Tindlela Ta Ku Chumayela Mahungu Ya Ku Tsakisa

LESWI Yesu a a li muchumayeli wa ku hiseka wa mahungu ya ku tsakisa, a va vekele xikombiso vadjondzisiwa va yena. A a ya lomu vanhu a va kumeka kona a ya va chumayela a tlhela a va djondzisa amakaya ni lomu ku nga tala hi vanhu. (Mat. 9:35; 13:36; Luk. 8:1) Yesu a nga yo djondzisa vanhu tanihi ntlawa ntsena, kambe a a tlhela a djondzisa hi mun’we hi mun’we ni ku djondzisa vadjondzisiwa va yena na va li voxe. (Mar. 4:10-13; 6:35-44; Yoh. 3:2-21) A a londzovota nkama wun’wani ni wun’wani swaku a tiyisa vanhu a tlhela a va nyika ntshembo. (Luk. 4:16-19) Hambi hi minkama leyi a a lava ku humula a tlhela a beliwa hi moya, a nga tshikanga ku chumayela loko a pfulekeliwa hi nkama. (Mar. 6:30-34; Yoh. 4:4-34) Loko hi lerha hi ntirho wa ku chumayela lowu Yesu a nga wu yendla nkama lowu na a li lani misaveni, swi hi yendla hi lava ku mu tekelela hilani vapostolo va nga yendla hi kona. — Mat. 4:19, 20; Luk. 5:27, 28; Yoh. 1:43-45.

² A hi buleni hi mukhandlu lowu Vakreste va nga na wona namuntlha wa ku yendla ntirho lowu Yesu a nga wu sungula kolomuyani ka 2.000 wa malembe lawa ma nga hundza.

KU CHUMAYELA HI MUNTI NI MUNTI

³ Tanihi Timboni ta Yehovha hi swi teka swi li swa lisima swinene ku chumayela mahungu ya ku tsakisa hi ndlela yayinene hi munti ni munti. Phela ndlela leyi ya ku chumayela hi yi tirhisa ngopfu swinene naswona amisaveni hinkwayu va hi tiva hi ku chumayela hi ndlela leyi. Leswi vanhu va vanyingi va nga yamukela ntiyiso hi ku tirhisa machumayelelo lawa, swi kombisa leswaku i ndlela ya wutlharhi ya ku chumayela. (Mat. 11:19; 24:14) Phela ku chumayela hi munti ni munti i ndlela yin’wani ya ku kombisa swaku ha mu rhandza Yehovha ni vanhu van’wani. — Mat. 22:34-40.

⁴ Ku chumayela hi munti ni munti a swi sunguliwanga namuntlha hi Timboni ta Yehovha. Mupostolo Pawulo a vule swaku na yena a a djondzisa vanhu amakaya ya vona. Loko a vulavula ni madoda ya Efeza hi ntirho wa yena a te: “Ku sukela siku la ku sungula leli ni nga nghena ka provhinsiya la Aziya . . . a ni tshikanga ku mi byela minchumu leyi nga ta mi pfuna, ni ku mi djondzisa . . . hi munti ni munti.” Hi ndlela leyo ni hi tindlela tin’wani, Pawulo a “chumayele hi ku helela ka Vayuda ni ka Vagriki swaku va tilaya va gandzela Xikwembu, va tlhela va va ni lipfumelo ka Hosi ya hina Yesu.” (Min. 20:18, 20, 21) Ka nkama lowuyani, vagovhernadori va Varoma a va gandzela swikwembu swa mavunhwa va tlhela va yendla swaku ni vanhu van’wani va swi gandzela, naswona vanhu va vanyingi a va “rhandza hintamu swikwembu.” Hi mhaka leyo, hi xihantla a va fanele va lavetela “Xikwembu lexi nga yendla misava ni hinkwaswu leswi nga ka yona,” lexi a xi “byela vanhu amisaveni hinkwayu swaku va fanele va tilaya.” — Min. 17:22-31.

⁵ A misava leyi ya ku biha ya Sathana se yi le kusuhi ni ku helisiwa. Hi mhaka leyo, i swa xihantla kuva hi chumayela vanhu mahungu ya ku tsakisa namuntlha. Ku tiva leswo swi hi yendla hi lava ku yengesela nkama lowu hi wu hetaka na hi chumayela. Ku sukela khale anze swoswi, ndlela ya kahle leyi tirhisiwaka swaku ku chumayeliwa mahungu ya ku tsakisa i ku chumayela hi munti ni munti. Phela machumayelelo lawo ma kahle swinene namuntlha ku fana ni leswi a swi li xiswona ka nkama wa Yesu ni ka nkama wa vapostolo. — Mar. 13:10.

⁶ Indjhe wa swi kota ku chumayela hi munti ni munti hi ku helela? Phela loko u yendla leswo, tiyiseka swaku Yehovha wa yi tsakela minzamu leyi u yi yendlaka. (Eze. 9:11; Min. 20:35) Swi nga yendleka ku chumayela hi munti ni munti swi nga ku vevukeli. Swi nga yendleka ku li ni swikarhatu leswi swi ku sivelaka ku chumayela hi munti ni munti, kumbe swi nga yendleka lomu u chumayelaka kona vanhu va vanyingi va nga lavi ku twa nchumu hi mahungu ya ku tsakisa. Minkama yin’wani swi nga yendleka a mfumu wu tsimbisa ntirho wa hina wa ku chumayela, kumbe swi nga yendleka u li ni tingana ta ku sungula mabulu ni vanhu lava u kalaka u nga va tivi. Hi mhaka leyo, minkama hinkwayu loko u ya ku chumayeleni hi munti ni munti u nga ha chavanyana, kambe u nga godoli. (Eks. 4:10-12) Phela leswi swi ku yendlekelaka swi yendlekela vamakwerhu va vanyingi amisaveni hinkwayu.

⁷ Yesu a tshembise vadjondzisiwa va yena a ku: “Phela ni na n’wina masiku hinkwawu, anze ku fika magamu.” (Mat. 28:20) Xitshembiso lexo xa hi tiyisa swaku hi tama hi wu yendla kahle ntirho wa ku yendla vadjondzisiwa. Hi titwa ku fana na mupostolo Pawulo lweyi a nga vula leswi: “Ka hinkwaswu ni ni matimba hi mhaka ya lweyi a ni nyikaka matimba.” (Filp. 4:13) Ma tirhisi kahle malulamiselo lawa ma nga kona abandleni la wena ya ku chumayela hi munti ni munti. Hi ku tirha ni vanhu van’wani, u ta tiyisiwa ni ku tlhela u pfuniwa hi vanhu van’wani. Khongela u kombela ku pfuniwa swaku u hlula xikarhatu xin’wani ni xin’wani lexi u nga ha kumanaka na xona. Naswona yendla hinkwaswu u nga swi kotaka ka ntirho wa ku chumayela mahungu ya ku tsakisa hi ku hiseka. — 1 Yo. 5:14.

⁸ Loko u chumayela van’wani mahungu ya ku tsakisa, u ta va u va pfuna swaku va ‘tiva hi ta ntshembo lowu u nga na wona.’ (1 Pe. 3:15) U ta vona ku hambana ka lava va nga ni ntshembo wa leswi Mfumu wa Xikwembu wu nga ta swi yendlela vanhu ni lava va kalaka va nga li na wona. (Esa. 65:13, 14) U ta tsaka hi ku tiva swaku u yingisa nawu wa Yesu wa ku yendla swaku ‘ku vonakala ka wena ku voninga ka vanhu’ naswona u ta pfuna vanhu swaku va tiva Yehovha ni ntiyiso lowu nga ta va yendla va kuma wutomi la ku kala li nga heli. — Mat. 5:16; Yoh. 17:3; 1 Tm. 4:16.

⁹ Ku ni malulamiselo lawa ma yendliwaka swaku ku chumayeliwa hi munti ni munti hi ku hela ka vhiki kumbe hi xikarhi ka vhiki. Lomu swi karhataka ku kuma vanhu makaya ya vona ninhlikanhi, mabandla man’wani ma yendla malulamiselo leswaku ma ya bula ni vanhu nimadlambu. Ka nkama wolowo swi nga yendleka vanhu se va swi lava ku yingisela mahungu ya ku tsakisa ku tlula loko u va yela nimixo.

KU LAVETELA LAVA FANELIWAKA

¹⁰ Yesu a byele vadjondzisiwa va yena swaku va ‘lavetela’ lava faneliwaka. (Mat. 10:11) Yena a a nga yendli leswo hi ku chumayela hi munti ni munti ntsena, kambe yena a a chumayela loko a pfulekeliwa hi nkama, a tlhela a chumayela hi ku kongoma ni swa kola na kola. (Luk. 8:1; Yoh. 4:7-15) Na vona vapostolo a va chumayela vanhu ka tindhawu ta ku hambanahambana. — Min. 17:17; 28:16, 23, 30, 31.

¹¹ Ninamuntlha lexi hi xi lavaka hintamu hileswaku vanhu hinkwavu va chumayeliwa mahungu ya ku tsakisa. Leswaku leswo swi koteka, hi fanele hi tekelela machumayelelo ya Yesu ni vapostolo va yena hi tlhela hi titwananisa ni ku txintxa ka minkama ni swiyimu swa vanhu. (1 Ko. 7:31) Hi xikombiso, vachumayeli va vanyingi swi va fambela kahle nsin’wini loko va bula ni vanhu antirhweni. Van’wani swi va fambela kahle loko va chumayela tindleleni kumbe va chumayela lomu ku nyimaka mimovha kumbe lomu ku talisaka ku va ni vanhu. Mabandla man’wani ma tirhisa swilo swa ku fana ni mimeza, makarinya swaku va veka mabuku swaku va chumayela. Ka tindhawu tin’wani lani ku nga ni vanhu va vanyingi, abetele li nga ha yendla malunghiselelo ya leswaku mabandla ya ku hambanahambana ma tlhangana swaku ma ya chumayela ka madoropa yamakulu. Ku yendla leswo swi pfuna vachumayeli swaku va bula ni vanhu lava swi karhataka ku va kuma makaya.

¹² Ka tindhawu leti ku nga tala hi vanhu, loko hi bula ni munhu lweyi a tsakelaka hi nga gama hi mu nyika buku. Leswaku hi pfuna munhu yelweyo a tama a tsakela mahungu ya ku tsakisa, hi nga ha mu nyika numeru ya hina ya telefoni hi tlhela hi tshembisa ku mu pfuxela. Naswona hi nga tlhela hi mu komba a site la hina la jw.org kumbe hi mu byela lomu Yindlo ya Wugandzeli ya lomu kusuhi yi kumekaka kona. Phela ku chumayela lomu ku nga tala hi vanhu i ndlela yin’wani ya ku yendla swa swinyingi ka ntirho wa hina wa ku chumayela.

¹³ Ntirho lowu Vakreste va nga nyikiwa wona a hi ku chumayela mahungu ya ku tsakisa ntsena. Leswaku u pfuna munhu a pfumela ntiyiso lowu yisaka awuton’wini, i swa lisima ku mu yendzela nkama ni nkama leswaku a yendla nhluvuku a gama a va Mukreste wa ku wupfa.

KU YENDLA MAREVHIZITA

¹⁴ Yesu a va byele leswi valandzeli va yena: “Mi ta va timboni ta mina . . . anze amagamu ya misava.” (Min. 1:8) A tlhele a vula leswi: “Fambani mi ya djondzisa vanhu va matiko hinkwawu leswaku va va vadjondzisiwa va mina, . . . mi va djondzisa ku yingisa hinkwaswu leswi ni nga mi byela swona.” (Mat. 28:19, 20) Loko hi yendla marevhizita swi ta hi yendla hi tsaka nkama hi tirhelaka Yehovha. Lava va tsakelaka mahungu ya ku tsakisa loko hi va yendzela hi khambi la ku sungula, swi nga yendleka va tsaka swinene loko hi tlhela hi va yendzela. Loko u tama u bula na vona hi Bibele, u ta tiyisa lipfumelo la vona u tlhela u va pfuna swaku va swi vona swaku va fanele va tikarhatela ku va vanghanu va Xikwembu. (Mat. 5:3) Loko u tilunghiselela kahle u tlhela u hamba marevhizita hi nkama wawunene ka vona, swi nga yendleka u swi kota ku sungula swidjondzo swa Bibele. Phela loko hi hamba marevhizita, lexi hi xi lavaka hintamu i ku sungula swidjondzo swa Bibele. Phela a timbewu ta ntiyiso a ho lava ku ti byala ntsena, kambe hi lava ku tlhela hi ti regara. — 1 Ko. 3:6.

¹⁵ Van’wani swi nga ha va karhatela ku hamba marevhizita. Swi nga yendleka na wena swi ku vevukela swinene ku sungula mabulu hi munti ni munti naswona u swi rhandza ku yendla leswo, kambe loko u pimisa hi ku tlhelela ka munhu lweyi a nga kombisa ku tsakela leswaku u ya bula hi swilo swin’wani swa Bibele, swi nga ha ku yendla u karhateka. Kambe loko u tilunghiselela kahle, u ta chumayela na u nga chavi. Khumbuka swaku swilo leswi djondziwaka ka ntlhanganu wa xikarhi ka vhiki swi nga ku pfuna swinene ka ku yendla marevhizita, naswona u nga tlhela u pfuneka swinene hi ku va u rhamba muchumayeli lweyi a nga ni xiperiyensiya leswaku a famba na wena nkama u yaka u ya hamba revhizita.

KU FAMBISA SWIDJONDZO SWA BIBELE

¹⁶ Nkama Filipi na a vulavula ni muprozelita wa Muyuda lweyi a a lerha Rito la Xikwembu, a mu vutise leswi: “Indjhe wa swi twisisa leswi u swi lerhaka?” Se wanuna lwiyani a mu hlamulile a ku: “Ni nga swi kotisa ku yini ku swi twisisa na ku nga na lweyi a ni tlhamuselaka ke?” Marito ya Bibele lama kumekaka ka Mintirho ndzima 8 ma vula swaku Filipi “a mu byele mahungu ya ku tsakisa hi Yesu” na a sukela ka rungula leli a a lerha lona. (Min. 8:26-36) A hi swi tivi swaku va hete nkama wa ku fikela kwini na va bula, kambe mahungu ya ku tsakisa lawa Filipi a nga ma byela wanuna lwiyani, ma mu pfunile swaku a va ni lipfumelo a tlhela a kombela ku tsakamisiwa. Wanuna lwiyani a ve mulandzeli wa Yesu Kreste.

¹⁷ Vanhu va vanyingi namuntlha a va li tivi Bibele. Hi mhaka leyo, swi nga ha lava hi yendla marevhizita ya manyingi hi tlhela hi va djondzisa timhaka ta ku hambanahambana ku ringana mavhiki, tiwheti hambi hi lembe kumbe ku tlula, leswaku va ta kota ku va ni lipfumelo va tlhela va fanelekela ku tsakamisiwa. Yesu a te: “Swi tsakisa hintamu ku nyika ku tlula ku yamukela.” (Min. 20:35) Leswo swi vula swaku loko hi va pfuna hi lirhandzu hi tlhela hi va lehisela mbilu, hi ta kuma minkateko ya yinyingi.

¹⁸ Ha tiyiseka swaku u ta swi lava ku fambisa djondzo ya Bibele hi ku tirhisa buku leli li nga yendleliwa leswo. Phela loko u tirhisa swilo leswi hi swi kumaka ka ntlhanganu wa xikarhi ka vhiki u tlhela u tirha ni vamakwerhu lava nga ni xiperiyensiya, u ta swi kota ku fambisa swidjondzo swa Bibele leswi yendlaka nhluvuku naswona u ta pfuna vanhu va vanyingi leswaku va va vadjondzisiwa va Yesu Kreste.

¹⁹ Loko u lava ku pfuniwa leswaku u fambisa xidjondzo xa Bibele, chunseka ku vulavula ni doda kumbe makwerhu mun’wani ni mun’wani lweyi a djondzisaka kahle. Swilo leswi kombisiwaka ka Xibukwana xa Mintlhanganu xa Mahanyelo ni Ntirho wa hina wa Wukreste ni leswi kombisiwaka amintlhanganwini swi nga ku pfuna. Tshemba Yehovha naswona mu byeli hi xikhongelo swaku u swi lava hintamu ku sungula swidjondzo swa Bibele. (1 Yo. 3:22) Loko swi koteka, hambiloko se u djondza Bibele ni munhu wa ndjangu wa wena, lwela ku va ni xidjondzo xin’wani xa Bibele. Loko u djondza ni vanhu van’wani swi ta ku pfuna kuva u tsaka ka ntirho wa ku chumayela.

PFUNA LAVA TSAKELAKA SWAKU VA NGHENA KA NHLENGELETANU YA YEHOVHA

²⁰ Loko hi pfuna vanhu swaku va tiva Yehovha va tlhela va va vadjondzisiwa va Yesu, hi nkama wolowo va sungula ku lumba bandla. Leswaku swidjondzo swa Bibele swi yendla nhluvuku swi tlhela swi kulisa wunghanu la swona na Yehovha, swi fanele swi tiyiseka swaku Yehovha a ni nhlengeletanu swi tlhela swi longoloka na yona. Kambe leswo a swi nge tiyendlekeli, swi lava hi va djondzisa. Ku ni mavhidiyo ni mabroxura ya ku fana ni leli nge: I Vamani Lava Yendlaka Kurhandza ka Yehovha Namuntlha? lawa ma nga lunghiseleliwa leswaku ma va pfuna ku yendla leswo. Swilo swin’wani leswi nga va pfunaka swi kumeka ka Ndzima 4 ya buku leli.

²¹ Loko hi sungula ku djondza ni munhu Bibele, na to ho suka hi fanele hi mu pfuna kuva a tiva leswaku Yehovha a tirhisa nhlengeletanu ya yena leswaku ntirho wa ku chumayela wu yendliwa lani misaveni namuntlha. Mu tlhamuseli lisima la ku tirhisa mabuku, u tlhela u mu tlhamusela ndlela leyi ma yendliwaka hi yona ma tlhela ma nyikeliwa hi yona amisaveni hinkwayu, ku nga ntirho lowu yendliwaka hi vatirhi va ku tirhandzela. Mu rhambi leswaku a famba na wena amintlhanganwini ka Yindlo ya Wugandzeli. Mu tlhamuseli leswaku mintlhanganu yoleyo yi yendlisiwa ku yini u tlhela u mu pfuna swaku a tiva vamakwerhu. Tlhela u mu pfuna swaku a tiva vamakwerhu ka makongresu ni ka masembleya. Ka mintlhanganu leyo, mu tshiki a yi vona hi yexe ndlela leyi Timboni ta Yehovha ti li kombisaka hi yona lirhandzu leli Vakreste va ntiyiso va tiviwaka hi lona. (Yoh. 13:35) Lweyi u djondzaka na yena Bibele a ta swi kota ku tshinela kusuhi na Yehovha Xikwembu nkama a yaka a rhandza nhlengeletanu ya yena.

MABUKU LAWA MA TLHAMUSELAKA BIBELE

²² Vakreste va nkama wa vapostolo a va chumayela Rito la Xikwembu hi ku hiseka. A va hamba makopiya ya Matsalwa leswaku mun’wani ni mun’wani a ma tirhisa ma tlhela ma tirhisiwa abandleni. A va kutxa van’wani leswaku va djondza ntiyiso wa Bibele. Makopiya lawa a va ma hambile a ma li matsongo naswona a va ma nyika lisima swinene. (Kol. 4:16; 2 Tm. 2:15; 3:14-17; 4:13; 1 Pe. 1:1) Namuntlha Timboni ta Yehovha ti tirhisa michini ya ku imprimira swaku ti humesa Mabibele ya manyingi ni mabuku lawa ma tlhamuselaka Bibele. Mabuku wolawo ma patsa swiphephani, mabroxura, marevhixta hi tirimi ta ku hambanahambana.

²³ Nkama lowu u chumayelaka mahungu ya ku tsakisa ka vanhu van’wani, u nga tshiki ku tirhisa mabuku lawa hi ma kumaka ka nhlengeletanu ya Yehovha. Phela ku khumbuka leswaku ku lerha ni ku djondza mabuku wolawo ya Timboni ta Yehovha swi ku pfunile swinene, swi ta maha swaku na wena u navela ku ma nyika vanhu van’wani. — Heb. 13:15, 16.

²⁴ Namuntlha vanhu va vanyingi va tirhisa interneti swaku va tiva minchumu ya yinyingi. Hi mhaka leyo, handle ka ku tirhisa mabuku ya hina, hi nga tirhisa site la jw.org swaku hi chumayela mahungu ya ku tsakisa. Vanhu va vanyingi amisaveni hinkwayu va nga tirhisa komputadori swaku va lerha ni ku yingisela marito ya Bibele ya ku gravhariwa ni ya mabuku man’wani hi tirimi ta ku hambanahambana. Lava kalaka va nga chunseki ku bula na hina, kumbe lava tshamaka ka tindhawu leti ku kalaka ku nga na Timboni ta Yehovha ta tinyingi, va nga kambisisa leswi hi swi kholwaka hi ku tirhisa site la jw.org na va li kaya ka vona.

²⁵ Hi mhaka leyo, hi byela vanhu hi site la hina la jw.org hilani hi nga kotaka hi kona. Loko n’winyi wa munti a hi yendla xivutiso mayelana ni leswi hi kholwaka ka swona, hi nga ha tirhisa telefoni kumbe komputadori la hina leswaku hi mu komba nhlamulu hi nkama wolowo. Loko hi kuma munhu lweyi a vulavulaka lirimi lin’wani ku patsa ni lirimi la mavoko, hi nga mu byela swaku a nghena ka site la jw.org leswaku a kuma Bibele ni mabuku lawa ma tlhamuselaka Bibele hi lirimi la yena. Vachumayeli va vanyingi va tirhisa mavhidiyo lawa ma nga ka jw.org swaku va sungula mabulu lawa ma fambisanaka ni Bibele.

KU CHUMAYELA SWA KOLA NA KOLA

²⁶ Yesu a byele lava a va mu yingisela a ku: “N’wina mi ku vonakala ka misava. . . . Ku vonakala ka n’wina a ku voningi ka vanhu, leswaku va ta vona mintirho ya n’wina yayinene kutani va dzunisa Papayi wa n’wina lweyi a nga matilweni.” (Mat. 5:14-16) Phela vadjondzisiwa lavayani a va fanele va kombisa leswaku i vatirheli va Xikwembu hi ku tekelela Yesu lweyi a nga vula leswi: “Hi mina ku vonakala ka misava.” Phela Yesu a vekele Vakreste xikombiso xaxinene hi ku va “ku vonakala ka wutomi” leswaku vanhu va vanyingi lava a va mu yingisela va pfuneka. — Yoh. 8:12.

²⁷ Mupostolo Pawulo na yena a hi siyele xikombiso xaxinene. (1 Ko. 4:16; 11:1) Nkama na a li Atena a chumayele siku hinkwalu abazara ka vanhu lava a va li kolahayani. (Min. 17:17) Vakreste va le Filipiya va tekelele xikombiso xa yena. Hi mhaka leyo, mupostolo Pawulo a vule swaku a va ‘voninga ku fana ni swa ku voninga misaveni’ hambileswi a va ‘hanya ni vanhu va ku biha lava a va yendla swa ku biha.’ (Filp. 2:15) Ninamuntlha loko hi pfulekeliwa hi nkama wa ku chumayela mahungu ya ku tsakisa, hi ta va hi tshika ntiyiso wa Mfumu wu voninga hi marito ni swiyendlo swa hina. I ntiyiso swaku xikombiso xa hina xaxinene xa ku va vanhu va ku tshembeka ni va ku lulama xi nga yendla swaku vanhu van’wani va swi vona swaku hi hambanile ni vanhu va misava. Kambe loko hi vulavula na vona hi mahungu ya ku tsakisa, va ta ya va swi twisisa swaku hi mhaka muni hi hambanile hintamu ni vanhu van’wani.

²⁸ Vanhu va Yehovha namuntlha va chumayela mahungu ya ku tsakisa ka vanhu lava va tirhaka na vona, lava va djondzaka na vona, loko va li maxapeni kumbe hi nkama wun’wani ni wun’wani nkama lowu va yendlaka mintirho ya vona ya siku ni siku. Nkama hi yendzaka, swi nga yendleka hi pfulekeliwa hi nkama wa ku vulavula ni lava hi yendzaka na vona. Mun’wani ni mun’wani wa hina a fanele a tshama na a pfule matihlo swaku nkama lowu a bulaka ni vanhu van’wani a zama tindlela ta ku va chumayela. Hinkwerhu a hi tshameni na hi lunghekile swaku hi chumayela vanhu van’wani loko hi pfulekeliwa hi nkama.

²⁹ Leswi swi nga ta hi pfuna ku yendla leswo, i ku khumbuka swaku leswi hi swi yendlaka hi dzunisa Mutumbuluxi wa hina hi tlhela hi hlonipha vito la yena. Handle ka leswo, hi va hi pfuna vanhu lava swi tsakelaka leswaku va tiva Yehovha va tlhela va kuma mukhandlu wa ku mu tirhela ni ku va ni ntshembo wa ku hanya hi masiku ni masiku hi mhaka ya lipfumelo ka Yesu Kreste. Phela Yehovha a yi teka na yi li ya lisima swinene minzamu yoleyo leyi hi yi yendlaka naswona a yi teka na yi li ntirho wa ku kwetsima. — Heb. 12:28; Nhl. 7:9, 10.

TERITORIYU

³⁰ Yehovha a swi lava hintamu swaku mahungu ya ku tsakisa ya Mfumu ma chumayeliwa amisaveni hinkwayu amadoropeni ni ka tindhawu leti nga kule ni madoropa. Leswaku leswo swi koteka, a betele li nyikela materitoriyu abandleni ni lava va tirhaka ka tindhawu ta le kule. (1 Ko. 14:40) Leswo swa fambisana ni leswi Vakreste va minkama ya vapostolo a va swi yendla hi ku kongomisiwa hi Xikwembu. (2 Ko. 10:13; Gal. 2:9) Leswi ntirho wa Mfumu wu yaka wu kula ka masiku lawa ya wugamu, ko yendliwa ntirho wawukulu ntsena loko ku yendliwa programa la kahle ka teritoriyu la bandla.

³¹ A programa leli li voneleliwa hi mulanguteli wa ntirho. Mupfunisi wa bandla a nga ha nyikela materitoriyu. Ku ni mixaka yimbirhi ya materitoriyu, ku nga teritoriyu la ntlawa ni teritoriyu la muchumayeli ha mun’we. Valanguteli va mintlawa va ta tiyiseka swaku ntlawa wu na lona teritoriyu leli wu nga chumayelaka ka lona. Kambe loko swi ku teritoriyu i likulu, muchumayeli mun’wani ni mun’wani a nga ha nyikiwa teritoriyu la yena.

³² Muchumayeli lweyi a nga ni teritoriyu la yena, a ni ndhawu ya ku chumayela ka yona hi minkama leyi ku kalaka ku nga na ntlhanganu wa ntirho wa nsimu kumbe swi nga koteki leswaku a tlhangana ni ntlawa. Hi xikombiso, vachumayeli van’wani va kuma teritoriyu kusuhi ni lomu va tirhaka kona, naswona va chumayela kona hi nkama wa ku humula kumbe loko va huma ntirhweni. Mindjangu yin’wani yi kuma teritoriyu la yona lomu yi tshamaka kona, naswona masiku man’wani yi chumayela kona nimadlambu. Loko muchumayeli a ni teritoriyu la yena kusuhi ni lomu a tshamaka kona, swi nga mu pfuna leswaku a wu tirhisa kahle nkama wa yena leswaku a chumayela. I ntiyiso leswaku materitoriyu lawa munhu a ma kombelaka ma nga tlhela ma tirhisiwa hi ntlawa wa nsimu. Loko u tsakela ku va ni teritoriyu la wena n’winyi, u nga kombela mupfunisi wa bandla lweyi a nyikelaka materitoriyu.

³³ Loko mulanguteli wa ntlawa a nyikiwa teritoriyu la ntlawa kumbe loko muchumayeli a nyikiwa teritoriyu la yena yexe, va fanele va tiyiseka swaku ka miminti hinkwayu va vulavule ni munhu hambi o va mun’we ka munti. Valanguteli hinkwavu va ntlawa kumbe muchumayeli lweyi a nyikiwaka teritoriyu, a fanele a yendla minzamu ya ku heta teritoriyu lelo ndzeni ka 4 wa tiwheti. Ndlela leyi teritoriyu li tirhiwaka hi yona yi fanele yi yelana ni minawu ya tiko ya ku vhikela rungula la vanhu lava tshamaka ka teritoriyu lolelo. Loko se a hetile ku tirha hi teritoriyu lelo, lweyi a nga nyikiwa cartão a fanele a vulavula ni makwerhu lweyi a nyikelaka materitoriyu. Hi ku ya hi swiyimu, mulanguteli wa ntlawa kumbe muchumayeli, va nga tshama ni teritoriyu leswaku va tlhela va tirha ka lona kumbe va li tlhelisa ka makwerhu lweyi a nyikelaka materitoriyu.

³⁴ Loko vachumayeli va bandla va tirhisana, a teritoriyu li nga chumayeliwa hinkwalu li ku jii. Handle ka leswo, swi tlhela swi pfuna swaku vachumayeli vambirhi kumbe ku tlula va nga ngheni ka munti wolowu wa wun’we lowu wa ha ku chumayeliwaka, hikusa leswo swi nga nyenyentsa n’winyi wa munti. Loko hi yendla leswo hi ta kombisa swaku ha va pimiselela vamakwerhu ni vanhu va teritoriyu la hina.

KU TIRHISANA LESWAKU KU CHUMAYELIWA VANHU VA TIRIMI HINKWATU

³⁵ Vanhu hinkwavu va fanele va djondza hi Yehovha Xikwembu, N’wana wa yena ni hi Mfumu. (Nhl. 14:6, 7) Phela hi swi navela hintamu ku pfuna vanhu va tirimi hinkwatu leswaku va gandzela Yehovha leswaku va ponisiwa va tlhela va yambala wumunhu la nyuwani. (Rom. 10:12, 13; Kol. 3:10, 11) Hi swini swikarhatu swin’wani leswi vaka kona loko hi chumayela mahungu ya ku tsakisa ka tindhawu leti ku nga ni vanhu lava vulavulaka tirimi ta ku hambanahambana? Hi nga swi tlhantlhisa ku yini swikarhatu swoleswo hi ndlela leyi nga ta yendla leswaku vanhu va vanyingi va kuma nkama wa ku twa mahungu ya ku tsakisa hi lirimi leli va li twisisaka? — Rom. 10:14.

³⁶ Mabandla ma nyikiwa materitoriyu hi ku ya hi lirimi la wona. Ka tindhawu leti ku vulavuliwaka tirimi ta tinyingi, vachumayeli va mabandla ya ku hambanahambana va chumayela ka ndhawu ya yin’we. Ka xiyimu xa ku fana ni lexo, swa yampsa kuva vachumayeli va bandla lin’wani ni lin’wani va chumayela ka lava va vulavulaka lirimi la vona ntsena. Leswo swa tirha ni ka nkama wa makampanya ya ku rhamba vanhu. Kambe loko ku chumayeliwa tindleleni kumbe swa kola na kola, vachumayeli va nga vulavula ni munhu mun’wani ni mun’wani va tlhela va nyikela mabuku hi tirimi ta ku hambanahambana.

³⁷ Minkama yin’wani a mabandla ya tirimi tin’wani a ma swi koti ku chumayela tindhawu hinkwatu ta teritoriyu, ngopfungopfu tindhawu leti nga kule. Ka swiyimu leswo a valanguteli va ntirho wa ku chumayela va mabandla ya teritoriyu lolelo, va fanele va bulisana leswaku ku yendliwa malulamiselo ya leswaku a teritoriyu hinkwalu li za li fikeleliwa. Leswo swi ta yendla swaku vanhu hinkwavu va kota ku twa mahungu ya ku tsakisa ya Mfumu wa Xikwembu naswona swi ta yendla swaku vachumayeli va mabandla ya ku hambana va nga chumayeli vanhu volavo va van’we. — Swiv. 15:22.

³⁸ Hi fanele hi yendla yini loko hi tshuka hi tlhangana ni munhu lweyi a vulavulaka lirimi lin’wani? A hi fanelanga hi tibyela leswaku a ta yendzeliwa hi vachumayeli lava vulavulaka lirimi la yena. Phela vachumayeli van’wani va djondze xingheniso xa ku goma hi lirimi la vanhu lava va nga ka teritoriyu la vona. Hi nga komba munhu yelweyo ndlela ya ku baxara ni ku lerha mabuku hi lirimi la yena ka site la hina la jw.org kumbe hi mu tshembisa leswaku hi ta mu heleketela mabuku hi lirimi la yena.

³⁹ Loko munhu yelweyo a kombisa leswaku wa swi tsakela hintamu, hi fanele hi lava munhu lweyi a fanelekaka swaku a bula na yena hi lirimi leli yena a li twisisaka. Hi nga tlhela hi mu byela lomu a nga li kumaka kona bandla kusuhi ni lomu a tshamaka kona hi lirimi la yena. Loko munhu yelweyo a swi lava ku tama a djondza, hi nga mu kongomisa ka site la jw.org swaku a ya tsala rungula la yena leswaku a ta kota ku djondzeliwa. Loko a yendla leswo, betele li ta lava muchumayeli lweyi a tshamaka lani munhu yelweyo a tshamaka kona, ni ntlawa kumbe bandla leli nga mu pfunaka.

⁴⁰ Hi fanele hi tama hi pfuxela munhu lweyi a nga tsakela, anze a hi byela swaku ku ni munhu lweyi a vulavulaka lirimi la yena lweyi a mu yendzelaka. Minkama yin’wani betele li byela madoda loko li nga swi kotanga ku kuma munhu lweyi a vulavulaka lirimi leli munhu yelweyo a vulavulaka lona. Loko leswo swi yendleka hi fanele hi yendla hinkwaswu leswi hi nga swi kotaka swaku hi tama hi mu pfuna swaku a tama a tsakela ntiyiso. Loko swi koteka, hi nga djondza na yena Bibele. Hi nga ha djondza na yena hi ku tirhisa buku leli kumekaka hi lirimi la yena. Loko hi ma tirhisa kahle mafoto hi tlhela hi mu kombela swaku a lerha tindzimana leti ti nga kombisiwa, hi nga mu pfuna swaku a swi twisisa kahle leswi a swi djondzaka. Munhu mun’wani wa ndjangu wa yena lweyi a kotaka ku vulavula lirimi la yena a tlhela a kota ku vulavula lirimi la hina, a nga ha hundzuluxela nkama lowu hi djondzaka.

⁴¹ Hi fanele hi kongomisa munhu lweyi a tsakelaka ka nhlengeletanu ya Yehovha Xikwembu, hi ku mu rhamba swaku a va na hina ka mintlhanganu ya bandla hambiloko a nga swi twisisi hi ku helela leswi vulavuliwaka. Loko ku ni Bibele hi lirimi la yena, hi nga mu pfuna swaku a kuma tindzimana ta Bibele leti lerhiwaka. Phela hi ku va kona ntsena ka mintlhanganu ya bandla, swi nga mu tiyisa swinene swi tlhela swi mu pfuna leswaku a tama a yendla nhluvuku.

⁴² Pré-grupo: Ntlawa lowu wu vumbiwa hi vachumayeli lava va chumayelaka hi lirimi lin’wani leli nga hambana ni la bandla, hambiloko ku nga na doda kumbe mupfunisi wa bandla lweyi a fanelekaka swaku a rhangela mintlhanganu ya vhiki ni vhiki hi lirimi lolelo. Betele li nga ha pfumelela swaku ka bandla ku va ni pré-grupo loko:

1. 1) Ku li ni vanhu va ku tala ka ndhawu yoleyo lava vulavulaka lirimi la ku hambana ni la bandla.

2. 2) Ku li ni vachumayeli van’wani lava tivaka lirimi lelo, kumbe lava swi navelaka ku li djondza.

3. 3) Ntlawa wa madoda wu tinyimisela ku rhangela ntirho wa ku chumayela hi lirimi lolelo.

Loko ntlawa wa madoda wu swi lava swaku ka bandla ku va ni pré-grupo, wu fanele wu rhanga hi ku bula ni mudjikelezi. Swi nga yendleka mudjikelezi lweyo a tiva mabandla man’wani lawa ma ringetaka ku chumayela hi lirimi lolelo, naswona swi nga yendleka a li ni rungula leli nga pfunaka ku tiva swaku hi lini bandla leli fanelekaka ku rhangela pré-grupo. Madoda ya bandla leli nga langiwa ma fanele ma tsalela betele na ma kombela swaku bandla li va lona leli tiviwaka tanihi lona leli rhangelaka pré-grupo.

⁴³ Ntlawa: A betele li nga pfumelela swaku ka bandla ku va ni ntlawa loko:

1. 1) Ka ndhawu yoleyo ku ni vanhu lava tsakelaka lava vulavulaka lirimi leli vulavuliwaka ka ntlawa wolowo naswona va kombisa nhluvuku.

2. 2) Ku li ni ntlawa wawutsongo wa vachumayeli lava tivaka ku vulavula lirimi lolelo kumbe va tsakelaka ku li djondza.

3. 3) Ku ni doda kumbe mupfunisi wa bandla lweyi a fanele kaka lweyi a tinyimiselaka ku rhangela ntlawa wolowo, a tlhela vhiki ni vhiki a fambisa hambi o va xiyenge xin’we xa ntlhanganu, xa ku fana ni dixkursu leli yaka ka vanhu hinkwavu kumbe Djondzo ya Murindzi hi lirimi leli ntlawa wu li tirhisaka.

Loko tipontu hinkwatu leti ti fikeleliwa, a ntlawa wa madoda wu nga posa karta abetele na wu tlhamusela hinkwaswu leswi, wu tlhela wu kombela swaku bandla li va ni ntlawa. A doda kumbe mupfunisi wa bandla lweyi a rhangelaka ntlawa, a ta vitaniwa “mulanguteli wa ntlawa” kumbe “mupfunisi wa ntlawa” naswona hi yena lweyi a nga ta wu rhangela.

⁴⁴ Loko ntlawa wolowo se wu sungulile, a ntlawa wa madoda ya bandla leli ntlawa wolowo wu nga ka lona, wu ta kambisisa swaku hi swini swiyenge swin’wani swa mintlhanganu ya bandla leswi faneleke swi yengeteliwa, ni leswaku mintlhanganu yoleyo yi fanele yi va kona kangani hi wheti. Ku nga tlhela ku yendliwa malulamiselo ya leswaku ku yendliwa ntlhanganu wa ntirho wa nsimu. Vamakwerhu hinkwavu lava tirhaka ka ntlawa wolowo, va fanele va landzela nkongomiso wa ntlawa wa madoda ya bandla leli ntlawa wolowo wu lumbaka lona. Madoda ma fanele ma tshama na ma pfule matihlo ka swin’wani ni swin’wani leswi ntlawa wolowo wu nga ha swi lavaka wu tlhela wu nyikela nkongomiso ka vamakwerhu volavo. Loko mudjikelezi a tirha ni ntlawa wolowo hi vhiki leli a yendzelaka bandla leli ntlawa wolowo wu lumbaka lona, a ta rhumela relatoriyu abetele na a tlhamusela hinkwaswu mayelana ni ntlawa wolowo ni leswi wu lavaka ku pfuniwa ka swona. Hi ku famba ka nkama, ntlawa wolowo wu nga ha va bandla. Loko vamakwerhu hinkwavu va landzela nkongomiso wa nhlengeletanu, Yehovha a ta tsaka. — 1 Ko. 1:10; 3:5, 6.

KU CHUMAYELA HI NTLAWA

⁴⁵ Mukreste mun’wani ni mun’wani lweyi a nga tinyiketela ka Yehovha a ni wutihlamuleli la ku chumayela mahungu ya ku tsakisa. Leswo hi nga swi yendla hi tindlela ta ku hambanahambana. Kambe vanyingi va hina hi rhandza ku famba ni vanhu van’wani ka ntirho wa ku chumayela. (Luk. 10:1) Hi mhaka leyo, mabandla ma tlhangana swaku ma ya ka ntirho wa ku chumayela hi ku hela ka vhiki ni xikarhi ka vhiki. Maferiyadu na wona i masiku ya kahle ya ku chumayela hi mintlawa hikusa vamakwerhu va vanyingi a va yi mintirhweni kumbe xikola. A Comissão la Ntirho wa bandla li yendla programa swaku ku yiwa ka ntirho wa ku chumayela hi minkama ni ka tindhawu ta ku hambana ninhlikanhi kumbe nimadlambu.

⁴⁶ Ku chumayela hi ntlawa swi yendla swaku vachumayeli va tirha xikan’we va tlhela va “tiyisana”. (Rom. 1:12) Lava va nga ni nkama wawutsongo na va li vachumayeli, va nga tirha ni lava se va nga ni xiperiyensiya leswaku va ta va trenara. Ka tindhawu tin’wani swi nga yendleka swi li kahle kuva va huma vambirhivambirhi kumbe ku tlula leswaku va ta vhikeleleka. Hambiloko wena u lava ku tirha wexe ka teritoriyu, ku va kona ka ntlawa swi nga tiyisa van’wani. Ntsena hi ku tiva swaku ku ni van’wani lava tirhaka kusuhi ni lani u tirhaka kona, swi nga ku yendla u tirha na u nga chavi. A swo boha swaku vapfuli va ndlela ni van’wani va va kona ka mintlhanganu hinkwayu ya ntirho wa nsimu leyi yendliwaka bandleni, ngopfungopfu loko yi yendliwa siku ni siku. Kambe swi nga yendleka swi koteka swaku va va kona ka mintlhanganu yin’wani leyi yendliwaka vhiki ni vhiki.

⁴⁷ Hinkwerhu a hi tinyimiseleni ku tekelela xikombiso xa Yesu ni xa vapostolo. Hi nga tiyiseka swaku Yehovha a ta hi katekisa loko hi tinyiketela a ku yendleni ka ntirho wa lisima hintamu swinene wa ku chumayela mahungu ya ku tsakisa ya Mfumu wa Xikwembu. — Luk. 9:57-62.