Mabulu Ya Wugamu Ni Lava Va Yaka Ku Tsakamisiweni

Hi ntolovelo vanhu va tsakamisiwa masembleya ni makongresu ya Timboni ta Yehovha. Loko se ku helile dixkursu la ntsakamiso, lweyi a vekaka dixkursu a ta kombela lava yaka ku tsakamisiweni swaku va sekeleka va hlamula swivutiso leswi swa swimbirhi hi rito la ku tlakuka:

1. U tisolile ka swidjoho swa wena, u tlhela u tinyiketela ka Yehovha ni ku pfumela ndlela ya yena ya ku ponisa hi Yesu Kreste?

2. Wa swi twisisa leswaku ku tinyiketela ni ku tsakamisiwa ka wena swi ku yendla Mboni ya Yehovha ni ku lumba nhlengeletanu ya yena?

Loko va hlamula va ku “ina” va ‘swi vula hi nomo wa vona lomu ka vanhu’ swaku va ni lipfumelo ka nkutsulu ni swaku va nyiketele wutomi la vona ka Yehovha. (Rom. 10:9, 10) I swa lisima swaku va pimisa kahle hi swivutiso leswi va tlhela va khongela mayelana na swona na ka ha li nkama, leswaku va ta kota ku hlamula na va tiyiseka ka leswi va swi kholwaka.

U tinyiketelile ka Yehovha hi xikhongelo, u mu tshembisa leswaku u ta tirhela yena ntsena ni ku rhangisa ku yendla ku rhandza ka yena ka wutomi la wena?

Wa tiyiseka leswaku u lunghekile leswaku u tsakamisiwa?

Hi yini mpahla leyi fanelekaka leyi u faneleke u yi yambala loko u tsakamisiwa? (1 Tm. 2:9, 10; Yoh. 15:19; Filp. 1:10)

Hi fanele hi yambala mpahla ‘ya ku hlonipheka’ ni leyi kombisaka leswaku ‘hi ni mimpimiso yayinene’ leswaku hi kombisa leswaku ‘hi tinyiketelile ka Xikwembu.’ Se hinkwavu lava yaka ku tsakamisiweni a va fanelanga va yambala mpahla ya ku hlambela hi yona, ya ku vonekela kumbe leyi siyaka muzimbha handle, kumbe mpahla leyi nga tsaleteliwa kumbe leyi nga ni madezenyu. Va fanele va yambala mpahla ya ku hlonipheka, ya ku basa leyi fambisanaka ni xiyendlakalu lexi xa lisima.

I mpsini leswi munhu a kalaka a nga fanelanga a swi yendla loko a tsakamisiwa? (Luk. 3:21, 22)

Ntsakamiso wa Yesu wu tirha tanihi xikombiso ka ntsakamiso wa Vakreste namuntlha. Yena a a swi twisisa swaku ntsakamiso i xiyenge xa lisima hintamu. A swi kombisile hi leswi a a swi pimisa ni leswi a a swi yendla. Hi mhaka leyo, ndhawu ya ntsakamiso a yi fanelanga yi tirhiseliwa ku hlambeta kumbe ku tlangela kona, leswi a swi ta kombisa swaku a hi xi hloniphi xiyendlakalu lexi xa lisima. A swi nga ta va swi li swinene kuva loko munhu se a tsakamisiwile a sungula ku txinatxina kumbe ku tlulatlula hi ku tsaka kumbe swilo swin’wani. Hambileswi ku tsakamisiwa ku nga xiyendlakalu xa ku tsaka, hi fanele hi tsaka hi ndlela leyi fanelekaka.

Ku tlhangana ni vamakwerhu abandleni swi ta ku pfunisa ku yini ku tama u hanya hi ku landza ku tinyiketela ka wena ka Yehovha?

Loko se u tsakamisiwile, hi mhaka muni swi li swa lisima ku tama u va ni xiyimisu xa djondzo ya wena ya Bibele ni ku hlanganyela nkama ni nkama ka ntirho wa ku chumayela?

NKONGOMISO LOWU YAKA KA MADODA

Loko muchumayeli lweyi a kalaka a nga tsakamisiwanga a tivisa swaku yena a lava ku tsakamisiwa, va fanele va mu kutxa swaku a swi lerha kahle “Swivutiso Leswi Yaka ka Lava Lavaka Ku Tsakamisiwa” leswi kumekaka ka mapajina 185-207 ya buku loleli. A fanele a kombeliwa swaku a lerha “Mhaka Leyi Tsaleliwaka Muchumayeli wa Ku Kala A Nga Tsakamisiwanga” ku sukela ka pajina 182, hikusa ka ndhawu leyi ku tlhamuseliwa swaku i mpsini leswi a nga swi yendlaka swaku a tilunghiselela swaku madoda ma ta kota ku mu kambela. Hilani swi nga tlhamuseliwa hi kona ka mapajina lawa, a nga ha tsala leswi a swi lavaka ka buku leli kumbe ka ndhawu yin’wanyani swaku a swi tirhisa nkama lowu a kambeliwaka. Kambe a swi lavi swaku a rhanga hi ku ensayara ni munhu mun’wani swivutiso leswi kumekaka ka buku leli na a nge se rhanga hi ku tlhangana ni madoda.

Lweyi a lavaka ku tsakamisiwa a fanele a vulavula ni mutlhanganisi wa ntlawa wa madoda. Naswona loko se a lerhile “Swivutiso Leswi Yaka ka Lava Lavaka Ku Tsakamisiwa”, a mutlhanganisi wa ntlawa wa madoda a ta mu vutisa swaku se a khongelile a tinyiketela ka Yehovha a mu tshembisa swaku a lava ku yendla ku rhandza ka yena ke. Loko se a xi yendlile xikhongelo lexo, mutlhanganisi wa ntlawa wa madoda a ta kombela swaku madoda mambirhi ma kambisisa na yena “Swivutiso Leswi Yaka ka Lava Lavaka Ku Tsakamisiwa.” Xiyenge xin’wani ni xin’wani ka leswi swimbirhi, xi fanele xi yendliwa hi madoda ya ku hambana. Lweyi a lavaka ku tsakamisiwa a nga ha kambeliwa hambiloko siku la asembleya kumbe la kongresu li nge se tivisiwa.

Xiyenge xin’wani ni xin’wani ka leswi swimbirhi xi nga yendliwa hi nkama wa kolomuyani ka wora lin’we hambileswi swi kalaka swi nga hoxanga ku heta nkama wa ku tlula wora lin’we loko swi boha. Ka xiyenge xin’wani ni xin’wani ku fanele ku sunguliwa ku tlhela ku pfaliwa mabulu hi xikhongelo. Madoda a ma fanelanga ma kambela munhu hi ku hantlisa. Na yena muchumayeli lweyi a kalaka a nge se tsakamisiwa a nga fanelanga a va ni magugu kumbe a hantlisela loko a hlamula. Madoda lawa ma nga nyikiwa ntirho wa ku kambela munhu ma fanele ma rhangisa ntirho lowu hambiloko ma li ni mintirho yin’wani.

Hi ntolovelo swa yampsa swaku muchumayeli mun’wani ni mun’wani a kambeliwa na a li yexe, na va nga li ntlawa. Loko madoda ma bula na yena na a li yexe, ma ta swi kota ku swi twisisa kahle leswaku ndlela leyi a hlamulaka hi yona ya swi kombisa swaku wa faneleka ku tsakamisiwa ni leswaku wa ti twisisa tidjondzo ta ntiyiso, naswona swi yendla leswaku munhu lweyi a lavaka ku tsakamisiwa a chunseka ku hlamula loko a vutisiwa na a li yexe. Nuna na nsati va nga ha kambeliwa hi nkama wun’we.

Loko doda li kambela makwerhu wa xisati swi fanele swi yendliwa ka ndhawu leyi nga pfuleka leyi vanhu van’wani va kotaka ku va vona, kambe a va fanelanga va twa leswi va swi vulavulaka. Loko swi laveka swaku ku va ni munhu mun’wani, a fanele a va doda kumbe mupfunisi wa bandla, hi ku ya hi xiyenge lexi nga ta kambeliwaka, hi ku ya hi leswi li swi tlhamuselaka paragrafu leli landzelaka.

Loko ku li ni madoda yamatsongo ka bandla, vapfunisi va bandla lava nga ni wuswikoti naswona va swi kombisaka kahle swaku va ni wutlharhi ni ku twisisa, va nga kambela munhu “Xiyenge 1: Tidjondzo Ta Vakreste.” I madoda ntsena lawa ma faneleke ma kambela “Xiyenge 2: Mahanyelo Ya Vakreste.” Loko bandla li nga na madoda ya ku yenela kumbe vapfunisi va bandla lava va fanelekaka, swi nga lava ku vulavuliwa ni mudjikelezi wa sirkwitu ku vona swaku a ku na bandla la le kusuhi leli nga swi kotaka ku pfuna.

Loko swi ku lweyi a lavaka ku tsakamisiwa wa ha li mutsongo, vapsali va yena lava nga Vakreste (kumbe mun’we wa vona) va fanele va li kona nkama lowu a kambeliwaka. Loko vapsali lava nga Vakreste (kumbe mun’we wa vona) swi nga koteki swaku va va kona, ka xiyenge xin’wani ni xin’wani lexi nga ta kambisisiwa ku fanele ku va ni madoda mambirhi (kumbe doda lin’we ni mupfunisi wa bandla) hi ku ya hi xiyenge lexi kambeliwaka hi nkama wolowo.

Madoda ma fanele ma tiyiseka swaku munhu lweyi a lavaka ku tsakamisiwa a ni wutivi la ku yenela la tidjondzo ta lisima ta Bibele. Naswona ma fanele ma tiyiseka swaku wa wu nyika lisima ntiyiso ni swaku wa yi hlonipha nhlengeletanu ya Yehovha. Loko n’wana yelweyo a nga ti twisisi tidjondzo ta lisima ta Bibele, madoda ma ta yendla malulamiselo ya leswaku a pfuniwa leswaku ka khambi lin’wani swi koteka swaku a tsakamisiwa. Swi nga yendleka van’wanyani va lava nkama leswaku va kombisa swaku va li twisisa kahle lisima la ku va kona ka ntirho wa ku chumayela ni ku yingisa nkongomiso lowu taka hi ka nhlengeletanu. Madoda ma fanele ma wu tirhisa hi wutlharhi nkama lowu ma kambelaka munhu ka xiyenge xin’wani ni xin’wani lexi tekaka wora kumbe ku tlula, leswaku ma swi twisisa hi ku helela swaku munhu a lunghekile swaku a tsakamisiwa kumbe nada. Hambileswi swivutiso swin’wani swi nga ta teka nkama wa wunyingi na swi kambeliwa, kasi swin’wani swi teka nkama wawutsongo, hinkwaswu swi fanele swi yendliwa.

Madoda lawa ma nga langiwa swaku ma kambela munhu lweyi, loko se a kambeliwile xiyenge xa wumbirhi, ma ta tlhangana na yena swaku ma mu byela swaku wa faneleka kumbe a nga faneleki swaku a tsakamisiwa. Madoda ma fanele ma pimisa hi leswi a nga tshamisa xiswona, wuswikoti la yena la ku twisisa minchumu ni swiyimu swin’wani swa yena. Xa lisima hintamu i kuva ma vona swaku munhu lweyi wa mu rhandza Yehovha naswona a yi twisisile mintiyiso ya lisima ya Bibele. Loko hi va pfuna hi ndlela ya lirhandzu lava yaka ku tsakamisiweni va ta swi kota ku hetisisa ntirho wa lisima lowu hi nga na wona, ku nga ku chumayela mahungu ya ku tsakisa.

Loko swiyenge hinkwaswu se swi kambeliwile, doda lin’we kumbe mambirhi lawa ma nga kambela muchumayeli lweyi, ma ta tlhangana na yena swaku ma mu byela swaku wa faneleka kumbe a nga faneleki swaku a tsakamisiwa. Loko munhu lweyo a faneleka, madoda ma ta kambisisa na yena xiyenge lexi nge: “Mabulu Ya Wugamu Ni Lava Va Yaka Ku Tsakamisiweni” lexi kumekaka ka mapajina 206-207. Loko munhu lweyi a nge se heta ku djondza buku leli nge: Tikhorisi Hi Wutomi La Ku Kala Li Heli, madoda ma fanele ma mu kutxa kuva a li hetisa loko se a tsakamisiwile. Madoda ma ta byela munhu lweyi a yaka ku tsakamisiweni swaku siku leli a nga ta tsakamisiwa hi lona li ta tsaliwa ka cartão la yena la Registo De Publicador De Congregação. Khumbukisa munhu yelweyo swaku madoda ma tsala rungula la muchumayeli mun’wani ni mun’wani ka cartão la yena leswaku nhlengeletanu yi ta swi kota ku wu kongomisa kahle ntirho wa Timboni ta Yehovha amisaveni hikwayu, naswona ma tsala rungula leli leswaku swi ta koteka swaku munhu yelweyo a yendla mintirho ya Wukreste a tlhela a pfuniwa swaku a tiyisa wunghanu la yena na Yehovha. Madoda ma tlhela ma khumbukisa vachumayeli va nyuwani swaku ma hlayisa rungula la muchumayeli mun’wani ni mun’wani ka Leswi swi fambisana ni Minawu ya Hina ya Xihundla aMisaveni Hinkwayu ka Matirhiselo Ya Mavito ni Maenderesu ya Munhu lawa ma kumekaka ka jw.org. Hi ntolovelo a ntlhanganu lowu a wu fanelanga wu hundza 10 minutu.

Loko se ku hundze lembe na muchumayeli a tsakamisiwile, madoda mambirhi ma fanele ma mu yendzela swaku ma mu tiyisa ma tlhela ma mu byela swin’wani leswi nga mu pfunaka. Lin’we la madoda lawa ku fanele ku li mulanguteli wa ntlawa wa muchumayeli yelweyo. Loko swi ku i n’wana, vapsali va yena (kumbe mun’we wa vona) va fanele va va kona. Ntlhanganu lowu wu fanele wu tsakisa wu tlhela wu tiyisa swinene. Madoda ma ta kambela swaku i yini leswi muchumayeli se a nga swi yampsisa ndzhaku ka ku se a tsakamisiwile, ma tlhela ma mu byela swin’wani leswi swi nga mu pfunaka swaku a tama a va ni djondzo ya yena yexe, a lerha Bibele, a va ni djondzo ya ndjangu vhiki ni vhiki, a va kona mintlhanganwini nkama ni nkama ni ku tlhela a hlamula, ku patsa ni ku va kona ka ntirho wa nsimu. (Efe. 5:15, 16) Loko swi ku a nge se heta ku djondza buku leli nge: Tikhorisi Hi Wutomi La Ku Kala Li Nga Heli, madoda ma fanele ma lava tindlela swaku ku va ni munhu lweyi a mu djondzelaka. Madoda ma fanele ma mu komba lirhandzu ma tlhela ma mu khensa munhu yelweyo. Hi ntolovelo, swa yenela kuva ma mu nyika switsundzuxu ka mhaka yin’we kumbe timbirhi ntsena.