Vachumayeli Va Mahungu Ya Ku Tsakisa

YEHOVHA a hi nyike N’wana wa yena Yesu Kreste leswaku a ta hi vekela xikombiso xaxinene lexi hi faneleke hi xi tekelela. (1 Pe. 2:21) Loko munhu a va mulandzeli wa Yesu a fanele a chumayela mahungu ya ku tsakisa naswona a va mutirheli wa Xikwembu. Yesu a kombise leswaku ku va mulandzeli wa yena swa pepisa. Yena a te: “Tanani ka mina, n’wina hinkwenu lava nga karhala ni lava tikeliwaka, ni ta mi pepisa. Tanani mi ta tirha na mina mi tlhela mi djondza ka mina, hikusa ni rhulile naswona ni ni mbilu ya ku tiveka hansi, kutani mi ta pepa.” (Mat. 11:28, 29) Xitshembiso lexi xa Yesu xi hetisekile ka hinkwavu lava va yamukelaka xirhambu lexi!

² Leswi Yesu a nga Mutirheli Wamukulu wa Xikwembu, a rhambe vanhu swaku va va valandzeli va yena. (Mat. 9:9; Yoh. 1:43) A va djondzise ku chumayela a tlhela a va rhuma swaku va ya chumayela ku fana na yena. (Mat. 10:1–11:1; 20:28; Luk. 4:43) Hi ku famba ka nkama, a rhume 70 wa valandzeli va yena van’wani swaku va ya chumayela mahungu ya ku tsakisa ya Mfumu wa Xikwembu. (Luk. 10:1, 8-11) Loko Yesu a rhuma vadjondzisiwa va yena a va byele leswi: “Lweyi a mi yingisaka na mina wa ni yingisa. Naswona lweyi a kalaka a nga mi yingisi na mina a nga ni yingisi. Funtshi lweyi a kalaka a nga ni yingisi a nga mu yingisi ni Lweyi a nga ni rhuma.” (Luk. 10:16) Hi mhaka leyo, Yesu a a kombisa swaku ntirho lowu a nga nyika vadjondzisiwa va yena a wu lava wutihlamuleli lalikulu hikusa a va ta nyimela Yesu ni Xikwembu lexi nga Henhlahenhla. Swi hi ku fana ka lava va yamukelaka xirhambu xa Yesu namuntlha lexi nge: “Tana u ta ni landzela.” (Luk. 18:22; 2 Ko. 2:17) Hinkwavu lava va yamukelaka xirhambu lexi xa Yesu va ni ntirho wa ku chumayela mahungu ya ku tsakisa ni ku djondzisa vanhu van’wani. — Mat. 24:14; 28:19, 20.

³ Loko hi yamukela xirhambu xa Yesu hi katekisiwa hi “ku tiva” Yehovha na Yesu Kreste. (Yoh. 17:3) Hi tlhela hi djondza ku tiva leswi hi nga swi yendlaka swaku hi mu tsakisa Yehovha. Naswona hi ku pfuniwa hi yena, ha swi kota ku txintxa mapimiselo ya hina ni ku yambala wumunhu la nyuwani, hi tlhela hi twananisa mahanyelo ya hina ni minawu ya Yena ya ku lulama. (Rom. 12:1, 2; Efe. 4:22-24; Kol. 3:9, 10) Leswi hi swi tlangelaka swinene hinkwaswu leswi a nga hi yendlela swona Yehovha, hi nyiketele wutomi la hina ka Yena hi tlhela hi swi kombisa leswo hi ku tsakamisiwa ka mati. Phela loko hi tsakamisiwa, na hina hi kombisa swaku hi langiwile leswaku hi va vatirheli va Yehovha.

⁴ Hi nga rivali swaku ntirho wa hina ka Xikwembu wu fanele wu yendliwa hi mavoko ya ku kala ma nga na nandzu ni hi mbilu ya ku basa. (Ps. 24:3, 4; Esa. 52:11; 2 Ko. 6:14–7:1) Lipfumelo la hina ka Yesu Kreste li hi pfumelela ku va ni lipfalu la ku basa. (Heb. 10:19-23, 35, 36; Nhl. 7:9, 10, 14) Mupostolo Pawulo a pfune Vakreste akuva va yendla hinkwaswu swaku va dzunisa Xikwembu leswaku va nga wisi vanhu van’wani. Mupostolo Pedru a kombise lisima la ku va ni mahanyelo lamanene swaku hi koka van’wani swaku va ta ka ntiyiso. (1 Ko. 10:31, 33; 1 Pe. 3:1) U nga yendla yini swaku u pfuna van’wani swaku va va vachumayeli va mahungu ya ku tsakisa?

VACHUMAYELI VA NYUWANI

⁵ Loko hi sungula ku djondza Bibele ni munhu lweyi a tsakelaka, na to ho suka hi fanele hi mu byela swaku a chumayela vanhu leswi a swi djondzaka. A nga ha chumayela maxaka ya yena, vanghanu, lava a tirhaka na vona kumbe vanhu van’wani. Phela ku yendla leswo i swa lisima swinene ka lava hi djondzaka na vona Bibele leswaku va va valandzeli va Yesu Kreste tanihi vachumayeli va mahungu ya ku tsakisa. (Mat. 9:9; Luk. 6:40) Loko munhu lweyi hi djondzaka na yena Bibele a ya a yendla nhluvuku a tlhela a swi kota ku chumayela vanhu van’wani swa kola na kola, a ta swi navela ku va kona ka ntirho wa ku chumayela mahungu ya ku tsakisa ni bandla.

LESWI LAVEKAKA SWAKU MUNHU A VA MUCHUMAYELI

⁶ Na u nge se rhamba munhu swaku a famba na wena ka ntirho wa ku chumayela hi munti ni munti hi khambi la ku sungula, ku ni leswi u faneleke u tiyiseka swaku munhu lweyi wa swi hetisisa. Lweyi a fambaka na hina ka ntirho wa ku chumayela a tiviwa hi vanhu va vanyingi swaku i Mboni ya Yehovha. Hi mhaka leyo a voniwa na a li munhu lweyi a hanyaka hi minawu ya ku lulama ya Yehovha naswona a nga va muchumayeli wa ku kala a nga tsakamisiwanga.

⁷ Loko u djondza ni munhu Bibele, u djondza na yena hi matshinya ya minawu ya Bibele, se swi nga yendleka u sungula ku mu tiva ku yampsa. U nga ha vona leswaku se a hanya hi ku pfumelelana ni leswi a swi djondzaka. Kambe ku ni timhaka tin’wani leti khumbaka wutomi la yena leti madoda ma nga ta navela ku bula na yena hi tona na wena wu li kona.

⁸ Mutlhanganisi wa ntlawa wa madoda a ta kombela madoda mambirhi (mun’we wa wona a fanele a va wa comissão la ntirho wa bandla) swaku ma bula hi timhaka leti na wena ni munhu lweyi u djondzaka na yena Bibele. Ka mabandla lawa ku nga ni madoda yamatsongo, doda lin’we ni mupfunisi wa bandla lweyi a fanelekaka va nga wu yendla ntirho lowu. Vamakwerhu lava va nga langiwa swaku va yendla ntirho lowu va fanele va yendla minzamu swaku va wu yendla hi ku hantlisa. Hi xikombiso, loko va byeliwa na va li mintlhanganwini swaku ku ni munhu lweyi a lavaka ku va muchumayeli wa ku kala a nga tsakamisiwanga, swi nga yendleka va bula na wena ni munhu lweyi u djondzaka na yena Bibele loko mintlhanganu yi helile. Mabulu wolawo va fanele va ma yendla na va rhulile. Na munhu lweyi u djondzaka na yena Bibele a nge se pfumeleliwa swaku a va muchumayeli wa ku kala a nga tsakamisiwanga, madoda ma fanele ma tiyiseka swaku:

1. 1) Wa pfumela leswaku a Bibele i Rito la Xikwembu. — 2 Tm. 3:16.

2. 2) Wa ti tiva tidjondzo ta lisima ta Bibele naswona wa kholwa ka tona lakakuva loko o yendliwa swivutiso hi tona, a ta hlamula hi ku ya hi leswi Bibele li swi vulaka ku nga li hi ku ya hi tidjondzo ta wukhongeli la mavunhwa kumbe hi ku ya hi mavonelo ya yena. — Mat. 7:21-23; 2 Tm. 2:15.

3. 3) Wa wu yingisa nawu wa Bibele wa ku tlhangana ni vanhu va Yehovha ka mintlhanganu ya bandla loko swiyimu swa yena swi mu pfumelela. — Ps. 122:1; Heb. 10:24, 25.

4. 4) Wa swi twisisa leswi Bibele li swi djondzisaka hi swa wuntunga la swa masangu, ku patsa ni ku mbuyeta, ku teka vavasati va vanyingi kumbe ku tekiwa hi vavanuna vanyingi, ku famba masangu ka wanuna ni wanuna kumbe wansati ni wansati, naswona a hanya hi ku ya hi tidjondzo toleto ta Bibele. Loko wanuna ni wansati lava va kalaka va nga li maxaka va tshama xikan’we naswona va famba masangu xikan’we va fanele na va chadile hi ku ya hi nawu. — Mat. 19:9; 1 Ko. 6:9, 10; 1 Tm. 3:2, 12; Heb. 13:4.

5. 5) Wa wu yingisa nawu wa Bibele lowu wu tsimbisaka ku dakwa naswona a nga tirhisi minchumu yin’wani leyi nga yendlaka swaku a va vhisiyadu, ya ku fana ni masigari kumbe swin’wani na a nga rhumiwanga hi dotori. — 2 Ko. 7:1; Efe. 5:18; 1 Pe. 4:3, 4.

6. 6) Wa li vona lisima la ku fambela kule ni vanghanu va ku biha. — 1 Ko. 15:33.

7. 7) A nga ha lumbi wukhongeli la mavunhwa naswona a tshike ku ya ka mintlhanganu ya wukhongeli lolelo funtshi a nga ha li seketeli. — 2 Ko. 6:14-18; Nhl. 18:4.

8. 8) A nga ha ngheni ka timhaka ta politika. — Yoh. 6:15; 15:19; Yak. 1:27.

9. 9) A nga ngheni ka maguwa ya misava naswona a nga tingheniseli ka tinyimpi ta tiko kumbe swilo leswi fambisanaka ni tinyimpi. — Esa. 2:4.

10. 10) Wa swi lava hi mbilu hinkwayu ku va Mboni ya Yehovha. — Ps. 110:3.

⁹ Loko madoda ma nga tiyiseki hi leswi munhu lweyi u djondzaka na yena Bibele a swi pimisaka hi tipontu tin’wani leti va nga bula na yena hi tona swi nga yendleka swi lava ku va madoda ma tirhisa tindzimana tin’wani ta Bibele leti ti nga kombisiwa lani. I swa lisima hintamu akuva munhu lweyi u djondzaka na yena Bibele a swi twisisa swaku a ku va kona ka ntirho wa ku chumayela ni Timboni ta Yehovha swi lava a hanya hi ku ya hi leswi a nga swi djondza ka Matsalwa. Tinhlamulu ta yena ti ta pfuna madoda akuva ma vona swaku munhu lweyi wa faneleka kumbe a nga faneleki kuva a sungula ku va kona ka ntirho wa ku chumayela naswona wa swi tiva leswi lavekaka ka yena.

¹⁰ Handle ka ku heta nkama, madoda ma fanele ma byela munhu lweyi a kambeliwaka swaku wa faneleka. Minkama ya yinyingi va nga yendla leswo loko va gamile ku bula na yena. Loko a faneleka, madoda ma fanele ma mu byela leswaku ma tsakile swinene naswona ma mu hoyozela hi mandla mambirhi tanihi muchumayeli wa nyuwani wa bandla. (Rom. 15:7) Ma fanele ma mu byela leswaku a fanele a sungula ku ya nsin’wini hi ku hantlisa ni leswaku a fanele a nyikela mawora ya yena a ku heleni ka wheti. Madoda ma nga mu tlhamusela leswaku loko munhu a pfumeleliwa ku va muchumayeli wa ku kala a nga tsakamisiwanga, naswona a nyikela ntirho wa yena wa ku sungula ku chumayela, ku pfuliwa a cartão la vachumayeli abandleni hi vito la yena li tlhela li hlayisiwa ka arkivhu la bandla. Madoda ma yendla leswo leswaku nhlengeletanu yi swi kota ku hlayisa ni ku fambisa mintirho ya Timboni ta Yehovha amisaveni hinkwayu ni leswaku muchumayeli a ta swi kota ku yendla mintirho ni bandla a tlhela a pfuniwa loko swi laveka. Handle ka leswo, madoda ma fanele ma khumbukisa vachumayeli va nyuwani swaku mavito ya vona ni swin’wani swi ta tirhisiwa hi ku fambisana ni Minawu ya Hina ya Xihundla aMisaveni Hinkwayu ka Matirhiselo Ya Mavito ni Maenderesu ya Munhu leyi nga ka jw.org.

¹¹ Ku mu tiva kahle muchumayeli wa nyuwani ni ku kombisa ku tlangela hi ntirho lowu a wu yendlaka swi nga mu pfuna hintamu. Funtshi swi nga mu pfuna akuva a nyikela relatoriyu la ntirho wheti ni wheti ni ku tikarhatela ku tirhela Yehovha. — Filp. 2:4; Heb. 13:2.

¹² Loko madoda ma pfumelela leswaku munhu a va muchumayeli wa mahungu ya ku tsakisa, ma nga mu nyika buku leli nge: Nhlengeletanu Leyi Yendlaka Ku Rhandza ka Yehovha. Loko se a nyikelile relatoriyu la yena la ku sungula la nsimu, ku ta nyikeliwa xitiviso xa ku goma abandleni xa leswaku yena se i muchumayeli wa ku kala a nga tsakamisiwanga.

PFUNA VANA

¹³ Vana na vona va nga faneleka ku va vachumayeli va mahungu ya ku tsakisa. Yesu a yamukele vana a tlhela a va katekisa. (Mat. 19:13-15; 21:15, 16) Hambileswi vapsali ku nga vona va nga nyikiwa ntirho wa ku kulisa vana, van’wani bandleni swi nga yendleka va swi lava ku pfuna vana lava va swi lavaka hintamu ku va kona ka ntirho wa ku chumayela mahungu ya Mfumu. Loko u li papayi kumbe mamani, xikombiso xa wena ka ntirho wa ku chumayela xi nga va pfuna hintamu vana va wena swaku va hisekela ku tirhela Xikwembu. Loko n’wana lweyi a nga ni mahanyelo yamanene a swi lava hi mbilu hinkwayu ku kombisa lipfumelo la yena ka van’wani hi ku va chumayela, i yini leswi u nga swi yendlaka swaku u mu pfuna?

¹⁴ Papayi kumbe mamani a nga lavetela madoda ya Comissão la Ntirho wa Bandla leswaku ma ta bula na yena leswaku n’wana wa yena se a swi lunghekelile ku va muchumayeli. Mutlhanganisi wa ntlawa wa madoda a ta langa madoda mambirhi (lin’we li fanele li va la comissão la ntirho wa bandla) leswaku ma tlhangana ni n’wana yelweyo ni vapsali lava va nga Vakreste (kumbe mupsali mun’we) kumbe munhu mun’wani lweyi a hlayisaka n’wana lweyo. Loko n’wana se a ni wutivi la tidjondzo leti nga ka Bibele naswona a swi kombisa swaku wa swi lava ku chumayela mahungu ya ku tsakisa, leswo swi ta kombisa swaku se a yendle nhluvuku wa kahle. Loko madoda se ma bulile hi timhaka leto, ni timhaka tin’wani leti minkama ya yinyingi ti kambisisiwaka ni vanhu vavakulu, madoda ma nga boha swaku n’wana yelweyo a nga va muchumayeli wa ku kala a nga tsakamisiwanga. (Luk. 6:45; Rom. 10:10) Loko ma bula ni n’wana a swi bohi leswaku ma bula hi timhaka tin’wani leti kambisisiwaka ni vanhu vavakulu leti ti kalaka ti nga khumbi n’wana.

¹⁵ Na va ha li ka ntlhanganu wolowo, madoda ma fanele ma tlangela n’wana yelweyo hi nhluvuku lowu a wu yendlaka ma tlhela ma mu kutxa kuva a navela ku tsakamisiwa. Leswi vapsali na vona va nga tikarhatela ku djondzisa ntiyiso n’wana lweyo na vona va fanele va tlangeliwa. Leswaku vapsali va tama va pfuna n’wana lweyo, madoda ma fanele ma kutxa vapsali ku lerha mhaka leyi nge: “Mhaka leyi yi tsaleliwaka Vapsali Lava Nga Vakreste” leyi kumekaka ka mapajina 179-181 ka buku leli.

KU TINYIKETELA NI KU TSAKAMISIWA

¹⁶ Loko se u tiva Yehovha u tlhela u mu rhandza ni ku hanya hi minawu ya yena u tlhela u chumayela mahungu ya ku tsakisa, u fanele u tama u tiyisa wunghanu la wena na yena. U nga swi yendlisa ku yini leswo? Hi ku tinyiketela ka yena u tlhela u kombisa ku tinyiketela ka wena hi ku tsakamisiwa ka mati. — Mat. 28:19, 20.

¹⁷ Ku tinyiketela swi vula ku tihambanisa ni minchumu ya ku karhi leswaku u tirhela Xikwembu. Leswaku u tinyiketela ka Xikwembu swi lava u yendla xikhongelo na u tshembisa swaku u ta xi tirhela hi mbilu ya wena hinkwayu, wutomi la wena hinkwalu ni ku tlhela u hanya hi minawu ya xona. Leswo swi vula swaku u ta gandzela xona ntsena hi masiku ni masiku. (Det. 5:9) Lexi i xiboho xa wena n’winyi. A ku na munhu lweyi a nga ku yendlelaka xona.

¹⁸ Kambe, ku byela Yehovha hi xikhongelo swaku u lava ku mu tirhela a swi xegi. U fanele u kombisa ka van’wani swaku u tinyiketelile ka Xikwembu. U nga yendla leswo hi ku tsakamisiwa ka mati ku fana ni leswi Yesu Kreste a nga swi yendla. (1 Pe. 2:21; 3:21) U fanele u yendla yini loko se u yendle xiboho xa ku tirhela Yehovha naswona u lava ku tsakamisiwa? U fanele u byela mutlhanganisi wa ntlawa wa madoda se yena a ta langa madoda swaku ma bula na wena akuva ku tiyisekiwa swaku u hanya hi ku pfumelelana ni leswi Xikwembu xi swi lavaka ka lava va lavaka ku tsakamisiwa. Leswaku u kuma swin’wani hi kombela u vona nhlokomhaka leyi nge: “Mhaka Leyi Tsaleliwaka Muchumayeli wa Ku Kala A Nga Tsakamisiwanga,” leyi kumekaka ka mapajina 182-184 ka buku leli, ni “Swivutiso Leswi Yaka ka Lava Lavaka Ku Tsakamisiwa” ka mapajina 185-207.

RELATORIYU LA KU KULA KA NTIRHO WA KU CHUMAYELA

¹⁹ Ku sukela khale marelatoriyu lama kombisaka ku kula ka wugandzeli la ntiyiso amisaveni hinkwayu ma va tiyisa hintamu vanhu va Yehovha. Ku sukela loko Yesu Kreste a byele vadjondzisiwa va yena swaku mahungu ya ku tsakisa a ma ta chumayeliwa amisaveni hinkwayu, Vakreste va ntiyiso a va swi lava hintamu ku tiva swaku ntirho lowu a wu ta yendlisiwa ku yini. — Mat. 28:19, 20; Mar. 13:10; Min. 1:8.

²⁰ Valandzeli va Yesu va ku sungula a va swi rhandza swinene ku twa hi ta ku kula ka ntirho wa ku chumayela. (Mar. 6:30) Buku la Mintirho li hi byela leswaku a ku ni kolomuyani ka 120 wa vadjondzisiwa nkama ku nga chululiwa moya wa ku kwetsima ka vadjondzisiwa hi Pentekoxta wa 33 E.C. Hi ku hantlisa a numeru ya vadjondzisiwa yi kule swinene yi ya fika kolomuyani ka 3.000 naswona hi ku famba ka nkama yi fike kolomuyani ka 5.000. Ku vuliwe leswaku “siku ni siku Yehovha a tame a va tisela vanhu lava a a ta va ponisa swaku va va vadjondzisiwa” ni leswaku “vaprista va vanyingi va sungule ku va vapfumeli.” (Min. 1:15; 2:5-11, 41, 47; 4:4; 6:7) Phela mahungu wolawo ya ku tsakisa ma va tiyise swinene vadjondzisiwa! Mahungu wolawo ya ku tsakisa ma yendle leswaku vadjondzisiwa va tama va wu yendla kahle ntirho lowu Xikwembu xi nga va nyika wona wa ku chumayela, ku nga na mhaka swaku a va xanisiwa swinene hi varhangeli va wukhongeli la Xiyuda!

²¹ Kolomuyani ka malembe ya 60-61 E.C., ka karta leli Pawulo a nga li tsalela Vakolosa a vule swaku mahungu ya ku tsakisa a ma ta ‘tala ma tlhela ma fikelela vanhu hinkwavu’ funtshi ‘a ma chumayeliwa ka vanhu hinkwavu lani amisaveni.’ (Kol. 1:5, 6, 23) Vakreste va ku sungula a va yingisa Rito la Xikwembu naswona moya wa ku kwetsima a wu va nyike matimba ya ku yendla swa swinyingi ka ntirho wa ku chumayela na doropa la Yerusalema li nga se helisiwa hi lembe la 70 E.C. A swi tsakisa hintamu ka Vakreste va ku tshembeka ku twa marelatoriyu ya ntirho lowu a wu yendliwa!

²² Hilani ku fanaka, nhlengeletanu ya Yehovha namuntlha yi yendla hinkwaswu swaku yi hlayisa marelatoriyu ya ku tsakisa mayelana ni ntirho wa ku chumayela lowu yendliwaka leswaku ku hetiseka Matewu 24:14, leyi nge: “Mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu, kutani hi kona magamu ma nga ta fika.” Leswi hi nga vatirheli lava va nga tinyiketela ka Xikwembu, hi ni ntirho wa xihantla lowu hi faneleke hi wu yendla. Hi fanele hi yendla hinkwaswu leswi hi nga swi kotaka leswaku ntirho wa ku chumayela wu yendliwa hi ku helela na magamu ma nge se fika. Yehovha a ta yendla leswaku ntirho lowu wu hetiwa, hi mhaka leyo loko hi hlangamela ka wona Yehovha a ta hi yamukela. — Eze. 3:18-21.

RELATORIYU LA NTIRHO WA NSIMU

²³ Kasi hi fanele hi tsala yini ka relatoriyu leli? Xipapelana lexi nge: Relatório de Serviço de Campo lexi hi nyikiwaka xona hi nhlengeletanu xi kombisa leswi hi faneleke hi swi tsala. Kambe tintlhamuselo leti landzelaka ti nga ku pfuna.

²⁴ Lani ku nga tsaliwa leswi: “Publicações (impressas e eletrónicas),” tsala mabuku ya ku imprimiriwa kumbe ya eletroniku lawa u nga nyika munhu kumbe u nga posela munhu lweyi a kalaka a nga li Mboni ya Yehovha leyi nga tsakamisiwa. Se lani ku nge “Vídeos mostrados,” tsala makhambi lawa u nga komba munhu mavhidiyo.

²⁵ Lani ku nga tsaliwa swaku “Revisitas,” tsala makhambi hinkwawu lawa u nga yendzela munhu lweyi a kalaka a nga li Mboni ya Yehovha ya ku tsakamisiwa na wu lava ku mu pfuna swaku a tama a tsakela. Revhizita li nga yendliwa hi ku bula ni munhu, ku mu tsalela karta, ku mu fonela, ku mu tsalela mensaji, ku mu tsalela e-mail kumbe hi ku mu nyika lin’we la mabuku ya hina. Makhambi hinkwawu lawa u yaka u ya djondza ni munhu Bibele, u nga konta revhizita. Papayi (kumbe mamani) lweyi a fambisaka wugandzeli la ndjangu, a nga konta revhizita vhiki ni vhiki loko mun’we wa vana va yena lweyi a kalaka a nga tsakamisiwanga a li kona.

²⁶ Hambileswi hi ntolovelo djondzo ya Bibele yi fambisiwaka kan’we hi vhiki, yi fanele yi kontiwa tanihi xidjondzo xin’we a ku heleni ka wheti. Vachumayeli va fanele va tsala numeru ya swidjondzo swa Bibele swa ku hambanahambana leswi va nga swi fambisa wheti yoleyo. Swidjondzo swa Bibele leswi swi nga tsaliwaka, swi nga patsa vanhu lava kalaka va nga li Timboni ta Yehovha, lava va nga tsakamisiwa ku patsa ni lava va ha ku tsakamisiwaka lava kalaka va nge se heta ku djondza buku leli nge: Tikhorisi Hi Wutomi La Ku Kala Li Nga Heli, naswona ku nga tlhela ku kontiwa xidjondzo ka makwerhu lweyi a nga hola hi ku landza nkongomiso wa doda lin’we leli li lumbaka comissão la ntirho wa bandla.

²⁷ I swa lisima hintamu ku ma konta kahle mawora lawa hi ma hetaka na hi chumayela, lawa hi ma tsalaka lani ku nge: “Horas.” Hikusa mawora lawa i nkama lowu hi wu hetaka na hi chumayela hi munti ni munti, ku yendla marevhizita, ku fambisa swidjondzo swa Bibele kumbe loko hi chumayela ka tindhawu tin’wani leti ku kalaka ku nga na Timboni ta Yehovha leti nga tsakamisiwa. Loko vachumayeli vambirhi va tirha xikan’we, havambirhi va nga konta mawora lawa va ma hetaka. Kambe mun’wani ni mun’wani a ta konta marevhizita ya yena ni swidjondzo swa yena ntsena. Vapsali va nga konta wora lin’we leli va li hetaka ka wusiku la Wugandzeli la Ndjangu. Vamakwerhu va xinuna va nga tsala mawora lawa va ma hetaka nkama va vekaka dixkursu hi ku hela ka vhiki. Loko makwerhu a tirha tanihi muhundzuluxeli wa dixkursu, na yena a nga tsala mawora lawa a ma hetaka. Ku ni mintirho yin’wani ya lisima leyi hi kalaka hi nga konti nkama lowu hi wu hetaka, ya ku fana ni ku tilunghiselela leswaku hi ya nsin’wini, ku va ka ntlhanganu wa ntirho wa nsimu kumbe loko hi yendla mintirho yin’wani.

²⁸ Muchumayeli mun’wani ni mun’wani a fanele a landza lipfalu la yena li nga djondzisiwa hi Bibele loko a konta nkama lowu a nga wu heta ka ntirho wa ku chumayela. Vachumayeli van’wani va nga ha chumayela ka tindhawu leti ku nga ni vanhu va vanyingi, kasi van’wani va nga ha chumayela lomu vanhu va kona va nga vatsongo naswona swi lavaka swaku va famba mpfhuka wa ku leha. Tindhawu ta ku chumayela ka tona a ti fani; naswona vachumayeli va ni mavonelo ya ku hambanahambana ya ndlela ya ku konta mawora lawa va ma hetaka na va li ka ntirho wa ku chumayela. Vamakwerhu va Ntlawa Lowu Rhangelaka a va sindzisi mabandla leswaku ma landza leswi lipfalu la vona li va byelaka swona hi ku konta mawora, naswona a ku na munhu lweyi a nga ni mfanelo ya ku veka minawu ka mhaka ya ku konta mawora. — Mat. 6:1; 7:1; 1 Tm. 1:5.

²⁹ Nkama lowu hi wu hetaka na hi chumayela mahungu ya ku tsakisa wu fanele wu nyikeliwa hi mawora ya ku helela. Munhu a nga nyikela nkama lowu a wu hetaka na a chumayela hambiloko wu nga fiki wora lin’we hi mhaka ya leswi a nga guga kumbe hi mhaka ya leswi a kalaka a nga swi koti ku huma kaya kumbe hileswi a tshamaka ka ndhawu leyi ku hlayisiwaka va ku guga, kumbe lava va nga limala. Muchumayeli yelweyo a nga ha nyikela 15 minutu. Phela hambiloko o yo tirha 15 minutu ntsena, a nga wu nyikela ntirho wa yena naswona a ta voniwa na a li muchumayeli wa mahungu ya ku tsakisa wa nkama hinkwawu. Lulamiselo leli li nga ha tlhela li tirhisiwa hi muchumayeli lweyi a kalaka a nga swi koti ku huma kaya ku ringana wheti yin’we kumbe timbirhi hi mhaka ya leswi a vabyaka, kumbe hileswi a nga humeleliwa hi nghozi. Lulamiselo leli li tirha ntsena ka vanhu lava kalaka va nga swi koti hikakunene ku yendla swa swinyingi ka ntirho wa ku chumayela. A comissão la ntirho wa bandla, hi lona li nga pfumelelaka swaku munhu a vuyeliwa hi lunghiselelo leli.

CARTÃO DE REGISTO DE PUBLICADOR DE CONGREGAÇÃO

³⁰ Leswi u swi yendlaka ka ntirho wa ku chumayela wheti ni wheti swi tsaliwa ka Cartão De Registo De Publicador De Congregação. Leswi swi tsaliwaka ka cartão leli swi lumba bandla. Loko u lava ku txintxa bandla u ya ka lin’wani, tivisa madoda ya bandla la wena. Sekretariyu a ta tiyiseka hi ku rhumela cartão la wena ka bandla la nyuwani. Hi ndlela leyo madoda ma ta kota ku ku yamukela hi ndlela yayinene, ma tlhela ma ku pfuna swaku u va ni wunghanu lalinene ni Xikwembu. Loko u yendza hi nkama lowu kalaka wu nga hundzi tiwheti tinharhu, tama u rhumela relatoriyu la ntirho wa ku chumayela ka bandla leli u sukaka ka lona.

HI MHAKA MUNI HI NYIKELA RELATORIYU LA NTIRHO WA HINA WA NSIMU?

³¹ Indjhe minkama yin’wani ha tshuka hi khohlwa ku nyikela relatoriyu la ntirho wa hina wa nsimu? Handle ka ku kanakana hinkwerhu hi lava ku khumbukisiwa minkama yin’wani. Kambe loko hi twisisa swaku hi mhaka muni relatoriyu la ntirho wa nsimu li laveka ni swaku hi mhaka muni li li la lisima swi ta hi vevukela ku khumbuka ku nyikela relatoriyu la ntirho wa hina wa nsimu hi nkama.

³² Van’wani va nga ha tivutisa leswi: “Leswi Yehovha a swi tivaka leswi ni swi yendlaka ka ntirho wa yena, hi mhaka muni ni fanele ni nyikela relatoriyu abandleni?” I ntiyiso swaku Yehovha wa swi tiva leswi hi swi yendlaka, funtshi wa swi tiva loko ntirho lowu hi wu yendla na swi suka mbilwini kumbe loko hi wu yendla hi ku hetisisa nawu ntsena. Kambe khumbuka swaku Yehovha a tsale numeru ya masiku lawa Nowa a nga ma heta ka ngalava a tlhele a tsala hi malembe lawa Vayisrayele va nga ma heta na va famba amananga. Xikwembu xi tlhele xi tsala numeru ya vanhu va ku tshembeka ni ya vanhu va ku kala va nga tshembekanga. Xi tlhele xi tsala hi ku hluliwa ka Kanana ni leswi vayavanyisi va nga swi yendlela tiko la Israyele. Leswi swi kombisa leswaku Xikwembu xa yi tiva mintirho hinkwayu leyi vanhu va xona va yi yendlaka. Xi yendle leswaku timhaka hinkwatu leti ti tsaliwa leswaku hi vona swaku i swa lisima ku tsala marelatoriyu ya ntiyiso ya leswi hi nga swi yendla.

³³ Swilo leswi swi nga yendleka khale leswi swi nga tsaliwa ka Bibele, swi kombisa ku tshembeka ka marelatoriyu ni swilo leswi swi nga tsaliwa mayelana ni vanhu va Xikwembu. Timhaka tinyingi leti ti nga tsaliwa ka Bibele a swi nga ta koteka swaku ti khumba mbilu loko a ku nga tsaliwanga tinumeru ta swilo swa kona. Vona swikombiso ka: Genesa 46:27; Eksoda 12:37; Vayavanyisi 7:7; 2 Tihosi 19:35; 2 Tikronika 14:9-13; Yohani 6:10; 21:11; Mintirho 2:41; 19:19.

³⁴ I ntiyiso swaku ka marelatoriyu ya hina a hi hinkwaswu leswi hi swi tsalaka leswi hi swi yendlaka ka wugandzeli la hina, kambe marelatoriyu i ya lisima hikusa ma pfuna ka nhlengeletanu ya Yehovha. A nkama vapostolo va nga vuya hi ka ntirho wa ku chumayela, va fike va byela Yesu “hinkwaswu leswi va nga swi yendla ni leswi va nga swi djondzisa.” (Mar. 6:30) Minkama yin’wani, marelatoriyu ma nga kombisa leswi hi faneleke hi swi yampsisa ka ntirho wa hina wa ku chumayela. Tinumeru leti hi ti tsalaka ka relatoriyu ti nga kombisa swaku hi yendle nhluvuku ka yini, naswona ti nga hi pfuna ku vona swaku a numeru ya vachumayeli yi khwelile kumbe yi xikile. Swi nga yendleka swi lava hi pfuniwa kumbe ku ni xikarhatu lexi lavaka ku lulamisiwa. Vamakwerhu lava va rhangelaka va ta kambisisa relatoriyu va gama va vona leswi va nga swi yendlaka swaku va lulamisa xikarhatu lexi nga vaka kona ka muchumayeli ha mun’we kumbe ka bandla hinkwalu.

³⁵ Marelatoriyu ma tlhela ma pfuna nhlengeletanu akuva yi tiva lomu ku nga ni xilaveko xaxikulu xa vatirhi ansin’wini yi tlhela yi tiva tindhawu leti nhluvuku wu nga wukulu ni lomu nhluvuku wu nga wutsongo. Va tiva mabuku lama ma lavekaka swaku ma pfuna vanhu akuva va twisisa ntiyiso. Marelatoriyu ma tlhela ma pfuna nhlengeletanu leswaku yi tiva mabuku lawa ma lavekaka swaku ma pfuna vanhu ni leswaku ntirho wa ku chumayela wu yendliwa amisaveni hinkwayu. Leswo swi va pfuna kuva va tilunghiselela leswaku mabuku wolawo ma nga ha pfumaleki.

³⁶ Ka hina, marelatoriyu ma hi tiyisa hintamu. Hi tsaka hintamu hi ku tiva swaku vamakwerhu va hina amisaveni hinkwayu va yendla swa swinyingi ka ntirho wa ku chumayela mahungu ya ku tsakisa. Marelatoriyu ma hi pfuna swaku hi swi vona swaku nhlengeletanu ya Yehovha yi ya yi kula. Swiperiyensiya swa vamakwerhu va hina swa hi tsakisa swi tlhela swi hi tiyisa ni ku hi yendla hi lava ku yendla swa swinyingi ka ntirho wa ku chumayela. (Min. 15:3) Ku nyikela relatoriyu la hina la ntirho wa ku chumayela i swa lisima hikusa swi kombisa swaku hi ni mhaka ni vamakwerhu amisaveni hinkwayu. Hi ndlela yoleyo, hi kombisa swaku hi tiveka hansi ka nhlengeletanu ya Yehovha. — Luk. 16:10; Heb. 13:17.

KU TIVEKELA MINTIRHO LEYI HI LAVAKA KU YI YENDLELA YEHOVHA

³⁷ Phela a ku na xivangelo xa ku hi ringanisa a ntirho wa hina wa nsimu ni wa van’wani. (Gal. 5:26; 6:4) A swiyimu swa vanhu a swi fani. Hi nga pfuneka swinene hi kuva hi tivekela mintirho leyi hi lavaka ku yi yendlela Yehovha leyi hi nga ta yi kota ku yi fikelela. Ku yendla leswo swi ta hi pfuna ku kambela nhluvuku lowu hi nga wu yendla ka ntirho wa hina wa ku chumayela. Phela ku fikelela mintirho leyi hi nga tivekisela yona swi nga yendla leswaku hi tsaka hi ntirho wa hina.

³⁸ Ha tiyiseka leswaku Yehovha a hantlisela ku hlengeleta vanhu lava va nga ta pona ka “nhlomulu wawukulu.” Hi hanya ka nkama lowu ku hetisekaka wuprofeta la Esaya leli nge: “Lweyi wamutsongo a ta va 1.000, kasi lweyi wamutsongo hintamu a ta va tiko la matimba. Mina Yehovha, ni ta swi hantlisisa hi nkama wa kona.” (Nhl. 7:9, 14; Esa. 60:22) Swi tsakisa hintamu ku chumayela ka masiku lawa ya wugamu! — Mat. 24:14.