XIYENGETELO

Mhaka Leyi Yi Tsaleliwaka Vapsali Lava Nga Vakreste:

Leswi u nga mamani kumbe Papayi u swi lava hintamu ku pfuna vana va wena swaku va rhandza Yehovha va tlhela va tinyiketela ka yena. Kambe u nga yendla yini leswaku u va pfuna akuva va tilunghiselela leswaku va tsakamisiwa? Kasi va ta va va lunghekile nkama muni swaku va yendla xiboho lexi xa lisima?

Yesu a rhume vadjondzisiwa va yena a ku: “Fambani mi ya djondzisa vanhu va matiko hinkwawu leswaku va va vadjondzisiwa va mina, mi va tsakamisa.” (Mat. 28:19) Hi mhaka leyo, leswaku munhu a tsakamisiwa i swa lisima hintamu leswaku a va mudjondzisiwa, leswi vulaka swaku a ngo to twisisa tidjondzo ta Yesu ntsena a tlhela a ti kholwa, kambe a ta hanya hi tona. Phela hambi hi vana va nga swi kota ku swi yendla leswo.

Vana xikombiso xaxinene ka vana va wena ni ku tlhela u va djondzisa ku rhandza Yehovha. (Det. 6:6-9) Leswo swi patsa ku tirhisa buku leli nge: Tikhorisi Hi Wutomi La Ku Kala Li Nga Heli leswaku u va djondzisa mintiyiso ya Bibele ni ku va djondzisa ku yanakanyisisa ni ku tlhela va hanya hi matshinya ya minawu ya Bibele. Pfuna vana va wena leswaku va kota ku tlhamusela leswi va swi kholwaka hi marito ya vona. (1 Pe. 3:15) Wutivi leli va nga na lona, mpfunu lowu u va nyikaka wona, djondzo ya munhu a li yexe, wugandzeli la ndjangu, ku va kona mintlhanganwini ni vanghanu vavanene swi ta va pfuna swaku va swi lava ku tsakamisiwa ni kuva va tama va kulisa wunghanu la vona na Yehovha. Tlhela u va pfuna swaku minkama hinkwayu va pimisa hi leswi va nga swi yendlaka swaku va va kusuhi hintamu na Yehovha.

Swivuriso 20:11 yi li: “Hambi n’wana a tiviwa hi mintirho ya yena, loko mahanyelo ya yena ma basile ma tlhela ma lulama.” I yini leswi kombisaka swaku n’wana se i mudjondzisiwa wa Yesu Kreste ni swaku se wa faneleka kuva a tsakamisiwa?

N’wana lweyi a lavaka ku fanelekela ku tsakamisiwa a fanele a yingisa vapsali va yena. (Min. 5:29; Kol. 3:20) Loko Bibele li vulavula hi Yesu nkama na a ni 12 wa malembe li li: ‘A a tama a yingisa [vapsali va yena] minkama hinkwayu.’ (Luk. 2:51) I ntiyiso swaku a wu fanelanga u nyimela swaku n’wana wa wena a va munhu lweyi a nga hetiseka. Kambe n’wana lweyi a lavaka ku tsakamisiwa a fanele a tikarhatela ku tekelela xikombiso xa Yesu naswona a tiviwa tanihi hi munhu lweyi a yingisaka vapsali va yena.

Naswona i swa lisima swinene swaku n’wana yelweyo a swi kombisa leswaku wa swi lava ku djondza hi mintiyiso ya Bibele. (Luk. 2:46) Indjhe n’wana wa wena wa swi rhandza ku ya mintlhanganwini a tlhela a hlamula? (Ps. 122:1) Indjhe wa swi rhandza ku lerha Bibele nkama ni nkama a tlhela a va ni djondzo ya munhu hi xiyexe? — Mat. 4:4.

N’wana lweyi a yendlaka nhluvuku leswaku a tsakamisiwa, wa tikarhata leswaku a rhangisa Mfumu ka wutomi la yena. (Mat. 6:33) A li teka na li li la lisima a wutihlamuleli leli a nga na lona la ku byela van’wani hi leswi a swi djondzaka ka Bibele. Naswona a va kona ka tindlela ta ku hambanahambana leti nga kona ta ku chumayela. Funtshi a nga na tingana ta ku byela vaprofesori, vakolega va yena va xikola swaku yena i Mboni ya Yehovha. Naswona a ma teka ma li ya lisima madixkursu lawa a nyikiwaka wona ya Ntlhanganu wa Mahanyelo ni Ntirho.

N’wana lweyi, wa tikarhata swaku a tshama na a basile ka mahanyelo ya yena hi ku fambela kule ni vanghanu va ku biha. (Swiv. 13:20; 1 Ko. 15:33) Leswo swi ta tikomba hi mamuzika lawa a ma langaka, mafilmi lawa a ma sixtiraka, ni maprograma ya televhizori ku patsa ni magemi lawa a ma jogaka ni ma site lawa a nghenaka ka wona ka interneti.

Vana va vanyingi va pfumelile ntiyiso hi mbilu ya vona hinkwayu naswona va fanelekile leswaku va tsakamisiwa hambileswi a va ha li vatsongo. Hi navela swaku Yehovha a tama a ku katekisa nkama lowu u zamaka ku pfuna vana va wena swaku va fikelela xiboho lexi xa lisima xa ku va ni wunghanu la ku tiya na Yehovha.

Mhaka Leyi Tsaleliwaka Muchumayeli Wa Ku Kala A Nga Tsakamisiwanga:

I nkateko wukulu ku tirha tanihi muchumayeli wa ku kala a nga tsakamisiwanga abandleni. Naswona wa tlangeliwa hi nhluvuku lowu u nga wu yendla ka ntirho wa Yehovha. Ku djondza Rito la Xikwembu swi ku pfunile kuva u mu tiva ku yampsa Yehovha ni ku kulisa lipfumelo leli u nga na lona ka switshembiso swa yena. — Yoh. 17:3; Heb. 11:6.

Na u nge se sungula ku djondza ni Timboni ta Yehovha, swi nga yendleka a wu li ka wukhongeli lin’wani kumbe swi nga yendleka ni ku khongela a wu nga khongeli. Swi nga yendleka ku ni leswi a wu swi yendla leswi a swi lwisana ni matshinya ya minawu ya Bibele, kambe swoswi u kombise lipfumelo la wena hi ku tisola ni ku txintxa ka mahanyelo ya wena. Ku tisola swi vula ku tilaya ka swidjoho leswi u nga swi yendla khale kasi ku txintxa swi vula ku tshika ku yendla minchumu ya ku biha ni ku tinyimisela ku yendla leswi nga swinene ka Xikwembu. — Min. 3:19.

Swi nga yendleka u tive Matsalwa ya ku kwetsima ku sukela loko “wa ha li xin’wanani.” Se leswo swi ku pfunile leswaku u nga weli ka mahanyelo lawa ma kalaka ma nga li ya Vakreste ni ka swidjoho swaswikulu. (2 Tm. 3:15) U djondze ku hlula ku hlohloteliwa hi vanhu va ntanga ya wena ni ku fambela kule ni swilo leswi a swi ta ku yendla u maha minchumu ya ku biha ka Yehovha. U kombise lipfumelo la ku tiya hi ku lwela a wugandzeli la ntiyiso ni ku tlhela u chumayela vanhu van’wani leswi u swi kholwaka, naswona u djondzisiwile ku chumayela. Se swoswi u tiyendlele xiboho xa ku tirhela Yehovha tanihi muchumayeli lweyi a kalaka a nga tsakamisiwanga.

A swi na mhaka leswaku u djondze hi Yehovha ku sukela wa ha li mutsongo kumbe u hlwelile ku djondza hi yena, swi nga yendleka swoswi u pimisa hi ku yendla swilo swin’wani swa swimbirhi swa lisima swinene ka wunghanu la wena na Yehovha, ku nga ku tinyiketela ni ku tsakamisiwa. Phela u nga tinyiketela ka Yehovha hi ku khongela ka yena u mu byela leswaku u navela ku tirhela yena ntsena wutomi la wena hinkwalu. (Mat. 16:24) U gama u swi kombisa leswaku u tinyiketelile ka yena hi ku tsakamisiwa ka mati. (Mat. 28:19, 20) Phela loko u tinyiketela ka Yehovha u tlhela u tsakamisiwa, swi ku yendla u tiviwa tanihi mutirheli wa Yehovha. Phela lelo i lunghelo lalikulu swinene!

Hilani djondzo ya wena ya Bibele yi nga swi kombisa hi kona, swi nga yendleka swoswi u langutana ni mindzingo ya ku hambanahambana. Khumbuka swaku loko se a tsakamisiwile, ‘Yesu a yisiwe mananga hi matimba ya Xikwembu; se Davulosi a ya mu ringa.’ (Mat. 4:1) Loko se u tsakamisiwile tanihi mulandzeli wa Yesu, swi lava u nyimela miringo ya yinyingi. (Yoh. 15:20) Miringo leyi yi ta ta hi tindlela ta tinyingi. Swi nga yendleka u langutana ni ku kanetiwa hi vandjangu wa wena. (Mat. 10:36) Swi nga yendleka u poyiliwa hi vakolega va wena va xikola, lava u tirhaka na vona kumbe vanghanu va wena va khale. Minkama hinkwayu khumbuka marito ya Yesu lawa ma nga ka Marka 10:29, 30, lawa ma nge: “Ni mi byela ntiyiso: A nga kona lweyi a nga tshika yindlo kumbe vamakwavu va xinuna kumbe vamakwavu va xisati kumbe mamani kumbe papayi kumbe vana kumbe masimu hi mhaka ya mina ni hi mhaka ya mahungu ya ku tsakisa lweyi swoswi a nga ta kala a nga kumi leswi nga phindhiwa ka 100, tiyindlo, vamakwavu va xinuna, vamakwavu va xisati, vamamani, vana, masimu xikan’we ni ku xanisiwa, se ka nkama lowu taka a kuma wutomi la ku kala li nga heli.” Hi mhaka leyo, tama u tikarhata swaku u tshinela kusuhi na Yehovha ni ku hanya hi minawu ya Yena ya ku lulama.

Loko u lava ku tsakamisiwa, vulavula ni mutlhanganisi wa ntlawa wa madoda. A swivutiso leswi sungulaka ka pajina 185, swi ta tirhisiwa hi madoda leswaku ma ku kambela swaku wa faneleka kumbe a wu faneleki ku tsakamisiwa. U nga sungula ku kambisisa swivutiso swoleswo ka djondzo ya wena wexe leyi u yi yendlaka nkama ni nkama.

Nkama lowu u tilunghiselelaka swaku u ya kambeliwa, tinyiki nkama wa ku lerha tindzimana hinkwatu ta Bibele leti nga kombisiwa u tlhela u pimisa hi tona. Swi nga yendleka u lava ku tsala swin’wani leswi u swi lavaka ka buku leli kumbe ka ndhawu yin’wani. Chunseka kuva u tirhisa buku leli ni leswi u nga ta va u swi tsalile nkama lowu u kambeliwaka hi madoda. Loko ku ni swivutiso leswi ku karhatelaka, chunseka ku kombela ku pfuniwa hi lweyi u djondzaka na yena Bibele kumbe u kombela ku pfuniwa hi madoda.

Nkama lowu u kambeliwaka hi madoda a swi zi swi lava u nyikela tinhlamulu ta ku leha kumbe leti karhataka ku ti twisisa. Khumbuka swaku nhlamulu ya ku goma, ya ku kongoma ni ku tirhisa marito ya wena hi swona leswi lavekaka. Ka swivutiso swa ku tala swi nga va swinene kuva u hlamula na u phata tindzimana ta Bibele leti seketelaka nhlamulu ya wena.

Loko madoda ma swi vona swaku a wu se va ni wutivi la ku yenela la tidjondzo ta lisima ta Bibele, ma ta ku pfuna kuva u twisisa ni ku tlhela u tlhamusela Rito la Xikwembu na u tirhisa marito ya wena leswaku ka khambi leli landzelaka u ta kota ku tsakamisiwa.

[Nkongomiso lowu yaka ka madoda: Nkongomiso wa ku kambela lava yaka ku tsakamisiweni wu kumeka ka mapajina 208-212.]