Papila La Ntlawa Lowu Rhangelaka

Ka Vachumayeli Va Ku Rhandzeka Va Mahungu Ya Ku Tsakisa:

A hi ku tsakisa ka swona funtshi i nkateko ku gandzela Yehovha Xikwembu xa ntiyiso xikan’we! Hi “tirha xikan’we ni Xikwembu” ka ntirho wa ku chumayela ni wa ku djondzisa mahungu ya ku tsakisa ya Mfumu, ku nga ntirho wa ku kwetsima lowu nga ta ponisa wutomi la vanhu. (1 Ko. 3:9; Mat. 28:19, 20) Leswaku hi yendla ntirho lowu amisaveni hinkwayu hi ku rhula ni hi ku twanana, swi lava hi wu yendla hi ndlela yayinene ni hi nawu wa kona. — 1 Ko. 14:40.

A buku leli li ta ku pfuna kuva u twisisa leswi bandla la Wukreste li tirhisaka xiswona namuntlha. Li vulavula hi mintirho ya lisima ni leswi u faneleke u swi yendla hileswi u nga Mboni ya Yehovha. Loko u yi nyika lisima mintirho ya wena u tlhela u yendla ntirho wa wena u ta “tiyisiwa lipfumelo.” — Min. 16:4, 5; Gal. 6:5.

Hi mhaka leyo, ha ku kombela swaku u li djondza kahle buku leli. Yendla hinkwaswu leswi u nga swi kotaka akuva u swi tirhisa ka wutomi la wena leswi u swi djondzaka. Hi xikombiso, loko i li swaku wa ha ku sungula ku va muchumayeli wa ku kala a nga tsakamisiwanga, u nga yendla yini swaku u tsakamisiwa u va Mboni ya Yehovha? Se loko i li swaku se u tsakamisiwile, u nga yendla yini swaku u kulisa wunghanu la wena na Yehovha ni ku yengetela ntirho lowu u mu yendlelaka wona? (1 Tm. 4:15) U nga yendla yini akuva ku tama ku va ni ku rhula abandleni? (2 Ko. 13:11) Tinhlamulu ta swivutiso leswi u ta ti kuma nkama u lerhaka buku leli.

Loko u li wanuna lweyi a nga tsakamisiwa, u nga yendla yini swaku u va mupfunisi wa bandla naswona hi ku famba ka nkama u va doda? Leswi vanhu va vanyingi va yaka va nghena ka nhlengeletanu ya Xikwembu, ku laveka vavanuna lava fanelekaka swaku va rhangela ka bandla la Wukreste. A buku leli li ta ku pfuna ku vona leswi lavekaka ka lava va “lavaka” ku fikelela mintirho leyi. — 1 Tm. 3:1.

Hi khongelela leswaku buku leli li ku pfuna kuva u tiva ntirho wa wena ka nhlengeletanu ya Yehovha ni ku wu nyika lisima. Tiyisekani leswaku ha mi rhandza hinkwenu, naswona hi tama hi khongela swaku mi tama mi va ka lava va nga ta tsaka hi masiku ni masiku, na mi gandzela Yehovha Papayi wa hina wa matilweni. — Ps. 37:10, 11; Esa. 65:21-25.