KU SUNGULA MABULU
DJONDZO 4
Tiveki Hansi
Bibele li li: “Tivekeni hansi mi teka van’wani va li va lisima ku tlula n’wina”. — Filp. 2:3.
I Mpsini Leswi Pawulo A Nga Swi Yendla?
1. Sixtira VHIDIYO, kumbe u lerha Mintirho 26:2, 3. U gama u hlamula swivutiso leswi landzelaka:
Pawulo a swi kombisise ku yini swaku a a tiveka hansi nkama na a vulavula na Hosi Agripa?
Pawulo a swi kombisise ku yini swaku a a nga tibyeli kambe a a vulavula hi Yehovha ni Matsalwa? — Vona Mintirho 26:22.
Hi Djondza Yini Ka Leswi Pawulo A Nga Swi Yendla?
2. Swa vevuka kuva vanhu va yamukela leswi hi swi chumayelaka loko hi vulavula hi ku tiveka hansi hi tlhela hi va ni xihlonipho.
Tekelela Xikombiso Xa Pawulo
3. Vulavula hi xihlonipho. U nga kombisi swaku wena u tiva hintamu ku tlula vanhu lava u bulaka na vona kumbe u va yendla va titwa ingi vona a va tivi nchumu.
4. Va pfuni va twisisa swaku leswi u swi vulavulaka swi ta hi ka Bibele. Bibele li ni marito lawa ma nga khumbaka timbilu ta vanhu. Loko hi tirhisa Bibele hi va pfuna swaku va va ni lipfumelo la ntiyiso.
5. Vulavula hi ku rhula. U nga zami ku sindzisa lweyi u bulaka na yena swaku a kholwa swaku leswi u swi vulaka i ntiyiso. Phela a hi lavi ku phikizana ni vanhu. Tama u kombisa swaku u tiveka hansi hi ku tama u rhula u tlhela u suka u famba loko lweyi u bulaka na yena a lava ku phikizana na wena. (Swiv. 17:14; Tit. 3:2) Phela loko hi vulavula hi ndlela ya ku rhula swi nga yendleka munhu lweyi hi bulaka na yena a tsakela ku tlhela a bula na hina ka nkama lowu taka.