Mintlhanganu Leyi Yendlaka Swaku Hi “Rhandzana Hi Tlhela Hi Yendla Mintirho Yayinene”

KU SUKELA khale, vanhu va Yehovha va tlhangana leswaku va mu gandzela hi ndlela yayinene. Ka Israyele wa khale, vavanuna a va yendza anze Yerusalema va ya ka mafexta manharhu yamakulu ya Vayuda. (Det. 16:16) Aminkameni ya vapostolo, Vakreste a va tlhangana nkama ni nkama. Minkama ya yinyingi a va tlhangana kaya ka vamakwerhu. (Flm. 1, 2) Namuntlha hi ni mintlhanganu, masembleya ni makongresu. Hi mhaka muni vanhu va Xikwembu va tlhangana? Hi mhaka mintlhanganu i ya lisima ka wugandzeli la hina. — Ps. 95:6; Kol. 3:16.

² Mintlhanganu yi tlhela yi pfuna lava va yaka ka yona. Nkama Yehovha a nga vulavula ni Vayisrayele hi Fexta la Minchacha (leli a li yendliwa kan’we hi lembe) a va byele swaku ka 7 ni 7 wa malembe a va fanele va yendla leswi: “Hlengeletani vanhu, vavanuna, vavasati, vana ni munhu wa tiko lin’wani lweyi a tshamaka ka madoropa ya n’wina, leswaku va ta yingisa Yehovha Xikwembu xa n’wina, va djondza hi yena ni ku mu chava ni ku landzela marito hinkwawu ya Nawu lowu.” (Det. 31:12) Ha swi tiva leswaku ku tlhangana i swa lisima leswaku hi “djondzisiwa hi Yehovha.” (Esa. 54:13) Ku va hi tlhangana ni vamakwerhu amintlhanganwini swi hi pfuna ku va tiva ku yampsa vamakwerhu hi tlhela hi tiyisana.

MINTLHANGANU YA BANDLA

³ Vadjondzisiwa lava nga sala aYerusalema loko Pentekoxta la  33 E.C. se li hundzile, a va tinyiketela ka tidjondzo ta vapostolo naswona “siku ni siku a va tshama tempeleni hi xikongomelo xin’we.” (Min. 2:42, 46) Hi ku famba ka nkama, loko Vakreste va tlhangana leswaku va gandzela Xikwembu a va lerha Matsalwa ya Xikwembu ku patsa ni makarta lawa a ma tsaliwe hi vapostolo ni vadjondzisiwa van’wani. (1 Ko. 1:1, 2; Kol. 4:16; 1 Tes. 1:1; Yak. 1:1) Loko va tlhanganile a va yendla swikhongelo. (Min. 4:24-29; 20:36) Minkama yin’wani a va kontarelana swiperiyensiya swa nsimu ya wumisiyonariyu. (Min. 11:5-18; 14:27, 28) A va tlhela va kambisisa ndlela leyi wuprofeta a li hetiseka hi yona. A va tlhela va djondza ku va ni mahanyelo ya Wukreste ni ku tinyiketela ka Xikwembu. Hinkwavu a va kutxiwa leswaku va va vachumayeli va ku hiseka va mahungu ya ku tsakisa. — Rom. 10:9, 10; 1 Ko. 11:23-26; 15:58; Efe. 5:1-33.

⁴ Ninamuntlha mintlhanganu yi yendlisiwa xileswi a yi yendlisiwa xiswona ka minkama ya vapostolo. Hi tirhisa leswi kumekaka ka Vaheberu 10:24, 25 leyi nge: “A hi hlayisaneni . . . hi nga tshikeni ku tlhangana ku fana ni leswi van’wani va yendlisaka xiswona kambe hi tiyisana naswona hi yendla leswo ngopfungopfu leswi mi vonaka leswaku siku li le kusuhi.” Ka masiku lawa ya wugamu loko hi tlhangana nkama ni nkama ha tiyisana, leswo swi hi pfuna leswaku hi tama hi tiyisa wunghanu la hina na Yehovha hi tlhela hi va Vakreste va ku tshembeka. (Rom. 1:11, 12) Phela hi hanya xikarhi ka vanhu va ku biha lava nga ni mahanyelo ya ku kala ma nga li manene. Kambe hina hi tama hi rhandza Xikwembu hi tlhela hi fambela kule ni ku navela ku yendla swilo swa ku biha. (Filp. 2:15, 16; Tit. 2:12-14) Phela a ku na xa ku yampsa ku tlula ku va xikarhi ka vanhu va Xikwembu. (Ps. 84:10) Naswona a ku na xin’wani xa ku yampsa ku tlula ku djondza Rito la Xikwembu na hi li xikan’we ni vamakwerhu. Se swoswi a hi voneni mintlhanganu ya ku hambanahambana leyi hi nga na yona, leyi yi hi pfunaka swinene.

NTLHANGANU WA KU HELA KA VHIKI

⁵ A xiyenge xa ku sungula xa ntlhanganu wa ku hela ka vhiki i dixkursu la Bibele, leli pfunaka vanhu hinkwavu li tlhela li pfuna lava ngo sungula ku ya mintlhanganwini. A dixkursu la Bibele i la lisima hintamu hikusa li djondzisa mintiyiso ya Bibele ka lava va ha ku sungulaka ku ta ka mintlhanganu ku patsa ni vachumayeli lava va nga kona abandleni. — Min. 18:4; 19:9, 10.

⁶ Yesu, vapostolo va yena ni Vakreste ni lava a va tipatsa na vona, a va ni mintlhanganu ya ku fana ni leyi hi vaka na yona namuntlha. Swi yo baa swaku Yesu a a li muveki wa kahle wa madixkursu lawa ma yaka ka vanhu hinkwavu, naswona a ku se tshama ku va ni munhu lweyi a nga veka madixkursu hi ndlela leyi Yesu a a ma veka hi yona. Loko Bibele li vulavula hi yena li li: “A ku na munhu lweyi a nga tshama a vulavulisa leswi.” (Yoh. 7:46) Loko Yesu a vulavula, a swi tikomba leswaku a a li munhu lweyi a a nyikiwe wurhangeli. Naswona leswi a a swi vulavula a swi hlamalisa lava a va mu yingisela. (Mat. 7:28, 29) Lava a va pfumela rungula la yena hi mbilu hinkwayu a va pfuneka swinene. (Mat. 13:16, 17) Vapostolo va tekelele xikombiso xa yena. Ka Mintirho 2:14-36, hi lerha dixkursu la ku hlamalisa leli Pedru a nga li veka hi siku la Pentekoxta la lembe la 33 E.C. Vanhu va vanyingi va pfuniwile hi dixkursu leli leswaku va txintxa wutomi la vona. Loko se ku hundze malembenyana, Pawulo a veke dixkursu aAtena leli li nga yendla swaku va vanyingi va va Vakreste. — Min. 17:22-34.

⁷ Hi ku fana, vanhu va vanyingi namuntlha va pfuneka swinene hi madixkursu ya Bibele lawa ma yaka ka vanhu hinkwavu, lawa ma yendliwaka vhiki ni vhiki amabandleni ku patsa ni lawa ma vekiwaka ka masembleya ni makongresu. Madixkursu lawa ma hi pfuna leswaku minkama hinkwayu, hi ti tiva ku yampsa tidjondzo ta Vakreste ni ku tama hi yendla ntirho wa hina wa ku chumayela mahungu ya ku tsakisa. Loko hi rhamba vanhu lava va tsakelaka ni vanhu hinkwavu swaku va va kona ka madixkursu wolawo, hi va hi yendla leswaku vanhu va vanyingi va ti tiva ku yampsa tidjondzo ta lisima ta Bibele.

⁸ Ka madixkursu lawa ma yaka ka vanhu hinkwavu, ku vulavuliwa hi swilo swa ku hambanahambana. Ma nga ha vulavula hi tidjondzo ta Bibele, wuprofeta, matshinya ya minawu ya Bibele, leswi swi nga pfunaka mindjangu, muchadu, swikarhatu leswi majovhem ma kumanaka na swona ni mahanyelo ya Vakreste. Madixkursu man’wani ma nga ha vulavula hi ntumbuluku wa ku saseka wa Yehovha. Man’wani ma nga ha vulavula hi lipfumelo, ku tiya nhlana ni ku tshembeka ka vanhu va Xikwembu va minkama ya Bibele ni ku hi komba swaku swikombiso swoleswo swi nga hi pfunisa ku yini ka masiku ya hina.

⁹ Leswaku hi pfuneka swinene hi madixkursu lawa ma yaka ka vanhu hinkwavu, i swa lisima swaku hi ma yingiselisisa kahle. Nkama lowu lweyi a vekaka dixkursu a vulaka ndzimana, na hina hi pfula na yena hi tlhela hi yingiselisisa kahle loko a yi tlhamusela. (Luk. 8:18) Loko hi yendla leswo, hi ta tivonela hi hoxe swaku leswi swi tlhamuseliwaka swi ta hi ka Bibele, naswona ku yendla leswo swi ta hi pfuna ku khomelela ka leswi hi swi djondzaka ni ku vona swaku hi nga swi tirhisisa ku yini ka wutomi la hina. — 1 Tes. 5:21.

¹⁰ Loko ku li ni vamakwerhu lava va nga vekaka madixkursu, a bandla li ta va ni madixkursu wolawo vhiki ni vhiki. Leswo swi tlhela swi koteka hi leswi ku nga rhambiwaka vamakwerhu va mabandla man’wani leswaku va ta veka madixkursu. Loko ku li ni vamakwerhu vavatsongo lava va nga vekaka madixkursu, madixkursu wolawo ma ta vekiwa loko swi koteka.

¹¹ A xiyenge xa wumbirhi xa ntlhanganu wa ku hela ka vhiki i Djondzo ya Murindzi. A xiyenge xolexo xi fambisiwa hi swivutiso ni tinhlamulu leswi kumekaka ka nhlokomhaka leyi djondziwaka ka Murindzi yelweyo. Hi ku tirhisa Murindzi, Yehovha a hi nyika leswi hi swi lavaka leswaku hi kulisa wunghanu la hina na yena hi nkama wa kona.

¹² Nhlokomhaka yin’wani ni yin’wani ya Murindzi yi hi komba leswi hi nga ma tirhisisaka xiswona matshinya ya minawu ya Bibele ka wutomi la hina. Ti hi pfuna leswaku hi lwisana ni “moya wa misava” ni mahanyelo ya ku biha. (1 Ko. 2:12) Ka Murindzi ku tlhamuseliwa wuprofeta ni tidjondzo ta Bibele leti hi ti twisisaka hi kutsongokutsongo, leswo swi hi pfuna leswaku hi tama hi fambisana ni ntiyiso hi tlhela hi nga hambuki ka ndlela ya ku lulama. (Ps. 97:11; Swiv. 4:18) Ku va kona ka Djondzo ya Murindzi ni ku tlhela hi hlangamela ka yona swi hi yendla hi tsaka hi tlhela hi va ni ntshembo wa misava ya nyuwani ya ku lulama leyi Yehovha a hi tshembisaka yona. (Rom. 12:12; 2 Pe. 3:13) Mintlhanganu leyi, yi hi pfuna ku kombisa mihandzu ya moya wa ku kwetsima ni ku tlhela hi ya hi swi navela hintamu ku tirhela Yehovha hi ku hiseka. (Gal. 5:22, 23) Yi hi pfuna ku tiyisela miringo ni ku “tivekela masungulo yamanene” leswaku ‘hi ta khoma swi tiya ka wutomi la ntiyiso.’ — 1 Tm. 6:19; 1 Pe. 1:6, 7.

¹³ Hi nga yendla yini leswaku hi pfuneka swinene hi leswi Yehovha Xikwembu a hi phamelaka swona? Hi fanele hi lunghiselela leswi swi nga ta djondziwa ka mintlhanganu, na hi li hoxe kumbe ni ndjangu wa hina. Hi fanele hi lavetela tindzimana leti nga kona ka djondzo naswona loko hi li mintlhanganwini hi fanele hi hlamula hi marito ya hina. Leswo swi ta yendla leswaku a ntiyiso wa Bibele wu dzima timintsu ka timbilu ta hina, naswona vamakwerhu va ta pfuneka swinene hi ku hi twa hi hlamula. Hi ta pfuneka swinene vhiki ni vhiki loko hi yingisela kahle tinhlamulu ta vamakwerhu.

NTLHANGANU WA XIKARHI KA VHIKI

¹⁴ Vhiki ni vhiki a bandla la tlhangana ka Yindlo ya Wugandzeli ya Timboni ta Yehovha swaku li va ni ntlhanganu lowu vitaniwaka Mahanyelo ni Ntirho wa Hina wa Wukreste. Ntlhanganu wolowo wu ni swiyenge swinharhu leswi hi pfunaka leswaku hi “faneleka kahle” ku va vatirheli va Xikwembu. (2 Ko. 3:5, 6) A xiyimisu ni leswi swi nga ta djondziwa swi nyikeliwa wheti ni wheti ka xibukwana lexi vitaniwaka Mahanyelo ni Ntirho wa Hina wa Wukreste — Xibukwana xa Mintlhanganu. Ka xibukwana lexi ku tlhela ku kombisiwa swikombiso swa mabulu leswi hi nga ta swi tirhisa ka ntirho wa ku chumayela.

¹⁵ A xiyenge xa ku sungula xa ntlhanganu lowu, xi vitaniwa Xuma Xi Nga ka Rito la Xikwembu. Ka xiyenge lexi, hi pfuneka ku va hi tolovelana ku yampsa ni leswi swi nga yendleka ka minkama ya Bibele ni ku twisisa xiyimu xa kona hi tlhela hi vona leswi hi nga swi tirhisisaka xiswona ka wutomi la hina. Xiyenge lexi xa ntlhanganu xi patsa dixkursu, ku lerha ka Bibele ni xiyenge lexi vamakwerhu va hlamulaka leswi va nga swi kuma ka tindzima ta Bibele leti lerhiwaka ka vhiki lolelo. Ka Xibukwana xa Mintlhanganu ku ni mafoto, mimapa, madiyagrama, ni swin’wani leswi nga hi pfunaka ku twisisa kahle leswi nga yendleka ka minkama ya Bibele. Hinkwaswu leswi hi swi djondzaka, swa hi pfuna ka wutomi la hina ni ku tlhela swi hi pfuna ku yampsisa madjondzisela ya hina leswaku ‘hi ta swi kota hi ku helela hi tlhela hi lunghekela ku yendla ntirho wun’wani ni wun’wani wawunene’. — 2 Tm. 3:16, 17.

¹⁶ A xiyenge xa wumbirhi xa ntlhanganu lowu, lexi nge Hisekela Ntirho wa Ku Chumayela xi yendleliwe ku pfuna vachumayeli hinkwavu leswaku va yampsisa machumayelelo ya vona ni madjondzisela ya vona. Ka xiyenge lexi ku tlhela ku va ni madixkursu ya switudanti, ku tlhela ku buliwa hi mavhidiyo lawa ma kombisaka ndlela ya ku sungula mabulu hi ku tirhisa Bibele. Phela xiyenge lexi xa mintlhanganu ya hina xi hi pfuna leswaku hi va ni “lirimi la lava va nga djondzisiwa” leswaku hi ‘tiva ndlela ya ku hlamula lweyi a nga karhala, hi rito leli tiyisaka.’ — Esa. 50:4.

¹⁷ Ka xiyenge xa wunharhu lexi vitaniwaka Mahanyelo ya Hina Vakreste, ku djondzisiwa ndlela leyi hi nga ma tirhisaka hi yona matshinya ya minawu ya Bibele ka wutomi la hina siku ni siku. (Ps. 119:105) Ka xiyenge lexi xa Mahanyelo ya Hina Vakreste ku ni xiyenge xa lisima hintamu ku nga Djondzo ya Bibele ya Bandla. Ku fana ni ka Djondzo ya Murindzi, a Djondzo ya Bibele ya Bandla yi fambisiwa hi swivutiso ni tinhlamulu.

¹⁸ Wheti ni wheti, loko ku fika a xiyimisu xa Mahanyelo ni Ntirho wa Hina wa Wukreste, a mutlhanganisi wa ntlawa wa madoda kumbe doda leli mu pfunisaka, li kambela leswi nga ta djondziwa li gama li hamba a programa. Vhiki lin’wani ni lin’wani, ku langiwa doda leli djondzisaka kahle leli nga pfumeleliwa hi ntlawa wa madoda swaku li va mufambisi wa ntlhanganu. Ntirho wa mufambisi wa ntlhanganu i ku tiyiseka leswaku ntlhanganu wu sungula hi nkama wawunene wu tlhela wu gama hi nkama wa kona, a tlhela a khensa ni ku nyika switsundzuxu lava va nga ni swiyenge swa switudanti.

¹⁹ Loko hi tilunghiselela nkama ni nkama, hi va kona hi tlhela hi hlamula ka Ntlhanganu wa Mahanyelo ni Ntirho wa Hina wa Wukreste, swi ta hi pfuna swaku hi ma twisisa ku yampsa Matsalwa, hi tlhela hi twisisa matshinya ya minawu ya Bibele, swi tlhela swi hi pfuna swaku hi nga chavi ku chumayela ni ku yampsisa madjondzisela ya hina. Phela lava va vaka kona ka ntlhanganu lowu naswona va kalaka va nga li Timboni ta Yehovha leti nga tsakamisiwa va nga pfuneka hi ku va kona amintlhanganwini xikan’we ni vamakwerhu naswona va ta djondza swilo leswi nga ta va pfuna swaku va va vanghanu va Xikwembu. Swin’wani leswi swi nga hi pfunaka leswaku hi lunghiselela ntlhanganu lowu ni yin’wani, i ku tirhisa a Watchtower Library, JW Library^®, BIBLIYOTEKA KA INTERNETI la Watchtower^™ (loko swi li kona hi lirimi la wena), kumbe bibliyoteka leli nga ha kumekaka ka Yindlo ya Wugandzeli. Phela bibliyoteka lolelo leli kumekaka ka Yindlo ya Wugandzeli, li ni mabuku ya Timboni ta Yehovha, Índice das Publicações da Torre de Vigia kumbe Nkongomiso Wa Ku Yendla Pexkiza Wa Timboni Ta Yehovha ni Mabibele ya ku hambanahambana, dicionário ni mabuku man’wani lawa ma nga ku pfunaka. A bibliyoteka lelo li nga tirhisiwa hi mun’wani ni mun’wani loko mintlhanganu yi nga se sungula ni loko se yi helile.

MINTLHANGANU YA NTIRHO WA NSIMU

²⁰ Ka minkama ya ku hambanahambana xikarhi ka vhiki kumbe hi ku hela ka vhiki, ntlawa wa vachumayeli wa tlhangana leswaku wu ya ka ntirho wa nsimu. Mintlhanganu leyo minkama ya yinyingi yi yendliwa kaya ka vamakwerhu kumbe ka tindhawu tin’wani leti fanelekaka. A Yindlo ya Wugandzeli na yona yi nga tirhisiwa leswaku ku yendliwa ntlhanganu lowu. Ku va ku ni mintlawa ya ku hambanahambana leyi tlhanganaka leswaku yi ya ka ntirho wa nsimu, swi nga pfuna vachumayeli ku ya lomu nsimu yi yaviwaka kona swi tlhela swi va vevukela ku ya ka teritoriyu. Vachumayeli va nga yaviwa swi tlhela swi va vevukela ku fika ka teritoriyu na va nga zanga va hlwela. Leswo swi tlhela swi pfuna mulanguteli wa ntlawa akuva a pfuna mun’wani ni mun’wani lweyi a nga ka ntlawa wa yena. Hambileswi swi pfunaka kuva mintlawa ya nsimu yi tlhangana ka tindhawu ta ku hambanahambana, minkama yin’wani swi nga ha lava leswaku mintlawa leyi yi patsiwa. Hi xikombiso, loko ku li ni vachumayeli vavatsongo lava va yaka ka ntirho wa nsimu xikarhi ka vhiki, swi nga yendleka swi yampsa mintlawa leyi yi patsana swaku yi tlhangana ka Yindlo ya Wugandzeli kumbe kaya ka makwerhu. Leswo swi ta pfuna vachumayeli van’wani swaku va kuma makwerhu wa ku tirha na yena. Swi nga yendleka madoda ma swi vona swi yampsa kuva bandla li tlhangana ka Yindlo ya Wugandzeli swaku va ya ka ntirho wa nsimu hi maferiyadu. Naswona va nga ha swi vona swi yampsa akuva ntirho wa nsimu wu yendliwa loko Djondzo ya Murindzi yi hela.

²¹ Loko mintlawa yi tlhangana ka tindhawu ta ku hambanahambana, mulanguteli wa ntlawa wun’wani ni wun’wani hi yena a nga ta fambisa ntlhanganu wa ntirho wa nsimu. Minkama yin’wani a nga ha kombela mupfunisi wa yena kumbe makwerhu mun’wani lweyi a fanelekaka swaku a fambisa ntlhanganu lowu. Mufambisi wa ntlhanganu wa nsimu a fanele a tilunghiselela kahle leswaku a ta vulavula swilo leswi nga ta pfuna ka ntirho wa nsimu. Vachumayeli va yaviwa vambirhivambirhi va tlhela va nyikiwa teritoriyu leli va nga ta tirha ka lona, se ku gama ku langiwa makwerhu mun’we swaku a yendla xikhongelo. Se loko ku yendliwe leswo a ntlawa wu nga tifambela ka teritoriyu. A mintlhanganu leyi yi teka 5 kumbe 7 wa maminutu kambe wu fanele wu koma hintamu loko wu yendliwa ndzhaku ka mintlhanganu ya bandla. A ntlhanganu lowu wu fanele wu djondzisa, wu tiyisa wu tlhela wu nyikela minkongomiso leyi nga ta pfuna ka ntirho wa nsimu. Vachumayeli va nyuwani ni van’wani lava kumbexana va nga ha lavaka ku pfuniwa va nga ha tirha ni vachumayeli lava nga ni xiperiyensiya leswaku va va pfuna.

MINTLHANGANU LEYI YENDLIWAKA KA MABANDLA YA NYUWANI KUMBE KA MABANDLA YAMATSONGO

²² Leswi vanhu va vanyingi va vaka vadjondzisiwa, a numeru ya mabandla na yona yi ya yi khwela. Hi ntolovelo lweyi a kombelaka swaku a bandla la nyuwani li pfuliwa i mudjikelezi. Kambe minkama yin’wani mintlawa yayitsongo yi nga ha vona leswaku swa yampsa yi tlhangana ni bandla leli nga kusuhi ni ntlawa wolowo.

²³ Minkama yin’wani ka mabandla yamatsongo ku nga ha va ni vamakwerhu va xisati ntsena. Ka xiyimu lexo, makwerhu mun’we wa xisati a nga yendla xikhongelo abandleni kumbe ku fambisa mintlhanganu, kambe a yendla leswo na a funengete nhloko hi ku landza nawu Matsalwa. (1 Ko. 11:3-16) Minkama ya ku tala makwerhu lweyi wa xisati, a yendla leswo na a tshamile phambheni ka ntlawa. Vamakwerhu va xisati a va veki madixkursu a plataforma ku fana ni vamakwerhu va xinuna, kambe vona va lerha kumbe va tlhamusela hi swilo swin’wani leswi taka hi ka nhlengeletanu. Kumbe loko va lava ku txintxanyana va nga ha bula hi mhaka leyo hi ku tirhisa swivutiso ni tinhlamulu kumbe va yendla minkombiso. Betele li nga ha langa makwerhu mun’we wa xisati akuva a fambisa mintlhanganu kumbe a yamukela makarta lawa ma taka hi Betele. Hi ku famba ka nkama loko se ku ni vamakwerhu va xinuna lava fanelekaka hi vona lava va nga ta hetisisa mintirho leyi.

MASEMBLEYA YA SIRKWITU

²⁴ Lembe ni lembe ku yendliwa programa la leswaku mabandla lawa ma nga ka sirkwitu lalin’we ma tlhangana ka masembleya mambirhi ya sirkwitu. Hi nkama lowu wa asembleya, hinkwavu lava nga kona va londzovota nkama lowu swaku va ‘pfula timbilu ta vona’ ni ku kombisa lirhandzu loko va tlhangana ni vamakwerhu. (2 Ko. 6:11-13) Nhlengeletanu ya Yehovha yi lunghiselela madixkursu ni swiyenge swa ku hambanahambana swaku yi pfuna vamakwerhu ka mhaka ya ku karhi. Swilo swoleswo swi tlhamuseliwa hi ku tirhisa madixkursu, minkombiso, swiperiyensiya swa wutomi ni swa ntirho wa ku chumayela, minkombiso ya makwerhu lweyi a vulavulaka na a li yexe ni maentrevhixta. Tidjondzo hinkwatu leti ti tiyisa hinkwavu lava va vaka kona ka ntlhanganu lowu. Naswona masembleya ma pfuna vachumayeli va nyuwani leswaku va kombisa swaku va tinyiketelile ka Yehovha hi ku tsakamisiwa.

MAKONGRESU

²⁵ Kan’we hi lembe ku yendliwa mintlhanganu yayikulu. Hi ntolovelo yi vitaniwa makongresu lawa ma tekaka masiku manharhu lani ku tlhanganaka mabandla ya manyingi ya masirkwitu ya ku tala. Ka mabetele lawa ma nga matsongo, va nga vona swi yampsa swaku mabandla hinkwawu ya teritoriyu la vona ma tlhangana ka ndhawu yin’we. Ka matiko man’wani, ku lunghiseleliwa ka makongresu swi nga ya hi swiyimu swa tiko la kona kumbe hi ku landza nkongomiso lowu taka hi ka nhlengeletanu. Minkama yin’wani ku ni makongresu internacional ni makongresu ya ku hlawuleka ka matiko man’wani naswona Timboni ta tinyingi ta matiko ya ku hambanahambana ti va kona ka makongresu wolawo. Ku ringana malembe ya manyingi vanhu va vanyingi va djondza hi ta mahungu ya ku tsakisa hi leswi va nga rhambiwa leswaku va va kona ka mintlhanganu yoleyo.

²⁶ Ka vanhu va Yehovha, makongresu i nkama wa ku tsakisa hikusa va gandzela Yehovha hi ku twanana. Ka makongresu wolawo ku tlhamuseliwa matwisiselo ya nyuwani ya ntiyiso. Ka makongresu man’wani ku humesiwa mabuku ya nyuwani lawa munhu a nga ma tirhisaka swaku a yendla djondzo ya munhu a li yexe, lawa ma tirhisiwaka bandleni kumbe ka ntirho wa nsimu. Ka makongresu hinkwawu, vanhu va tsakamisiwa naswona makongresu i ya lisima hintamu hikusa ma hi pfuna ku tiyisa wunghanu la hina na Yehovha. Makongresu ma kombisa swaku vanhu va Yehovha i ndjangu wun’we amisaveni hinkwayu naswona va tiviwa hi lirhandzu. — Yoh. 13:35.

²⁷ Loko hi va kona ka mintlhanganu ya bandla, ka masembleya ni ka makongresu lawa Yehovha a ma yendlelaka vanhu va yena, ha tiyisiwa swaku hi tama hi yendla ku rhandza ka yena hi tlhela hi vhikeleliwa ka mahanyelo ni mapimiselo ya misava, lawa ma nga hahlulelaka lipfumelo la hina. Mintlhanganu hinkwayu leyi yi yisa ku dzuneka ka Yehovha. (Ps. 35:18; Swiv. 14:28) Hi mu khensa hintamu Yehovha leswi a nyikaka vanhu va yena minkama leyi ya ku tsakisa ka masiku lawa ya wugamu.

XILALELO XA HOSI

²⁸ Kan’we hi lembe, hi siku leli Yesu Kreste a nga fa hi lona, mabandla hinkwawu ya Timboni ta Yehovha amisaveni hinkwayu ma tlhangana swaku ma khumbuka lifu la Yesu kumbe ma yendla Xilalelo Xa Hosi. (1 Ko. 11:20, 23, 24) Phela ntlhanganu lowu i ntlhanganu wa lisima swinene ndzeni ka lembe ka Timboni ta Yehovha. Phela hi nyikiwe nawu wa leswaku hi wu yendla ntlhanganu lowu. — Luk. 22:19.

²⁹ Siku la Xitsundzuxu li kotlana ni siku la Paxkwa leli ku vulavuliwaka hi lona ka Bibele. (Eks. 12:2, 6; Mat. 26:17, 20, 26) A Paxkwa a ku li fexta leli Vayisrayele a va li yendla lembe ni lembe na va khumbuka siku leli va nga chunsiwa a wukaraweni aGibita hi lembe la 1513 A.E.C. Yehovha a lange siku la wu 14 ka wheti ya ku sungula ya lembe hi ku ya hi kalendariyu la Vayuda, leswaku li va siku leli Vayuda a va ta dla nyempfu ya Paxkwa va tlhela va chunsiwa a wukaraweni aGibita. (Eks. 12:1-51) Leswaku hi fika ka siku la wu 14, hi fanele hi konta 13 wa masiku ku sukela ka siku leli n’weti yi sungulaka ku huma hi lona aYerusalema loko malanga ma sungula. Hi ntolovelo a Xitsundzuxu xi yendliwa hi siku la ku sungula leli n’weti wu humaka na wu helelile.

³⁰ Leswi Yesu a nga swi vula ka Matewu 26:26-28 swi hi komba ndlela leyi Xitsundzuxu xi faneleke xi yendliwa hi yona. Phela Xitsundzuxu a hi ntirho lowu fambisanaka ni mihivahivani kumbe swiyilayila, kambe i Xilalelo xa ku fanekisela lexi xi dliwaka ntsena hi lava va nga ta fuma na Yesu atilweni. (Luk. 22:28-30) Vakreste lavan’wani hinkwavu ni lava va swi tsakelaka, va khutaziwa ku va kona ntsena ka Xilalelo xa Hosi. Loko va li kona, va kombisa swaku va mu khensa Yehovha hileswi a nga nyikela N’wana wa yena Yesu leswaku a pfuna vanhu hinkwavu. Na Xitsundzuxu xi nga se fika ku vekiwa dixkursu la ku hlawuleka leli yaka ka vanhu hinkwavu. A dixkursu leli li hi lunghiselela swaku hi li nyimela kahle siku leli la Xitsundzuxu hi tlhela hi swi navela hintamu ku djondza Bibele.

³¹ Leswi hi nga Timboni ta Yehovha hi swi rhandza swinene ku va ni vamakwerhu va hina amintlhanganwini. Ka minkama leyo, ‘ha hlayisana leswaku hi tiyisana hi rhandzana hi tlhela hi yendla mintirho yayinene.’ (Heb. 10:24) Mutirhi wa ku tshembeka ni wa ku tlhariha a tshama na a lungile leswaku a hi nyika mintlhanganu leyi tiyisaka wunghanu la hina na Yehovha. Vatirheli hinkwavu va Yehovha ni vanhu hinkwavu lava tsakelaka, va kutxiwa leswaku va pfuneka swinene hi mintlhanganu. Loko hi kombisa leswaku ha swi khensa hinkwaswu leswi Yehovha Xikwembu a hi nyikaka swona hi ku tirhisa nhlengeletanu ya yena, hi ta tama hi hlayisa ku twanana ka hina tanihi vanhu va Xikwembu. Xa lisima hintamu, hi ta dzunisa Yehovha. — Ps. 111:1.