenge ya yinyingi, hikusa swa nyenyentsa.+ 43 Mi nga tshuki mi tiyendla lava nyenyentsaka hi ku dla xiharhi xin’wani ni xin’wani xaxitsongo ka leswi fambaka hi mintlawa na swi li swinyingi naswona mi nga tichakisi kutani mi nga tengi hi mhaka ya swona.+ 44 Hikusa hi mina Yehovha Xikwembu xa n’wina+ naswona mi fanele mi tshama na mi basile mi tlhela mi kwetsima+ hikusa mina na kwetsima.+ Kutani a mi fanelanga mi tichakisa hi ku dla xiharhi xin’wani ni xin’wani xaxitsongo ka leswi fambaka hi mintlawa na swi li swinyingi amisaveni. 45 Hikusa hi mina Yehovha lweyi a nga mi humesa ka tiko la Gibita leswaku ni tikombisa ni li Xikwembu ka n’wina+ naswona mi fanele mi kwetsima,+ hikusa mina na kwetsima.+

46 “‘Nawu lowu mi ta wu tirhisa ka swiharhi, swiharhi leswi hahaka, xiharhi xin’wani ni xin’wani lexi fambaka matini ku patsa ni swiharhi hinkwaswu swaswitsongo leswi fambaka hi mintlawa na swi li swinyingi amisaveni, 47 leswaku ku va ni ku hambana xikarhi ka leswi kalaka swi nga tenganga ni leswi nga tenga, ni xikarhi ka swiharhi leswi nga dliwaka ni leswi nga kalaka swi nga dliwi.’”+

12 Yehovha a tama a byela Moxe a ku: 2 “Byela Vayisrayele u ku: ‘Loko wansati a kuma nyimba a gama a psala* n’wana wa xinuna, a ta tshama 7 wa masiku na a nga tenganga, ku fana ni leswi a kalaka a nga tenganga loko a li ka masiku ya yena.+ 3 Hi siku la wu 8, n’wana a ta tsemiwa nsuvu.*+ 4 Wansati a ta tama a tibasisa ku ringana 33 wa masiku hi mhaka ya ngati leyi nga huma. A nga fanelanga a khumba nchumu ni xin’we xa ku kwetsima naswona a nga fanelanga a nghena ka ndhawu ya ku kwetsima anze masiku ya ku basisiwa ka yena ma hela.

5 “‘Loko a psala n’wana wa xisati, a ta va a nga tenganga ku ringana 14 wa masiku, ku fana ni loko a li ka masiku ya yena. A ta tama a tibasisa ku ringana 66 wa masiku hi mhaka ya ngati leyi nga huma. 6 Loko masiku ya yena ya ku basisiwa hi mhaka ya n’wana wa yena wa djaha kumbe wa ntombhi ma helile, a fanele a yisa xinyempfani ka muprista, lexi nga ni lembe lin’we swaku xi va gandzelo la ku hisiwa+ ni xituvani kumbe tuva swaku li va gandzelo la xidjoho, a ta swi tisa ka nyanghwa wa tende la ntlhanganu. 7 Muprista a ta li nyikela phambheni ka Yehovha naswona a ta mu kombelela ku rivaleliwa, kutani a ta va a basile ka ngati ya yena leyi nga huma. Lowu i nawu lowu nga ta tirha ka wansati lweyi a nga psala n’wana wa xinuna kumbe wa xisati. 8 Kambe loko a nga swi koti ku humesa nyempfu, a fanele a teka matuva mambirhi kumbe swituvani swimbirhi,+ xin’we xi va xa gandzelo la ku hisiwa lexin’wana xi va gandzelo la xidjoho naswona muprista a ta mu kombelela ku rivaleliwa, se a ta va na a tengile.’”

13 Yehovha a tama a vulavula na Moxe na Aroni a ku: 2 “Loko munhu o tshuka a pfimba ka muzimbha wa yena, a va ni swirhumbani kumbe a va ni mafelangati lawa ma nga ha vaka mavabyi ya nhlokonho*+ ka muzimbha wa yena, a fanele a yisiwa ka muprista Aroni kumbe ka mun’wani wa vana va yena lava nga vaprista.+ 3 Muprista a ta kambela mavabyi lawa ma nga ka xikhumba xa munhu yelweyo. Loko misisi leyi nga ka ndhawu leyi nga ni mavabyi yi txintxe yi va ya ku basa naswona mavabyi ma tikomba na ma nghene ka nyama ya yena, i mavabyi ya nhlokonho. Muprista a ta ma kambela a gama a vula swaku munhu yelweyo a nga tenganga. 4 Kambe loko mafelangati lama nga ka xikhumba xa yena ma li ya ku basa naswona ma tikomba na ma nga nghenanga hintamu ka xikhumba naswona ni misisi ya yena yi nga txintxanga yi va ya ku basa, muprista a ta veka munhu lweyi a vabyaka a tshama na a li yexe anze ku hela 7 wa masiku.+ 5 Muprista a ta mu kambela hi siku la wu 7, kutani loko mavabyi ma tikomba na ma nyimile ma nga hangalakanga ka muzimbha, muprista a ta tlhela a mu veka a tshama na a li yexe anze ku hela 7 wa masiku man’wani.

6 “Muprista a fanele a tlhela a mu kambela hi siku la wu 7 naswona loko mavabyi ma nga hangalakanga ka muzimbha, muprista a ta vula swaku a tengile;+ a ko va swirhumbani ntsena. Munhu lweyi a ta hlampsa mpahla ya yena a gama a va lweyi a tengeke. 7 Kambe loko mavabyi ma hangalakile ka muzimbha kuve se a a yile ka muprista kuva a ya mu kambela ku vona swaku a tengile, a fanele a tlhela a ya ka muprista. 8 Muprista a ta mu kambela, se loko mavabyi ma hangalakile ka muzimbha, muprista a ta vula swaku a nga tenganga. I mavabyi ya nhlokonho.+

9 “Loko munhu o va ni mavabyi ya nhlokonho, a fanele a yisiwa ka muprista, 10 kutani muprista a ta mu kambela.+ Loko ku ni swirhumbani swa ku basa ka muzimbha wa yena naswona swi txintxe misisi yi va ya ku basa naswona swirhumbani swi boxekile,+ 11 i mavabyi ya nhlokonho lawa ma nga ta tshama nkama wa ku leha ka xikhumba xa yena naswona muprista a ta vula swaku a nga tenganga. A nga fanelanga a mu tshamisa na a li yexe+ leswaku a ta kambeliwa hikusa a nga tenganga. 12 Loko mavabyi ya nhlokonho mo hangalaka ka xikhumba hinkwaxu xa munhu yelweyo kutani ma mu funengeta ku sukela ka nhloko ku ya fika ka minenge lomu muprista a nga kotaka ku vona kona, 13 se muprista a mu kambela a gama a kuma swaku mavabyi ya nhlokonho ma funengete xikhumba xa yena hinkwaxu, a ta vula swaku munhu yelweyo a tengile.* Xikhumba xa yena hinkwaxu xi txintxe xi va xa ku basa, a tengile. 14 Kambe loko xikhumba xa yena xo tshuka xi huma swirhumbani swa ku boxeka, a ta va a nga tenganga. 15 Loko muprista o vona swirhumbani swa ku boxeka, a ta hlaya swaku a nga tenganga.+ Swirhumbani swa ku boxeka a swi tenganga. I mavabyi ya nhlokonho.+ 16 Kambe loko swirhumbani swa ku boxeka swo tlhela swi va swa ku basa, a ta ya ka muprista. 17 Muprista a ta mu kambela+ naswona loko swirhumbani swi txintxe swi va swa ku basa, muprista a ta hlaya swaku munhu yelweyo a tengile. A ta va a tengile.

18 “Loko munhu o huma rhumba ka xikhumba xa yena li gama li hola, 19 kambe lani a ku ni rhumba ku gama ku huma swirhumbani swa ku basa kumbe mafelangati, a fanele a ya ka muprista. 20 Muprista a ta ma kambela,+ kutani loko ma tikomba na ma nghene hintamu ka xikhumba naswona misisi ya kona yi txintxile yi va ya ku basa, muprista a ta hlaya swaku a nga tenganga. I mavabyi ya nhlokonho lama nga huma ka rhumba. 21 Kambe loko muprista a kambela mafelangati a gama a kuma swaku a ku na misisi ya ku basa ka wona naswona a ma nghenanga hintamu ka xikhumba, naswona ma tikomba na ma nyamalalile, muprista a ta mu veka a tshama na a li yexe anze ku hela 7 wa masiku.+ 22 Loko ma hangalakile ka xikhumba, muprista a ta hlaya swaku a nga tenganga. I mavabyi. 23 Kambe loko mafelangati ma nga hangalakanga ka muzimbha, i swilondza swa rhumba ntsena naswona muprista a ta vula swaku a tengile.+

24 “Kumbe loko munhu o psha hi ndzilu se lani a nga psha kona ku huma mafelangati kumbe ku va ka ku basa, 25 muprista a ta mu kambela. Loko misisi leyi nga ka mafelangati yi txintxile yi va ya ku basa naswona xivati xi tikomba na xi nghenile hintamu ka xikhumba, i mavabyi ya nhlokonho lama humaka ka xivati kutani muprista a ta hlaya swaku a nga tenganga. I mavabyi ya nhlokonho. 26 Kambe loko muprista a xi kambela a gama a kuma swaku a ku na misisi ya ku basa ka mafelangati naswona a xi nghenanga hintamu ka xikhumba, naswona mafelangati ma nyamalalile, muprista a ta mu veka a tshama na a li yexe anze ku hela 7 wa masiku.+ 27 Muprista a ta mu kambela hi siku la wu 7 naswona loko mafelangati ma hangalakile ka xikhumba, muprista a ta hlaya swaku a nga tenganga. I mavabyi ya nhlokonho. 28 Kambe loko mafelangati ma nga hangalakanga ka muzimbha ma tlhela ma nyamalala, ku li xivati xi ngo pfimba ntsena, muprista a ta hlaya swaku a tengile hikusa i xivati xa ku pfimbisiwa hi ku psha.

29 “Loko wanuna kumbe wansati o tshuka a huma xirhumbani ka nhloko kumbe ka xilepfu, 30 muprista a ta kambela xirhumbani xolexo.+ Loko xi tikomba na xi nghene hintamu ka xikhumba naswona misisi yi li ya amarelu yi tlhela yi va yitsongo, muprista a ta hlaya swaku munhu yelweyo a nga tenganga; i swirhumbani swa ku tsuvukela ka misisi kumbe malepfu. I mavabyi ya nhlokonho ya nhloko kumbe ya xilepfu. 31 Kambe loko muprista a vona swaku swirhumbani a swi nghenanga hintamu ka xikhumba naswona a ku na misisi ya ntima ka swona, muprista a fanele a veka munhu yelweyo a nga huma swirhumbani a tshama na a li yexe anze ku hela 7 wa masiku.+ 32 Muprista a ta kambela swirhumbani hi siku la wu 7, loko swirhumbani swi nga hangalakanga naswona lomu swi nga kona ku nga humanga misisi ya amarelu naswona ndhawu leyi swi nga ka yona yi nga nghenanga hintamu ka xikhumba, 33 munhu yelweyo a fanele a tsemeta misisi hinkwayu ni malepfu, kambe a nga fanelanga a tsemeta ka ndhawu leyi nga ni swirhumbani. Se muprista a ta veka munhu yelweyo a tshama na a li yexe anze ku hela 7 wa masiku.

34 “Hi siku la wu 7, muprista a ta tlhela a kambela ndhawu leyi nga ni swirhumbani, se loko swirhumbani swa ku tsuvukela ka misisi kumbe malepfu swi nga hangalakanga ka xikhumba naswona swi nga nghenanga hintamu ka xikhumba, muprista a fanele a hlaya swaku a tengile naswona munhu yelweyo a fanele a hlampsa mpahla ya yena kutani a va lweyi a tengeke. 35 Kambe loko swirhumbani swo hangalaka ka xikhumba loko se a basisiwile, 36 muprista a ta mu kambela kutani loko swirhumbani swi hangalakile ka xikhumba, muprista a nga ha fanelanga a lavetela misisi ya amarelu; munhu yelweyo a nga tenganga. 37 Kambe loko muprista a tsumbula swaku swirhumbani a swi hangalakanga ka xikhumba naswona ku mile misisi ya ntima ka swona, swirhumbani swi holile. A tengile, muprista a ta hlaya swaku a tengile.+

38 “Loko wanuna kumbe wansati o tshuka a huma mafelangati ka xikhumba xa yena naswona ma li ya ku basa, 39 muprista a ta ma kambela.+ Loko swirhumbani swa xikhumba swi nga na kori, i swirhumbani leswi nga huma ka xikhumba. Munhu yelweyo a tengile.

40 “Loko wanuna o suketela misisi ya nhloko ya yena a gama a sala ni mpandlha, a tengile. 41 Loko o suketela misisi ya phambheni ka nhloko ya yena a gama a huma mpandlha, a tengile. 42 Kambe loko o tshuka a huma mafelangati ka mpandlha kumbe ka ximombo xa yena, i mavabyi ya nhlokonho lama nga huma ka mpandlha ya yena kumbe ka ximombo xa yena. 43 Muprista a ta mu kambela naswona loko ku hume mafelangati ka mpandlha ya yena hi henhla ka nhloko kumbe ka ximombo xa yena, naswona swi fana ni mavabyi ya nhlokonho ka xikhumba xa yena, 44 a ta hlaya swaku a nga tenganga hikusa a ni mavabyi ya nhlokonho. 45 Mpahla ya munhu lweyi a nga ni mavabyi ya nhlokonho yi fanele yi handzuleliwa, nhloko ya yena yi fanele yi tshama na yi nga fenyiwanga naswona a fanele a mbhonya malepfu ya yena ya le henhla ka nomo a gama a huwelela a ku: ‘A ni tenganga, a ni tenganga!’ 46 Loko a nga se hanya ka mavabyi lawa, a nga tenganga. Leswi a kalaka a nga tenganga, a fanele a tshama na a li yexe. A ta tshama handle ka matende.+

47 “Loko mavabyi ya nhlokonho mo chakisa mpahla ya ku yendliwa hi mavoya, hi panu ya linyu, 48 kumbe linya la mpahla ya ku yendliwa hi panu ya linyu kumbe mavoya kumbe xikhumba kumbe nchumu xin’wani ni xin’wani xa ku yendliwa hi xikhumba, 49 kutani xivati xa vherdi-amarelu kumbe xa ku pshuka xa mavabyi wolawo xi humelela ka mpahla, xikhumba, linya kumbe nchumu xin’wani ni xin’wani xa xikhumba, xi ni mavabyi ya nhlokonho se xi fanele xi ya kombiwa muprista. 50 Muprista a ta kambela mavabyi lawa, se a fanele a xi veka xoxe nchumu lexi nga ni mavabyi anze ku hela 7 wa masiku.+ 51 Loko a kambela mavabyi lawa hi siku la wu 7 a gama a tsumbula swaku ma hangalakile ka mpahla, linya kumbe ka xikhumba (a ku na mhaka swaku xikhumba xolexo xi tirhiseliwa yini), mavabyi wolawo i mavabyi ya nhlokonho lama dlayaka naswona nchumu xolexo a xi tenganga.+ 52 A fanele a hisa mpahla kumbe linya leli nga ka xikhumba kumbe panu ya linyu kumbe nchumu xin’wani ni xin’wani xa xikhumba lexi mavabyi ma nga kumiwaka ka xona, hikusa i mavabyi ya nhlokonho lama dlayaka. Xi fanele xi hisiwa hi ndzilu.

53 “Kambe loko muprista a xi kambela a gama a tsumbula swaku mavabyi a ma hangalakanga ka mpahla kumbe linya kumbe nchumu xin’wani ni xin’wani xa xikhumba, 54 muprista a ta va rhuma swaku va hlampsa nchumu lexi nga ni mavabyi, kutani a ta tlhela a xi tshika 7 wa masiku. 55 Loko nchumu lexi nga ni mavabyi se xi hlampsiwile xi basa, muprista a ta gama a xi kambela. Se loko xivati xi nga txintxanga hambiloko mavabyi ma nga hangalakanga, nchumu xolexo a xi tenganga. A fanele a xi hisa hi ndzilu hikusa xi dliwile, ku nga ha va ndzeni ka xona kumbe handle ka xona.

56 “Kambe loko muprista a xi kambelile a gama a tsumbula swaku ndhawu leyi a yi ni mavabyi yi basile loko se xi hlampsiwile, a ta handzula ndhawu yoleyo ka mpahla kumbe ka xikhumba kumbe ka linya. 57 Kambe loko ma ha humelela ka ndhawu yin’wani ya mpahla kumbe ka linya kumbe ka nchumu xin’wani ni xin’wani xa xikhumba, swi komba swaku mo hangalaka se u fanele u xi hisa hi ndzilu nchumu xin’wani ni xin’wani lexi nga tluleliwa hi mavabyi.+ 58 Kambe loko mavabyi ma nyamalala ka mpahla kumbe ka linya kumbe ka nchumu xin’wani ni xin’wani xa xikhumba lexi u nga xi hlampsa, xi fanele xi tlhela xi hlampsiwa ka wumbirhi, kutani xi ta va xi tengile.

59 “Lowu i nawu wa mavabyi ya nhlokonho ka mpahla ya xikhumba kumbe ka panu ya linyu kumbe ka linya kumbe ka nchumu xin’wani ni xin’wani xa xikhumba, leswaku ku ta vuliwa swaku xi tengile kumbe a xi tenganga.”

14 Yehovha a tama a vulavula na Moxe a ku: 2 “Lowu i nawu lowu tirhaka ka munhu lweyi a nga ni mavabyi ya nhlokonho* hi siku leli ku nga ta hlayiwaka swaku a tengile, nkama a nga ta yisiwa ka muprista.+ 3 Muprista a ta ya handle ka matende a fika a mu kambela. Loko munhu lweyi a nga ni mavabyi ya nhlokonho se a hanyile ka mavabyi wolawo, 4 muprista a ta rhuma munhu yelweyo swaku a tisa swinyanyani swimbirhi leswi hanyaka leswi swi nga tenga, mapulangu ya mukedari, nguvu ya ku pshuka ni xinsinyani xa hisopa* leswaku a ta tengisiwa.+ 5 Muprista a ta hlaya swaku xinyanyani xin’we xi dlayeliwa ka xibya xa vumba lexi nga ni mati, mati ya kona ma fanele ma khiwe ka ndhawu leyi mati ya kona ma fambaka. 6 A fanele a teka xinyanyani lexi hanyaka ku patsa ni mapulangu ya mukedari, nguvu ya ku pshuka ni xinsinyani xa hisopa, a swi peta ka ngati ya xinyanyani lexi nga dlayiwa ka mati wolawo. 7 Kutani a ta yi n’wan’wasela ka 7 ka lweyi a tibasisaka ka mavabyi ya nhlokonho naswona a ta vula swaku a tengile, a gama a tshika xinyanyani lexi hanyaka xi ya nhoveni.+

8 “Lweyi a tibasisaka a fanele a hlampsa mpahla ya yena, a tsemeta misisi ya yena hinkwayu naswona a hlamba ka mati kutani a ta va a tengile. Se hi kona a nga nghenaka ka matende, kambe a ta tshama handle ka tende la yena anze ku hela 7 wa masiku. 9 Hi siku la wu 7 a fanele a tsemeta nhloko yi ku baa, a tsemeta xilepfu xa yena ni tixiyi ta yena. Loko se a tsemetile misisi ya yena hinkwayu, a ta hlampsa mpahla ya yena a gama a hlamba hi mati kutani a ta va a tengile.

10 “Hi siku la wu 8, a ta teka swinyempfani swimbirhi swa xinuna leswi nga hanya kahle, xinyempfani xa xisati+ lexi nga hanya kahle xi ngo va ni lembe lin’we, mpupu wa ku siliwa kahle lowu ringanaka nchumu xa malitru mambirhi* lowu nga patsiwa ni mafurha swaku wu va gandzelo la swakudla+ ni txikirhi* lin’we la mafurha;+ 11 kutani muprista lweyi a hlayaka swaku munhu lweyi a tibasisaka a tengile, a ta mu teka ni magandzelo lawa a famba na yena phambheni ka Yehovha ka nyanghwa wa tende la ntlhanganu. 12 Muprista a ta teka xinyempfani xa xinuna a xi nyikela swaku xi va gandzelo la nandzu+ ku patsa ni txikirhi la mafurha, a gama a swi fambisa swi ya hala ni hala swaku swi va gandzelo leli fambisiwaka phambheni ka Yehovha.+ 13 Kutani a ta dlaya xinyempfani xa xinuna lomu swifuyu swa gandzelo la xidjoho ni gandzelo la ku hisiwa swi tolovelaka ku dlayeliwa kona,+ ka ndhawu ya ku kwetsima, hikusa xifuyu xa gandzelo la nandzu ku fana ni xa gandzelo la xidjoho i swa muprista.+ I nchumu xa ku kwetsima hintamu.+

14 “Kutani muprista a ta teka ngati yin’wani ya xifuyu xa gandzelo la nandzu a yi tota ka ponta ya ndleve ya xinene ya lweyi a tibasisaka ni ka litiho lalikulu la voko la yena la xinene ni ka litiho lalikulu la nenge wa yena wa xinene. 15 Se muprista a ta teka mafurha yamatsongo lawa ma nga ka txikirhi,+ a ma chela ka voko la yena la ximatsi. 16 Muprista a ta tsakamisa litiho la yena la xinene hi mafurha lawa ma nga ka voko la yena la ximatsi, a gama a n’wan’wasela mafurha man’wani ka 7 hi litiho la yena aphambheni ka Yehovha. 17 Kutani muprista a ta teka mafurha man’wani lawa ma nga sala ka voko la yena, a ma tota ka ponta ya ndleve ya xinene ya lweyi a tibasisaka ni le ka litiho lalikulu la voko la yena la xinene ni ka litiho lalikulu la nenge wa yena wa xinene, ahenhla ka ngati ya gandzelo la nandzu. 18 Muprista a ta teka mafurha lama nga sala ka voko la yena a ma chela ka nhloko ya lweyi a tibasisaka, a gama a mu kombelela ku rivaleliwa phambheni ka Yehovha.+

19 “Muprista a ta nyikela xifuyu xa gandzelo la xidjoho+ a kombelela lweyi a tibasisaka ku rivaleliwa hi mhaka ya leswi a kalaka a nga tenganga, se a ta gama a dlaya xifuyu xa gandzelo la ku hisiwa. 20 Muprista a ta nyikela gandzelo la ku hisiwa ni gandzelo la swakudla+ ka altari, muprista a ta mu kombelela ku rivaleliwa+ kutani munhu yelweyo a ta va a tengile.+

21 “Kambe loko a li xisiwana a nga li na swona swilo leswi, a ta teka xinyempfani xin’we xa xinuna swaku xi va gandzelo la nandzu a ya xi nyikela xi va gandzelo leli fambisiwaka swaku a ta tikombelela ku rivaleliwa, ku patsa ni mpupu wa ku siliwa kahle lowu ringanaka nchumu xa malitru mambirhi* lowu nga patsiwa ni mafurha swaku wu va gandzelo la swakudla, txikirhi* la mafurha 22 ni matuva mambirhi kumbe swituvani swimbirhi, hi ku ya hi leswi a nga na swona. Xin’wani xi ta va gandzelo la xidjoho, se lexin’wani xi va gandzelo la ku hisiwa.+ 23 Hi siku la wu 8,+ a ta swi yisa ka muprista ka nyanghwa wa tende la ntlhanganu aphambheni ka Yehovha+ swaku a ta vuliwa swaku a tengile.

24 “Muprista a ta teka xinyempfani xa xinuna xa gandzelo la nandzu+ ni txikirhi la mafurha, a gama a swi fambisa swi ya hala ni hala swaku swi va gandzelo leli fambisiwaka phambheni ka Yehovha.+ 25 Se muprista a ta gama a dlaya xinyempfani xa xinuna xa gandzelo la nandzu kutani a teka ngati yin’wani ya xifuyu xa gandzelo la nandzu a yi tota ka ponta ya ndleve ya xinene ya lweyi a tibasisaka ni le ka litiho lalikulu* la voko la yena la xinene ni ka litiho lalikulu la nenge wa yena wa xinene.+ 26 Muprista a ta chela mafurha man’wani ka voko la yena la ximatsi,+ 27 kutani a ta n’wan’wasela mafurha man’wani lama nga ka voko la yena la ximatsi ka 7, hi litiho la xinene phambheni ka Yehovha. 28 Se muprista a ta tota mafurha man’wani lama nga ka voko la yena, ka ponta ya ndleve ya xinene ya lweyi a tibasisaka ni ka litiho lalikulu la voko la yena la xinene ni ka litiho lalikulu la nenge wa yena wa xinene, a ta yendla leswo ka tindhawu leti a nga tota ngati ya gandzelo la nandzu. 29 Muprista a ta gama a teka mafurha lama nga sala ka voko la yena, a ma chela ka nhloko ya lweyi a tibasisaka, leswaku a mu kombelela ku rivaleliwa phambheni ka Yehovha.

30 “A ta nyikela tuva lin’we kumbe xituvani xin’we hi ku ya hi leswi a nga na swona,+ 31 lexi a nga ta kota ku xi kuma, xi va gandzelo la xidjoho naswona lexin’wani xi ta va gandzelo la ku hisiwa+ ku patsa ni gandzelo la swakudla; se muprista a ta kombelela lweyi a tibasisaka ku rivaleliwa phambheni ka Yehovha.+

32 “Lowu i nawu wa lweyi a nga vabya hi nhlokonho, kambe a kalaka a nga na nchumu swaku ku hlayiwa swaku a tengile.”

33 Kutani Yehovha a byela Moxe na Aroni a ku: 34 “Loko mi fika ka tiko la Kanana+ leli ni nga ta mi nyika lona li va tshomba la n’wina,+ se ni chakisa yindlo ka tiko la n’wina hi mavabyi ya nhlokonho,+ 35 n’winyi wa yindlo yoleyo a fanele a ya byela muprista a ku: ‘Ku ni nchumu ka yindlo ya mina lexi tikombaka ingi i mavabyi ya nhlokonho.’ 36 Muprista a ta va rhuma swaku va humesa swilo hinkwaswu leswi nga lomu ndlwini na a nga se ta a ta kambela nchumu lexi nga humelela, leswaku a nga vuli swaku swilo hinkwaswu leswi nga ndlwini a swi tenganga; se muprista a ta gama a ta a ta kambela yindlo. 37 A ta kambela ndhawu leyi nga huma nchumu lexi, loko makhumbi ya yindlo ma ni mimbhovo ya vherdi-amarelu kumbe ya ku pshuka, naswona yi tikomba na yi nghenile ka khumbi la yindlo, 38 muprista a ta huma ka yindlo a ya nyima ka nyanghwa wa yona, a gama a pfala yindlo yoleyo anze ku hela 7 wa masiku.+

39 “Kutani muprista a ta tlhela hi siku la wu 7 a ya kambela yindlo. Loko nchumu lexi nga humelela xi hangalakile ka makhumbi ya yindlo, 40 muprista a ta va rhuma swaku va susa maribye lama nga ni nchumu lexi, va ma txukumeta handle ka doropa ka ndhawu leyi kalaka yi nga basanga. 41 Kutani a ta va rhuma swaku va khwaya yindlo hinkwayu andzeni, se misava leyi nga ta khwayiwa yi fanele yi txukumetiwa handle ka doropa ka ndhawu leyi kalaka yi nga basanga. 42 Kutani lani va nga suselela maribye va ta veka maribye man’wani naswona a fanele a tirhisa misava yin’wani swaku ku rebukariwa yindlo.

43 “Kambe loko ko tlhela ku humelela nchumu xin’wani ka yindlo yoleyo, kuve se ma suseleliwile maribye naswona yindlo yi khwayiwile yi tlhela yi rebukariwa, 44 muprista a ta nghena ndzeni ka yona a yi kambela. Loko nchumu xolexo xi hangalakile ka yindlo, i mavabyi ya nhlokonho lawa ma dlayaka.+ Yindlo yoleyo a yi basanga. 45 Kutani a ta rhumisa swaku yindlo yi diliziwa, se maribye ya yona, timhandzi ta yona ni misava hinkwayu ya yindlo, swi ta yisiwa handle ka doropa ka ndhawu leyi kalaka yi nga basanga.+ 46 Kambe lweyi a nga ta tshuka a nghena ka yindlo yoleyo na ya ha pfaliwile,+ a ta tshama na a nga tenganga anze nimadlambu;+ 47 naswona lweyi a nga ta yetlela ka yindlo yoleyo a fanele a hlampsa mpahla ya yena ni lweyi a nga ta dlela ka yindlo yoleyo a fanele a hlampsa mpahla ya yena.

48 “Kambe loko muprista a fika a kuma swaku nchumu lexi nga humelela a xi hangalakanga lomu ndlwini nkama yi nga tlhela yi rebukariwa, muprista a ta vula swaku yindlo yoleyo yi basile, hikusa lexi nga humelela a xa ha li kona. 49 Muprista a ta teka swinyanyani swimbirhi, mapulangu ya mukedari, nguvu ya ku pshuka ni xinsinyani xa hisopa* swaku a basisa yindlo.+ 50 A ta dlaya xinyanyani xin’we ka xibya xa vumba lexi nga ni mati. Mati lawa ma fanele ma khiwa ka ndhawu leyi mati ya kona ma fambaka. 51 Kutani a ta teka mapulangu ya mukedari, xinsinyani xa hisopa, nguvu ya ku pshuka ni xinyanyani lexi hanyaka a swi peta ka ngati ya xinyanyani lexi nga dlayiwa ka mati lawa ma nga khiwa ka ndhawu leyi mati ya kona ma fambaka. Naswona a fanele a yi n’wan’wasela ka 7+ ka tlhelo leli nga txuvukana ni yindlo. 52 A ta basisa yindlo hi ngati ya xinyanyani, mati lawa ma nga khiwa ka ndhawu leyi mati ya kona ma fambaka, xinyanyani lexi hanyaka, mapulangu ya mukedari, xinsinyani xa hisopa ni nguvu ya ku pshuka. 53 Kutani a ta tshika xinyanyani lexi hanyaka xi ya handle ka doropa akhwatini a gama a kombela swaku yindlo yi rivaleliwa, kutani yi ta va yi basile.

54 “Lowu i nawu lowu tirhaka ka mavabyi ya nhlokonho, swirhumbani swa ku tsuvukela ka misisi kumbe malepfu,+ 55 mavabyi ya nhlokonho lawa ma nga ka mpahla+ kumbe ka yindlo,+ 56 ku pfimba, swirhumbani ni mafelangati,+ 57 leswaku swi ta tiviwa loko nchumu xi nga tenganga ni loko nchumu xi tengile.+ Lowu i nawu wa mavabyi ya nhlokonho.”+

15 Yehovha a tama a vulavula na Moxe na Aroni a ku: 2 “Byelani Vayisrayele mi ku: ‘Loko wanuna o tshuka a huma chaka ka xirho xa yena xa wununa, li ta mu yendla a nga tengi.+ 3 A nga tenganga hambi xirho xa yena xa wununa xi tama xi huma chaka kumbe xi pfaleka, a nga tenganga.

4 “‘Sangu* lin’wani ni lin’wani leli munhu lweyi a humaka chaka a nga ta yetlela ka lona li ta va li nga basanga, naswona nchumu xin’wani ni xin’wani lexi a nga ta tshama ka xona xi ta va xi nga basanga. 5 Munhu lweyi a khumbaka sangu la yena a fanele a hlampsa mpahla ya yena naswona a fanele a hlamba hi mati, kutani a ta tshama na a nga tenganga anze nimadlambu.+ 6 Lweyi a tshamaka ka nchumu lexi munhu lweyi a humaka chaka a a tshame ka xona, a fanele a hlampsa mpahla ya yena, a hlamba hi mati naswona a ta tshama na a nga tenganga anze nimadlambu. 7 Mun’wani ni mun’wani lweyi a nga ta khumba munhu lweyi a humaka chaka a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 8 Loko munhu lweyi a humaka chaka o pshitela marhi munhu lweyi a nga tenga, lweyi a nga pshiteliwa marhi a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 9 Nchumu xin’wani ni xin’wani lexi munhu lweyi a humaka chaka a nga ta tshama ka xona loko a li henhla ka xiharhi, xi ta va xi nga basanga. 10 Lweyi a nga ta khumba nchumu xin’wani ni xin’wani lexi a a tshame ka xona a ta tshama na a nga basanga anze nimadlambu naswona mun’wani ni mun’wani lweyi a nga ta swi rhwala a ta hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 11 Loko munhu lweyi a humaka chaka+ a nga hlambanga mavoko ya yena hi mati a gama a khumba munhu mun’wani, munhu lweyi a nga khumbiwa a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 12 Xibya xa vumba lexi munhu lweyi a humaka chaka a nga ta xi khumba xi fanele xi fayiwa naswona xibya xin’wani ni xin’wani xa ku yendliwa hi mapulangu xi fanele xi hlampsiwa hi mati.+

13 “‘Loko chaka li nyima, a ta konta 7 wa masiku swaku a basisiwa naswona a fanele a hlampsa mpahla ya yena, a hlamba hi mati lama fambaka, kutani a ta va a tengile.+ 14 Hi siku la wu 8, a fanele a teka matuva mambirhi kumbe swituvani swimbirhi,+ a ya phambheni ka Yehovha ka nyanghwa wa tende la ntlhanganu, a fika a swi nyika muprista. 15 Muprista a ta swi nyikela, xin’wani xi va gandzelo la xidjoho kasi lexin’wani xi va gandzelo la ku hisiwa, naswona muprista a ta mu kombelela ku rivaleliwa phambheni ka Yehovha hi mhaka ya chaka leli nga huma ka yena.

16 “‘Kutani loko wanuna o tshuka a humesa mbewu ya wununa, a fanele a hlamba muzimbha wa yena hinkwawu hi mati naswona a ta tshama na a nga tenganga anze nimadlambu.+ 17 Mpahla yin’wani ni yin’wani kumbe xikhumba xin’wani ni xin’wani lexi nga cheliwa hi mbewu leyi, a fanele a swi hlampsa hi mati naswona swi ta tshama swi nga tenganga anze nimadlambu.

18 “‘Loko wanuna a yetlela ni wansati se ku huma mbewu ya wununa, va fanele va hlamba hi mati naswona va ta tshama na va nga tenganga anze nimadlambu.+

19 “‘Loko wansati a huma ngati hi mhaka ya leswi a nga ka masiku ya yena, a ta tshama na a nga tenganga anze ku hela 7 wa masiku.+ Mun’wani ni mun’wani lweyi a nga ta mu khumba a ta tshama na a nga tenganga anze nimadlambu.+ 20 Hinkwaswu leswi a nga ta yetlela ka swona na a li ka masiku ya yena swi ta va swi nga basanga naswona hinkwaswu leswi a nga ta tshama ka swona swi ta va swi nga basanga.+ 21 Mun’wani ni mun’wani lweyi a nga ta khumba sangu* la yena a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 22 Mun’wani ni mun’wani lweyi a nga ta khumba nchumu xin’wani ni xin’wani lexi a a tshame ka xona, a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu. 23 Loko swi ku wansati yelweyo a a tshame ka sangu kumbe ka nchumu xin’wani, lweyi a nga ta xi khumba a ta tshama na a nga tenganga anze nimadlambu.+ 24 Loko wanuna o tshuka a famba masangu ni wansati lweyi a nga ka masiku ya yena+ a ta tshama na a nga tenganga anze ku hela 7 wa masiku, naswona sangu lin’wani ni lin’wani leli wanuna lweyi a nga ta yetlela ka lona li ta va li nga basanga.

25 “‘Loko wansati o humetela ngati masiku ya manyingi+ kambe na ku nga li wona nkama lowu a nghenaka hi wona ka masiku ya yena+ kumbe loko ngati yo huma nkama wa wunyingi ku tlula masiku lawa a nghenaka hi wona ka masiku ya yena, a ta va a nga tenganga masiku wolawo hinkwawu, ku fana ni loko a li ka masiku ya yena. 26 Sangu lin’wani ni lin’wani leli a nga ta yetlela ka lona hi masiku lawa a humaka ngati hi wona li ta va li nga basanga ku fana ni sangu leli a yetlelaka ka lona loko a li ka masiku ya yena,+ naswona nchumu xin’wani ni xin’wani lexi a nga ta tshama ka xona xi ta va xi nga basanga ku fana ni loko a li ka masiku ya yena. 27 Lweyi a nga ta mu khumba a ta va a nga tenganga naswona a fanele a hlampsa mpahla ya yena, a hlamba hi mati kutani a ta tshama na a nga tenganga anze nimadlambu.+

28 “‘Kambe loko ngati leyi a yi huma ka yena yi nyimile, a fanele a konta 7 wa masiku kutani a ta va a tengile.+ 29 Hi siku la wu 8 a fanele a teka matuva mambirhi kumbe swituvani swimbirhi,+ a swi yisa ka muprista ka nyanghwa wa tende la ntlhanganu.+ 30 Muprista a ta teka xin’we a yendla gandzelo la xidjoho se lexin’wani a ta yendla gandzelo la ku hisiwa, naswona muprista a ta mu kombelela ku rivaleliwa phambheni ka Yehovha hi mhaka ya ngati ya ku kala yi nga tenganga leyi nga huma ka yena.+

31 “‘Mi fanele mi pfuna Vayisrayele swaku va tshama na va tengile, leswaku va nga fi hi mhaka ya ku chakisa tabernakela ya mina leyi nga xikarhi ka vona.+

32 “‘Lowu i nawu lowu tirhaka ka wanuna lweyi a humaka chaka, wanuna lweyi a kalaka a nga tenganga hi mhaka ya leswi a nga huma mbewu ya wununa,+ 33 wansati lweyi a kalaka a nga tenganga hi mhaka ya leswi a nga ka masiku ya yena,+ wanuna mun’wani ni mun’wani lweyi a humaka chaka+ kumbe wansati lweyi a humaka ngati ni wanuna lweyi a fambaka masangu ni wansati wa ku kala a nga tenganga.’”

16 Yehovha a khulume na Moxe loko vana vambirhi va Aroni se va file hi mhaka ya ku tshinela ka Yehovha hi ndlela ya ku kala yi nga yamukeleki.+ 2 Yehovha a byela Moxe a ku: “Byela Aroni makwenu swaku a nga fanelanga a nghena nkama ni nkama ka ndhawu ya ku kwetsima,+ andzhaku ka kortina leli pfalaka ndhawu leyi,+ phambheni ka tampa ya Areka, swaku a nga fi,+ hikusa ni ta humelela henhla ka tampa+ na ni li ka rhefu.+

3 “Loko a ya ka ndhawu ya ku kwetsima, Aroni a fanele a ta ni leswi: Xihon’wani xa gandzelo la xidjoho+ ni nyempfu ya gandzelo la ku hisiwa.+ 4 A fanele a yambala nkhantxu wa ku kwetsima wa ku leha lowu nga yendliwa hi panu ya linyu+ naswona a yambala xibulukwani xa le ndzeni lexi nga yendliwa hi panu ya linyu+ swaku xi pfala muzimbha wa yena; a fanele a tiboha hi bandhi leli nga yendliwa hi panu ya linyu+ a gama a yambala xifunengeto xa nhloko*+ lexi nga yendliwa hi linyu. I mpahla ya ku kwetsima.+ A ta hlamba hi mati+ a gama a swi yambala.

5 “A fanele a teka swiphongo swimbirhi swaswitsongo ka Vayisrayele+ swi ta va gandzelo la xidjoho ni nyempfu swaku yi va gandzelo la ku hisiwa.

6 “Kutani Aroni a fanele a tisa homu ya gandzelo la xidjoho leli nga la yena, a gama a tikombelela ku rivaleliwa, yena+ ni ndjangu wa yena.

7 “Se a ta teka swiphongo swimbirhi a swi nyimisa phambheni ka Yehovha ka nyanghwa wa tende la ntlhanganu. 8 Aroni a ta yava swiphongo swimbirhi, xin’we xi va xa Yehovha kasi lexin’wani xi va xa Azazele.* 9 Aroni a ta nyikela xiphongo lexi nga langiwa+ swaku xi va xa Yehovha, a ta yendla gandzelo la xidjoho hi xona. 10 Kambe xiphongo lexi nga langiwa swaku xi va xa Azazele xi fanele xi tisiwa na xa ha hanya xi nyimisiwa phambheni ka Yehovha, swaku ku ta kombeliwa ku rivaleliwa swidjoho henhla ka xona, swaku xi ta gama xi tshikiwa xi famba xi ya mananga xi va xa Azazele.+

11 “Aroni a ta tisa homu ya gandzelo la xidjoho leli nga la yena a gama a tikombelela ku rivaleliwa, yena ni ndjangu wa yena; se a ta gama a dlaya homu ya gandzelo la xidjoho leli nga la yena.+

12 “A ta teka xa ku chela ndzilu+ lexi nga tala hi makhala lama pfurhaka, lawa ma nga susiwa ka altari+ leyi nga phambheni ka Yehovha ni mpupu wa swinun’hwelisu*+ wa ku tata mavoko mambirhi a gama a swi yisa ndzeni ka kortina.+ 13 A ta chela swinun’hwelisu henhla ka ndzilu phambheni ka Yehovha,+ kutani rhefu la swinun’hwelisu leswi li ta funengeta tampa ya Areka+ ya Wumboni+ leswaku a nga fi.

14 “A ta teka ngati yin’wani ya homu+ a yi n’wan’wasela hi litiho phambheni ka tampa ka tlhelo la le wuxeni, naswona a ta n’wan’wasela ngati yin’wani hi litiho ka 7, phambheni ka tampa.+

15 “Se a ta gama a dlaya xiphongo xa gandzelo la xidjoho leli nga la vanhu,+ kutani a yisa ngati ya xona ndzeni ka kortina,+ a yendla swa ku fana ni leswi a nga swi yendla hi ngati+ ya homu; a ta yi n’wan’wasela ka tlhelo la tampa ni le phambheni ka tampa.

16 “A fanele a kombela swaku ndhawu ya ku kwetsima yi rivaleliwa hi mhaka ya swilo swa ku kala swi nga basanga leswi nga yendliwa hi Vayisrayele, ni swidjoho swa vona,+ a fanele a yendla leswo ka tende la ntlhanganu, leli nga xikarhi ka vona hi mhaka ya leswi va nga yendla swilo swa ku kala swi nga basanga.

17 “A ku fanelanga ku va ni munhu ni mun’we ka tende la ntlhanganu, nkama Aroni a nga ta nghena a ya kombela ku rivaleliwa ka ndhawu ya ku kwetsima anze a huma. A ta tikombelela ku rivaleliwa yena ni ndjangu wa yena+ ku patsa ni Vayisrayele hinkwavu.+

18 “Kutani a ta huma a ya ka altari+ leyi nga phambheni ka Yehovha, a yi kombelela ku rivaleliwa naswona a ta teka ngati yin’wani ya homu ni ngati yin’wani ya xiphongo a yi tota ka matlhelo hinkwawu ya timhondzo ta altari. 19 A ta tlhela a n’wan’wasela ngati yin’wani ka altari hi litiho ka 7, kutani a ta yi basisa a gama a yi kwetsimisa ka mintirho ya Vayisrayele ya ku kala yi nga basanga.

20 “Loko a gamile ku kombela+ swaku ndhawu ya ku kwetsima, tende la ntlhanganu ni altari+ swi rivaleliwa, a ta tlhela a tisa xiphongo xa ku hanya.+ 21 Aroni a ta tlhateka mavoko ya yena ka nhloko ya xiphongo lexi xa ku hanya kutani a hlaya swihoxo ni swidjoho hinkwaswu swa Vayisrayele, naswona swi ta fana ni loko a veka swidjoho leswi hinkwaswu ka nhloko ya xona,+ a ta gama a xi nyikela ka munhu lweyi a nga langiwa naswona munhu wa kona a ta xi yisa mananga. 22 Xiphongo xolexo xi ta rhwala swihoxo swa vona+ hinkwaswu xi ya na swona ka ndhawu ya ku kala yi nga tshami munhu;+ a ta xi yisa amananga.+

23 “Kutani Aroni a ta nghena ka tende la ntlhanganu a hlivila mpahla ya linyu leyi a nga yi yambala nkama a nga nghena ka ndhawu ya ku kwetsima, a ta yi veka kolanu hansi. 24 A fanele a hlamba hi mati+ ka ndhawu ya ku kwetsima a gama a yambala mpahla ya yena;+ se a ta huma a ta nyikela gandzelo la yena la ku hisiwa+ ni gandzelo la ku hisiwa la vanhu+ naswona a tikombelela ku rivaleliwa yena ni vanhu.+ 25 A ta hisa mafurha ya gandzelo la xidjoho ka altari.

26 “Wanuna lweyi a nga heleketa xiphongo xa Azazele+ a fanele a hlampsa mpahla ya yena a hlamba hi mati se hi kona a nga gamaka a nghena ka matende.

27 “Kutani homu ya gandzelo la xidjoho ni xiphongo xa gandzelo la xidjoho leswi ngati ya swona yi nga tisiwa ka ndhawu ya ku kwetsima swaku ku ta kombeliwa ku rivaleliwa, swi ta yisiwa handle ka matende, kutani swikhumba swa kona, nyama ya swona ni chaka la swona swi ta hisiwa ka ndzilu.+ 28 Lweyi a nga ta swi hisa a fanele a hlampsa mpahla ya yena kutani a hlamba hi mati, se hi kona a nga ta gama a nghena ka matende.

29 “Leswi swi ta va nawu wa ku kala wu nga heli ka n’wina: Hi diya 10 ka wheti ya wu 7, mi fanele mi tisola* hi mhaka ya swidjoho swa n’wina naswona a mi fanelanga mi tirha,+ ku nga ha va n’wina kumbe munhu wa tiko lin’wani lweyi a tshamaka xikarhi ka n’wina. 30 Hi siku leli, mi ta kombeleliwa ku rivaleliwa+ swaku ku vuliwa swaku mi tengile. Mi ta va mi tengile ka swidjoho swa n’wina hinkwaswu phambheni ka Yehovha.+ 31 I savata, ku nga siku la lisima swaku mi humula naswona mi fanele mi tisola hi mhaka ya swidjoho swa n’wina.+ Lowu i nawu wa ku kala wu nga heli.

32 “Muprista lweyi a nga ta langiwa+ a tlhela a vekiwa ku va muprista+ swaku a pfaleta papayi wa yena,+ a ta kombela ku rivaleliwa se a yambala mpahla leyi nga yendliwa hi panu ya linyu,+ ku nga mpahla ya ku kwetsima.+ 33 A ta kombela swaku Ndhawu Ya Ku Kwetsima Hintamu,+ tende la ntlhanganu+ ni altari+ swi rivaleliwa; naswona a ta kombelela vaprista ni tiko hinkwalu la Israyele ku rivaleliwa.+ 34 Lowu wu ta va nawu wa ku kala wu nga heli ka n’wina,+ swaku Vayisrayele va kombeleliwa ku rivaleliwa swidjoho swa vona hinkwaswu kan’we hi lembe.”+

Se Aroni a yendla leswi Yehovha a nga byela Moxe.

17 Yehovha a tama a vulavula na Moxe a ku: 2 “Byela Aroni ni vana va yena ni Vayisrayele hinkwavu u ku: ‘Hi leswi Yehovha a nga swi vula:

3 “‘“Loko munhu mun’wani ni mun’wani wa yindlo ya Israyele o tshuka a dlaya homu kumbe xinyempfani kumbe mbuti ka matende kumbe handle ka matende, 4 kambe a nga xi tisi xifuyu xolexo ka nyanghwa wa tende la ntlhanganu swaku a ta xi nyikela xi va gandzelo ka Yehovha phambheni ka tabernakela ya Yehovha, munhu wa kona a ta va ni nandzu wa ngati. A halate ngati naswona a fanele a dlayiwa. 5 Leswo swi yendleliwa swaku Vayisrayele va nga ha dlayi swifuyu akhwatini, kambe va ta swi tisa ka Yehovha ka nyanghwa wa tende la ntlhanganu ka muprista. Va ta yendlela Yehovha magandzelo ya ku kombela ku rhula hi swona.+ 6 Kutani muprista a ta n’wan’wasela ngati ka altari ya Yehovha ka nyanghwa wa tende la ntlhanganu, a gama a hisa mafurha swaku ma nun’hwela kahle ka Yehovha.+ 7 Se va nga ha tshuki va yendlela madimoni lama fanaka ni timbuti magandzelo,+ lawa vanhu lava va kalaka va nga tshembeki* ka mina hi ku ma gandzela.+ Lowu i nawu wa ku kala wu nga heli ka n’wina, lowu wu nga ta tirha ni ka vatukulu va n’wina.”’

8 “U fanele a va byela u ku: ‘Munhu mun’wani ni mun’wani wa yindlo ya Israyele kumbe munhu wa tiko lin’wani lweyi a tshamaka na n’wina, lweyi a humesaka gandzelo la ku hisiwa kumbe gandzelo lin’wani, 9 kutani a nga li tisi ka nyanghwa wa tende la ntlhanganu swaku a ta li nyikela ka Yehovha, a fanele a dlayiwa.+

10 “‘Loko munhu mun’wani ni mun’wani wa yindlo ya Israyele kumbe wa tiko lin’wani lweyi a tshamaka na n’wina o dla ngati+ yin’wani ni yin’wani, munhu yelweyo ni ta fambela kule na yena naswona ni ta mu dlaya. 11 Hikusa wutomi la leswi hanyaka* li le ka ngati,+ kutani mina ni mi vekele yona ka altari+ leswaku mi tikombelela ku rivaleliwa hikusa i ngati leyi kombelelaka ku rivaleliwa+ hi wutomi leli li nga ka yona. 12 Hi leswo swi nga yendla ni byela Vayisrayele ni ku: “A mi fanelanga mi dla ngati naswona a ku na munhu wa tiko lin’wani lweyi a tshamaka na n’wina+ lweyi a faneleke a dla ngati.”+

13 “‘Loko Muyisrayele kumbe munhu wa tiko lin’wani lweyi a tshamaka na n’wina o hlota a gama a khoma xiharhi kumbe xinyanyani lexi dliwaka, a fanele a halata ngati ya xona+ kutani a yi seletela hi misava. 14 Hikusa wutomi la xin’wani ni xin’wani lexi hanyaka li le ka ngati ya xona. Hi mhaka leyo ni byele Vayisrayele ni ku: “Mi nga tshuki mi dla ngati yin’wani ni yin’wani ya lexi xi hanyaka, hikusa wutomi la xin’wani ni xin’wani li le ka ngati ya xona. Mun’wani ni mun’wani lweyi a yi dlaka, a ta dlayiwa.”+ 15 Loko munhu mun’wani ni mun’wani, ku nga ha va Muyisrayele kumbe wa tiko lin’wani, o dla xifuyu lexi nga kumiwa na xi file kumbe lexi nga davuleliwa hi xiharhi,+ a fanele a hlampsa mpahla ya yena kutani a hlamba hi mati naswona a ta tshama na a nga tenganga anze nimadlambu;+ se a ta gama a tenga. 16 Kambe loko a nga yi hlampsi mpahla ya yena naswona a nga hlambi, a ta tihlamulela hi mhaka ya xihoxo xa yena.’”+

18 Yehovha a tama a vulavula na Moxe a ku: 2 “Byela Vayisrayele u ku: ‘Hi mina Yehovha Xikwembu xa n’wina.+ 3 A mi fanelanga mi hanya ku fana ni vanhu va le tikweni la Gibita leli a mi tshama ka lona, naswona a mi fanelanga mi yendla leswi va swi yendlaka atikweni la Kanana leli ni mi yisaka ka lona.+ A mi fanelanga mi landzelela minawu ya vona. 4 Mi fanele mi yingisa swiboho swa mina swa ku yavanyisa naswona mi fanele mi hlayisa minawu ya mina, mi hanya hi yona.+ Hi mina Yehovha Xikwembu xa n’wina. 5 Mi fanele mi hlayisa minawu ya mina ni swiboho swa mina swa ku yavanyisa; lweyi a yendlaka leswo a ta hanya hi mhaka ya swona.+ Hi mina Yehovha.

6 “‘A ku na munhu ni mun’we axikarhi ka n’wina lweyi a faneleke a famba masangu ni xaka la yena la kusuhi.+ Hi mina Yehovha. 7 U nga tshuki u famba masangu ni papayi wa wena naswona u nga tshuki u famba masangu ni mamani wa wena. Phela i mamani wa wena, u nga tshuki u famba masangu na yena.

8 “‘U nga tshuki u famba masangu ni nsati wa papayi wa wena.+ Swi nga danisa papayi wa wena.

9 “‘U nga tshuki u famba masangu ni makwenu wa wena wa xisati, ku nga ha va makwenu wa wena wa xisati hi ka tlhelo la papayi kumbe hi ka tlhelo la mamani, mi nga ha va mi psaliwe ka ndjangu wun’we kumbe a psaliwe ka ndjangu wun’wani.+

10 “‘U nga tshuki u famba masangu ni n’wana wa ntombhi wa n’wana wa wena wa xinuna kumbe n’wana wa ntombhi wa n’wana wa wena wa xisati, hikusa swi ta ku danisa.

11 “‘U nga tshuki u famba masangu ni n’wana wa ntombhi wa nsati wa papayi wa wena, lweyi a nga n’wana wa papayi wa wena, hikusa i makwenu wa wena wa xisati.

12 “‘U nga tshuki u famba masangu ni makwavu wa xisati wa papayi wa wena. I xaka la le kusuhi la papayi wa wena.+

13 “‘U nga tshuki u famba masangu ni makwavu wa xisati wa mamani wa wena, hikusa i xaka la le kusuhi la mamani wa wena.

14 “‘U nga tshuki u danisa makwavu wa xinuna wa papayi wa wena hi ku famba masangu ni nsati wa yena. Phela i titiya wa wena.+

15 “‘U nga tshuki u famba masangu ni mamanyani* wa wena.+ I nsati wa n’wana wa wena, u nga tshuki u yetlela na yena.

16 “‘U nga tshuki u famba masangu ni nsati wa makwenu wa wena,+ hikusa swi nga mu danisa makwenu wa wena.

17 “‘U nga tshuki u famba masangu ni wansati ni n’wana wa yena wa ntombhi.+ U nga tshuki u teka n’wana wa n’wana wa yena wa xinuna ni n’wana wa n’wana wa yena wa xisati leswaku u famba masangu na vona. Hikusa i maxaka ya yena ya le kusuhi. Phela swa nyenyentsa leswo.

18 “‘U nga tshuki u teka makwavu wa xisati wa nsati wa wena, swaku a va nsati wa wena wa wumbirhi,+ u gama u famba masangu na yena kuve nsati wa wena wa ha hanya.

19 “‘U nga tshuki u famba masangu ni wansati lweyi a nga ka masiku ya yena.+

20 “‘U nga tshuki u famba masangu ni nsati wa wanuna mun’wani, kutani u va munhu wa ku kala a nga tenganga.+

21 “‘U nga tshuki u pfumela swaku vana va wena va nyikeliwa* ka Moleki.+ U nga tshuki u chakisa vito la Xikwembu xa wena hi ku yendla leswo.+ Hi mina Yehovha.

22 “‘U nga tshuki u famba masangu ni wanuna mun’wani.*+ I nchumu xa ku nyenyentsa.

23 “‘Wanuna a nga fanelanga a famba masangu ni xiharhi swaku a tichakisa hi ku yendla leswo; ni wansati a nga fanelanga a nyima phambheni ka xiharhi swaku a ta famba masangu na xona.+ Leswo swi lwisana ni nawu wa Xikwembu.

24 “‘U nga tshuki u tichakisa hi ku yendla xin’wani xa minchumu leyi, hikusa matiko lawa ni ma hlongolaka phambheni ka n’wina ma tichakisile hi ku yendla minchumu leyi hinkwayu.+ 25 Se tiko a li basanga, kutani ni ta li khatisa hi mhaka ya xihoxo xa lona naswona tiko li ta hlanta vanhu lava tshamaka ka lona.+ 26 Kambe n’wina mi fanele mi hlayisa minawu ni swiboho swa mina swa ku yavanyisa,+ naswona a mi fanelanga mi yendla xin’wani xa minchumu leyi ya ku nyenyentsa, ku nga ha va n’wina kumbe munhu wa tiko lin’wani lweyi a tshamaka na n’wina.+ 27 Hikusa swilo leswi hinkwaswu swa ku nyenyentsa a swi yendliwa hi vanhu lava a va tshama ka tiko leli, na n’wina mi nga se tshama ka lona,+ kutani swoswi tiko a li basanga. 28 Kutani tiko a li nga ta boheka ku mi hlanta hi mhaka ya ku li chakisa ku fana ni leswi li nga hlanta matiko lawa a ma tshama ka lona na n’wina mi nge se tshama ka lona. 29 Loko munhu mun’wani o tshuka a yendla xin’wani xa swilo leswi swa ku nyenyentsa, hinkwavu lava yendlaka swilo leswi va fanele va dlayiwa. 30 Mi fanele mi yingisa minawu leyi ni nga mi nyika yona hi ku va mi nga yendli swilo swa ku nyenyentsa leswi a swi yendliwa hi matiko lawa a ma tshama kona na n’wina mi nga se tshama kona,+ leswaku mi nga tichakisi hi mhaka ya swona. Hi mina Yehovha Xikwembu xa n’wina.’”

19 Yehovha a tama a khuluma na Moxe a ku: 2 “Byela Vayisrayele hinkwavu u ku: ‘Mi fanele mi kwetsima hikusa mina Yehovha Xikwembu xa n’wina na kwetsima.+

3 “‘Mun’wani ni mun’wani wa n’wina a fanele a hlonipha* mamani wa yena ni papayi wa yena,+ naswona mi fanele mi hlayisa tisavata ta mina.+ Hi mina Yehovha Xikwembu xa n’wina. 4 Mi nga tshuki mi gandzela swikwembu leswi kalaka swi nga pfuni nchumu+ kumbe mi tiyendlela swikwembu swa nsimbi.+ Hi mina Yehovha Xikwembu xa n’wina.

5 “‘Loko mi yendlela Yehovha gandzelo la ku kombela ku rhula,+ mi fanele mi li yendla hi ndlela ya kuva mi yamukeleka ka yena.+ 6 Li fanele li dliwa hi siku leli mi nga li yendla hi lona ni hi siku leli landzelaka, kambe leswi swi nga ta sala anze siku la wunharhu swi fanele swi hisiwa hi ndzilu.+ 7 Kambe loko nyama ya gandzelo yo dliwa hi siku la wunharhu, i nchumu xa ku nyenyentsa lexi nga ta kala xi nga yamukeleki. 8 Lweyi a yi dlaka a ta tihlamulela hi mhaka ya xihoxo xa yena, hikusa a delele nchumu xa ku kwetsima xa Yehovha naswona munhu wa kona a fanele a dlayiwa.

9 “‘Loko mi tshovela ka masimu ya n’wina, mi nga tshuki mi tshovela hinkwaswu leswi nga ka matlhelo ya nsimu ya n’wina naswona mi nga tshuki mi rholela leswi nga sala loko mi tshovela.+ 10 Naswona mi nga tshuki mi hlengeleta leswi nga sala ka masimu ya n’wina ya mawuvha kumbe mi rholela mawuvha lama nga wa ka masimu ya n’wina. Mi fanele mi swi siyela xisiwana*+ ni munhu wa tiko lin’wani, lweyi a tshamaka na n’wina. Hi mina Yehovha Xikwembu xa n’wina.

11 “‘Mi nga tshuki mi yiva,+ mi nga kanganyisani+ naswona mi fanele mi tshembeka. 12 Mi nga tshuki mi funga hi vito la mina swaku mi khuluma mavunhwa,+ kutani mi chakisa vito la Xikwembu xa n’wina. Hi mina Yehovha. 13 U nga tshuki u xolola munhu mun’wani+ naswona a wu fanelanga u yivela vanhu van’wani.+ A wu fanelanga u tshama wusiku hinkwalu anze li ya xa ni muholo wa munhu lweyi a nga tholiwa.+

14 “‘U nga tshuki u rhuka* munhu wa ku fa tindleve, kumbe u veka nchumu phambheni ka munhu wa ku fa matihlo swaku a tiphariheta+ naswona u fanele u chava Xikwembu xa wena.+ Hi mina Yehovha.

15 “‘Mi nga tshuki mi yavanyisa hi ndlela ya ku kala yi nga lulamanga. Mi nga tshuki mi va ni xikheto ka xisiwana kumbe mi tsakela munhu wa ku ganya.+ Mi fanele mi yavanyisa munhu mun’wani hi ndlela yayinene.

16 “‘U nga tshuki u famba u wonha van’wani vito.+ U nga tshuki u lava ku dlaya munhu mun’wani.*+ Hi mina Yehovha.

17 “‘U nga tshuki u nyenya makwenu ka mbilu ya wena.+ U fanele u laya munhu mun’wani+ swaku u nga vi ni xidjoho ku fana na yena.

18 “‘U nga tshuki u tlhelisela+ kumbe u veketela xiviti ka vanhu va tiko la wena naswona u fanele u rhandza munhu mun’wani ku fana ni leswi u tirhandzisaka swona.+ Hi mina Yehovha.

19 “‘Mi fanele mi yingisa minawu ya mina: Mi nga tshuki mi tlhanganisa swiharhi swa mixaka yimbirhi swaku swi ta fambelana.* Mi nga tshuki mi byala timbewu ta mixaka yimbirhi ka masimu ya n’wina,+ naswona mi nga tshuki mi yambala mpahla leyi nga yendliwa hi mixaka yimbirhi ya malinya lawa ma nga patsiwa.+

20 “‘Se loko wanuna o famba masangu ni wansati, kuve wansati yelweyo a a li mutirhi lweyi a nga tshembisiwa nuna mun’wani kambe a nga kutsuliwanga kumbe a a nga chunsiwanga, va fanele va khatisiwa. Kambe a va fanelanga va dlayiwa hikusa a a nga chunsiwanga. 21 Wanuna yelweyo a fanele a tisa gandzelo la yena la nandzu ka Yehovha ka tende la ntlhanganu, ku nga nyempfu ya xinuna ya gandzelo la nandzu.+ 22 Muprista a ta mu kombelela ku rivaleliwa hi nyempfu ya xinuna ya gandzelo la nandzu phambheni ka Yehovha hi mhaka ya xidjoho lexi a nga xi yendla, se a ta rivaleliwa xidjoho lexi a nga xi yendla.

23 “‘Loko mi fika ka tiko leli ni mi nyikaka lona kutani mi byala minsinya leyi psalaka mihandzu, a mi fanelanga mi dla mihandzu ya yona malembe manharhu ya ku sungula. Mihandzu ya nsinya wolowo a yi basanga ka n’wina naswona swa tsimbisiwa ku yi dla. 24 Kambe hi lembe la wu 4, mihandzu ya wona hinkwayu yi ta va ya ku kwetsima naswona wu ta va nkama wa ku tsaka phambheni ka Yehovha.+ 25 Kutani hi lembe la wu 5, mi nga ha dla mihandzu ya wona swaku mi yengetela ntshovelo wa n’wina hi yona. Hi mina Yehovha Xikwembu xa n’wina.

26 “‘Mi nga tshuki mi dla nchumu lexi nga ni ngati.+

“‘Mi nga tshuki mi vhumba kumbe mi yendla masalamusi.+

27 “‘Mi nga tshuki mi tsemeta misisi ya n’wina ya le matlhelweni ka nhloko kumbe mi tsemeta malepfu ya n’wina hi le magamu.+

28 “‘Mi nga tshuki mi titsemelela hi mhaka ya munhu lweyi a nga fa*+ naswona mi nga tshuki mi titsaletela ka muzimbha* wa n’wina. Hi mina Yehovha.

29 “‘U nga tshuki u danisa n’wana wa wena wa xisati hi ku mu yendla nghwavani,+ swaku tiko la wena li nga chakisiwi hi tinghwavani naswona li tala hi mahanyelo ya ku biha.+

30 “‘Mi fanele mi hlayisa tisavata ta mina+ naswona mi fanele mi hlonipha ndhawu ya mina leyi kwetsimaka. Hi mina Yehovha.

31 “‘U nga tshuki u ya ka tinyanga+ naswona u nga tshuki u vutisa lava vhumbaka+ swaku u nga tshuki u tichakisa hi mhaka ya vona. Hi mina Yehovha Xikwembu xa wena.

32 “‘U fanele u hlonipha munhu lweyi a nga ni misisi ya ku basa,*+ u fanele u hlonipha munhu lweyi a nga kula+ naswona u fanele u chava Xikwembu xa wena.+ Hi mina Yehovha.

33 “‘Loko munhu wa tiko lin’wani a tshama ka tiko la n’wina, a mi fanelanga mi mu hlupha.+ 34 Munhu wa tiko lin’wani lweyi a tshamaka na n’wina mi fanele mi mu vona na a li Muyisrayele;+ naswona mi fanele mi mu rhandza ku fana ni leswi mi tirhandzisaka swona, hikusa na n’wina mi tshame Gibita ka tiko leli a li nga li la n’wina.+ Hi mina Yehovha Xikwembu xa n’wina.

35 “‘Mi nga tshuki mi kanganyisa loko mi pima ku leha ka nchumu, ku tika ka xona kumbe loko mi pima swilo leswi dibekaka.+ 36 Mi fanele mi tirhisa mabalansa lawa ma pimaka kahle, swa ku peza hi swona leswi pezaka kahle, xa ku pima hi xona lexi pimaka kahle swilo swa ku woma* ni xa ku pima hi xona lexi pimaka kahle swilo leswi dibekaka.*+ Hi mina Yehovha Xikwembu xa n’wina lweyi a nga mi humesa ka tiko la Gibita. 37 Kutani mi fanele mi hlayisa minawu ya mina hinkwayu ni swiboho swa mina hinkwaswu swa ku yavanyisa, naswona mi fanele mi swi yingisa.+ Hi mina Yehovha.’”

20 Yehovha a tama a vulavula na Moxe a ku: 2 “U ta byela Vayisrayele u ku: ‘Munhu mun’wani ni mun’wani lweyi a nga Muyisrayele ni munhu mun’wani ni mun’wani wa tiko lin’wani lweyi a tshamaka aIsrayele, lweyi a nyikelaka n’wana wa yena ka Moleki a fanele a dlayiwa.+ Vanhu va tiko va fanele va mu ba hi maribye anze a fa. 3 Ni ta fambela kule ni munhu wa kona naswona ni ta mu dlaya hikusa a nyikele n’wana wa yena ka Moleki, naswona a chakise ndhawu ya mina ya ku kwetsima+ a tlhela a chakisa vito la mina la ku kwetsima. 4 Loko vanhu va tiko vo yendla ingi a va swi voni leswi nga yendliwa hi munhu yelweyo loko a nyikela vana va yena ka Moleki kutani va nga mu dlayi,+ 5 mina ni ta fambela kule ni munhu wa kona ni ndjangu wa yena.+ Ni ta dlaya munhu yelweyo ni hinkwavu lava nga tipatsa na yena ka ku yendla swilo swa ku biha hi ku gandzela Moleki.

6 “‘Ni ta fambela kule ni munhu wa ku kala a nga tshembeki* lweyi a yaka ka tinyanga+ ni ka lava vhumbaka,+ naswona ni ta mu dlaya.+

7 “‘Mi fanele mi tibasisa naswona mi kwetsima+ hikusa hi mina Yehovha Xikwembu xa n’wina. 8 Mi fanele mi yingisa minawu ya mina mi tlhela mi hanya hi yona.+ Hi mina Yehovha lweyi a mi kwetsimisaka.+

9 “‘Loko ko va ni munhu lweyi a rhukaka* papayi wa yena kumbe mamani wa yena, a fanele a dlayiwa.+ Leswi a nga rhuka papayi wa yena kumbe mamani wa yena, ngati ya yena yi le henhla ka yena.

10 “‘Ku fanele ku yendliwa leswi hi munhu lweyi a mbuyetaka ni nsati wa wanuna mun’wani: Lweyi a mbuyetaka ni nsati wa munhu mun’wani a fanele a dlayiwa, yena ni lweyi a nga mbuyeta na yena.+ 11 Wanuna lweyi a fambaka masangu ni nsati wa papayi wa yena a danisa papayi wa yena.+ Hawumbirhi ka vona va fanele va dlayiwa. Ngati ya vona yi le henhla ka vona. 12 Loko wanuna a famba masangu ni mamanyani* wa yena, hawumbirhi ka vona va fanele va dlayiwa. Va tlule nawu wa Xikwembu. Ngati ya vona yi le henhla ka vona.+

13 “‘Loko wanuna a famba masangu ni wanuna mun’wani,* hawumbirhi ka vona va yendle nchumu xa ku nyenyentsa.+ Va fanele va dlayiwa. Ngati ya vona yi le henhla ka vona.

14 “‘Loko wanuna a famba masangu ni wansati ni mamani wa wansati yelweyo, i nchumu xa ku nyenyentsa.+ Va fanele va hisiwa hinkwavu ka ndzilu+ swaku mahanyelo ya vona ya tingana ma nga tami ma va kona axikarhi ka n’wina.

15 “‘Loko wanuna o famba masangu ni xiharhi, a fanele a dlayiwa naswona mi fanele mi dlaya ni xiharhi xolexo.+ 16 Loko wansati a tinyikela ka xiharhi swaku a famba masangu na xona,+ u fanele u dlaya wansati ni xiharhi xa kona. Va fanele va dlayiwa. Ngati ya vona yi le henhla ka vona.

17 “‘Loko wanuna a famba masangu ni makwavu wa yena wa xisati, ku nga ha va n’wana wa ntombhi wa papayi wa yena kumbe n’wana wa ntombhi wa mamani wa yena, swa danisa.+ Va fanele va dlayiwa phambheni ka vanhu. Wanuna lweyi a danise makwavu wa yena wa xisati. A fanele a tihlamulela hi mhaka ya xihoxo xa yena.

18 “‘Loko wanuna a famba masangu ni wansati lweyi a nga ka masiku ya yena, hawumbirhi ka vona a va yi hloniphanga ngati ya yena leyi humaka.+ Va fanele va dlayiwa hawumbirhi ka vona.

19 “‘U nga tshuki u famba masangu ni makwavu wa xisati wa mamani wa wena kumbe makwavu wa xisati wa papayi wa wena, hikusa loko u yendla leswo u ta va na u danisa xaka la wena la le kusuhi.+ Va fanele va tihlamulela hi mhaka ya xihoxo xa vona. 20 Wanuna lweyi a fambaka masangu ni nsati wa makwavu wa papayi wa yena a danisa makwavu wa papayi wa yena.+ Va fanele va tihlamulela hi mhaka ya xidjoho xa vona. Va fanele va fa na va nga na vana. 21 Loko munhu a teka nsati wa makwavu, i nchumu xa ku nyenyentsa.+ A danise makwavu. A va fanelanga va va ni vana.

22 “‘Mi fanele mi yingisa minawu ya mina hinkwayu ni swiboho swa mina hinkwaswu swa ku yavanyisa+ mi tlhela mi swi yendla,+ swaku mi nga hlantiwi hi tiko leli ni mi yisaka ka lona swaku mi ya tshama kona.+ 23 Mi nga tshuki mi landzela minawu ya matiko lawa ni ma hlongolaka phambheni ka n’wina;+ hikusa ma yendle swilo leswi hinkwaswu kutani na ma nyenya.+ 24 Hi leswo swi nga yendla ni mi byela leswi: “Mi ta teka tiko la vona naswona ni ta mi nyika lona swaku li va la n’wina, tiko leli li nga tala hi leiti ni wulombe.+ Hi mina Yehovha Xikwembu xa n’wina lweyi a nga mi langa xikarhi ka vanhu van’wani.”+ 25 Mi fanele ku hambanisa xikarhi ka xiharhi lexi xi nga tenga ni lexi kalaka xi nga tenganga ni xikarhi ka xinyanyani lexi nga tenga ni lexi kalaka xi nga tenganga;+ mi nga tshuki mi tichakisa hi xiharhi kumbe xinyanyani kumbe xin’wani ni xin’wani lexi fambaka hi khwirhi, leswi ni nga swi langa swaku mi swi vona na swi nga tenganga.+ 26 Mi fanele mi kwetsima ka mina hikusa mina Yehovha na kwetsima+ naswona ni mi langile xikarhi ka vanhu van’wani swaku mi va vanhu va mina.+

27 “‘Wanuna kumbe wansati lweyi a tiyendlaka nyanga kumbe lweyi a vhumbaka a fanele a dlayiwa.+ Vanhu va fanele va va ba hi maribye anze va fa. Ngati ya vona yi le henhla ka vona.’”

21 Yehovha a tlhela a byela Moxe a ku: “Byela vana va Aroni lava nga vaprista, u ku: ‘A ku na muprista lweyi a faneleke a tichakisa hi ntsumbu xikarhi ka n’wina.+ 2 Kambe a nga tichakisa ntsena hi mhaka ya xaka la yena la le kusuhi, mamani wa yena, papayi wa yena, n’wana wa yena wa djaha, n’wana wa yena wa ntombhi, makwavu wa yena wa xinuna 3 naswona a nga tichakisa hi mhaka ya makwavu wa yena wa xisati loko ku li swaku a a tshama na yena, loko a nga se famba masangu ni wanuna naswona a nga se chadiwa. 4 A nga fanelanga a tiyendla munhu wa ku kala a nga tenganga hi ku tichakisa hi mhaka ya ntsumbu wa wansati lweyi a nga tekiwa hi mun’wani wa vanhu va tiko la n’wina. 5 Va nga tshuki va tsemeta mpandlha+ kumbe va tsemeta malepfu ya vona hi le magamu kumbe va titsemelela muzimbha.+ 6 Va fanele va kwetsima ka Xikwembu+ xa vona naswona a va fanelanga va chakisa vito la Xikwembu xa vona,+ hikusa va nyikela magandzelo lama yendleliwaka Yehovha hi ndzilu, ku nga pawu* la Xikwembu xa vona, kutani va fanele va kwetsima.+ 7 A va fanelanga va chada ni nghwavani,+ wansati lweyi a nga chakisiwa* kumbe wansati lweyi a nga tshikiwa hi nuna,+ hikusa muprista wa kwetsima ka Xikwembu xa yena. 8 U fanele u mu kwetsimisa+ hikusa hi yena a nyikelaka pawu la Xikwembu xa wena. A fanele a kwetsima ka wena hikusa mina Yehovha lweyi a mi kwetsimisaka na kwetsima.+

9 “‘Loko n’wana wa ntombhi wa muprista o tichakisa hi ku yendla wunghwavani, a chakisa papayi wa yena. A fanele a hisiwa hi ndzilu.+

10 “‘Muprista wamukulu ka vamakwavu, lweyi a nga cheliwa mafurha ya ku kwetsima+ ka nhloko ya yena naswona a nga langiwa swaku a yambala mpahla ya vaprista,+ a nga fanelanga a yi tshikisa swa wufuta misisi ya nhloko ya yena kumbe a handzula mpahla ya yena.+ 11 A nga fanelanga a tshinela ka ntsumbu;*+ a nga fanelanga a tichakisa hambi a li papayi wa yena kumbe mamani wa yena. 12 A nga fanelanga a huma ka ndhawu leyi kwetsimaka naswona a nga fanelanga a chakisa ndhawu leyi kwetsimaka ya Xikwembu xa yena,+ hikusa marka wa ku tinyiketela, ku nga mafurha ya ku kwetsima ya Xikwembu xa yena,+ wu le henhla ka yena. Hi mina Yehovha.

13 “‘A fanele a teka nsati wa ku kala a nge se famba masangu ni wanuna.+ 14 A nga fanelanga a chada ni wansati wa ku feliwa hi nuna, wansati lweyi a nga tshikiwa, lweyi a nga chakisiwa kumbe nghwavani; kambe a fanele a chada ni wansati wa tiko la n’wina lweyi a kalaka a nga se famba masangu ni wanuna swaku a va nsati wa yena. 15 A nga fanelanga a chakisa vana va yena xikarhi ka vanhu va n’wina,+ hikusa hi mina Yehovha lweyi a mu kwetsimisaka.’”

16 Yehovha a tama a vulavula na Moxe a ku: 17 “Byela Aroni u ku: ‘A ku na munhu ni mun’we ka vana* va wena, ka vatukulu va vona hinkwavu lweyi a nga limala, lweyi a nga tshinelaka swaku a ta nyikela pawu la Xikwembu xa yena. 18 Loko ku ni munhu lweyi a nga limala, a nga tshuki a tshinela ka ndhawu ya ku kwetsima: Lweyi a nga fa matihlo, kumbe lweyi a khwitaka, kumbe lweyi a nga ni nghohe* ya ku wonhekela,* kumbe lweyi a nga ni mavoko, kumbe minenge ya ku kala yi nga ringani, 19 munhu lweyi a nga tshoveka nenge kumbe voko, 20 lweyi a nga ni kurukunda* kumbe lweyi a nga ximakwa* kumbe munhu lweyi a vabyaka hi matihlo kumbe swirhumbani kumbe marhansa kumbe lweyi a nga fayeka marhanga ya yena ya wununa.+ 21 A ku na munhu ni mun’we wa ku limala ka vana* va muprista Aroni lweyi a nga tshinelaka swaku a ta nyikela magandzelo ya Yehovha lama nga yendliwa hi ndzilu. Leswi a nga limala, a nge tshineli swaku a ta nyikela pawu la Xikwembu xa yena. 22 A nga dla pawu la Xikwembu xa yena leli nga susiwa ka minchumu ya ku kwetsima hintamu+ ni leli nga susiwa ka minchumu ya ku kwetsima.+ 23 Kambe a nga tshuki a tshinela kusuhi ni kortina+ naswona a nga tshuki a tshinela ka altari+ hikusa a limalile; naswona a nga fanelanga a chakisa ndhawu ya mina leyi kwetsimaka,+ hikusa hi mina Yehovha lweyi a va kwetsimisaka.’”+

24 Kutani Moxe a vulavula na Aroni ni vana va yena ni Vayisrayele hinkwavu.

22 Yehovha a tama a khuluma na Moxe a ku: 2 “Byela Aroni ni vana va yena swaku va fanele va tivonela ka ndlela leyi va swi khomaka hi yona* swilo swa ku kwetsima swa Vayisrayele naswona va nga chakisi vito la mina+ la ku kwetsima ka swilo leswi va ni kwetsimiselaka swona.+ Hi mina Yehovha. 3 Va byeli u ku: ‘Loko mun’wani wa vatukulu va vana va n’wina o tshuka a tshinela kusuhi ni swilo swa ku kwetsima leswi Vayisrayele va swi kwetsimiselaka Yehovha, kuve a nga tenganga, munhu yelweyo a ta dlayiwa phambheni ka mina.+ Hi mina Yehovha. 4 A ku na wanuna ni mun’we ka vana va Aroni lweyi a nga ni mavabyi ya nhlokonho*+ kumbe lweyi a humaka chaka ka xirho xa yena xa wununa,+ lweyi a nga dlaka swilo swa ku kwetsima na a nga tenganga,+ hambi ko va wanuna lweyi a khumbaka munhu lweyi a kalaka a nga tenganga hi mhaka ya leswi a nga khumba ntsumbu+ kumbe wanuna lweyi a humaka mbewu ya wununa,+ 5 hambi wanuna lweyi a khumbaka xiharhi xa ku kala xi nga tenganga+ ka leswi fambaka hi mintlawa na swi li swinyingi kumbe lweyi a khumbaka munhu wa ku kala a nga tenganga, lweyi a nga mu yendlaka a chaka.+ 6 Munhu lweyi a khumbaka nchumu xin’wani ni xin’wani ka swilo leswi, a ta va a nga tenganga anze nimadlambu naswona a nge swi dli swilo swa ku kwetsima, kambe a fanele a hlamba hi mati.+ 7 Loko dlambu li pelile a ta va se a tengile, kutani hi kona se a nga dlaka swin’wani swa swilo swa ku kwetsima hikusa i swakudla swa yena.+ 8 Naswona a nga fanelanga a dla nyama ya xifuyu xin’wani ni xin’wani lexi nga kumiwa na xi file kumbe nchumu xin’wani ni xin’wani lexi nga handzuleliwa hi swiharhi kutani xi mu yendla a nga tengi.+ Hi mina Yehovha.

9 “‘Va fanele va yingisa nawu wa mina leswaku va nga vi ni xidjoho hi mhaka ya ku kala ku yingisa va za va fa hileswi va kalaka va nga wu yingisanga hikusa a va chakisa swilo swa ku kwetsima. Hi mina Yehovha lweyi a va kwetsimisaka.

10 “‘A ku na munhu wa ku kala a nga li muprista* lweyi a nga dlaka nchumu xa ku kwetsima.+ A ku na munhu wa tiko lin’wani lweyi a nga yendzela muprista kumbe mutirhi wa ku tholiwa lweyi a nga dlaka swilo swa ku kwetsima. 11 Kambe loko muprista o xava munhu hi male, munhu yelweyo a nga dla swilo swa ku kwetsima. Swikarawa leswi nga psaliwa ka ndjangu wa yena na swona swi nga dla swakudla swa yena.+ 12 Loko n’wana wa muprista wa xisati o chadiwa hi munhu lweyi a kalaka a nga li muprista, n’wana yelweyo a nga fanelanga a dla swilo swa ku kwetsima leswi nyikeliwaka. 13 Kambe loko n’wana wa muprista wa xisati o feliwa hi nuna kumbe a tshikiwa na a nga na vana, a gama a tlhelela kaya ka papayi wa yena ku fana ni loko wa ha li ntombhi, a nga dla swin’wani swa swakudla swa papayi wa yena;+ kambe a ku na munhu lweyi a kalaka a nga pfumeleliwi* lweyi a nga swi dlaka.

14 “‘Loko munhu o tshuka a phazama a dla swilo swa ku kwetsima, a fanele a tisa gandzelo lin’wani ka muprista a gama a yengetela 20 pursentu ka lona.+ 15 Kutani a va fanelanga va chakisa swilo swa ku kwetsima swa Vayisrayele leswi va swi nyikelaka ka Yehovha;+ 16 se swi yendla swaku va khatisiwa hi mhaka ya nandzu wa vona hileswi va nga dla swilo swa vona swa ku kwetsima; hikusa hi mina Yehovha lweyi a va kwetsimisaka.’”

17 Yehovha a tama a khuluma na Moxe a ku: 18 “Byela Aroni ni vana va yena ni Vayisrayele hinkwavu u ku: ‘Loko Muyisrayele kumbe munhu wa tiko lin’wani lweyi a tshamaka aIsrayele a tisa gandzelo la ku hisiwa+ leli a nga tshembisa a tlhela a funga ka Yehovha kumbe a yendla gandzelo la ku tirhandzela,+ 19 a fanele a tisa homu ya xinuna+ ya ku hanya kahle, swinyempfani kumbe timbuti leswaku a ta yamukeleka. 20 A mi fanelanga mi nyikela nchumu ni xin’we xa ku limala+ hikusa xi ta yendla swaku mi nga yamukeleki.

21 “‘Loko munhu a nyikela gandzelo la ku kombela ku rhula+ leli a nga tshembisa a tlhela a funga ka Yehovha kumbe swaku li va gandzelo la ku tirhandzela, ku fanele ku va homu, kumbe nyempfu, kumbe mbuti ya ku hanya kahle leswaku a ta yamukeleka. Xifuyu xa kona a xi fanelanga xi li xa ku limala. 22 Xifuyu xa gandzelo a xi fanelanga xi fe matihlo, xi tshovekile, xi tsemiwile, xi wonyekelile, xi ni swirhumbani kumbe xi ni marhansa; a mi fanelanga mi swi nyikela ka Yehovha kumbe mi yendlela Yehovha magandzelo hi swona ka altari. 23 Mi nga nyikela homu kumbe nyempfu leyi nga ni minenge ya ku kala yi nga ringani, swaku yi va gandzelo la ku tirhandzela, kambe a yi nge yamukeleki loko mi yi nyikela swaku yi va gandzelo la xitshembiso. 24 A mi fanelanga mi nyikela ka Yehovha hi xifuyu lexi marhanga ya xona ya wununa ma nga vavisiwa, kumbe ma nga fayeka, kumbe ma nga susiwa, kumbe ma nga tsemiwa naswona a mi fanelanga mi nyikela hi swifuyu swa ku tshamisa leswo ka tiko la n’wina. 25 Kutani a mi fanelanga mi nyikela hi swin’wani swa swifuyu leswi, leswi tisiwaka hi munhu wa tiko lin’wani swaku swi va gandzelo* la Xikwembu xa n’wina hikusa swi limalile. A swi nge yamukeleki.’”

26 Yehovha a tama a khuluma na Moxe a ku: 27 “Loko ku psaliwa homu kumbe xinyempfani kumbe mbuti, swi ta tshama 7 wa masiku ni mamani wa swona,+ kambe ku sukela hi siku la wu 8 ku ya phambheni swi ta yamukeleka swaku swi va gandzelo, ku nga gandzelo leli yendleliwaka Yehovha hi ndzilu. 28 A mi fanelanga mi dlaya homu kumbe nyempfu ni vana va yona hi siku lin’we.+

29 “Loko mi nyikela gandzelo la ku khensa ka Yehovha,+ mi fanele mi li nyikela hi ndlela leyi nga ta yendla swaku mi yamukeleka. 30 Li fanele li dliwa hi siku lolelo. A mi fanelanga mi li siya anze li ya xa.+ Hi mina Yehovha.

31 “Mi fanele mi hlayisa minawu ya mina mi tlhela mi yi yendla.+ Hi mina Yehovha. 32 A mi fanelanga mi chakisa vito la mina la ku kwetsima+ naswona ni fanele ni kwetsimisiwa xikarhi ka Vayisrayele.+ Hi mina Yehovha lweyi a mi kwetsimisaka,+ 33 lweyi a nga mi humesa ka tiko la Gibita swaku ni ta va Xikwembu xa n’wina.+ Hi mina Yehovha.”

23 Yehovha a tama a vulavula na Moxe a ku: 2 “Byela Vayisrayele u ku: ‘Mafexta*+ ya Yehovha lawa mi faneleke mi ma huwelela+ i makongresu ya ku kwetsima. Mafexta ya mina hi lawa:

3 “‘Mi nga ha tirha 6 wa masiku kambe siku la wu 7 i savata, i siku la ku humula,+ ku nga kongresu ya ku kwetsima. A mi fanelanga mi tirha nchumu. Ku ta va savata ya Yehovha hinkwaku lomu mi tshamaka kona.+

4 “‘Hi lawa mafexta ya Yehovha, ku nga makongresu ya ku kwetsima lawa mi faneleke mi ma huwelela hi minkama ya wona leyi nga vekiwa: 5 Hi siku la wu 14 ka wheti ya ku sungula,+ loko dlambu la ha ku pela i Paxkwa+ la Yehovha.

6 “‘Hi siku la wu 15 ka wheti yoleyo i Fexta la Mapawu ya Ku Kala Fermentu leli yendleliwaka Yehovha.+ Mi fanele mi heta 7 wa masiku na mi dla mapawu ya ku kala fermentu.+ 7 Hi siku la ku sungula, mi ta va ni kongresu ya ku kwetsima.+ A mi fanelanga mi yendla ntirho wa ku tika. 8 Kambe mi fanele mi nyikela gandzelo leli nga yendleliwa Yehovha hi ndzilu anze ku hela 7 wa masiku. Hi siku la wu 7 ku ta va ni kongresu ya ku kwetsima. A mi fanelanga mi yendla ntirho wa ku tika.’”

9 Yehovha a tlhela a vulavula na Moxe a ku: 10 “Byela Vayisrayele u ku: ‘Loko mi ku swee ka tiko leli ni mi nyikaka lona kutani mi tshovela leswi mi nga swi byala, mi fanele mi yisa nyandza ya swilo leswi mi nga rhanga+ mi swi tshovela ka muprista.+ 11 Yena a ta fambisa nyandza yi ya hala ni hala phambheni ka Yehovha swaku mi yamukeleka. Muprista a fanele a yi fambisa hi siku leli landzelaka Savata. 12 Hi siku leli nyandza yi nga ta fambisiwaka hi lona, mi fanele mi nyikela xinyempfani lexi nga ni lembe lin’we xa ku hanya kahle, swaku xi va gandzelo la ku hisiwa ka Yehovha. 13 Gandzelo la kona la swakudla ku ta va mpupu lowu nga siliwa kahle lowu ringanaka kolomuyani ka makilu mambirhi* lowu nga patsiwa ni mafurha, swaku wu va gandzelo leli nga yendleliwa Yehovha hi ndzilu, li nun’hwela kahle. Gandzelo la vhinyu ku ta va kolomuyani ka malitru manharhu* ni hafu. 14 A mi fanelanga mi dla pawu, mbhacha kumbe maxalani* lawa ma ha ku tshoveliwaka ku fikela siku leli, anze mi tisa gandzelo la Xikwembu xa n’wina. Lowu i nawu wa ku kala wu nga heli ka vatukulu va n’wina hinkwavu, hinkwaku lomu mi tshamaka kona.

15 “‘Mi ta kontela 7 wa tisavata ku sukela ka siku la le phambheni ka Savata, ku sukela hi siku leli mi nga tisa nyandza ya gandzelo leli fambisiwaka.+ Mi fanele mi kontela mavhiki hinkwawu. 16 Mi fanele mi konta 50 wa masiku+ anze mi fika ka siku leli nga phambheni ka Savata ya wu 7, kutani mi fanele mi nyikela gandzelo la trigu leli la ha ku tshoveliwaka ka Yehovha.+ 17 Mi fanele mi tisa mapawu mambirhi hi makaya ya n’wina swaku ma va gandzelo leli fambisiwaka. Ma fanele ma hambiwa hi mpupu lowu nga siliwa kahle lowu ringanaka kolomuyani ka makilu mambirhi.* Ma fanele ma cheliwa fermentu loko ma hambiwa,+ ma ta va swilo leswi rhangaka swi tshoveliwa leswi nyikeliwaka ka Yehovha.+ 18 Kutani mi fanele mi nyikela mapawu xikan’we ni 7 wa swinyempfani swa xinuna leswi nga hanya kahle, hinkwaswu na swi ni lembe lin’we ni xihon’wani ni tinyempfu timbirhi.+ Swi ta va gandzelo la ku hisiwa leli yendleliwaka Yehovha ku patsa ni gandzelo la swona la swakudla ni magandzelo ya swona ya vhinyu, swi va gandzelo leli nga yendliwa hi ndzilu, li nun’hwela kahle ka Yehovha. 19 Kutani mi fanele mi nyikela ximbutani xin’we swaku xi va gandzelo la xidjoho+ ni swinyempfani swimbirhi swa xinuna, hinkwaswu na swi ni lembe lin’we swaku swi va gandzelo la ku kombela ku rhula.+ 20 Muprista a ta fambisa swinyempfani swimbirhi swa xinuna swi ya hala ni hala ni mapawu lawa ma nga hambiwa hi swilo leswi nga rhanga swi tshoveliwa, swaku swi va gandzelo leli fambisiwaka phambheni ka Yehovha. Swi ta va nchumu xa ku kwetsima ka Yehovha lexi lumbaka muprista.+ 21 Hi siku lolelo mi ta huwelela+ swaku ku ni kongresu ya ku kwetsima. A mi fanelanga mi yendla ntirho wa ku tika. Lowu i nawu wa ku kala wu nga heli ka vatukulu va n’wina hinkwavu ka tindhawu hinkwatu leti mi tshamaka ka tona.

22 “‘Loko mi tshovela ka masimu ya n’wina, mi nga tshuki mi tshovela hinkwaswu leswi nga matlhelweni ka masimu ya n’wina naswona mi nga tshuki mi rholela leswi nga sala loko mi tshovela.+ Mi fanele mi swi siyela xisiwana*+ ni munhu wa tiko lin’wani+ lweyi a tshamaka na n’wina. Hi mina Yehovha Xikwembu xa n’wina.’”

23 Yehovha a tlhela a vulavula na Moxe a ku: 24 “Byela Vayisrayele u ku: ‘Hi siku la ku sungula ka wheti ya wu 7, mi fanele mi humula ka mintirho ya n’wina hinkwayu, siku leli li ta tivisiwa hi ku chayiwa ka mhalamhala*+ swaku mi ta khumbuka swaku i kongresu ya ku kwetsima. 25 A mi nga ta yendla ntirho wa ku tika naswona mi ta nyikela gandzelo leli yendleliwaka Yehovha hi ndzilu.’”

26 Yehovha a tlhela a vulavula na Moxe a ku: 27 “Kambe hi diya 10 ka wheti yoleyo ya wu 7, i Siku la Ku Kombela Ku Rivaleliwa.+ Mi fanele mi va ni kongresu ya ku kwetsima kutani mi fanele mi tisola* hi mhaka ya swidjoho swa n’wina,+ se mi fanele mi nyikela gandzelo leli yendleliwaka Yehovha hi ndzilu. 28 A mi fanelanga mi tirha hi siku leli hikusa i siku la ku kombela ku rivaleliwa swaku mi rivaleliwa+ hi Yehovha Xikwembu xa n’wina. 29 Munhu mun’wani ni mun’wani lweyi a nga ta kala a nga tisoli* hi mhaka ya swidjoho swa yena hi siku leli, a ta dlayiwa.+ 30 Naswona ni ta dlaya munhu mun’wani ni mun’wani xikarhi ka n’wina lweyi a nga ta tirha hi siku leli. 31 A mi fanelanga mi tirha. Lowu i nawu wa ku kala wu nga heli ka vatukulu va n’wina hinkwavu, hinkwaku lomu mi tshamaka kona. 32 I savata, i siku la ku humula; se hi diya 9 ka wheti yoleyo nimadlambu, mi fanele mi tisola hi mhaka ya swidjoho swa n’wina.+ Mi fanele mi hlayisa savata ya n’wina ku sukela nimadlambu anze madlambu man’wani.”

33 Yehovha a tlhela a vulavula na Moxe a ku: 34 “Byela Vayisrayele u ku: ‘Hi diya 15 ka wheti leyi ya wu 7, i Fexta la Minchacha* ka Yehovha anze ku hela 7 wa masiku.+ 35 Ku ta va ni kongresu ya ku kwetsima hi siku la ku sungula, kutani a mi fanelanga mi yendla ntirho wa ku tika. 36 Mi fanele mi nyikela gandzelo leli nga yendleliwa Yehovha hi ndzilu anze ku hela 7 wa masiku. Hi siku la wu 8, mi ta va ni kongresu ya ku kwetsima+ naswona mi fanele mi nyikela gandzelo leli nga yendleliwa Yehovha hi ndzilu. I kongresu ya ku hlawuleka. A mi fanelanga mi yendla ntirho wa ku tika.

37 “‘Lawa i mafexta+ ya Yehovha lawa mi faneleke mi ma huwelela kuva ma va makongresu ya ku kwetsima+ swaku mi nyikela gandzelo leli yendleliwaka Yehovha hi ndzilu: Gandzelo la ku hisiwa,+ gandzelo la swakudla+ ni gandzelo la vhinyu+ hi ku ya hileswi lavekaka siku ni siku. 38 Magandzelo lawa ma ta yengetela ka lama yendliwaka hi tisavata ta Yehovha,+ ka leswi mi lavaka ku swi nyikela,+ ka magandzelo ya n’wina ya xitshembiso+ ni ka magandzelo ya n’wina ya ku tirhandzela+ lawa mi faneleke mi ma nyikela ka Yehovha. 39 Kambe hi diya 15 ka wheti ya wu 7, loko se mi hlengeletile leswi nga tshoveliwa, mi fanele mi yendla fexta* la Yehovha anze ku hela 7 wa masiku.+ Mi ta humula hi siku la ku sungula mi tlhela mi humula hi siku la wu 8.+ 40 Hi siku la ku sungula mi ta teka mihandzu ya minsinya ya ku saseka, matluka ya minsinya ya mintxindzu,+ tigadja leti nga ni matluka ya manyingi ni ya minsinya ya maxopu leyi nga ka nkova, kutani mi ta tsaka+ phambheni ka Yehovha Xikwembu xa n’wina anze ku hela 7 wa masiku.+ 41 Mi fanele mi yendla fexta lolelo 7 wa masiku hi lembe swaku li va fexta la Yehovha.+ Mi fanele mi li yendla hi wheti ya wu 7 naswona leswo swi fanele swi va nawu wa ku kala wu nga heli ka vatukulu va n’wina hinkwavu. 42 Mi fanele mi tshama ka minchacha anze ku hela 7 wa masiku.+ Vayisrayele hinkwavu va fanele va tshama ka minchacha, 43 swaku vatukulu va n’wina va ta swi tiva+ swaku ni tshamise Vayisrayele ka minchacha nkama ni nga va humesa ka tiko la Gibita.+ Hi mina Yehovha Xikwembu xa n’wina.’”

44 Kutani Moxe a vulavule ni Vayisrayele hi mafexta ya Yehovha.

24 Yehovha a tama a vulavula na Moxe a ku: 2 “Byela Vayisrayele swaku va ku tisela mafurha ya ku tenga ya wolivhera swaku ma ta cheliwa ka swa ku voninga kuva swi tshama na swi voninga nkama hinkwawu.+ 3 Aroni a fanele a yendla swa ku voninga hi swona swi tshama na swi tlhavikiwile ku sukela nimadlambu anze nimixo phambheni ka Yehovha ahandle ka kortina* la areka ya Wumboni ka tende la ntlhanganu. Lowu i nawu wa ku kala wu nga heli ka vatukulu va n’wina hinkwavu. 4 Minkama hinkwayu a fanele a hlayisa swa ku voninga leswi nga ka xa ku tlhoma swa voninga hi swona+ xa woru la ku tenga lexi nga phambheni ka Yehovha.

5 “U ta teka mpupu wa ku siliwa kahle u hamba 12 wa mapawu ya redondu. Pawu lin’wani ni lin’wani u ta li hamba hi mpupu wa kolomuyani ka makilu mambirhi.* 6 U ta ma veka hi mintlawa yimbirhi, u ta veka 6 ka ntlawa ha wun’we,*+ ahenhla ka meza lowu nga yendliwa hi woru la ku tenga lowu nga phambheni ka Yehovha.+ 7 Ka ntlawa wun’wani ni wun’wani u fanele u chela olibanu* la ku tenga, ma ta va mapawu ya gandzelo la xitsundzuxu,+ leli nga yendleliwa Yehovha hi ndzilu. 8 Siku lin’wani ni lin’wani la Savata, a fanele a veka mapawu wolawo nkama hinkwawu phambheni ka Yehovha;+ i ntwananu wa ku kala wu nga heli ni Vayisrayele. 9 Ma ta va ya Aroni ni vana va yena+ naswona va ta ma dla na va li ka ndhawu ya ku kwetsima+ hikusa i nchumu xa ku kwetsima hintamu ka yena, lexi nga susiwa ka magandzelo lama yendleliwaka Yehovha hi ndzilu, lowu i nawu wa ku kala wu nga heli.”

10 Ka Vayisrayele a ku ni djaha leli mamani wa lona a a li Muyisrayele kasi papayi wa lona a a li Mugibita,+ se siku lin’wani djaha leli li lwe ni wanuna mun’wani wa Muyisrayele ka matende. 11 N’wana lweyi, lweyi mamani wa yena a a li Muyisrayele a sungule ku poyila Vito la Xikwembu* ni ku li rhuka.+ Se va mu yisa ka Moxe,+ vito la mamani wa yena a ku li Xelomiti, n’wana wa Dibri wa lixaka la Dani. 12 Va mu pfalelile anze leswi Yehovha a nga swi boha swi tlhamuseliwa kahle ka vona.+

13 Kutani Yehovha a vulavula na Moxe a ku: 14 “Humesa munhu lweyi a nga rhuka vito la mina a ya handle ka matende naswona hinkwavu lava nga mu twa va fanele va tlhateka mavoko henhla ka nhloko ya yena, se Vayisrayele hinkwavu va fanele va mu ba hi maribye.+ 15 Kutani u fanele u byela Vayisrayele u ku: ‘Loko munhu o tshuka a rhuka Xikwembu xa yena, a ta tihlamulela hi mhaka ya xidjoho xa yena. 16 Se lweyi a poyilaka vito la Yehovha a fanele a dlayiwa,+ Vayisrayele hinkwavu va ta mu ba hi maribye. Loko munhu wa tiko lin’wani lweyi a tshamaka na n’wina o tshuka a poyila Vito la Xikwembu, na yena a fanele a dlayiwa ku fana ni Muyisrayele.

17 “‘Loko munhu a dlaya munhu mun’wani na yena a fanele a dlayiwa.+ 18 Munhu lweyi a baka xifuyu a xi dlaya a fanele a xi hakela, wutomi hi wutomi.* 19 Loko munhu a vavisa munhu mun’wani, leswi a nga swi yendla ka munhu yelweyo na yena a fanele a yendliwa swoleswo.+ 20 Ku tshoveka hi ku tshoveka, tihlo hi tihlo, tinyu hi tinyu, loko munhu a vavisa munhu mun’wani na yena a fanele a vavisiwa ku fana.+ 21 Munhu lweyi a baka xiharhi a xi dlaya a fanele a xi hakela,+ kambe lweyi a baka munhu a mu dlaya a fanele a dlayiwa.+

22 “‘Ku ta tirha xiboho xin’we xa ku yavanyisa ka n’wina ni ka munhu lweyi a taka hi ka tiko lin’wani,+ hikusa hi mina Yehovha Xikwembu xa n’wina.’”

23 Se Moxe a gama a vulavula ni Vayisrayele kutani munhu lweyi a nga rhuka Xikwembu va mu humesa handle ka matende, se va mu ba hi maribye.+ Vayisrayele va yendle leswi Yehovha a nga byela Moxe.

25 Yehovha a tama a khuluma na Moxe ka Ntshava ya Sinayi a ku: 2 “Byela Vayisrayele u ku: ‘Nkama mi nga ta ku swee ka tiko leli ni nga ta mi nyika lona,+ tiko li fanele li hlayisa savata ya Yehovha.+ 3 U fanele u byala mbewu ka masimu ya wena 6 wa malembe, u tlhela u tsema* minsinya ya mawuvha ka nsimu ya wena naswona u ta hlengeleta ntshovelo wa tiko.+ 4 Kambe hi lembe la wu 7, ku fanele ku va savata ya ku humula ka tiko, i savata ya Yehovha. A wu fanelanga u byala mbewu ka masimu ya wena kumbe u tsema minsinya ka nsimu ya wena ya mawuvha. 5 A wu fanelanga u tshovela leswi nga sala swi timilela loko se u game ku tshovela naswona u nga tshuki u hlengeleta mawuvha ya nsinya wa wena wa mawuvha wa ku kala wu nga tsemiwanga. Ku fanele ku va lembe la ku humula ka tiko. 6 Kambe u nga ha dla swakudla leswi nga mila tikweni hi nkama wa savata; wena, swikarawa swa wena swa xinuna ni swa xisati, mutirhi wa wena lweyi a nga tholiwa ku patsa ni munhu wa tiko lin’wani lweyi a tshamaka na wena va nga swi dla, 7 ni swifuyu ni swiharhi leswi nga ka tiko la wena. Hinkwaswu leswi tiko li swi humesaka swi nga dliwa.

8 “‘U ta konta 7 wa malembe ya tisavata, 7 wa malembe ma nga phindhiwa ka 7, se a masiku ya 7 wa malembe ya savata ma ta va 49. 9 Hi diya 10 ka wheti ya wu 7, mi fanele mi chaya limhondzo swi twala kahle; hi Siku la Ku Kombela Ku Rivaleliwa,+ mi fanele mi chaya limhondzo swi twala kahle ka tiko la n’wina hinkwalu. 10 Mi fanele mi yendla lembe la wu 50 li va la lisima hintamu, mi huwelela ku chunseka ka vanhu hinkwavu lava tshamaka ka tiko hinkwalu.+ Li ta va Lembe la Chunseko* ka n’wina, se mun’wani ni mun’wani wa n’wina a ta tlhelela ka tiko la yena naswona mun’wani ni mun’wani wa n’wina a fanele a tlhelela ka ndjangu wa yena.+ 11 Lembe la wu 50 li ta va Lembe la Chunseko ka n’wina. A mi nge byali kumbe mi tshovela leswi nga timilela tikweni na swi huma ka mbewu leyi nga wa masin’wini kumbe mi hlengeleta mawuvha lama nga khayiwa ka minsinya ya ku kala yi nga tsemiwanga.+ 12 Hikusa i Lembe la Chunseko. Li fanele li kwetsima ka n’wina. Mi ngo dla ntsena leswi misava yi swi humesaka.+

13 “‘Hi Lembe la Chunseko, mun’wani ni mun’wani wa n’wina a fanele a tlhelela ka tiko la yena.+ 14 Loko u xavisela xanchumu munhu mun’wani kumbe u xava nchumu ka yena, mi nga xololani.+ 15 Loko u xava masimu ka munhu mun’wani, u fanele u konta malembe lama nga ta hundza loko Lembe la Chunseko se li hundzile, munhu yelweyo a fanele a ku xavisela hi ku ya hi malembe lama nga sala ya ku tshovela.+ 16 Loko ka ha sale malembe ya manyingi, a nga yengesela male naswona loko ku sale malembe yamatsongo, a fanele a pumba male, hikusa a ku xavisela numeru ya leswi u nga ta swi tshovela. 17 Ku nga tshuki ku va ni munhu lweyi a xololaka munhu mun’wani+ xikarhi ka n’wina naswona mi fanele mi chava Xikwembu xa n’wina,+ hikusa hi mina Yehovha Xikwembu xa n’wina.+ 18 Loko mi hlayisa minawu ya mina ni swiboho swa mina swa ku yavanyisa, mi ta tshama ka tiko la n’wina na mi hlayisekile.+ 19 Tiko li ta humesa mihandzu ya lona,+ kutani mi ta dla mi xurha naswona mi ta tshama ka lona na mi hlayisekile.+

20 “‘Kambe loko mi ku: “Hi ta dla yini hi lembe la wu 7 loko hi nga byali kumbe ku hlengeleta leswi hi nga swi byala ke?”+ 21 Swi tiveni swaku hi lembe la wu 6, ni ta mi rhumela minkateko ya mina naswona tiko li ta humesa ntshovelo lowu nga ta ringana malembe manharhu.+ 22 Se mi ta byala hi lembe la wu 8 naswona mi ta dla leswi mi nga swi tshovela khale anze ku fika lembe la wu 9. Mi ta dla leswi mi nga swi tshovela khale anze ku fika ntshovelo wa kona.

23 “‘Tiko a li fanelanga li xavisiwa swa wugamu+ hikusa i la mina. Tiko leli a li mi lumbi funtshi mi vayendzi ka mina.+ 24 Tiko hinkwalu leli nga la n’wina mi fanele mi nyikela mpfumelelo swaku li tlhela li xaviwa.

25 “‘Loko makwenu o va xisiwana a gama a boheka ku xavisa ndhawu yin’wani leyi nga ya yena, mukutsuli lweyi a nga xaka la yena a fanele a ta, a ta xava swilo leswi makwavu a nga swi xavisa.+ 26 Loko munhu a nga na mukutsuli kambe a kuma tshomba a za a va ni male ya ku tlhela a swi xava, 27 a fanele a konta male ya ntshovelo leyi ringanaka malembe lawa a a yi xavisile a gama a hakela male ya malembe lama nga sala ka munhu lweyi a nga mu xavisela. Se hi kona a nga tlhelelaka ka ndhawu ya yena.+

28 “‘Kambe loko a nga swi kumi swa ku ringana swaku a kota ku tlhelisela lweyi a nga xava, leswi a nga swi xavisa swi ta tshama ni lweyi a nga swi xava anze ku fika Lembe la Chunseko;+ kutani hi Lembe la Chunseko a ta tlheliseliwa swona, se hi kona a nga ta tlhelela ka ndhawu ya yena.+

29 “‘Kutani loko munhu o xavisa yindlo leyi nga ka doropa leli nga ni muru, a ta va ni mfanelo ya ku tlhela a yi xava anze ku hela lembe lin’we na a yi xavisile; a ta heta lembe hinkwalu na wa ha ni mfanelo ya ku tlhela a yi xava.+ 30 Kambe loko o kala a nga yi xavi ku za ku hela lembe, yindlo leyi nga ka doropa leli nga ni muru yi ta va ya munhu lweyi a nga yi xava ni vatukulu va yena hinkwavu. Hi Lembe la Chunseko a yi fanelanga yi tlhelisiwa ka lweyi a nga yi xavisa. 31 Kambe loko yindlo leyi nga ta xavisiwa yi li ka doropa leli kalaka li nga na muru, yi ta voniwa na yi lumba ndhawu ya tiko. Ndhawu leyi yi ta tshama na yi ni mfanelo ya ku tlhela yi xaviwa naswona hi Lembe la Chunseko yi fanele yi tlhelisiwa ka lweyi a nga yi xavisa.

32 “‘Valevhi va ta tshama na va ni mfanelo ya ku tlhela va xava tiyindlo leti nga ka madoropa+ ya vona nkama hinkwawu. 33 Loko ndhawu leyi lumbaka Valevhi yi nga tlheli yi xaviwa, yindlo leyi nga xavisiwa ka doropa la vona yi fanele yi tlhelisiwa hi Lembe la Chunseko,+ hikusa tiyindlo ta madoropa ya Valevhi i tshomba la vona xikarhi ka Vayisrayele.+ 34 Naswona ndhawu leyi swifuyu swi dlelaka ka yona+ leyi nga kusuhi ni madoropa ya vona a yi nge xavisiwi hikusa i tshomba la vona hi masiku ni masiku.

35 “‘Loko makwenu lweyi a tshamaka na n’wina o va xisiwana naswona a nga swi koti ku tihlayisa,+ mi fanele mi mu pfuna mi yendla leswi a mi ta swi yendla ka munhu wa tiko lin’wani ni muyendzi,+ leswaku a ta kota ku tama a hanya na n’wina. 36 Mi nga lavi majuru ka yena kumbe mi lava ku ganya hi yena.+ Mi fanele mi chava Xikwembu xa n’wina+ kutani makwenu a ta tama a hanya na n’wina. 37 Mi nga lavi majuru loko mi mu lombe male+ kumbe mi mu nyika swakudla swaku mi ta kota ku ganya. 38 Hi mina Yehovha Xikwembu xa n’wina, lweyi a nga mi humesa ka tiko la Gibita+ leswaku ni ta mi nyika tiko la Kanana, swaku ni ta va Xikwembu xa n’wina.+

39 “‘Loko makwenu lweyi a hanyaka na wena o va xisiwana a za a boheka ku tixavisa ka wena,+ u nga mu sindzisi ku yendla ntirho wa xikarawa.+ 40 A fanele a khomiwa ku fana ni mutirhi lweyi a nga tholiwa,+ ku fana ni munhu wa tiko lin’wani. A fanele a ku tirhela anze hi Lembe la Chunseko. 41 Se a ta gama a famba ni vana va yena a tlhelela ka ndjangu wa vona. A fanele a tlhelela ka ndhawu leyi nga tshomba la vavhovho va yena.+ 42 Hikusa i swikarawa swa mina leswi ni nga swi humesa ka tiko la Gibita.+ A va fanelanga va tixavisa ku fana ni swikarawa. 43 A wu fanelanga u mu hlupha,+ u fanele u chava Xikwembu xa wena.+ 44 Swikarawa swa wena swa xinuna ni swa xisati swi fanele swi li swa matiko lawa ma nga kusuhi na wena, u nga xava swikarawa swa xinuna ni swa xisati ka matiko wolawo. 45 U nga tlhela u xava swikarawa ka vana va vanhu va tiko lin’wani lava tshamaka na n’wina+ ni ka mindjangu leyi va nga na yona ka tiko la n’wina naswona swi ta va swa n’wina. 46 Swikarawa swa kona mi nga ha swi nyikela ni ka vana va n’wina swaku swi va tshomba la vona hi masiku ni masiku. Mi nga ha swi yendla vatirhi kambe a mi fanelanga mi hlupha vamakwenu ku nga Vayisrayele.+

47 “‘Kambe loko munhu wa tiko lin’wani kumbe muyendzi lweyi a tshamaka na n’wina o ganya, kutani makwenu lweyi a tshamaka na yena a va xisiwana a za a tixavisa ka munhu wa tiko lin’wani kumbe ka muyendzi lweyi a tshamaka na n’wina kumbe ka munhu wa ndjangu wa munhu wa tiko lin’wani, 48 a ta tshama na a ni mfanelo ya ku tlhela a xaviwa loko se a tixavisile. Mun’wani wa vamakwavu a nga ha tlhela a mu xava,+ 49 kumbe makwavu wa papayi wa yena kumbe n’wana wa makwavu wa papayi wa yena a nga tlhela a mu xava,* kumbe xaka la ndjangu wa yena la le kusuhi li nga tlhela li mu xava.

“‘Kumbe loko yena o ganya, a nga tlhela a tikutsula.+ 50 Yena ni lweyi a nga mu xava va fanele va konta ku sukela hi lembe leli a nga tixavisa hi lona anze hi Lembe la Chunseko,+ se a male leyi a nga xaviwa hi yona yi ta ringana ni numeru ya malembe.+ Ku ta konteliwa masiku ya yena ya ku tirha ku fana ni ya munhu lweyi a nga tholiwa.+ 51 Loko ka ha sale malembe ya manyingi, a fanele a hakela male ya ku kutsuliwa ka yena hi ku ya hi numeru ya malembe lama nga sala. 52 Kambe loko ku sale malembe yamatsongo swaku ku fika Lembe la Chunseko, a fanele a ma kontela, a gama a hakela male ya ku kutsuliwa ka yena hi ku ya hi numeru ya malembe lama nga sala. 53 Lembe ni lembe a fanele a tirhela lweyi a nga mu xava ku fana ni munhu lweyi a nga tholiwa; a wu fanelanga u pfumela swaku lweyi a nga mu xava a mu hlupha.+ 54 Kambe loko a nga swi koti ku tikutsula hi tindlela leti, a ta chunsiwa hi Lembe la Chunseko,+ yena ni vana va yena.

55 “‘Hikusa Vayisrayele i swikarawa swa mina. I swikarawa swa mina leswi ni nga swi humesa ka tiko la Gibita.+ Hi mina Yehovha Xikwembu xa n’wina.

26 “‘Mi nga tshuki mi tiyendlela swikwembu swa ku kala swi nga pfuni nchumu+ naswona mi nga tshuki mi veka xifaniso xa ku vatliwa+ kumbe pilari leli mi nga li txintxa mi li yendla xikwembu, mi nga tshuki mi veka ribye+ leli mi nga li yendla atikweni la n’wina swaku mi li khizamela;+ hikusa hi mina Yehovha Xikwembu xa n’wina. 2 Mi fanele mi hlayisa tisavata ta mina mi tlhela mi hlonipha ndhawu ya mina leyi kwetsimaka. Hi mina Yehovha.

3 “‘Loko mi tama mi landzela minawu ya mina naswona mi yingisa leswi ni mi byelaka swona kutani mi swi yendla,+ 4 ni ta mi nisela mpfula hi nkama wa kona,+ tiko li ta humesa swakudla+ ni minsinya yi ta psala mihandzu atikweni. 5 Mi ta hula leswi mi nga swi tshovela anze ku fika nkama wa ku hlengeleta mawuvha, se mi ta hlengeleta mawuvha anze ku fika nkama wa ku byala; naswona mi ta tidlela swakudla* swa n’wina mi xurha, mi tlhela mi tshama na mi hlayisekile ka tiko la n’wina.+ 6 Ni ta yendla swaku ku va ni ku rhula atikweni+ naswona loko mi yetlela a nga kona lweyi a nga ta fika a mi chavisa;+ ni ta helisa swiharhi leswi nga ni nghozi tikweni naswona xipada xa nyimpi a xi nge ngheni ka tiko la n’wina. 7 Mi ta txatxa valala va n’wina mi va dlaya hi xipada. 8 A 5 wa vanhu va n’wina va ta hlongolisa 100 wa vanhu va vona naswona 100 wa vanhu va n’wina va ta hlongolisa 10.000 wa vanhu va vona, mi ta dlaya valala va n’wina hi xipada.+

9 “‘Ni ta mi katekisa, ni yendla swaku mi psalana mi va vanyingi+ naswona ni ta hlayisa ntwananu wa mina na n’wina.+ 10 Na ma ha dla leswi mi nga swi tshovela lembe li nga hundza, mi ta boheka ku humesa swa khale swaku mi nghenisa swa nyuwani. 11 Ni ta veka tabernakela ya mina xikarhi ka n’wina+ naswona a ni nge mi tshiki. 12 Ni ta famba xikarhi ka n’wina ni va Xikwembu xa n’wina+ naswona n’wina mi ta va vanhu va mina.+ 13 Hi mina Yehovha Xikwembu xa n’wina lweyi a nga mi humesa ka tiko la Gibita leswaku mi nga ha vi swikarawa swa vona, ni tshove kange* la n’wina ni yendla swaku mi famba na mi wololokile.

14 “‘Kambe loko mo kala mi nga ni yingisi kumbe mi nga yendli leswi hinkwaswu ni mi byelaka swona+ 15 naswona loko mi tshika minawu ya mina,+ mi nyenya swiboho swa mina swa ku yavanyisa, mi nga swi yingisi hinkwaswu leswi ni mi byelaka swona, se mi tlula ntwananu wa mina,+ 16 ni ta mi yendla leswi: Ni ta mi khatisa hi ku mi tisela nhlomulu, ndere* ni ku hiseta ka muzimbha, swi ta yendla swaku mi nga ha voni naswona swi yendla swaku mi hela ntamu. Mi ta yi byala mahala mbewu ya n’wina hikusa yi ta dliwa hi valala va n’wina.+ 17 Ni ta lwa na n’wina, se valala va n’wina va ta mi hlula;+ lava mi nyenyaka va ta mi hlupha+ naswona mi ta baleka na mi nga zanga mi txatxiwa hi munhu.+

18 “‘Loko mi nga ni yingisi hambiloko mi humeleliwa hi swilo leswi, ni ta za ni mi ba ka 7 hi mhaka ya swidjoho swa n’wina. 19 Ni ta yendla swaku mi tshika ku tiwomisa tinhloko ni ku tibyela naswona ni ta yendla swaku matilo ya n’wina ma fana ni nsimbi+ ni misava ya n’wina yi fana ni kobre. 20 Mi ta balha mahala hikusa tiko la n’wina a li nga ta humesa nchumu+ naswona minsinya ya tiko la n’wina a yi nga ta psala mihandzu.

21 “‘Kambe loko mi tama mi fambela kule na mina naswona mi nga swi lavi ku ni yingisa, ni ta mi ba ka 7 hi ku ya hi swidjoho swa n’wina. 22 Ni ta rhumela swiharhi leswi nga ni nghozi xikarhi ka n’wina,+ swi ta heta vana va n’wina+ naswona swi ta helisa swifuyu swa n’wina swi tlhela swi mi pumba naswona a ku nge he fambi munhu ka tindlela ta n’wina.+

23 “‘Loko mi nga pfumeli ku layiwa hi mina+ hambiloko se mi humeleliwe hi swilo leswi naswona mi tama mi nga na mhaka na mina, 24 na mina a ni nga ta va ni mhaka na n’wina naswona ni ta mi ba ka 7 hi mhaka ya swidjoho swa n’wina. 25 Ni ta mi khatisa hi ku yendla swaku valala va n’wina va mi hlasela hi xipada hi mhaka ya leswi mi nga tlula ntwananu wa mina.+ Loko mi hlengeletana ka madoropa ya n’wina,+ ni ta mi rhumela mavabyi naswona mi ta hluliwa hi valala va n’wina.+ 26 Loko ni ta helisa swakudla* swa n’wina,+ 10 wa vavasati va ta woxa pawu la n’wina ka fornu lin’we se va ta gama va pezela pawu la kona va mi nyika xikhemu xaxitsongo;+ mi ta dla kambe a mi nga ta xurha.+

27 “‘Loko mi nga ni yingisi hambiloko mi humeleliwe hi swilo leswi naswona mi tama mi nga na mhaka na mina, 28 ni ta mi kwatela hintamu+ naswona ni ta mi khatisa ka 7 hi mhaka ya swidjoho swa n’wina. 29 Se mi ta za mi dla nyama ya vana va n’wina va madjaha mi tlhela mi dla ni nyama ya vana va n’wina va tintombhi.+ 30 Ni ta helisa tindhawu leti mi gandzelaka ka tona+ swikwembu swa mavunhwa,* ni ta diliza maaltari ya n’wina ya swinun’hwelisu,* ni tlhatekela mintsumbu ya n’wina henhla ka mintsumbu ya swifaniso swa n’wina swa ku nyenyentsa* leswi mi swi gandzelaka+ naswona ni ta fambela kule na n’wina hikusa ma ni nyenyentsa.+ 31 Ni ta helisa madoropa ya n’wina hi xipada,+ ni helisa tindhawu ta n’wina ta ku kwetsima naswona a ni nge ku twi ku nun’hwela kahle ka magandzelo ya n’wina. 32 Ni ta yendla swaku tiko li sala na li nga na vanhu+ naswona valala va n’wina lava tshamaka ka lona va ta li txuvuka na va hlamala.+ 33 Ni ta mi hangalasa ka matiko+ naswona ni ta yendla swaku valala va n’wina va lwa na n’wina hi xipada;+ tiko la n’wina li ta sala li nga na munhu+ naswona madoropa ya n’wina ma ta helisiwa.

34 “‘Nkama lowu tiko li nga ta sala na li nga na munhu, n’wina na mi li ka tiko la valala. Hi nkama wolowo tiko li ta hakela tisavata ta lona, tiko li ta humula hikusa li fanele li hakela tisavata leti li kalaka li nga ti hlayisanga.+ 35 Li ta humula masiku hinkwawu loko li nga ha na munhu, hikusa a li zanga li humulile hi tisavata ta n’wina nkama na ma ha tshama ka lona.

36 “‘Lava nga ta pona,+ ni ta yendla swaku va chava hintamu na va li ka matiko ya valala va vona; guwa la tluka leli biwaka hi moya li ta va yendla swaku va baleka naswona va ta baleka ku fana ni munhu lweyi a balekaka xipada, va ta gama va wa na va nga zanga va txatxiwa hi munhu.+ 37 Va ta pharihetana va wa ku fana ni vanhu lava balekaka xipada, hambi ku nga zanga ku va ni munhu lweyi a va txatxaka. Phela a mi nge swi koti ku lwa ni valala va n’wina.+ 38 Mi ta hela xikarhi ka matiko+ naswona tiko la valala va n’wina li ta mi dla mi hela. 39 Lava nga sala xikarhi ka n’wina va ta bola ka matiko ya valala va vona+ hi mhaka ya xihoxo xa n’wina. Va ta bola hi mhaka ya swihoxo swa vapapayi va vona.+ 40 Kutani va ta vula xihoxo xa vona+ ni xihoxo xa vapapayi va vona ni ku nga tshembeki ka vona va gama va pfumela swaku a va tshembekanga hileswi va nga ni tshika.+ 41 Se na mina ni va tshikile+ hi ku va yisa ka tiko la valala va vona.+

“‘Kumbexana hi nkama wolowo mbilu ya vona ya ribye yi ta tiveka hansi+ kutani va ta hakela xihoxo xa vona. 42 Ni ta khumbuka ntwananu wa mina na Yakobe+ ni ntwananu wa mina na Izaki+ naswona ni ta khumbuka ntwananu wa mina na Abrahamu+ naswona ni ta khumbuka tiko. 43 Nkama na va nga li kona ka tiko, li hlayise tisavata ta lona+ naswona a li nga na munhu, se vona a va hakela xihoxo xa vona hileswi a va tshike swiboho swa mina swa ku yavanyisa ni leswi va nga nyenya minawu ya mina.+ 44 Kambe a ni nge va tshiki hi ku helela kumbe ni va txukumeta+ lakakuva ni za ni va helisa loko va ha li ka tiko la valala va vona, hikusa leswo swi nga wonha ntwananu wa mina+ na vona, phela hi mina Yehovha Xikwembu xa vona. 45 Hi mhaka ya vona, ni ta khumbuka ntwananu lowu ni nga wu yendla ni vavhovho va vona,+ lava ni nga va humesa ka tiko la Gibita na matiko ma swi vona,+ swaku ni va Xikwembu xa vona. Hi mina Yehovha.’”

46 Leswi, i swiboho swa ku yavanyisa ni minawu leyi Yehovha a nga yi veka xikarhi ka yena ni Vayisrayele ka Ntshava ya Sinayi hi ku tirhisa Moxe.+

27 Yehovha a tama a vulavula na Moxe a ku: 2 “Byela Vayisrayele u ku: ‘Loko munhu o yendla xitshembiso xa ku hlawuleka+ ka Yehovha xa ku nyikela male leyi ringanaka ni male leyi nga gemeliwa munhu lweyi a nyikeliwaka, ku fanele ku yendliwa leswi: 3 Male leyi nga gemeliwa wanuna wa ku sukela ka 20 wa malembe ku ya ka 60, ku ta va kolomuyani ka 570 wa magrama* ya prata hi ku ya hi mapezela ya ndhawu ya ku kwetsima.* 4 Kambe loko a li wansati, male leyi nga gemiwa ku ta va kolomuyani ka 342 wa magrama* ya prata. 5 Loko va ni 5 wa malembe ku ya ka 20, male leyi nga gemeliwa wanuna ku ta va kolomuyani ka 228 wa magrama* ya prata kasi ka vavasati ku ta va kolomuyani ka 114 wa magrama* ya prata. 6 Loko va ni wheti yin’we ku ya ka 5 wa malembe, male leyi nga gemiwa ka vavanuna ku ta va kolomuyani ka 57 wa magrama* ya prata kasi male leyi nga gemeliwa vavasati ku ta va kolomuyani ka 34 wa magrama* ya prata.

7 “‘Loko va ni 60 wa malembe ku ya henhla, male leyi nga gemeliwa vavanuna ku ta va kolomuyani ka 171 wa magrama* ya prata kasi male leyi nga gemeliwa vavasati ku ta va kolomuyani ka 114 wa magrama* ya prata. 8 Kambe loko a li xisiwana lakakuza a nga swi koti ku humesa male leyi nga gemiwa,+ munhu yelweyo a ta ya nyima phambheni ka muprista, se muprista a ta gema male ya kona. Muprista a ta gema male ya kona hi ku ya hi leswi lweyi a yendlaka xitshembiso a nga kotaka ku swi humesa.+

9 “‘Loko xitshembiso xa kona ku li xifuyu lexi nga pfumeleliwa ku nyikeliwa ka Yehovha, nchumu xin’wani ni xin’wani lexi nga ta nyikeliwa ka Yehovha xi ta va nchumu xa ku kwetsima. 10 A nga fanelanga a txintxisa xaxinene hi xa ku kala xi nga li xinene kumbe xa ku kala xi nga li xinene hi xaxinene. Kambe loko a lava ku txintxisa xifuyu xin’wani hi xifuyu xin’wani, hiwumbirhi ka swona swi ta va swa ku kwetsima. 11 Loko ku li xifuyu xa ku kala xi nga tenganga+ lexi nga ta kala xi nga nyikeliwi swaku xi va gandzelo ka Yehovha, a ta xi nyimisa phambheni ka muprista. 12 Se muprista a ta gema male ya xona loko se a xi kambelile ku vona swaku i xinene kumbe a hi xinene. Male leyi nga gemiwa hi muprista a yi nge txintxi. 13 Kambe loko n’winyi wa xona a lava ku tlhela a xi kuma, a fanele a yengetela 20 pursentu ka male leyi nga gemiwa.+

14 “‘Kambe loko munhu a lava ku nyikela* yindlo ya yena swaku yi va nchumu xa ku kwetsima ka Yehovha, muprista a ta gema male ya kona loko se a yi kambelile ku vona swaku i yinene kumbe a hi yinene. Yi ta xavisiwa hi ku ya hi male leyi nga gemiwa hi muprista.+ 15 Kambe loko lweyi a nyikelaka yindlo ya yena a lava ku tlhela a yi xava, a fanele a yengetela 20 pursentu ka male leyi nga gemiwa, se yi ta tlhela yi va ya yena.

16 “‘Loko munhu a nyikela nsimu yin’wani ka Yehovha, male yi ta gemiwa hi ku ya hi mbewu leyi lavekaka swaku ku byaliwa ka yona: A 130 wa makilu* ya mbewu ya maxalani ku ta va kolomuyani 570 wa magrama* ya prata. 17 Loko a nyikela nsimu ya yena hi Lembe la Chunseko,+ male leyi nga gemiwa a yi nge txintxi. 18 Loko a nyikela nsimu ya yena loko Lembe la Chunseko* li hundzile, muprista a ta mu gemela male hi ku ya hi malembe lama chotaka swaku ku fika lembe leli landzelaka la Chunseko, se male ya kona yi ta pumbiwa hi ku ya hi male leyi nga gemiwa.+ 19 Kambe loko lweyi a nga yi nyikela o lava ku tlhela a yi xava, a fanele a yengetela 20 pursentu ka male leyi nga gemiwa, se yi ta tlhela yi va ya yena. 20 Loko a nga tlheli a yi xava kutani nsimu yi xaviseliwa munhu mun’wani, a yi nge he tlheli yi xavisiwa. 21 Loko hi Lembe la Chunseko nsimu yi tlheliseliwa ka lweyi a nga yi xavisa, yi ta va nchumu xa ku kwetsima ka Yehovha, ku fana ni nsimu leyi nga nyiketeliwa ka yena. Yi ta lumba vaprista.+

22 “‘Loko munhu a nyikela ka Yehovha nsimu leyi a nga yi xava kambe na yi nga lumbi tshomba leli a nga siyeliwa,+ 23 muprista a ta kontela male ya kona hi ku ya hi malembe lama chotaka anze Lembe la Chunseko, se hi siku lolelo a ta gama a mu nyika male leyi nga gemiwa.+ I nchumu xa ku kwetsima ka Yehovha. 24 Hi Lembe la Chunseko, nsimu yi ta tlheliseliwa ka lweyi a nga yi xava ka yena, ku nga lweyi nsimu yi lumbaka yena.+

25 “‘Male hinkwayu yi fanele yi gemiwa hi ku ya hi mapezela ya ndhawu ya ku kwetsima. Xikele yin’wani ni yin’wani yi peza 12 wa magrama.*

26 “‘Kambe a nga kona lweyi a faneleke a nyikela matevula ya swifuyu hikusa swi psaliwa na swi li matevula ya Yehovha.+ Hambi ku li homu ya xinuna kumbe nyempfu, i swa Yehovha.+ 27 Loko a li xifuyu xa ku kala xi nga tenganga se a xi kutsula hi ku ya hi male leyi nga gemiwa, a fanele a yengetela 20 pursentu ka male yoleyo.+ Kambe loko o kala a nga xi kutsuli, xi ta xavisiwa hi ku ya hi male leyi nga gemiwa.

28 “‘Kambe a ku na nchumu ni wun’we lowu nga nyiketiwa lowu munhu a nga wu nyiketa ka Yehovha swaku wu helisiwa na a wu susa ka minchumu leyi a nga na yona wu fanelaka wu xavisiwa kumbe wu tlhela wu xaviwa, ku nga ha va munhu kumbe swifuyu kumbe nsimu leyi a nga na yona. Minchumu hinkwayu leyi nga nyiketiwa ya kwetsima hintamu ka Yehovha.+ 29 Naswona munhu lweyi a nga gemeliwa lifu, lweyi a nga nyiketiwa swaku a dlayiwa a nge ponisiwi.+ A fanele a dlayiwa.+

30 “‘Xin’wani ni xin’wani xa wukhume*+ atikweni, ku nga ha va lexi xi nga tshoveliwa masin’wini kumbe xa mihandzu ya minsinya, i xa Yehovha. I nchumu xa ku kwetsima ka Yehovha. 31 Loko munhu o tshuka a lava ku tlhela a xava xin’wani xa wukhume la yena, a fanele a yengetela 20 pursentu ka male ya kona. 32 Xin’wani ni xin’wani xa wukhume ka ntlhambi wa tihomu ni wa tinyempfu, ka hinkwaswu leswi hundzaka hansi ka nhonga ya mulusi, xi ta va nchumu xa ku kwetsima ka Yehovha. 33 A nga fanelanga a xi kambela ku vona swaku i xinene kumbe a hi xinene naswona a nga fanelanga a xi txintxisa. Kambe loko o tshuka a zama ku xi txintxisa, swifuyu haswimbirhi swi fanele swi va swilo swa ku kwetsima.+ A swi nge kutsuliwi.’”

34 Leyi i minawu leyi Yehovha a nga yi nyika Moxe ka Ntshava ya Sinayi swaku a yi nyika Vayisrayele.+