MISAVA LEYI NGA TALA HI SWIKARHATU

4 | U Nga Heleliwi Hi Ntshembo

HI MHAKA MUNI SWI LI SWA LISIMA

Swilo leswi yendlekaka lani misaveni swoswi, swi nga yendla swaku munhu a hela ntamu a tlhela a nga tsaki. Hi mhaka leyo, vanhu va vanyingi va heleliwa hi ntshembo wa leswaku siku lin’wani swilo swi ta yampsa. Se va gama va yendla yini?

Van’wani a va swi lavi hambi hi ku pimisa hi leswi nga ta yendleka ka nkama lowu taka.
Van’wani va phuza byala ku tlula mpimu kumbe va dzaha ni ku tirhisa timbangi leswaku va zama ku baleka swikarhatu swa vona.
Van’wanyani va fika ni ka ku za va lava hambi hi ku tidlaya, hikusa va tivutisa leswi: “Swi pfuna yini ku tama ni hanya?”

Leswi U Faneleke U Swi Tiva

Swi nga yendleka swin’wani swa swikarhatu leswi u kumanaka na swona swi li swa nkamanyana, hi ku famba ka nkama swilo swi nga ha tshuka swi yampsa.
Hambiloko xiyimu xi nga txintxi, ku ni swilo leswi u nga swi yendlaka leswaku u kota ku lwisana ni swikarhatu swa wena.
Bibele li hi nyika ntshembo wa leswaku swikarhatu hinkwaswu leswi vanhu va kumanaka na swona lani misaveni, siku lin’wani swi ta hela naswona hi nga swi tshemba leswo.

I Mpsini Leswi U Nga Swi Yendlaka

Bibele li li: “Mi nga tshuki mi vilela hi swa mundzuku, hikusa siku la mundzuku li ta va ni mivilelo ya lona. Siku lin’wani ni lin’wani li ni swikarhatu swa lona.” — Matewu 6:34.

U nga karhateki hi swilo leswi nga ha yendlekaka mundzuku. U nga pfumeleli swaku ku karhateka hi swilo leswi nga ha yendlekaka ka nkama lowu taka swi ku yendla u tsandzeka ku yendla swilo leswi u faneleke u swi yendla swoswi.

Ku karhateka hintamu hi swilo swaku swi nga ha tshuka swi nga humeleli, swi to ku yengetela xitresi ni ku tlhela swi helisa ntshembo wa wena wa leswaku swilo swi ta yampsa ka nkama lowu taka.

I MPSINI LESWI U NGA SWI YENDLAKA — Leswi Nga Ku Pfunaka

PIMISA HI SWILO SWASWINENE

Bibele li li: “Munhu lweyi a hluphekaka, masiku ya yena hinkwawu a ma tsakisi, kambe lweyi mbilu ya yena yi nga tsaka a tshama na a tsakile.” (Swivuriso 15:15) Ku pimisa hi swilo swa ku biha minkama hinkwayu, swi nga yendla swaku u nga yi voni ndlela ya ku lulamisa swikarhatu leswi u kumanaka na swona. Kambe ku pimisa hi swilo swaswinene swi nga ku pfuna swaku u kota ku lwisana ni xiyimu xa ku karhata lexi u nga ka xona.

Pumba nkama lowu u wu hetaka na u sixtira kumbe ku yingisela mahungu.
Siku ni siku loko li chona pimisa hi swilo swimbirhi kumbe swinharhu swaswinene leswi nga yendleka hi siku lolelo.
Hamba lixta la mintirho leyi u nga ta yi yendla naswona ka lixta lolelo, tsala ntsena mintirho leyi u nga ta yi kota ku yi yendla hi siku lolelo. Yava mintirho yayikulu hi swintirhwani swaswitsongo, loko u yendla leswo, swi ta ku vevukela ku vona minzamu leyi u nga yi yendla hi siku lolelo.

U NGA TIHAMBANISI NI VAN’WANI

Bibele li li: “Lweyi a tihambanisaka ni van’wani . . . a yala wutlharhi hinkwalu.” (Swivuriso 18:1) Munhu lweyi a nga ka xikhele xa ku yenta a nge swi koti ku huma hi yexe, kambe loko a pfuniwa hi vanhu van’wani a nga swi kota.

Kombela ku pfuniwa hi ndjangu wa wena kumbe vanghanu.
Pimisa hi swilo swaswinene leswi wena u nga va yendlelaka swona vanhu van’wani. Phela loko u va yendlela swaswinene vanhu van’wani swi nga ku pfuna swaku u va ni mavonelo ya kahle hi swikarhatu swa wena.
Loko u heleliwe hi ntshembo naswona u pimisa swaku a swa ha pfuni nchumu ku tama u hanya, swi nga va kahle kuva u lavetela ku pfuniwa hi vadotori. Minkama yin’wani, kuva u titwa na u hele ntamu swi nga ha vula swaku ku ni mavabyi lawa u nga na wona, ya ku fana ni depressão. Vanhu van’wani va game va titwa kahle hileswi va nga ya lavetela ku pfuniwa hi vadotori.a

a A revhixta la Khindlimuka! a li vulavuli hi leswi u nga swi yendlaka swaku u daha mavabyi lawa.

Bibele Li Hi Nyika Ntshembo Wa Ku Tiya

Mupisalema a tshame a khongela ka Xikwembu a ku: “Rito la wena i livoni ka nenge wa mina, ni ku vonakala ka ndlela ya mina.” (Tipisalema 119:105) Vona swaku Rito la Xikwembu li fanisa ku yini ni livoni.

Loko ku li wusiku naswona ku mphumile, livoni li nga hi pfuna swaku hi vona lani hi kandzihaka kona. Hilani ku fanaka, Bibele li hi nyika switsundzuxu leswi hi pfunaka ku yendla swiboho swaswinene ka swiyimu swa ku karhata.

Livoni li nga tlhela li hi pfuna ku vona nchumu lowu nga kule. Hilani ku fanaka, Bibele la hi pfuna ku tiva leswi nga ta yendleka ka nkama lowu taka.

Bibele i buku la ku kwetsima leli hi byelaka leswi nga yendlekela vanhu ku sukela ku sunguleni, kambe a lo hi byela leswo ntsena, li tlhela li hi nyika ntshembo wa swilo leswi nga ta yendleka ka nkama lowu taka naswona li hlamula swivutiso leswi landzelaka:

Swi yendlekise ku yini?

Ku hlupheka ku sungulise ku yini? Bibele li li: “Leswi xidjoho xi nga nghena misaveni hi munhu mun’we, na lona lifu li nghenile hi mhaka ya xidjoho, se lifu li tlulele vanhu hinkwavu hikusa hinkwavu va djohile.” — Varoma 5:12.

Hi mhaka muni?

Hi mhaka muni vanhu va nga swi koti ku lulamisa swikarhatu swa lani misaveni? Bibele li li: “Munhu a nge swi koti ku tikongomisa.” (Yeremiya 10:23) Loko hi txuvuka leswi yendlekaka lani misaveni ho vhela hi swi vona swaku leswo i ntiyiso.

I mpsini?

I mpsini leswi Xikwembu xi nga ta swi yendla swaku xi helisa swikarhatu swa lani misaveni? Bibele li vula swaku: “[Xikwembu] xi ta limpa mihloti hinkwayu ka matihlo ya vona, lifu a li nga ha ta va kona, hambi nkosi, ku rila ni ku twa ku vava a swi nge he vi kona.” — Nhlawutelo 21:4.